Mahabharata · Chapter 1.122

tataḥ śāntanavo bhīṣmo rājñaḥ pāṇḍoryaśasvinaḥ /
vivāhasyāparasyārthe cakāra matimānmatim //

so'mātyaiḥ sthaviraiḥ sārdhaṃ brāhmaṇaiśca maharṣibhiḥ /
balena caturaṅgeṇa yayau madrapateḥ puram //

tamāgatamabhiśrutya bhīṣmaṃ vāhīkapuṅgavaḥ /
pratyudgamyārcayitvā ca puraṃ prāveśayannṛpaḥ //

dattvā tasyāsanaṃ śubhraṃ pādyamarghyaṃ tathaiva ca /
madhuparkaṃ ca madreśaḥ papracchāgamane'rthitām //

taṃ bhīṣmaḥ pratyuvācedaṃ madrarājaṃ kurūdvahaḥ /
āgataṃ māṃ vijānīhi kanyārthinamarindama //

śrūyate bhavataḥ sādhvī svasā mādrī yaśasvinī /
tāmahaṃ varayiṣyāmi pāṇḍorarthe yaśasvinīm //

yuktarūpo hi sambandhe tvaṃ no rājanvayaṃ tava /
etatsañcintya madreśa gṛhāṇāsmānyathāvidhi //

tamevaṃvādinaṃ bhīṣmaṃ pratyabhāṣata madrapaḥ /
na hi me'nyo varastvattaḥ śreyāniti matirmama //

pūrvaiḥ pravartitaṃ kiñcitkule'sminnṛpasattamaiḥ /
sādhu vā yadi vā'sādhu tannātikrāntumutsahe //

vyaktaṃ tadbhavataścāpi viditaṃ nātra saṃśayaḥ /
na ca yuktaṃ tathā vaktuṃ bhavāndehīti sattama //

kuladharmaḥ sa no vīra pramāṇaṃ paramaṃ ca tat /
tena tvāṃ na bravīmyetadasandigdhaṃ vaco'rihan //

taṃ bhīṣmaḥ pratyuvācedaṃ madrarājaṃ janādhipaḥ /
dharma eṣa paro rājansvayamuktaḥ svayambhuvā //

nātra kaścana doṣo'sti pūrvairvidhirayaṃ kṛtaḥ /
viditeyaṃ ca te śalya maryādā sādhusammatā //

ityuktvā sa mahātejāḥ śātakumbhaṃ kṛtākṛtam /
ratnāni ca vicitrāṇi śalyāyādātsahasraśaḥ //

gajānaśvānrathāṃścaiva vāsāṃsyābharaṇāni ca /
maṇimuktāpravālaṃ ca gāṅgeyo vyasṛjacchubham //

tatpragṛhya dhanaṃ sarvaṃ śalyaḥ sampratīmānasaḥ /
dadau tāṃ samalaṅkṛtya svasāraṃ kauravarṣabhe //

sa tāṃ mādrīmupādāya bhīṣmaḥ sāgaragāsutaḥ /
ājagāma purīṃ dhīmānpraviṣṭo gajasāhvayam //

tata iṣṭe'hani prāpte muhūrte sādhusammate / vivāhaṃ kārāyāmāsa bhīṣmaḥ pāṇḍormahātmanaḥ /
jagrāha vidhivatpāṇiṃ mādryāḥ pāṇḍurnarādhipaḥ //

tato vivāhe nirvṛtte sa rājā kurunandanaḥ /
sthāpayāmāsa tāṃ bhāryāṃ śubhe veśmani bhāminīṃ //

sa tābhyāṃ vyacaratsārdhaṃ bhāryābhyāṃ rājasattamaḥ /
kuntyā mādryā ca rājendro yathākāmaṃ yathāsukham //

tataḥ sa kauravo rājā vihṛtya tridaśā niśāḥ /
jigīṣayā mahīṃ pāṇḍurnirakrāmatpurātprabho //

sa bhīṣmapramukhānvṛddhānabhivādya praṇamya ca / dhṛtarāṣṭraṃ ca kauravyaṃ tathānyānkurusattamān /
āmantrya prayayau rājā taiścaivāpyanumojitaḥ //

maṅgalācārayuktābhirāśīrbhirabhinanditaḥ /
gajavājirathaughena balena mahatā'gamat //

sa rājā devagarbhābho vijigīṣurvasundharām /
hṛṣṭapuṣṭabalaiḥ prāyātpāṇḍuḥ śatrūnanekaśaḥ //

pūrvamāgaskṛto gatvā daśārṇāḥ samare jitāḥ /
pāṇḍunā narasiṃhena kauravāṇāṃ yaśobhṛtā //

tataḥ senāmupādāya pāṇḍurnānāvidhadhvajām /
prabhūtahastyaśvayutāṃ padātirathasankulām //

āgaskārī mahīpānāṃ bahūnāṃ baladarpitaḥ /
goptā magadharāṣṭrasya dīrgho rājagṛhe hataḥ //

tataḥ kośaṃ samādāya vāhanāni ca bhūriśaḥ /
pāṇḍunā mithilāṃ gatvā videhāḥ samare jitāḥ //

tathā kāśiṣu suhmeṣu puṇḍreṣu ca nararṣabha /
svabāhubalavīryeṇa kurūṇāmakarodyaśaḥ //

taṃ śaraughamahājvālaṃ śastrārciṣamarindamam /
pāṇḍupāvakamāsādya vyavahyanta narādhipāḥ //

te sasenāḥ sasenena vidhvaṃsitabalā nṛpāḥ /
pāṇḍunā vaśagāḥ kṛtvā kurukarmasu yojitāḥ //

tena te nirjitāḥ sarve pṛthivyāṃ sarvapārthivāḥ /
tamekaṃ menire śūraṃ deveṣviva purandaram //

taṃ kṛtāñjalayaḥ sarve praṇatā vasudhādhipāḥ /
upājagmurdhanaṃ gṛhya ratnāni vividhāni ca //

maṇimuktāpravālaṃ ca suvarṇaṃ rajataṃ bahu /
goratnānyaśvaratnāni ratharatnāni kuñjarān //

kharoṣṭramahiṣāṃścaiva yacca kiñcidajāvikam / kamlājinaratnāni rāṅkavāstaraṇāni ca /
tatsarvaṃ pratijagrāha rājā nāgapurādhipaḥ //

tadādāya yayau pāṇḍuḥ punarmaditavāhanaḥ /
harṣayiṣyansvarāṣṭrāṇi puraṃ ca gajasāhvayam //

śāntano rājasiṃhasya bharatasya ca dhīmataḥ /
pranaṣṭaḥ kīrtijaḥ śabdaḥ pāṇḍunā punarāhṛtaḥ //

ye purā kururāṣṭrāṇi jahruḥ kurudhanāni ca /
te nāgapurasiṃhena pāṇḍunā karadīkṛtāḥ //

ityabhāṣanta rājāno rājāmātyāśca saṅgatāḥ /
pratītamanaso hṛṣṭāḥ paurajānapadaiḥ saha //

pratyudyayuśca taṃ prāptaṃ sarve bhīṣmapurogamāḥ /
te nadūramivādhvānaṃ gatvā nāgapurālayāḥ //

āvṛtaṃ dadṛśurhṛṣṭā lokaṃ bahuvidhairdhanaiḥ /
nānāyānasamānītai ratnairuccāvacaistadā //

hastyaśvaratharatnaiśca gobhiruṣṭraistathā'vibhiḥ /
nāntaṃ dadṛśurāsādya bhīṣmeṇa saha kauravāḥ //

so'bhivādya pituḥ pādau kausalyānandavardhanaḥ /
yathā'rhaṃ mānayāmāsa paurajānapadānapi //

pramṛdya pararāṣṭrāṇi kṛtārthaṃ punarāgatam /
putramāśliṣya bhīṣmastu harṣādaśrūṇyavartayat //

sa tūryaśataśaṅkhānāṃ bherīṇāṃ ca mahāsvanaiḥ /
harṣayansarvaśaḥ paurānviveśa gajasāhvayam //