Kāvyālaṃkārasūtra with Vṛtti · Chapter 1

pāṇḍitavaraśrīvāmanaviracitasavṛtti-
kāvyālaṅkārasūtrāṇi
atha prathame'dhikaraṇe prathamo'dhyāyaḥ /
praṇamya paramaṃ jyotirvāmanena kavipriyā /
kāvyālaṅkārasūtrāṇāṃ teṣāṃ vṛttirvidhīyate //
kāvyaṃ grāhyamalaṅkārāt
kāvyaṃ khalu grāhyamupādeyaṃ bhavati, alaṅkārāt / kāvyaśabdo'yaṃ guṇālaṅkārasaṃskṛtayoḥ śabdārthayorvartate / bhaktyā tu śabdārthamātravacano'tra gṛhyate

ko'sāvalaṅkāra ityata āha ----
saundaryamalaṅkāraḥ
alaṅkṛtiraṅkāraḥ / karaṇavyutpattyā punaralaṅkāraśabdo'yam upamādiṣu vartate

sa doṣaguṇālaṅkārahānādānābhyām
sa khalvalaṅkāro doṣahānād guṇālaṅkārādānācc sampādyaḥ kaveḥ

śāstrataste
te doṣaguṇālaṅkārahānādāne / śāstrādasmāt / śāstrato hi jñātvā doṣāñjahyād , guṇālaṅkārāṃścādadīta

kiṃ punaḥ phalam alaṅkaravatā kāvyena, yenaitadartho'yamityāha ----
kāvyaṃ saddṛṣṭādṛṣṭārtham, prītikīrtihetutvāt
{kāvyaṃ sat} cāru dṛṣṭaprayojanaṃ , prītihetutvāt / adṛṣṭaprayojanaṃ kīrtihetutvāt / atra ślokāḥ ----
pratiṣṭhāṃ kāvyabandhasya yaśasaḥ saraṇiṃ viduḥ /
akīrtivarttinīṃ tvevaṃ kukavitvaviḍambanam //
kīrtisvargaphalāmāhurāsasāraṃ vipaścitaḥ /
akīrtiṃ tu nirālokanarakoddeśadūtikām //
tasmāt kīrtimupādātumakīrtiṃ ca nivarhitum /
kāvyālaṅkārasūtrārthaḥ prasādyaḥ kavipuṅgavaiḥ //