Kubjikamatatantra · અધ્યાય 10

કવચસ્ય તુ માહાત્મ્યં શૃણુ દેવિ વદામ્ય્ અહમ્
યેન સંરક્ષયેત્ સર્વં ક્રુદ્ધઃ શત્રૂન્ નિપાતયેત્ ॥

આગતં રક્ષયેત્ કાલં ક્રુદ્ધઃ કાલં વિનાશયેત્
કાલવત્ કુલસિદ્ધો ઽસૌ તનુત્રાણાવલમ્બકઃ ॥

શાકિનીભૂતવેતાલાન્ નાશયેત્ સાધયેતિ ચ
માયારૂપધરો મન્ત્રી માહેન્દ્રગુણશાલિનઃ ॥

કુરુતે વિવિધાશ્ચર્યં પિચ્છકભ્રામણેન વૈ
કવચં તુ સમાખ્યાતમ્ અસિદ્ધભેદકૃદ્ ભવેત્ ॥

અસ્ય દૂતીં પ્રવક્ષ્યામિ સદ્યઃસિદ્ધાં કુલોદ્ભવામ્
યસ્યા લેખનમાત્રેણ પ્રસ્રાવો ઽઙ્ઘ્રિતલં ભવેત્ ॥

આખ્ખિલ્લ ભેટ્ટા દુર્વસ આખ્ખિલ્લે ઉસિ આન્નિદિ
આટ્ટિ વસં વિહ પૂર્વસ અટ્ટિ મસિ આલિત્તો ઉ ॥

એવં પારમ્પરેણૈવ કૌલભાષા સમુદ્ધૃતા
ગુરુવક્ત્રાદ્ વિલોમેન તર્જન્યગ્રેષુ સિદ્ધિદા ॥

કવચં તુ સમાખ્યાતં શૃણુ નેત્રં યથાસ્થિતમ્
નેત્રસિદ્ધો મહાયોગી લોકાલોકં ચરાચરમ્ ॥

પશ્યતે નિખિલં સર્વં શિવાદ્યવનિગોચરમ્
ક્રુદ્ધઃ સંશોષયેત્ સર્વં સાગરાંશ્ ચ નદાનદીન્ ॥

આપ્યાયતિ તદાવસ્થં પઞ્ચવ્યાપ્ત્યન્તગોચરમ્
નિરાચારપદસ્થો ઽસૌ તત્ત્વસ્થો જપતે યદિ ॥

અસ્ય દૂતી પરા દેવ્યા પરદૃષ્ટિસમુદ્ભવા
સદ્યઃસિદ્ધા મહાદેવિ સદ્યઃપ્રત્યયકારિકા ॥

ગુરુવક્ત્રોપદેશેન પારમ્પર્યક્રમેણ વૈ
તિથિસઙ્ખ્યાકલૈર્ યુક્તા કુલભાષાસુરક્ષિતા ॥

અસ્યોપચારઃ કર્તવ્યઃ કૌમાર્યૌ દ્વે સમાહરેત્
ગન્ધધૂપપયઃપાનં શુચૌ સ્થાને નયેત્ તુ તે ॥

શુક્લવસ્ત્રધરાં તાં વૈ દેવીં ધાયેદ્ યથા તુ તામ્
ભાવનાન્તાનુસારેણ મર્દયેદ્ દારિકાનનામ્ ॥

શિખિનોચ્છિષ્ટયોગેન શરીરં તસ્ય લાઞ્છિતમ્
સ્વસ્તિકેન તુ કુમ્ભોર્ધ્વં સિતવસ્ત્રાવગુણ્ઠિતમ્ ॥

કુર્યાત્ સ્નાનં તુ તૈલાક્તા ભુઞ્જાનસ્ તિલપિષ્ટકમ્
તૃપ્તાઃ સન્તઃ પ્રપશ્યન્તિ દારિકાનનમધ્યતઃ ॥

યત્ કિઞ્ચિદ્ વાઙ્મયં લોકે ચિન્તયિત્વા તુ સાધકઃ
ભૂતભવ્યાર્થનિર્દેશં તત્ પસ્યતિ તદોદરે ॥

એષા નેત્રગતા દૂતી સદ્યઃસિદ્ધિફલપ્રદા
કાલવેલાવિનિર્મુક્તા સાધિતા સતિ સર્વદા ॥

અસ્ત્રં પ્રચણ્ડદણ્ડોગ્રં સાધિતં વિધિના યદિ
હૃદાદૌ ક્રમશો વૃદ્ધ્યા સઙ્ક્રુદ્ધઃ સંહરેત્ ખિલમ્ ॥

અશુદ્ધં શોધયેત્ સર્વં સકૃદુચ્ચારણાત્ તુ તમ્
તન્ ન વસ્ત્વન્તરં કિઞ્ચિદ્ યદ્ અનેન ન સિધ્યતિ ॥

અસ્ય દૂતી મહામાયા શ્રીમદ્ગુહ્યેશ્વરી પરા
ગુહ્યકાલીતિ નામેન સર્વાયુધવિમર્દની ॥

રક્ષણી કાલપાશાનાં શત્રૂણાં તુ નિકૃન્તની
છેદની પરમન્ત્રાણાં યન્ત્રમન્ત્રાપવાદિનામ્ ॥

યસ્યેષા તિષ્ઠતે કણ્ઠે મહાકૃત્યા સુદારુણા
તસ્ય યઃ કુરુતે કિઞ્ચિત્ તસ્યૈવ તુ પુનર્ ભવેત્ ॥

અશુભે વા શુભે વાથ કર્મવૃત્તૌ નિયોજયેત્
સાધકેન્દ્રસ્ય યઃ કશ્ચિત્ તસ્ય પ્રત્યઙ્ગિરા ભવેત્ ॥

મહાભયે સમુત્પન્ને સિતગન્ધામ્બરાન્વિતઃ
ચિન્તયન્તો નિશાભાગે શત્રોર્ યુદ્ધં પરસ્પરમ્ ॥

એવમ્ અન્યાનિ કર્માણિ સાધયેત્ પરમેશ્વરી
દેવ્યાઃ શસ્ત્રસ્ય ધારેણ અમોઘોત્કટવર્ચસા ॥

શ્રૂયતાં કુલ-મ્-ઈશાનિ કાલસ્ય કાલરૂપિણી
અમોઘા શક્તિ વિખ્યાતા સંવર્તાઙ્ગસમુદ્ભવા ॥

સ્વાહા ઓં વૈ પરિત્યજ્ય સિદ્ધવર્ણાસ્ ત્રિષષ્ટિ ચ
ખાદકાસ્ત્રેતિ વિખ્યાતા સર્વાર્થગુણરૂપધૃક્ ॥

અસ્ય નામ્ના પૃથક્તન્ત્રં સ્વતન્ત્રં સિદ્ધસાગરમ્
ગુહ્યકાલીતિ નામેન સપાદલક્ષપૂર્વકમ્ ॥

વ્યાવર્ણિતં તુ તત્રસ્થમ્ અત્ર કિઞ્ચિદ્ ઉદાહૃતમ્
કુબ્જિકાસ્ત્રસ્ય માહાત્મ્યં કુલાલીતન્ત્રનિર્ગતમ્ ॥

પારમ્પર્યક્રમાયાતમ્ ઉપદેશસમન્વિતમ્
વિલોમવિહિતં સર્વં ખાદકાસ્ત્રે ઽપ્ય્ અયં વિધિઃ ॥

ખાદકાસ્ત્રસ્ય લક્ષેણ નિરાચારેણ યોજયેત્
માંસાહારસ્વરૂપસ્ય પરિવર્તં કરોતિ ચ ॥

તત્ક્ષણાદ્ વિષ્ણુપઙ્કેન લેપનાત્ સિંહરૂપધૃક્
જાયતે નારસિંહત્વં યદ્ ધૃતં વિષ્ણુના પુરા ॥

વિષ્ણુનાપિ પુરા ચીર્ણં વ્રતં હ્ય્ અસ્યાઃ સુભીષણમ્
તેન તં નારસિંહત્વં તસ્ય સિદ્ધં સુદારુણમ્ ॥

નાયાતં મર્ત્યલોકેદં ક્વચિત્ સિદ્ધં ક્રમે સ્થિતમ્
માહાત્મ્યં ગોપિતં હ્ય્ અસ્યાઃ સિદ્ધૈર્ ભૃગુપુરઃસરૈઃ ॥

અસ્ત્રસ્ય દૂતિકા હ્ય્ એષા કુબ્જિકામ્નાયનિર્ગતા
સિદ્ધવિદ્યામહૌઘૈષા આશુસિદ્ધા સુગોપિતા ॥

કુલેશ્વર્યાઙ્ગસમ્ભૂતા સુવ્રતા યા ગુણોજ્જ્વલા
ગોપિતા અન્યતન્ત્રેષુ પ્રત્યક્ષા કુબ્જિકામતે ॥

એતદ્ દેવ્યાઙ્ગષટ્કં તુ નાનાનન્દપ્રદાયકમ્
દેવ્યા હૃદયમાહાત્મ્યં નિત્યાતન્ત્રમ્ અશેષકમ્ ॥

નિત્યાનન્દકરી દૂતી દેવ્યા હૃદિ સમુદ્ભવા
તેન નિત્યા સમાખ્યાતા સ્વાધિષ્ઠાનં સમાશ્રિતા ॥

સિદ્ધાતન્ત્રં શિરોદ્ભૂતં તત્ર દેવ્યા મહાબલા
સિદ્ધયોગેશ્વરી નામ રૌદ્રશક્તિર્ મહોજ્જ્વલા ॥

અનાહતેન સંયુક્તા રૌદ્રદેવ્યા મહાબલા
સિદ્ધયોગેશ્વરીતન્ત્રે અસ્યાઃ કીર્તિર્ અનેકધા ॥

દેવ્યાઃ શિખિશિખોદ્ભૂતા સ્વચ્છન્દાનેકભેદતઃ
મણિભેદાન્તરાલેન સ્વચ્છન્દાદ્યં વિનિર્મિતમ્ ॥

સ્વતન્ત્રા સહજા શાન્તા સ્વચ્છન્દગતિગામિની
મણિભેદં પૂરયન્તી સ્વચ્છન્દાર્થપ્રબોધિકા ॥

સ્વચ્છન્દેન સ્વરૂપેણ શિખાસૂત્રં પ્રવર્તતે
સ્વચ્છન્દાઘોરરૂપસ્ય તસ્યેદં તન્ત્રમ્ ઉત્તમમ્ ॥

તનુત્રાણસમુદ્ભૂતં તન્ત્રં સમ્મોહનાદિકમ્
વિશુદ્ધિભાવનાસીનં દૂત્યનેકસુસઙ્કુલમ્ ॥

અનેકાશ્ચર્યકર્તારં સમ્મોહધ્વંસકારકમ્
સમ્મોહનં તુ તેનેદં માહાત્મ્યં તત્ર તસ્ય વૈ ॥

દેવ્યા નેત્રસમુદ્ભૂતં જ્યોતિઃશાસ્ત્રં સ્વરોદયમ્
આજ્ઞાધારગતં હ્ય્ એતત્ સામર્થ્યાનેકસઙ્કુલમ્ ॥

કૈવલ્યાદ્યં ચ યત્ કિઞ્ચિત્ તન્ નેત્રાઙ્ગસમુદ્ભવમ્
અસ્યાઙ્ગસ્ય તુ માહાત્મ્યં જ્યોતિષેશ્વરસાગરે ॥

પરમાસ્ત્રસ્ય મધ્યે તુ ખાદકાસ્ત્રં મહાબલમ્
તસ્ય વ્યાવર્ણિતં પૂર્વં તન્ત્રં સ્વાભાવલક્ષણમ્ ॥

અભિષેકં પ્રવક્ષ્યામિ સર્વપાપપ્રણાશનમ્
પરમાસ્ત્રપ્રયોગેન સર્વં તત્ર ન સંશયઃ ॥

શૂલદણ્ડં સમુદ્ધૃત્ય નાભિસ્થં વર્ણમ્ ઉદ્ધરેત્
શૂલદણ્ડાસનસ્થં તુ કર્ણભૂષણવામકમ્ ॥

વામજઙ્ઘાસમાયુક્તં નિતમ્બાલઙ્કૃતં પ્રિયે
એતદ્ દેવ્યાસ્ત્રપરમં નાપુણ્યો લભતે સ્ફુટમ્ ॥

ક્રમપૂજાવિધાનેન યથાવિભવવિસ્તરમ્
દીપમાલાભિર્ ઉદ્દ્યોતં કૃત્વા ધૂપાધિવાસિતમ્ ॥

શઙ્ખં વા કલશં વાપિ અભિમન્ત્ર્ય સ્વવિદ્યયા
ઉત્તમાધમમધ્યસ્ય કર્મસેવાનુસારતઃ ॥

તયા વિદ્યાભિષેકં તુ ન્યસ્તવ્યા કલશે તુ સા
શિષ્યહસ્તે તુ તં દત્ત્વા ઇદં કૂટં તુ યોજયેત્ ॥

યાવત્ ક્ષુભ્યત્ય્ અસૌ હસ્તઃ સ્વયમ્ એવ ચલત્ય્ અસૌ
ધારણાદ્ ઇવ સંયાતં યદા પતતિ મસ્તકે ॥

તદા તુ જાયતે ઽસૌ વૈ સાધ્યલક્ષણસાધકઃ
દગ્ધપાપઃ પ્રજાયેત નાત્ર કાર્યવિચારણાત્ ॥

નાશિષ્યાય પ્રદાતવ્યં ન ધૂર્તાય ન નિન્દકે
ભક્તાય શ્રદ્દધાનાય ગુરુભક્તાય સુન્દરિ ॥

તસ્ય દેયમ્ ઇદં દેવિ અભિષેકં વરાનને
તદા તુ સાધયેત્ કર્મ યદ્ ઉક્તં કર્મસન્તતૌ ॥

લક્ષં વૈ પૂર્વસેવાયાં સિધ્યતે નાત્ર સંશયઃ
ષડઙ્ગં ષટ્પ્રકારં ચ ષડ્યોગિન્યઃ ષડધ્વરમ્ ॥

ષટ્ પ્રકારાણિ ષટ્ સિદ્ધા જ્ઞાત્વૈતાન્ ભિન્નદૃષ્ટિના
સ જાનાતિ વરારોહે સમસ્તામ્નાયપદ્ધતિમ્ ॥

અન્યથા ન ભવેત્ સિદ્ધિઃ કિઞ્ચિજ્જ્ઞઃ પશ્ચિમાન્વયે
શ્રુત્વા સવિસ્મયં વાક્યમ્ આનન્દપ્રણયાન્વિતમ્ ॥

ઉવાચેદં પુનઃ કુબ્જી ષડધ્વં વદ મે પ્રભો ॥

યુક્તમ્ ઉક્તં ચ દેવેશિ શ્રૂયતાં પરમાર્થતઃ
સઙ્ક્ષેપાત્ કથયિષ્યામિ શેષાન્યત્ પુરતઃ પુનઃ ॥

ભૂતં ભાવં તથા શાક્તં માન્ત્રં રૌદ્રં ચ શામ્ભવમ્
આજ્ઞાતઃ સમ્પ્રવર્તેત ષડધ્વેદં કુલાન્વયે ॥

ભૂતં ભુવનાવરણં પદં ભાવં પ્રયુજ્યતે
શાક્તં વર્ણાઃ સમાખ્યાતા માન્ત્રં દ્વાદશ કીર્તિતાઃ ॥

રૌદ્રં કલાધ્વરં પ્રોક્તં શામ્ભવં તત્ત્વલક્ષણમ્
આજ્ઞાનલવતી દીક્ષા મન્ત્રાણાં સાધને હિતા ॥

સા ચાજ્ઞા પૂર્વિકા સિદ્ધા અન્યથા તિલઘાતકી
સા ચ તત્ત્વવતાં ચૈવ તત્ત્વં વૈ શામ્ભવમ્ પદમ્ ॥

તત્ પદં વિદ્યતે યસ્ય સામર્થજ્ઞઃ સ સર્વશઃ
જ્ઞાનમાર્ગપ્રસિદ્ધ્યર્થં દીક્ષા વેધવતી શુભા ॥

યોગ્યતાતઃ પ્રદાતવ્યા સુભક્તસ્ય કુલાધ્વરે
સર્વાસામ્ એવ દીક્ષાનાં ચોત્તમા પરિકીર્તિતા ॥

તેન વેધો ન કર્તવ્યો ન જ્ઞાતં યાવ નિશ્ચયમ્
શામ્ભવાજ્ઞાભિમાનેન લોભમોહઃ પ્રકીર્તિતઃ ॥

સામર્થ્યો ઽન્યો ન મે તુલ્યો ય એવં મન્યતે કુધીઃ
આજ્ઞાતઃ સમ્પ્રવર્તેત કિં તુ ભૂતવતી ભવેત્ ॥

અથ ચેત્ પરિપક્વસ્ય ષડ્વિધો હ્ય્ અલ્પસ્વલ્પવત્
પૃથિવ્યાદીનિ ભૂતાનિ ચાવિશન્તિ ચ યસ્ય વૈ ॥

ભૂતાવેશં તુ તદ્ વિદ્ધિ ભાવાવેશમ્ અતઃ શૃણુ
શબ્દઃ સ્પર્શસ્ તથા રૂપં રસો ગન્ધશ્ ચ ભાવજમ્ ॥

શ્રોત્રં ત્વક્ ચક્ષુષી જિહ્વા ઘ્રાણં શક્તિમનો વિદુઃ
વાચા પાણિસ્ તથા પાદં પાયૂપસ્થં તુ માન્ત્રજમ્ ॥

મનો બુદ્ધિસ્ તથા ગર્વઃ પ્રકૃતૌ ગુણ રૌદ્રજમ્
પુરુષાદિનિવૃત્[ત્]યન્તમ્ ઉન્મનત્વં પરાન્તિકમ્ ॥

એતત્ તે શામ્ભવં જ્ઞાનં ભુવનાદ્યં મહાહ્રદમ્ ॥

ભૂતાદિશામ્ભવાન્તસ્ય ભેદોપાયં પૃથક્ પૃથક્
કથિતં તુ યથા નાથ તથા તત્પ્રત્યયં વદ ॥

સાધુ દેવિ મહાપ્રાજ્ઞે કથયામિ સપ્રત્યયમ્
અન્યથા તત્ કથં તસ્ય ભ્રાન્તિજ્ઞાનં વિનશ્યતિ ॥

કમ્પતે ભ્રમતે રોદેચ્ ચોત્પતેન્ નિપતેદ્ વદેત્
અનિબદ્ધરવોન્માદી સસંજ્ઞો ભૂતવદ્ યથા ॥

ભૂતાવેશસ્ય ચિહ્નેદં ભાવાવેશમ્ અતઃ શૃણુ
યાનિ ચિહ્નાનિ જાયન્તે ભાવવિદ્ધસ્ય ભાવિનિ ॥

ઘૂર્મણં સ્વેદરોમાઞ્ચ અશ્રુપાતાઙ્ગમોટનમ્
આરાધ્ય સ્મરણાદ્ એવં સમ્પદ્યન્તે સ્વભાવધૃક્ ॥

ભ્રમતે ચક્રવત્ પાતઃ કાષ્ઠવત્ ક્ષુભિતેક્ષણઃ
પશ્યતે વિભ્રમાપન્નઃ શક્તિવેધોપલક્ષયેત્ ॥

કમ્પતે ભ્રમતે ચૈવ જલ્પતે વદતે ઽખિલમ્
મન્ત્રાવેશસ્ય ચિહ્નેદં કથિતં તવ શોભને ॥

રૌદ્રં ચૈવમ્ અતો બ્રૂમિ પઞ્ચાવસ્થા[ સ્] તુ રૌદ્રજાઃ
અનાધીતાનિ શાસ્ત્રાણિ ગ્રન્થતશ્ ચાર્થતઃ સુધીઃ ॥

અતીતાનાગતં સર્વં વર્તમાનસ્ય યત્ ફલમ્
રૌદ્રશક્તિસમાવેશાત્ સર્વમ્ એવ પ્રપદ્યતે ॥

યસ્યેદં વર્તતે ચિહ્નં રૌદ્રાવેશં તદ્ ઉચ્યતે
શામ્ભવેન તુ વેધેન સર્વાણ્ય્ એતાનિ સુવ્રતે ॥

શુદ્ધશામ્ભવવેધસ્ય સામ્પ્રતં નિર્ણયં શૃણુ
યેન વિદ્ધસ્ય લોકે ઽસ્મિન્ સર્વજ્ઞત્વં પ્રપદ્યતે ॥

પૂર્વોક્તેન તુ કાલેન શોધિતસ્ તુ યદા શિશુઃ
તદા સમ્પદ્યતે તસ્ય શામ્ભવં ગુણદાયકમ્ ॥

કુબ્જીશો યં યદાયાતઃ પુંસો જન્મન્ય્ અપશ્ચિમે
તદા સમ્પદ્યતે તસ્ય શામ્ભવં કુબ્જિકે તનૌ ॥

બહ્વર્થકાલે ઽપિ વિશોધિતાત્મા આત્મૈવ સૌ પશ્યતિ સર્વભૂતાન્
ન મે સમાનો ભુવનાન્તરાલે વિશુદ્ધભાવો ભવતે હ્ય્ અકાલે ॥

એકૈકં ભુવનં પશ્યેત્ પુંસાદૌ ચોન્મનાવધિમ્
વિશુદ્ધતનુજો હ્ય્ એવં દેહેનાનેન ચોત્પતેત્ ॥

ન કમ્પધુનને તસ્ય ઈશદ્ઘૂર્મિઃ પ્રવર્તતે
વિષોન્મૂર્છાગતસ્ ત્વ્ એવં તિષ્ઠતે ભૂતકુમ્ભવત્ ॥

પશ્યતે ચાગ્રતઃ સર્વં તત્ત્વવ્રાતં સદોદિતમ્
તત્ક્ષણાદ્ વિષયાન્ મુચ્યેજ્ જીર્ણકઞ્ચુર્ યથોરગઃ ॥

સદાનન્દમદોન્મત્તઃ સર્વજ્ઞગુણભૂષિતઃ
શામ્ભવેન તુ વિદ્ધસ્ય ચિહ્નેદં સમ્પ્રવર્તતે ॥

ભૂતભાવનશક્તીનાં મન્ત્રાવેશ[ ં ] સરૌદ્રજમ્
ક્રમેણ શામ્ભવસ્ તેષાં વિશુદ્ધત્વં યથા યથા ॥

ઝલઝલેતિ યદ્ વેધં સમ્પૂર્ણઘટવદ્ યથા
ભૂતાન્તશક્તિમન્ત્રાદૌ તથેદં સમ્પ્રચક્ષ્યતે ॥

ગુરુભક્તિવિહીનાનાં વઞ્ચકાનાં યશસ્વિનિ
પૂર્વં શામ્ભવવિદ્ધસ્ય ભૂતાદ્યં સમ્પ્રવર્તતે ॥

વેધદીક્ષાપરં નાસ્તિ કથં સા પ્રત્યયાત્મિકા
પ્રત્યયે સતિ સઞ્જાતે કથં તન્ મોક્ષલક્ષણમ્ ॥

પ્રત્યયે સતિ મોક્ષો ઽ સ્તિ પિણ્ડપાતેન સર્વથા
વિષયેષુ ન મુચ્યેત સિદ્ધભાવં ન ગચ્છતિ ॥

શામ્ભવેન તુ વેધેન તત્ક્ષણાદ્ વિષયોજ્ઝિતઃ
વિષયોજ્ઝિત-આત્મા વૈ દેહેનાનેન ચોત્પતેત્ ॥

યેન વેધેન વિદ્ધસ્ય સુખાસ્વાદો ન વિદ્યતે
સ કથં સ્વાર્થનિર્મુક્તો વિષયેષુ વિરજ્યતે ॥

શામ્ભવે ન હિ સમ્પ્રાપ્તે દર્પેણાકુલિતેક્ષણઃ
નાયકૈઃ સો ઽભિભૂયેત ન સિધ્યત્ય્ અધિકારકૃત્ ॥

આજ્ઞાનન્દે સમુત્પન્ને ન ગન્તવ્યં ગુરોઃ કુલાત્
કસ્માત્ સામર્થ્યહેત્વર્થં યાવન્ નોત્પાદયેદ્ ગુણાન્ ॥

દિવા પ્રેષણતન્નિષ્ઠો રાત્રૌ જ્ઞાનપરિગ્રહઃ
એવં સમ્પાદયેત્ સર્વં સામર્થ્યં તુ ગુરોઃ કુલે ॥

અપ્રેષિતે ન ગન્તવ્યં ન કુર્યાચ્ ચોલ્બણાદિકમ્
યે ન કોપવશાદ્ આજ્ઞાં દાસ્યન્તિ ગમનં પ્રતિ ॥

શામ્ભવાજ્ઞાસમુત્પન્ને ય એવં કુરુતે કુધીઃ
તસ્ય પીઠાધિપાઃ પાલાશ્ ચાભિભૂયન્ત્ય્ અનેકધા ॥

અનુષ્ઠાનતપોપાયૈર્ યદાનન્દભૃતસ્ તનુઃ
તદાધિકારઃ કર્તવ્યો યસ્યાજ્ઞા તસ્ય તત્પદે ॥

અનુજ્ઞાતો ઽભિષિક્તસ્ય નામમાલાં પ્રકાશયેત્
નવપઞ્ચવિધં દ્રવ્યં પૂજાર્થે સમ્પ્રદર્શિતમ્ ॥

શુભે ઽહનિ મુહૂર્તે ચ ચતુર્દશ્યાષ્ટમીષુ ચ
દર્પણોદરભૂભાગે વસ્ત્રે વાથ સુશોભને ॥

તતોપરિ યજેત્ સિદ્ધાન્ સર્વજ્ઞગુણશાલિનાન્
ચતુર્વિંશ ષોડશૈવમ્ અષ્ટૌ ચૈવ ત્રિપઙ્ક્તિષુ ॥

દ્વૌ સિદ્ધૌ મધ્યદેશે તુ કુઙ્કુમેન તુ ચાક્ષતૈઃ
ત્રિહસ્તં મણ્ડલં કુર્યાદ્ ઊર્ધ્વાદૌ પૂર્વપશ્ચિમમ્ ॥

શૃઙ્ગાતકાકૃતિ હ્ય્ એવં તત્ર પૂજાં સમારભેત્
પૂજયિત્વા વિધાનેન દ્રવ્યૈઃ પઞ્ચનવાદિભિઃ ॥

પૃથગ્દીપૈઃ પૂજયિત્વા ફલ્ગુષાલિસુગન્ધિભિઃ
સુપ્રણીતં સુભક્તં ચ આજ્ઞાગુણવિધાયિનમ્ ॥

તતઃ પ્રવેશયેચ્ છિષ્યં પુષ્પં મોચાપયેદ્ ઇતિ
યસ્મિન્ માર્ગે પતેત્ પુષ્પં તન્ નામ તસ્ય દાપયેત્ ॥

પ્રકટં શિવ વિજ્ઞેયં ગુપ્તમ્ આનન્દ-મ્-ઉચ્યતે
અકારાદિક્ષકારાન્તં પઞ્ચાશગુણલક્ષિતમ્ ॥

અક્ષરે અક્ષરે સિદ્ધં પુષ્પપાતાદ્ વિલક્ષયેત્
શ્રીકણ્ઠાનન્તસૂક્ષ્મેશં ત્રિમૂર્તિર્ અમરો ઽર્ઘિનઃ ॥

તિથીશો ભારભૂતિશ્ ચ સ્થાણુનામો હરસ્ તથા
ઝણ્ટીશો ભૌક્તિકશ્ ચૈવ સદ્યોજાતસ્ ત્વ્ અનુગ્રહી ॥

ક્રૂરસેનસ્ તથાન્યો વૈ મહાસેનસ્ તતઃ પરઃ
પ્રથમાદૌ સ્થિતા હ્ય્ એતે ઉપરિષ્ટાદ્ વિલક્ષયેત્ ॥

ક્રોધશ્ ચણ્ડઃ પ્રચણ્ડશ્ ચ શિવૈકરુદ્ર એવ ચ
કૂર્મશ્ ચૈવૈકનેત્રશ્ ચ ચતુરાસ્યો ઽવસાનુગઃ ॥

પ્રથમા યા સ્થિતા પઙ્ક્તિઃ પીઠત્રયવિભૂષિતા
અજેશઃ શર્મ સોમશ્ ચ લાઙ્ગુલીશો ઽથ દારુકઃ ॥

અર્ધનાર્યો હ્ય્ ઉમાકાન્તો આષાઢી દિણ્ડિર્ એવ ચ
ધાત્રીશશ્ ચ તથા મીનો મેષો લોહિત-મ્-એવ ચ ॥

શિખીશશ્ છગલણ્ડશ્ ચ દ્વિરણ્ડો મધ્યપઙ્ક્તિગાઃ
મહાકાલશ્ ચ વાલાખ્યો ભુજઙ્ગાખ્યઃ પિનાકિનઃ ॥

ખડ્ગાનન્દો બકાનન્દઃ શ્વેતાનન્દસ્ તથૈવ ચ
ભૃગુશ્ ચૈવાન્તિમે ચક્રે અષ્ટૌ તાંશ્ ચ પ્રપૂજયેત્ ॥

લાકુલાનન્દ મધ્યસ્થં સંવર્તાનન્દસંયુતમ્
તયોર્ મધ્યગતાં દેવીં કુબ્જિકાં પરમેશ્વરીમ્ ॥

પૂજયેત્ પીઠસંયુક્તાં પારમ્પર્યેણ સંયુતામ્
યથા સિદ્ધાસ્ તથા દેવ્યાઃ સંહાર્યાદિ પ્રપૂજયેત્ ॥

વાગેશ્યન્તાઃ ક્રમેણૈવ ગુરુવક્ત્રપ્રસાદતઃ
ષડારે ડાદિષટ્કં તુ ક્રમેણૈવ પ્રપૂજયેત્ ॥

કુલાષ્ટકં તતો બાહ્યે અષ્ટારે પઙ્કજે ક્રમાત્
પઞ્ચદ્રવ્યભૃતં પાત્રં તદગ્રે સન્નિવેશયેત્ ॥

ક્રમામ્નાયં પુનઃ પાત્રે કુર્યાત્ તેનાભિષેચનમ્
મુખેન વાથ કર્તવ્યં યસ્યોપરિ સુભાવના ॥

તતશ્ ચાદેશયેત્ તં તુ કુરુ કાર્યં યદૃચ્છયા
અધિકારપદં સર્વં મોક્ષિતં તે પ્રસાદતઃ ॥

તતઃ પ્રભૃતિ દેવેશિ યોગ્યો ભવતિ શાસને
શાસનં ભૂષયેન્ નિત્યં ગુપ્તાચારવિધૌ સ્થિતઃ ॥

અવ્યક્તેન તુ લિઙ્ગેન વ્યક્તલિઙ્ગેન વા પુનઃ
યેન લિઙ્ગેન યસ્યેદં તલ્લિઙ્ગં ન પરિત્યજેત્ ॥

આકાશાત્ પતિતં તોયં યથા ગચ્છતિ સાગરમ્
ગર્તાનદ્યોપચારેણ તથા સર્વં કુલાન્વયે ॥

યાસ્યન્તિ લિઙ્ગિનઃ સર્વે નિશ્ચયાર્થો ઽન્યથા ન હિ
કસ્માત્ પ્રત્યક્ષરૂપેણ તત્રાજ્ઞા વર્તતે યતઃ ॥

સમુદ્રવત્ કુલાનન્દં યસ્માત્ તત્ સર્વતોમુખમ્
કુલં તદ્ એવ વિજ્ઞેયં સર્વાનુગ્રહકારકમ્ ॥

બ્રાહ્મણં ક્ષત્રિયં વૈશ્યં શૂદ્રં પ્રાકૃતમ્ અન્ત્યજમ્
માતઙ્ગમ્લેચ્છજાત્યુત્થં બૌદ્ધસાઙ્ખ્યદિગમ્બરમ્ ॥

ત્રિદણ્ડમુણ્ડખટ્વાઙ્ગ મુષલાન્યક્રિયાન્વિતમ્
યાસ્યન્તિ પરમં શૈવં શૈવો યાતિ ન કુત્રચિત્ ॥

તચ્ ચ કૌલભૃતાનન્દં નેતરં તુ ક્રિયાકુલમ્
સર્વજ્ઞમાર્ગવિહિતં સર્વાચારપ્રપાલકમ્ ॥

કૌલિકાચારમાર્ગેણ ભાવાદ્વૈતેન સર્વથા
તત્ત્વાદ્વૈતેન માર્ગેણ સર્વથા યત્ર સંસ્થિતઃ ॥

પાલયેલ્ લૌકિકાચારમ્ અદ્વૈતં સમનુષ્ઠયેત્
ગોપયેદ્ ગુપ્તલિઙ્ગાનિ તત્પ્રવિષ્ટાનિ સર્વથા ॥

અધમાદ્ ઉત્તમં જ્ઞાનં યદ્ય્ અર્થી ઉત્તમો ભવેત્
લિઙ્ગિનો વા દ્વિજન્મા વા આજ્ઞાર્થી તુ ન વઞ્ચયેત્ ॥

એકાન્તે વિહિતં સર્વં કુર્વીત ન જનાકુલે
અન્યથા સ્થિતિભઙ્ગઃ સ્યાન્ નશ્યતે શાસનં પ્રિયે ॥

વર્જયેત્ કૌલિકાન્ બૌદ્ધાન્ તથા મીમાંસકાસ્થિતાન્
કસ્માદ્ ભ્રષ્ટક્રિયા તેષાં ન મોક્ષો નૈવ સાધનમ્ ॥

જિહ્વોપસ્થનિમિત્તાર્થમ્ અદ્વૈતં તેષુ સર્વથા
કૌલિકાચારનિર્મુક્તાઃ શ્વાનવદ્ વિચરન્તિ તે ॥

નિરાચારં પ્રકુર્વન્તિ નિરાચારવિવર્જિતાઃ
વિષં ભક્ષન્તિ તે મૂઢા યથાજ્ઞામન્ત્રવર્જિતાઃ ॥

યદ્ય્ અપિ તે ત્રિકાલજ્ઞાસ્ ત્રૈલોક્યાકર્ષણક્ષમાઃ
તથાપિ સંવૃતાચારાઃ પાલયન્તિ કુલસ્થિતિમ્ ॥

નિરાચારેણ યોગેન પશ્યન્તિ વિષયોજ્ઝિતાઃ
વિષયસ્થો ઽપહાસિત્વં નિરાચારેણ યાત્ય્ અસૌ ॥

ભ્રષ્ટનષ્ટકુલં ત્યજ્ય કુલકૌલં સમાશ્રયેત્
તત્ર યોગિગુરૂણાં ચ પૂજ્યતે ચરણામ્બુજમ્ ॥

સમયેન વિના દેવિ સમર્થો ભવતે કથમ્
સામર્થ્યેન વિના ચર્યા નિરાચારાત્મિકા ભવેત્ ॥

જ્ઞાત્વામ્નાયપદં સર્વં યથાવસ્થં કુલેશ્વરમ્
ષટ્પ્રકારવિધાનેન નિર્ગતાચારરૂપિણમ્ ॥

સામર્થ્યગુણયુક્તાત્મા વિષયાતીતો જિતેન્દ્રિયઃ
વિરજો રઞ્જિતાત્મા વૈ નિરાચારો ભવેત્ તુ સઃ ॥

એતત્ તે કથિતં દેવિ સરહસ્યં સુગોપિતમ્
અન્યદ્ યત્ તે મનસ્થં તુ તત્ પૃચ્છ વદતો મમ ॥