Mahabharata · Chapter 1.104

etacchrutvā vaco rājñaḥ sasmitaṃ mṛdu valgu ca /
yaśasvinī ca sā'gacchacchāntanorbhūtaye tadā //

sā tu dṛṣṭvā nṛpaśreṣṭhaṃ carantaṃ tīramāśritam /
vasūnāṃ samayaṃ smṛtvā'thābhyagacchadaninditā //

prajārthinī rājaputraṃ śāntanuṃ pṛthivīpatim /
pratīpavacanaṃ cāpi saṃsmṛtyaiva svayaṃ nṛpam //

kālo'yamiti matvā sā vasūnāṃ śāpacoditā /
uvāca caiva rājñaḥ sā hlādayantī mano girā //
gaṅgovāca /

bhaviṣyāmi mahīpāla mahiṣī te vaśānugā /
na tu tvaṃ vā dvitīyo vā jñātumicchetkathañcana //

yattu kuryāmahaṃ rājañśubhaṃ vā yadi vā'śubham /
na tadvārayitavyā'smi na vaktavyā tathā'priyam //

evaṃ hi vartamāne'haṃ tvayi vatsyāmi pārthiva /
vāritā vipriyaṃ coktā tyajeyaṃ tvāmasaṃśayam //

eṣa me samayo rājanbhaja māṃ tvaṃ yathepsitam /
anunītā'smi te pitrā bhartā me tvaṃ bhava prabho //
vaiśampāyana uvāca /

tatheti sā yadā tūktā tadā bharatasattama /
praharṣamatulaṃ lebhe prāpya taṃ pārthivottamam //

pratijñāya tu tattasyāstatheti manujādhipaḥ /
rathamāropya tāṃ devīṃ jagāma sa tayā saha //

sā ca śāntanumabhyāgātsākṣāllakṣmīrivāparā /
āsādya śāntanustāṃ ca bubhuje kāmato vaśī //

na praṣṭavyeti manvāno na sa tāṃ kiñcidūcivān /
sa tasyāḥ śīlavṛttena rūpaudāryaguṇena ca //

upacāreṇa ca rahastutoṣa jagatīpatiḥ /
sa rājā paramaprītaḥ paramastrīpralālitaḥ //

divyarūpā hi sā devī gaṅgā tripathagāminī /
mānuṣaṃ vigrahaṃ kṛtvā śrīmantaṃ varavarṇinī //

bhāgyopanatakāmasya bhāryā copanatā'bhavat /
śantanornṛpasiṃhasya devarājasamadyuteḥ //

sambhogasnehacāturyairhāvalāsyairmanoharaiḥ /
rājānaṃ ramayāmāsa yathā rajyeta sa prabhuḥ //

sa rājā ratisakto'bhūduttamastrīguṇairhṛtaḥ //