Kathaka Samhita · Chapter 13

atha trayodaśaṃ vacanam /
śādānuvacanam /
śādaṃ dadbhiravakān dantamūlaistegān dam̐ṣṭrābhyāṃ maṇḍūkāñjambhairādakāṃ khādenorjam̐ sam̐sīdenāraṇyaṃ jāmbīlena mṛdaṃ barsvaiśśarkarābhiravakāmavakābhiśśarkarāmutsādena jihvāmavakrandena tālum̐ sarasvatīṃ jihvāgreṇa

vājam̐ hanubhyāmapa āsyenādityāñchmaśrubhirupayāmamadharoṣṭhena saduttareṇāntareṇānūkāśaṃ prakāśaṃ prakāśena bāhyam̐ stanayitnuṃ nirbādhena sūryāgnī cakṣurbhyāṃ vidyutaṃ kanīnikābhyāmaśaniṃ mastiṣkeṇa balaṃ majjabhiḥ

kūrmācchaphairañcharābhiḥ kapiñjalān sāma kuṣṭhikābhirjavaṃ jaṅghābhiragadaṃ jānubhyāṃ vīryaṃ guhābhyāṃ bhayaṃ pracalābhyāṃ guhopapakṣābhyāmaśvinā am̐sābhyāmaditim̐ śīrṣṇā nirṛtiṃ nirjālmākaśīrṣṇā

yoktraṃ gṛdhrābhiryugamānatena cittaṃ manyābhissaṃghoṣān prāṇaiḥ prakāśena tvacaṃ parākāśenāntarāṃ maśakān keśarindram̐ svapasā vahena bṛhaspatim̐ śakunisādena rathamuṣṇihābhiḥ

mitrāvaruṇau śroṇibhyāmindrāgnī śikhaṇḍābhyāmindrābṛhaspatī ūrubhyāmindrāviṣṇū aṣṭhīvadbhyām̐ savitāraṃ pucchena gandharvāñchepenāpsaraso muṣkābhyāṃ pavamānaṃ pāyunā pavitraṃ potrābhyāmākramaṇam̐ sthūrābhyāṃ pratikramaṇaṃ gṛṣṭhābhyām

indrasya kroḍo'dityai pājasyaṃ diśāṃ jatravo jīmūtān hṛdayaupaśābhyāmantarikṣaṃ pulitatā nabha udaryeṇendrāṇīṃ plīhnā valmīkān klomnā girīn plāśibhissamudramudareṇa vaiśvānaraṃ bhasmanā

pūṣṇo vaniṣṭhurāndhāhessthūragudā sarpān gudābhirṛtūn pṛṣṭibhirdivaṃ pṛṣṭhena vasūnāṃ prathamā kīkasā rudrāṇāṃ dvitīyādityānāṃ tṛtīyāṅgirasāṃ caturthī sādhyānāṃ pañcamī viśveṣāṃ devānām̐ ṣaṣṭhī

ojo grīvābhirnirṛtimasthabhirindram̐ svapasā vahena rudrasya vicalasskandho'horātrayordvitīyo'rdhamāsānāṃ tṛtīyo māsaścaturtha ṛtūnāṃ pañcamassaṃvatsarasya ṣaṣṭhaḥ

ānandanandathubhyāṃ kāmaṃ pratyāsābhyāṃ bhayam̐ śitīmadbhyāṃ praśiṣaṃ praśāsābhyām̐ sūryācandramasau vṛkkābhyām̐ śyāmaśabalau matasnābhyāṃ vyuṣṭiṃ rūpeṇa nimruktimarūpeṇa

aharmām̐sena rātrī pīvasāpo yūṣeṇa ghṛtaṃ rasena śyāṃ vasayā dūṣīkābhirhradunimaśrubhiḥ pruṣvāṃ divaṃ rūpeṇa nakṣatrāṇi pratirūpeṇa pṛthivīṃ carmaṇā kavīṃ chavyopākṛtāya svāhālabdhāya svāhā hutāya svāhā

agneḥ pakṣatissarasvatyā nipakṣatissomasya tṛtīyāpāṃ caturthyoṣadhīnāṃ pañcamī rudrasya ṣaṣṭhī marutām̐ saptamī bṛhaspateraṣṭamī mitrasya navamī varuṇasya daśamīndrasyaikādaśī viśveṣāṃ devānāṃ dvādaśī dyāvāpṛthivyoḥ pārśvaṃ yamasya pāṭoraḥ

vāyoḥ pakṣatissarasvato nipakṣatiścandramasastṛtīyā nakṣatrāṇāṃ caturthī savituḥ pañcamī saṃvatsarasya ṣaṣṭhī sarpāṇām̐ saptamyaryamṇo'ṣṭamī dhāturnavamī tvaṣṭurdaśamīndrāṇyā ekādaśyadityā dvādaśī dyāvāpṛthivyoḥ pārśvaṃ yamyāḥ pāṭoraḥ

panthāmanuvṛgbhyām̐ saṃtatim̐ snāvanyābhyām̐ śukān pittena harimāṇaṃ yaknā halikṣṇān pāpavātena kūśmāñchakabhiśśavartānūvadhyena śuno viśasanena sarpāṃllohitagandhena vayām̐si pakvagandhena pipīlikāḥ praśādena

// iti śrīyajuṣi kāṭhake carakaśākhāyāmaśvamedhanāmani pañcame granthe śādānuvacanaṃ nāma trayodaśaṃ vacanaṃ saṃpūrṇam

// ityekottaraśatādhvaryuśākhāprabhedabhinne śrīyajuṣi kāṭhake carakaśākhāyāmaśvamedho nāma pañcamo granthaḥ saṃpūrṇaḥ