Mahabharata · Chapter 1.123

dhṛtarāṣṭrābhyanujñātaḥ svabāhuvijitaṃ dhanam /
bhīṣmāya satyavatyai ca mātre copajahāra saḥ //

vidurāya ca vai pāṇḍuḥ preṣayāmāsa taddhanam /
suhṛdaścāpi dharmātmā dhanena samatarpayat //

tataḥ satyavatīṃ bhīṣmaṃ kausalyāṃ ca yaśasvinīm /
śubhaiḥ pāṇḍurjitairarthaistoṣayāmāsa bhārata //

nananda mātā kausalyā tamapratimatejasam /
jayantamiva paulomī pariṣvajya narṣabham //

tasya vīrasya vikrāntaiḥ sahasraśatadakṣiṇaiḥ /
aśvamedhaśatairīje dhṛtarāṣṭro mahāmakhaiḥ //

samprayuktastu kuntyā ca mādryā ca bharatarṣabha /
jitatandristadā pāṇḍurbabhūva vanagocaraḥ //

hitvā prāsādanilayaṃ śubhāni śayanāni ca /
araṇyanityaḥ satataṃ babhūva mṛgayāparaḥ //

sa carandakṣiṇaṃ pārśvaṃ ramyaṃ himavato giraḥ /
uvāsa giripṛṣṭheṣu mahāśālavaneṣu ca //

rarāja kuntyā mādryā ca pāṇḍuḥ saha vane caran /
kareṇvoriva madhyasthaḥ śrīmānpaurandaro gajaḥ //

bhārataṃ saha bhāryābhyāṃ khaṅgabāṇadhanurdharam / vicitrakavacaṃ vīraṃ paramāstravidaṃ nṛpam /
devo'yamityamanyanta carantaṃ vanavāsinaḥ //

tasya kāmāṃśca bhogāṃśca narā nityamatandritāḥ /
upajahrurvanānteṣu dhṛtarāṣṭreṇa coditāḥ //

tadāsādya mahāraṇyaṃ mṛgavyālaniṣevitam /
tatra maithunakālasthaṃ dadarśa mṛgayūthapam //

tatastaṃ ca mṛgīṃ caiva rukmapuṅkhaiḥ supatribhiḥ /
nirbibheda śaraistīkṣṇaiḥ pāṇḍuḥ pañcabhirāśugaiḥ //

sa ca rājanmahātejā ṛṣiputrastapodhanaḥ /
bhāryayā saha tejasvī mṛgarūpeṇa saṅgataḥ //

sa saṃyuktastayā mṛgyā mānuṣīṃ vācamīrayan /
kṣaṇena patito bhūmau vilalāpāturo mṛgaḥ //
mṛga uvāca /

kāmamanyuvaśaṃ prāptā buddhyantaragatā api /
varjayanti nṛśaṃsāni pāpeṣvapi ratā narāḥ //

na vidhiṃ grasate prajñā prajñāṃ tu grasate vidhiḥ /
vidhiparyāgatānarthānprajñāvānpratipadyate //

śasvaddharmātmanāṃ mukhye kule jātasya bhārata /
kāmalobhābhibhūtasya kathaṃ te calitā matiḥ //
pāṇḍuruvāca /

śatrūṇāṃ yā vadhe vṛttiḥ sā mṛgāṇāṃ vadhe smṛtā /
rājñāṃ mṛga na māṃ mohāttvaṃ garhayitumarhasi //

acchadmanā'māyayā ca mṛgāṇāṃ vadha iṣyate /
sa eva dharmo rājñāṃ tu taddhi tvaṃ kiṃ nu garhase //

agastyaḥ satramāsīnaścakāra mṛgayāmṛṣiḥ /
āraṇyānsarvadaivatyānmṛgānprokṣya mahāvane //

pramāṇadṛṣṭadharmeṇa kathamasmānvigarhase /
agastyasyābhicāreṇa yuṣmākaṃ vihito vadhaḥ //

na ripūnvai samuddiśya vimuñcanti narāḥ śarān /
randhra eṣāṃ viśeṣeṇa vadhakālaḥ praśasyate //

pramattamapramattaṃ vā vivṛtaṃ ghnanti caujasā /
upāyairvividhaistīkṣṇaiḥ kasmānmṛga vigarhase //
mṛga uvāca /

nāhaṃ ghntaṃ mṛganrājanvigarhe cātmakāraṇāt /
maithunaṃ tu pratīkṣyaṃ me tvayehādyānṛśaṃsyataḥ //

sarvabhūtahite kāle sarvabhūtepsite tathā /
ko hi vidvānmṛgaṃ hanyāccarantaṃ maithunaṃ vane //

asyāṃ mṛgyāṃ ca rājendra harṣānmaithunamācaram /
puruṣārthaphalaṃ kartuṃ tattvayā viphalīkṛtam //

pauravāṇāṃ mahārāja teṣāmakliṣṭakarmaṇām /
vaṃśe jātasya kauravya nānurūpamidaṃ tava //

nṛśaṃsaṃ karma sumahatsarvalokavigarhitam /
asvargyamayaśasyaṃ cāpyadharmiṣṭhaṃ ca bhārata //

strībhogānāṃ viśeṣajñaḥ śāstradharmārthatattvavit /
nārhastvaṃ surasaṅkāśa kartumasvargyamīdṛśam //

tvayā nṛśaṃsakartāraḥ pāpācārāśca mānavāḥ /
nigrāhyāḥ pārthivaśreṣṭha trivargaparivarjitāḥ //

kiṃ kṛtaṃ te naraśreṣṭha māmihānāgasaṃ ghnataḥ /
muniṃ mūlaphalāhāraṃ mṛgaveṣadharaṃ nṛpa //

vasamānamaraṇyeṣu nityaṃ śamaparāyaṇam /
tvayā'haṃ hiṃsito yasmāttasmāttvāmapyanāgasaḥ //

dvayornṛśaṃsakartāramavaśaṃ kāmamohitam /
jīvitāntakaro bhāvo maithune samupaiṣyati //

ahaṃ hi kindamo nāma tapasā bhāvito muniḥ /
vyapatrapanmanuṣyāṇāṃ mṛgyāṃ maithunamācaram //

mṛgo bhatvā mṛgaiḥ sārdhaṃ carāmi gahane vane /
na tu te brahmahatyeyaṃ bhaviṣyatyavijānataḥ //

mṛgarūpadharaṃ hatvā māmevaṃ kāmamohitam /
asya tu tvaṃ phalaṃ mūḍha prāpsyasīdṛśameva hi //

priyayā saha saṃvāsaṃ prāpya kāmavimohitaḥ /
tvamapyasyāmavasthāyāṃ pretalokaṃ gamiṣyasi //

antakāle hi saṃvāsaṃ yayā gantāsi kāntayā / pretarājapuraṃ prāptaṃ sarvabhūtaduratyayam /
bhaktyā matimatāṃ śreṣṭha saiva tvā'nugamiṣyati //

vartamānaḥ sukhe duḥkhaṃ yathā'haṃ prāpitastvayā /
tathā tvāṃ ca sukhaṃ prāptaṃ duḥkhamabhyāgamiṣyati //
vaiśampāyana uvāca /

evamuktvā suduḥkhārto jīvitātsa vyamucyata /
mṛgaḥ pāṇḍuśca duḥkhārtaḥ kṣaṇena samapadyata //