Kathaka Samhita · Verses 4-2

atha caturthaṃ sthānakam
grahāḥ //
vācaspataye pavasva // vājin vṛṣṇo am̐śubhyāṃ gabhastipūto devo devānāṃ pavitramasi yeṣāṃ bhāgo'si madhumatīrna iṣaskṛdhi svaṃkṛto'syurvantarikṣaṃ vīhi viśvebhya indriyebhyo divyebhyaḥ pārthivebhyo manastvāṣṭu svāhā tvā subho sūryāya devebhyastvā marīcipebhyaḥ prāṇāya tvā vyānāya tvopayāmagṛhīto'si //
antaryaccha maghavan pāhi somamuruṣya rāyassamiṣo yajasva /
antaste dyāvāpṛthivī dadhāmyantardadhāmyurvantarikṣam //
sajoṣā devairavaraiḥ paraiścāntaryāme maghavan mādayasva //
madhumatīrna īṣaskṛdhi svaṃkṛto'syurvantarikṣaṃ vīhi viśvebhya indriyebhyo divyebhyaḥ pārthivebhyo manastvāṣṭu svāhā tvā subho sūryāya devebhyastvā marīcipebhyo'pānāya tvā

ā vāyo bhūṣa śucipā upa nassahasraṃ te niyuto viśvavāra /
upo te andho madyamayāmi yato deva dadhiṣe pūrvapeyam //
upayāmagṛhīto'si vāyave tvā //
indravāyū ime sutā upa prayobhirāgatam //
indavo vāgmuśanti hi //
upayāmagṛhīto'si vāyava indravāyubhyāṃ tvaiṣa te yonissajoṣobhyāṃ tvā //
ayaṃ vāṃ mitrāvaruṇā sutassoma ṛtāvṛdhā / mamediha śrutaṃ havam //
upayāmagṛhīto'si mitrāvaruṇābhyāṃ tvaiṣa te yonirṛtāyubhyāṃ tvā /
yā vāṃ kaśā madhumatyaśvinā sūnṛtāvatī / tayā yajñaṃ mimikṣatam // upayāmagṛhīto'syaśvibhyāṃ tvaiṣa te yonirmādhvībhyāṃ tvopayāmagṛhīto'si vāyava indravāyubhyāṃ tvaiṣa te yonirviṣṇorurukrama upayāmagṛhīto'si mitrāvaruṇābhyāṃ tvaiṣa te yonirviṣṇorurukrama upayāmagṛhīto'syaśvibhyāṃ tvaiṣa te yonirviṣṇorurukrama taṃ rakṣasva mā tvā dabhan duścakṣāste māvakṣat

ayaṃ venaścodayat pṛśnigarbhā jyotirjarāyū rajaso vimānaḥ /
imamapām̐ saṃgame sūryasya śiśuṃ na viprā matibhī rihanti //
upayāmagṛhīto'si śaṇḍāyendrāya tvā juṣṭaṃ gṛhṇāmyeṣa te yonirvīratāyai tvā /
taṃ pratnathā pūrvathā viśvathemathā jyeṣṭhatātiṃ barhiṣadam̐ svarvidam /
pratīcīnaṃ vṛjanaṃ dohase girā yā saṃjayantamadhi yāsu vardhase //
upayāmagṛhīto'si markāya sūryāya tvā juṣṭaṃ gṛhṇāmyeṣa te yoniḥ prajābhyastvā

apanuttā śaṇḍāmarkau saha tena yaṃ dviṣmastutho'si janadhāyā devāstvā śukrapāḥ praṇayantu tutho'si janadhāyā devāstvā manthipāḥ praṇayantvāyussaṃdhattaṃ prāṇam̐ saṃdhattaṃ cakṣussaṃdhattam̐ śrotram̐ saṃdhattaṃ vācam̐ saṃdhattamanādhṛṣṭāsi jinvethām̐ svapatyā madhvā vītam̐ suvīrāḥ prajāḥ prajanayan parīhi suprajāḥ prajāḥ prajanayan parīhi //
indreṇa manyunā yujā sāsahyāma pṛtanyataḥ / ghnanto vṛtrāṇyaprati /
saṃjagmānā divā pṛthivyā śukraśśukraśociṣā manthī manthiśociṣā śukro'si śukraśocirmanthyasi manthiśociracchinnasya te deva soma suvīryasya rāyaspoṣasya daditārassyāma nirastā śaṇḍāmarkau saha tena yaṃ dviṣmaśśukrasyādhiṣṭhānamasi manthino'dhiṣṭhānamasi //
yā sam̐skṛtiḥ prathamā viśvakarmā yo madhyamo bṛhaspatiścikitvān /
yaḥ paramo varuṇo mitro agnistasmā indrāya sutamājuhota tasmai sūryāya sutamājuhota //
svāhā tvā subho sūryāya devebhyastvā marīcipebhyaḥ

ye devā divyaikādaśa stha pṛthivyāmadhyekādaśa stha /
apsuṣado mahinaikādaśa stha te devāso yajñamimaṃ juṣadhvam // upayāmagṛhīto'syāgrāyaṇo jinva yajñaṃ jinva yajñapatimabhi saṃvanāni pāhi viṣṇustvāṃ pātu viśaṃ tvaṃ pāhīndriyeṇaiṣa te yonirviśvebhyastvā devebhyaḥ // upayāmagṛhīto 'sīndrāya tvā bṛhadvate vayasvata ukthāvyaṃ yatta indra bṛhadvayastasmai tvā viṣṇave tvaiṣa te yonirindrāya tvā //
mūrdhānaṃ divo aratiṃ pṛthivyā vaiśvānaramṛta ā jātamagnim /
kaviṃ samrājamatithiṃ janānāmāsannā pātraṃ janayantu devāḥ //
upayāmagṛhīto'si vaiśvānaro dhruvo'si dhuvakṣitirruyasavāṇāṃ dhruvatamo'cyutānāmacyutakṣittama eṣa te yonirvaiśvānarīya tvā

upayāmagṛhīto'si mitrāvaruṇābhyāṃ tvokthebhyastvokthāvyaṃ gṛhṇāmyeṣa te yonirmitrāvaruṇābhyāṃ tvā punarhavirasi devebhyastvā devāvyaṃ pṛṇacmi yajñasyāyuṣa upayāmagṛhīto'sīndrāya tvokthebhyastvokthāvyaṃ gṛhṇāmyeṣa te yonirindrāya tvā punarhavirasi devebhyastvā devāvyaṃ pṛṇacmi yajñasyāyuṣa upayāmagṛhīto'sīndrāgnibhyāṃ tvokthebhyastvokthāvyaṃ gṛhṇāmyeṣa te yonirindrāgnibhyāṃ tvā devebhyastvā devāvyaṃ pṛṇacmi yajñasyāyuṣa upayāmagṛhīto'sīndrāya tvendrāya tvokthebhyastvokthāvya gṛhṇāmyeṣa te yonirindrāya tvā devebhyastvā devāvyaṃ pṛṇacmi yajñasyāyuṣa upayāmagṛhīto'sīndrāvaruṇābhyāṃ tvokthebhyastvokthāvyaṃ gṛhṇāmyeṣa te yonirindrāvaruṇābhyāṃ tvā punarhavirasi devebhyastvā devāvyaṃ pṛṇacmi yajñasyāyuṣa upayāmagṛhīto'sīndrābṛhaspatibhyāṃ tvokthebhyastvokthāvyaṃ gṛhṇāmyeṣa te yonirindrābṛhaspatibhyāṃ tvā punarhavirasi devebhyastvā devāvyaṃ pṛṇacmi yajñasyāyuṣa upayāmagṛhīto'sīndrāviṣṇubhyāṃ tvokthebhyastvokthāvyaṃ gṛhrāmyeṣa te yonirindrāviṣṇubhyāṃ tvā punarhavirasi devebhyastvā devāvyaṃ pṛṇacmi yajñasyāyuṣe

upayāmagṛhīto'si madhave tvopayāmagṛhīto'si mādhavāya tvopayāmagṛhīto'si śukrāya tvopayāmagṛhīto'si śucaye tvopayāmagṛhīto'si nabhase tvopayāmagahīto'si nabhasyāya tvopayāmagṛhīto'sīṣāya tvopayāmagṛhīto'syūrjāya tyopayāmagṛhīto'si sahase tvopayāmagṛhīto'si sahasyāya tvopayāmagṛhīto'si tapase tvopayāmagṛhīto'si tapasyāya tvā //
indrāgnī āgatam̐ sutaṃ gīrbhinabho vareṇyam / asya pātaṃ dhiyeṣitā // upayāmagṛhīto'sīndrāgnibhyāṃ tvaiṣa te yonirindrāgnibhyāṃ tvā /
omāsaścarṣaṇīdhṛto viśve devāsa āgata / dāśvām̐so dāśuṣassutam // upayāmagṛhīto'si viśvebhyastvā devebhya eṣa te yonirviśvebhyastvā devebhyaḥ

janiṣṭhā ugrassahase turāya mandraṃ ojiṣṭho bahulābhimānaḥ / /
avardhannindraṃ marutaścidatra mātā yadvīraṃ dadhanaddhaniṣṭhā /
upayāmagṛhīto'sīndrāya tvā marutvata eṣa te yonirindrāya tvā marutvate //
indra marutva iha pāhi somaṃ yathā śāryāte apibassutasya //
tava praṇītī tava śūra śarmannāvivāsanti kavayassuyajñāḥ //
upayāmagṛhīto'sīndrāya tvā marutvata eṣa te yonirindrāya tvā marutvate //
marutvām̐ indra vṛṣabho raṇāya pibā somamanuṣvadhaṃ madāya /
āsiñcasva jaṭhare madhva ūrmiṃ tvaṃ rājāsi pradivassutānām //
upayāmagṛhīto'sīndrāya tvā marutvata eṣa te yonirindrāya tvā marutvate //
marutvantaṃ vṛṣabhaṃ vāvṛdhānamakavāriṃ divyaṃ śāsamindram //
viśvāsāhamavase nūtanāyogram̐ sahodāmiha taṃ huvema //
upayārmagṛhīto'sīndrāya tvā marutvata eṣa te yonirindrāya tvā marutvate //
mahām̐ indro ya ojasā parjanyo vṛṣṭimām̐ iva / stomairvatsasya vāvṛdhe / upayāmagṛhīto'si mahendrāya tvaiṣa te yonirmahendrāya tvā //
mahām̐ indro nṛvadā carṣaṇiprā uta dvibarhā aminassahobhiḥ /
asmadryagvāvṛdhe vīryāyoruḥ pṛthussukṛtaḥ kartṛbhirbhṛt //
upayāmagṛhīto'si mahendrāya tvaiṣa te yonirmahendrāya tvā

udu tyaṃ jātavedasaṃ devaṃ vahanti ketavaḥ / dṛśe viśvāya sūryam //
citraṃ devānāmudagādanīkaṃ cakṣurmitrasya varuṇāsyāgneḥ /
āprā dyāvāpṛthivī antarikṣam̐ sūrya ātmā jagatastasthuṣaśca //
dyāṃ gaccha svargaccha rūpaṃ vo rūpeṇābhyāṃgāṃ vayasā vayastutho vo viśvavedā vibhajatu varṣiṣṭhe'dhi nāka etatte agne rādha eti somacyutaṃ tanmitrasya pathā nayartasya pathā preta candradakṣiṇā brāhmaṇamadyardhyāsaṃ pitṛmantaṃ paitṛmatyamṛṣimārṣeyam̐ sudhātudakṣiṇam //
ayaṃ no agnirvarivaḥ kṛṇotvayaṃ mṛdhaḥ puraetu prabhindan /
ayam̐ śatrūñjayatu jarhṛṣāṇo'yaṃ vājaṃ jayatu vājasātau //
vaneṣu vyantarikṣaṃ tatāna vājamarvatsu payo aghnyāsu /
hṛtsu kratuṃ varuṇo vikṣvagniṃ divi sūryamadadhāt somamadrau //
vi svaḥ paśya vyantarikṣaṃ yatasva sadasyairasmadrātā madhumatī devatrā gaccha pradātāramāviśānavahāyāsmān devi dakṣiṇe devayānena pathā yatī sukṛtāṃ loke sīda tannau sam̐skṛtam

kadā cana starīrasi nendra saścasi dāśuṣe /
upopennu maghavan bhūya innu te dānaṃ devasya pṛcyate // upayāmagṛhīto'syādityebhyastvā //
kadā cana prayucchasyubhe nipāsi janmanī /
turīyāditya savanaṃ ta indriyamātasthā amṛtaṃ divi // upayāmagṛhīto'syādityebhyastvā //
yajño devānāṃ pratyeti sumnamādityāso bhavatā mṛḍayantaḥ //
ā vo'rvācī sumatirvavṛtyādam̐hościdyā varivovittarāsat // upayāmagṛhīto'syādityebhyastvā // vivasva ādityaiṣa te somapīthastasmin mandasva // yā divyā vṛṣṭistayā tvā śrīṇāmi //
adabdhebhissavitaḥ pāyubhiṣṭvam̐ śivebhiradya paripāhi no gayam // hiraṇyajihvassuvitāya navyase rakṣā mākirno aghaśam̐sa īśata //
upayāmagṛhīto'si devāya tvā savitra upayāmagṛhīto'si suśarmāsi supratiṣṭhāno bṛhadukṣe nama eṣa te yonirviśvebhyastvā devebhyaḥ

upayāmagṛhīto'si bṛhaspatisutasya inda indriyāvataḥ patnīvato grahamadhyāsamagnā३ i patnīvā३ntsajūstvaṣṭrā somaṃ pibopayāmagṛhīto'si harirasi hāriyojano haryossthātā haribhyāṃ tvā stutastomasya te deva soma śastokthasyeṣṭayajuṣo harivato grahamṛdhyāsam̐ hayām̐sstha harivato dhānāssahasomā indrasya//
agna āyūm̐ṣi pavasa āsuvorjamiṣaṃ ca naḥ / āre bādhasva ducchanām // upayāmagṛhīto'syagnaye tvā tejasvata eṣa te yoniragnaye tvā tejasvate //
ojastadasya titviṣa ubhe yatsamavartayat / indraścarmeva rodasī // upayāmagṛhīto'sīndrāya tvaujasvata eṣa te yonirindrāya tvaujasvate //
adṛśrannasya ketavo vi raśmayo janām̐ anu / bhrājanto agnayo yathā // upayāmagṛhīto'si sūryāya tvā bhrājasvata eṣa te yonissūryāya tvā bhrājasvate //
indramiddharī vahato'pratidhṛṣṭaśavasam / ṛṣīṇāṃ ca stutīrupa yajñaṃ ca mānuṣāṇām // upayāmāhīto'sīndrāya tvā harivata eṣa te yonirindrāya tvā harivate

dhātā rātissavitedaṃ juṣantāṃ prajāpatirvaruṇo mitro agniḥ /
tvaṣṭā viṣṇuḥ prajayā saṃrarāṇā yajamānāya draviṇaṃ dadhātu //
samindra no manasā neṣi gobhissam̐ sūribhirharivassam̐ svastyā /
saṃ brahmaṇā devakṛtaṃ yadasti saṃ devānām̐ sumatyā yajñiyānām //
saṃ varcasā payasā saṃ tanūbhiraganmahi manasā sam̐ śivena /
tvaṣṭā sudatro vidadhātu rāyo'nu no mārṣṭu tanvo yadviliṣṭam //
sugā vo devāssadanedamastu ya ājagma savanedaṃ juṣāṇāḥ /
jakṣivām̐saḥ papivām̐saśca viśve'sme dhatta vasavo vasūni //
yānāvaha uśato deva devām̐stān preraya sve agne sadhasthe /
vahamānā bharamāṇā havīm̐ṣyasuṃ gharmaṃ divamātiṣṭhatānu //
yadadya tvā prayati yajñe asminagne hotāramavṛṇīmahīha //
ṛdhagayāḍṛdhagutāśamiṣṭa vidvān prajānannupayāhi yajñam //
yajña yajñaṃ gaccha yajñapatiṃ gaccha svaṃ yoniṃ gaccha svāhaiṣa te yajño yajñapate sahasūktavākassuvorassvāhā devā gātuvido gātuṃ vittvā gātumita manasaspata imaṃ devayajñam̐ svāhā vāci svāhā vāte dhāḥ

urum̐ hi rājā varuṇaścakāra sūryāya panthāmanvetavā u //
apade pādā pratidhātave'karutāpavaktā hṛdayāvidhaścit //
śataṃ te rājan bhiṣajassahasramurvī gabhīrā sumatiṣṭe astu /
āre bādhasva nirṛtiṃ parācaiḥ kṛtaṃ cidenaḥ pramumugdhyasmāt //
agneranīkamapa āviveśāpāṃ napāt pratirakṣannasuryam /
dame dame samidhaṃ yakṣyagne prati te jihvā ghṛtamuccaraṇyat //
samudre te hṛdayamapsvantassaṃ tvā viśantvoṣadhīrutāpaḥ /
yajñasya tvā yajñapate saha sūktavāke namovāke vidhema //
svāhāvabhṛtha nicuṅkuṇa nicerurasi nicuṅkuṇo'va no devairdevakṛtameno yakṣyava martyairmartyakṛtamurorā no deva riṣaspāhi devīrāpa eṣa vo garbhastaṃ vassuprītaṃ subhṛtamabhārṣaṃ deveṣu nassukṛto brūtābhiṣṭhito varuṇasya pāśo'vahato varuṇasya pāśo'psu dhautasya te deva soma nṛbhisstutasya yo bhakṣo gosaniryo'śvasanistasya ta upahūta upahūtasya bhakṣaṃ kṛṇomi pratyasto varuṇasya pāśo namo varuṇasya pāśāya //
udeta prajāmāyurvarco dadhānā adha syāma surabhayo gṛheṣu //
gāyatrī chandām̐syanu sam̐rabhantāmasmān rāya urta yajñassacantām //
suprītaśśiśura āviveśa / unnetarvasyo'bhyunnayā naḥ // edho'syedhiṣīmahi samidasi samedhiṣīmahi tejo'si tejo mayi dhehi ///
apo adyānvacāriṣaṃ rasena samaganmahi / payasvānagna āgamaṃ taṃ mā sam̐sṛja varcasā // saṃ māgne varcasā sṛja prajayā ca dhanena ca /
vidyurme asya devā indro vidyāda saharṣibhiḥ

mamāgne varco vihaveṣvastu vayaṃ tvendhānāstanvaṃ puṣema /
mahyaṃ namantāṃ pradiśaścatasrastvayādhyakṣeṇa pṛtanā jayema //
agne vratapate vratamālabhe tatte prabravīmi tacchakeyaṃ tenardhyāsam //
agnirhotopa tam̐ huve devān yajñiyāniha yān yajāmahai /
ā devā yantu sumanasyamānā vyantu devā haviṣo me asya //
yunajmi tvā brahmaṇā daivyena havyāyāsmai voḍhavai jātavedaḥ //
indhānātvā suprajasassuvīrā jyogjīvema balihṛto vayaṃ te //
aṅgiraso māsya yajñasya prathamānuvākairavantu // samiddho agnirāhutassvāhākṛtaḥ pipartu naḥ // mano'si prājāpatyaṃ manasā mā bhūtenāviśa vāgasyaindrī sapatnakṣayaṇī vācāmindriyeṇāviśa devāḥ pitaraḥ pitaro devā yo'smi sa sanyaje tadvaḥ prabravīmi tasya me vitta svaṃ ma iṣṭamastu śunam̐ śāntam̐ svaṃ kṛtaṃ vasantamṛtūnāṃ prīṇāmi sa mā prītaḥ prīṇātu vasantasyāhaṃ devayajyayorjasvān payasvān bhūyāsaṃ grīṣmamṛtūnāṃ prīṇāmi sa mā prītaḥ prīṇātu grīṣmasyāhaṃ devayajyayaujasvaॉstejasvāna bhūyāsaṃ varṣāṛtūnāṃ prīṇāmi tā mā prītāḥ prīṇantu varṣāṇāmahaṃ devayajyayā puṣṭimān paśumān bhūyāsam̐ śaradamṛtūnāṃ prīṇāmi sā mā prītā prīṇātu śarado'haṃ devayajyayānnavān varcasvān bhūyāsam̐ hemantamṛtūnāṃ prīṇāmi sa mā prītaḥ prīṇātu hemantasyāhaṃ devayajyayā sahasvān vīryāvān bhūyāsam

indrāgnī rocanā divaḥ pari vājeṣu bhūṣathaḥ / tadvāṃ ceti pra vīryam //
śnathadvṛtramuta sanoti vājamindrā yo agnī sahurī saparyāt /
irajyantā vasavyasya bhūressahastamā sahasā vājayantā //
yā vām̐ santi puruspṛho niyuto dāśuṣe narā / indrāgnī tābhirāgatam //
tā yodhiṣṭamabhi gā indra nūnamapassvaruṣaso agna ūḍhāḥ //
diśassvaruṣasa indra citrā apo gā agne yuvase niyutvān //
tā vāmeṣe rathānāmindrāgnī havāmahe / patī turasya rādhaso vidvām̐sā girvaṇastamā //
aśravam̐ hi bhūridāvattarā vāṃ vijāmāturuta vā ghā syālāt /
adhā somasya prayatī yuvābhyāmindrāgnī stomaṃ janayāmi navyam //
indrāgnī navatiṃ puro dāsapatnīradhūnutam / sākamekena karmaṇā //
ā vṛtrahaṇā vṛtrahabhiśśuṣmairindra yātaṃ namobhiragne arvāk //
yuvaṃ rādhobhirakavebhirindrāgne asme bhavatamuttamebhiḥ //
ugrā vighaninā mṛdha indrāgrī havāmahe / tā no mṛḍāta īdṛśe //
pra carṣaṇibhyaḥ pṛtanāhaveṣu pra pṛthivyā riricāthe divaśca /
pra sindhubhyaḥ pra giribhyo mahitvā prendrāgnī viśvā bhuvanātyanyā //
gomaddhiraṇyavadvasu yadvāmaśvāvadīmahe / indrāgnī tadvanemahi //
gīrbhirvipraḥ pramatimicchamāna īṭṭe rayiṃ yaśasaṃ pūrvabhājam //
indrāgnī vṛtrahaṇā suvajrā pra no navyebhistirataṃ deṣṇaiḥ //
pūṣā gā anvetu naḥ pūṣā rakṣatvarvataḥ / pūṣā vājaṃ sanotu naḥ //
śukraṃ te anyadyajataṃ te anyadviṣurūpe ahanī dyaurivāsi /
viśvā hi māyā avasi svadhāvo bhadrā te pūṣanniha rātirastu /
kṣetrasya patinā vayam̐ hiteneva jayāmasi / gāmaśvaṃ poṣayitnvā sa no mṛḍātīdṛśe //
kṣetrasya pate madhumantamūrmiṃ dhenuriva payo asmāsu dhukṣva /
madhuścyutaṃ ghṛtamiva supūtamṛtasya naḥ patayo mṛḍayantu

agnāviṣṇū mahi tadvāṃ mahitvaṃ pātho ghṛtasya guhyāni nāma /
dame dame sapta ratnā dadhānā prati vāṃ jihvā ghṛtamuccaraṇyat //
agnāviṣṇū mahi dhāma priyaṃ vāṃ vītho ghṛtasya guhyā juṣāṇā /
dame dame suṣṭutyā vāvṛdhānānu vāṃ jihvā ghṛtamācaraṇyat //
agnirmukhaṃ prathamo devatānām̐ saṃgatānāmuttamo viṣṇurāsīt /
yajamānāya parigṛhya devān dīkṣāyedaṃ havirāgacchataṃ naḥ //
iyamadadādrabhasamṛṇacyutaṃ divodāsaṃ vadhryaśvāya dāśuṣe //
yā śaśvantamācakhādāvasaṃ paṇiṃ tā te dātrāṇi taviṣā sarasvati //
iyaṃ śuṣmebhirvisakhā ivārujat sānu girīṇāṃ taviṣebhirūrmibhiḥ /
pārāvataghnīmavase suvṛktibhissarasvatīmāvivāsema dhītibhiḥ /
janāya cidya īvata u lokaṃ bṛhaspatirdevahūtau cakāra /
ghnan vṛtrāṇi vi puro dardarīti jayañchatrūm̐ramitrān pṛtsu sāhan /
bṛhaspatissamajayadvasūni maho vrajān gomato deva eṣaḥ /
apaḥ siṣāsan svarapratīto bṛhaspatirhantyamitramarkaiḥ //
pāvakā nassarasvatī vājebhirvājinīvatī / yajñaṃ vaṣṭu dhiyāvasuḥ //
imā juhvānā yuṣmadā namobhiḥ prati stomam̐ sarasvati juṣasva /
tava śarman priyatame dadhānā upa stheyāma śaraṇaṃ na vṛkṣam //
ā no divo bṛhataḥ parvatādā sarasvatī yajatā gantu yajñam /
havaṃ devī jujuṣāṇā ghṛtācī śagmāṃ no vācamuśatī śṛṇotu //
vṛṣabhaṃ carṣaṇīnāṃ viśvarūpamadābhyam / bṛhaspatiṃ vareṇyam //
aṃdevena manasā yo riṣaṇyati śāsāmugro manyamāno jighām̐sati /
bṛhaspate mā praṇaktasya no vadho nikarma manyuṃ durevasya śardhataḥ //
bṛhaspate juṣasva no havyāni viśvadevya / rāsva ratnāni dāśuṣe //
bṛhaspate ati yadaryo arhād dyumadvibhāti kratumajjaneṣu /
yaddīdayacchavasartaprajāta tadasmāsu draviṇaṃ dhehi citram //
ā no mitrāvaruṇā ghṛtairgavyūtimukṣatam / madhvā rajām̐si sukratū //
pra bāhavā sisṛtaṃ jīvase na ā no gavyūtimukṣataṃ ghṛtena /
ā no jane śravayataṃ yuvānā śrutaṃ me mitrāvaruṇā havemā /
hiraṇyagarbhaḥ //
yaḥ prāṇato nimiṣataśca rājā patirviśvasya jagato babhūva //
ya īśe asya dvipadaścatuṣpadaḥ kasmai devāya haviṣā vidhema //
agnīṣomā imeṃ su me śṛṇutaṃ vṛṣaṇā havam / prati sūktāni haryataṃ bhavataṃ dāśuṣe mayaḥ//
agnīṣomā savedasā sahūtī vanataṃ giraḥ / saṃ devatrā babhūvathuḥ //
yuvametāni divi rocanānyagniśca soma sakratū adhattam /
yuvam̐ sindhūṃrabhiśasteravadyādagnīṣomā amuñcataṃ gṛbhītān //
ānyaṃ divo mātariśvā jabhārāmathnādanyaṃ pari śyeno adreḥ /
agnīṣomā brahmaṇā vāvṛdhānoruṃ yajñāya cakrathuru lokam //
vaiśvānaro na ūtaya ā prayātu parāvataḥ / agnirukthena vāhasā //
tvadvipro jāyate vājyagne tvadvīrāso abhimātiṣāhaḥ /
vaiśvānara tvamasmāsu dhehi vasūni rājan spṛhayāyyāṇi /
ṛtāvānaṃ vaiśvānaramṛtasya jyotiṣaspatim / ajasraṃ gharmamīmahe //
vaiśvānarasya sumatau syāma rājā hi kaṃ bhuvanānāmabhiśrīḥ /
ito jāto viśvamidaṃ vicaṣṭe vaiśvānaro yatate sūryeṇa //
pṛṣṭo divi pṛṣṭo agniḥ pṛthivyāṃ pṛṣṭo viśvā auṣadhīrāviveśa /
vaiśvānarassahasā pṛṣṭo agnissa no divā sa riṣaḥ pātu naktam //
asmākamagne maghavatsu dhārayānāmi kṣatramajaraṃ suvīram //
vayaṃ jayema śatinam̐ sahasriṇaṃ vaiśvānara vājamagne tavotibhiḥ //
imaṃ me varuṇa śrudhī havamadyā ca mṛḍaya / tvāmavasyurācake //
tattvā yāmi brahmaṇā vandamānastadāśāste yajamāno havirbhiḥ /
aheḍamāno varuṇeha bodhyuruśam̐sa mā na āyuḥ pramoṣīḥ //
śatena pāśairvaruṇābhidhehi mā te mocyanṛtavāṅ nṛcakṣaḥ //
āstāṃ jalma udaram̐ sram̐sayitvā kośa ivābandhraḥ parikṛtyamānaḥ //
dhīrā tvasya mahinā janūm̐ṣi vi yastastambha rodasī cidurvī /
pra nākamṛṣvaṃ nunude bṛhantaṃ dvitā nakṣatraṃ paprathacca bhūma

// iti śrīyajuṣi kāṭhake carakaśākhāyāmiṭhimikāyāṃ graho nāma caturthaṃ sthānakaṃ saṃpūrṇam