Kathaka Samhita · Chapter 15

atha pañcadaśaṃ sthānakam /
śrīrājasūyam /
anumatyā aṣṭākapālo dhenurdakṣiṇā ye pratyañcaśśamyāmatiśīyante sa naiṛta ekakapālo bhavati tā ubhau saha śṛtau kurvanti tayornairṛtena pūrveṇa pracaranti dakṣiṇā paretya svakṛta iriṇa ekolmukaṃ nidhāya visram̐sikāyāḥ kāṇḍābhyāṃ juhoti juṣāṇā niṛtirvetu svāhā vāso bhināntaṃ dakṣiṇa ya udañco'vaśīyante tānudak paretya valmīkavapāmuddhṛtya juhotīmahamamuṣyāmuṣyāyaṇasya kṣetriyamavayaje svāhedamahamamuṣyāmuṣyāyaṇasya kṣetriyamapidadhāmītyapidadhātyādityebhyo bhuvadvadbhyo ghṛte carurvaro dakṣiṇāgnāvaiṣṇava ekādaśakapālo'naḍvān vāmano dakṣiṇāgnīṣomīya ekādaśakapālo hiraṇyaṃ dakṣiṇaindrāgna ekādaśakapāla ṛṣabho'naḍvān dakṣiṇāgneyo'ṣṭākapālo mahendrīyaṃ dadhi vāsaḥ kṣaumaṃ dakṣiṇā saumyaśśyāmākaścarurbabhruḥ piṅgalo dakṣiṇaindrāgno dvādaśakapālo vaiśvadevaścarurdyāvāpṛthivya ekakapālo vatsaḥ prathamajo dakṣiṇā

āgneyo'ṣṭākapālassaumyaścarussāvitro'ṣṭākapālassārasvataścaruḥ pauṣṇaścarurvāyave niyutvate payo vā yavāgūrvendrāya śunāsīrāya dvādaśakapālassaurya ekakapāla uṣṭārau dakṣiṇā sīraṃ vā dvādaśāyogamāgneyo'ṣṭākapālo vāruṇo yavamayo daśakapālo raudro gāvīdhukaścaruraindram̐ sānnāyaṃ dhenuranaḍvāhī dakṣiṇāpāṃ nyayanādapāmārgānāharanti tān saktūn kurvanti tān parṇamayena sruveṇa juhoti dakṣiṇā paretya svakṛta iriṇe devasya savituḥ prasave'śvinorbāhubhyāṃ pūṣṇo hastābhyāmindrasyaujasā rakṣohāsi svāhā hataṃ rakṣo'vadhiṣma rakṣo varo dakṣiṇā // ye devāḥ purassado'gninetrā rakṣohaṇaste naḥ pāntu te no'vantu tebhyassvāhā ye devā dakṣiṇāt sado yamanetrā rakṣohaṇaste naḥ pāntu te no'vantu tebhyassvāhā ye devāḥ paścāt sado marunnetrā rakṣohaṇaste naḥ pāntu te no'vantu tebhyassvāhā ye devā uttarāt sado mitrāvaruṇanetrā rakṣohaṇaste naḥ pāntu te no'vantu tebhyassvāhā ye devā upariṣadassomanetrā avasvadvanto rakṣāhaṇaste naḥ pāntu te no'vantu tebhyassvāhā // idaṃ maha rakṣo'bhisamūhāmyagne saṃdaha rakṣassaṃdagdhaṃ rakṣo'gnaye purassade rakṣoghne svāhā yamāya dakṣiṇāt sade rakṣoghne svāhā marudbhyaḥ paścāt sadbhyo rakṣobhyassvāhā mitrāvaruṇābhyāmuttarāt sadbhyāṃ rakṣobhyām̐ svāhā somāyopariṣade'vasvadvate rakṣoghne svāhā rathaḥ pañcavāhī dakṣiṇā

anumatyai carū rākāyai carussinīvālyai caruḥ kuhvai carurdhātre dvādaśakapālaḥ paṣṭhauhyapravītā dakṣiṇā pṛthivyai svāhāntarikṣāya svāhā dive svāhā sūryāya svāhā candramase svāhā nakṣatrebhyasvāhāyassvāhauṣadhībhyassvāhā vanaspatibhyassvāhā patayadbhyassvāhā pariplavebhyassvāhā carācarebhyassvāhā sarīsṛpebhyassvāhāgnāvaiṣṇava ekādaśakapāla aindrāvaiṣṇavaścarurvaiṣṇavastrikapālo vāmano dakṣiṇā saumāpauṣṇaścaruraindrāpauṣṇaścaruḥ pauṣṇaścaruśśyāmo dakṣiṇāgnaye vaiśvānarāya dvādaśakapālo hiraṇyaṃ dakṣiṇā vāruṇo yavamayaścaruraśvo babhrurdakṣiṇā

bārhaspatyaścaruḥ purohitasya gṛhe śitipṛṣṭho dakṣiṇaindra ekādaśakapālo rājño gṛha ṛṣabho dakṣiṇādityai carurmahiṣyā gṛhe dhenurdakṣiṇā nairṛtaścaruḥ kṛṣṇānāṃ vrīhīṇāṃ nakhanirbhinnānāṃ parivṛktyā gṛhe śyenī kūṭā vaṇḍāpasphurā dakṣiṇāgneyo'ṣṭākapālassenānyo gahe hiraṇyaṃ dakṣiṇāśvino dvikapālassaṃgrahīturgṛhe savātyau dakṣiṇā sāvitro'ṣṭākapālaḥ kṣatturgṛhe śyeto dākṣiṇā vāruṇo yavamayo daśakapālassūtasya gṛhe babhrurmahāniraṣṭo dakṣiṇā mārutassaptakapālo vaiśyasya grāmaṇyo gṛhe pṛśniḥ paṣṭauhī dakṣiṇā pauṣṇaścarurbhāgadughasya gṛhe śyāmo dakṣiṇā raudro gāvīdhukaścarurakṣāvapasya ca govyacchasya ca gṛhe'sirvālāvṛto vavrirvālapratigrathitā barāsī dāmabhṛṣā vatsataro vā śabalo dakṣiṇendrāya sutrāmṇa ekādaśakapāla indrāyām̐homuca ekādaśakapālo rājño gṛha ṛṣabho dakṣiṇā

svayamavapannāyā aśvatthaśākhāyāḥ pātraṃ bhavati śvetām̐ śvetavatsāṃ duhanti tat svayaṃ mūrcchati svayaṃ mathyate svayaṃ vilīyate'tha maitrābārhaspatyam̐ havirnirvapati tān dvedhā taṇḍulān vibhajati ye kṣodīyām̐sastaṃ bārhaspatyaṃ carum̐ śṛtaṃ kurvanti sa yadāśṛto bhavatyatha tat pātramāśvatthamapidhāya pavitravatyājyamānayati tat sthavīyasa āvapati sa maitraścarussvayam̐śṛto bhavatyardhaṃ vedyāḥ kurvantyardham̐ svayaṃkṛtamardhaṃ barhiṣo dāntyardham̐ svayaṃdinamardhamidhmasya kurvantyardham̐ svayaṃkṛtam̐ śitipṛṣṭho bārhaspatyasya dakṣiṇāśvo maitrasya sā vai śvetā śvetavatsāgnaye gṛhapatya āśūnāmaṣṭākapālassavitre prasavitre satīnānāmaṣṭākapālassomāya vanaspataye śyāmākaścarurbṛhaspataye vācaspataye naivāraścarurindrāya jyeṣṭhāya hāyanānāmekādaśakapālo mitrāya satyasya pataya āmbānāṃ carurvaruṇāya dharmaṇaspataye yavamayo daśakapālo rudrāya paśupataya gāvīdhukaścarussavitā tvā prasavānām̐ suvatāmagnirgāhapatyānām̐ somo vanaspatīnāṃ bṛhaspatirvācāmindro jyaiṣṭhyānāṃ mitrassatyānāṃ varuṇo dharmaṇāṃ rudraḥ paśūnāṃ te devā asapatnamimam̐ suvadhva mahate kṣatrāya mahate jyaiṣṭhyāya mahate rājyāya mahate jānarājyāya mahate viśvasya bhuvanasyādhipatyāya

davārāpā apāṃ napādrāṣṭradāsstha rāṣṭraṃ datta svāhā vṛṣormirasi rāṣṭradāsstha rāṣṭraṃ datta svāhā vṛṣaseno'si rāṣṭradāsstha rāṣṭraṃ datta svāhāpāṃ patirasi rāṣṭradāsstha rāṣṭraṃ datta svāhā prahāvarīsstha parivāhiṇīsthaujasvinīsstha vrajakṣitasstha sūryavarcasasstha sūryatvacasasstha māndāsstha vaśāsstha śakvarīsstha marutāmojasstha janabhṛtasstha viśvabhṛtassthānādhṛṣṭāssthāpāmoṣadhīnāṃ rasaśśraviṣṭhāsstha rāṣṭradāsstha rāṣṭraṃ datta svāhā //
apo devīrmadhumatīragṛbhṇāmūrjasvatī rājasūyāścitānāḥ /
yābhirmitrāvaruṇā abhyaṣiñcan yābhirindramanayanatyarātīḥ //
devīrāpo madhumatīssam̐sṛjyadhvaṃ mahi kṣatraṃ kṣatriyāya vanvānāḥ /
anādhṛṣṭāssīdatorjasvatīrmahi varcaḥ kṣatriyāya dadatīḥ //
anibhṛṣṭamasi vāco bandhustapojāssomasya dātram̐ śukrā vaśśukreṇa punāmi candrā vaścandreṇa punāmi devo vassavitā punātvacchidreṇa pavitreṇa sūryasya raśmibhissvāhā rājasūyāḥ //
sadhamādo dyumnyā ūrja ekā anādhṛṣṭā apasyo vasānaḥ /
pastyāsu cakre varuṇassadhasthamapām̐ śiśurmātṛtamāsvantaḥ //
rudra yatte krivi paraṃ nāma tasmai hutamasi yameṣṭamasi svāhā soma indro varuṇo mitro agniste devā dharmadhṛto dharmaṃ dhārayantāṃ te'smai vācam̐ suvantām

kṣatrasya yonirasi kṣatrasyolbamasi kṣatrasya nābhirasyāvida āvedayatāvitto agnirgṛhapatirāvitta indro vṛddhaśravā āvittau mitrāvaruṇau dhṛtavratā āvitte dyāvāpṛthivī ṛtāvṛdhā āvittā devyaditirāvittaḥ pūṣā viśvavedā āvitto'yamasā āmuṣyāyaṇo'muṣyāḥ putro'muṣyāṃ viśyeṣa te janate rājā somo asmākaṃ brāhmaṇānāṃ rājendrasya vajro'si vārtraghrastvayāyaṃ vṛtraṃ vadhyācchatrubādhanāsstha pāta prācaḥ pāta pratīcaḥ pātānūcaḥ pāta tiraśco mitro'si varuṇo'si //
hiraṇyavarṇamuṣaso vyuṣṭā ayassthūṇamuditau sūryasya /
ārohatho varuṇa mitra gartaṃ tatra cakrāthe aditiṃ ditiṃ ca //
samidhamātiṣṭha gāyatrī tvā chandasāvatu trivṛtstomo rathantaram̐ sāmāgnirdevatā brahma draviṇamugrāmātiṣṭha triṣṭuptvā chandasāvatu pañcadaśasstomo bṛhat sāmendro devatā kṣatraṃ draviṇaṃ prācīmātiṣṭha jagatī tvā chandasāvatu saptadaśasstomo vairūpam̐ sāma maruto devatā viḍ draviṇamudīcīmātiṣṭhānuṣṭup tvā chandasāvatvekaviṃśasstomo vairājam̐ sāma mitrāvaruṇau devatā puṣṭaṃ draviṇamūrvāṣmātiṣṭha paṅktistvā chandasāvatu // triṇavatrayastriṃśau stomau śākvararaivate sāmanī bṛhaspatirdevatā varco draviṇam̐ somasya tviṣirasi tviṣimām̐ asi taveva me tviṣirbhūyāt pratyastaṃ namuceśśiro'veṣṭā dandaśūkā mṛtyoḥ pāhi didyotpāhyagnaye svāhā somāya svāhā savitre svāhā sarasvatyai svāhā pūṣṇe svāhā bṛhaspataye svāhendrāya svāhā ghoṣāya svāhā ślokāya svāhām̐śāya svāhā bhagāya svāhā kṣetrasya pataye svāhā somasya tvā dyumnenāgnestejasā sūryasya varcasendrasyendriyeṇa viśveṣāṃ tvā devānāṃ kratunābhiṣiñcāmyati divaspāhīndrasya yonirasi janaya //
samāvavṛtrannadharāgudaktā ahiṃ budhnyamanvīyamānāḥ /
tāḥ parvatasya vṛṣabhasya pṛṣṭhe nāvo viyanti suṣico na vāṇīḥ

indrasya vajro'si vājasāstvayāyaṃ vājam̐ senmitrāvaruṇayostvā praśāstroḥ praśiṣā yunajmi viṣṇoḥ kramo'si marutāṃ prasave jayāptaṃ manassamindriyeṇaiṣa vajro vājasātamastena nau putro vājam̐ sediyadasyāyurasyāyurme dhehyūrgasyūrjaṃ me dhehi yuṅṅasi varco'si varco me dhehi mitro'si varuṇo'si saṃ viśvairdevairnamo mātre pṛthivyai //
prati tyannāma rājyamadhāyi svāṃ tanvaṃ varuṇo'suṣot /
śucermitrasya vratyā abhūmāmanmahi mahadṛtasya nāma //
sarve vrātā varuṇasyābhūvanni mitrayuraratīnatārīt /
aśūśubhanta yajñiyā ṛtena ni trito no jarimāṇamānaṭ //
syonāsi suṣadāsi syonāmāsīda suṣadāmāsīda //
niṣasāda dhṛtavato varuṇaḥ pastyāsvā / sāmrājyāya sukratuḥ /
agnaye gṛhapataye svāhā somāya vanaspataye svāhendrasya balāya svāhā marutāmojase svāhā//
ham̐saśśuciṣadvasurantarikṣasaddhotā vediṣadatithirduroṇasat /
nṛṣadvarasadṛtasadvyomasadabjā gojā ṛtajā adrijā ṛtam //
brahmām̐३stvaṃ brahmāsi savitāsi satyasavo brahmām̐३stvaṃ brahmāsi mitro'si suśevo brahmām̐३stvaṃ brahmāsīndro'si satyaujā brahmām̐३stvaṃ brahmāsi varuṇo'si viśvaujā eṣa vajrastena me radhya diśo abhyabhūdayam //
prajāpate nahi tvadanya etā viśvā jātāni para tā babhūva /
yat kāmāste juhumastanno astu //
asā amuṣya putro'muṣyāsau putraḥ / vayam̐ syāma patayo rayīṇām //
apāṃ naptre svāhorjo naptre svāhāgnaye gṛhapataye svāhā

sāvitro'ṣṭākapālaśśyeto dakṣiṇā sārasvataścaruḥ paṣṭhauhyapravītā dakṣiṇā pauṣṇaścaruśśyāmo dakṣiṇā bārhaspatyaścaruśśitipṛṣṭho dakṣiṇaindra ekādaśakapāla ṛṣabho dākṣiṇā vāruṇo yavamayo daśakapālo babhrurmahāniraṣṭo dakṣiṇā tvāṣṭro'ṣṭākapālaśśuṇṭho dakṣiṇāgneyo'ṣṭākapālassaumyaścarurvaiṣṇavastrikapāla āgneyo'ṣṭākapālo hiraṇyaṃ dakṣiṇaindra ekādaśakapāla ṛṣabho dākṣiṇā // vaiśvadevaścarurdhenuḥ piśaṅgī dakṣiṇā maitrāvaruṇyāmikṣā vaśā dakṣiṇā bārhaspatyaścaruśśitipṛṣṭho dakṣiṇāgneyo'ṣṭākapālassaumyaścarussāvitro'ṣṭākapālo bārhaspatyaścaruragnaye vaiśvānarāya dvādaśakapālastvāṣṭro'ṣṭākapālo dākṣiṇo rathavāhanavāho dakṣiṇā sārasvataścaruḥ pauṣṇaścarurmaitraścarurvāruṇaścaruradityai caruḥ kṣetrasya pataye caruritaro rathavāhanavāho dakṣiṇā savitre dvādaśakapālo'śvibhyāṃ pūṣṇa ekādaśakapālassarasvatyai satyavāce carustisṛdhanvam̐ śuṣkadṛtardaṇḍa upānahau taddakṣiṇāśvo vā śoṇakarṇaḥ

trivṛdbahiṣpavamānaṃ pañcadaśānyājyāni pañcadaśo mādhyaṃdinaḥ pavamānassaptadaśāni pṛṣṭhāni saptadaśa ārbhavaḥ pavamāna ekaviṃśo'gniṣṭomaścatustrim̐śāḥ pavamānā abhiṣecanīyasya pañcadaśānyājyāni saptadaśāni pṛṣṭhānyekaviṃśo'gniṣṭomaścokthāni ca saptadaśo daśapeyassarva ekaviṃśaṃ bahiṣpavamānaṃ keśavapanīyasya saptadaśānyājyāni saptadaśo mādhyaṃdinaḥ pavamānaḥ pañcadaśāni pṛṣṭhāni pañcadaśa ārbhavaḥ pavamānastrivṛdagniṣṭomaścokthāni caikavim̐śaṣṣoḍaśī pañcadaśī rātrī trivṛtsandhirathaiṣa dvirātro vyuṣṭistasya yāvanti saṃvatsarasyāhorātrāṇi tāvatīsstotrīyāḥ

yuñjānaḥ prathamaṃ manastatvāya savitā dhiyaḥ / agniṃ jyotirnicāyya pṛthivyā adhyābharat//
yuktena manasā vayaṃ devasya savitussave / svargyayā śaktyā //
yuktvāya savitā devān svaryato dhiyā divam /
bṛhajjyotiḥ kariṣyatassavitā prasuvāti tān //
yuñjate mana uta yuñjate dhiyo viprā viprasya bṛhato vipaścitaḥ /
vi hotrā dadhe vayunāvideka inmahī devasya savituḥ pariṣṭutiḥ //
yuje vāṃ brahma pūrvyaṃ namobhirvi śloka etu patheva sūraḥ /
śṛṇvantu viśve amṛtasya putrā ā ye dhāmāni divyāni tasthuḥ //
yasya prayāṇamanvanya idyayurdevā devasya mahimānamarcataḥ /
yaḥ pārthivāni vimame sa etaśo rajām̐si devassavitā mahitvanā //
deva savitaḥ prasuva yajñaṃ prasuva yajñapatiṃ bhagāya //
divyo gandharvaḥ ketapaḥ ketaṃ punātu vācaspatirvācaṃ nassvadatu //
imaṃ me deva savitaryajñaṃ praṇaya devāvyam / sakhividam̐ satrājitaṃ dhanajitam̐ svarvidam //
ṛcā stomam̐ samardhaya gāyatreṇa rathantaram / bṛhadgāyatravartani

pra devaṃ devyā dhiyā bharatā jātavedasam / havyā no vakṣadānuṣak //
ayam ṣya pra devayurhotā yajñāya nīyate / ratho na yorabhīvṛto ghṛṇīvāñcetati tmanā //
ayamagniruruṣyatyamṛtādiva janmanaḥ / sahasaścit sahīyān devo jīvātave kṛtaḥ //
iḍāyāstvā pade vayaṃ nābhā pṛthivyā adhi /
jātavedo nidhīmahyagne havyāya voḍhave //
agne viśvebhissvanīka devairūrṇāvantaṃ prathamassīda yonim /
kulāyinaṃ ghṛtavantaṃ savitre yajña naya yajamānāya sādhu //
sīda hotarni hotā /
tvaṃ dūtastvamu naḥ paraspāstvaṃ vasya ā vṛṣabha praṇetā /
agne tokasya nastane tanūnāmaprayucchan dīdyadbodhi gopāḥ //
añjanti tvāmadhvare devayanto vanaspate madhunā daivyena /
yadūrdhvastiṣṭhād draviṇeha dhattādyadvā kṣayo māturasyā upasthe //
ucchrayasva vanaspate varṣman pṛthivyā adhi / sumitī mīyamāno varco dhā yajñavāhase //
samiddhasya śrayamāṇaḥ purastādbrahma vanvāno ajaram̐ suvīram /
āre asmadamatiṃ bādhamāna ucchrayasva mahate saubhagāya //
ūrdhva ū ṣu ṇa ūtaye tiṣṭhā devo na savitā /
ūrdhvo vājasya sanitā yadañjibhirvāghadbhirvihvayāmahe //
ūrdhvo naḥ pāhyam̐haso ni ketunā viśvam̐ samatriṇaṃ daha /
kṛdhī na ūrdhvāñcarathāya jīvase vidā deveṣu no duvaḥ //
yuvā suvāsāḥ parivīta āgāt sa u śreyān bhavati jāyamānaḥ /
taṃ dhīrāsaḥ kavaya unnayanti svādhyo manasā devayantaḥ //
abhi tvā deva savitarīśānaṃ vāryāṇām / sadāvan bhāgamīmahe //
mahī dyauḥ pṛthivī ca nastvāmagne puṣkarādadhi tamu tvā dadhyaṅṅṛṣistamu tvā pāthyo vṛṣāgnī rakṣām̐si sedhatyuta bruvantu jantavaḥ //
ā yam̐ haste na khādinam̐ śiśuṃ jātaṃ na bibhrati / viśāmagniṃ svadhvaram //
pra devaṃ devavītaye bharatā vasuvittamam / a sve yonau niṣīdata //
ā jātaṃ jātavedasi priyam̐ śiśītātithim / syona ā gṛhapatim //
agnināgnissamidhyate kavirgṛhapatiryuvā / havyavāḍ juhvāsyaḥ //
tvam̐ hyagne agninā vipro vipreṇa san satā / sakhā sakhyā samidhyase //
taṃ marjayanta sukratuṃ purogāvānamājiṣu / sveṣu kṣayeṣu vājinam //
yajñena yajñamayajanta devāstāni dharmāṇi prathamānyāsan /
te ha nākaṃ mahimānassacanta yatra pūrve sādhyāssanti devāḥ

hotā yakṣadagnim̐ samidhā suṣamidhā samidhaṃ nābhā pṛthivyāssaṃgathe vāmasya varṣman diva iḍaspade vetvājyasya hotaryaja hotā yakṣat tanūnapātamaditergarbhaṃ bhavanasya gopāṃ madhvādya devo devebhyo devayānān patho anaktu vetvājyasya hotaryaja hotā yakṣadagnimiḍa īḍito devo devām̐-ā vakṣaddūto havyavāḍamūra upemaṃ yajñamupemāṃ devo devahūtiṃ vetvājyasya hotaryaja hotā yakṣadbarhissuṣṭarīmorṇamradā asmin yajñe vi ca pra ca prathatām̐ svāsasthaṃ devebhya emenadadya vasavo rudrā ādityāssadantu priyamindrasyāstu vetvājyasya hotaryaja hotā yakṣaddura ṛṣvāḥ kavaṣyo koṣadhāvanīrudātābhirjihatāṃ vi pakṣobhiśśrayantām̐ suprāyaṇā asmin yajñe viśrayantāmṛtāvṛdho vyantvājyasya hotaryaja hotā yakṣaduṣāsānaktā bṛhatī supeśasā nṝm̐ patibhyo yoniṃ kṛṇvāne sam̐smayamāne indreṇa devairedaṃ barhissīdatāṃ vītāmājyasya hotaryaja hotā yakṣaddaivyā hotārā mandrā potārā kavī pracetasā sviṣṭamadyānyaḥ karat svabhigūrtamanyassvatavasemaṃ yajñaṃ divi deveṣu dhattāṃ vītāmājyasya hotaryaja hotā yakṣat tisro devīrapasāmapastamā acchidramadyedamapastanvatāṃ devebhyo devīrdevamapo vyantvājyasya hotaryaja hotā yakṣat tvaṣṭāramaciṣṭumapākaṃ retodhāṃ viśravasaṃ yaśodhāṃ pururūpamakāmakarśanam̐ supoṣaḥ poṣaissyāt suvīro vīrairvetvājyasya hotaryaja hotā yakṣadvanaspatimupāvasrakṣaddhiyo joṣṭāram̐ śaśamannarassvadāt svadhitirṛtuthādya devo devebhyo havyavāḍvetvājyasya hotaryaja hotā yakṣadagniṃ svāhājyasya svāhā medasassvāhā stokānām̐ svāhā svāhākṛtīnām̐ svāhā havyasūktīnām̐ svāhā devā ājyapā juṣāṇā agna ājyasya vyantu hotaryaja

[ १०३८] //
iti śrīyajuṣi kāṭhake carakaśākhāyāmiṭhimikāyāṃ śrīrājasūyaṃ nāma pañcadaśaṃ sthānakaṃ saṃpūrṇam