Kubjikamatatantra · અધ્યાય 9

ભેદયિત્વા પરં તત્ત્વં હકારં નામ નામતઃ
સો ઽષ્ટાકપાલો વિજ્ઞેયસ્ તસ્યાકાશં તુ તચ્ છિરઃ ॥

અઘોરમ્ ઇતિ વિખ્યાતં દ્વાત્રિંશાક્ષરભૂષિતમ્
તસ્માત્ સઞ્જાયતે સૃષ્ટિઃ સા તુ સૃષ્ટિર્ હૃદિ સ્થિતા ॥

દ્વાત્રિંશ માતરસ્ તાસ્ તુ ચક્રારૂઢા વિચિન્તયેત્
ચણ્ડા ઘણ્ટા મહાનાસા સુમુખી દુર્મુખી બલા ॥

રેવતી પ્રથમા ઘોરા સૌમ્યા ભીમા મહાબલા
જયા ચ વિજયા ચૈવ અજિતા ચાપરાજિતા ॥

મહોત્કટા વિરૂપાક્ષી શુષ્કા ચાકાશમાતરા
સેહારી જાતહારી ચ દંષ્ટ્રાલી શુષ્કરેવતી ॥

પિપીલિકા પુષ્પહારી અશની સસ્યહારિકા
ભદ્રકાલી સુભદ્રા ચ ભદ્રભીમા સુભદ્રિકા ॥

મનસા પૂજયેત્ તસ્થા ભક્ષ્યભોજ્યાદિભિઃ ક્રમાત્
પુષ્પૈર્ નાનાવિધૈર્ દેવિ નાનાલઙ્કારકાદિભિઃ ॥

સ્રવન્તં ચિન્તયેત્ તસ્થમ્ અમૃતં સર્વતોમુખમ્
તેનાપ્યાયિતદેહસ્ તુ તત્ક્ષણાદ્ વિરજો ભવેત્ ॥

યાગં તુ માનસં કૃત્વા કસ્ય સિદ્ધિર્ ન જાયતે
સમ્પૂર્ણમણ્ડલં ધ્યાત્વા અઘોરં નામ નામતઃ ॥

સો ઽષ્ટાકપાલઃ પ્રવરસ્ તત્ત્વવ્યાપી નિરક્ષરઃ
સ એવ ચન્દ્રરૂપી સ્યાત્ કર્ણિકાયાં વિચિન્તયેત્ ॥

તત્ત્વં તત્ર મહાનાદં હકારં નામ નામતઃ
ષટ્પદાર્થયુતો દેવિ નવકેન પ્રસિધ્યતિ ॥

સ એવ લીયતે વિષ્ણોર્ વિષ્ણુ રુદ્રસમાશ્રિતઃ
સ એવ કાલો વિજ્ઞેયઃ સર્વભક્ષો હુતાશનઃ ॥

સ એવ લીયતે માયા સા ચ વિષ્ણુઃ પ્રકીર્તિતા
સા શક્તિર્ નિર્મલા કુબ્જિ કાલો વૈ યેન ભક્ષિતઃ ॥

સ વિષ્ણુઃ શિવતાં યાતિ સેતું ભિત્ત્વા કુલેશ્વરિ
સ ચ તુર્યપદં પ્રાપ્ય ઉન્મનત્વં હિ તત્ પદમ્ ॥

આશ્રયં દેવદેવસ્ય અઘોરસ્ય મહાતપે
નિર્વાણં તુ પરં વિન્દ્યાત્ સ કુબ્જીશઃ પ્રકીર્તિતઃ ॥

સ ધ્રુવો વાસુદેવશ્ ચ અજાતઃ પરિકીર્તિતઃ
તત્ર શક્તિં સદા કુર્યાત્ તત્રાસક્તઃ સદા ભવેત્ ॥

ન પાપૈર્ લિપ્યતે દેવિ મહાપાપૈઃ સુદારુણૈઃ
ન કાલસ્ય વશં ગચ્છેન્ ન જરા ન ચ દુઃખિતઃ ॥

સર્વતીર્થફલં ચૈવ સર્વયજ્ઞેષુ દીક્ષિતઃ
હૃન્નાદં મનસોત્થાપ્ય વ્રજેન્ નિર્વાણજં પદમ્ ॥

ચેતસા ત્વ્ અમૃતં ગૃહ્ય આગચ્છેદ્ ઘણ્ટિકાશ્રયમ્
તદુત્થં ભારતીમૂલે કૃત્વાસૌ ઽમૃતમ્ અશ્નુતે ॥

આપૂર્ય વદનં તેન સ્વચ્છન્દેન કુજેશ્વરિ
અનન્ગધેનવીં દુગ્ધ્[ વ્ ]આ તત્ત્વં વ્યાપ્યેશ્વરેણ તુ ॥

અઘોરં પઞ્ચમધ્યે તુ આત્મતત્ત્વં વિચિન્તયેત્
યો ઽગ્નિર્ જ્વલતિ ચાપેન એકસ્ તિષ્ઠતિ પઞ્ચધા ॥

ત્રૈલોક્યં વ્યાપિતં તેન યજન્તે બ્રહ્મવાદિનઃ
તસ્યૈવ યઃ શિખાં વેત્તિ આહિતાગ્નિઃ સ ઉચ્યતે ॥

સોઽ ગ્નિર્ દેવમુખં વિન્દ્યાદ્ અઘોરઃ સર્વતોમુખઃ
મુખેષુ ચ મુખં દેવિ ત્રૈલોક્યે ઽપિ પ્રગીયતે ॥

વિના તેન વરારોહે ન હોમો ન ચ ભોજનમ્
શુચિર્ અગ્નિર્ ભવેદ્ દેવો બહુરૂપઃ કુજેશ્વરિ ॥

તદન્તં તુ જપં કુર્યાત્ કૃત્વા હૃત્સ્થં તુ કેશવમ્
અધસ્તાત્ સેતુમાર્ગસ્ય તિષ્ઠતે તુ કુજેશ્વરઃ ॥

સ ચાસનં પરં તસ્ય સેવ્યતે કિં ન મન્ત્રરાટ્
વિદ્યારાજેતિ વિખ્યાતો મન્ત્રરાજેતિ કથ્યતે ॥

મુદ્રારાજેતિ મહતાં મણ્ડલાધિપતિઃ સ્મૃતઃ
બ્રહ્મવિષ્ણ્વીશ્વરાદ્યેષુ પતિર્ દેવિ પ્રચક્ષ્યતે ॥

નાનેન સદૃશો દેવિ મન્ત્રકોટિશતૈર્ અપિ
હૃદયં સર્વમન્ત્રાણાં પરમં પરિકીર્તિતમ્ ॥

અનેન હીના દેવેશિ મહાન્ અપિ ન સિધ્યતિ
ગ્રહયન્ત્રેષુ સર્વેષુ વ્યાધિતેષુ કુલેશ્વરિ ॥

રિપુનાશે ચ બલવાન્ દારિદ્રભયનાશનમ્
તસ્માદ્ આરાધ્ય યત્નેન દુઃખસિંહઃ પ્રકીર્તિતઃ ॥

નાનેન સદૃશઃ કશ્ચિન્ નાન્યો ઽસ્તિ સચરાચરે
દેવાસુરમનુષ્યાનાં તત્ત્વરૂપો મહેશ્વરિ ॥

મૂર્ધ્નઃ પાદતલં યાવત્ તત્ત્વં ચરતિ દેહિનામ્
નિષ્કલાત્ સકલં યાતિ સકલાન્ નિષ્કલં પદમ્ ॥

એકેનાંશેન વીરાણાં સર્વેષાં કિમ્ અપિ સ્તુતમ્
સ ભૈરવઃ શિવો ભાતિ સર્વજ્ઞઃ સર્વજન્તુષુ ॥

યાવત્ તિષ્ઠત્ય્ અસૌ ગાત્રે તાવજ્ જીવન્તિ જન્તવઃ
વિના તેન વરારોહે નાસ્તિ નાસ્તીતિ કથ્યતે ॥

તસ્ય દેવાધિદેવસ્ય સર્વવ્યાપિમયસ્ય ચ
સર્વદેવમયો દેવિ કથં ભક્ત્યા ન સિધ્યતિ ॥

યેન વિજ્ઞાનમાત્રેણ સ્મૃતેનૈવ તુ સુન્દરિ
અક્ષયાન્ લભતે લોકાન્ મુક્તિસ્થાનં ગમિષ્યતિ ॥

સર્વલક્ષણહીનો ઽપિ સ્મરણાત્ કલ્મષાપહઃ
અહો મન્ત્રસ્ય માહાત્મ્યં જપ્યમાનસ્ય નિત્યશઃ ॥

વિનાપિ લયયોગેન યોગિનીસમતાં વ્રજેત્
સાધકાય પ્રયચ્છન્તિ ત્રૈલોક્યજ્ઞાનમ્ ઉત્તમમ્ ॥

આકાશાદિ પ્રયચ્છન્તિ દિવ્યદૃષ્ટિશ્રુતાગમમ્
સર્વભૂતા વશં યાન્તિ ગ્રહાશ્ ચૈવ વિશેષતઃ ॥

વિષં ચ નિર્વિષં કુર્યાદ્ દર્શનાદ્ એવ સર્વતઃ
ન તસ્ય તિષ્ઠતે ગાત્રે વિષં સ્થાવરજઙ્ગમમ્ ॥

કીટલૂતાસ્ તુ ભૂતાશ્ ચ અપમૃત્યુર્ ન તિષ્ઠતિ
ગરજં યોગજં દોષં પ્રલયં યાન્તિ દૂરતઃ ॥

ચૂર્ણલેપાઞ્જનાદીનિ કુહકાનિ તુ યાનિ વૈ
યે કરિષ્યન્તિ રિપવઃ સ્ત્રિયો વા પુરુષસ્ય વા ॥

તત્ક્ષણાત્ પ્રલયં યાન્તિ તેષાં પ્રત્યઙ્ગિરા ભવેત્
સ્મરણાદ્ દેવદેવસ્ય ઇન્દ્રં યાતિ નરોત્તમઃ ॥

જ્વલન્તો દૃશ્યતે ભૂતૈર્ હૃચ્ચક્રે વિધિસંસ્થિતઃ
દુષ્ટાશ્ ચ પ્રલયં યાન્તિ સિંહસ્યૈવ યથા મૃગાઃ ॥

એકો દોષો હિ મન્ત્રસ્ય જપ્યમાનસ્ય જાયતે
જરા મૃત્યુશ્ ચ દારિદ્ર્યં વ્યાધયો વિવિધાઃ પ્રિયે ॥

સ્મરણાત્ પ્રલયં યાન્તિ તુહિનં તુ રવેર્ ઇવ
જપ્યતે યેષુ રાષ્ટ્રેષુ દેશે વા સુરસુન્દરિ ॥

ન રુજા જાયતે તત્ર સ્વામી તત્ર વિવર્ધતે
એકેનાપિ સુપુત્રેણ ઘોરદેવાઙ્ગપૂજનાત્ ॥

ઘોરીશં તુ યદા જ્ઞાતં સ કુલં તારયિષ્યતિ
પશવશ્ ચ ન નશ્યન્તિ સદા વર્ધતિ ગોકુલમ્ ॥

વન્ધ્યા ન જાયતે નારી ન મ્રિયન્તે ચ બાલકાઃ
જ્વરરોગાદિભિસ્ તસ્ય કુટુમ્બં નૈવ પીડ્યતે ॥

સર્વલોકસ્ય સમ્પૂજ્યો જાયતે રાજવલ્લભઃ
ધારણીયં સદા ગાત્રે યથાવત્ પ્રવદામ્ય્ અહમ્ ॥

પુષ્પેણ ગુડિકાં કૃત્વા મન્ત્રં ભૂર્જે સમાલિખેત્
કુઙ્કુમેન લિખેદ્ દેવિ રોચનાયાથવા પુનઃ ॥

અકારચતુરો મધ્યે આત્મનામ સમાલિખેત્
મન્ત્રેણ છાદિતં નામ અઙ્કુસેન તુ રક્ષિતમ્ ॥

માયયાચ્છાદયિત્વા તુ શિવં મૂર્ધ્નિ ગતં લિખેત્
યાષ્ટં ષષ્ઠસમાયુક્તં બિન્દુનાદાઙ્કિતં પ્રિયે ॥

તચ્ છિવં તુ વરારોહે ચતુરાશ્રમપૂજિતમ્
સર્વં ક્ષસ્થં પરં મન્ત્રં સર્વરક્ષાકરં પરમ્ ॥

નામ્ના તુ ગુડિકા હ્ય્ એષા સર્વરોગવિમર્દની
સાન્તા પૂર્વં તુ કર્તવ્યા તતઃ ક્ષસ્થાં તુ કારયેત્ ॥

ક્ષકારં કાલમ્ આરૂઢમ્ ઓકારોપરિદીપિતમ્
ષષ્ઠસ્વરયુતં દેવિ અમરત્વં પ્રયચ્છતિ ॥

યસ્ તુ ધારયતે દિવ્યાં ગુડિકાં શિવપૂજિતામ્
તસ્ય વક્ષ્યામિ સુશ્રોણિ ગુણાન્ નાનાવિધાન્ શૃણુ ॥

સર્વતીર્થેષુ યઃ સ્નાતઃ સર્વયજ્ઞેષુ દીક્ષિતઃ
ન ભયં વિદ્યતે તસ્ય ધરણદ્ અજરામરઃ ॥

સર્વવ્રતાનિ ચીર્ણાનિ સર્વતીર્થનમસ્કૃતઃ
અવનિં વિચરેત્ સર્વાં ભૈરવસ્ તુ યથા હિ સઃ ॥

સર્વે તે દર્શનાત્ તસ્ય સાધકસ્ય મહાત્મનઃ
દુષ્ટાશ્ ચ પ્રલયં યાન્તિ વ્યાધયો વિદ્રવન્તિ ચ ॥

અબ્રહ્મચારી ચારી સ્યાદ્ અસ્નાતઃ સ્નાનમ્ આપ્નુયાત્
ન ભયં વિદ્યતે તસ્ય સઙ્ગ્રામે ચ સદા જયઃ ॥

અભક્ષ્યભક્ષણં કૃત્વા અગમ્યાગમનં તથા
નાસૌ લિપ્યતિ પાપેન પઙ્કસ્થં કમલં યથા ॥

ગુડિકા તુ સદા સિદ્ધા મહાભૈરવધારિતા
યોગેશ્વરાદિમુનિભિઃ સર્વદેવૈર્ નમસ્કૃતા ॥

બહુનાપિ કિમ્ ઉક્તેન સત્યં સત્યં યશસ્વિનિ
જ્વલન્તો દૃશ્યતે ભૂતૈર્ યથા રુદ્રો મખાન્તકૃત્ ॥

સુપ્તો ભુક્તઃ પ્રબુદ્ધશ્ ચ અથ મૈથુનમ્ આગતે
મહાહવે મહાદેવિ દુષ્ટસિંહગજેષુ ચ ॥

વિદ્યુદ્વજ્રાશનિશ્ ચૈવ ઉત્પાતેષ્વ્ અશનીષુ ચ
શત્રુનાશે ચ ગોનાશે વિષશઙ્કાગતં ચ યત્ ॥

આર્ણવેષુ ચ સર્વેષુ ધારણાન્ ન ભયં ભવેત્
શાકિન્યો વશગાસ્ તસ્ય દુષ્ટવેતાલરાક્ષસાહ્ ॥

શુચિર્ વાપ્ય્ અશુચિર્ વાપિ વિદ્રવન્તિ દિશો દશ
ગુડિકૈષા સમાખ્યાતા ત્રિલોહપરિવેષ્ટિતા ॥

ધારણીયા પ્રયત્નેન શિવલોકમ્ અવાપ્નુયાત્
સર્વાવસ્થગતો વાપિ મુક્તિં યાતિ સુરાધિપે ॥

મત્સમો ધારણાદ્ દેવિ સત્યં સત્યં યશસ્વિનિ
મયાપિ ધારિતા હ્ય્ એષા બ્રહ્મણાપિ તતઃ પુનઃ ॥

વિષ્ણુના દેવરાજેન યુદ્ધે દૈત્યાસ્ તુ નિર્જિતાઃ
અગ્નિવાયુકુબેરેણ યમેન વરુણેન ચ ॥

માતૃભિર્ ગુહ્યકૈશ્ ચૈવ ગરુડેન ચ ધીમતા
દધીચિના ચ શુક્રેણ દુર્વાસેનાપિ ધીમતા ॥

ઋષિભિશ્ ચ તથા સર્વૈર્ દેવદૈત્યૈઃ કુજેશ્વરિ
તતસ્ ત્વ્ અન્યૈશ્ ચ રાજાનૈર્ બલિભિર્ નહુષાદિભિઃ ॥

યુદ્ધે જયાર્થિભિર્ દેવિ ઉગ્રવ્યાધિજયાર્થિભિઃ
પ્રજાવશ્યાર્થિભિશ્ ચૈવ ગુડિકા કણ્ઠધારિતા ॥

નાનયા સદૃશી વિદ્યા ગુડિકા ભુવિ વિદ્યતે
પિણ્ડં તુ પ્રથમં મન્ત્ર્યમ્ અઘોરેણ સુસંસ્કૃતમ્ ॥

ભુઞ્જીયાચ્ ચૈવ નિઃશઙ્કં તતસ્ તસ્યામૃતાયતે
દિશો ઽભિમન્ત્ર્ય ગચ્છેત વામં ચાગ્રપદં ન્યસેત્ ॥

ઉભયોશ્ ચન્દ્રમધ્યે તુ પર્યટેત સદા સ્થિતઃ
ભુઞ્જાને શયને ચૈવ ચન્દ્રમધ્યે સદા સ્થિતઃ ॥

ચન્દ્રારૂઢેન સતતં સ્થાતવ્યં વરવર્ણિનિ
નાઘોરસદૃશો મન્ત્રો મન્ત્રા યસ્માદ્ વિનિર્ગતાઃ ॥

ગુરુવક્ત્રાત્ તુ વિજ્ઞેયો મધ્યે ઓંકારમધ્યગમ્
સ એવ નાદસંલીનો યાવદ્ બ્રહ્મબિલં ગતઃ ॥

ધારણાદ્ ધારિતં કૃત્વા ત્રિભિઃ પ્રાણૈર્ અલઙ્કૃતમ્
સ્વચ્છન્દસહિતં દેવં વર્ણાન્તપરિવેષ્ટિતમ્ ॥

મુખે ઽનઙ્ગાં તતો દુગ્ધ્વા ધેનવીં ચામ્બરાં પ્રિયે
ગ્રાહ્યગ્રાહવિમર્દશ્ ચ ત્રિશૂલં વડવામુખમ્ ॥

કુઞ્ચિકા ઘણ્ટિકા ચૈવ રાજદન્તામૃતાગમમ્
આયુષો જ્ઞાનમ્ ઉત્ક્રાન્તિર્ અઘોરસ્ય વશે સ્થિતઃ ॥

નાઘોરસદૃશો મન્ત્રો મન્ત્રકોટિશતૈર્ અપિ
સત્યં સત્યં પુનઃ સત્યં ભૂયઃ સત્યં પુનઃ પુનઃ ॥

સર્વજ્ઞં પરમં મન્ત્રં મુક્તિદં વ્યાધિનાશનમ્
જરામૃત્યુહરં દેવિ વિદ્યારાજેતિ કીર્તિતમ્ ॥

વિષુવં ચ સદા તત્ર યત્ર સર્વં પ્રતિષ્ઠિતમ્
ઉત્પત્તિસ્થિતિકર્તારં યત્ર સર્વે લયં ગતાઃ ॥

કિં ન સેવ્યતિ દેવેશિ બહુરૂપં કુજેશ્વરિ
દેવાધિદેવં પરમં યત્ તત્ કારણમ્ અવ્યયમ્ ॥

તત્ત્વવ્યાપીતિ પરમં વ્યોમવ્યાપીતિ કથ્યતે
બ્રહ્મવિષ્ણુસુરાદીનામ્ ઉત્પત્તિપ્રલયાન્તિકમ્ ॥

અઘોરં ઘોરરૂપેતિ અઘોરીશ ઇતિ સ્મૃતઃ ॥