Mahabharata · Chapter 1.127

evamuktā mahārāja kuntī pāṇḍumabhāṣata /
kurūṇāmṛṣabhaṃ vīraṃ tadā bhūmipatiṃ patim //
kuntyuvāca /

na māmarhasi dharmajña vaktumevaṃ kathañcana /
dharmapatnīmabhiratāṃ tvayi rājīvalocane //

tvameva tu mahābāho mayyapatyāni bhārata /
vīra vīryopapannāni dharmato janayiṣyasi //

svargaṃ manujaśārdūla gaccheyaṃ sahitā tvayā /
apatyāya ca māṃ gaccha tvameva kurunandana //

na hyahaṃ manasāpyanyaṃ gaccheyaṃ tvadṛte naram /
tvattaḥ prati viśiṣṭaśca ko'nyo'sti bhuvi mānavaḥ //

imāṃ ca tāvaddharmātmanpaurāṇīṃ śṛṇu me kathām /
pariśrutāṃ viśālākṣa kīrtayiṣyāmi yāmaham //

vyuṣaitāśva iti khyāto babhūva kila pārthivaḥ /
purā paramadharmiṣṭhaḥ pūrorvaṃśavivardhanaḥ //

tasmiṃśca yajamāne vai dharmātmani mahābhuje /
upāgamaṃstato devāḥ sendrā devarṣibhiḥ saha //

amādyadindraḥ somena dakṣiṇābhirdvijātayaḥ /
vyuṣitāśvasya rājarṣestato yajñe mahātmanaḥ //

devā brahmarṣayaścaiva cakruḥ karma svayaṃ tadā /
vyuṣitāśvastato rājannati martyānvyarocata //

sarvabhūtānprati yathā tapanaḥ śiśirātyaye /
sa vijitya gṛhītvā ca nṛpatīnrājasattamaḥ //

prācyānudicyānpāścātyāndākṣiṇātyānakālayat /
aśvamedhe mahāyajñe vyuṣitāśvaḥ pratāpavān //

babhūva sa hi rājendro daśanāgabalānvitaḥ /
apyatra gāthāṃ gāyanti ye purāṇavido janāḥ //

vyuṣitāśve yaśovṛddhe manuṣyendre kurūttama /
vyuṣitāśvaḥ samudrāntāṃ vijityemāṃ vasundharām //

apālayatsarvavarṇānpitā putrānivaurasān /
yajamāno mahāyajñairbrāhmaṇebhyo dhanaṃ dadau //

anantaratnānyādāya sa jahāra mahākratūn /
suṣāva ca bahūnsomānsomasaṃsthāstatāna ca //

āsītkākṣīvatī cāsya bhāryā paramasammatā /
bhadrā nāma manuṣyendra rūpeṇāsadṛśī bhuvi //

kāmayāmāsatustau ca parasparamiti śrutam /
sa tasyāṃ kāmasampanno yakṣmaṇā samapadyata //

tenācireṇa kālena jagāmāstamivāṃśumān /
tasminprete manuṣyendre bhāryā'sya bhṛśaduḥkhitā //

aputrā puruṣavyāghra vilalāpeti naḥ śrutam /
bhadrā paramaduḥkhārtā tannibodha janādhipa //
bhadrovāca /

nārī paramadharmajña sarvā bhartṛvinākṛtā /
patiṃ vinā jīvati yā na sā jīvati duḥkhitā //

patiṃ vinā mṛtaṃ śreyo nāryāḥ kṣatriyapungava //
tvadgatiṃ gantumicchāmi prasīdasvanayasvamām //

tvayā hīnā kṣaṇamapi nāhaṃ jīvitumutsahe /
prasādaṃ kuru me rājannitastūrṇaṃ nayasva mām //

pṛṣṭhato'nugamiṣyāmi sameṣu viṣameṣu ca /
tvāmahaṃ naraśārdūla gacchantamanivartitum //

chāyevānugatā rājansatataṃ vaśavartinī /
bhaviṣyāmi naravyāghra nityaṃ priyahite ratā //

adyaprabhṛti māṃ rājankaṣṭā hṛdayaśoṣaṇāḥ /
ādhayo'bhibhaviṣyanti tvāmṛte puṣkarekṣaṇa //

abhāgyayā mayā nūnaṃ viyuktāḥ sahacāriṇaḥ /
tena me viprayogo'yamupapannastvayā saha //

viprayuktā tu yā patyā muhūrtamapi jīvati /
duḥkhaṃ jīvati sā pāpā narakastheva pārthiva //

saṃyuktā viprayuktāśca pūrvadehe kṛtā mayā /
tadidaṃ karmabhiḥ pāpaiḥ pūrvadeheṣu sañcitam //

duḥkhaṃ māmanusamprāptaṃ rājaṃstvadviprayogajam / adyaprabhṛtyahaṃ rājankuśasaṃstaraśāyinī /
bhaviṣyāmyasukhāviṣṭā tvaddarśanaparāyaṇā //

darśayasva naravyāghra śādhi māmasukhānvitām /
kṛpaṇāṃ cātha karuṇaṃ vilapatnīṃ nareśvara //
kantyuvāca /

evaṃ bahuvidhaṃ tasyāṃ vilapantyāṃ punaḥpunaḥ /
taṃ śavaṃ sampariṣvajya vākkilā'ntarhitā'bravīt //

uttiṣṭha bhadre gaccha tvaṃ dadānīha varaṃ tava /
janayiṣyāmyapatyāni tvayyahaṃ cāruhāsini //

ātmakīye varārohe śayanīye caturdaśīm /
aṣṭamīṃ vā ṛtusnātā saṃviśethā mayā saha //

evamuktā tu sā devī tathā cakre pativratā /
yathoktameva tadvākyaṃ bhadrā putrārthinī tadā //

sā tena suṣuve devī śavena bharatarṣabha /
trīñśālvāṃścaturo madrānsutānbharatasattama //

tathā tvamapi mayyevaṃ manasā bharatarṣabha /
śakto janayituṃ putrāṃstapoyogabalānvitaḥ //