Mahabharata · Chapter 1.147

tataḥ srastottarapaṭaḥ saprasvedaḥ savepathuḥ /
viveśādhiratho raṅgaṃ yaṣṭiprāṇo hvayanniva //

tamālokya dhanustyaktvā pitṛgauravayantritaḥ /
karṇo'bhiṣekārdraśirāḥ śirasā samavandata //

tataḥ pādāvavacchādya paṭāntena sasambhramaḥ /
putreti paripūrṇārthamabravīdrathasārathim //

pariṣvajya ca tasyātha mūrdhānaṃ snehaviklavaḥ /
aṅgarājyābhiṣekārdramaśrubhiḥ siṣice punaḥ //

taṃ dṛṣṭvā sūtaputro'yamiti sañcintya pāṇḍavaḥ /
bhīmasenastadā vākyamabravītprahasanniva //

na tvamarhasi pārthena sūtaputra raṇe vadham /
kulasya sadṛśastūrṇaṃ pratodo gṛhyatāṃ tvayā //

aṅgarājyaṃ ca nārhastvamupabhoktuṃ narādhama /
śvā hutāśasamīpasthaṃ puroḍāśamivādhvare //
vaiśampāyana uvāca /

evamuktastataḥ karṇaḥ kiñcitprasphuritādharaḥ /
gaganasthaṃ viniḥśvasya divākaramudaikṣata //

tato duryodhanaḥ kopādutpapāta mahābalaḥ /
bhrātṛpadmavanāttasmānmadotkaṭa iva dvipaḥ //

so'bravīdbhīmakarmāṇaṃ bhīmasenamavasthitam /
vṛkodara na yuktaṃ te vacanaṃ vaktumīdṛśam //

kṣatriyāṇāṃ balaṃ jyaṣṭhaṃ yoktavyaṃ kṣatrabandhunā /
śūrāṇāṃ ca nadīnāṃ ca prabhavo durvibhāvanaḥ //

salilādutthito vahniryena vyāptaṃ carācaram /
dadhīcasyāsthito vajraṃ kṛtaṃ dānavasūdanam //

āgneyaḥ kṛttikāputro raudro gāṅgeya ityapi /
śrūyate bhagavāndevaḥ sarvaguhyamayo guhaḥ //

kṣatriyebhyaśca ye jātā brāhmaṇāste ca te śrutāḥ /
viśvāmitraprabhṛtayaḥ prāptā brahmatvamavyayam //

ācāryaḥ kalaśājjāto droṇaḥ śastrabhṛtāṃ varaḥ /
gautamasyānvavāye ca śarastambācca gautamaḥ //

bhavatāṃ ca yathā janma tadapyāgamitaṃ mayā / sakuṇḍalaṃ sakavacaṃ sarvalakṣaṇalakṣitam /
kathamādityasadṛśaṃ mṛgī vyāghraṃ janiṣyati //

pṛthivīrājyamarho'yaṃ nāṅgarājyaṃ nareśvaraḥ /
anena bāhuvīryeṇa mayā cājñānuvartinā //

yasya vā manujasyedaṃ na kṣāntaṃ madviceṣṭitam /
rathamāruhya padbhyāṃ sa vināmayatu kārmukam //

tataḥ sarvasya raṅgasya hāhākāro mahānabhūt /
sādhuvādānusambaddhaḥ sūryaścāstamupāgamat //

tato duryodhanaḥ karṇamālambyāgrakare nṛpaḥ /
dīpikābhiḥ kṛtālokastasmādraṅgādviniryayau //

pāṇḍavāśca sahadroṇāḥ sakṛpāśca viśāmpate /
bhīṣmeṇa sahitāḥ sarve yayuḥ svaṃ svaṃ niveśanam //

arjuneti janaḥ kaścitkaścitkarṇeti bhārata /
kaścidduryodhanetyevaṃ bruvantaḥ prasthitāstadā //

kuntyāśca pratyabhijñāya divyalakṣaṇasūcitam /
putramaṅgeśvaraṃ snehācchannā prītirajāyata //

duryodhanasyāpi tadā karṇamāsādya pārthiva /
bhayamarjunasañjātaṃ kṣipramantaradhīyata //

sa cāpi vīraḥ kṛtaśastraniśramaḥ pareṇa sāmnā'bhyavadatsuyodhanam /
yudhiṣṭhirasyāpyabhavattadā mati- rna karṇatulyo'sti dhanurdharaḥ kṣitau //