Kathaka Samhita · Verses 5-2

atha pañcamaṃ sthānakam //
yajamānam /
agnīṣomābhyāṃ yajñaścakṣuṣmām̐stayorahaṃ devayajyayā cakṣuṣā cakṣuṣmān bhūyāsamagnirannasyānnapatistasyāhaṃ devayajyayānnasyānnapatirbhūyāsaṃ dabdhirasyadabdho bhūyāsamamuṃ dabheyamagnīṣomau vṛtrahaṇau tayorahaṃ devayajyayā vṛtrahā bhūyāsamindrāgnyorahaṃ devayajyayaujasvān vīryāvān bhūyāsamindrasyāhaṃ devayajyayendriyāvān bhūyāsaṃ mahendrasyāhaṃ devayajyayā jehamānaṃ bhūmānaṃ gameyamindrasyāhaṃ vimṛdhasya devayajyayāsapatno bhūyāsamindrasyāhamindriyāvato devayajyayā paśumān bhūyāsam// sarasvatyā ahaṃ devayajyayā vācamannādyaṃ puṣeyaṃ pūṣṇo'haṃ devayajyayā puṣṭimān paśumān bhūyāsamadityā ahaṃ devayajyayā pratiṣṭhāṃ gameyaṃ viśveṣāmahaṃ devānāṃ devayajyayā prāṇānām̐ sāyujyaṃ gameyaṃ dyāvāpṛthivyorahaṃ devayajyayā prajaniṣeyaṃ prajayā paśubhiragneraham̐ sviṣṭakṛto devayajyayāyuḥ pratiṣṭhāṃ gameyam //
atītapadyajñe yajñamayāḍ devām̐ araṃkṛtaḥ / somaste mitro aryamā rāyaspoṣaṃ dadhātana

bṛhato mā vājena vājaya vāmadevasya mā vājena vājaya rathantarasya mā vājeya vājaya juṣṭe juṣṭiṃ te gameyamupahūta upahavaṃ te'śīya suhavāmehi saha prajayā saha rāyaspoṣeṇa //
asmāsvindra indriyaṃ dadhātvasmān rāyo maghavānassacantām //
asmākam̐ santvāśiṣaḥ //
āśīrma ūrjamuta suprajāstvamiṣaṃ dadhātu draviṇem̐ savarcasam /
saṃjayan kṣetrāṇi sahasāhamindra kurvāṇo anyām̐ adharān sapatnān //
brahma tejo me pinvasva kṣatramojo me pinvasva prajāṃ vṛṣṭiṃ me pinvasva paśūn viśaṃ me pinvasveṣamūrjaṃ me pinvasva //
mayi tyadindriyaṃ mahanmayi dyumna uta kratuḥ //
triśuggharmassadaminme vibhāti virāḍa jyotiṣā saha //
tasya dohamaśīya bradhna pinvasva kalpantāṃ diśo yajamānasyāyuṣe dadato me mā kṣāyi kurvato me mopadasadbhajatāṃ bhāgī mābhāgo bhakta ye brāhmaṇāssomyāsteṣāmidam̐ havirnāsomyasyāpyasti nirbhakto yaṃ dviṣmaḥ

devasyāhaṃ barhiṣo devayajyayā prajāvān bhūyāsaṃ devasyāhaṃ narāśam̐sasya devayajyayā paśumān bhūyāsaṃ devasyāhamagnessviṣṭakṛto devayajyayāyuḥ pratiṣṭhāṃ gameyam //
ā māśiṣaḥ dohakāmā indravanto havāmahe / dhukṣīmahi prajāmiṣam //
sā me satyāśīrdevān gamyājjuṣṭājjuṣṭatarā panyāt panyatarāheḍatā manasā devān gaccha yo devayānaḥ panthāstena devān gaccha yajño devān gacchatu yajño devān gamyādado mā gacchatu // rohitena tvāgnirdevatāṃ gamayatu haribhyāṃ tvendro devatāṃ gamayatvetaśena tvā sūryo devatāṃ gamayatu yajña yajñaṃ gaccha yajñapatiṃ gaccha yajñasyāyurasi yajño ma āyurdadhātu //
vi te muñcāmi raśanāṃ vi raśmīn vi yoktrāṇi paricartanāni //
dattvāyāsmabhyaṃ draviṇeha bhadraṃ pra mā brūtāddhavirdā devatābhyaḥ //
viṣṇośca yajñasyāntastayorahaṃ devayajyayāyuḥ pratiṣṭhāṃ gameyam

iṣṭo yajño bhṛgubhirdraviṇodā yatibhirāśīrvām̐ atharvabhiḥ// tasya yajñasyeṣṭasya sviṣṭasya draviṇamāgacchatvaṅgiraso me'sya yajñasya prātaranuvākairahauṣurvasuryajño vasumān yajño vasu vasīya vasumanto bhūyāsma tasya yajñasya vasorvasumato vasu māgacchatu somo retodhāstasyāhaṃ devayajyayā suretodhā reto dhiṣīya tvaṣṭā rūpāṇāṃ vikartā tasyāhaṃ devayajyayā viśvarūpaṃ priyaṃ puṣeyaṃ devānāṃ patnīragnirgṛhapatirmithunaṃ yajamānasya tayorahaṃ devayajyayā mithunena prajaniṣīyāyuṣe varcase rāyaspoṣāya suprajāstvāya//
saṃ patnī patyā sukṛteṣu gacchatāṃ yajñasya yuktau dhuryā abhūtām /
āprīṇāno vijahatā arātiṃ dive jyotiruttamamārabhethām //
svāhā svāheṣṭibhyo vaṣaḍaniṣṭebhyo bhiṣajau sviṣṭyai svāhā niṣkṛtirduriṣṭayai svāhā // devebhyastanūbhyassvāhā //
ayāścāgne'syanabhiśastiśca satyamittvamayā asi //
ayāssanmanasā kṛto'yāssanhavyamūhiṣe'yā no dhehi bheṣajam //
svāhā sarasvatyai veśabhaginyai svāhā // yā sarasvatī veśabhaginī tasyā no rāsva tasyāste bhaktivāno bhūyāsma yajñasya tvā pramayābhimayonmayā pratimayā parigṛhṇāmi vedo'si vittirasi vedase tvā vedo me vinda videya ///
ghṛtavantaṃ kulāyinaṃ rāyaspoṣam̐ sahasriṇam / vedo vājaṃ dadātu me vedo vīraṃ dadātu me // vṛṣā vṛṣaṇvatībhyo vedapatnībhyo bhava

prajāpaterbhāgo'syūrjasvān payasvānakṣito'syakṣityai tvakṣito nāmāsi mā me kṣeṣṭhāḥ prāṇāpānau me pāhi samānavyānau me pāhyudānarūpe me pāhyūrgasyūrjaṃ mayi dhehyā mā gamyāḥ pūrṇamasi pūrṇaṃ me bhūyāssadasi sanme bhūyāssarvamasi sarvaṃ me bhūyā akṣitirasi mā me kṣeṣṭhāḥ prācyā diśā devā ṛtvijo mārjayantāṃ dakṣiṇayā diśā māsāḥ pitaro mārjayantāṃ pratīcyā diśā gṛhāḥ paśavo mārjayantāmudīcyā diśāpa oṣadhayo vanaspatayo mārjayantāmūrdhvayā diśā yajñassaṃvatsaro mārjayantām // pṛthivīṃ viṣṇurvyakram̐sta gāyatreṇa cchandasā nirbhakto yaṃ dviṣmo'ntarikṣaṃ viṣṇurvyakram̐sta traiṣṭubhena cchandasā nirbhakto yaṃ dviṣmo divaṃ viṣṇurvyakram̐sta jāgatena cchandasā nirbhakto yaṃ dviṣmo diśo viṣṇurvyakram̐stānuṣṭubhena cchandasā nirbhakto yaṃ dviṣmo'ganma svassaṃ jyotiṣābhūma sūryasyāvṛtamanvāvarta idamahaṃ yo'smān dveṣṭi yaṃ ca vayaṃ dviṣmastasya prāṇaṃ niveṣṭayāmi tejo'si tejo mayi dhehi samahaṃ prajayā saṃ mayā prajā samahaṃ rāyaspoṣeṇa saṃ mayā rāyaspoṣo'gnestejasā tejasvī bhūyāsaṃ vāyorāyuṣāyuṣmān bhūyāsam̐ sūryasya varcasā varcasvī bhūyāsamindrasyendriyeṇendriyāvān bhūyāsaṃ dhātā me dhāmnā sudhāṃ dadhātu prajāpateḥ prajayā prajāvān bhūyāsamagne gṛhapate sugṛhapatirahaṃ tvayā gṛhapatinā bhūyāsam̐ sugṛhapatirmayā tvaṃ gṛhapatinā bhūyā asthūri ṇau gārhapatyaṃ dīdāyacchatam̐ himādvāyū

devāñjanamagan yajñastato mā yajñasyāśīrāgacchatu pitṝn sarpān gandharvānapa oṣadhīḥ pañca janāñjanamagan yajñastato mā yajñasyāśīrāgacchatu pañcānāṃ tvā vātānāṃ dhartrāyāgṛhṇāmi pañcānāṃ tvā salilānāṃ dhartrāyāgṛhṇāmi pañcānāṃ tvā pṛṣṭhānāṃ dhartrāyāgṛhṇāmi pañcānāṃ tvā diśāṃ dhartrāyāgṛhṇāmi pañcānāṃ tvā pañcajanānāṃ dhartrāyāgṛhṇāmi, bhūrasmākam̐ havyaṃ devānāmāśiṣo yajamānasya carostvā pañcabilasya dhartrāyāgṛhṇāmi dhāmāsi priyaṃ devānāmanādhṛṣṭaṃ devayajanaṃ devatābhistvā devatābhyo gṛhṇāmi //
ye devā yajñahano yajñamuṣaḥ pṛthivyāmadhyāsate /
agnirmā tebhyo rakṣatu gacchema sukṛto vayam //
yāste rātrayassavitardevayānīssahasrayajñamabhisaṃbabhūvuḥ //
gṛhaiśca sarvaiḥ prajayā nvagre svo ruhāṇāstaratā rajām̐si /
ye devā yajñahano yajñamuṣo'ntarikṣe'dhyāsate //
vāyurmā tebhyo rakṣatu gacchema sukṛto vayam //
āganma mitrāvaruṇā vareṇyaṃ rātrīṇāṃ bhāgo yuvayoryo asti //
nākaṃ gṛhṇānāssukṛtasya loke tṛtīye pṛṣṭhe adhi rocane divaḥ //
ye devā yajñahano yajñamuṣo divyadhyāsate //
sūryo mā tebhyo rakṣatu gacchema sukṛto vayam //
yenendrāya samabharan payām̐syuttamena haviṣā jātavedaḥ /
tenāgne tvamuta vardhayemam̐ sujātānām̐ śreṣṭhya ādhehyenam //
gomām̐ agne'vimām̐ aśvī yajño nṛvatsakhā sadamidapramṛṣyaḥ /
iḍāvām̐ eṣo asura prajāvān dīrgho rayiḥ pṛthubudhnassabhāvān /
agne vratapate vratamacāriṣaṃ tadaśakaṃ tatte prabūmastanno gopāya

iti śrīyajuṣi kāṭhake carakaśākhāyāmiṭhimikāṃyā yajamānaṃ nāma pañcamaṃ sthānakaṃ saṃpūrṇam