Kubjikamata Tantra · Chapter 10

kavacasya tu māhātmyaṃ śṛṇu devi vadāmy aham
yena saṃrakṣayet sarvaṃ kruddhaḥ śatrūn nipātayet //

āgataṃ rakṣayet kālaṃ kruddhaḥ kālaṃ vināśayet
kālavat kulasiddho 'sau tanutrāṇāvalambakaḥ //

śākinībhūtavetālān nāśayet sādhayeti ca
māyārūpadharo mantrī māhendraguṇaśālinaḥ //

kurute vividhāścaryaṃ picchakabhrāmaṇena vai
kavacaṃ tu samākhyātam asiddhabhedakṛd bhavet //

asya dūtīṃ pravakṣyāmi sadyaḥsiddhāṃ kulodbhavām
yasyā lekhanamātreṇa prasrāvo 'ṅghritalaṃ bhavet //

ākhkhilla bheṭṭā durvasa ākhkhille usi ānnidi
āṭṭi vasaṃ viha pūrvasa aṭṭi masi ālitto u //

evaṃ pārampareṇaiva kaulabhāṣā samuddhṛtā
guruvaktrād vilomena tarjanyagreṣu siddhidā //

kavacaṃ tu samākhyātaṃ śṛṇu netraṃ yathāsthitam
netrasiddho mahāyogī lokālokaṃ carācaram //

paśyate nikhilaṃ sarvaṃ śivādyavanigocaram
kruddhaḥ saṃśoṣayet sarvaṃ sāgarāṃś ca nadānadīn //

āpyāyati tadāvasthaṃ pañcavyāptyantagocaram
nirācārapadastho 'sau tattvastho japate yadi //

asya dūtī parā devyā paradṛṣṭisamudbhavā
sadyaḥsiddhā mahādevi sadyaḥpratyayakārikā //

guruvaktropadeśena pāramparyakrameṇa vai
tithisaṅkhyākalair yuktā kulabhāṣāsurakṣitā //

asyopacāraḥ kartavyaḥ kaumāryau dve samāharet
gandhadhūpapayaḥpānaṃ śucau sthāne nayet tu te //

śuklavastradharāṃ tāṃ vai devīṃ dhāyed yathā tu tām
bhāvanāntānusāreṇa mardayed dārikānanām //

śikhinocchiṣṭayogena śarīraṃ tasya lāñchitam
svastikena tu kumbhordhvaṃ sitavastrāvaguṇṭhitam //

kuryāt snānaṃ tu tailāktā bhuñjānas tilapiṣṭakam
tṛptāḥ santaḥ prapaśyanti dārikānanamadhyataḥ //

yat kiñcid vāṅmayaṃ loke cintayitvā tu sādhakaḥ
bhūtabhavyārthanirdeśaṃ tat pasyati tadodare //

eṣā netragatā dūtī sadyaḥsiddhiphalapradā
kālavelāvinirmuktā sādhitā sati sarvadā //

astraṃ pracaṇḍadaṇḍograṃ sādhitaṃ vidhinā yadi
hṛdādau kramaśo vṛddhyā saṅkruddhaḥ saṃharet khilam //

aśuddhaṃ śodhayet sarvaṃ sakṛduccāraṇāt tu tam
tan na vastvantaraṃ kiñcid yad anena na sidhyati //

asya dūtī mahāmāyā śrīmadguhyeśvarī parā
guhyakālīti nāmena sarvāyudhavimardanī //

rakṣaṇī kālapāśānāṃ śatrūṇāṃ tu nikṛntanī
chedanī paramantrāṇāṃ yantramantrāpavādinām //

yasyeṣā tiṣṭhate kaṇṭhe mahākṛtyā sudāruṇā
tasya yaḥ kurute kiñcit tasyaiva tu punar bhavet //

aśubhe vā śubhe vātha karmavṛttau niyojayet
sādhakendrasya yaḥ kaścit tasya pratyaṅgirā bhavet //

mahābhaye samutpanne sitagandhāmbarānvitaḥ
cintayanto niśābhāge śatror yuddhaṃ parasparam //

evam anyāni karmāṇi sādhayet parameśvarī
devyāḥ śastrasya dhāreṇa amoghotkaṭavarcasā //

śrūyatāṃ kula-m-īśāni kālasya kālarūpiṇī
amoghā śakti vikhyātā saṃvartāṅgasamudbhavā //

svāhā oṃ vai parityajya siddhavarṇās triṣaṣṭi ca
khādakāstreti vikhyātā sarvārthaguṇarūpadhṛk //

asya nāmnā pṛthaktantraṃ svatantraṃ siddhasāgaram
guhyakālīti nāmena sapādalakṣapūrvakam //

vyāvarṇitaṃ tu tatrastham atra kiñcid udāhṛtam
kubjikāstrasya māhātmyaṃ kulālītantranirgatam //

pāramparyakramāyātam upadeśasamanvitam
vilomavihitaṃ sarvaṃ khādakāstre 'py ayaṃ vidhiḥ //

khādakāstrasya lakṣeṇa nirācāreṇa yojayet
māṃsāhārasvarūpasya parivartaṃ karoti ca //

tatkṣaṇād viṣṇupaṅkena lepanāt siṃharūpadhṛk
jāyate nārasiṃhatvaṃ yad dhṛtaṃ viṣṇunā purā //

viṣṇunāpi purā cīrṇaṃ vrataṃ hy asyāḥ subhīṣaṇam
tena taṃ nārasiṃhatvaṃ tasya siddhaṃ sudāruṇam //

nāyātaṃ martyalokedaṃ kvacit siddhaṃ krame sthitam
māhātmyaṃ gopitaṃ hy asyāḥ siddhair bhṛgupuraḥsaraiḥ //

astrasya dūtikā hy eṣā kubjikāmnāyanirgatā
siddhavidyāmahaughaiṣā āśusiddhā sugopitā //

kuleśvaryāṅgasambhūtā suvratā yā guṇojjvalā
gopitā anyatantreṣu pratyakṣā kubjikāmate //

etad devyāṅgaṣaṭkaṃ tu nānānandapradāyakam
devyā hṛdayamāhātmyaṃ nityātantram aśeṣakam //

nityānandakarī dūtī devyā hṛdi samudbhavā
tena nityā samākhyātā svādhiṣṭhānaṃ samāśritā //

siddhātantraṃ śirodbhūtaṃ tatra devyā mahābalā
siddhayogeśvarī nāma raudraśaktir mahojjvalā //

anāhatena saṃyuktā raudradevyā mahābalā
siddhayogeśvarītantre asyāḥ kīrtir anekadhā //

devyāḥ śikhiśikhodbhūtā svacchandānekabhedataḥ
maṇibhedāntarālena svacchandādyaṃ vinirmitam //

svatantrā sahajā śāntā svacchandagatigāminī
maṇibhedaṃ pūrayantī svacchandārthaprabodhikā //

svacchandena svarūpeṇa śikhāsūtraṃ pravartate
svacchandāghorarūpasya tasyedaṃ tantram uttamam //

tanutrāṇasamudbhūtaṃ tantraṃ sammohanādikam
viśuddhibhāvanāsīnaṃ dūtyanekasusaṅkulam //

anekāścaryakartāraṃ sammohadhvaṃsakārakam
sammohanaṃ tu tenedaṃ māhātmyaṃ tatra tasya vai //

devyā netrasamudbhūtaṃ jyotiḥśāstraṃ svarodayam
ājñādhāragataṃ hy etat sāmarthyānekasaṅkulam //

kaivalyādyaṃ ca yat kiñcit tan netrāṅgasamudbhavam
asyāṅgasya tu māhātmyaṃ jyotiṣeśvarasāgare //

paramāstrasya madhye tu khādakāstraṃ mahābalam
tasya vyāvarṇitaṃ pūrvaṃ tantraṃ svābhāvalakṣaṇam //

abhiṣekaṃ pravakṣyāmi sarvapāpapraṇāśanam
paramāstraprayogena sarvaṃ tatra na saṃśayaḥ //

śūladaṇḍaṃ samuddhṛtya nābhisthaṃ varṇam uddharet
śūladaṇḍāsanasthaṃ tu karṇabhūṣaṇavāmakam //

vāmajaṅghāsamāyuktaṃ nitambālaṅkṛtaṃ priye
etad devyāstraparamaṃ nāpuṇyo labhate sphuṭam //

kramapūjāvidhānena yathāvibhavavistaram
dīpamālābhir uddyotaṃ kṛtvā dhūpādhivāsitam //

śaṅkhaṃ vā kalaśaṃ vāpi abhimantrya svavidyayā
uttamādhamamadhyasya karmasevānusārataḥ //

tayā vidyābhiṣekaṃ tu nyastavyā kalaśe tu sā
śiṣyahaste tu taṃ dattvā idaṃ kūṭaṃ tu yojayet //

yāvat kṣubhyaty asau hastaḥ svayam eva calaty asau
dhāraṇād iva saṃyātaṃ yadā patati mastake //

tadā tu jāyate 'sau vai sādhyalakṣaṇasādhakaḥ
dagdhapāpaḥ prajāyeta nātra kāryavicāraṇāt //

nāśiṣyāya pradātavyaṃ na dhūrtāya na nindake
bhaktāya śraddadhānāya gurubhaktāya sundari //

tasya deyam idaṃ devi abhiṣekaṃ varānane
tadā tu sādhayet karma yad uktaṃ karmasantatau //

lakṣaṃ vai pūrvasevāyāṃ sidhyate nātra saṃśayaḥ
ṣaḍaṅgaṃ ṣaṭprakāraṃ ca ṣaḍyoginyaḥ ṣaḍadhvaram //

ṣaṭ prakārāṇi ṣaṭ siddhā jñātvaitān bhinnadṛṣṭinā
sa jānāti varārohe samastāmnāyapaddhatim //

anyathā na bhavet siddhiḥ kiñcijjñaḥ paścimānvaye
śrutvā savismayaṃ vākyam ānandapraṇayānvitam //

uvācedaṃ punaḥ kubjī ṣaḍadhvaṃ vada me prabho //

yuktam uktaṃ ca deveśi śrūyatāṃ paramārthataḥ
saṅkṣepāt kathayiṣyāmi śeṣānyat purataḥ punaḥ //

bhūtaṃ bhāvaṃ tathā śāktaṃ māntraṃ raudraṃ ca śāmbhavam
ājñātaḥ sampravarteta ṣaḍadhvedaṃ kulānvaye //

bhūtaṃ bhuvanāvaraṇaṃ padaṃ bhāvaṃ prayujyate
śāktaṃ varṇāḥ samākhyātā māntraṃ dvādaśa kīrtitāḥ //

raudraṃ kalādhvaraṃ proktaṃ śāmbhavaṃ tattvalakṣaṇam
ājñānalavatī dīkṣā mantrāṇāṃ sādhane hitā //

sā cājñā pūrvikā siddhā anyathā tilaghātakī
sā ca tattvavatāṃ caiva tattvaṃ vai śāmbhavam padam //

tat padaṃ vidyate yasya sāmarthajñaḥ sa sarvaśaḥ
jñānamārgaprasiddhyarthaṃ dīkṣā vedhavatī śubhā //

yogyatātaḥ pradātavyā subhaktasya kulādhvare
sarvāsām eva dīkṣānāṃ cottamā parikīrtitā //

tena vedho na kartavyo na jñātaṃ yāva niścayam
śāmbhavājñābhimānena lobhamohaḥ prakīrtitaḥ //

sāmarthyo 'nyo na me tulyo ya evaṃ manyate kudhīḥ
ājñātaḥ sampravarteta kiṃ tu bhūtavatī bhavet //

atha cet paripakvasya ṣaḍvidho hy alpasvalpavat
pṛthivyādīni bhūtāni cāviśanti ca yasya vai //

bhūtāveśaṃ tu tad viddhi bhāvāveśam ataḥ śṛṇu
śabdaḥ sparśas tathā rūpaṃ raso gandhaś ca bhāvajam //

śrotraṃ tvak cakṣuṣī jihvā ghrāṇaṃ śaktimano viduḥ
vācā pāṇis tathā pādaṃ pāyūpasthaṃ tu māntrajam //

mano buddhis tathā garvaḥ prakṛtau guṇa raudrajam
puruṣādinivṛt[t]yantam unmanatvaṃ parāntikam //

etat te śāmbhavaṃ jñānaṃ bhuvanādyaṃ mahāhradam //

bhūtādiśāmbhavāntasya bhedopāyaṃ pṛthak pṛthak
kathitaṃ tu yathā nātha tathā tatpratyayaṃ vada //

sādhu devi mahāprājñe kathayāmi sapratyayam
anyathā tat kathaṃ tasya bhrāntijñānaṃ vinaśyati //

kampate bhramate rodec cotpaten nipated vadet
anibaddharavonmādī sasaṃjño bhūtavad yathā //

bhūtāveśasya cihnedaṃ bhāvāveśam ataḥ śṛṇu
yāni cihnāni jāyante bhāvaviddhasya bhāvini //

ghūrmaṇaṃ svedaromāñca aśrupātāṅgamoṭanam
ārādhya smaraṇād evaṃ sampadyante svabhāvadhṛk //

bhramate cakravat pātaḥ kāṣṭhavat kṣubhitekṣaṇaḥ
paśyate vibhramāpannaḥ śaktivedhopalakṣayet //

kampate bhramate caiva jalpate vadate 'khilam
mantrāveśasya cihnedaṃ kathitaṃ tava śobhane //

raudraṃ caivam ato brūmi pañcāvasthā[ s] tu raudrajāḥ
anādhītāni śāstrāṇi granthataś cārthataḥ sudhīḥ //

atītānāgataṃ sarvaṃ vartamānasya yat phalam
raudraśaktisamāveśāt sarvam eva prapadyate //

yasyedaṃ vartate cihnaṃ raudrāveśaṃ tad ucyate
śāmbhavena tu vedhena sarvāṇy etāni suvrate //

śuddhaśāmbhavavedhasya sāmprataṃ nirṇayaṃ śṛṇu
yena viddhasya loke 'smin sarvajñatvaṃ prapadyate //

pūrvoktena tu kālena śodhitas tu yadā śiśuḥ
tadā sampadyate tasya śāmbhavaṃ guṇadāyakam //

kubjīśo yaṃ yadāyātaḥ puṃso janmany apaścime
tadā sampadyate tasya śāmbhavaṃ kubjike tanau //

bahvarthakāle 'pi viśodhitātmā ātmaiva sau paśyati sarvabhūtān
na me samāno bhuvanāntarāle viśuddhabhāvo bhavate hy akāle //

ekaikaṃ bhuvanaṃ paśyet puṃsādau conmanāvadhim
viśuddhatanujo hy evaṃ dehenānena cotpatet //

na kampadhunane tasya īśadghūrmiḥ pravartate
viṣonmūrchāgatas tv evaṃ tiṣṭhate bhūtakumbhavat //

paśyate cāgrataḥ sarvaṃ tattvavrātaṃ sadoditam
tatkṣaṇād viṣayān mucyej jīrṇakañcur yathoragaḥ //

sadānandamadonmattaḥ sarvajñaguṇabhūṣitaḥ
śāmbhavena tu viddhasya cihnedaṃ sampravartate //

bhūtabhāvanaśaktīnāṃ mantrāveśa[ ṃ ] saraudrajam
krameṇa śāmbhavas teṣāṃ viśuddhatvaṃ yathā yathā //

jhalajhaleti yad vedhaṃ sampūrṇaghaṭavad yathā
bhūtāntaśaktimantrādau tathedaṃ sampracakṣyate //

gurubhaktivihīnānāṃ vañcakānāṃ yaśasvini
pūrvaṃ śāmbhavaviddhasya bhūtādyaṃ sampravartate //

vedhadīkṣāparaṃ nāsti kathaṃ sā pratyayātmikā
pratyaye sati sañjāte kathaṃ tan mokṣalakṣaṇam //

pratyaye sati mokṣo ' sti piṇḍapātena sarvathā
viṣayeṣu na mucyeta siddhabhāvaṃ na gacchati //

śāmbhavena tu vedhena tatkṣaṇād viṣayojjhitaḥ
viṣayojjhita-ātmā vai dehenānena cotpatet //

yena vedhena viddhasya sukhāsvādo na vidyate
sa kathaṃ svārthanirmukto viṣayeṣu virajyate //

śāmbhave na hi samprāpte darpeṇākulitekṣaṇaḥ
nāyakaiḥ so 'bhibhūyeta na sidhyaty adhikārakṛt //

ājñānande samutpanne na gantavyaṃ guroḥ kulāt
kasmāt sāmarthyahetvarthaṃ yāvan notpādayed guṇān //

divā preṣaṇatanniṣṭho rātrau jñānaparigrahaḥ
evaṃ sampādayet sarvaṃ sāmarthyaṃ tu guroḥ kule //

apreṣite na gantavyaṃ na kuryāc colbaṇādikam
ye na kopavaśād ājñāṃ dāsyanti gamanaṃ prati //

śāmbhavājñāsamutpanne ya evaṃ kurute kudhīḥ
tasya pīṭhādhipāḥ pālāś cābhibhūyanty anekadhā //

anuṣṭhānatapopāyair yadānandabhṛtas tanuḥ
tadādhikāraḥ kartavyo yasyājñā tasya tatpade //

anujñāto 'bhiṣiktasya nāmamālāṃ prakāśayet
navapañcavidhaṃ dravyaṃ pūjārthe sampradarśitam //

śubhe 'hani muhūrte ca caturdaśyāṣṭamīṣu ca
darpaṇodarabhūbhāge vastre vātha suśobhane //

tatopari yajet siddhān sarvajñaguṇaśālinān
caturviṃśa ṣoḍaśaivam aṣṭau caiva tripaṅktiṣu //

dvau siddhau madhyadeśe tu kuṅkumena tu cākṣataiḥ
trihastaṃ maṇḍalaṃ kuryād ūrdhvādau pūrvapaścimam //

śṛṅgātakākṛti hy evaṃ tatra pūjāṃ samārabhet
pūjayitvā vidhānena dravyaiḥ pañcanavādibhiḥ //

pṛthagdīpaiḥ pūjayitvā phalguṣālisugandhibhiḥ
supraṇītaṃ subhaktaṃ ca ājñāguṇavidhāyinam //

tataḥ praveśayec chiṣyaṃ puṣpaṃ mocāpayed iti
yasmin mārge patet puṣpaṃ tan nāma tasya dāpayet //

prakaṭaṃ śiva vijñeyaṃ guptam ānanda-m-ucyate
akārādikṣakārāntaṃ pañcāśaguṇalakṣitam //

akṣare akṣare siddhaṃ puṣpapātād vilakṣayet
śrīkaṇṭhānantasūkṣmeśaṃ trimūrtir amaro 'rghinaḥ //

tithīśo bhārabhūtiś ca sthāṇunāmo haras tathā
jhaṇṭīśo bhauktikaś caiva sadyojātas tv anugrahī //

krūrasenas tathānyo vai mahāsenas tataḥ paraḥ
prathamādau sthitā hy ete upariṣṭād vilakṣayet //

krodhaś caṇḍaḥ pracaṇḍaś ca śivaikarudra eva ca
kūrmaś caivaikanetraś ca caturāsyo 'vasānugaḥ //

prathamā yā sthitā paṅktiḥ pīṭhatrayavibhūṣitā
ajeśaḥ śarma somaś ca lāṅgulīśo 'tha dārukaḥ //

ardhanāryo hy umākānto āṣāḍhī diṇḍir eva ca
dhātrīśaś ca tathā mīno meṣo lohita-m-eva ca //

śikhīśaś chagalaṇḍaś ca dviraṇḍo madhyapaṅktigāḥ
mahākālaś ca vālākhyo bhujaṅgākhyaḥ pinākinaḥ //

khaḍgānando bakānandaḥ śvetānandas tathaiva ca
bhṛguś caivāntime cakre aṣṭau tāṃś ca prapūjayet //

lākulānanda madhyasthaṃ saṃvartānandasaṃyutam
tayor madhyagatāṃ devīṃ kubjikāṃ parameśvarīm //

pūjayet pīṭhasaṃyuktāṃ pāramparyeṇa saṃyutām
yathā siddhās tathā devyāḥ saṃhāryādi prapūjayet //

vāgeśyantāḥ krameṇaiva guruvaktraprasādataḥ
ṣaḍāre ḍādiṣaṭkaṃ tu krameṇaiva prapūjayet //

kulāṣṭakaṃ tato bāhye aṣṭāre paṅkaje kramāt
pañcadravyabhṛtaṃ pātraṃ tadagre sanniveśayet //

kramāmnāyaṃ punaḥ pātre kuryāt tenābhiṣecanam
mukhena vātha kartavyaṃ yasyopari subhāvanā //

tataś cādeśayet taṃ tu kuru kāryaṃ yadṛcchayā
adhikārapadaṃ sarvaṃ mokṣitaṃ te prasādataḥ //

tataḥ prabhṛti deveśi yogyo bhavati śāsane
śāsanaṃ bhūṣayen nityaṃ guptācāravidhau sthitaḥ //

avyaktena tu liṅgena vyaktaliṅgena vā punaḥ
yena liṅgena yasyedaṃ talliṅgaṃ na parityajet //

ākāśāt patitaṃ toyaṃ yathā gacchati sāgaram
gartānadyopacāreṇa tathā sarvaṃ kulānvaye //

yāsyanti liṅginaḥ sarve niścayārtho 'nyathā na hi
kasmāt pratyakṣarūpeṇa tatrājñā vartate yataḥ //

samudravat kulānandaṃ yasmāt tat sarvatomukham
kulaṃ tad eva vijñeyaṃ sarvānugrahakārakam //

brāhmaṇaṃ kṣatriyaṃ vaiśyaṃ śūdraṃ prākṛtam antyajam
mātaṅgamlecchajātyutthaṃ bauddhasāṅkhyadigambaram //

tridaṇḍamuṇḍakhaṭvāṅga muṣalānyakriyānvitam
yāsyanti paramaṃ śaivaṃ śaivo yāti na kutracit //

tac ca kaulabhṛtānandaṃ netaraṃ tu kriyākulam
sarvajñamārgavihitaṃ sarvācāraprapālakam //

kaulikācāramārgeṇa bhāvādvaitena sarvathā
tattvādvaitena mārgeṇa sarvathā yatra saṃsthitaḥ //

pālayel laukikācāram advaitaṃ samanuṣṭhayet
gopayed guptaliṅgāni tatpraviṣṭāni sarvathā //

adhamād uttamaṃ jñānaṃ yady arthī uttamo bhavet
liṅgino vā dvijanmā vā ājñārthī tu na vañcayet //

ekānte vihitaṃ sarvaṃ kurvīta na janākule
anyathā sthitibhaṅgaḥ syān naśyate śāsanaṃ priye //

varjayet kaulikān bauddhān tathā mīmāṃsakāsthitān
kasmād bhraṣṭakriyā teṣāṃ na mokṣo naiva sādhanam //

jihvopasthanimittārtham advaitaṃ teṣu sarvathā
kaulikācāranirmuktāḥ śvānavad vicaranti te //

nirācāraṃ prakurvanti nirācāravivarjitāḥ
viṣaṃ bhakṣanti te mūḍhā yathājñāmantravarjitāḥ //

yady api te trikālajñās trailokyākarṣaṇakṣamāḥ
tathāpi saṃvṛtācārāḥ pālayanti kulasthitim //

nirācāreṇa yogena paśyanti viṣayojjhitāḥ
viṣayastho 'pahāsitvaṃ nirācāreṇa yāty asau //

bhraṣṭanaṣṭakulaṃ tyajya kulakaulaṃ samāśrayet
tatra yogigurūṇāṃ ca pūjyate caraṇāmbujam //

samayena vinā devi samartho bhavate katham
sāmarthyena vinā caryā nirācārātmikā bhavet //

jñātvāmnāyapadaṃ sarvaṃ yathāvasthaṃ kuleśvaram
ṣaṭprakāravidhānena nirgatācārarūpiṇam //

sāmarthyaguṇayuktātmā viṣayātīto jitendriyaḥ
virajo rañjitātmā vai nirācāro bhavet tu saḥ //

etat te kathitaṃ devi sarahasyaṃ sugopitam
anyad yat te manasthaṃ tu tat pṛccha vadato mama //