Kathaka Samhita · Verses 13-2

atha trayodaśaṃ sthānakam //
paśubandham /
tisro'jāśśvetā malhā garbhiṇīrālabheta brahmavarcasakāma āgneyīṃ vasantā saurī grīṣme bārhaspatyām̐ śaradi yadāgneyī mukhata eva tayā tejo dhatte yat saurī madhyata eva tayā rucaṃ dhatte yad bārhaspatyopariṣṭādeva tayā brahmavarcasaṃ dhatte saṃvatsaraṃ paryālabhyante vīryaṃ vai saṃvatsarassaṃvatsarameva vīryamāpnoti yacchvetā ruca eva tadrūpaṃ garbhiṇīrbhavantīndriyaṃ vai garbha indriyamevāvarunddhe tisro malhā garbhiṇīrālabheta yaṃ paryamyurvāyavyām̐ śvetām̐ sarasvatīṃ meṣīmādityāmajāmadhorāmāṃ meṣīṃ vā manasā vā eta etaṃ paryamanti mano vāyuryad vāyavyā manasaivaiṣāṃ manām̐si śamayati vācā vā eta etaṃ paryamanti vāk sarasvatī yat sārasvatī vācaivaiṣāṃ vācam̐ śamayatyapratiṣṭhito vā eṣa yaṃ paryamantīyamaditiryadādityāsyāmeva pratitiṣṭhatyanapimantro vā eṣa eteṣu yaṃ paryamanti vāco mantro garbho yad garbhiṇīrvāca evainaṃ garbhamakarapimantramenaṃ karotyapa vā etasmādindriyaṃ krāmati yaṃ paryamantīndriyaṃ garbho yadgarbhiṇīrindriyamevāvarunddhe'gnaye vaiśvānarāya kṛṣṇaṃ petvamālabheta yassamāntamabhidruhyed yo vābhidudrukṣet saṃvatsaro vā agnirvaiśvānarassaṃvatsarāyaiṣa samamate yassamamate saṃvatsaramevāptvā kāmamavaruṇamabhidruhyati prājāpatyamajaṃ tūparaṃ viśvarūpamālabheta sarvebhyaḥ kāmebhyaḥ prajāpatiryoniryonereva prajāyate prajāpatiḥ pradātā tameva bhāgadheyenopadhāvati so'smai sarvān kāmān prayacchatyaśvasyeva vā etasya śiro gardabhasyeva karṇau puruṣasyeva śmaśrūṇi goriva pūrvau pādā averivāparau śuna iva lomānyajo bhavatyetāvanto vai grāmyāḥ paśavastānevaitenāptvāvarunddhe dvādaśa dhenavo dakṣiṇā tārpyaṃ hiraṇyamadhīvāsaḥ prajāpateryāssāmidhenyastāssāmidhenyaḥ prajāpateryā āpriyastā āpriyo hiraṇyagarbhavatyāghāra etasya sūktasya yājyānuvākye etena ha vā upaketū rarādha'rdhnoti ya etena yajate dvādaśadhā ha tvai sa prāśitrāṇi parijahāra tatra dvādaśa dvādaśa dhenūrdadau yad dvādaśa dadāti saiva tasya pratimā yat tārpyaṃ hiraṇyamadhīvāsamaparimitameva tenāvarunddhe

vāruṇaṃ kṛṣṇaṃ petvamekaśitipādamālabhetāmayāvī jyogāmayāvī prajāpatiḥ prajā asṛjata tā enamatyacaram̐stā aticarantīrvaruṇenāgrāhayat tā jihmāḥ pannā aśerata varuṇagṛhītāstāḥ kṛṣṇaḥ petva āpravata tasyābhihāya pādamagṛhṇāt sa prāvṛhyata sa ekaśitipādabhavat tāḥ prajāpatā anāthanta so'paśyadyo'yamavaruṇagṛhītastenainā varuṇānmuñcānīti taṃ vāruṇamālabhata tenainā varuṇādamuñcadvaruṇagṛhīta eṣa ya āmayāvī yadvāruṇo varuṇādevainaṃ muñcati / dvīpe yajetāpo vai varuṇassamakṣamevainaṃ varuṇānmuñcati prajāpatiḥ paśūn sṛṣṭvā varuṇaṃ varamabhyasṛjat sa etamavṛṇīta tasmādvaruṇadevatyaḥ pāpmanaiṣa gṛhīto ya āmayāvī kṛṣṇa iva pāpmā yat kṛṣṇaḥ pāpmānamevāpahate yadekaśitipādvaruṇapāśameva tena pramuñcata āgneyamajamālabheta vāruṇaṃ kṛṣṇaṃ petvaṃ bubhūṣannṛddhyā evāgneyo varuṇagṛhīta eṣa yo'laṃ bhūtyai sanna bhavati yadvāruṇo varuṇādevainaṃ muñcatyardhaṃ vai puruṣasyāgneyamardhaṃ vāruṇamasthānyāgneyāni mām̐sāni vāruṇāni tayorevainaṃ bhāgadheyena niṣkrīṇāti // so'nṛṇo bhūtvā bhavatyeva vāruṇaṃ kṛṣṇaṃ vṛṣṇimabhicarannālabheta mṛtyurvai varuṇo mṛtyunaivainaṃ grāhayatyetadvai pāpmano rūpaṃ kṛṣṇa iva pāpmā yat kṛṣṇaḥ pāpmanaivainamabhiṣuvati //
paśuṃ badhnāmi varuṇāya rājña indrāya bhāgamṛṣabhaṃ kevalo hi /
gātrāṇi devā abhisaṃviśantu yamo gṛhṇātu nirṛtissapatnān //
ityetā vai devatāḥ puruṣasyeśate tābhya evainamadhiniṣkrīya mṛtyuryamo mṛtyunaivainaṃ grāhayati

vaiṣṇavaṃ vāmanamālabheta bhrātṛvyavān viṣṇurvā imāṃllokānudajayat sa ebhyo lokebhyo'surān prāṇudatemāneva lokānujjayatyebhyo lokebhyo bhrātṛvyaṃ praṇudate viṣame yajeta viṣamā iva hīme lokā aindrāmārutaṃ pṛśnisakthamālabheta yasmāt kṣatriyād viḍabhyardhaścaret kṣatraṃ vā indro viṇmarutaḥ kṣatrāyaiva viśamanuniyunakti pṛśnisaktho bhavati viśamevāsmai paścādupadadhātyasam̐sargāyaindramutpṛṣṭimālabheta paśukāma indro vai valamapāvṛṇot tam̐ sahasramanūdait tasyaiṣo'grata udatṛṇat sa samaiṣaduttitṛtsanimāṃllokān paśyam̐stasmādeṣa samīṣitaḥ pratīṣitagrīvastametaṃ purastāt sahasrasyālabheta pra sahasraṃ paśūnāpnoti valamevāpavṛṇoti yadā sahasraṃ paśūn prāpnuyādatha vaiṣṇavaṃ vāmanamālabheta pratiṣṭhityā etasmin vai tat sahasramadhyatiṣṭhat sa vyaiṣadadhiṣṭhīyamānastasmādeṣa tiryaṅṅiva vīṣitastā etā evamabhita ālabheta sahasrasya parigṛhītyai yajño vai dakṣiṇāmabhyakāmayata tām̐ samabhavat sā garbhamadhatta tamavavṛjya prādravat tamavavṛktam̐ śayānamaditiracāyat tamāharat tamadhastādūrvorupāsyata so'dhastādūrvoravardhata tasmādeṣa tiryaṅṅiva vīṣito'dhastāddhyūrvoravardhata taṃ viṣṇuracāyat tamabhyavadat tasmin praśnamaitāṃ taṃ viṣṇave'nvabruvam̐stasmādāhuḥ kartureva putra iti yena vāmanenertsedadityai caruṃ purastānnirvapedatirvā etamavardhayat tasyā evainamadhiniṣkrīṇāti tenānṛṇena niṣkrītena medhyena prasūtenardhnotyeva saumyaṃ babhrumṛṣabhaṃ prathamakusindhamālabheta yo rājya āśam̐seta somo vai devānāṃ rājā soma etasya devatā yo rājya āśam̐sate svāmeva devatāṃ bhāgadheyenopadhāvati sainaṃ rājyāya pariṇayati yat prathamakusindho vīryasya tadrūpamindrāya vajriṇe rohitamṛṣabhaṃ prathamakusindhamālabheta rājanyāyābhicarate vā bubhūṣate vaindro vai rājanyo devatayā vajro'sya vīryaṃ vajramevāsmin dadhāti tena vijayati bhavatyeva yat prathamakusindho vīryasya tadrūpaṃ ya ekāṣṭakāyāṃ jāyeta tamutsṛjed yadi dvau jāyeyātāṃ tā ubhā utsṛjed yadi saṃvatsare dvitīyo jāyeta tam̐ saṃvatsare'nūtsṛjedāgneyamaṣṭākapālaṃ nirvapejjātayorāgneyā vai paśavastasmādevainā adhiniṣkrīṇātyagnaye vaiśvānarāya dvādaśakapālaṃ nirvapetsaṃvatsare paryete saṃvatsaro vā agnirvaiśvānarassaṃvatsarādevainā adhiniṣkrīṇātyā medhyābhyāṃ bhavitossaṃvatsare saṃvatsare'gnaye vaiśvānarāya dvādaśakapālaṃ nirvapet saṃvatsaro vā agnirvaiśvānarassaṃvatsarādevainā adhiniṣkrīṇāti // tābhyām̐ sarvato niṣkrītābhyāṃ medhyābhyāṃ prasūtābhyāmṛdhnotyevaitasyāṃ vā indro'jāyata sa devānāṃ vīryāvattamastasmād ya ekāṣṭakāyāṃ paśūnāṃ jāyate sa vīryāvān bhavati vīryāvān bhavati ya evaṃ vidvānetābhyāṃ yajata indrāyābhimātighne pūrvamālabheta pāpmā vā abhimātiḥ pāpmānamevāpahata indrāya vṛtratura uttaraṃ pāpmā vā abhimātiḥ pāpmānamevāpahatyāthaitena vṛtratūrbhavati svārājyamupaiti nāsmādanyassamāneṣu vasīyān bhavati ya evaṃ vidvānetābhyāṃ yajate śatamanyasya dakṣiṇāśvo'nyasya pūrvavāḍyā eva kauca dvā etad brāhmaṇā anevamutsṛṣṭā ālabheta tābhyāmevardhnoti tatra yat kiṃca dadāti tad dakṣiṇā

indrāya manyumate lalāmamṛṣabhamālabheta saṃgrāme manyunā vai vīryaṃ karotīndriyeṇa jayati manyuṃ caiveṣvindriyaṃ ca jityai dadhāti yallalāmaḥ purastānmanyossamṛddhyai devāśca vā asurāśca saṃyattā āsam̐ste na vyajayanta te'bruvan brahmaṇā no menī vijayetāmiti ta ṛṣabhau samavāsṛjañchvaitreyo'ruṇastūparo devānāmāsīcchyeneyaśśyeto'yaśśṛṅgo'surāṇāṃ tau samahatāṃ tam̐ śvaitreyassamayābhinat sā yā vāk parājitā sīt sāvācyapatad yājayat sordhvā tasmād yasyāvācī vāk so'nārtvijīno'suryo hi sa varṇastasmād yasyordhvā vāk sa ārtvijīno devatreva hi sa bārhaspatyamaruṇaṃ tūparamabhicarannālabheta brahma vai bṛhaspatirbrahmaṇaivainamabhiprayuṅkta etena vai devā asurānastṛṇvata yat tūparasstṛtyā indro vai vṛtramaham̐stam̐ hatassaptabhirbhogaiḥ paryaham̐stasya mūrdhno vaidehīrudāyam̐stāḥ prācīrāyam̐stasmāt tāḥ purassa jaghanyamṛṣabhaṃ vaidehamanūdyantamamanyatemamidānīmālabheya tena tvā ito mucyeyeti tamālabhata tena nāmucyata sa āgneyamajamālabhataindramṛṣabhaṃ tena vai sa tānagninā pāpmano bhogānapidahyāthaindreṇendriyaṃ vīryamātmannadhatta tato vai so'bhavadāgneyajamālabhetaindramṛṣabhaṃ bubhūṣan yaḥ pāpmagṛhīta iva manyeta pāpmā vai sa tam̐ saptabhirbhogaiḥ paryahan pāpmana eṣa bhogaiḥ parihato yo'laṃ bhūtyai sanna bhavati yadāgneyo'gninaiva pāpmano bhogānapidahyāthaindreṇendriyaṃ vīryamātman dhatte bhavatyeva // devāśca vā asurāścāsmiṃlloka āsam̐ste'surā devānanudantāsmāllokāt te devāḥ prajāpatā evānāthanta sa etā asṛjatarṣabhaṃ ca vaśāṃ ca yamaṃ ca yamyaṃ ca tasmād yau yamau mithunau jāyete ṛṣabha evānyo bhavati vaśānyā sa vaiṣṇuvāruṇīṃ vaśāmālabhataindramṛṣabhaṃ tena vai sa tān varuṇenāsurān grāhayitvā viṣṇunā yajñena prāṇudatāthaindreṇendriyaṃ vīryamātmannadadhādeṣu tato devā abhavan parāsurā abhavam̐stā etā evamālabheta yo bhrātṛvyena vyāyaccheta vaiṣṇuvāruṇīṃ vaśāmaindramṛṣabhaṃ varuṇenaiva bhrātṛvyaṃ grāhayitvā viṣṇunā yajñena praṇudate'thaindreṇendriyaṃ vīryamātman dhatte bhavatyātmanā parāsya bhrātṛvyo bhavatyoṣadhibhyo vehatamālabheta prajākāma oṣadhīnāṃ vā eṣā priyā tā etām̐ sūtoḥ paribādhante tasmādeṣā sarveṣāṃ paśūnāṃ priyāpa oṣadhaya āpo'sat khananti tā eva bhāgadheyenopadhāvati tā asmai prajāṃ khananti yāvantastāṃ vāśitāmanvādhāvanti te dakṣiṇā samaddhyā aindrīm̐ sūtavaśāmālabheta rājanyāya bubhūṣata indro bā etasyā ajāyata sa punaḥ pratyavaikṣata so'manyata yo vā ito'paro janiṣyate sa me bhrātṛvyo bhaviṣyatīti taṃ pratyāvamṛśya yoniṃ nyaveṣṭayat tasmādeṣā nāparam̐ sūta aindro rājanyo devatayā svādevainaṃ yonerjanayati bhūtyai bhavatyeva yastasyā adhijāyeta tamaindramālabhetendriyakāma indriyaṃ vā etadetasyā adhijāyate tadeva samakṣamāptvāvarunddhe brāhmaṇaspatyamatiṣṭhāyamālabheta yaḥ kāmayetātiṣṭhāyassyāmityagnervai jihvā brahmaṇaspatissarvameṣātitiṣṭhati rūpeṇaivainam̐ samardhayati sainamatiṣṭhāyaṃ karoti

āgneyamajamālabheta saumyamṛṣabhaṃ yasya pitā pitāmahaḥ puṇyassyādatha tanna prāpnuyādagnissarvā devatā mukhata eva devatā ālabhata indriyeṇa vā eṣa somapīthena vyṛdhyate yasya pitā pitāmahaḥ puṇyo bhavatyatha tanna prāpnoti saumyo brāhmaṇo devatayendriyamasya somapītho yat saumya indriyeṇaivainam̐ somapīthena samardhayati dyāvāpṛthivyāṃ dhenuṃ paryāriṇīmālabheta niruddho jyoṅniruddho dyāvāpṛthivyorvā eṣa nirbhakto yo niruddho jyoṅniruddho yad dyāvāpṛthivyā dyāvāpṛthivyorevainamābhajati paryārī vā eṣa yo niruddho jyoṅniruddhaḥ paryāriṇyasya devatā yat paryāriṇī sva evāsya tena paśuretasyāṃ eva vāyavyaṃ vatsam̐ śva ālabheta vāyurvā anayorvatsassa ime āpyāyayati sa pradāpayati tameva bhāgadheyenopadhāvati so'smā ime pradāpayatyaindrāgnametamanusṛṣṭamālabheta yasya pitā pitāmahassomaṃ na pibedatha sa pipāsedindriyeṇa vā eṣa somapīthena vyṛdhyate yasya pitā pitāmahassomaṃ na pibatyāgneyo brāhmaṇo devatayendriyamasya somapītho yadaindrāgnassvayaiva devatayā somapīthamanusaṃtanotyanusṛṣṭo vā etasya somapītho yasya pitā pitāmahassomaṃ na pibati yadanusṛṣṭassva evāsya tena paśuryadetau dvivatyasya tadrūpaṃ tvāṣṭram̐ śuṇṭhamālabheta yaḥ kāmayeta sūpakāśo me putro jāyeteti tvaṣṭā vai rūpāṇāṃ vikartā tameva bhāgadheyenopadhāvati so'smai rūpāṇi vikarotyāśvinaṃ kṛṣṇalalāmamālabheta bhrātṛvyavān devā vā asurānahno'nudanta teṣāṃ yat svamāsīd yadvittaṃ yadvedyaṃ tena rātrīm̐ samavāyam̐ste devā etamāśvinaṃ kṛṣṇalalāmamapaśyam̐stamālabhanta tenainān rātrīmanvavāyan dyāvāpṛthivī vā aśvinau tān dyāvāpṛthivībhyāmevāvastānnibādhyādityena parastādrātryā anudanta teṣāṃ yat svamāsīda yādvittaṃ yadvedyaṃ tadavṛñjata tato devā abhavan parāsurā abhavan dyāvāpṛthivī vā aśvinau dyāvāpṛthivībhyāmevāvastād bhrātṛvyaṃ nibādhyādityena parastādahorātrayoḥ praṇudate tasya yat svaṃ yadvittaṃ yadvedyaṃ tad vṛṅkte bhavatyātmanā parāsya bhrātṛvyo bhavati/ yallalāmo'hnastadrūpaṃ yat kṛṣṇo rātryāstadubhayorevainaṃ varṇayoḥ praṇudata indro vai vilisteṅgāṃ dānavīmakāmayata so'sureṣvacarat stryeva strīṣvabhavat pumān puṃsu nirṛtigṛhīta ivāmanyata sa etamaindrānairṛtaṃ vipum̐sakamapaśyadyena rūpeṇācarat tamālabhata tasya yadanavadānīyamāsīt tena pūrveṇa prācaraddakṣiṇā paretya svakṛta iriṇe juṣāṇā niṛtirvettu svāhetyathetaraṃ punaretyaindram̐ samasthāpayat sa nirṛtimeva pūrvāṃ niravadāyāthaindreṇendriyaṃ vīryamātmannadhatta tato vai so'bhavadaindrānairṛtaṃ vipum̐sakamālabheta bubhūṣan yo nirṛtigṛhīta iva manyeta tasya yadanavadānīyam̐ syāt tena pūrveṇa pracareddakṣiṇā paretya svakṛta iriṇe juṣāṇā nirṛtirvettu svāhetyathetaraṃ punaretyaindram̐ sam̐sthāpayennirṛtimeva pūrvāṃ niravadāyāthaindreṇendriyaṃ vīryamātman dhatte bhavatyevaindraṃ viśālamṛṣabhamālabheta saṃgrāme yaḥ kāmayetāyam̐ saṃgrāmo na vijayetetīndro vai saṃgrāmasya vinetendro vijāpayitā tameva bhāgadheyenopadhāvati sa enān vinayati yadviśālo viyatāṃ tadrūpamindrāya vighanāya viśālamṛṣabhamālabheta janatayossaṃdhau yaḥ kāmayetobhe janate ṛccheyamityubhe eva janate ṛcchati ta anyānyāṃ ghnatī carato yadviśāla āvraskamevaine gamayati

āgnivāruṇīmanaḍvāhīmālabhetānājñātayakṣmagṛhīto'nājñātayakṣmo vā etāṃ vitto yā strī satyanaḍvāhī tasmādenāmanājñātayakṣmagṛhīta ālabhetāgnissarvā devatā yadevāsya devatābhirniṣitaṃ tadagninā muñcati yadvaruṇagṛhītaṃ tadvaruṇena yadvahinī tenāgneyī yat strī satī dāntā tena vāruṇī tasmādāgnivāruṇī bhavati tvāṣṭramam̐sepādamālabheta paśukāmo mithuno vā eṣa yom̐'sepātvdaṣṭā mithunasya prajanayitā tameva bhāgadheyenopadhāvati so'smā etasmānmithunāt paśūn prajanayati vāruṇam̐ śyāmaśitikaṇṭhamālabheta yaṃ vyemānaṃ yakṣmo gṛhṇīyād ruṇo vā etaṃ gṛhṇāti yaṃ vyemānaṃ yakṣmo gṛhṇāti yad vāruṇo varuṇādevainaṃ muñcati pāpmanaiṣa gṛhīto ya āmayāvī śyāma iva pāpmā yacchyāmaḥ pāpmānamevāpahate yacchitikaṇṭho varuṇapāśameva tena pramuñcata āśvinaṃ dhūmralalāmamālabheta yo durbrāhmaṇam̐ somaṃ pipāyayiṣedaśvinau vai devānāmasomapā āstāṃ tau paścāt somapīthaṃ prāpnutāmaśvinā etasya devatā yaḥ paścāt somapastā eva bhāgadheyenopadhāvati tā enam̐ somapīthāya pariṇayatasstāyadiva yajeta stāyadiva hi durbrāhmaṇo brāhmaṇo bubhūṣati dhūmra iva vā eṣa yo durbrāhmaṇo yaddhūmro dhūmrimāṇamevāpahate yallalāmo mukhata eva tena tejo dhatte sārasvatīṃ dhenuṣṭarīmālabheta yaṃ bhrātṛvyā nīva śvāsayeran vācā vā eta etaṃ niśvāsayante vāk sarasvatī yat sārasvatī vācaivaiṣāṃ vācaṃ pratiśṛṇāti // dhenurvā eṣā satī na duhe tasmāddhenuṣṭaryucyate yaddhenuṣṭarī vācamevaiṣām̐ starīkaroti sārasvatīṃ dhenuṣṭarīmālabheta yamajaghnivām̐samabhiśam̐seyuraśāntā vā etaṃ vāgṛcchati yamajaghnivām̐samabhiśam̐santi vāk sarasvatī yat sārasvatī vācaivaiṣāṃ vācam̐ śamayati dhenurvā eṣā satī na duhe tasmāddhenuṣṭaryucyate yaddhenuṣṭarī vācameveṣām̐ starīkaroti sāvitraṃ punarutsṛṣṭamālabheta yaḥ purā puṇyo bhūtvā paścāt pāpīyān syādyayā vā eṣa devatayā purā puṇyo bhavati sā hi vā etamanusṛjatyathaiṣa pāpīyān bhavati savitā śriyaḥ prasavitā tameva bhāgadheyenopadhāvati sa enaṃ punaśśriye prasuvati pāpo vā eṣa purā bhūtvā paścācchriyaṃ prāpnoti yo'naḍvān bhūtvokṣā bhavati yathaiva sa śriyaṃ prāpnotyevamenam̐ śriyaṃ prāpayati

trīm̐llāmānṛṣabhān vasantālabheta trīñchiātikakudo grīṣme trīñchitibhasadaśśaradi yallalāmā mukhata eva tena tejo dhatte yacchitikakudo madhyata eva tena rucaṃ dhatte yacchitibhasada upariṣṭādeva tena brahmavarcasaṃ dhatte saṃvatsaraṃ paryālabhyante vīryaṃ vai saṃvatsarassaṃvatsarameva vīryamāpnoti nava bhavaṃti nava prāṇāḥ prāṇānevātman dhatta aindrāssyurbubhūṣan yajetāsau vā āditya indrassa etairabhavat sa etaistejo vīryamātmannadhatta bhavatyeva tejo vīryamātman dhatte ya evaṃ vidvānetairyajate prājāpatyam̐ sarvarūpaṃ daśamamālabheta saṃvatsare paryete saṃvatsarasyāptyai prajāpatiryoniryonā eva pratitiṣṭhati / sarvarūpo bhavati sarvasyāptyai sarvasyāvaruddhyai daśa bhavanti daśa prāṇāḥ prāṇā vīryaṃ vīrya eva pratitiṣṭhati dyāvāpṛthivye dhenū saṃmātarā ālabhetānnakāmo dyāvāpṛthivī vā annādyasyeśāte amuto varṣatyasyāṃ pratitiṣṭhatyete annādyasya pradātrī te eva bhāgadheyenopadhāvati te asmā annādyaṃ prayacchatassaṃmātarau bhavatassaṃmātarā iva hīme etayoreva vāyavyaṃ vatsam̐ śva ālabheta vāyurvā anayorvatsassa ime āpyāyayati sa pradāpayati tameva bhāgadheyenopadhāvati so'smā ime pradāpayati bārhaspatyam̐ śitipṛṣṭhamālabheta brahmavarcasakāmo brahma vai bṛhaspatirbṛhaspatirbrahmavarcasasya pradātā tameva bhāgadhayenopadhāvati so'smai brahmavarcasaṃ prayacchati // pṛṣṭhamiva vā eṣa bhavati yo bhavati yacchitipṛṣṭhaḥ pṛṣṭhamevainaṃ karotyāśvinaṃ kṛṣṇalalāmamālabhetānujāvaro'śvinau vai devānāmānujāvarau tā agraṃ paryaitāmaśvinā etasya devatā ya ānujāvarastā evānvārabhate tā enamagraṃ pariṇayataḥ pāpmanaiṣa gṛhīto ya ānujāvaraḥ kṛṣṇa iva pāpmā yat kṛṣṇaḥ pāpmānamevāpahate yallalāmo mukhata eva tena tejo dhatta āśvinaṃ kṛṣṇalalāmamālabhetāmayāvyaśvinau vai devānāṃ bhiṣajā aśvinau etasya devatā ya āmayāvī tā eva bhāgadheyenopadhāvati tā enaṃ bhiṣajyataḥ pāpmanaiṣa gṛhīto ya āmayāvī kṛṣṇa iva pāpmā yat kṛṣṇaḥ pāpmānamevāpahate yallalāmo mukhata eva tena tejo dhatte // tvāṣṭraṃ vipum̐sakamālabheta prajākāmo vā paśukāmo vā prajāpatirvai prajāssisṛkṣamāṇassa dvitīyaṃ mithunaṃ nāvindata sa etadrūpaṃ kṛtvāṅguṣṭhenātmānam̐ samabhavat tataḥ prajā asṛjata tvaṣṭā mithunasya prajanayitā tameva bhāgadheyenopadhāvati so'smā etasmānmithunāt paśūn prajanayatyetena vai rūpeṇa prajāpatiḥ prajā asṛjata yenaiva rūpeṇa prajāpatiḥ prajā asṛjata tasmādeva rūpāta prajayā ca paśubhiśca prajāyata aindraṃ vipum̐sakamālabheta yaḥ paṇḍakatvādbibhīyādindro vā etāṃ tvacametaṃ pāpmānamapāhata tameva bhāgadheyenopadhāvati so'smāt tāṃ tvacaṃ taṃ pāpmānamapahantyṛṣabho dakṣiṇā vīryaṃ vā ṛṣabho vīryamevāsmin dadhāti

chandām̐si vai yajñamabhyamanyanta sa vaṣaṭkāro'bhyayya gāyatryāśśiro'cchinat tato yo raso'sravat sā vaśābhavadyadvaśamasravat tadvaśāyā vaśātvaṃ yat prathamamasravallohitaṃ vāva tadasravat tadbṛhaspatirupāgṛhṇāt sā yā rohiṇī sābhavat tasmāt sā bārhaspatyā yad dvitīyamasravat tanmitrāvaruṇā upāgṛhṇītām̐ sā yā dvirūpā sābhavat tasmāt sā maitrāvaruṇī yat tṛtīyamasravat tadviśve devā upāgṛhṇan sā yā bahurūpā sābhavat tasmāt sā vaiśvadevī // yadudaukṣata tadbṛhaspatirabhyagṛhṇāt sa ukṣābhavat tadukṣṇa ukṣatvaṃ yadatyamucyata tānīmānyanyāni rūpāṇi bārhaspatyāṃ rohiṇīmālabheta brahmavarcasakāmo rasena vā eṣa vyṛdhyate yo'laṃ brahmavarcasāya sanna brahmavarcasī bhavati cchandasāmeṣa raso brahma bṛhaspatirbrahmaṇaivāsmim̐stejo rasaṃ dadhāti brahmavarcasī bhavati maitrāvaruṇīṃ dvirūpāmālabheta vṛṣṭikāmo 'horātre vai mitrāvaruṇā ahorātre parjanyo'nuvarṣati naktaṃ vā hi divā varṣatyetau varṣasyeśāte tā eva bhāgadheyenopadhāvati tā asmai prītau vṛṣṭiṃ ninayato maitrāvaruṇīṃ dvirūpāmālabheta prajākāmo'horātre vai mitrāvaruṇā ahorātre prajā anuprajāyante naktaṃ vā hi divā vā prajāyante'horātre evainā anuprajanayati // vaiśvadevīṃ bahurūpāmālabheta kāmebhyaḥ kāmā vai viśve devāstāneva bhāgadheyenopadhāvati te'smai sa sarvān kāmān prayacchanti bārhaspatyamukṣāṇamālabheta bubhūṣan rasena vā eṣa vyṛdhyate yo'laṃ bhūtyai sanna bhavati cchandasāmeṣa raso brahma bṛhaspatirbrahmaṇaivāsmin bhūtiṃ rasaṃ dadhāti bhavatyeva saurīm̐ śvetāmālabheta rukkāmo'sau vā ādityo rucaḥ pradātā tameva bhāgadheyenopadhāvati so'smai rucaṃ prayacchati brāhmaṇaspatyāṃ babhrūmabhicarannālabheta brahma vai brahmaṇaspatirbrahmaṇaivainamabhiprayuṅkta etadvai brahmaṇo rūpaṃ yadbabhrū rūpeṇaivainatsam̐śyati

dhātā rātissavitedaṃ juṣantaॆ prajāpatirvaruṇo mitro agniḥ //
tvaṣṭā viṣṇuḥ prajayā saṃrarāṇā yajamānāya draviṇaṃ dadhāta //
āvartaya nivartayā vartana vartaya ni nivartana vartaya /
indra nandabala bhūmyāścatasrassūktayastābhyastvā vartayāmasi //
vi te bhinadmi takariṃ vi yoniṃ vi parīṇaham /
vi mātaraṃ ca putraṃ ca vi garbhaṃ ca jarāyu ca //
bahiṣṭe astu bāliti purudasmavad viśvarūpaminduḥ pavamāno garbhamānañja dhīraḥ // ekapādaṃ dvipādaṃ tripādaṃ catuṣpādaṃ bhuvanānuprathantām //
garbho yaste yajñiyo yoniryaste hiraṇyayaḥ / aṅgānyahrutā yasya taṃ devāssamacīklṛpan//
mahī dyauḥ pṛthivī ca na imaṃ yajña mimikṣatām / pipṛtāṃ no bharīmabhiḥ //
namo mahimna uta cakṣuṣe te marutāṃ pitaruta tadgṛṇīmaḥ /
huto yāhi pathibhirdevayānairoṣadhīṣu pratitiṣṭhā śarīraiḥ //
devānāmeṣa upanāha āsīdapāṃ patiroṣadhīnām //
somasya drapsamavṛṇīta pūṣā bṛhannadrirabhavadyat tadāsīt //
pitā vatsānāṃ patiraghnyānāmatho pitā mahatāṃ gargarāṇām /
garbho jarāyuḥ pratidhuk pīyūṣa āmikṣā mastu ghṛtamasya yoniḥ //
drapsaścaskanda pṛthivīmanu dyāmimaṃ ca yonimanu yaśca pūrvaḥ /
samānaṃ yonimanu saṃcarantaṃ drapsaṃ juhomyanu sapta hotrāḥ

yadāṣṭāpadyabhūdityanubudhyeta dhātā rātissavitedaṃ juṣantāmiti sruveṇāhavanīye juhuyāddevatābhya evainānnivedayatyāvartaya nivartayetīndrameva digbhya āvartayati prāyaścityai e vi te bhinadmi takarimiti praiva janayatyantarā śroṇī nighnanti prajananāya purudasmavaditi pātramupadadhātyaskandāyaikapādaṃ dvipādamiti prathayatyeva yadavadyedavadānānyatirecayedyannāvadyet paśorālabdhasya nāvadyedārtimārcchet purastādanyannābhyā avadyet paścādanyat purastādvai nābhyāḥ prāṇaḥ paścādapāna etāvān vai paśuryāvāneva paśustasyāvadyatyacchambaṭkāraṃ yadrasamavadāneṣu vyānayati tenaiva sarveṣāmaṅgānāmavattaṃ bhavatyaṣṭāpṛḍam̐ hiraṇyaṃ dakṣiṇāṣṭāpadī vā eṣātmā navamo'ṣṭāpṛḍametannemirnavamaḥ paśorāptyai tṛtīye'ntarakośa uṣṇīṣeṇāveṣṭitaṃ bhavati vibilāniva kośān kuryādevameva hi paśurloma carma mām̐samasthi majjā paśumevāpnoti tadviṣṇave śipiviṣṭāya juhoti yo vai paśūnāṃ bhūmā yadatiriktaṃ tadviṣṇośśipiviṣṭamatiriktaṃ vā etadatiriktam̐ śipiviṣṭamatiriktenaivātiriktamāpnotyatho atirikta evātiriktaṃ dadhāti // garbho yaste yajñiya iti yajñiyamevainaṃ karoti yoniryaste hiraṇyaya iti hiraṇyayamevainaṃ karotyaṅgānyahrutā yasya taṃ devāssamacīklṛpanniti samevainaṃ kalpayati mahī dyauḥ pṛthivī ca na iti paśuśrapaṇa upavapatyanayorvā eṣa garbho'nayorevainaṃ pratiṣṭhāpayati namo mahimna uta cakṣuṣe ta iti vyṛddhena vā eṣa paśunā carati yasyaitāni na kriyante yadetāni karoti sarvamevainam̐ savīryam̐ sayonim̐ satanūmṛddhyai saṃbharati

ā vāyo bhūṣa śucipā upā nassahasraṃ te niyutā viśvavāra /
upo te andho madyamayāmi yato deva dadhiṣe pūrvapeyam //
ākūtyai tvā kāmāya tvā samṛdhe tvā kikkiṭā te manaḥ prajāpataye svāhā kikkiṭā te cakṣussūryāya svāhā kikkiṭā te śrotraṃ dyāvāpṛthivībhyām̐ svāhā kikkiṭā te vācam̐ sarasvatyai svāhā kikkiṭā te prāṇaṃ vātāya svāhā //
vaśāsi vaśinī sakṛdyate manasā garbhamāśayat /
vaśā tvaṃ vaśinī gaccha devān satyāssantu yajamānasya kāmāḥ //
ajāsi rayiṣṭhāḥ pṛthivyām̐ sīda / ūrdhvāntarikṣamupatiṣṭhasva divi te bṛhadbhāssvāhā // tantuṃ tataṃ rajaso bhānumanvihi jyotiṣmataḥ patho rakṣa dhiyā kṛtān /
anulbaṇaṃ vayasi joguvāmapo manurbhava janayā daivyaṃ janam //
tapaso havirasi prajāpatervarṇo gātrāṇāṃ te gātrabhāgbhūyāsam̐ sūryoṃ divā diviṣadbhyo dhātā kṣatrasya vāyuḥ prajānāṃ bṛhaspatistvā prajāpataye jyotiṣmate jyotiṣmatīṃ juhotu svāhā

ima vai sahāstāṃ te vāyurvyavāt te garbhamadadhātāṃ tato'jā vaśājāyata tāmagniragrasata tāṃ prajāpatiretena puroḍāśena nirakrīṇādyadāgneyaḥ puroḍāśo bhavati niṣkrītyai yadvāyurvyavāt tasmādvāyavyā yad dyāvāpṛthivī garbhamadhātāṃ tasmād dyāvāpṛthivyeme vai sahāstāṃ te yathā veṇū saṃdhāvyete evam̐ samadhāvyetām̐ sā yā vāgāsīt sājā vaśābhavat tasmāt sārasvatī bhavatyasau vā āditya ime abhyakrandat te garbhamadadhātāṃ tato'jā vaśājāyata tasmāt saurī bhavati vāyavyāmālabheta bubhūṣan kṣiprā devatājiraṃ bhūtimupaiti dyāvāpṛthivyāmālabheta kṛṣimavasyat pratiṣṭhā vā etasmā eṣṭavyā yaḥ kṛṣimavasyati yad dyāvāpṛthivyā dyāvāpṛthivyoreva pratitiṣṭhati varṣuko'smai parjanyo bhavati tāmetāṃ kaṇvāssauśravasā vidussārasvatīmālabheta yasmādvāgapakrāmedvāgvai sarasvatī sarasvatyetasmādapakrāmati yasmādvāgapakrāmati yat sārasvatī vācamevāvarunddhe tāmetāṃ garbhāḥ prāvareyā vidussaurīmālabheta rukkāmo'sau vā ādityo rucaḥ pradātā so'smai rucaṃ prayacchati tāmetāṃ yaskā gairikṣitā vidurāgnendrīmālabheta purodhākāma āgneyo vai brāhmaṇa aindro rājanyo brahma caiva kṣatraṃ ca sayujau karoti tāmetāṃ kāpeyā viduragnīṣomīyāmālabhetānnakāmo'gnirvai devānāmannādassomo'nnamagninaivānnamatti somenāvarunddhe tāmetāmāruṇayo vidurā vāyo bhūṣa śucipā upā na iti ya eva prājanayat tasmādenāmadhyavarunddha ākūtyai tvetyākūtyai hyeṣālabhyate kāmāya tveti kāmāya hyeṣālabhyate samṛdhe tveti samṛdhe hyeṣālabhyate kikkiṭā te manaḥ prajāpataye svāheti prajāpatimevāsyā mano gamayati kikkiṭā te cakṣussūryāya svāheti sūryamevāsyāścakṣurgamayati kikkiṭā te śrotraṃ dyāvāpṛthivībhyām̐ svāheti dyāvāpṛthivī evāsyāśśrotraṃ gamayati kikkiṭā te vācam̐ sarasvatyai svāheti sarasvatīmevāsyā vācaṃ gamayati kikkiṭā te prāṇaṃ vātāya svāheti vātamevāsyāḥ prāṇaṃ gamayati // kikkiṭā ta iti juhoti tasmāt kikkiṭākāraṃ grāmyāḥ paśava upatiṣṭhante kikkiṭākārādāraṇyāḥ pratrasanti pañcaitāni juhoti pāṅktāḥ paśavo yāvāneva paśustam̐ svargaṃ lokaṃ gamayati vaśāsi vaśinītyāśiṣamevāśāste sakṛdyatte manasā garbhamāśayaditi praiva janayatyajāsi rayiṣṭhāḥ pṛthivyām̐ sīdetīmānevaināṃllokānāmayatyūrdhvāntarikṣamupatiṣṭhasva divi te bṛhadbhāssvāheti svargamevaināṃllokān gamayati tantuṃ tataṃ rajaso bhānumanvihītyāśiṣamevāśāste jyotiṣmataḥ patho rakṣa dhiyā kṛtāniti rakṣasāmapahatyā anulbaṇaṃ vayasi joguvāmapa ityanulbaṇamevaināṃ tanute manurbhava janayā daivyaṃ janamiti praiva janayati tapaso havirasi prajāpatervarṇo gātrāṇāṃ te gātrabhāgbhūyāsamityāśiṣamevāśāste // yadapsu pravapati vyṛddhissā yadagnau juhoti svagākṛtissā yanmegha ālabhate vyṛddhā tenāprajātaiva tarhi vīdhrasamṛddhā vaḥ eṣā vīdhra evaitayā yajeta trayāṇāṃ vāvaiṣāvaruddhā saṃvatsarasado gṛhamedhinassahasrayājinasta evaitayā yajeran sūryo devo diviṣadbhyo dhātā kṣatrasya vāyuḥ prajānāṃ bṛhaspatistvā prajāpataye jyotiṣmate jyotiṣmatīṃ juhotu svāheti brahma vai bṛhaspatirbrahmaṇaivaināṃ prajāpataye jyotiṣmate jyotiṣmatīṃ juhoti

agnirvai jāto na vyarocata so'kāmayata tejasvī syāmiti so'gnaye tejasvine'jaṃ kṛṣṇagrīvamālabhata tato vai sa tejasvyabhavat so'kāmayata sarvatra vibhaveyamiti so'gnaye vibhumate'jaṃ kṛṣṇagrīvamālabhata tato vai sa sarvatra vyabhavat so'kāmayata sarvatrāpibhāgassyāmiti so'gnaye bhāgine'jaṃ kṛṣṇagrīvamālabhata tato vai sa sarvatrāpibhāgo'bhavadyaḥ kāmayeta tejasvī syām̐ sarvatra vibhaveyam̐ sarvatrāpibhāgasyāmiti sa etānāgneyānajān kṛṣṇagrīvānālabheta tejasvyeva bhavati sarvatra vibhavati sarvatrāpibhāgo bhavati

deva savitaḥ prasuva yajñaṃ prasuva yajñapatiṃ bhagāya /
divyo gandharvaḥ ketapūḥ ketaṃ punātu vācaspatirvācamadya svadāti naḥ //
vājasya nu prasave mātaraṃ mahīmaditiṃ nāma vacasā karāmahe //
yasyāmidaṃ viśvaṃ bhuvanamāviveśa tasyāṃ no devassavitā dharmam̐ sāviṣat //
apsvantaramṛtamapsu bheṣajamapāmuta praśastiṣu /
aśvā bhavatha vājinaḥ //
vāyurvā tvā manurvā tvā gandharvāssaptaviṃśatiḥ /
te agre aśvamayuñjam̐ste asmiñjavamādadhuḥ //
apāṃ napādāśuhemanya ūrmiḥ pratūrtiḥ kakudmān / vājasāstena vājam̐ seṣam //
devasya savituḥ prasave satyasavasya varṣiṣṭhaṃ nākaṃ ruheyaṃ devasya vayam̐ savituḥ prasave satyasavanasya bṛhaspatervājino vājajito vājaṃ jeṣma // vājaṃ vājino jayatādhvanasskabhnuvanto yojanā mimānāḥ kāṣṭhāṃ gacchata //
śaṃ no bhavantu vājino haveṣu devatātā mitadravassvarkāḥ /
jambhayanto'hiṃ vṛkaṃ rakṣām̐si sanemyasmadyuyavannamīvāḥ //
vāje vāje'vata vājino no dhaneṣu viprā amṛtā ṛtajñāḥ /
asya madhvaḥ pibata mādayadhvaṃ tṛptā yāta pathibhirdevayānaiḥ //
te no arvanto havanaśruto havaṃ viśve śṛṇvantu vājino mitadravaḥ /
sahasrasā medhasātā saniṣyavo maho ye dhanā samitheṣu jabhrire //
eṣa sya vājī kṣipaṇiṃ turaṇyati grīvāsu baddho apikakṣa āsani /
kratuṃ dadhikrā anusam̐saniṣyadat pathāmaṅkām̐syanvāpanīphaṇat //
uta smāsya dravatasturaṇyataḥ parṇaṃ na veranuvāti pragardhinaḥ /
śyenasyeva dravato aṅkasaṃ pari dadhikrāvṇassahorjā taritrataḥ

tvamimā oṣadhīssoma viśvāstvamapo ajanayastvaṃ gāḥ /
tvamātatanthorvantarikṣaṃ tvaṃ jyotiṣā vi tamo vavartha //
yā te dhāmāni divi yā pṛthivyāṃ yā parvateṣvoṣadhīṣvapsu /
tebhirno viśvaissumanā aheḍan rājan soma prati havyā gṛbhāya //
sadā sugaḥ pitumām̐ astu panthā madhvā devā oṣadhīssaṃpipṛkta /
bhago me agne sakhye na mṛdhyā udrāyo aśyām̐ sadanaṃ purukṣoḥ //
svadasva havyā samiṣo didīhyasmadryak saṃmimīhi śravām̐si /
viśvām̐ agne pṛtsu tāñjeṣi śatrūm̐rahā viśvā sumanā dīdihī naḥ //
ā ghā ye agnimindhate stṛṇanti barhirānuṣak / yeṣāmindro yuvā sakhā //
sukarmāṇassuruco devayanto'yo na devā janimā dhamantaḥ /
śucanto agniṃ vavṛdhanta indramūrvaṃ gavyaṃ pariṣadanto agman //
iyaṃ vāmasya manmana indrāgnī pūrvyastutiḥ / abhrādvṛṣṭirivājani //
śuciṃ nu stomaṃ navajātamadyendrāgnī vṛtrahaṇā juṣethām /
ubhā hi vām̐ suhavā johavīmi tā vājam̐ sadya uśate dheṣṭhā //
viśve devā ṛtāvṛdha ṛtubhirhavanaśrutaḥ / juṣantāṃ yujyaṃ payaḥ //
ye ke ca jmā mahino ahimāyā divo jajñire apām̐ sadhasthe /
te asmabhyamiṣaye viśvamāyuḥ kṣapa usrā varivasyantu devāḥ //
mahī dyaurghṛtavatī bhuvanānāmabhiśriyorvī pṛthvī madhudughe /
supeśasā dyāvāpṛthivī varuṇasya dharmaṇā viṣkabhite ajare bhūriretasā //
śatāyudhāya śatavīryāya śatotaye'bhimātiṣāhe /
śataṃ yo naśśarado'nayadindro viśvasya duritasya pāram //
ime catvāro rajaso vimānā antarā dyāvāpṛthivī viyanti panthānaḥ /
teṣāmajyāniṃ yatamo na āvahāt tasmai no devāḥ paridatta sarve //
vasanto grīṣmo madhumanti varṣāśśaraddhemantassuvite dadhāta /
teṣāṃ vayam̐ sumatau yajñiyānāṃ jyogajītā ahatāssyāma //
saṃvatsarāya parivatsarāyedāvatsarāyānuvatsarāyodvatsarāya kṛṇutā bṛhannamaḥ /
teṣāṃ vayam̐ sumatau yajñiyānāṃ nivāta eṣāmabhaye syāma //
iyam̐ svastissaṃvatsarīyā parivatsarāyedāvatsarīyānuvatsarīyodvatsarīyā /
sā naḥ pipartvahṛṇīyamānaināhnedamaharaśīya svāhā //
ā naḥ prajāṃ janayatu prajāpatirdhātā dadhātu sumanasyamānaḥ /
saṃvatsara ṛtubhiścāklṛpāno mayi puṣṭiṃ puṣṭipatirdadhātu //
agniḥ prāśnātu prathamassa hi veda yathā haviḥ / śivā asmabhyamoṣadhīḥ karotu viśvacarṣaṇiḥ //
bhadrānnaśśreyassamanaiṣṭa devāstvayāvasena samaśīmahi tvā /
sa naḥ pito madhumām̐ āviśeha śivastokāya tanve na edhi //
etamu tyaṃ madhunā saṃyutaṃ yavam̐ sarasvatyā adhi mānā acakṛṣuḥ /
indra āsīt sīrapatiśśatakratuḥ kīnāśā āsanmarutassudānavaḥ

śaṃ no devīrabhiṣṭaya āpo bhavantu pītaye / śaṃ yorabhisravantu naḥ //
evedyūne yuvatayo namanta yadīmuśannuśatīretyaccha /
saṃjānate manasā saṃcikitre'dhvaryavo dhiṣaṇāpaśca devīḥ //
oṣadhīriti mātaraḥ //
yā oṣadhīḥ pūrvā jātā devebhyastriyugaṃ purā /
manai nu babhrūṇāmaham̐ śataṃ dhāmāni sapta ca //
gāvo bhago gāva indro me acchān gāvassomasya prathamasya bhakṣaḥ /
imā yā gāvassa janāsa indra icchāmīddhṛdā manasā cidindram //
na tā arvā reṇukakāṭo aśnute na sam̐skṛtatramupayanti tā abhi /
urugāyamabhayaṃ tasya tā anu gāvo martasya vicaranti yajvanaḥ //
rātrī vyakhyadāyatī purutrā devyakṣabhiḥ / viśvā adhi śriyā'dhita //
upa te gā ivākaraṃ vṛṇīṣva duhitardivaḥ / rātri stomaṃ na jigyuṣī //
udu tyaṃ citraṃ devānām //
anvidanumate tvaṃ manyāsai śaṃ ca naskṛdhi /
iṣaṃ tokāya no dadhaḥ pra ṇa āyūṃṣi tāriṣaḥ //
yat te nāma suhavam̐ supraṇīte'numate anumatam̐ sudānu /
tena tvam̐ sumatiṃ devyasme iṣaṃ pinva viśvavārām̐ suvīrām //
rākāmaham̐ suhavām̐ suṣṭutī huve śṛṇotu nassubhagā bodhatu tmanā /
sīvyatvapassūcyācchidyamānayā dadātu vīram̐ śatadāyamukthyam //
yāste rāke sumatayassupeśaso yābhirdadāsi dāśuṣe vasūni /
tābhirno adya sumanā upāṃgahi sahasrapoṣam̐ subhage rarāṇā //
sinīvāli pṛthuṣṭuke yā devānāmasi svasā/ juṣasva havyamāhutaṃ prajāṃ devi didiḍḍhi naḥ //
yā subāhussvaṅgurissuṣūmā bahusūvarī / tasyai viśpatnyai havissinīvālyai juhotana //
kuhūmaham̐ sukṛtaṃ vidmanāpasamasmin yajñe suhavāṃ johavīmi /
yā no dadāti śravaṇaṃ pitṝṇāṃ tasyai te devi haviṣā vidhema //
kuhūrdevānāmamṛtasya patnī havyā no asya haviṣaśśṛṇotu /
svasā devānāṃ mahayantyasmai rāyaspoṣaṃ cikituṣe dadhātu //
dhātā dadhātu no rayimīśāno jagataspatiḥ / sa naḥ pūrṇena vāvanat //
prajāpatī ramayatu prajā iha dhātā dadhātu sumanasyamānaḥ /
saṃvatsaraṃ ṛtubhiścāklṛpāno mayi puṣṭiṃ puṣṭipatirdadhātu

[ ९३८ ]
// iti śrīyajuṣi kāike caraka śākhāyāmiṭhimikāyāṃ paśubandha nāma trayodaśaṃ sthānakaṃ saṃpūrṇam