Mahabharata · Chapter 1.132

jāte balavatāṃ śreṣṭhe pāṇḍuścintāparo'bhavat /
kathamanyo mama suto loke śreṣṭho bhavediti //

daive puruṣakāre ca loko'yaṃ sampratiṣṭhitaḥ /
tatra daivaṃ tu vidhinā kālayuktena labhyate //

indro hi rājā devānāṃ pradhāna iti naḥ śrutam /
aprameyabalotsāho vīryavānamitadyutiḥ //

taṃ toṣayitvā tapasā putraṃ lapsye mahābalam /
yaṃ dāsyati sa me putraṃ sa vīrayānbhaviṣyati //

amānuṣānmānuṣāṃśca sangrāme sa haniṣyati /
karmaṇā manasā vācā tasmāttapsye mahattapaḥ //

tataḥ pāṇḍurmahārājo mantrayitvā maharṣibhiḥ /
dideśa kuntyāḥ kauravyo vrataṃ sāṃvatsaraṃ śubham //

ātmanā ca mahābāhurekapādasthito'bhavat /
ugraṃ sa tapa āsthāya parameṇa samādhinā //

ārirādhayiṣurdevaṃ tridaśānāṃ tamīśvaram /
sūryeṇa saha dharmātmā paryatapyata bhārata //

taṃ tu kālena mahatā vāsavaḥ pratyapadyata /
śakra uvāca /
putraṃ tava pradāsyāmi triṣu lokeṣu viśrutam //

brāhmaṇānāṃ gavāṃ caiva suhṛdāṃ cārthasādhakam /
durhṛdāṃ śokajananaṃ sarvabāndhavanandanam //

sutaṃ te'gryaṃ pradāsyāmi sarvāmitravināśanam /
ityuktaḥ kāraivo rājā vāsavena mahātmanā //

uvāca kuntīṃ dharmātmā devarājavacaḥ smaran /
udarkastava kalyāṇi tuṣṭo devagaṇeśvaraḥ //

dātumicchati te putraṃ yathā sankalpitaṃ tvayā /
atimānuṣakarmāṇaṃ yaśasvinamarindamam //

nītimantaṃ mahātmānamādityasamatejasam /
durādharṣaṃ kriyāvantamatīvādbhutadarśanam //

putraṃ janaya suśroṇi dhāma kṣatriyatejasām /
labdhaḥ prasādo devendrāttamāhvaya śucismite //
vaiśampāyana uvāca /

evamuktā tataḥ śakramājuhāva yaśasvinī /
athājagāma devendro janayāmāsa cārjunam //

uttarābhyāṃ tu pūrvābhyāṃ phalgunībhyāṃ tato divā /
jātastu phālgune māsi tenāsau phalgunaḥsmṛtaḥ //

jātamātre kumāre tu sarvabhūtapraharṣiṇī / sūtake vartamānāṃ tāṃ vāguvācāśarīriṇī /
mahāgambhīranirghoṣā nabho nādayatī tadā //

śṛṇvatāṃ sarvabhūtānāṃ teṣāṃ cāśramavāsinām /
kuntīmābhāṣya vispaṣṭamuvācedaṃ śucismitām //

kārtavīryasamaḥ kunti śivatulyaparākramaḥ /
eṣa śakra ivājayyo yaśaste prathayiṣyati //

adityā viṣṇunā prītiryathā'bhūdabhivardhitā /
tathā viṣṇusamaḥ prītiṃ vardhayiṣyati te'rjunaḥ //

eṣa madrānvaśe kṛtvā kurūṃśca saha somakaiḥ /
cedikāśikarūṣāṃśca kurulakṣmīṃ vahiṣyati //

etasya bhujavīryeṇa khāṇḍave havyavāhanaḥ /
medasā sarvabhūtānāṃ tṛptiṃ yāsyati vai parām //

grāmaṇīśca mahīpālāneṣa jitvā mahābalaḥ /
bhrātṛbhiḥ sahito vīrastrīnmedhānāhariṣyati //

jāmadagnyasamaḥ kunti viṣṇutulyaparākramaḥ /
eṣa vīryavatāṃ śreṣṭho bhaviṣyati mahāyaśāḥ //

eṣa yuddhe mahādevaṃ toṣayiṣyati śaṅkaram /
astraṃ pāśupataṃ nāma tasmāttuṣṭādavāpsyati //

nivātakavacā nāma daityā vibudhavidviṣaḥ /
śakrājñayā mahābāhustānvadhiṣyati te sutaḥ //

tathā divyāni cāstrāṇi nikhilenāhariṣyati /
vipranaṣṭāṃ śriyaṃ cāyamāhartā puruṣarṣabhaḥ //

etāmatyadbhutāṃ vācaṃ kuntī śuśrāva sūtake /
vācamuccaritāmuccaistāṃ niśamya tapasvinām //

babhūva pamo harṣaḥ śataśṛṅganivāsinām /
tathā devamaharṣīṇāṃ sendrāṇāṃ ca divaukasām //

ākāśe dundubhīnāṃ ca babhūva tumulaḥ svanaḥ /
udatiṣṭhanmahāghoraḥ puṣpavṛṣṭibhirāvṛtaḥ //

samavetya ca devānāṃ gaṇāḥ pārthamapūjayan / kādraveyā vainateyā gandharvāpsarasastathā /
prajānāṃ patayaḥ sarve sapta caiva maharṣayaḥ //

bharadvājaḥ khasyapo gautamaśca viśvāmitro jamadagnirvasiṣṭhaḥ /
yaścodito bhāskare'bhūtpranaṣṭe so'pyatrātrirbhagavānājagāma //

marīciraṅgirāścaiva pulastyaḥ pulahaḥ kratuḥ /
dakṣaḥ prajāpatiścaiva gandharvāpsarasastathā //

divyamālyāmbaradharāḥ sarvālaṅkārabhūṣitāḥ /
upagāyanti bībhatsuṃ nṛtyante'psarasāṃ gaṇāḥ //

tathā maharṣayaścāpi jepustatra samantataḥ /
gandharvaiḥ sahitaḥ śrīmānprāgāyata ca tumburuḥ //

bhīmasenograsenau ca ūrṇāyuranaghastathā /
gopatirdhṛtarāṣṭraśca sūryavarcāstathāṣṭamaḥ //

yugapastṛṇapaḥ kārṣṇirnandiścitrarathastathā /
trayodaśaḥ śāliśirāḥ parjanyaśca caturdaśaḥ //

kaliḥ pañcadaśaścaiva nāradaścātra ṣoḍaśaḥ /
ṛtvā bṛhattvā bṛhakaḥ karālaśca mahāmanāḥ //

brahmacārī bahuguṇaḥ suvarṇaśceti viśrutaḥ /
viśvāvasurbhumanyuśca sucandraśca śarustathā //

gītamādhuryasampannau vikhyātau ca hahāhuhū /
ityete devagandharvā jagmustatra narādhipa //

tathaivāpsaraso hṛṣṭāḥ sarvālaṅkārabhūṣitāḥ /
nanṛturvai mahābhāgā jaguścāyatalocanāḥ //

anūcānā'navadyā ca guṇamukhyā guṇāvarā /
adrikā ca tathā somā miśrakeśī tvalambuṣā //

marīciḥ śucikā caiva vidyutparṇā tilottamā /
ambikā lakṣaṇā kṣemā devī rambhā manoramā //

asitā ca subāhuśca supriyā ca vapustathā /
puṇḍarīkā sugandhā ca surasā ca pramāthinī //

kāmyā śāradvatī caiva nanṛtustatra sanghaśaḥ /
menakā sahajanyā ca karṇikā puñjikasthalā //

ṛtusthalā ghṛtācī ca viśvācī pūrvacittyapi /
umloceti ca vikhyātā pramloceti ca tā daśa //

urvaśyekādaśī tāsāṃ jaguścāyatalocanāḥ /
dhātā'ryamā ca mitraśca varuṇoṃ'śo bhagastathā //

indro vivasvānpūṣā ca parjanyo daśamaḥ smṛtaḥ /
tatastvaṣṭā tato viṣṇurajaghanyo jaghanyajaḥ //

ityete dvādaśādityā jvalantaḥ sūryavarcasaḥ //

mṛgavyādhaśca sarpaśca nirṛtiśca mahāyaśāḥ /
ajaikapādahirbudhnyaḥ pinākī ca parantapa //

dahano'theśvaraścaiva kapālī ca viśāmpate /
sthāṇurbhagaśca bhagavānrudrāstatrāvatasthire //

aśvinau vasavaścāṣṭau marutaśca mahābalāḥ /
viśvedevāstathā sādhyāstatrāsanparitaḥ sthitāḥ //

karkoṭako'tha sarpaśca vāsukiśca bhujaṅgamaḥ /
kacchapaścātha kuṇḍaśca takṣakaśca mahoragaḥ //

āyayustapasā yuktā mahākrodhā mahābalāḥ /
ete cānye ca bahavastatra nāgā vyavasthitāḥ //

tārkṣyaścāriṣṭanemiśca garuḍaścāsitadhvajaḥ /
aruṇaścāruṇiścaiva vainateyā vyavasthitāḥ //

tāṃśca devagaṇānsarvāṃstapaḥsiddhā maharṣayaḥ /
vimānagiryagragatāndadṛśurnetare janāḥ //

taddṛṣṭvā mahadāścaryaṃ vismitā munisattamāḥ /
adhikāṃ sma tato vṛttimavartanpāṇḍavaṃ prati //

pāṇḍuḥ prītena manasā devatādīnapūjayat /
pāṇḍunā pūjitā devāḥ pratyūcurnarasattamam //

prādurbūto hyayaṃ dharmo devatānāṃ prasādataḥ /
mātariśvā hyayaṃ bhīmo balavānarimardanaḥ //

sākṣādindraḥ svayaṃ jātaḥ prasādācca śatakratoḥ /
pitṛtvāddevatānāṃ hi nāsti puṇyatarastvayā //

pitṝṇāmṛṇanirmuktaḥ svargaṃ prāpsyasi puṇyabhāk /
ityuktvā devatāḥ sarvā viprajagmuryathāgatam //

pāṇḍustu punarevaināṃ putralobhānmahāyaśāḥ /
prādiśaddarśanīyārthī kuntī tvenamathābravīt //

nātaścaturthaṃ prasavamāpastvapi vadantyuta /
ataḥparaṃ svairiṇī syādbandhakī pañcame bhavet //

sa tvaṃ vidvandharmamimamadhigamya kathaṃ nu mām /
apatyārthaṃ samutkramya pramādādiva bhāṣase //