Laghubhāgavatāmṛta · Chapter 1.1

Laghubhāgavatāmṛta
pūrva-khaṇḍam śrī-kṛṣṇāmṛtam prathama-paricchedaḥ
svayaṃrūpa-vilāsa-svāṃśāveśa-prakāśa-lakṣaṇa-bhagavat-tattva-nirūpaṇam |
oṃ namaḥ śrī-kṛṣṇāya --
namas tasmai bhagavate kṛṣṇāyākuṇṭha-medhase |
yo dhatte sarva-bhūtānām abhavāyośatīḥ kalāḥ

(BhP 10.87.46)
kṛṣṇa-varṇaṃ tviṣākṛṣṇaṃ sāṅgopāṅgāstra-pārṣadam |
yajñaiḥ saṅkīrtana-prāyair yajanti hi su-medhasaḥ

(BhP 11.5.32)
mukhāravinda-nisyanda-maranda-bhara-tundilā |
mamānandaṃ mukundasya sandugdhāṃ veṇu-kākalī

śrī-caitanya-mukhodgīrṇā hare-kṛṣṇeti varṇakāḥ |
majjayanto jagat premṇi vijayantāṃ tad-āhvayāḥ

śrīmat-prabhupādāmbhojaiḥ śrīmad-bhāgavatāmṛtam |
yad-vyatāni tad evedaṃ saṅkṣepeṇa niṣevyate

idaṃ śrī-kṛṣṇa-tad-bhakta-sambandhād amṛtaṃ dvidhā |
ādau kṛṣṇāmṛtaṃ tatra suhṛdbhyaḥ pariveṣyate

nirbandhaṃ yukti-vistāre mayātra parimuñcatā |
pradhānatvāt parmāṇeṣu śabda eva pramāṇyate

yatas taiḥ śāstra-yonitvāt iti nyāya-pradarśanāt |
śabdasyaiva pramāṇatvaṃ svīkṛtaṃ paramarṣibhiḥ

kiṃ ca tarkāpratiṣṭhānāt iti nyāya-vidhānataḥ |
amībhir eva suvyaktaṃ tarkasyānādaraḥ kṛtaḥ

athopāsyeṣu mukhyatvaṃ vaktum utkarṣa-bhūmataḥ |
kṛṣṇasya tat-svarūpāṇi nirūpyante kramād iha

svayaṃ rūpas tad-ekātma-rūpa āveśa-nāmakaḥ |
ity asau trividhaṃ bhāti prapañcātīta-dhāmasu

tatra svayaṃrūpaḥ --
ananyāpekṣi yad rūpaṃ svayaṃ-rūpaḥ sa ucyate

īśvaraḥ paramaḥ kṛṣṇaḥ sac-cid-ānanda-vigrahaḥ |
anādir ādir govindaḥ sarva-kāraṇa-kāraṇam

iti (BrS 5.1)
atra tad-ekātma-rūpaḥ -
yad-rūpaṃ tad-abhedena svarūpeṇa virājate |
ākṛtyādibhir anyādṛk sa tad-ekātma-rūpakaḥ |
sa vilāsaḥ svāṃśa iti dhatte bheda-dvayaṃ punaḥ

tatra vilāsaḥ -
svarūpam anyākāraṃ yat tasya bhāti vilāsataḥ |
prāyeṇātma-samaṃ śaktyā sa vilāso nigadyate

parama-vyoma-nāthas tu govindasya yathā smṛtaḥ |
parama-vyoma-nāthasya vāsudevaś ca yādṛśaḥ

svāṃśaḥ -
tādṛśo nyūna-śaktiḥ yo vyanakti svāṃśa īritaḥ |
saṅkarṣaṇādir matsyādir yathā tat-tat-svadhāmasu

tatra āveśaḥ -
jñāna-śakty-ādi-kalayā yatrāviṣṭo janārdanaḥ |
ta āveśā nigadyante jīvā eva mahattamāḥ

vaikuṇṭhe'pi yathā śeṣo nāradaḥ sanakādayaḥ |
akrūra-dṛṣṭānte cāmī daśame parikīrtitāḥ

iti bheda-trayam |
prakāśas tu na bhedeṣu gaṇyate sa hi no pṛthak

tathā hi -
anekatra prakaṭatā rūpasyaikasya yaikadā |
sarvathā tat-svarūpaiva sa prakāśa itīryate

dvāravatyāṃ yathā kṛṣṇaḥ pratyakṣaṃ pratimandiram |
citra bataitad ity ādi-pramāṇena sa setsyati

kvacic caturbhujatve'pi na tyajet kṛṣṇa-rūpatām |
ataḥ prakāśa eva syāt tasyāsau dvibhujasya ca

prapañcātīta-dhāmatvam eṣāṃ śāstre pṛthag-vidhe |
pādmīyottara-khaṇḍādau vyaktam eva virājate