Kubjikamata Tantra · Chapter 9

bhedayitvā paraṃ tattvaṃ hakāraṃ nāma nāmataḥ
so 'ṣṭākapālo vijñeyas tasyākāśaṃ tu tac chiraḥ //

aghoram iti vikhyātaṃ dvātriṃśākṣarabhūṣitam
tasmāt sañjāyate sṛṣṭiḥ sā tu sṛṣṭir hṛdi sthitā //

dvātriṃśa mātaras tās tu cakrārūḍhā vicintayet
caṇḍā ghaṇṭā mahānāsā sumukhī durmukhī balā //

revatī prathamā ghorā saumyā bhīmā mahābalā
jayā ca vijayā caiva ajitā cāparājitā //

mahotkaṭā virūpākṣī śuṣkā cākāśamātarā
sehārī jātahārī ca daṃṣṭrālī śuṣkarevatī //

pipīlikā puṣpahārī aśanī sasyahārikā
bhadrakālī subhadrā ca bhadrabhīmā subhadrikā //

manasā pūjayet tasthā bhakṣyabhojyādibhiḥ kramāt
puṣpair nānāvidhair devi nānālaṅkārakādibhiḥ //

sravantaṃ cintayet tastham amṛtaṃ sarvatomukham
tenāpyāyitadehas tu tatkṣaṇād virajo bhavet //

yāgaṃ tu mānasaṃ kṛtvā kasya siddhir na jāyate
sampūrṇamaṇḍalaṃ dhyātvā aghoraṃ nāma nāmataḥ //

so 'ṣṭākapālaḥ pravaras tattvavyāpī nirakṣaraḥ
sa eva candrarūpī syāt karṇikāyāṃ vicintayet //

tattvaṃ tatra mahānādaṃ hakāraṃ nāma nāmataḥ
ṣaṭpadārthayuto devi navakena prasidhyati //

sa eva līyate viṣṇor viṣṇu rudrasamāśritaḥ
sa eva kālo vijñeyaḥ sarvabhakṣo hutāśanaḥ //

sa eva līyate māyā sā ca viṣṇuḥ prakīrtitā
sā śaktir nirmalā kubji kālo vai yena bhakṣitaḥ //

sa viṣṇuḥ śivatāṃ yāti setuṃ bhittvā kuleśvari
sa ca turyapadaṃ prāpya unmanatvaṃ hi tat padam //

āśrayaṃ devadevasya aghorasya mahātape
nirvāṇaṃ tu paraṃ vindyāt sa kubjīśaḥ prakīrtitaḥ //

sa dhruvo vāsudevaś ca ajātaḥ parikīrtitaḥ
tatra śaktiṃ sadā kuryāt tatrāsaktaḥ sadā bhavet //

na pāpair lipyate devi mahāpāpaiḥ sudāruṇaiḥ
na kālasya vaśaṃ gacchen na jarā na ca duḥkhitaḥ //

sarvatīrthaphalaṃ caiva sarvayajñeṣu dīkṣitaḥ
hṛnnādaṃ manasotthāpya vrajen nirvāṇajaṃ padam //

cetasā tv amṛtaṃ gṛhya āgacched ghaṇṭikāśrayam
tadutthaṃ bhāratīmūle kṛtvāsau 'mṛtam aśnute //

āpūrya vadanaṃ tena svacchandena kujeśvari
anangadhenavīṃ dugdh[ v ]ā tattvaṃ vyāpyeśvareṇa tu //

aghoraṃ pañcamadhye tu ātmatattvaṃ vicintayet
yo 'gnir jvalati cāpena ekas tiṣṭhati pañcadhā //

trailokyaṃ vyāpitaṃ tena yajante brahmavādinaḥ
tasyaiva yaḥ śikhāṃ vetti āhitāgniḥ sa ucyate //

so' gnir devamukhaṃ vindyād aghoraḥ sarvatomukhaḥ
mukheṣu ca mukhaṃ devi trailokye 'pi pragīyate //

vinā tena varārohe na homo na ca bhojanam
śucir agnir bhaved devo bahurūpaḥ kujeśvari //

tadantaṃ tu japaṃ kuryāt kṛtvā hṛtsthaṃ tu keśavam
adhastāt setumārgasya tiṣṭhate tu kujeśvaraḥ //

sa cāsanaṃ paraṃ tasya sevyate kiṃ na mantrarāṭ
vidyārājeti vikhyāto mantrarājeti kathyate //

mudrārājeti mahatāṃ maṇḍalādhipatiḥ smṛtaḥ
brahmaviṣṇvīśvarādyeṣu patir devi pracakṣyate //

nānena sadṛśo devi mantrakoṭiśatair api
hṛdayaṃ sarvamantrāṇāṃ paramaṃ parikīrtitam //

anena hīnā deveśi mahān api na sidhyati
grahayantreṣu sarveṣu vyādhiteṣu kuleśvari //

ripunāśe ca balavān dāridrabhayanāśanam
tasmād ārādhya yatnena duḥkhasiṃhaḥ prakīrtitaḥ //

nānena sadṛśaḥ kaścin nānyo 'sti sacarācare
devāsuramanuṣyānāṃ tattvarūpo maheśvari //

mūrdhnaḥ pādatalaṃ yāvat tattvaṃ carati dehinām
niṣkalāt sakalaṃ yāti sakalān niṣkalaṃ padam //

ekenāṃśena vīrāṇāṃ sarveṣāṃ kim api stutam
sa bhairavaḥ śivo bhāti sarvajñaḥ sarvajantuṣu //

yāvat tiṣṭhaty asau gātre tāvaj jīvanti jantavaḥ
vinā tena varārohe nāsti nāstīti kathyate //

tasya devādhidevasya sarvavyāpimayasya ca
sarvadevamayo devi kathaṃ bhaktyā na sidhyati //

yena vijñānamātreṇa smṛtenaiva tu sundari
akṣayān labhate lokān muktisthānaṃ gamiṣyati //

sarvalakṣaṇahīno 'pi smaraṇāt kalmaṣāpahaḥ
aho mantrasya māhātmyaṃ japyamānasya nityaśaḥ //

vināpi layayogena yoginīsamatāṃ vrajet
sādhakāya prayacchanti trailokyajñānam uttamam //

ākāśādi prayacchanti divyadṛṣṭiśrutāgamam
sarvabhūtā vaśaṃ yānti grahāś caiva viśeṣataḥ //

viṣaṃ ca nirviṣaṃ kuryād darśanād eva sarvataḥ
na tasya tiṣṭhate gātre viṣaṃ sthāvarajaṅgamam //

kīṭalūtās tu bhūtāś ca apamṛtyur na tiṣṭhati
garajaṃ yogajaṃ doṣaṃ pralayaṃ yānti dūrataḥ //

cūrṇalepāñjanādīni kuhakāni tu yāni vai
ye kariṣyanti ripavaḥ striyo vā puruṣasya vā //

tatkṣaṇāt pralayaṃ yānti teṣāṃ pratyaṅgirā bhavet
smaraṇād devadevasya indraṃ yāti narottamaḥ //

jvalanto dṛśyate bhūtair hṛccakre vidhisaṃsthitaḥ
duṣṭāś ca pralayaṃ yānti siṃhasyaiva yathā mṛgāḥ //

eko doṣo hi mantrasya japyamānasya jāyate
jarā mṛtyuś ca dāridryaṃ vyādhayo vividhāḥ priye //

smaraṇāt pralayaṃ yānti tuhinaṃ tu raver iva
japyate yeṣu rāṣṭreṣu deśe vā surasundari //

na rujā jāyate tatra svāmī tatra vivardhate
ekenāpi suputreṇa ghoradevāṅgapūjanāt //

ghorīśaṃ tu yadā jñātaṃ sa kulaṃ tārayiṣyati
paśavaś ca na naśyanti sadā vardhati gokulam //

vandhyā na jāyate nārī na mriyante ca bālakāḥ
jvararogādibhis tasya kuṭumbaṃ naiva pīḍyate //

sarvalokasya sampūjyo jāyate rājavallabhaḥ
dhāraṇīyaṃ sadā gātre yathāvat pravadāmy aham //

puṣpeṇa guḍikāṃ kṛtvā mantraṃ bhūrje samālikhet
kuṅkumena likhed devi rocanāyāthavā punaḥ //

akāracaturo madhye ātmanāma samālikhet
mantreṇa chāditaṃ nāma aṅkusena tu rakṣitam //

māyayācchādayitvā tu śivaṃ mūrdhni gataṃ likhet
yāṣṭaṃ ṣaṣṭhasamāyuktaṃ bindunādāṅkitaṃ priye //

tac chivaṃ tu varārohe caturāśramapūjitam
sarvaṃ kṣasthaṃ paraṃ mantraṃ sarvarakṣākaraṃ param //

nāmnā tu guḍikā hy eṣā sarvarogavimardanī
sāntā pūrvaṃ tu kartavyā tataḥ kṣasthāṃ tu kārayet //

kṣakāraṃ kālam ārūḍham okāroparidīpitam
ṣaṣṭhasvarayutaṃ devi amaratvaṃ prayacchati //

yas tu dhārayate divyāṃ guḍikāṃ śivapūjitām
tasya vakṣyāmi suśroṇi guṇān nānāvidhān śṛṇu //

sarvatīrtheṣu yaḥ snātaḥ sarvayajñeṣu dīkṣitaḥ
na bhayaṃ vidyate tasya dharaṇad ajarāmaraḥ //

sarvavratāni cīrṇāni sarvatīrthanamaskṛtaḥ
avaniṃ vicaret sarvāṃ bhairavas tu yathā hi saḥ //

sarve te darśanāt tasya sādhakasya mahātmanaḥ
duṣṭāś ca pralayaṃ yānti vyādhayo vidravanti ca //

abrahmacārī cārī syād asnātaḥ snānam āpnuyāt
na bhayaṃ vidyate tasya saṅgrāme ca sadā jayaḥ //

abhakṣyabhakṣaṇaṃ kṛtvā agamyāgamanaṃ tathā
nāsau lipyati pāpena paṅkasthaṃ kamalaṃ yathā //

guḍikā tu sadā siddhā mahābhairavadhāritā
yogeśvarādimunibhiḥ sarvadevair namaskṛtā //

bahunāpi kim uktena satyaṃ satyaṃ yaśasvini
jvalanto dṛśyate bhūtair yathā rudro makhāntakṛt //

supto bhuktaḥ prabuddhaś ca atha maithunam āgate
mahāhave mahādevi duṣṭasiṃhagajeṣu ca //

vidyudvajrāśaniś caiva utpāteṣv aśanīṣu ca
śatrunāśe ca gonāśe viṣaśaṅkāgataṃ ca yat //

ārṇaveṣu ca sarveṣu dhāraṇān na bhayaṃ bhavet
śākinyo vaśagās tasya duṣṭavetālarākṣasāh //

śucir vāpy aśucir vāpi vidravanti diśo daśa
guḍikaiṣā samākhyātā trilohapariveṣṭitā //

dhāraṇīyā prayatnena śivalokam avāpnuyāt
sarvāvasthagato vāpi muktiṃ yāti surādhipe //

matsamo dhāraṇād devi satyaṃ satyaṃ yaśasvini
mayāpi dhāritā hy eṣā brahmaṇāpi tataḥ punaḥ //

viṣṇunā devarājena yuddhe daityās tu nirjitāḥ
agnivāyukubereṇa yamena varuṇena ca //

mātṛbhir guhyakaiś caiva garuḍena ca dhīmatā
dadhīcinā ca śukreṇa durvāsenāpi dhīmatā //

ṛṣibhiś ca tathā sarvair devadaityaiḥ kujeśvari
tatas tv anyaiś ca rājānair balibhir nahuṣādibhiḥ //

yuddhe jayārthibhir devi ugravyādhijayārthibhiḥ
prajāvaśyārthibhiś caiva guḍikā kaṇṭhadhāritā //

nānayā sadṛśī vidyā guḍikā bhuvi vidyate
piṇḍaṃ tu prathamaṃ mantryam aghoreṇa susaṃskṛtam //

bhuñjīyāc caiva niḥśaṅkaṃ tatas tasyāmṛtāyate
diśo 'bhimantrya gaccheta vāmaṃ cāgrapadaṃ nyaset //

ubhayoś candramadhye tu paryaṭeta sadā sthitaḥ
bhuñjāne śayane caiva candramadhye sadā sthitaḥ //

candrārūḍhena satataṃ sthātavyaṃ varavarṇini
nāghorasadṛśo mantro mantrā yasmād vinirgatāḥ //

guruvaktrāt tu vijñeyo madhye oṃkāramadhyagam
sa eva nādasaṃlīno yāvad brahmabilaṃ gataḥ //

dhāraṇād dhāritaṃ kṛtvā tribhiḥ prāṇair alaṅkṛtam
svacchandasahitaṃ devaṃ varṇāntapariveṣṭitam //

mukhe 'naṅgāṃ tato dugdhvā dhenavīṃ cāmbarāṃ priye
grāhyagrāhavimardaś ca triśūlaṃ vaḍavāmukham //

kuñcikā ghaṇṭikā caiva rājadantāmṛtāgamam
āyuṣo jñānam utkrāntir aghorasya vaśe sthitaḥ //

nāghorasadṛśo mantro mantrakoṭiśatair api
satyaṃ satyaṃ punaḥ satyaṃ bhūyaḥ satyaṃ punaḥ punaḥ //

sarvajñaṃ paramaṃ mantraṃ muktidaṃ vyādhināśanam
jarāmṛtyuharaṃ devi vidyārājeti kīrtitam //

viṣuvaṃ ca sadā tatra yatra sarvaṃ pratiṣṭhitam
utpattisthitikartāraṃ yatra sarve layaṃ gatāḥ //

kiṃ na sevyati deveśi bahurūpaṃ kujeśvari
devādhidevaṃ paramaṃ yat tat kāraṇam avyayam //

tattvavyāpīti paramaṃ vyomavyāpīti kathyate
brahmaviṣṇusurādīnām utpattipralayāntikam //

aghoraṃ ghorarūpeti aghorīśa iti smṛtaḥ //