Mahabharata · Chapter 1.143

tato dhanañjayaṃ droṇaḥ smayamāno'bhyabhāṣata /
tvayedānīṃ prahartavyametallakṣyaṃ vilokyatām //

madvākyasamakālaṃ te moktavyo'tra bhaveccharaḥ /
vitatya kārmukaṃ putra tiṣṭha tāvanmuhūrtakam //

evamuktaḥ savyasācī maṇḍalīkṛtakārmukaḥ /
tasthau bhāsaṃ samuddiśya guruvākyapracoditaḥ //

muhūrtādiva taṃ droṇastathaiva samabhāṣata /
paśyasyenaṃ sthitaṃ bhāsaṃ drumaṃ māmapi cārjuna //

paśyāmyekaṃ bhāsamiti droṇaṃ pārtho'bhyabhāṣata /
na tu vṛkṣaṃ bhavantaṃ vā paśyāmīti ca bhārata //

tataḥ prītamanā droṇo muhūrtādiva taṃ punaḥ /
pratyabhāṣata durdharṣaḥ pāṇḍavānāṃ mahāratham //

bhāsaṃ paśyasi yadyenaṃ tathā brūhi punarvacaḥ /
śiraḥ paśyāmi bhāsasya na gātramiti so'bravīt //

arjunenaivamuktastu droṇo hṛṣṭatanūruhaḥ /
muñcasvetyabravītpārthaṃ sa mumocāvicārayan //

tatastasya gasthasya kṣureṇa niśitena ca /
śira utkṛtya tarasā pātayāmāsa pāṇḍavaḥ //

tasminkarmaṇi saṃsiddhe paryaṣvajata pāṇḍavam /
mene ca drupadaṃ saṅkhye sānubandhaṃ parājitam //

kasya cittvatha kālasya saśiṣyo'ṅgirasāṃ varaḥ /
jagāma gaṅgāmabhito majjituṃ bharatarṣabha //

avagāḍhamatho droṇaṃ salile salilecaraḥ /
grāho jagrāha balavāñjaṅghānte kālacoditaḥ //

sa samartho'pi mokṣāya śiṣyānsarvānacodayat /
grāhaṃ hatvā tu mokṣyadhvaṃ māmiti tvarayanniva //

tadvākyasamakālaṃ tu bībhatsurniśitaiḥ śaraiḥ /
avāryaiḥ pañcabhirgrāhaṃ magnamambhasyatāḍayat //

itare tvatha sammūḍhāstatrapatra prapedire /
taṃ tu dṛṣṭvā kriyopetaṃ droṇo'manyata pāṇḍavam //

viśiṣṭaṃ sarvaśiṣyebhyaḥ prītimāṃścābhavattadā /
sa pārthabāṇairbahudhā khaṇḍaśaḥ parikalpitaḥ //

grāhaḥ pañcatvamāpede jaṅghāṃ tyaktvā mahātmanaḥ /
sarvakriyābhyanujñānāttathā śiṣyānsamānayat //

duryodhanaṃ citrasenaṃ duḥśāsanaviviṃśatī /
arjunaṃ ca samānīya hyaśvatthāmānameva ca //

śiśukaṃ mṛṇmayaṃ kṛtvā droṇo gaṅgājale tataḥ /
śiṣyāṇāṃ paśyatāṃ caiva kṣipati sma mahābhujaḥ //

cakṣuṣī vāsasā caiva baddhvā prādāccharāsanam /
śiśukaṃ viddhyatemaṃ vai jalasthaṃ baddhacakṣuṣaḥ //

tatkṣaṇenaiva bībhatsurāvāpairdaśabhirvaśī /
pañcakairanuvivyādha magnaṃ śiśukamambhasi //

tāḥ sa dṛṣṭvā kriyāḥ sarvā droṇo'manyata pāṇḍavam / viśiṣṭaṃ sarvaśiṣyebhyaḥ prītimāṃścābhavattadā /
tathābravīnmahātmānaṃ bhāradvājo mahāratham //

gṛhāṇedaṃ mahābāho viśiṣṭamatidurdharam /
astraṃ brahmaśiro nāma saprayoganivartanam //

na ca te mānuṣeṣvetatprayoktavyaṃ kathañcana /
jagadvinirdahedetadalpatejasi pātitam //

asāmānyamidaṃ tāta lokeṣvastraṃ nigadyate /
taddhārayethāḥ prayataḥ śṛṇu cedaṃ vaco mama //

bādhetāmānuṣaḥ śatruryadi tvāṃ vīra kaścana /
tadvadhāya prayuñjīthāstadastramidamāhave //

tatheti sampratiśrutya bībhatsuḥ sa kṛtāñjaliḥ / jagrāha paramāstraṃ tadāha cainaṃ punarguruḥ /
bhavitā tvatsamo nānyaḥ pumām̐lloke dhanurdharaḥ //