Mahabharata · Chapter 1.105

saṃvatsarānṛtūnmāsānbubudhe na bahūngatān /
ramamāṇastayā sārdhaṃ yathākāmaṃ nareśvaraḥ //

diviṣṭhānmānuṣāṃścaiva bhogānbhuṅkte sa vai nṛpaḥ / āsādya śāntanuḥ śrīmānmumude yoṣitāṃ varām //

ṛtukāle tu sā devī divyaṃ garbhamadhārayat /
aṣṭāvajanayatputrāṃstasmādamarasannibhān //

jātaṃ jātaṃ ca sā putraṃ kṣipatyamyasi bhārata /
sūtake kaṇṭhamākramya tānnināya yamakṣayam //

prīṇāmyahaṃ tvāmityuktvā gaṅgāsrotasyamajjayat /
tasya tanna priyaṃ rājñaḥ śāntanorabhavattadā //

na ca tāṃ kiñcanovāca tyāgādbhīto mahīpatiḥ /
amīmāṃsyā karmayonirāgamaśceti śāntanuḥ //

smaranpitṛvacaścaiva nāpṛcchatputrakilbiṣam /
jātāñjātāṃśca vai hanti sā strī sapta varānsutān //

śāntanurdharmabhaṅgācca nāpṛcchattāṃ kathañcana / aṣṭamaṃ tu jighāṃsantyāṃ cukṣubhe śāntanordhṛtiḥ //

athaināmaṣṭame putre jāte prahasatīmiva /
uvāca rājā duḥkhārtaḥ parīpsanputramātmanaḥ //

ālabhantīṃ tadā dṛṣṭvā tāṃ sa kauravanandanaḥ / abravīdbharataśreṣṭho vākyaṃ paramaduḥkhitaḥ //

māvadhīḥ kasya kā'sīti kiṃ hinatsi sutāniti /
putraghni sumahatpāpaṃ samprāptaṃ te sugarhitam //
gaṅgovāca /

putrakāma na te hanmi putraṃ putravatāṃ vara /
jīrṇastu mama vāso'yaṃ yathā sa samayaḥ kṛtaḥ //

ahaṃ gaṅgā jahnusutā maharṣigaṇasevitā /
devakāryārthasiddhyarthamuṣitā'haṃ tvayā saha //

ime'ṣṭau vasavo devā mahābhāgā mahaujasaḥ /
vasiṣṭhaśāpadoṣeṇa mānuṣatvamupāgatāḥ //

teṣāṃ janayitā nānyastvadṛte bhuvi vidyate /
madvidhā mānuṣī dhātrī loke nāstīha kācana //

tasmāttajjananīhetormānuṣatvamupāgatā /
janayitvā vasūnaṣṭau jitā lokāstvayā'kṣayāḥ //

devānāṃ samayastveṣa vasūnāṃ saṃśruto mayā /
jātaṃ jātaṃ mokṣayiṣye janmato mānuṣāditi //

tatte śāpādvinirmuktā āpavasya mahātmanaḥ /
svasti testu gamiṣyāmi putraṃ pāhi mahāvratam //

ayaṃ tava sutasteṣāṃ vīryeṇa kulanandanaḥ / sambhūtotijanaṃ karma kariṣyati na saṃśayaḥ //

eṣa paryāyavāso me vasūnāṃ sannidhau kṛtaḥ /
matprasūtiṃ vijānīhi gaṅgādattamimaṃ sutam //