Kashyapa Samhita · Chapter p3

atha navamaṃ khilasthānam
viṣamajvaranirdeśīyādhyāyaḥ prathamaḥ
athāto viṣamajvaranirdeśīyaṃ nāmādhyāyaṃ vyākhyāsyāmaḥ

iti ha smāha bhagavān kaśyapaḥ

kaśyapaṃ sarvaśāstrajñaṃ sarvalokaguruṃ gurum
bhārgavaḥ paripapraccha saṃśayaṃ saṃśritavrataḥ

proktaṃ jvaracikitsāyāṃ viṣamajvarabheṣajam
na nirdiṣṭaṃ bhagavatā viṣamatvasya kāraṇam

yuktaṃ satatakādīnāṃ vaiṣamyaṃ viṣamāgateḥ
avisargī jvaraḥ kasmāt saṃtato viṣamaḥ smṛtaḥ

pretajvaro grahotthaśca viṣamaḥ kena hetunā
tadidānīṃ yathākālaṃ vaktavyo'vayavādyathā

vaktumahasi tattvena saviśeṣaṃ savistaram
iti pṛṣṭaḥ sa śiṣyeṇa praśnaṃ provāca kaśyapaḥ

alpaheturbahirmārgo vaikṛto nirupadravaḥ
ekāśrayaḥ sukhopāyo laghupākaḥ samo jvaraḥ

viṣamastadviparyastastīkṣṇatvāt saṃtato mataḥ
tadvat pretagrahotthā ye catvāro viṣamāgamāt

durjayatvādugrahaparigrahāt
vaiṣamyaṃ saṃtatādīnāṃ dāruṇatvādudāhṛtam

tathā satatakādīnāṃ caturṇāṃ kālakāritam
viṣamatvaṃ pravakṣyāmi jvarāṇāṃ jāyate yathā

samastā dvandvaśo vā'pi dhamanī rasavāhinīḥ
doṣāḥ prapannāḥ kurvanti viṣamā viṣamajvaram

jvarito mucyamāno vā muktamātraśca yo naraḥ
vyāyāmagurvasātmyānnamatimātramatho jalam

pāyasaṃ kṛśaraṃ piṣṭaṃ palalaṃ dadhi mandakam
piṇyākamāṣavikṛtīrgrāmyānūpaṃ tathā''miṣam

evaṃ vidhāni cānyāni viruddhāni gurūṇi ca
sevate ca divāsvapnamajīrṇādhyaśanāni ca

jvaro'bhivardhate tasya viṣamo vā''śu jāyate
doṣeṣvaparipakveṣu kaṣāyaṃ yaśca sevate

laulyādvā snehapānāni kṣīraṃ saṃtarpaṇāni vā
daivatānāmabhidhyānād grahasaṃsparśanādapi

sadyo vānto virikto vā snehapīto'nuvāsitaḥ
śītopacāraṃ gurvannaṃ vyavāyaṃ yaśca sevate

tasyāpi sahasā vāyurasthimajjāntaraṃ gataḥ
kupitaḥ kopayatyāśu śleṣmāṇaṃ pittameva ca

tato'sya dhātuvaiṣamyādviṣamo jāyate jvaraḥ
satato'nyedyuko vā'pi tṛtīyaḥ sacaturthakaḥ

na ca nopaśamaṃ yāti na ca bhūyo na kupyati
śamaprakopayoḥ kālaṃ na cāyamativartate

na ca svabhāvopaśamaṃ gacchatyanuśayātmakaḥ
na hi svabhāvaśāntānāṃ bhāvānāmasti saṃbhavaḥ

jvarapravegoparame dehī mukta ivekṣyate
tathā'pyasyāmavasthāyāmebhirliṅgairna mucyate

mukhavairasyakāṭukyamādhuryādibhiralpaśaḥ
nātyannalipsāglānibhyāṃ śiraso gauraveṇa ca

punaḥ punaryathā caiṣa jāyate tannibodha me
niruddhamārgo doṣeṇa viṣamajvarahetunā

vāyustaddoṣakopānte labdhamārgo yathākramam
doṣaśeṣaṃ tamādāya yathāsthānaṃ prapadyate

sa doṣaśeṣaḥ sve sthāne līnaḥ kālabalāśrayāt
rasasthānamupāgamya bhūyo janayati jvaram

upakramaviśeṣeṇa svabalasya vyayena ca
kṣayaṃ prāpnoti vṛddhiṃ ca samānaguṇasaṃśrayāt

so'yaṃ nivṛttiṃ saṃprāpya yathā dīpaḥ svabhāvataḥ
punaḥ punaḥ prajvalati kṣīṇattailendhano'pi san

svamadhiṣṭhānamāśritya śāntaḥ śāntastathā jvaraḥ
kāle balaṃ darśayati kṣīṇadoṣendhano'pi san

svahetudoṣamāśritya niyato niyamena yaḥ
ahorātre darśayati kālahetukṛtaṃ balam

dvikālaṃ sa yathādoṣaṃ jvaraḥ satatakaḥ smṛtaḥ
sthānamāmāśayastasya yaṃ samāśritya vartate

urastvanyedyukasthānamahorātrāduraścyutaḥ
doṣo rasaṃ samāsādya yadā darśayate balam

tadā'nuṣaṅgī sve kāle jāyate'nyedyuko jvaraḥ
kaṇṭhastṛtīyakasthānamahorātrāccyutastataḥ

uraḥ prapadyate'nyasmādahorātrādyathākramam
rasadhātvāśrito doṣa ūṣmaṇā saha mūrcchitaḥ

tṛtīye'hani nirvṛttiṃ janayet sa tṛtīyakaḥ
śiraścaturthakasthānaṃ caturthaṃ samudāhṛtam

ahorātrāccyutaḥ sthānāddoṣaḥ kaṇṭhe'vatiṣṭhate
tataḥ punarahorātrādurasi pratipadyate

tṛtīye cāpyahorātre rasadhātau prakupyati
caturthakaḥ sa vijñeyaścirasthāyī mahājvaraḥ

gambhīrasthānasaṃbhūto dhātusaṃkaradūṣitaḥ
darśayitvā balaṃ kāle jantoḥ śirasi līyate

tridoṣasaṃbhavatvācca bhūtasaṃsparśanādapi
duścikitsyatamo hyeṣa tasmāddhyenamupakramet

balibhiḥ śāntihomaiśca siddhairmantrapadaistathā
pāpāpaharaṇaṃ cāsya kartavyaṃ siddhimicchatā

bhūteśvaraṃ nīlakaṇṭhaṃ prapadyeta vṛṣadhvajam
cirānubandhī viṣamo yathākālaṃ vivardhate

ekāhācca dvyahāccaiva tryahāccaturahāttathā
pañcame'hani ṣaṣṭhe vā kasmādeṣa na jāyate

tasya tvāmāśayaḥ sthānamuraḥ kaṇṭhaḥ śirastathā
sthānamanyattato nāsti sthānābhāvānna jāyate

āgneyaḥ syāt satatako vāyavyo hi dvitīyakaḥ
vaiśvadevastṛtīyaḥ syādaiśānastu caturthakaḥ

kasmāt parikṣīṇabalaḥ kṣīṇadhātubalaujasaḥ
jvaro vivardhate jantormokṣakāle viśeṣataḥ

gaterabhāvādvāhyena vāyunā'bhyāhatakramaḥ
saṃkṣīṇavartyanugataḥ snehavāyvabhimūrcchitaḥ
śānto'pi tadupādānādyathā dīpo na dīpyate

tadvaddhātubale kṣīṇe jvaraḥ kṣīṇabalo'pi san
nirupādānadoṣatvānmokṣakāle viśeṣataḥ

hetuśeṣamaśeṣeṇa dahan darśayate balam
sapratīkāravaiśeṣyāt praśamaṃ yāti hanti vā

pākādvā śamanādvā'pi śodhanādvā hṛtādhike
svasthānasthe naro doṣe śuddhasrotā visṛjyate

nirdiṣṭo doṣapākāderasmāddhetutrayāt param
anyatra caiva nānyo'sti heturjvaravimokṣaṇe

kasmāddoṣaparikṣobhe prāyaśaḥ śītapūrvakam
nirvartate jvaro jantoḥ paścāddāhaḥ pravartate

vāyurvyavāyī viśadaḥ śīto rūkṣaścalaḥ kharaḥ
pittamāgneyamuṣṇaṃ ca tīkṣṇamalpaṃ laghu dravam

saumyaḥ śīto guruḥ snigdho balavān kaphako bahu
kapho mandavyavāyī ca cirotthānanivartanaḥ

vāyuśca śītasāmānyāt kaphasyānubalo balī
balavān hi guṇaḥ saumya āgneyo durbalaḥ smṛtaḥ

hetunā'nena mahatā śleṣmā hi balavattaraḥ
tasmāt pūrvaṃ jvare śītaṃ paścāddāhaḥ pravartate

svavegapariṇāmācca kriyābhiśca yadā kaphaḥ
uṣṇābhiḥ praśamaṃ yāti tadā pittaṃ prakupyati

parīṇāmakriyābhirvā śānte tasmin sukhī bhavet
heturukto mahāneṣa yathāvacchītapūrvake

atha kasmājjvaro jantorjāyate dāhapūrvakaḥ
sa eva heturatrāpi balīyastvādudāhṛtaḥ

atyudīrṇaṃ yadā pittaṃ vāyunā'lpena mūrcchitam
anubaddhaṃ rasasthāne śleṣmaṇā'lpabalena ca

dāhaḥ pūrvaṃ tadā jantoḥ śītamante pravartate
sodvepakaḥ sapralāpasmṛtibuddhipramohanaḥ

tāvetau śītadāhādī jvarau saṃsargasaṃbhavau
asādhyaḥ kṛcchrasādhyo vā dāhapūrvo jvarastayoḥ

pratyanīkaguṇāḥ santo doṣā vātādayaḥ katham
saṃbhūya kurvate rogānnānyo'nyaṃ śamayanti ca

svabhāvāddūṣaṇāddoṣā nānyonyaśamanāḥ smṛtāḥ
yasmāttasmādbahuvidhāḥ saṃsṛṣṭāḥ kurvate gadān

viruddhā guṇato'nyonyaṃ kāryaṃ sattvādayo yathā
śiraḥ saṃtapyate kasmājjvaritasya viśeṣataḥ

sati sarvāṅgatāpe ca śaityaṃ bhavati pādayoḥ
doṣairāvṛtamārgatvādūrdhvagatvācca tejasaḥ

bāhulyādindriyāṇāṃ ca śiraḥ saṃtapyate'dhikam
tejasā'tipravṛddhena somadhātuḥ prapīḍitaḥ

adhaḥ prapadyate tena śaityaṃ bhavati pādayoḥ
jvaroṣmaṇā'bhisaṃtapte prāguṣṇādikriyāvidhiḥ

kriyate netaraḥ kasmācchīta uṣṇasya bādhakaḥ
yathā'gnyagāre saṃtapte kapāṭapuṭasavṛte

bhavatyatyadhikastūṣmā sarvataḥ paritāpanaḥ
sa evodghāṭitadvāre mandībhavati tatkṣaṇāt

evamāvṛtamārgeṣu doṣaiḥ srotaḥsu dehinām
jvaroṣmā vardhate dehe yathāhetubalāśrayam

udghāṭanārthaṃ tatteṣāmuṣṇopakrama iṣyate
stambhano hi guṇaḥ śīta uṣṇo vilayanaḥ smṛtaḥ

tasmāduṣṇāmbu pānāya jvaritāya pradīyate
tenāsya doṣāḥ pacyante kāyāgniścābhidīpyate

jvaroṣmā mārdavaṃ yāti vibandhaśca praśāmyati
tṛṣṇā nivartate cāśu prakāṅkṣā copajāyate

ṛte pittajvarāduṣṇo vidhiḥ sarvo jvarāpahaḥ
tatrāpyanuṣṇaśītādirupacāro vidhīyate

iti sapta yathāpraśnaṃ nirdiṣṭā viṣamajvarāḥ
vakṣye satatakādīnāṃ cikitsāṃ śṛṇvataḥ param

upakramaiḥ parikliṣṭaṃ kṣīṇadhātubalaujasam
jvaraḥ purāṇo rūkṣatvādanubadhnāti dehinam

tasmādasya balādhāne prayateta vicakṣaṇaḥ
ramyairvicitrairāhārairhṛdyaiḥ śraddhopapāditaiḥ

surāgrapānairmāṃsānāṃ vaiṣkirāṇāṃ ca bhakṣaṇaiḥ
sarpiṣaḥ pañcagavyasya payaso laśunasya ca

upakrameccauṣadhānāṃ prayogairviṣamajvaram
daivatejyopahāraiśca dhūpanābhyañjanāñjanaiḥ

vātottaraṃ snehapānairabhyaṅgaiḥ sāvagāhanaiḥ
snigdhoṣṇairannapānaiśca balibhiścāpyupakramaiḥ

pittottaraṃ tiktaśītaiḥ śamanaiḥ savirecanaiḥ
payasā sarpiṣā caiva śītaiścābhyañjanairjayet

vamanaiḥ pācanīyaiśca laṅghanairlaghubhojanaiḥ
rūkṣoṣṇaiścāpyupacaret kaṣāyaiśca kaphottaram

romaharṣo'ṅgamardaśca vātapittottare jvare
mahākalyāṇakaṃ sarpiḥ pañcagavyamatho pibet

pītvā vā mahatīṃ mātrāṃ sarpiṣaḥ punarullikhet
tadaharvā paredyurvā peyāṃ samaricāṃ pibet

rājamūlasya vā kvāthaṃ pibet prajvarakaṃ haviḥ
kritoyaṃ --- mayogaścaturthakamapohati

dhāroṣṇaṃ vā payaḥ pītvā tadvamedicchayā na vā
śītaṃ vā madhunā'śītaṃ nimbapatrodakaṃ pibet

sarpirvā māhiṣaṃ pītvā hiṅgustokasamanvitam
tasmin vidagdha evānnaṃ dadhnā bhuñjīta kevalam

nīlaspandaśiphā vā'pi supiṣṭā taṇḍulāmbunā
deyā jvaratithau nasye mṛgarājasya vā vasā

harītakī vacā kuṣṭhaṃ nimbapatraṃ palaṅkaṣā
siddhārthakā yavāḥ sarpirdhūpo jīrṇajvarāpahaḥ

mūlāni sahadevāyāḥ kaṭukā rohiṇī vacā
taṇḍulodakapiṣṭo'yaṃ deho dāhajvarāpahaḥ

surayā sarvagandhaiśca tailamabhyañjanaṃ pacet
sarṣapā lasunaṃ hiṅgu trivyoṣaṃ rocanā vacā

ṛkṣapittaṃ bastamūtraṃ karañjasya phalāni ca
grahajvarābhibhūtānāṃ nasyakarmāñjanaṃ hitam

sannipātavibandhe ca vyāladaṣṭe ca śasyate
arśaḥsu yoniśūle ca pralepo'yamanuttamaḥ

bhīṣaṇairharṣaṇaiścaiva vicitrādbhūtadarśanaiḥ
vyākṣepaṃ manasaścāsya bhiṣakkuryājjvarāgame

pānaṃ caitatpradātavyaṃ snigdhasvinnasya dehinaḥ
tribhaṇṭīmajagandhāṃ ca nīlinīṃ kaṭurohiṇīm

kalkaṃ vā kaṭurohiṇyāḥ pibedgomūtrasaṃplutam
cikitsāyāṃ ca yat proktaṃ tacca kuryādvidhānavit

iti ha smāha bhagavān kaśyapaḥ
iti khileṣu viṣamajvaranirdeśīyo nāma prathamo'dhyāyaḥ
viśeṣanirdeśīyo nāma dvitīyo'dhyāyaḥ
athāto viśeṣanirdeśīyaṃ nāmādhyāyaṃ vyākhyāsyāmaḥ

iti ha smāha bhagavān kaśyapaḥ

maharṣiṃ kaśyapaṃ vṛddhaṃ vedavedāṅgapāragam
sukhopaviṣṭamavyagramapṛcchad vṛddhaśīvakaḥ

viṣamāṇāṃ jvarāṇāṃ te savikalpaṃ savistaram
yadyathāvacca yāvacca proktaṃ vaktavyamāditaḥ

sāmānyenāpi sarveṣāṃ jvarāṇāṃ vigatajvara
vaktumarhasi kārtsnyena pariśeṣamataḥ param

iti saṃcoditaḥ prāha prajāpatiridaṃ vacaḥ
samāsābhihitaṃ yacca nābhihitaṃ hitam

jvaritānāṃ jvarāṇāṃ ca bhūyo vakṣyāmi tacchṛṇu
avasthālakṣaṇoddeśaviśeṣopakrame kramāt

bhaiṣajyamanavasthāyāṃ pathyamapyavacāritam
guṇaṃ na kiñcit kurute doṣāyaiva tu kalpate

prayuktaṃ tadavasthāyāmamṛtatvāya kalpate
vātādbāhyādabhīghātāt krodhācchokādbhayāt kṣayāt

śramād grahābhiṣaṅgācca vegānāṃ ca vidhāraṇāt
samutpanne jvare jantorvamanaṃ na prayojayet

prayuktaṃ kurute kṣipraṃ tīvraṃ sopadravaṃ jvaram
pūraṇāttu samutpanne jvare hyamātrayā śrayet

doṣe vṛddhe'timātrā ca samutkliṣṭe tathaiva ca
sannipātajvarabhayāttvaritaṃ vāmayedbhiṣak

vāmitaṃ laṅghanādyena krameṇopakramettataḥ
vamanānantaraṃ cāsya kuryācchīrṣavirecanam

tathā''śu śirasaḥ śūlaṃ gauravaṃ copaśāmyati
vibandhaścakṣurādīnāmaruciśca nivartate

jīrṇajvare'pyathaiteṣu vikāreṣu pradāpayet
bahudoṣe balavatī madhyadoṣeṣu madhyamā

alpadoṣe jvare mṛdvī kriyaḥ kāryā vijānatā
svāni rūpāṇi kārtsnyena yadā vyādhau viśeṣataḥ

tīvrāṇi vyathitatvaṃ ca śarīrasyopalakṣayet
bahudoṣaṃ tadā vidyādalpadoṣamato'nyathā

tathā madhyabaleṣveṣu madhyadoṣaṃ vibhāvayet
vibandhārucitṛṇmūrcchā gātrabhedaḥ śirorujā

pralāpālasyahṛllāsatandrīdāhaśramabhramāḥ
mūtrapracuratā glāniḥ purīṣasyāvipakvatā

utkleśo gurukoṣṭhatvaṃ liṅgānyāmajvare vadet
nivṛttau prāyaśaścaiṣāṃ saṃjāte jvaramārdave

laghutvaṃ cāṣṭarātre ca nirāmajvaramādiśet
āpātalakṣyaḥ syādūṣmā tatkṣaṇādeti mārdavam

antarlaghutvamutsāho doṣapaktiḥ prasannatā
tṛṣṇādīnāṃ mṛdutvaṃ ca bahirmārgagate jvare

tatrābhyaṅgān pradehāṃśca pariṣekāṃśca kārayet
avipakvā vipakvā vā doṣā yasya na nirhṛtāḥ

na ca vyādherupaśamo na cotsāho na lāghavam
glānikārśye na cātyarthaṃ na ca cchando'śanaṃ prati

aprakṛṣṭe vā sa kāle doṣadurbalaḥ
ato viparyayāddehī bhavedauṣadhadurbalaḥ

pācanairavipakvānāṃ doṣāṇāṃ doṣadurbale
samyakkuryādupaśamaṃ pakvānāṃ ca virecanaiḥ

itarasyāmayāvekṣaṃ balāpyāyanamiṣyate
samudīrṇeṣu sahasā doṣeṣvabhinaveṣu ca

balavad durbale vā'pi kaṣāyaṃ vā'pi bheṣajam
saṃrakṣan dharmayaśasī na prayuñjyāt kadācana

yathā śaratsu mahatoḥ kruddhayorabhiṣaktayoḥ
na dhatte durbalā vegaṃ hastinoragravāraṇī

tathā balaṃ balavatostaddoṣaudhayordvayoḥ
saṃkṣubdhayorna sahate saṃtaptā dehinastataḥ

puṣṇāti durbalaṃ doṣāḥ kaṣāyaḥ stambhayatyataḥ
bhūyo'bhivṛddhāste prāṇānnighnantyāśu śarīriṇaḥ

kaṣāyeṇākulībhūtāściraṃ saṃkleśayanti vā
bhagnavegeṣu doṣeṣu vidhinā laṅghanādinā

kāle prayuktaṃ bhaiṣajyaṃ syādvikāropaśāntaye
laṅghanaṃ svedanaṃ peyā trividhā dīpanānvitā
odanastrividho yūṣaḥ kaṣāyastrividho rasaḥ

sarpirabhyañjanaṃ bastiḥ pradehaḥ sāvagāhanaḥ
jvarāpahaḥ samuddiṣṭo laṅghanādirayaṃ kramaḥ

pacyante saptarātreṇa doṣāḥ saptasu dhātuṣu
tasmāt kaṣāyaṃ saptāhe pācanīyaṃ vidhāpayet

śamanaṃ sraṃsanīyaṃ vā yathāvasthamataḥ param
mandoṣmatvāt sthiratvācca gurutvācca kaphajvaraḥ

paripākaṃ cirādeti tasmādasyauṣadhakramaḥ
aṣṭāhāt parato vā'pi yathāpākaṃ vidhīyate

pakvāvaśeṣastenāśu pacyate'gniśca dīpyate
doṣapaktyā'gnidīptyā ca jvarasyāpacayo dhruvam

tadyuktasnehasaṃskārān rasānatrāvacārayet
tataḥ saṃśamanaṃ kuryādvyādhiśeṣopaśāntaye

prasādanārthaṃ dhātūnāṃ balasyāpyāyanāya ca
deśadoṣāgnisātmyartuyuktaṃ cātra praśoṣaṇam

tryahaṃ caturahaṃ vā'pi nātimātramataḥ param
rūkṣatvājjvaryamāṇāya deyaṃ sarpirjvarāpaham

jvarito'nena nirvāti pradīptaṃ cāmbunā gṛham
sarpiḥ pittaṃ śamayati śaityāt snehācca mārutam

samānaguṇamapyetat saṃskārājjīyate kapham
atha cedbahudoṣatvāt kṛte'pi śamane sati

pakvāśayagurutvaṃ ca stimitatvaṃ ca lakṣyate
svedo viṇmūtrarāgaśca bhaktasyānabhinandanam

snigdhāya kṣāmadehāya dadyāttatra virecanam
śūle pakvāśayagate pārśvapṛṣṭhakaṭigrahe

vātaviṇmūtrasaṅge ca nirūhaḥ sānuvāsanaḥ
bahirmārgagate cāpi jvare'bhyaṅgādiriṣyate

narasya vātaprakṛteryadi syādvātiko jvaraḥ
ṛtau ca vātaprakṛtau sa duḥsādhyastrisaṃkaraḥ

tathaiva pittaprakṛteḥ ślaiṣmikasya ca dehinaḥ
viparītaprakṛtayaḥ sukhasādhyā jvarādayaḥ

ekadvitriprakṛtayo vyādhayaḥ sarva eva hi
sukhaduḥkhāścikitsyāḥ syuḥ prāyaśaste yathākramam

samutkliṣṭeṣu doṣeṣu trividhaṃ karma niścitam
śodhanaṃ śamanaṃ caiva tathā śamanaśodhanam

tatra puṃsāṃ balavatāṃ vahnimatāṃ satām
tīvravegāmayānāṃ ca hitaṃ śodhanamauṣadham

balināmalpadoṣāṇāṃ nātivṛddhavikāriṇām
nātikleśasahānāṃ ca śamanaṃ hitamucyate

tathaiva madhyadoṣāṇāṃ durbalānāṃ śarīriṇām
balavadvyādhijuṣṭānāṃ hitaṃ śamanaśodhanam

ūrdhva harati yaddoṣānadhaścobhayataśca yat
dravyaṃ vividhavīryatvāttaddhi saṃśodhanaṃ smṛtam

nādho na cordhvaṃ harati yaddoṣāñchamayatyapi
na cograguṇavīryaṃ tad dravyaṃ saṃśamanaṃ viduḥ

nātyarthaṃ śodhayati yaddoṣān saṃśamayatyapi
tatra madhyabalopetaṃ dravyaṃ śamanaśodhanam

daśamūlaśaṭīrāsnāvayasthāpañcakolakam
śārṅgeṣṭā rohiṇī pāṭhā saralo devadāru ca
mustā'mṛtā vṛścikālī karkaṭākhyā durālabhā

trāyantītyevamādīni śamanīyāni nirdiśet
vacākośātakīnimbapippalyaḥ kauṭajaṃ phalam

kṣāradvayaṃ sagomūtraṃ madanaṃ lavaṇāni ca
triphalā''ragvadho dantī nīlinī saptalā trivṛt

evamādi tu yaccānyad dravyaṃ śodhanamucyate
kāśmaryāmalakaṃ drākṣā śītapākī parūṣakam

madhukaṃ pippalīmūlaṃ viḍaṅgaṃ hiṅgu saindhavam
pāṭhā'jagandhā'tiviṣā pathyā mustā kaṭutrikam

rohiṇītyevamādi syād dravyaṃ śamanaśodhanam
trividhaṃ karma nirdiṣṭamityetaddoṣaśāntaye

doṣaśāntau ca dhātūnāṃ prasāda upajāyate
malāyanānāṃ sarveṣāmavyāghātakriyāsu ca

doṣadhātu malaistasmāt sve sve karmaṇyavasthitaiḥ
svāsthyamutpadyate nṝṇāmasvāsthyaṃ tadviparyaye

samyagāhāraceṣṭābhyāṃ yadā sātmyaṃ yatheritam
samānāṃ rakṣaṇaṃ kuryāddoṣādīnāṃ vicakṣaṇaḥ

kupitānāṃ praśamanaṃ kṣīṇānāmabhivardhanam
kṣapaṇaṃ caiva vṛddhānāmetāvaddhi cikitsitam

tadekatvamanekatvamavasthāmudayavyayam
doṣāṇāmāturāṇāṃ ca saṃpradhārya balābalam

yathāvadauṣadhānāṃ ca bhinnānāṃ nāmarūpataḥ
rasān guṇāṃśca vīryaṃ ca vipākaṃ ca yathātatham

deśaṃ kālamupāyaṃ ca pramāṇaṃ vyādhimeva ca
jñātvā cikitsā bhiṣajā praṇetavyā'pramādataḥ

ye yathā ca samuddiṣṭā yogāḥ sve sve cikitsite
te tathaiva prayoktavyā na teṣvasti vicāraṇā

ko hi nāma praṇītānāṃ dravyāṇāṃ tattvadarśibhiḥ
nānāvidhānāmekatve tatkarma jñātumarhati

kiñcidanyarasaṃ dravyaṃ guṇataḥ kiñcidanyathā
vīryataścānyathā kiñcidvidyādatra vipākataḥ

atha caikatvamāgamya prayoge na virudhyate
utpadyate yathārthaṃ ca samavāyaguṇāntaram

pṛthakpṛthakprasiddhe'pi gandhe gandhāntaraṃ yathā
gandhāṅgānāṃ manohlādi pratyakṣaṃ sāmavāyikam

tasmādārṣaprayogeṣu prakṣepāpacayaṃ prati
na pramādyedavijñāya doṣauṣadhabalābalam

vayaḥ śarīrāgnibalaṃ tvavekṣya matimān bhiṣak
mātrāṃ vikalpayedatra pradhānāvaramadhyataḥ

iti jvarāṇāmuddiṣṭo viśeṣo'yamupakrame
yaṃ viditvā tu kāryeṣu vividheṣu na saṃbhramet

iti ha smāha bhagavān kaśyapaḥ

iti khileṣu viśeṣanirdeśīyo nāma dvitīyo'dhyāyaḥ
bhaiṣajyopakramaṇīyastṛtīyādhyāyaḥ
athāto bhaiṣajyopakramaṇīyamadhyāyaṃ vyākhyāsyāmaḥ

iti ha smāha bhagavān kaśyapaḥ

brāhmayā śriyā prajvalantaṃ brahmarṣimamitadyutim
kaśyapaṃ lokakartāraṃ bhārgavaḥ paripṛcchati

ābādhakāraṇaṃ vyādhirbheṣajaṃ sukhakāraṇam
samyagyuktaṃ tadamṛtaṃ syāttadanyadviṣavadbhavet

bheṣajopakramaṃ tasmādbhagavan vaktumarhasi
auṣadhaṃ kimadhiṣṭhānaṃ kathaṃ cāsyopadiśyate
auṣadhajñauṣadhatvaṃ ca bheṣajatvamathāpi ca

bhaiṣajyatvāgadatvaṃ ca kaṣāyatvaṃ tathaiva ca
yathā ca gauṇyena rasā dravye dravye vyavasthitāḥ

prādhānyena yathā dṛṣṭo madhuke madhuro rasaḥ
amlaḥ kapitthe lavaṇaḥ saindhave nāgare kaṭuḥ

tiktastiktakarohiṇyāṃ kaṣāyaścābhayāṃ prati
satyevaṃ rasanānātve saṃyogaḥ sarva eva hi

kaṣāyatvena nirdiṣṭaḥ kutaḥ kiṃ cātra kāraṇam
kati ke cauṣadhaguṇā bhedāścāsya kati smṛtāḥ

kati cauṣadhakālāśca kāle kāle ca ko vidhiḥ
kasthāṃ kasyāmavasthāyāṃ pātavyaṃ bheṣajaṃ na vā

kathaṃ ca peyaṃ pītasya parihāryaṃ ca kiṃ bhavet
jīryamāṇasya kiṃ rūpaṃ kiṃ ca jīrṇasya lakṣaṇam

vibhajya vayasastritvaṃ kathaṃ mātrā vidhīyate
adhobhāgordhvabhāgānāṃ doṣasaṃśamanī ca yā

jīvanīyā ca yā mātrā dīpanīyā ca yā smṛtā
mātrā saṃśodhanī yā ca snehamātrā ca yā bhavet

sarvametadyathātattvaṃ kīrtayasva mahāmune
jātamātramupādāya yāvadvarṣaśataṃ param

iti śuśrūṣamāṇāya śiṣyāya vadatāṃvaraḥ
ācacakṣe yathānyāyaṃ bhaiṣajyopakramaṃ prati

ayaṃ heturidaṃ liṅgamasya cāyamupakramaḥ
iti tāvat paraṃ sūkṣmaṃ vyādhijñānaṃ pracakṣate

asmādapyauṣadhajñānamāhuḥ sūkṣmataraṃ budhāḥ
tadahaṃ te'bhidhāsyāmi kārtsnyenaiva nibodha me

pathyasevinamārogyaṃ guṇena bhajate naram
apathyasevinaṃ kṣipraṃ rogaḥ samabhimardati

sa rogo dvividhaścoktaḥ śārīro mānasastathā
ādhayo mānasāstatra śārīrā vyādhayaḥ smṛtāḥ

sādhyo'sādhyaśca yāpyaśca trividhaṃ rogalakṣaṇam
vātapittakaphā doṣāḥ śārīravyādhihetavaḥ

sattvetaraṃ ca dvandvaṃ ca mānasāmayahetavaḥ
dhṛtivīryasmṛtijñānavijñānairmānasaṃ jayet

śārīraṃ bheṣajaiḥ kālayuktidaivavyapāśrayaiḥ
sa punardvividho vyādhirāganturnija eva ca

āganturbādhate pūrvaṃ paścāddoṣān prapadyate
nijastu cīyate pūrvaṃ paścādvṛddhaḥ prabādhate

tasmādāganturogāṇāṃ paśyanti nijavat kriyāḥ
nijānāṃ pūrvarūpāṇi dṛṣṭvā saṃśodhanaṃ hitam

saṃśodhanaṃ saptavidhaṃ tadāyattaṃ cikitsitam
taccāyattaṃ catuṣpāde pādaścauṣadhamucyate

oṣadhaṃ yuktyadhiṣṭhānaṃ daivādhiṣṭhānameva ca
yuktirvamanakarmādi daivaṃ yāgādi kīrtyate

oso nāma rasaḥ so'syāṃ dhīyate yattadoṣadhiḥ
osādārogyamādhatte tasmādoṣadhiroṣadhaḥ

bhiṣagvijñānaneyatvādbheṣajaṃ bhiṣajo viduḥ
bhiṣagjite hitatvācca bhaiṣajyaṃ paricakṣate

agadatvaṃ ca yuktasya gadānāmapunarbhavāt
kaṇṭhasya kaṣāṇāt prāyo rogāṇāṃ vā'pi karṣaṇāt

kaṣāyaśabdaḥ prādhānyāt sarvayogeṣu kalpyate
śabdarūparasasparśagandhavaddeśajaṃ navam

ajagdhamavidagdhaṃ ca dravyaṃ guṇavaducyate
mātrāvallaghupākaṃ ca hṛdyaṃ doṣapravāhaṇam

alpapeyaṃ mahāvīryaṃ prīṇanaṃ balarakṣaṇam
vyāpattāvalpadoṣaṃ ca mandaglāpanameva ca

saṃskāraguṇasaṃpannaṃ rājārhaṃ bheṣajaṃ matam
taddhi siddhamasiddhaṃ ca śītamuṣṇaṃ dravaṃ ghanam

koṣṇaṃ sasnehamasnehamiti bhinnamanekadhā
tadāmayavayobhedāt saptadhaiva vibhajyate

cūrṇaṃ śītakaṣāyaśca svaraso'bhiṣavastathā
phāṇṭaḥ kalkastathā kvātho yathāvattaṃ nibodha me

sūkṣmacūrṇīkṛtaṃ cūrṇaṃ nānākarmasu yujyate
grahaṇyāmavikāreṣu braṇavatyañjanādiṣu

śītaḥ śītakaṣāyaḥ syādantarikṣāmbusaṃplutaḥ
sa pittajvaradāhāsṛgviṣamūrcchāmadāpahaḥ

tadvadeva niśāvyuṣṭo'bhiṣavaḥ sādhu sādhitaḥ
praśāntāgnibalakṣobhaḥ saumyaḥ svarasasaṅgataḥ

drākṣekṣvāmalakādīnāṃ pīḍanāt svarasaḥ smṛtaḥ
sa saṃśamanasaṃyoge nānārogeṣu kalpate

kvathitastvāntarikṣeṇa vāriṇā'rdhāvaśeṣitaḥ
sakṛdvā phāṇitaḥ phenaṃ kaṣāyaḥ phāṇṭa ucyate

so'lpadoṣabale bāle laghuvyādhau ca śasyate
kalkaḥ kalkīkṛto yojyaḥ pānalepāvalehane

kevaladravyapeyatvādvikārṣī durjaraśca saḥ
pādasthito bhavet kvātho yukto'bahvagnitejasā

sa vayobalasaṃpanne guruvyādhau ca śasyate
saptadhaivaṃ vibhajyaitaddaśadhā pravicārayet
pūrvaṃ bhaktasya madhye'dhaḥ samudgaṃ samuhurmuhuḥ

sabhaktaṃ bhaktayormadhye grāsagrāsāntare paraḥ
pūrvaṃ bhaktasya bhaiṣajyaṃ na karoti balakṣayam

āmāśayagatān doṣānnihantyāśu ca pacyate
annasaṃstambhite dehe cchardyudgāravyathādayaḥ

na bhavanti yatastasmāttaddeyaṃ durbalīyase
madhyebhaktaṃ hyubhayato ruddhamannena bheṣajam

tadantarāśaye doṣān sukhenaiva niyacchati
śamayatyāśvadho bhaktamuraḥkaṇṭhaśirogadān

vyatyāsena ca sāmudgaṃ doṣe tūrdhvamadhogate
muhurmuhuḥ śvāsakāsahikkātṛṭchardiśāntaye

hitaṃ balāgnirakṣārthaṃ sabhaktaṃ durbalātmanām
strībālavṛddhalalitakṣatakṣīṇauṣadhadviṣām

vyādhau mande'nale tīkṣṇe bhaktayormadhya iṣyate
kṣīṇakṣīṇālpaśukrāṇāṃ vājīkaraṇamauṣadham

grāse vidheyaṃ cūrṇaṃ ca yadagnibalavardhanam
grāsāntare cchardanīyaṃ dhūmapānaṃ ca śasyate

abhaktamauṣadhaṃ pītaṃ vyādhimāśu balīyasām
hanyāttadeveha balaṃ balavaddurbalīyasām

etānauṣadhakālāṃstu vibhajeddaśadhā daśa
kṣīṇadhātvindriye śānte klānte tānte bubhukṣite

bhaiṣajyadagdhakoṣṭhe ca bheṣajaṃ nāvacārayet
kruddhe viṣaṇṇe śokārte rātrau jāgarite tathā

vidagdhājīrṇabhakte ca bheṣajaṃ nāvacārayet
karmātibhārābhihate nirūḍhe sānuvāsite

upoṣite virikte ca bheṣajaṃ nāvacārayet
yatkiñcidapyupāttānne mūrcchite gharmatāpite

sadyaḥ pītodake caiva bheṣajaṃ nāvacārayet
avasthāviparītaṃ ca bheṣajaṃ nāvacārayet

ūnadvādaśavarṣāṇāṃ naikāntenāvacārayet
avacāritamekāntenāhanyahani cauṣadham

asamatvāgataprāṇadoṣadhātubalaujasām
atyantasukumārāṇāṃ kumārāṇāṃ balāyuṣī

kṣīṇātivṛddhakruddhānāṃ kṣīṇadhātvindriyaujasām
ekāntenauṣadhaṃ pītaṃ sūryastoyamivālpakam

vyādhidoṣabalāgnibhyo hīnaṃ tebhyo'dhikaṃ ca yat
ajijñāsitapūrvaṃ ca guṇaiścoktairvivarjitam

arogasātmyaṃ duryuktamaniṣṭaṃ manasaśca yat
yasya pītasya pākānte doṣaḥ sūkṣmo'pi lakṣyate

vyādheśca praśamo na syāttacca varjyaṃ vijānatā
yannāturabalaṃ hanti vyādhivīryaṃ nihanti ca

tadevāsyāvacāryaṃ syādāvyādhyucchedadarśanāt
kāmaṃ vyādhau praśānte'pi śamadānācchamauṣadham

tadevālpaṃ vidhātavyaṃ sakṛd dvistriryathābalam
puṇye'hani namasyādau devadvijabhiṣaggurūn

pūrvāhṇe prāṅmukhāyāsmai sukhāsīnāya sādhave
bubhūṣamāṇāya bhiṣaṅmantravadbheṣajaṃ śuciḥ

idaṃ hanta piba ceti saṃprayacchedudaṅmukhaḥ
aticaṅkramaṇatthānaśayanāsanabhāṣaṇam

krodhaśokadivāsvapnaviruddhānnahimātapān
pītauṣadho na seveta tathā strīvegadhāraṇam

vijṛmbhāḥ śabdavidveṣo mukhaśoṣo'ratiḥ klamaḥ
tandrīrudveṣṭanaṃ sādo liṅgaṃ jīryati bheṣaje

sṛṣṭirviṇmūtravātānāṃ śarīrasya ca lāghavam
udgāraśuddhirvaiśadyaṃ vaimalyaṃ hṛdayasya ca

prakāṅkṣā kukṣiśaithilyamannakālasya lakṣaṇam
vayastridhā vibhajyādau mātrā vakṣyāmyataḥ param

garbhabālakumārākhyamityetattrividhaṃ vayaḥ
yauvanaṃ madhyamaṃ vṛddhametacca trividhaṃ punaḥ

varṣāvaraḥ kṣīrapaḥ syādyāvat pibati vā payaḥ
vayastadbālamasmācca yāvat ṣoḍaśavārṣikaḥ

annādaḥ sarva eva syāt kaumāre vayasi sthitaḥ
ataḥ paraṃ dhātusattvabalavīryaparākramaiḥ

vardhamānaiścatustriṃśadyuvā varṣāṇyudarkataḥ
dhātvādibhiḥ sthirībhūtairyāvadāsaptatirnaraḥ

madhyo dhātvādibhiḥ paścāt kṣīyamāṇairyathākramam
vṛddho bhavati mandātmā pravṛttiryāvadāyuṣaḥ

vikalpanā'nyā vṛddhasya tasya ṣoḍaśavārṣikī
bhavedbheṣajamātrā tu kṣīyamāṇottarottarā

śatike śatādhike vā'pi kṣīrānnādavadiṣyate
jātamātrasya mātrā syāt sarpiṣkolāsthisaṃmitā

pañcarātraṃ bhavedyāvaddaśāhamadhikaṃ tataḥ
kolārdhasaṃmitaṃ yāvadviṃśadrātramataḥ param

kolamātraṃ bhavedyāvanmāsaṃ māsadvaye'dhikam
dvikolasaṃmitaṃ sarpistṛtīye māsi śasyate

śuṣkāmalakamātraṃ tu caturthe māsyudāhṛtam
pañcame māsi ṣaṣṭhe ca hyārdrāmalakasaṃmitam

tadevābhyadhikaṃ kiñcidvihitaṃ saptamāṣṭame
kṣīrānnādasya bālasya prāyeṇāhārasaṃkarāt

bhavatyaniyato vahniḥ paktau bahvanilātmanaḥ
tasyā'gnyāvekṣikī tasmāt snehamātrā vidhīyate

anādasya tu bhūyiṣṭhaṃ samo bhavati pāvakaḥ
tasyāmalakamātrasya sarpiṣaḥ pānamiṣyate

tadevāgnibalaṃ vīkṣya vardhamānasya vardhayet
kṣīrapasya kumārasya kṣīrānnadasya cobhayoḥ

deyaṃ snehacaturbhāgaṃ bheṣajasya yathāmayam
ghṛtena pāyayedbālaṃ yāvat syādaṣṭamāsikaḥ

māsādato'ṣṭamājjantorjalapiṣṭaṃ pradāpayet
ataḥ paraṃ yathāśāstraṃ kumārasyānnasevinaḥ

vakṣyāmi vividhāṃ mātrāṃ bheṣajānāṃ vibhāgaśaḥ
mucūṭiṃ vā prakuñcaṃ vā prasṛtaṃ vā'thavāñjalim

āturasya pramāṇena sametavyaṃ cikitsite
agraparvāṅguligrāhyā cūrṇamātrā tu pāṇinā

cūrṇānāṃ dīpanīyānāmeṣā mātrā vidhīyate
dviguṇā jīvanīyānāṃ tathā saṃśamanasya ca

ūrdhvabhāge tvardhamātrā tathaiva ca virecane
vātapittakaphaghnānāṃ kaṣāye tu pradāpayet

dvau dāpayeta prasṛtau śarkarāmadhusaṃyutau
prasṛtaṃ chardanīyasya niṣkvāthasya pradāpayet

tathā vairecanīyasya prasṛtaṃ nātra saṃśayaḥ
dviguṇāṃ jīvanīyasya tathā saṃśamanasya ca
dīpanīyasya kalkaṃ tu akṣamātraṃ pradāpayet

dviguṇaṃ jīvanīyasya tathā saṃśamanasya ca
akṣārdhaṃ chardanīyasya tathā vairecikasya ca

snehamātrāmato vakṣye vamane savirecane
vamane vamanīyābhiroṣadhībhiḥ susaṃskṛte

mātrāvattu ghṛtaṃ dadyādvamane kaphasaṃbhave
ardhamātrā bhaveddeyā vireke sarpiṣastathā

vairecanairvipakvasya pitte prakupite sati
mātrā'dhaścordhvabhāgā ca ślaiṣmikasya praśasyate

dīpanaiḥ śamanīyaiśca jīvanīyaiśca sādhitam
tathā'pi kupite vāte doṣe pakvāśaye sthite

kukṣigranthiṣu pārśve ca sakte deyaṃ virecanam
śamanairdīpanīyaiśca pācanīyaiśca sādhitam

caturbhāgaguṇaṃ dadyānmātrāyāḥ kumbhasarpiṣaḥ
pādārdhahīnaṃ pādonamardhaṃ vā'pi yathākramam

sarpirvidadyādbāleṣu saṃpradhārya vayobale
niṣkvāthānāṃ sakalkānāṃ cūrṇānāṃ sarpiṣastathā

ityuktā vividhā mātrā mātrāmūlaṃ cikitsitam
tasmādagnimṛtuṃ sātmyaṃ dehaṃ koṣṭhaṃ vayo balam

prakṛtiṃ bheṣajaṃ caiva doṣāṇāmudayaṃ vyayam
vijñāyaitadyathoddiṣṭāṃ mātrāṃ samyak prayojayet

apramattaḥ sadā ca syādbheṣajānāṃ prayojane
oṣadhīrnāmarūpābhyāṃ jānanti vanagocarāḥ

ajapālāśca gopāśca na tu karmaguṇaṃ viduḥ
yogaṃ tu tāsāṃ yogajñā bhiṣajaḥ śāstrakovidāḥ

mātrābalavidhānajñā jānate guṇakarma ca
karmajño vā'pyarūpajñastāsāṃ tattvaviducyate

kiṃ punaryo vijānīyādoṣadhīḥ sarvathā bhiṣak
yathā viṣaṃ yathā śastraṃ yathā'gniraśaniryathā

tathauṣadhamavijñātaṃ vijñātamamṛtopamam
auṣadhaṃ cāpi duryuktaṃ tīkṣṇaṃ saṃpadyate viṣam

viṣaṃ ca vidhinā yuktaṃ bhaiṣajyāyopakalpate
agniryathā prajvalitaḥ kruddhaścāśīviṣo yathā

asidhārā yathā tīkṣṇā prabhinno vā'pi kuñjaraḥ
tathauṣadhamasaṃyuktamavaidyenāvacāritam

viparyayeṇa mātrāyā niruṇaddhyasya jīvitam
dṛṣṭvā spṛṣṭvā tathā pṛṣṭvā kāryākāryakriyāṃ tataḥ

auṣadhāni prasiddhāni yāni syurbahuśo bhiṣak
rasato vīryataścaiva tāni tatrāvacārayet

ato'nyathā hyamātrajño yuktyāgamabahiṣkṛtaḥ
kṛśaṃ rogaparidhvastaṃ sukumāraṃ samātvikam

tīkṣṇauṣadhaprayogeṇa hanti cāpyatimātrayā
mahārogaṃ mahāhāraṃ mahāsattvaṃ mahābalam

mṛdvalpauṣadhayogena kleśayatyāturaṃ bhiṣak
upakramyo balī tasmād durbalo nirupakramaḥ

madhyaṃ yuktairupakramya na cāhārānnivartayet
kṛśaṃ viśrāmya viśrāmya pathyairauṣadhasādhanaiḥ

dhārayedvardhayedagnimagnau vṛddhe hi jīvati
yathā'nilaḥ pittakaphāsṛjaśca
nityāḥ śarīre nihitā narāṇām /
tathaiva bāleṣvapi sarvameta
ddvayostu rūpaṃ tu tadalpamalpam

yathā'lpadehasya tadalpamalpaṃ
tathā'nnapānauṣadhamalpamalpam /
buddhyā vimṛśyeha bhiṣagvidaddhyāt
mātrā hi dehāgnivayaḥ pradhānāḥ

iti ha smāha bhagavān kaśyapaḥ
iti khileṣu bhaiṣajyopakramaṇīyādhyāyastṛtīyaḥ

atha yūṣanirdeśīyo nāma caturthodhyāyaḥ
athāto yūṣanirdeśīyaṃ nāmādhyāyaṃ vyākhyāsyāmaḥ

iti ha smāha bhagavān kaśyapaḥ

yūṣādivyañjanopetaṃ bhojyaṃ pathyataraṃ bhavet
svasthānāmāturāṇāṃ ca viśeṣārogyakārakam

ataśca sarvabhūtānāmāhāraḥ sthitikāraṇam
na tvāhārādṛte'styanyat prāṇināṃ prāṇadhāraṇam

na cāhārasamaṃ kiñcidbhaiṣajyamupalabhyate
śakyate'pyannamātreṇa naraḥ kartuṃ nirāmayaḥ

bheṣajenopapanno'pi nirāhāro na śakyate
tasmādbhiṣagbhirāhāro mahābhaiṣajyamucyate

sa hyāharaṇasāmānyāddṛṣṭaṃ ekavidho budhaiḥ
dvividho vīryabhedena trividho doṣabhedataḥ

bhakṣyabhojyādibhedena tathaivoktaścaturvidhaḥ
pañcabhūtātmakatvācca punaḥ pañcavidhaḥ smṛtaḥ

sa eva punaruddiṣṭaḥ ṣaḍvidhaḥ ṣaḍrasāśrayāt
punardvādaśadhā bhinno dvādaśapravicārataḥ

caturviṃśatidhā bhūyaḥ kālādīnāṃ vikalpataḥ
pravartate tamāśritya dharmārthādricatuṣṭayam

svasthayātrā cikitsā ca tamevāśritya vartate
tuṣṭiḥ puṣṭirdhṛtirbuddhirutsāhaḥ pauruṣaṃ balam

sausvaryamojastejaśca jīvitaṃ pratibhā prabhā
āhārādeva jāyante evamādyā guṇā nṛṇām

tadātmavān hitamitaṃ kāle bhuñjīta ṣaḍrasam
yathā ca yacca bhoktavyaṃ ye ca bhogyaguṇāguṇāḥ

tatte bhojyavibhāgīye sarvaṃ vakṣyāmyataḥ param
atra te saṃpravakṣyāmi nānādravyopasaṃskṛtān

nānārogopaśamanān yūṣān sthavirajīvaka
rocano dīpano vṛṣyaḥ svaravarṇabalāgnikṛt

prasvedajanano mukhyastuṣṭipuṣṭisukhāvahaḥ
yūṣaḥ snehoṣṇabhāvācca vātaṃ snehakaṣāyataḥ

pittaṃ kaphaṃ kaduṣṇatvāt saṃskārācca niyacchati
yūṣadhātuṃ vadanti jñā dravīkaraṇapākayoḥ

dravīkaroti bhojyāni pakvaḥ sadyūṣa ityataḥ
dravyairbahuvidhairdravyaistathā cānyairataṇḍulaiḥ

yūṣa ityucyate siddho yavāgūstaṇḍulaiḥ saha
madgayūṣo virasikā yūṣo dāḍimakastathā

citrakāmalakānāṃ ca dvau yūṣau parikīrtitau
pañcakolakayūṣau dvau saṃgrāhī dīpanastathā

dhānyayūṣo'tha kaulatthaḥ phalayūṣaśca bhārgava
puṣpayūṣaḥ patrayūṣo valkayūṣastathaiva ca

mukhyaḥ pallavayūṣaśca mahāyūṣastathaiva ca
rāsnāyūṣo mahāyūṣaścāṅgeryā mūlakasya ca

punarnavātibalayorguḍakambalikastathā
mukhyatrikaṭuyūṣaśca laśunairvāstukena ca

pañcaviṃśatirityete yūṣāḥ kaśyapanirmitāḥ
yūṣāḥ kaṣāyamadhurā kaṣāyāmlāśca bhārgava

dvividhā vihitāḥ sarve sarve ca dravayonayaḥ
kṛtā'kṛtā'kṛtakṛtāḥ pittaśleṣmānilātmasu

rogeṣu snehayogācca te yūṣāstrividhāḥ smṛtāḥ
ta eva pācanāḥ proktāḥ karṣaṇā bṛṃhaṇāstathā

śītoṣṇamiśravīryatvānnānādravyopasaṃśrayāt
lavaṇavyoṣaṇasnehapaktisaṃskārayuktayaḥ

siddhā yūṣeṣu viduṣo na vakṣyāmi punaḥ punaḥ
doṣabhedena yūṣāste saṃkhyātāḥ pañcasaptatiḥ

tathaiva yāpanāditvāt pañcāśattu rasāśrayāt
eke yūṣāstathaikeṣāṃ yatkiñcidvyañjanaṃ dravam

agnau siddhamasiddhaṃ tu rāgakhāḍavapānakam
yamakasnehasiddhāstu te yūṣā ghṛtatailayoḥ

śaṣyante vātarogeṣu varcaḥ śoṣābhighātayoḥ
dīptāgnīnāmanidrāṇāṃ bhārādhvaśramamaithunaiḥ

klāntānāṃ patanādyaiśca yūṣo'yameka iṣyate
dadhikāñjikaśuktāni vargo yaścāpi dīpanaḥ

niryūhaḥ sarvayūṣāṇāmanyasmāt pāñcakarmikāt
kvātho niryūha ādānaṃ kaṣāyaśceti tat samam

garbhaḥ kalkastathā''vāpaḥ pākaḥ saṃskāra ucyate
nistuṣāṇāṃ purāṇānāṃ mudgānāṃ dīpanāmbunā

mudgamaṇḍastanutvāt sa mudgayūṣo ghano'lpaśaḥ
mudgatakrāmlasiddhastu yūṣo virasikā smṛtaḥ

sa eva dāḍimodaśvitkṛto rocana ucyate
smṛto dāḍimayūṣaśca mudgadāḍimasaṃskṛtaḥ

mudgāmalakaniryūho dhātrīyūṣo'bhidhīyate
ityete pañca yūṣāstu vihitāḥ pāñcakarmikāḥ

kāmyāṃstvanyān pravakṣyāmi yūṣānāmayadarśanāt
siddhaścitrakaniryūhe samūlaskandhapatrake

khyātaścitrakayūṣastu grahaṇīdoṣaśūlanut
plīhārśogulmakuṣṭhaghno hṛdrogakaphavātajit

tadvanmūlakayūṣo'pi sa vai saṃskāramīkṣate
śaṭīkarkaṭakībilvamājapauṣkaradhātakī

dadhitthaṃ dāḍimaphalaṃ cāṅgerīsasamaṅgayoḥ
pañcakolakayūṣo'yaṃ paraḥ sāṃgrāhikaḥ smṛtaḥ

sa eva dīpanopeto lavaṇaiścāpi dīpanaḥ
akhaṇḍitānāṃ dhānyānāṃ sarveṣāṃ samabhāginām

niryūhaḥ syādṛte māṣatilaniṣpāvasarṣapāt
dhānyayūṣaḥ smṛto mukhyo dvīpadāḍimasaṃskṛtaḥ

dadhimaṇḍe'tha vā siddhastakre vā rogadarśanāt
śiraḥkarṇāttirogeṣu hṛdroge'vardhābhedake

arucau cātisāre ca kāryaḥ satilamāṣakaḥ
kulatthānāṃ tu niryūhe kaulattho yūṣa ucyate

sannipātānilakaphavyādhīn hanti virūkṣaṇaḥ
kapitthabilvabadaradvākadāḍimacūtajaiḥ

phalayūṣaḥ phalairāmairjīrṇātīsāranāśanam
śaṇaśālmalidhātakyaḥ padmasaugandhikaiḥ saha

kovidārāt karbudārāt puṣpairyūṣaṃ prakalpayet
asṛgdare raktapitte dāhe codaracakṣuṣoḥ

tailāmlābhyāmṛte siddhaḥ puṣpayūṣaḥ sadāḍimaḥ
bilvaśobhāñjanairaṇḍabalārāsnāmravāriṇā

patraniṣkvāthayūṣaḥ syāt patrayūṣo'nilāpahaḥ
dāḍimāmrātajambūnāṃ cirabilvasya ca tvacaḥ

niṣkvāthya dadhimaṇḍena valkayūṣo'tisāranut
nyagrodhodumbarāśvatthaplakṣakālāpalāśajaiḥ

pallavaiḥ kamalānāṃ ca ghṛtadāḍimasaṃskṛtaḥ
pittarogeṣu sarveṣu garbhacyavanadāhayoḥ

mukhyaḥ pallavayūṣo'yaṃ hitaḥ kaṭukinīṣu ca
punarnavāyā rāsnāyāścāṅgerībalayostathā

pṛthagyūṣāḥ samākhyātā vātaghnā dadhisarpiṣā
rohitāpotamatsyānāṃ niryūhaṃ sādhayejjale

taṃ kvāthaṃ sādhayedbhūyaḥ śuktakāñjikamastubhiḥ
dravāṇi kuḍabījāni guḍapañcapale śṛtaḥ

eṣa kāmbaliko rūkṣaḥ kaṭutailena vā kṛtaḥ
vātarogapraśamano bṛṃhaṇo balavardhanaḥ

ratinidrārucikarastilatailena vā kṛtaḥ
dīpanaṃ pañcamūlaṃ ca phalāni madhurāṇi ca

pūrvavat sarvadhānyāni dhānyakaṃ maricāni ca
kākolīkṣīrakākolīkāśmaryāṇi parūṣakam

badarāṇi kulatthāśca rāsnairaṇḍapunarnavāḥ
dve pale gokṣuraḥ śigrupalāśataruṇāni ca

jaladroṇe pacedetaṃ niryūhaṃ pādaśeṣitam
dadhikāñjikaśuktāni prasthaśastailasarpiṣī

mūlakānāmapatrāṇāṃ taruṇānāṃ śataṃ bhavet
eṣa siddho mahāyūṣo vyoṣasaṃskārasaṃskṛtaḥ

sarvarogeṣu bhūyiṣṭhaṃ saṃsṛṣṭeṣu praśasyate
atyagniṣu vinidreṣu stabdhāṅgacchubukākṣiṣu

niryūheṇa samaṃ dadyānmāṃsaniryūhameva tu
kāryaḥ satilakalko vā jīrṇātīsāraśāntaye

ukto laśunayūṣastu svakalpe vātanāśanaḥ
sūpāśca rasakāścaiva trividhāḥ prāṅnidarśitāḥ

svinnāni mūlakānyapsu niṣpīḍya taruṇo vibhuḥ
paribhṛjya tataḥ snehe tata ādānamāvapet

eṣa mūlakayūṣastu sarvarogavināśanaḥ
anamloladakarasaḥ saṃskṛto jalasarpiṣoḥ

bhavet pittopaśamanastailabhṛṣṭo'nilāpahaḥ
ete yūṣāḥ svatantrotthā uktā vyāsasamāsataḥ

yavāgūrapi vakṣyāmi nānādravyopasaṃskṛtāḥ
nānārogopaśamanīḥ śṛṇu vṛddhaikaviṃśatim

odanasya vileplyāśca yavāgvāśca kimantaram
śuśrūṣe bhagavannetadityuktaḥ prāha kaśyapaḥ

odano viśadaḥ siddhaḥ susvinno nisruto mṛduḥ
taṇḍulaiḥ sakalaprāyairakṣīṇaiścāpi paṭhyate

asvinnatvamavakledastvasākalyamanisravaḥ
viraso'viśadaḥ śīta odanasya viparyayāḥ

dravādviṃśatibhāgena taṇḍulaiḥ saha sādhayeta
tathā pañcadaśākhyena yavāgūrdaśakena vā

viṃśateḥ sphuṭitaiḥ sikthaistulyādhomadhyatopari
ahastahāryā peyā syādyavāgūḥ saparigrahāḥ

ghanā viśīrṇā śītā ca na cāvakṣīṇataṇḍulā
picchilā viśadā'hṛdyā yavāgvā doṣasaṃgrahaḥ

takrasiddhā yavāgūstu dadhisiddhā ca te ghane
saṃskṛte hastahārye te pratiṣiddhe kriyāvatām

uṣṇā ghanā praśithilā dalitaistaṇḍulaiḥ kṛtā
vilepyā guṇadoṣāṃstu yavāgvā iva nirdiśet

dīrghopavāsināṃ nṝṇāṃ kṣīrapeyā praśasyate
śītapittopaśamanī bṛṃhaṇī varcabandhanī

śūlaghnī dīpanī peyā dīpanīyopasādhitā
pācanī pacanī coktā kaṣāyairvarcabandhanī

bilvaṃ dadhitthaṃ saha dāḍimena
savyoṣacāṅgerikṛtā yavāgūḥ
sāṃgrāhiṇī dīpanapācanī ca
sapañcamūlā'nilapīḍite tu

balā vṛṣatparṇyatha śālaparṇī
syāddāḍimaṃ bilvaśalāṭuyuktam
peyā hitā pittakaphātisāre
toyaṃ ca tattatra vadanti peyam

eṣaiva dadhnā rucivardhanī syānnirvāhikāṃ hanti tilopasiddhā
raktātisāraṃ śamayatyudīrṇamasṛgdaraṃ garbhaparisravaṃ ca

sadāḍimā sātiviṣā'tha sāmlā
peyā bhavedāmavipācanīyā
syāt kaṇṭakārīrasagokṣurābhyāṃ
saphāṇitā mūtragade yavāgūḥ

suvarcikākṣāraviḍaṅgaśigrusapippalīmūlakṛtā yavāgūḥ /
takropasiddhā krimināśanī syādgulme'tha kāse grahaṇīgade ca

mṛdvīkalājāmadhupippalībhiḥ
sasārivā tṛḍśamanī yavāgūḥ
viṣaṃ nihantyāśu tu somarājñyā
varāhaniryūhakṛtā tu balyā

kārśyārthamiṣṭā tu gavedhukānāṃ
sarpiṣmatī saindhavayugbalāya
dvipañcamūlodakasādhitā tu
śvāsaṃ ca kāsaṃ ca kaphaṃ ca hanti

śākaiḥ samāṃsaiḥ satilaiḥ samāṣaiḥ
sarpiṣmatī snehanabhedanī tu /
jambvāmrayorasthidadhitthabilvaistairamlayugvarcavibandhanī tu

takropasiddhā tu ghṛtāmaye syāt
piṇyākayuk saiva tu tailaroge
upodikādadhyupasādhitā tu
madaṃ vidāhaṃ ca nayet prasādam

śākairabhṛṣṭaiḥ paribhṛṣṭakaiśca rogāturāvekṣyupakalpayettāḥ
loke prasiddhaṃ yanmānaṃ tarkamānaṃ tulādhṛtam
tattantre'smin pramāṇaṃ syādvaktavya tatra nāsti me

iti ha smāha bhagavān kaśyapaḥ
iti khileṣu yūṣanirdeśīyo nāma caturthe'dhyāyaḥ
bhojyopakramaṇīyādhyāyaḥ pañcamaḥ
athāto bhojyopakramaṇīyaṃ nāmādhyāyaṃ vyākhyāsyāmaḥ

iti ha smāha bhagavān kaśayapaḥ

atha khalvasmābhiḥ pūrvaṃ yadrasavimāne'bhihitaṃ kālādicaturviṃśatividhamāhāramānaṃ tasyedānīṃ prativikalpaviśeṣānupadekṣyāmaḥ / kiṃ kāraṇam na hyāhārādṛte prāṇināṃ prāṇādhiṣṭhānaṃ kiñcidapyupalabhāmahe / sa samyagupayujyamāno jīvayati sarvendriyāṇi hlādayati dhātūnāpyāyayati smṛtimatisarvabalaujāṃsyūrjayati vaṇaprasādaṃ copajanayati asamyagupayujyamānastvasukhenopayojayati / tasmāt kāle sātmyaṃ mātrāvaduṣṇaṃ snigdhamavirodhi śucau deśe śuciṣu pātreṣu śuciparicareṇopanītaṃ prāṅmukhastūṣṇīṃstanmanā āsvādayannātidrutaṃ nātivilambitaṃ nātyuṣṇaṃ nātiśītaṃ nātirūkṣaṃ nātisnigdhaṃ nātibahu nātistokaṃ nātidravaṃ nātiśuṣkaṃ nākāṃkṣito na pratānto naikarasaṃ vā''rogyāyurbalārthī samaśnīyāt

bhavanti cātra--
ārogyaṃ doṣasamatā sarvābādhanivartanam
tadarthamṛṣayaḥ puṇyamāyurvedamadhīyate

rasāyanāni vidhivattadarthaṃ copayuñjate
dharmārthakāmamokṣāṇāmavāptiśca tadāśrayā

tadātmavāṃstadarthāya prayateta vicakṣaṇaḥ
annābhilāṣo bhuktasya paripākaḥ sukhena ca

sṛṣṭaviṇmūtravātatvaṃ śarīrasya ca lāghavam
suprasannendriyatvaṃ ca sukhasvapnaprabodhanam

balavarṇāyuṣāṃ lābhaḥ saumanasyaṃ samāgnitā
vidyādārogyaliṅgāni viparīte viparyayam

ārogyaṃ bhojanādhīnaṃ bhojyaṃ vidhimavekṣate
vidhirvikalpaṃ bhajate vikalpastu pravakṣyate

svasthānastheṣu doṣeṣu srotaḥsu vimaleṣu ca
jātāyāṃ ca prakāṅkṣāyāmannakālaṃ vidurbudhāḥ

kāle'śnato'nnaṃ svadate tuṣṭiḥ puṣṭiśca vardhate
sukhena jīryate na syuḥ pratāntājīrṇajā gadāḥ

sātmyaṃ nāmāhuraucityaṃ sātatyenopasevitam
āhārajātaṃ yadyasya cānuśete svabhāvataḥ

sātmyāśī sātmyasādguṇyācchataṃ varṣāṇi jīvati
na cāpyanucitāhāravikārairupasṛjyate

laghūnāṃ nātisauhityaṃ gurūṇāmalpaśastathā
mātrāvadaśnato bhuktaṃ sukhena paripacyate

svāsthya yātrāgniceṣṭānāmavirodhi ca tadbhavet
uṣṇaṃ hi bhuktaṃ svadate śleṣmāṇaṃ ca jayatyapi

vātānulomyaṃ kurute kṣiprameva ca jīryate
annābhilāṣaṃ laghutāmagnidīptiṃ ca dehinām

snigdhaṃ prīṇayate dehamūrjayatyapi pauruṣam
karoti dhātūpacayaṃ balavarṇau dadhāti ca

sumṛṣṭamapi nāśnīyādviruddhaṃ taddhi dehinaḥ
prāṇānasyā''śu vā hanyāttulyaṃ madhughṛtaṃ yathā

aviruddhānnabhuk svāsthyamāyurvarṇaṃ balaṃ sukham
prāpnoti viparītāśī teṣāmeva viparyayam

śucipātropacaraṇaḥ śucau deśe śuciḥ svayam
bhuñjāno labhate tuṣṭi puṣṭiṃ tenādhigacchati

nāniṣṭairamanasyairvā vighātaṃ manasorcchati
tasmādaniṣṭe nāśnīyādāyurārogyalipsayā

prāṅmukho'śnannaro dhīmān dīrghamāyuravāpnute
tūṣṇīṃ sarvendriyāhlādaṃ manaḥsātmyaṃ ca vindati

etadeva ca mātrāṃ ca pakti yuktiṃ ca tanmanāḥ
tasmāttatpravaṇo'jalpan svastho bhuñjīta bhojanam

āsvādyāsvādya yo'śnāti śuddhajihvendriyo rasān
sa vetti rasanānātvaṃ viśeṣāṃścādhigacchati

atidrutaṃ hi bhuñjāno nāhārasthitimāpnuyāt
bhojyānupūrvīṃ no vetti na cānnarasasaṃpadam

nātidrutāśī tatsarvamanūnaṃ pratipadyate
prasādamindriyāṇāṃ ca tathā vātānulomatām

śītīkaroti cānnādyaṃ bhuñjāno'tivilambitam
bhuṅkte bahu ca śītaṃ ca na tṛptimadhigacchati

śaityādbahutvādvairasyād bhuktaṃ kleśena pacyate
atyuṣṇabhojanājjihvākaṇṭhauṣṭhahṛdayodaram

dahyate na rasaṃ vetti rogāṃścāpnoti dāruṇān
mukhākṣipākavaisarparaktapittabhramajvarān

atiśītāśinaḥ śūlaṃ grahaṇīmārdavaṃ ghṛṇā
kaphavātābhivṛddhiśca kāso hikkā ca jāyate

rūkṣaṃ karoti viṣṭambhamudāvartaṃ vivarṇatām
glāniṃ bahvaśitaṃ vāyoḥ prakopaṃ mūtranigraham

atisnigdhāśinastandrītṛṣṇājīrṇodarāmayāḥ
bhavanti kaphamedotthā rogāḥ kaṇṭhodbhavāstathā

viṣṭambhodveṣṭanakleśaceṣṭāhānivisūcikāḥ
jñeyā vikārā jantūnāmatibahvaśanodbhavāḥ

atistokāśino'tyagnivikārāḥ kṛśatā bhramaḥ
atṛptirlaghutā nidrāśakṛnmūtrabalakṣayaḥ

atidravāśanājjantorutkleśo bahumūtratā
pārśvabhedaḥ pratiśyāyo viḍbhedaścopajāyate

atiśuṣkāśanaṃ cāpi viṣṭabhya paripacyate
pūrvajātarasaṃ jagdhvā kuryānmūtrakaphakṣayam

mohāt pramādāllaulyādvā yo bhuṅkte hyaprakāṅkṣitaḥ
avipākārucicchardiśūlānāhān samṛcchati

pratāntabhoktustṛṇmūrcchā vahnisādo'ṅgasīdanam
jvaraḥ kṣayo'tisāro vā mandatvaṃ darśanasya ca

daurbalyamadṛḍhatvaṃ ca bhavatyekarasāśanāt
doṣāpravṛddhirdhātūnāṃ sāmyaṃ vṛddhirbalāyuṣoḥ

ārogyaṃ cāgnidīptiśca jantoḥ sarvarasāśanāt
tasmādekarasābhyāsamārogyārthī vivarjayet

kālasātmyādinā'nena vidhinā'śnāti yo naraḥ
sa prāpnoti guṇāṃstajjānna ca doṣaiḥ prabādhyate

sthiratvaṃ svasthatā'ṅgānāmindriyopacayaṃ balam
kaphamedo'bhivṛddhiṃ ca kuryānmadhurasātmyatā

dantākṣikeśadaurbalyaṃ kaphapittāmayodbhavam
laghutāmagnidīptiṃ ca janayedamlasātmyatā

raktaprakopaṃ taimiryaṃ tṛṣṇāṃ durbalaśukratām
pālityaṃ balahāniṃ ca kuryāllavaṇasātmyatā

pakterupacayaṃ kārśyaṃ raukṣyaṃ śukrabalakṣayam
pittānilapravṛddhiṃ ca kuryāt kaṭukasātmyatā

kledālpatāṃ vātavṛddhiṃ dṛṣṭihāniṃ kaphakṣayam
tvagvikāropaśāntiṃ ca janayettiktasātmyatā

kaphapittakṣayaṃ vāyoḥ prakopaṃ paktimārdavam
kuryādraktopaśāntiṃ ca kaṣāyarasasātmyatā

ojastejo balaṃ varṇamāyurmedhā dhṛtiḥ smṛtiḥ
jāyate saukumāryaṃ ca ghṛtasātmyasya dehinaḥ

tathaiva kṣīrasātmyasya paraṃ caitadrasāyanam
dṛḍhopacitagātraśca nirmedasko jitaśramaḥ

balavān tailasātmyaḥ syāt kṣīṇavātakaphāmayaḥ
cakṣuṣmān balavāñchleṣmī dṛḍhasattvo dṛḍhendriyaḥ

dṛḍhāśrayo mandarujo māṃsasātmyo bhavennaraḥ
ahitaṃ yasya sātmyaṃ syādasātmyaṃ ca hitaṃ bhavet

sa śanairhitamādadyādahitaṃ ca śanaistyajet
ādau tu snigdhamadhuraṃ vicitraṃ madhyatastathā

rūkṣadravāvasānaṃ ca bhuñjāno nāvasīdati
bhāgadvayamihānnasya tṛtīyamudakasya ca

vāyoḥ saṃcaraṇārthaṃ ca caturthamavaśeṣayet
tato muhūrtamāśvasya gatvā pādaśataṃ śanaiḥ

svāsīnasya sukhenānnamavyathaṃ paripacyate
vīṇāveṇusvanonmiśraṃ gītaṃ nāṭyaviḍambitam

vicitrāśca kathāḥ śṛṇvan bhuktvā vardhayate balam
sukhasparśavihāraṃ ca samyagāpnotyato'nyathā

atisnigdhātiśuṣkāṇāṃ gurūṇāṃ cātisevanāt
jantoratyambupānācca vātaviṇmūtradhāraṇāt

rātrau jāgaraṇāt svapnāddivā viṣamabhojanāt
asātmyasevanāccaiva na samyak paripacyate

hitāhitaṃ yadaikadhyaṃ bhuktaṃ samaśanaṃ tu tat
pūrvabhakte'pariṇate vidyādadhyaśanaṃ bhiṣak

kṣuttṛṣṇoparame jāte śānte'gnau pramṛtāśanāt
viṣamaṃ guṇasaṃskārāt kramasātmyavyatikramāt

viruddhaṃ payasā matsyā yathā vā guḍamūlakam
syādajīrṇāśanaṃ nāma vyuṣṭājīrṇe caturvidhe

tathaivātyaśanaṃ jñeyamatimātropayogataḥ
sa --- tānyāmayotpattau mūlahetuṃ pracakṣate

āhārasātmyaṃ deśeṣu yeṣu yeṣa yathā yathā
proktaṃ tathopadeṣṭavyaṃ teṣu teṣu tathā tathā

caturviṃśatirityete vikalpāḥ samudāhṛtāḥ
bhiṣajā hyupadeṣṭavyā rājño rājopamasya vā

anyeṣāṃ vā vasumatāṃ yaśodharmārthasiddhaye
iti ha smāha bhagavān kaśyapaḥ
iti khileṣu bhojyavibhāgīyo nāma pañcamo'dhyāyaḥ

atha rasadoṣavibhāgīyādhyāyaḥ ṣaṣṭhaḥ
athāto rasadoṣavibhāgīyaṃ nāmādhyāyaṃ vyākhyāsyāmaḥ

iti ha smāha bhagavān kaśyapaḥ

rasadoṣavibhāgajñaḥ prakopopaśamaṃ prati
bhiṣagbhiṣaktvaṃ labhate viparyayamathānyathā

tasmāddoṣavikalpāṃśca vikalpāṃśca rasāśrayān
pravakṣyāmi yathāśāstraṃ saviśeṣaṃ savistaram

vyāsatastu jvarādīnāṃ vyādhīnāṃ doṣabhedataḥ
dviṣaṣṭidhā kalpanoktā sthūlasaṃkhyā tvataḥ param

ekaikaśastrayo dvandvairnava sarve trayodaśa
kṣīṇādhikasamaiścānyairdaśa dvau ca prakīrtitāḥ

teṣāṃ vibhāgaṃ vakṣyāmi vistareṇa yathākramam
ekaikaśastrayo jñeyā vātapittakaphairgadāḥ

samairdvandvaistrayaḥ ṣaṭ tu viṣamairnava te smṛtāḥ
dvyadhikaikādhikaiḥ ṣaṭ ca hīnamadhyādhikaiśca ṣaṭ

ekaḥ samaistribhirdoṣairityātaṅkāstrayodaśa
doṣairetairvivṛddhaiḥ syurvikalpāḥ pañcaviṃśatiḥ

doṣaiḥ kṣīṇairapi gadā dṛṣṭvaivaṃ pañcaviṃśatiḥ
dvikṣīṇairekavṛddhaiḥ syurekakṣīṇairdvirudbalaiḥ

ṣaṭ ṣaṭ kṣīṇādhikasamairdaśa dvau cāpare gadāḥ
iti dviṣaṣṭisaṃkhyaiṣā vikārāṇāṃ vikalpaśaḥ

vātapittakaphaireko daśa syāt prakṛtisthitaiḥ
rasānāṃ tu vikalpāḥ syurekaikaśyena ṣaṭ smṛtāḥ

pūrvaḥ pūrvaḥ parairyukto dvikāḥ pañcadaśāpare
raseṣu triṣu pūrveṣu vikalpāḥ syustrayo'dhikāḥ

dvikeṣu triṣvathaikaikaṃ saṃyojya kaṭukādibhiḥ
kaṭvādiṣu tathā pūrvaiḥ svādvamlalavaṇaiḥ pṛthak

aṣṭādaśaite dvābhyāṃ ca trikābhyāṃ viṃśatistrikāḥ
pūrvottarābhyāṃ madhuravyoṣādibhyāṃ yathākramam

ye dvikāstriṣu pūrveṣu yojyāste tribhiruttaraiḥ
pratyekaśo navaite syurvikalpāḥ ṣaḍihānyathā

yuktāḥ svādvamlalavaṇāḥ pṛthak kaṣṭvādibhistribhiḥ
kaṭvādayastathā pūrvairityete daśa pañca ca

catuṣkāḥ pañcakāḥ ṣaṭ syurekaikasya vivarjanāt
ṣaḍbhireko rasaisteṣāṃ kalpaneyaṃ triṣaṣṭidhā

saṃyogāḥ saptapañcāśadasaṃyuktāstu ṣaḍrasāḥ
ṣaḍeva triṣu yujyante rasā doṣeṣu yogataḥ

kvacidekaḥ kvacid dvau ca doṣavṛddhyā kvacittrayaḥ
hīnamadhyātivṛddhānāṃ doṣāṇāṃ tu yathākramam

hīnamadhyādhikairevaṃ rasaiḥ kuryādupakramam
dvyudbalaikodbalānāṃ ca samānāṃ caiva tadvidhaiḥ

vṛddhānāṃ kṣapaṇaṃ kāryaṃ madhyānāṃ yāpanaṃ tathā
kṣīṇānāṃ vardhanaṃ caiva rasavṛddhipramāṇataḥ

viśeṣo'tra yathāyogaṃ kāryo rasaviparyayāt
evaṃ dviṣaṣṭidoṣāṇāṃ rasairepāṃ dviṣaṣṭibhiḥ

sāmyaṃ taiḥ ṣaṭkairevaikaḥ svasthavṛttau prayujyate
kaṭutiktakaṣāyāṃstu rasān prājño yathākramam

yogataḥ kaphaje vyādhau bhaiṣajyamavatārayet
prayuktaḥ kaṭukaḥ pūrvaṃ paicchilyaṃ gauravaṃ ca yat

śleṣmaṇastaṃ nihantyāśu tiktastasmādanantaram
hrāsayatyāsyamādhuryaṃ kaphaṃ saṃśoṣayatyapi

saṃgṛhṇāti kaṣāyaśca snehaṃ cāsyāvakarṣati
tiktasvādukaṣāyāḥ syuḥ kramaśaḥ paittike hitāḥ

āmānvayatvāt pittasya pūrvaṃ tikto'vacāritaḥ
pācayatyāśu taṃ pakvaṃ tatastu madhuro rasaḥ

śaityādgurutvātsnehācca mādhuryācca niyacchati
taddravatvavighātārthaṃ kaṣāyaścāvacāritaḥ

raukṣyādviśoṣibhāvācca viśoṣayati taijasam
vātike lavaṇaḥ pūrvaṃ saṃyogādavacāritaḥ

prakledibhāvājjayati vibandhaṃ mātariśvanaḥ
nihanti śaityamuṣṇatvādgurutvāccāpi lāghavam

tathaivāmlo rasaḥ paścāttasminnevāvacāritaḥ
jaḍīkṛtāni srotāṃsi taikṣṇyādudghāṭya mārutam

anulomayati kṣipraṃ snigdhoṣṇatvādvimārgagam
amlādanantaraṃ paścāt prayukto madhuro rasaḥ

vāyorlaghutvaṃ vaiśadyaṃ rūkṣatvaṃ ca vyapohati
gurutvāt picchilatvācca snigdhatvācca yathābalam

ityuktāḥ sarvarogeṣu rasānāṃ pravicāraṇāḥ
dṛśyante prāyaśo yogā rogeṣūktā jvarādiṣu

kaṭutiktakaṣāyāśca rasato madhurāstathā
vātajvare yathāpūrvaṃ peyāyūṣarasādiṣu
lavaṇo'mlaśca yujyete rasau saṃskārayoginau

tato vidārigandhādirmadhuraḥ saṃprayujyate
pittajvare yathā tiktaḥ śāṅgiṣṭhādiḥ prayujyate

madhuraḥ sārivādiśca kaṣāyaścābhayādikaḥ
pippalyādiryathāpūrvaṃ kaṭukaḥ kaphaje jvare

āragvadhādikastiktaḥ kaṣāyastriphalādikaḥ
sarvatraivānayā yuktyā yathoddiṣṭānrasān budhaḥ

yathādoṣaṃ yathāyogaṃ prayuñjīta yathepsitam
prakṣepairavakarṣaiśca dravyāṇāmanyathānyathā

yathā vā vīṇayā vīṇī tantrīṇāṃ svarakovidaḥ
utkarṣaṃścāvakarṣaṃśca svarān samyak prayojayet

vindan nānāvikalpaiśca grāmarāgāṃśca darśayet
svaramaṇḍalatattvajño vikalpairbahuvistaraiḥ

tathaiva śāstratattvajño yogajñaḥ pratipattimān
vyādhau balābalajñaśca prakṛtijñaśca yogavān

utkarṣaṃścāvakarṣaṃśca prayogāñchāstrakovidaḥ
kevalaiḥ śītavīryaiśca tathaivoṣṇaiśca vīryataḥ

śītairuṣṇaiśca saṃpṛktairdravyairyogān prayojayet
kārtsnyataśca prayuñjīta yathāvadanupūrvaśaḥ

samuccayairvikalpaiśca nānārasasamucchrayaiḥ
yuñjīta bahudhā yogānnṛttaṃ gītavaśādiva

samasyoktaṃ pṛthakcoktaṃ saṃpradhārya balābalam
dviṣaṣṭirdoṣabhedā ye nirdiṣṭāstānataḥ param

sthānāni daśa saṃgṛhya pravakṣyāmi savistaram
traya ekaikaśasteṣāṃ ye ca vṛddhāstrayaḥ samāḥ

samairekaśca saptaite kṣayavṛddhyā caturdaśa
sthānavṛddhyā bhavetteṣāṃ catvāriṃśottaraṃ śatam

vyudasyaitānataḥ śeṣā ye triṃśaddaśa cāṣṭa ca
te bhedaṃ yāntyameyatvācchataśo'tha sahasraśaḥ

dvandvānāṃ viṣamāṇāṃ tu ṣaṇṇāmanyatamaṃ budhaḥ
svasthānādvardhayettāvadyāvat syāt sthānamaṣṭamam

ekaikaśo dviśaścaiva caturviṃśadbhavanti te
hrāsenaikaikaśaścāpi viṃśannava ca bhedataḥ

evamete tripañcāśaddvandvenaikena darśitāḥ
eṣaiva yuktiḥ śiṣṭānāṃ dvandvānāṃ syānna saṃśayaḥ

śatatrayaṃ bhavatyevameṣāmaṣṭādaśottaram
dvyudbalaikodbalānāṃ ca tāvadeva vinirdiśet

hīnamadhyādhikā doṣāḥ sve sve sthāne vyavasthitāḥ
svasthānāt saptamaṃ sthānamekaikaśyena yānti te

dvau ca dvau ca samastāśca teṣāṃ ṣaṭ saptakāstathā
bhavanti hrāsayettāṃśca yathānamadhaḥ kramāt

pañcāśītimatasteṣāṃ bhedānāṃ paricakṣate
eṣa eva vikalpaḥ syāccheṣāṇāṃ pravibhāgaśaḥ

śatāni sapta ṣaṣṭiśca dvau ca bhedā bhavanti te
evaṃ sahasraṃ bhedānāṃ vṛddhaistrīṇi śatāni ca

doṣairnavatiraṣṭau ca kṣīṇaistāvanta eva te
dvikṣīṇairekavṛddhaiḥ syuḥ ṣaṭ ca trīṇi śatāni ca

yāvantyeva ca bhedānāmekakṣīṇairdvirudbalaiḥ
kṣīṇādhikasamaiḥ ṣaṭ ca ṣaṭ ca ṣaṭ ca śatāni ca

krama evātra bhāgaḥ syādyo dvandveṣu nidarśitaḥ
caturdaśa vinirdiṣṭāḥ savikalpāstayoḥ pṛthak

taiḥ sārdhameṣāṃ sarveṣāṃ kārtsnyenaiva vibhāvayet
sahasrāṇi ca catvāri śataṃ ṣaṣṭyuttaraṃ tathā

etāvanto jvarādyānāṃ bhedāḥ proktā yathāgamam
athaiteṣu caturyogavibhāgagatikarmataḥ

sahasraṃ sannipātānāṃ vidyāt sanavakaṃ bhiṣak
ata ūrdhvaṃ rasānāṃ tu vakṣyate bhedavistaraḥ

karmasthānāni doṣāṇāṃ bhāvavṛddhyā yathākramam
tathā rasānāṃ ṣaṭkuryāt sthānānīti viniścayaḥ

tadeva karma sarveṣāṃ dvikādīnāṃ kṣayaṃ vinā
bhavatyevaṃ dvikānāṃ tu pañcaṣaṣṭyuttaraṃ śatam

trikānāṃ ca saviṃśāni ṣaṭśatāni vinirdiśet
catuṣkānāṃ sahasraṃ ca pañcaṣaṣṭyuttaraṃ vadet

pañcakāṇāṃ śatānyaṣṭau syācchataṃ ca ṣaḍuttaram
ṣaṣṭhakānāṃ śate dve tu śataṃ caikādaśottaram

saṃyuktānāṃ vikalpo'yaṃ savikalpāḥ ṣaḍekakaḥ
samānāṃ rasabhedānāmekamekaṃ tu piṇḍitam

trisaptatirbhavatyeṣāṃ sahasratrayameva ca
rasadoṣavikalpānāmatisaukṣmyādataḥ param
na vakṣyāmi mahābhāga na tu buddhiparikṣayāt

ataḥ paramidānīṃ rasabhedān vistareṇopadekṣyāmaḥ / tadyathā--madhurāmlalavaṇakaṭukatiktakaṣāyāḥ ṣaḍrasāḥ / eṣāmidānīṃ rasānāṃ vikalpāstriṣaṣṭirbhavanti / tatraikaikaśyena ṣaṭ / tadyathā--madhura eva amla
eva lavaṇa eva kaṭuka eva tikta eva kaṣāya eva

pūrvaḥ pūrvaḥ parairyukto dvikaḥ te pañcadaśa bhavanti / tatra madhuraḥ pañcabhiramlādibhiryujyate / tadyathā--madhurāmlaḥ madhuralavaṇaḥ madhurakaṭukaḥ madhuratiktaḥ madhurakaṣāya iti / amlaścaturbhirlavaṇādibhiḥ tadyathā--amlalavaṇaḥ amlakaṭukaḥ amlatiktaḥ amlakaṣāya iti / lavaṇastribhiḥ kaṭukādibhiḥ tadyathā--lavaṇakaṭuḥ lavaṇatiktaḥ lavaṇakaṣāya iti / kaṭukastiktakaṣāyābhyāṃ dvābhyāṃ tadyathā--kaṭutiktaḥ kaṭukaṣāya iti / tiktaḥ kaṣāyeṇa ca / tadyathā--tiktakaṣāya iti / te pañcadaśa eva / te dvikāḥ pañcadaśavikalpā bhavanti madhurasaṃyogena pañca bhavanti amlasaṃyogena catvāraḥ lavaṇasaṃyogena trayaḥ kaṭusaṃyogena dvau tiktasaṃyogenaika-- iti / pūrveṣu triṣu raseṣu madhurāmlalavaṇeṣu trayo'dhikā niṣpadyante / madhurāmlaḥ madhuralavaṇaḥ amlalavaṇa iti

eṣāṃ trayāṇāṃ dvikānāmekaiko dvikastribhiritaraiḥ kaṭutiktakaṣāyai rasairyojyaḥ tatastrikā niṣpadyante / tadyathā--madhurāmlakaṭuḥ madhurāmlatiktaḥ madhurāmlakaṣāyaḥ madhuralavaṇakaṭuḥ madhuralavaṇatiktaḥ madhuralavaṇakaṣāyaḥ amlalavaṇakaṭuḥ amlalavaṇatiktaḥ amlalavaṇakaṣāya iti / uttareṣu triṣu raseṣu kaṭutiktakaṣāyeṣu trayo dvikā niṣpadyante tadyathā--kaṭutiktaḥ kaṭukaṣāyaḥ tiktakaṣāya iti eṣāṃ trayāṇāṃ dvikānāmekaiko dvikastribhiritarairmadhurāmlalavaṇai rasairyojayitavyaḥ tatra trikā niṣpadyante / tadyathā--kaṭutiktamadhuraḥ kaṭutiktāmlaḥ kaṭutiktalavaṇaḥ kaṭukaṣāyamadhuraḥ kaṭukaṣāyāmlaḥ kaṭukaṣāyalavaṇaḥ tiktakaṣāyamadhuraḥ tiktakaṣāyāmlaḥ tiktakaṣāyalavaṇa iti / pūrve cottare ca / pūrve ca trayaḥ madhurāmlalavaṇatrika ekaḥ uttare ca trayaḥ kaṭukatiktakaṣāyatrika ekaḥ / ta ete trikā viṃśatirbhavanti prathamena
sūtreṇoktā nava nava ca dvitīyena tṛtīyena dvāviti

pūrveṣu triṣu raseṣu madhurāmlalavaṇeṣu trayo'dhikā ye pūrvoktāste pareṣāṃ trayāṇāṃ rasānāṃ kaṭukatiktakaṣāyāṇāṃ pūrvoktaistribhirdvikaiḥ pratyekaikaśyena yojayitavyāḥ tena catuṣkā niṣpadyante / tadyathā--madhurāmlakaṭutiktaḥ madhurāmlakaṭukaṣāyaḥ madhurāmlatiktakaṣāyaḥ madhuralavaṇakaṭutiktaḥ madhuralavaṇakaṭukaṣāyaḥ madhuralavaṇatiktakaṣāyaḥ amlalavaṇakaṭutiktaḥ amlalavaṇakaṭukaṣāyaḥ amlalavaṇatiktakaṣāya iti / pūrve madhurāmlalavaṇā uttaraiḥ kaṭukatiktakaṣāyairekaikaśo yujyante / tadyathā--madhurāmlalavaṇakaṭuḥ madhurāmlalavaṇatiktaḥ madhurāmlalavaṇakaṣāya iti / uttare trayaḥ kaṭukatiktakaṣāyāḥ pūrvairmadhurāmlalavaṇairekaikaśo yujyante tataścatuṣkā niṣpadyante / tadyathā--kaṭutiktakaṣāyamadhuraḥ kaṭutiktakaṣāyāmlaḥ kaṭutiktakaṣāyalavaṇa iti / ete catuṣkāḥ pañcadaśa pūrvasūtroktā nava dvitīyasūtroktāstrayaḥ tṛtīyasūtroktāstrayaḥ ityete catuṣkāḥ pañcadaśa

ṣaṭ pañcakāḥ / ṣaṇṇāṃ rasānāṃ madhurāmlalavaṇakaṭutiktakaṣāyāṇāmekaikamapanayitavyāḥ ṣaṭ pañcakā niṣpadyante / tadyathā--amlalavaṇakaṭutiktakaṣāyaḥ madhuralavaṇakaṭutiktakaṣāyaḥ madhurāmlakaṭutiktakaṣāyaḥ madhurāmlalavaṇatiktakaṣāyaḥ madhurāmlalavaṇakaṭukaṣāyaḥ madhurāmlalavaṇakaṭutikta iti / ta ete ṣaṭ pañcakāḥ / ṣaḍbhirmadhurāmlalavaṇakaṭutiktakaṣāyairekaḥ / tadyathā--madhurāmlalavaṇakaṭutiktakaṣāya iti / ta evamete rasāstriṣaṣṭidhā bhinnāḥ tatra
saṃyuktāḥ saptapañcāśat asaṃyuktāḥ ṣaṭ

iti ha smāha bhagavān kaśyapaḥ

iti khileṣu rasadoṣavibhāgīyo nāma ṣaṣṭho'dhyāyaḥ

atha saṃśuddhiviśeṣaṇīyo nāma saptamo'dhyāyaḥ
athātaḥ saṃśuddhiviśeṣaṇīyaṃ vyākhyāsyāmaḥ

iti ha smāha bhagavān kaśyapaḥ

siddhau viśodhanākhyāyāmanuktaṃ yadviśeṣaṇam
ūrdhvānulomayoḥ sarvaṃ tat pravakṣyāmyataḥ param

cayaprakopapraśamāḥ pittasya prāvṛḍādiṣu
śleṣmaṇaḥ śiśirādyeṣu vāyorgrīṣmādiṣu triṣu

prāvṛṭśaraddhemantākhyā visargastvṛtavastrayaḥ
śiśiraśca vasantaśca grīṣmaścādānasaṃjñitāḥ

visargādānayormadhye balaṃ madhyaṃ śarīriṇām
ādyantayostu daurbalyamantādyoruttamaṃ balam

hemante snigdhaśītābhiradbhiroṣadhibhistathā
cito'pi śaityāt praskannaḥ kapho nātra prakupyati

sa kupyati himāpāya saṃtapto bhāskarāṃśubhiḥ
tasmāt saṃśodhanaṃ tatra kartavyaṃ vamanottaram

grīṣme niṣpītasāratvādrasānāṃ vicito'pi saḥ
auṣṇyātirekāt kālasya vāyuratra na kupyati

raverambudasaṃrodhāt prakupyatyambudāgame
bastikarmottaraṃ tatra pratikarma viśiṣyate

apāṃ caivauṣadhīnāṃ ca varṣāsvamlavipākataḥ
citamapyatra tat pittaṃ varṣāśaityānna kupyati

divākarāṃśusaṃtaptaṃ śaratkāle prakupyati
virecanottaraṃ cātra vidhātavyaṃ viśodhanam

doṣaprakope sarvasmin kāle kāryamanantaram
na hi hetvīrito doṣaḥ kañcitkālamudīkṣyate

aucityādārtavo doṣaprakopo na tathā bhṛśaḥ
yathā hetukṛtastasmāt kṣipramenamupakramet

vamanaiśca virekaiśca nirūhaiḥ sānuvāsanaiḥ
tathā svāsthyamavāpnoti rogebhyaśca pramucyate

sthaulyāmapāṇḍutākarṇakoṭhāruḥpiḍakodbhavaḥ
nidrānāśo'ratistandrīrutkleśaḥ kaphapittayoḥ

śramadaurbalyadaurgandhyamālasyaṃ sīdanaṃ klamaḥ
bhaktadveṣo'vipākaśca klaibyaṃ buddherupaplavaḥ

bṛṃhaṇaistṛpyato'pi syādbalavarṇaparikṣayaḥ
duḥsvapnadarśanaṃ ceti bahudoṣasya lakṣaṇam

balinaḥ sthiradehasya tasya saṃśodhanaṃ bhiṣak
kuryāt saṃśamanaṃ caiva madhyadoṣabalasya tu

alpadoṣabalasyāpi yathākālaṃ viśoṣaṇam
atha saṃśodhanārhe tu snehasvedopapādite

vamanaṃ sraṃsanaṃ vā'pi yathāvadupakalpayet
snehaḥ pīto'nilaṃ hanti kurute dehamārdavam

saṅgaṃ malānāṃ nighnanti svedaḥ snigdhasya dehinaḥ
srotaḥsu līnaṃ sūkṣmeṣu doṣaṃ dravayati dravam

śodhanaṃ harati kṣipraṃ yathāvat saṃprayojitam
mantrapūtamabībhatsaṃ hṛdyaṃ kāryaṃ virecanam

sabībhatsaṃ tu vamanaṃ tathā tadyogamṛcchati
snigdho vamettṛtīye'hni caturthe sraṃsanaṃ pibet

vikārajāte tadyuktaṃ svasthavṛttau tu kāmataḥ
kaphavṛddhikaraṃ bhojyaḥ śvaḥ pātā vamanaṃ naraḥ

virecanaṃ dravaprāyaṃ snigdhoṣṇaviśadaṃ laghu
tathotkliṣṭakaphatvācca purīṣasya ca lāghavāt

ūrdhvaṃ cādhaśca doṣāṇāṃ pravṛttiḥ syādayatnataḥ
viṣa visarpe śvayathau vātarakte halīmake

kāmalāpāṇḍuroge ca nātisnigdhaṃ virecayet
nātisnigdhaśarīrāya vidadhyāt snehasaṃyutam

snigdhāya rūkṣaṃ rūkṣāya kāmaṃ snehavirecanam
snigdhābhāraṃ rathāt ko vā sraṃsanaṃ sahate naraḥ

ghṛtakumbhādyathā toyamayatnena nirasyate
nirasyate tathā doṣaḥ snigdhāddehādvirecanaiḥ

snigdhaṃ viṣyandayatyaṅgaṃ svedo snigdhārdramindhanam
tataḥ svinnaśarīrasya doṣān harati bheṣajam

yathā hi malinaṃ vāsaḥ kṣāreṇotkleśya vāriṇā
śodhyate śodhanaistadvadutkleśya vidhivadbalāt

vāmitaṃ laṅghayellaṅghyaṃ laghu bhojayet
tasya vāntaviriktasya kramaḥ peyādiriṣyate

tenāgnirvardhate sūkṣmairindhanāraṇayo yathā
samutthite'gnau saṃjāte male dehe ca nirmale

vāsasīvārpito rāgaḥ siddhiṃ yātyuttaro vidhiḥ
yaścātra vā yadābādhaḥ syādayogādiyogataḥ

samāsavyāsatastasya siddhau siddhirudāhṛtā
tato'nnapravicārasya vikalpaḥ saṃpravakṣyate

sarvatra trividhā peyā saṃsargādau vidhīyate
akṛtādivikalpena tato yūṣastato rasaḥ

vyapetalavaṇā pūrvā dīpanīyāmbusādhitā
tāni kṣudrā dvitīyā syāt kiñcillavaṇadīpanā

tadvadeva tṛtīyā tu saṃskṛtā snehamātrayā
avyaktalavaṇasneho yūṣastvakṛtako mataḥ

mandāmlalavaṇasnehasaṃskāraḥ syātkṛtākṛtaḥ
vyaktasnehāmlalavaṇaḥ kṛtayūṣaḥ susaṃskṛtaḥ

evameva rasaṃ vidyādimaṃ peyādikaṃ kramam
sakṛjjaghanyā dvirmadhyā triḥ śreṣṭhā śuddhimarhati

imāṃ peyādisaṃsargīṃ sarvasaṃśodhanopagām
ārogyakāmaḥ seveta svāsthye prakṛtibhojanam

varjayitvā viruddhānnaṃ gurvasātmyaṃ ca yadbhavet
ataḥ paraṃ pravakṣyāmi pramāṇādiprayojanam

vamanīyakaṣāyasya catvāro'ñjalayaḥ parā
mātrā madhyā trayo hrasvā dvau tadardhā virecane

puruṣaṃ puruṣaṃ prāpya doṣāṇāṃ ca balābalam
madanasya phalakvāthaḥ pippalīsarṣapānvitaḥ

grahaghnyā vā sa evā'tha paṭolāriṣṭavatsakaiḥ
yukto vā'tha priyaṅgūnāṃ kalkena madhukasya ca

vamanārthe vidheyaḥ syānmadhusaindhavamūrcchitaḥ
na tvajīrṇe hitaṃ tvatra lavaṇoṣṇāmbu kevalam

taddhi sarvaṃ samutkliśya mukhenāśu vinirharet
yadyevamāmaṃ viṣṭambhānnāpaiti tata uttaram

vacājagandhāmadanapippalībhistaduddharet
anyairvā kalkavihitairbībhatsodvejanauṣadhaiḥ

aṅgalyutpalanālādyairgalāvatudanaiḥ sukhaiḥ
tatpārśvodarapṛṣṭhānāṃ pīḍanonmadanairapi

pitavantaṃ ca vamanaṃ muhūrtamanupālayet
vidāhapūrvaḥ svedo'sya yadā bhavati sarvataḥ

viṣyandamānaṃ jānīyāttadā doṣaṃ bhiṣagvaraḥ
lomaharṣeṇa cānvakṣaṃ sthānebhyaścalitaṃ tathā

ādhmānodveṣṭanābhyāṃ ca nirdiśet koṣṭhamāśritam
hṛllāsāsyaparisrāvaiścāmukhī bhūtamuddharet

uṣṇāmbu lavaṇopetaṃ pītvā''kaṇṭhaṃ punaḥ punaḥ
yāvat syuraṣṭau ṣaḍvā'pi vegāścatvāra eva vā

āpittadarśanādvā'pi doṣocchitterathāpi vā
mānapramāṇato vaikādhyardhadviprasthasaṃmitam

pītādabhyadhikaṃ yat syāt sadoṣastadvinirgame
nirāmagandhaṃ sodgāraṃ yāvat pītamapicchilam

yadā vikaluṣaṃ vāntaṃ dṛśyate'mbu pratigrahe
kukṣyuraḥkaṇṭhaśirasāṃ lāghavaṃ rogamārdavam

klamakārśye na cātyarthamutsāho viśadātmatā
sadyo nirhṛtadoṣasya liṅgānyetāni nirdiśet

śirogataṃ tataścāsya tailaiḥ svinnasya dehinaḥ
doṣāvaśeṣaṃ nasyena dhūmapānena vā haret

yathāśuddhiṃ tataścainaṃ saṃsargeṇopapādayet
harītakyā grahaghnyā vā kalpoktaṃ syādvirecanam

pippalīsaindhavopetā pathyā vā trivṛtāyutā
śṛtaṃ cāragvadhaphalaṃ kṣīreṇātha rasena vā

triphalā vā trivṛdyuktā saghṛtavyoṣasaindhavā
tathā gandharvatailaṃ vā śreṣṭhaṃ snehavirecanam

daśamūlakaṣāyeṇa jāṅgalānāṃ rasena vā
drākṣākvāthena vā yuktamathavā dīpanāmbunā

trivṛddrākṣābhayānāṃ vā gavāṃ mūtreṇa saṃyutā
sadrākṣā trivṛtā vā syādathavā trivṛtāṣṭākam

pathyā trijātakaṃ vyūṣaṃ viḍaṅgāmalakaṃ ghanam
samāni ṣaḍguṇā tvatra śarkarā'ṣṭaguṇā trivṛt

cūrṇaṃ jvaraśramaśvāsakāsapāṇḍvāmayakṣayān
hanyātkrimiviṣārśāṃsi mūtrakṛcchraṃ ca dehinām

daśāvare pañcadaśa madhyame triṃśaduttame
vegā dvitricatuṣprasthapramāṇāḥ syurvirecane

viṭpattikaphasaṃmiśrāḥ savātāḥ syuryathākramam
pittāvasānā vamane kaṣāyakaphamūrcchitāḥ

samyagyoge'tiyoge'tipravṛttiḥ śoṇitottarā
ayoge tvapravṛttiḥ syādviparītā'lpaśo'pi vā

vibhraṃśaḥ karmaṇo bhraṃśaḥ kevalauṣadhanirgamaḥ
sarpiṣpānaṃ vikāre syādatiyogānubandhaje

madhukādivipakvaṃ vā tailaṃ tatrānuvāsanam
durvāntaṃ durviriktaṃ vā snigdhadehaṃ balānvitam

bahudoṣaṃ dṛḍhāgniṃ ca pāyayedapare'hani
durbalaṃ kramaśo bhūyaḥ snigdhasvinnaṃ viśodhayet

na tu duśchardanaṃ jātu krarakoṣṭhamathāpi vā
tayoḥ saṃśamanairdoṣān bastibhirvā śamaṃ nayet

ahṛdyamatidurgandhamajīrṇe cāti vā bahu
yasyānulomikaṃ pītamūrdhvaṃ yāti kaphāvṛtam

taṃ vāmitaṃ laṅghitaṃ vā parisnigdhaṃ virecayet
atyarthasnigdhadehasya viśuddhāmāśayasya vā

mārutasyānulomyasya yasyādho vamanaṃ vrajet
tasya saṃsargamātreṇa pariśuddhirvidhīyate

durbalasyālpadoṣasya mṛdu saṃśodhanaṃ hitam
vigṛhītācirāddoṣaiḥ stokaṃ stokaṃ vrajatyadhaḥ

uṣṇāmbupānaṃ tatra syādānulomyakaraṃ param
doṣo bhavedvā sodgāro nordhvaṃ nādhaśca gacchati

saśūle bheṣaje jantoḥ svedaṃ tatrāvacārayet
mātrāvirikte sodgāramauṣadhaṃ kṣipramuddharet

atipravṛttau jīrṇe'smin stambhanīyairupakramet
dīptāgneḥ krūrakoṣṭhasya bahudoṣasya dehinaḥ

sodāvartasya nirvāhya purīṣaṃ phalavartibhiḥ
susnigdhasvinnagātrasya bhiṣagdadyādvirecanam

yadasaktaṃ mahāvegaiḥ sukhenāśu pravartate
anābādhakaraṃ nātiglapanaṃ doṣaśodhanam

avyāpannaguṇodarkaṃ mātrāyuktaṃ susaṃskṛtam
pītamekāgramanasā samyakcchuddhikṛdāvahet

dīptāgnayaḥ karmanityā ye narā rūkṣabhojinaḥ
śaśvaddoṣāḥ kṣayaṃ yānti teṣāṃ vāyvagnikarmabhiḥ

viruddhādhyaśanājīrṇadoṣānapi sahanti te
svasthavṛttau na te śodhyā rakṣyā vātavikārataḥ

vijñāyaivaṃvidhaṃ vaidyaḥ saṃśuddhiṃ karmamarhati
iti ha smāha bhagavān kaśyapaḥ
iti khileṣu saṃśuddhiviśeṣaṇīyo nāma saptamo'dhyāyaḥ

atha bastiviśeṣaṇīyo nāmāṣṭamo'dhyāyaḥ
athāto bastiviśeṣaṇīyaṃ vyākhyāsyāmaḥ

iti ha smāha bhagavān kaśyapaḥ

bastidānātparaṃ nāsti cikitsā'ṅgasukhāvahā
śākhākoṣṭhagatā rogāḥ sarvārdhāṅgagatāśca ye

teṣāṃ samudbhave heturvātādanyo na vidyate
tathā kaphasya pittasya malānāṃ ca rasasya ca

vikṣepaṇe saṃharaṇe vāyurevātra kāraṇam
jetā cāsya pravṛddhasya bastitulyo na kaścana

tadupārdhaṃ cikitsāyāḥ sarvaṃ vātacikitsitam
karma kālaśca yogaśca tisraḥ saṃjñā yathākramam

vakṣye niruktanirdeśasaṃkhyādoṣavikalpataḥ
bāhu --- teḥ karmasaṃjñitam

atyudīrṇabale jāte prayojyaṃ tadyathāvidhi
tadardhakalanāt kālaḥ sa hi madhyabalānvaye

pavane pittasaṃsṛṣṭe vidhātavyo vijānatā
alpatvāt snehabastīnāṃ yukteryogaḥ sa lāghavāt

prayojyaḥ kaphasaṃsṛṣṭe nātitīvrabale'nile
anvāsanāścaturviṃśatirnirūhāḥ ṣaṭ ca karmaṇi

dvādaśā'nvāsanāḥ kāle nirūhāścātra vai trayaḥ

traya eva nirūhāḥ syuryoge pañcānuvāsanāḥ
karmādīnāṃ tripañcāśadbastisaṃkhyā nidarśitā

pañcādau karmaṇi snehāścatvāro'nte tathā'nayoḥ
madhye ṣaṇṇāṃ nirūhāṇāmantareṣu trayastrayaḥ

ādāvante'ntare caiva kāle snehāstrayastrayaḥ
yoge nirūhāntaritāstrayo'nte dvāviti kramāt

prokto vibhāganirdeśastadvikalpamataḥ śṛṇu
sapta pañca trayo vā''dau vāte garhitāḥ

jaghanyau pittakaphayoretāveva kadācana
tāṃ tāmavasthāmanvīkṣya doṣakālabalāśrayām

utkarṣeccāvakarṣecca bastīn dravyāṇi vā bhiṣak
kuryādyoge tathotkarṣamapakarṣaṃ tu karmaṇi

kāle tadubhayaṃ caiva vīkṣya doṣabalābalam
vāte samāṃśaḥ snigdhoṣṇo nirūhaḥ pānatailikaḥ

ṣaḍbhāgasnaihikau pitte sakṣīrau svāduśītalau
trayaḥ samūtrāstīkṣṇoṣṇaḥ śleṣmaṇyaṣṭāṅgatailikāḥ

sakṛtpraṇihito vātamāśayasthaṃ nirasyati
sapittaṃ sakaphaṃ dvistrirata ūrdhvaṃ na śasyate

śasyate'tra rasakṣīrayūṣāśanavidhiḥ kramāt
athavā balakālāgnideśaprakṛtisātmyataḥ

etā doṣavikalpāntā nirdiṣṭā bastiyuktayaḥ
eṣa cāpyaparaḥ kalpaścaturbhadra iti smṛtaḥ

catvāro bastayaḥ pūrvamante catvāra eva ca
tayorāsthāpanaṃ madhye kalpaḥ so'yaṃ niratyayaḥ

dvistrirvā'rthavaśādeṣa kriyamāṇaḥ sukhāvahaḥ
jvarādibhiḥ parikliṣṭe hīnavarṇabalaujasi

jātānuvāsanāvasthe balapuṃstvāgnivardhanāḥ
ayugmā bastayo deyā na tu yugmāḥ kathañcana

viṣamā viṣamaireva hanyante bastibhirgadāḥ
ekastrayo vā kaphaje paittike pañca sapta vā

vāte navaikādaśa vā yo yadāpnoti vā samam
iti sūkṣmavicitrārthamuktaṃ vyāsasamāsataḥ

vijñāyaitat prayoktavyaṃ yathā vakṣyāmyataḥ param
gambhīrānugatā yasya krameṇopacitā malāḥ

kupitā vātabhūyiṣṭhā bastisādhyā viśeṣataḥ
saṃpannasya sahiṣṇośca karma tasya parāyaṇam

ato madhyasya kālaḥ syādavarasyāvarastathā
snehasvedopapannasya vāmitasya yathākramam

snigdhasvinnasya tu punarviriktasya krame gate
dattānuvāsanasyāsya yathāyogaṃ tatastryahāt

kṣaṇikasya praśāntasya nirūhamupalakṣayet
tribhiranvāsitasyātaḥ saptāhaḥ karmakālayoḥ

punarāsthāpanaṃ kāryaṃ yogaḥ syāt pañcame'hani
svabhyaktasvinnagātrasya kālyamaprātarāśinaḥ

koṣṭhānu sā''maṃ śākhābhyaḥ samyaksaṃvāhitasya ca
nirūhaṃ yojayet prājñaḥ sarvopakaraṇānvitaḥ

haime raupye'thavā kāṃsye sumṛṣṭe bhājane same
prakṣipyaikaikaśo dravyaṃ yat krameṇopadekṣyate

bhiṣaṅnirūhaṃ mṛdnīyāt prāṅmukhaḥ susamāhitaḥ
pūrvamevātra nikṣepyaṃ madhunaḥ prasṛtadvayam

saindhavasyārdhakarṣaṃ ca tailaṃ ca madhunaḥ samam
tataśca kalkaprasṛtaṃ kvāthaṃ kalkacaturguṇam

prasṛtau māṃsaniryūhānmūtraprasṛtameva ca
dvādaśaprasṛto bastirityevaṃ khajamūrcchitaḥ

yathārthaṃ ca yathāvacca praṇidheyo vijānatā
syāccedvivakṣā dravyāṇāṃ prakṣepaṃ prati kasyacit

tatra vācyamidaṃ vyastakramasaṃyogakāraṇam
maṅgalyaṃ maṅgalārthāya madhu pūrvaṃ niṣicyate

paicchilyaṃ bahulatvaṃ ca kaṣāyatvaṃ ca mākṣike
bhinatti lavaṇaṃ taikṣṇyāt saṅghātaṃ ca niyacchati

madhuno'nantaraṃ tasmāllavaṇāṃśo niṣicyate

tatastailaṃ vinikṣiptamekībhāvāya kalpate

kalkaḥ saṃsṛjyate cāśu kvāthaśca samatāṃ vrajet
snehakalkakaṣāyāṇāmevaṃ saṃmūrcchane kṛte

mūtraṃ paṭutvaṃ kurute vīryaṃ codbhāvayatyapi
samyagevaṃ vimṛditaḥ srotobhyaḥ kaphamārutau

viṣyandayati pittaṃ ca kṣipraṃ caiva haratyapi
ato'nyathā mṛdyamāno na śleṣamadhigacchati

asamyaṅmathitaḥ śliṣṭo bastirnārthāya kalpate
tata eṣa kramo dṛṣṭo nirūhasyopayojane

pramāṇaṃ ca prakṛṣṭasya prasṛteryadudāhṛtam
tasmāt pramāṇādutkarṣo vayobalavadiṣyate

apakarṣastu kartavyaḥ saṃpradhārya vayobalam
guṇatastūbhayatvena dṛṣṭvā vyādhibalābalam

utkarṣaṇaṃ yadaṅgena tadaṅgenāpakarṣayet
śītoṣṇasnigdharūkṣāṇāṃ dravyāṇāmupakalpayet

svādvamlalavaṇoṣṇānāmutkarṣaṃ nātimātraśaḥ
vātavyādhau bhiṣakkuryāt snehasya tu vidhāpayet

rūkṣāṇāṃ śītavīryāṇāmapakarṣaṃ ca yuktitaḥ
svādutiktakaṣāyāṇāṃ vyādhau pittottare bhiṣak

utkarṣamapakarṣaṃ tu kuryāttikṣṇoṣṇayogyathā
tīkṣṇoṣṇarūkṣadravyāṇāmutkarṣaṃ tu kaphottare

viparyayaṃ viparyaye guṇānāṃ ca prakalpayet
saṃsṛṣṭadoṣe saṃsṛṣṭaguṇadravyāṇi yojayet

āsthāpanaṃ duṣprayuktaṃ bhavatyāśīviṣopamam
suprayuktaṃ tadeveha prāṇināmamṛtopamam

prāyo yatra guṇādhikyaṃ samyagyogena lakṣyate
tadapramādaṃ kurvīta bastikarmaṇi buddhimān

na hi tādṛgvidhaṃ kiñcit karmānyadupapadyate
kṣipraṃ rogābhighātāya rogāṇāṃ copapattaye

vyādhyāturāgnibhaiṣajyabalaṃ prakṛtimeva ca
vayaḥ śarīramaucityaṃ saukumāryaṃ sāhaṣṇutām

pradhārya buddhyā matimām̐stattatkarmāvacāraṇam
avasthāyāmavasthāyāṃ kuryāt samyagatandritaḥ

nātiśītaṃ na cātyuṣṇaṃ nātitīkṣṇaṃ nacetarat
nātirūkṣamatisnigdhaṃ nātisāndraṃ na ca dravam

nātimātraṃ na cātyalpaṃ nirūhamupakalpayet
atiśīto'tiśaityena skanno bātabalāvṛtaḥ

bhṛśaṃ stambhayate gātraṃ kṛcchreṇa ca nivartate
atyuṣṇaḥ kurute dāhaṃ mūrcchāṃ cāśu nireti ca

atitīkṣṇastathaivāsya jīvādānaṃ karoti vā
mando na doṣān harati dūṣayatyeva kevalam

karṣayatyatirūkṣaśca mārutaṃ ca prakopayet
snigdho'tijāḍyaṃ kurute vyāpādayati cānalam

kṣapayatyatisāndrastu na vā netrādviniṣkramet
atidravo'lpavīryatvādayogāyopapadyate

alpamātro na cāpyeti kṛcchrādvā'pi nivartate
atimātro'tiyogāya tasmādete vigarhitāḥ

yathāvanmūrcchito mṛtsno bhojyoṣṇalavaṇaḥ samaḥ
bālakāṣṭhauṣṭhajihvānāṃ yonidāhapravartakaḥ

śroṇibastikaṭīpārśvanābhimūlodarāśritaḥ
samyaksamucchrayaṃ kṛtsnaṃ vīryataḥ pratipadyate

ūrdhvabhāgairbalān kṣipto mārutairiva pāvakaḥ
pittasthānamatikramya svalpamākṣipate kapham

tīkṣṇo mātrāśatādūrdhvaṃ nātitīkṣṇaḥ prayujyate
na tiṣṭhati mṛdustiṣṭhatyadhikaṃ vā'pi yāpanaḥ

ānulomyādapānasya gudasyāropaṇādbhṛśam
taddvitīyastṛtīyo vā kālamalpataraṃ tathā

doṣān sthūlāṃśca sūkṣmāṃśca gambhīrānugatānapi
viṣyandayati viṣṭabdhān sapurīṣān prakarṣati

na kuryādvyāpadaḥ kāścit sukhena ca nivartate
yukto yuktena bhiṣajā sa bastiḥ saṃpraśasyate

vayasaḥ sthāpano vṛṣyaḥ svaravarṇabalāgnikṛt
vātapittakaphānāṃ ca malānāṃ cāpakarṣaṇaḥ

bālavṛddhavayasthānāṃ kṣipramūrjaskaraḥ param
sarvendriyāṇāṃ vaiśadyaṃ kurute cāṅgamārdavam

evamete samākhyātā nirūhasya guṇāguṇāḥ
purīṣaṃ mārutaḥ pittaṃ kaphaśca kramaśo yadā

pravartante ca phenaṃ ca śaṅkhasphaṭikasannibham
samyaṅgirūḍhagātrāṇāṃ mārdavaṃ janayet param

annābhilāṣo vaiśadyaṃ laghutā vā'tha mārdavam
sṛṣṭaviṇmūtravātatvamindriyāṇāṃ prasannatā

ayoge viparītaṃ syādatiyoge'tivartanam
kaphapittāsṛjāṃ māṃsaprakṣālananibhasya vā

hikkā kampastṛṣā glānirgātrabhedastamaḥ klamaḥ
nidrānāśaḥ pralāpaśca yatra cāpyupajāyate

samyaṅnirūḍhamāśvastaṃ pariṣiktaṃ sukhāmbunā
tanu vā bhojayenmātrāṃ jāṅgalānāṃ rasena vā

bhuktavantaṃ ca tailasya prasṛtenānuvāsayet
vāyuḥ praśāmyate tena nirūheṇa pracālitaḥ

āsthāpano bastirayaṃ gudanirvāpaṇaṃ naraḥ
ekāntaraṃ tataścordhvaṃ yathoktamanuvāsanam

dīptāgnerdṛḍhadehasya sodāvarte vimārgate
śroṇivaṅkṣaṇasaṃsthe ca vāte śastaṃ dine dine

tasya pakvāśayagataḥ snehamātrāṃ prabhañjanaḥ
balavān balavatyagnau vārivat sa viśodhayet

na ca tailāt paraṃ kiñciddravyamastyanilāpaham
snehādraukṣyaṃ gurutvācca laghutvaṃ mārutasya tu

auṣṇyācchaityaṃ nihantyāśu tailaṃ puṣṭi karoti ca
manaḥprasādaḥ snehaṃ ca balavarṇamathāpi ca

syātsnigdhaviṭapaskandhaḥ komalāṅkurapallavaḥ
mūle sikto yathā vṛkṣaḥ kāle puṣpaphalapradaḥ

snehabasternarastadvad dṛḍhakāyo dṛḍhaprajaḥ
vātā makairvikāraiśca pūrvoktairnābhibhūyate

pañcamūlāḍhake'dhyardhaṃ phalānāmāḍhakaṃ bhavet
yavakolakulatthānāṃ kuḍavāḥ syustrayaḥ pṛthak

caturbhāgāvaśiṣṭaṃ tu paścādaṣṭaguṇe jale
mastunaścāḍhakenaitattailaprasthaṃ vipācayet

kuṣṭhasya śatapuṣpāyā vacāyā madhukasya ca
kuṭajasya ca bījānāṃ bījānāṃ madanasya ca

yavānyāḥ pippalīnāṃ ca hareṇvā devadāruṇaḥ
bilvasya devapuṣpasya rāsnāyā mustakasya ca

sūkṣmailāyāḥ priyaṅgvāśca bhāgairakṣasamaiḥ pṛthak
siddhaṃ sulavaṇaṃ pūtaṃ nidadhyādbhājane śucau

etanmandanirūḍhānāṃ bastivyāpatsu cottamam
phalatailamiti khyātamudāvartanivartanam

tathaivodariṇāṃ siddhaṃ gulimināṃ krimikoṣṭhinām
pṛṣṭhaśroṇyūrujaṅghāsu vāteṣvapraguṇeṣu ca

nirūhasādhyā ye kecidvikārāḥ samudāhṛtāḥ
tāñjayedbastinā'nena mūtrāghātāṃśca nāśayet

eraṇḍamūlatriphalābalārāsnāpunarnavāḥ
guḍūcyāragvadho dāru palāśo madanaṃ phalam

mūlaṃ turaṅgagandhāyāḥ pañcamūlaṃ kanīyasam
palapramāṇānyetāni jaladroṇe vipācayet

aṣṭabhāgāvaśeṣaṃ taṃ paripūtaṃ samāharet
karṣapramāṇānyetāni ślakṣṇapeṣyāṇi kārayet

śatāhvā madhukaṃ mustā priyaṅgurhapuṣā vacā
rasāñjanaṃ tārkṣyaśailaṃ pippalyaḥ kauṭajaṃ phalam

khajena mathitaḥ koṣṇaḥ satailamadhusaindhavaḥ
samūtramāṃsaniryūho nirūhaḥ sādhuyojitaḥ

lekhano dīpano balyo grahaṇyarśovikāranut
pārśvapṛṣṭhakaṭīśūlaṃ pārśvajaṅghorujā rujaḥ

eraṇḍabastiḥ śamayenmārutaṃ ca kaphāvṛtam
yuktamātroṣṇalavaṇaḥ snehabastirvidhīyate

samāsataḥ sa dvividhastasya mātrā pracakṣyate
prakuñcaḥ kanyasī mātrā tato'dhyardhā tu madhyamā

uttamā dvipalā mātrā mātrābastau tu bhārgava
apastanasyārdhapalaṃ parihāryā niratyayā

karvatrayaṃ trivarṣasya caturvarṣasya vai palam
ṣaḍvarṣasya tu bālasya sva eva prasṛtaḥ smṛtaḥ

dvau dvau dvādaśavarṣāṇāṃ catvāraḥ prasṛtāstathā
deyāḥ ṣoḍaśakādīnāṃ pūrvāhṇe vā'ntareṣu ca

yāvanmadhyaṃ vayo vārdhe tvapakarṣedyathākramam
samīkṣya dehadoṣāgnibalaṃ prakṛtimeva ca

snehapramāṇaṃ yadbastau nirūhastriguṇastataḥ
ativyavāyavyāyāmapānayānādhvasaṅginaḥ

vayasthāḥ snehasātmyāśca yeṣāṃ cāgnibalaṃ dṛḍham
yeṣāṃ cādhaḥ prakupito vāyurvātātmakāśca ye

teṣūttamāṃ praṇidadhet snehamātrāṃ vicakṣaṇaḥ
ya ebhyo madhyamāvasthāḥ puruṣāsteṣu madhyamām

vayovyādhibalāvekṣāmitarāmitareṣu ca
iti karmādibastīnāṃ tritayaṃ samudāhṛtam

nirdeśaśca vikalpaśca pravibhāgaśca kārtsnyataḥ
yacca yasmin vidhātavyaṃ yā mātrā yeṣu yujyate

nirūhayuktiḥ snehaśca nirūhaśca prakīrtitaḥ
iti ha smāha bhagavān kaśyapaḥ

iti khileṣu bastiviśeṣaṇīyo nāmāṣṭamo'dhyāyaḥ

atha raktaśulmaviniścayādhyāyo navamaḥ
athāto raktagulmaviniścayamadhyāyaṃ vyākhyāsyāmaḥ

iti ha smāha bhagavān kaśyapaḥ

bhagavantamṛṣiśreṣṭhaṃ sarvaśāstravidāṃ varam
kaśyapaṃ bhārgavo dhīmān paryapṛcchat prajāpatim

raktagulmaḥ kathaṃ strīṇāṃ jāyate durupadravaḥ
atha kasmātkumārāṇāṃ kanyānāṃ ca na jāyate

raktagulmaḥ kathaṃ cāsau raktagulma iti smṛtaḥ
kasmānniścetanatve'pi garbhaceṣṭā viceṣṭate

dūrāntaraṃ na tvanayoścetanācetanāvatoḥ
viprakṛṣṭāntare'pyasmin garbhaśoṇitagulmayoḥ

kecidviśeṣaṃ necchanti kecidicchanti liṅgataḥ
tayorviśeṣo yadyasti kimarthaṃ sa upekṣyate

yukto garbhe dohadasya kṣīrasya ca samudbhavaḥ
āpāṇḍugaṇḍatādīnāṃ liṅgānāṃ ca samudbhavaḥ

na yuktamiva paśyāmi tasminneṣāṃ samudbhavam
raktagulme'tha dṛśyante liṅgānyetāni tat katham

kasmādādaśamānmāsāt paripākaṃ niyacchati
ekadvitricatuṣpañcaṣaṭsaptāṣṭanavādiṣu

māseṣu bhedaṃ nāpnoti prāyo garbhavadāsthitaḥ
nārīṇāṃ sukumārīṇāṃ sa kaṣṭa iti me matiḥ

upakramyaḥ kathamayaṃ kaścāsyopakramaḥ smṛtaḥ
kasyāṃ kasyāmavasthāyāṃ kā kā vā'syāvacāraṇā

kasmin kāle ca nirbhedyo bhedanīyaṃ ca kiṃ bhavet
vinirbhinne ca kiṃ kāryametadācakṣva me vibho

iti pṛṣṭaḥ sa śiṣyeṇa provāca vadatāṃ varaḥ
raktagulmastu nārīṇāṃ jāyate yena hetunā

yena caiva kumārāṇāṃ kanyānāṃ ca na jāyate
tat sarvamabhidhāsyāmi vistareṇa nibodha me

viṇmūtrakrimipakvāmakaphavātāśayāḥ pṛthak
saptaite dehināṃ koṣṭhe strīṇāṃ garbhāśayo'ṣṭamaḥ

rajovahāḥ sirā yasmin rajaḥ pravisṛjantyataḥ
puṣpabhūtaṃ hi taddaivānmāsi māsi pravartate
viparyayāttadeveha tatraiva tu nicīyate

anena hetunā strīṇāṃ raktagulmo hi jāyate
tadāśayasya cābhāvātpuruṣāṇāṃ na jāyate

hīnayonyāstu bālāyāḥ kāyaṃ gacchati śoṇitam
atha pūrṇasvabhāvāyāḥ kāyaṃ yoni ca gacchati

garbhamaṅge bhāvayati kiñcit stanyāya kalpate
paktaye śoṇitādyastu śeṣaḥ kāyaṃ samindhati

tathaiva garbhaḥ sūtāyāḥ sadyaḥ stanyāya kalpate
śeṣaṃ tu rudhirībhūtaṃ kāyaṃ yoniṃ ca sarpati

dhātuṣu pratipūrṇeṣu śarīre samavasthite
saṃcitaṃ rudhiraṃ yoniḥ punaḥ kālena muñcati

yadā raktavahā raktaṃ pradoṣānnānupadyate
vimārgādyonimanveti vikṛtistena jāyate

tathaiva raktagulmo'pi hetunā'nena jāyate
yadā ṛtumatī nārī prāptān vegān vidhārayet

hriyā trāsādvyavāyādvā vartamānānadhogatān
evamādibhirapyanyairudāvṛttaiḥ prakopitaḥ

vāyuḥ śoṇitamādāya pratisrotaḥ prapadyate
garbhāśayamudāvṛttastasyā vahati goṇitam

mārutaścyutagarbhāyā yadā mithyopacaryate
tasyāḥ sa vāyurudvṛttaḥ pratighātāt saśoṇitaḥ

gatvā garbhāśayaṃ ruddhaḥ sthiratvamupapadyate
saṃvṛttaṃ śoṇitaṃ tatra māruto viṣamaṃ gataḥ

rajovahāḥ samāvṛttaḥ saṃstambhayati garbhavat
sa gulmaḥ spandate'bhīkṣṇaṃ mārutena samīritaḥ

darśayan yāni rūpāṇi tāni vakṣyāmi sarvaśaḥ
kāsate śūlyate caiva jvaryate'thātisāryate

manyate sarvagātrāṇi mūrcchitāni gurūṇi ca
tamo'syā jāyate'bhīkṣṇaṃ kārśyaṃ caiva nigacchati

vamatyabhīkṣṇaśo bhuktamannaṃ cāsyai na rocate
jāyante codare gaṇḍā nīlaṃ cāsyāḥ pradṛśyate

stanāntaraṃ ca nābhiśca lomarājī ca mūrcchitā
oṣṭhau ca kṛṣṇau bhavatastathaiva stanacūcukau

payodharau prasicyete dohadaṃ ca nigacchati
nānārasān prārthayate niṣṭhīvati muhurmuhuḥ

śubhādudvijate gandhādvarṇaścāsyāḥ prasīdati
garbhiṇyā yāni rūpāṇi tāni saṃdṛśya tattvataḥ

varṣāṇi harati vyādhiṃ garbho'yamiti duḥkhitā
kenacittvatha kālena nirbhedaṃ yadi gacchati

tato gulmapramuktā sā jñātimadhye prabhāṣate
garbhiṇyahaṃ ciraṃ bhūtvā pracyute garbhaśoṇite

garbharūpaṃ na paśyāmi tatra me saṃśayo mahān
tāmidaṃ pratibhāṣante sarvagrāmakutūhalām

divyo garbhā vyatikrānto naigameṣeṇa te hṛtaḥ
ityenāmabudhāḥ prāhurhṛtaṃ sarvamaśobhanam

paripluta iti prāhuḥ kuśalā ye manīṣiṇaḥ
gulmaścaya iti prokto raktaṃ rudhiramucyate

raktasya saṃcayastena raktagulma iti smṛtaḥ
garbhavacceṣṭate nāyaṃ kintu sādṛśyadarśanāt

garbho'yamiti manvānā manasā tadvibhāvinī
nārī viceṣṭate tāstā garbhaceṣṭāḥ pṛthagvidhāḥ

dohadaṃ yat karotīti śṛṇu tatrāpi kāraṇam
ya eva hi rasāḥ prāyo dhātūnāṃ vṛddhihetavaḥ

teṣāmevābhilāṣaḥ syādyonisādharmyatattvataḥ
vātapittānvitaṃ raktaṃ cīyamānaṃ vikāravat

kaṣṭvamlalavaṇādīnāṃ rasānāṃ gṛddhimāvahet
garbhiṇyasmīti tatprītipremasaṃkalpasaṃbhṛtaḥ

prasruto jāyate nāryāstena stanyaṃ pravartate
sarvā rasavahā nāḍyaḥ samantānnābhimāśritāḥ

garbho vivardhamānaśca saṃpīḍayati tāḥ striyāḥ
tadvacca raktagulmo'pi pīḍayannupacīyate

tābhiśca pīḍyamānābhirna samyagvartate rasaḥ
āpāṇḍugaṇḍatādīni lakṣaṇāni bhavantyataḥ

kathaṃ prakarṣate kālamiti tatrāpi me śṛṇu
vivṛddheriha sārūpyādgarbho'yamiti niścitā

saṃrakṣate'bhighātebhyaḥ kukkuṭyaṇḍamivāṅganā
tadapāyakarān hetūnna kathaṃcana sevate

śramopavāsatīkṣṇoṣṇakṣārādīni ca sarvaśaḥ
sa evaṃ yāpyamānastu yathākālaṃ prakarṣate

vyāpattihetumāsādya kālenālpena vā punaḥ
bhedaṃ gacchatyadhastāddhi jalakumbha iva kṣataḥ

kecidicchanti gulmasya māsādādaśamātparam
paripākaṃ phalasyeva svakālapariṇāmataḥ

tasmiṃśca kāle sa vyādhiḥ syānnātidurupakramaḥ
tatropakramamicchanti tasya kartumato budhāḥ

aprāptakālo yāpyaḥ syādgarbhavadyuktikovidaiḥ
nāpakvo bhidyate vyādhiriti mattvā yathābhavam

viśeṣaṃ raktagulmasya garbhasya ca nibodha me
aṅgapratyaṅgavān garbhastaireva ca viceṣṭate

raktagulmastu vṛttaḥ syālloṣṭavacca viceṣṭate
sthānātsthānaṃ vrajan garbho vyāviddhaṃ parivartate

nābheradhastādgulmo'yamavyāviddhaṃ vivartate
ānupūrvyeṇa garbhaśca ahanyahani vardhate

viparītaṃ hi gulmastu mandaṃ mandaṃ vivardhate
tāṃ tāmavasthāṃ garbhastu māsi māsi prapadyate

garbhiṇī nānimittaṃ ca jvaryate dahyate'pi vā
gulminī hyanimittaṃ tu jvaryate dahyate'pi vā

asmin viśeṣe'pi sati saṃdeho jāyate mahān
nānāgarbhavikārāṇāṃ saṅkarādbhiṣaje mataḥ

saṃbhūya saha saṃmantrya bhiṣagbhiḥ śāstrakovidaiḥ
kāle cikitsāṃ kurvīta yathā vakṣyāmyataḥ param

alpāntarāvubhāvetau garbho gulmaśca raktajaḥ
tadyathāvadviditvā''dau kriyāṃ kuryādbhiṣagvaraḥ

yo hi gulme garbha iti garbhe vā gulma ityapi
kriyāṃ kuryādayaśasā enasā caiva yujyate

atastu saṃśaye jāte kuryāt sādhāraṇīḥ kriyāḥ
nopakramedaviditaṃ rogaṃ kañciccikitsakaḥ

atha kāle tvasaṃpūrṇe saṃdigdhe cāpi darśane
hetunā kenacidraktaṃ sravettaṃ cāśu vārayet

pūrṇe prasavakāle tu na raktaṃ prativārayet
tatrānuvāsanaṃ dadyād dravaṃ snigdhaṃ ca bhojanam

vidhinā'nena garbhaścet sukhena prasaviṣyati
athavā raktagulmaḥ syāt so'pyakṛtsnena bhetsyate

etasmātkāraṇādraktaṃ pravṛttaṃ na nivāryate
raktagulme prathamato yuktyā snehopapādanam

śastaṃ bāhusirāyāśca vedhanaṃ pākavāraṇam
tathā saṃśamanīyaṃ ca doṣaśeṣāvakarṣaṇam

kalyāṇakaṃ pañcagavyaṃ ṣaṭpalaṃ tiktameva vā
sarujāṃ pāyayennārīṃ doṣavit karmakovidaḥ

tīkṣṇairāsthāpayedenāṃ yuktitaścānuvāsayet
pathyāni bhojayeccaiva kṣīrayūṣarasādibhiḥ

annapānāni rūkṣāni vidāhīni gurūṇi ca
vyāyāmaṃ maithunaṃ cintāṃ gulminī tu vivarjayet

jvarāruciśvāsakāsaśoṣakārśyārativyathāḥ
śophaścopadravā gulme tāṃścikitset svabheṣajaiḥ

bilvaśyonākaniryūhe sādhitairjāṅgalaiḥ rasaiḥ
śaithilyakaraṇārthaṃ ca raktagulmasya bhojayet

yūṣeṇa vā kulatthānāṃ lāvasaṃskārikeṇa vā
cālanārthaṃ virekaṃ ca trivṛttriphalayā pibet

vāyorupaśamārthaṃ ca phalatailānuvāsitām
āsthāpayet sakṛd dvirvā śūlāṭopanivṛttaye

tulyaṃ madhu ca tailaṃ ca tābhyāmuṣṇodakaṃ samam
dvau karṣau śatapuṣpāyāḥ karṣārdhaṃ saindhavasya ca

etenāsthāpayennārīṃ daśamūlādikena vā
balaṃ cāpyāyayettasyā rasaiḥ kṣīraiśca saṃskṛtaiḥ

upakramettataścūrṇairetaiḥ śodhanapātanaiḥ
harītakī vacā hiṅgu saindhavaṃ sāmlavetasam

yavānī yāvaśūkaṃ ca cūrṇamuṣṇāmbunā pibet
harītakīyavakṣārasauvarcalamiti trayam

ghṛtayuktaṃ pibedyuktyā raktagulmasya bhedanam
patrailāpippalīśuṇṭhīcūrṇaṃ vā viḍasaṃyutam

nāgaraṃ śukticūrṇaṃ vā pibedgomūtrasaṃplutam
sūkṣmailākuñcikācavyapippalīcitrakasya vā

kalkaṃ balvajayūṣādyaiḥ pibenmaṇḍodakena vā
aparāpātanoddiṣṭairauṣadhaiścāpi bhedayet

atipravṛttaṃ rudhiraṃ glāniṃ janayate yadi
vinirhṛte gulmadoṣe sāvaśeṣe'pi vā bhiṣak

punarāsthāpanoktena tatra kuryādbhiṣagjitam
anubandhabhayāccaiva śanaistadanuśodhayet

padmādīni samūlāni dagdhvā tadbhasma saṃharet
gāḍhayitvā ca tatkvāthaṃ cūrṇairetairvipācayet

śuṇṭhīpippalikuṣṭhaiśca cavyacitrakadārubhiḥ
darvipralepitaṃ siddhamabhyasettena śuddhyati

śilājatvabhayāriṣṭaṃ kalpenābhyasya mucyate
yaccāpi pañcagulmīye cikitsitamudāhṛtam

tadihāpi prayoktavyaṃ prasamīkṣya balābalam
iti ha smāha bhagavān kaśyapaḥ

iti khileṣu raktagulmaviniścayo nāma navamo'dhyāyaḥ
atha antarvatnīcikitsitādhyāyo daśamaḥ
athāto'ntarvatnīcikitsitamadhyāyaṃ vakṣyāmaḥ

yathovāca bhagavān kaśyapaḥ

sūkṣmāṃ cikitsāṃ vakṣyāmi garbhiṇīnāṃ vibhāgaśaḥ
tathā garbhaśca nārī ca vardhate rakṣyate'pi ca

garbhiṇīnāṃ jvaraḥ kaṣṭaḥ sarvavyādhiṣu pārthiva
jvaroṣmaṇā'bhitaptastu garbho yātyeva vikriyām

tasmājjvaracikitsāṃ tu pūrvameva nibodha me
kṣucchramābhyañjanādraukṣyādauṣṇyāpakvavidhāraṇāt

snehasvedauṣadhānāṃ ca vibhramāttejaso'pi ca
santāpānmanasaścāpi parvatānāṃ tathaiva ca

gandhācca tṛṇapuṣpāṇāṃ garbhiṇyā jāyate jvaraḥ
garbhiṇīṃ jvaritāṃ nārīmekāhamupavāsayet

tato dadyādalavaṇāṃ peyāṃ snehavivarjitām
tīkṣṇāni tvannapānāni svedamāyāsameva ca

varjayejjvaritā nārī yavāgūṃ kevalāṃ pibet
yavāgvā hrasite doṣe yūṣairannāni dāpayet

yūṣaistu hrasite doṣe rasaṃ vā kṣīrameva vā
dāpayenmatimān prājño na tvauṣadhavidhirhitaḥ

anubandhe tu doṣasya garbhakālamapekṣya ca
māsāccaturthāt prabhṛti bhiṣagbheṣajamācaret

śārīraṃ tu jvaraṃ jñātvā vātapittakaphātmakam
madhyāṃ kriyāṃ prayuñjīta saṃcintya gurulāghavam

upadravabalaṃ jñātvā sattvaṃ cāpi samīkṣya tu
garbhāvasthāṃ tu vijñāya lekhanāni pradāpayet

utpannāyāṃ tu tṛṣṇāyāṃ nātyuṣṇaṃ prapibejjalam
vātaśleṣmasamutthe tu jvare nīraṃ viṣāyate

atha pittakṛte cāpi śṛtaśītaṃ praśasyate
kupyapāṣāṇaniṣpakvaṃ śītaṃ tṛṣṇānibarhaṇam

jvare tu taruṇe dṛṣṭo vidhireṣa viśeṣataḥ
bhagnavege tu kartavyaṃ tṛṣṇāprajamanaiḥ śṛtam

jvaraṃ jvaraṃ samāsādya śītaṃ vā yadi vetaram
śiroroge tu kartavyo yathāvadbheṣajakramaḥ
bhagnavege jvare kṛtsne guru naiva praśasyate

taruṇe tu jvare nāryā abhyaṅgo na praśasyate
garbhe tu taruṇe datto garbhaghātāya kalpate

garbhiṇīnāṃ tu nārīṇāṃ nastato nānusecayet
nasyadānena garbhiṇyāḥ prāṇāstu parihīyate

kuṇirvā yadi vā'ndhaśca jāyate durbalendriyaḥ
dhūmapānena garbhiṇyā dhūmatejo'hato bhṛśam

vivarṇo jāyate garbhaḥ patedvā'pi viśāṃpate
śirovireke garbhiṇyāḥ saṃkṣobhāttu bhayena vā

mārutaḥ kupito dehe garbhaghātāya kalpate
athavā vātarogī tu garbho bhavati pārthiva

svedena taruṇe garbhe pittaṃ prakupitaṃ bhṛśam
cyāvayedāśu garbhaṃ tu tasmāt svedaṃ vivarjayet

svedaḥ sthire tu vihito garbhavaivarṇyakārakaḥ
vamanaṃ taruṇe garbhe svairguṇairgarbhaghātakam

nābhiprapīḍanatkarāt saṃkṣobhācca viśeṣataḥ
garbhiṇyāstaruṇe garbhe sraṃsanaṃ na praśasyate

gurutvāduṣṇatīkṣṇatvādvāhanāccāsya ghātakam
āsthāpanaṃ tu taruṇe garbhe nāryā na śasyate

anuvāsanaṃ ca matimāniti śāstraviniścayaḥ
āsthāpanaṃ sānuvāsaṃ karoti svena tejasā

hīnāṅgaṃ srāviṇaṃ vā'pi garbhamityeṣa niścayaḥ
tasmādetāni matimān garbhiṇyā na pradāpayet

imāni dadyāt saṃcintya rogāvasthāviśeṣavit
vidārigandhāṃ kalaśīṃ tathā gandharvahastakam

madhukaṃ bhadradāruṃ ca kvāthaḥ śarkarayā yutaḥ
vātajvaraharo deyo mātuluṅgarasāplutaḥ

vargo vidārigandhādiḥ kvathito nātiśītalaḥ
bhadradārusamāyukto vātajvaraharo mataḥ

eraṇḍo varuṇaścaiva bṛhatyau madhukaṃ tathā
vātajvaraharaḥ kvātho rāsnākalkasamāyutaḥ

dvipañcamūlaniṣkvāthaḥ koṣṇo vā yadi vā himaḥ
rāsnākalkasamāyukto vātajvarahito mataḥ

jīrṇe tu bhojane peyā tanvī lavaṇavarjitā
kuṣṭhaṃ sayaṣṭīmadhukaṃ rāsnā girikadambakaḥ

śatāhvā padmakaṃ caiva sārivośīramutpalam
mustā śṛgālavinnā ca karavindī tathā vacā

payasyā haṃsapādī ca tathā punnāgameva ca
karṣapramāṇānyetāni dadhimaṇḍena peṣayet

tatastameṣāmaṅgānāṃ niṣkvāthaṃ kvāthayedbhiṣak
bhāgāśca daśamūlasya kāryā dvipalasaṃmitāḥ

balātibalayoścaiva kuryādardhapalaṃ bhiṣak
koraṇḍamadhuśigrūṇi madayantī ca te trayaḥ

yavakolakulatthānāṃ bhāgāḥ syuḥ prasthasaṃmitāḥ
niṣkvāthyaitānapāṃ droṇe śeṣamāḍhakasaṃmitam

tatra dadyāt pratīvāpaṃ yat pūrvamupakalpitam
kṣīraṃ tathaiva gomūtraṃ vāruṇīṃ dadhi cottamam

bhiṣakkuḍavamātrāṇi tilatailena yojayet
avahṛtyāgninā siddhamīṣatkṣodāyitaṃ yadi

uṣṇenaitena tailena sarvagātrāṇi mrakṣayet
vātajvaraṃ nihantyetanmrakṣaṇaistribhireva tu

eṣo'bhyaṅgaḥ sthire garbhe yathāvat saṃpraśasyate
kṣīraṃ kṣīrayavāgūrvāṃ raso vā jāṅgalo hitaḥ

jīrṇajvare sadā nāryā vātaghnairauṣadhaiḥ śṛtaḥ
atha pittakṛte cāpi kvathitaṃ sārivādikam

śarkarāmadhusaṃyuktaṃ pāyayet kalyamutthitam
payasyā kṣīrakākolī mṛdvīkā madhukāni ca

śarkarāmadhusaṃyuktaṃ pānakaṃ paittike jvare
nīlotpalaṃ payasyā ca sārivā madhukaṃ madhu

pippalyo maricośīraṃ lodhraṃ lājā saśarkarā
etat kṣīrasamāyuktaṃ khajena mathitaṃ pibet

garbhiṇī jvaritā kṣipraṃ pittāttena praśāmyati
nalavañjulamūlāni gundrāmūlāni cāharet

sahāṃ ca sahadevāṃ ca mārkavaṃ pāṭaliṃ tathā
kṣīriṇāṃ ca pravālāni tathā jambvāmrayorapi

utpalaṃ sārivośīraṃ candanaṃ padmapatrakam
ślakṣṇānyetāni piṣṭāni pradehaḥ śītalo bhavet

pittajvaraharo nāryāstarpaṇo ghṛtasaṃyutaḥ
yavapiṣṭasya kuḍavo mañjiṣṭhārdhapalaṃ tathā

amlaprasthaśate tailaṃ tailaprasthaṃ vipācayet
dāhajvaraharaṃ tailaṃ praśastaṃ jvaranāśanam

atha śleṣmajvare nārīṃ rāsnākvāthaṃ suśītalam
kṣaudreṇa saha saṃyuktaṃ pāyayediti kaśyapaḥ

bhadradārukaniṣkvātho rāsnākṣaudrasamāyutaḥ
athavā candanakvāthaḥ pippalīkṣaudrasaṃyutaḥ

śleṣmajvaraharaḥ peyo rāsnāvāsā'mṛtāśṛtaḥ
śrīparṇikāmṛtānāṃ tu niṣkvātho madhuyojitaḥ

peyaḥ sayaṣṭīmadhuko jvare ślaiṣmikapaittike
mahataḥ pañcamūlasya kvāthaḥ ślaiṣmikavātike

rāsnākalkasamāyuktaḥ peyaḥ kalyamiti sthitiḥ
kvātho vidārigandhādeḥ śarkarāmadhuyojitaḥ

vātapittajvare peya iti ha smāha kaśyapaḥ
pittajvare himā peyā pathyā kṣīramathāpi ca

jīrṇe pittaharaiḥ pakvo yūṣastu caṇakaistathā
śleṣmajvare sukhoṣṇā tu peyā nāryāḥ praśasyate

tathaiva mudgayūṣo'tha maulako rasa eva ca
susātmyaśceti kartavyo vyādhāvasmin viśeṣataḥ

saṃsṛṣṭe tu bhiṣak prājño yojayeta yathābalam
sannipātasamutthāne tridoṣaśamanaṃ hitam

atha yā madyapā nārī śṛṇu tasyāścikitsitam
vātike paittike vā'pi ślaiṣmike ca viśāṃpate

jvare dadyāt surāṃ nāryā jalenārdhena yojitām
surayā vāsayitvaināṃ tataḥ kalpaṃ pradāpayet

hareṇumudgacuccūnāṃ karkaṭyāśca rasena tu
rasena kiñcidamlena laghūnyannāni bhojayet

lavaṇasnehahīnāni mṛdūni surabhīṇi ca
āhāreṇa gade bhagne madyasyoparame kṛte

yathoktā tu kriyā pathyā yathāsvamiti kaśyapaḥ
atisāre tu garbhiṇyāḥ samutpanne bhiṣagjitam

vātike paittike caiva ślaiṣmike ca pravakṣyate
viruddhādhyaśanājīrṇaistathaivātyaśanādapi

bhayodvegavighātādvā saṃghātāt pūraṇāt kṣayāt
kandamūlaphalairāmairduṣṭatoyaniṣevaṇāt

raukṣyādbubhukṣayā chokādgurvabhiṣyandibhojanāt
abdhātośca sadrekādatīsāraḥ pravartate

āmātisāre saṃjāte pācanāni pradāpayet
kuṭajasya ca bījāni mustā pāṭhā tathaiva ca

ajamodā'tha saralaṃ tathā cātiviṣā śubhā
āme śleṣmānvite peyametat piṣṭaṃ sukhāmbunā

pāṭhācandanabhāgaśca kuṭajasya phalāni ca
tathā cātiviṣā mukhyā piṣṭametaddhitāmbunā

āme pittānvite peyamiti ha smāha kaśyapaḥ
hiṅgusaindhavanāgāśca bṛhatyau kauṭajaṃ phalam

tathā pippalimūlaṃ ca mukhyā cātiviṣā nṛpa
āme vātotthite peyametat piṣṭaṃ sukhāmbunā

bṛhatyādistu pātavyaḥ sannipātasamutthite
pakvasaṃgrahaṇe pathyaḥ sarveṣāmiti niścayaḥ

ślaiṣmike madhusaṃyuktastaṇḍulodakasaṃyutaḥ
ambaṣṭhādigaṇaḥ peyo bhinnavarcovibandhanaḥ

athavā kauṭajaṃ piṣṭvā phalaṃ kṣaudreṇa saṃyutam
dhātakī maricaṃ lodhraṃ kaṭvaṅgaṃ devadāru ca

taṇḍulodakasaṃyuktaṃ śleṣmātīsāranāśanam
taṇḍulodakapiṣṭaṃ vā kesaraṃ nalinasya tu

madhuyuktaṃ pibennārī śleṣmātīsāranāśanam
nyagrodhādistu niryūhaḥ kṣaudreṇa madhurīkṛtaḥ

pittātisāraśamanaḥ kuśalaiḥ parikīrtitaḥ
kaṇā dhātakipuṣpaṃ ca madhukaṃ bilvapeśikā

śarkarāmadhusaṃyuktaṃ pittavṛddhivināśanam
padmaṃ samaṅgamāmrāsthi madhukaṃ padmakesaram

lodhraṃ mocarasaścaiva śarkarākṣaudrasaṃyutaḥ
pittātisāraśamano yoga eṣa vidhīyate

eraṇḍavarjaṃ khuḍḍākaṃ pañcamūlaṃ śṛtaṃ hitam
kālākaṭvaṅgasaṃyuktaṃ vātātīsāranāśanam

padmaṃ samaṅgamāmrāsthi bṛhatī bilvapeśikā
ślakṣṇapiṣṭaṃ pibeddadhnā vātātīsāranāśanam

pippalyo dhātakī padmaṃ samaṅgā mocajo rasaḥ
matsyaṇḍikendradhānyaṃ ca piṣṭametannṛpottama

taṇḍulodakasaṃyuktaṃ saśūle vātike hitam
mustābilvaśalāṭūni anantā madhukaṃ tathā

ślakṣṇapiṣṭaṃ pibeddadhnā sarpirguḍasamāyutam
vātātīsāraśāntyarthaṃ yathāvaditi kaśyapaḥ

pippalyo dhātakī lodhraṃ samaṅgā padmakesaram
padmā mocarasaścaiva dīrghavṛntatarostvacaḥ

kesaraṃ ceti cūrṇāni ślakṣṇānyetāni cūrṇayet
ghṛtaṃ matsyaṇḍikā kṣaudraṃ lehībhūtāni lehayet

lehaḥ kalyāṇakastveṣa sarvātīsāranāśanaḥ
kāśmaryamūlatvakkalkaḥ śyāmāmūlaṃ tathaiva ca

yavāgūṃ dadhimaṇḍena siddhāmalpaghṛtāṃ pibet
pravāhikārtāṃ satataṃ tathā saṃpadyate sukhī

kirātatiktakaṃ lodhraṃ yaṣṭīmadhukameva ca
phāṇitaṃ tilakalkaśca śarkarāmadhusaṃyutam

taṇḍulodakamityetat pratihanti pravāhikām
kapitthabilvamāṣāṇāṃ kalkānakṣasamān pṛthak

tathā komalamocā'pi pippalīśṛṅgaberayoḥ
ardhaprasthaṃ bhaveddadhno gauḍamadyakṛtaḥ khaṭaḥ

ghṛtakṣaudreṇa sahitaḥ pīto hanti cirotthitām
vāhikāṃ jīrṇabhakṣāyāḥ prāṇasya balavardhanaḥ

bāṇamūlasya niṣkvāthastrapuṣībījasaṃyutaḥ
śarkarāmadhusaṃyukto raktātīsāranāśanaḥ

padmaṃ samaṅgā madhukaṃ candanaṃ padmakeśaram
payasā madhusaṃyuktaṃ raktātīsāranāśanam

tilān kṛṣṇān samaṅgā ca yaṣṭīmadhukamutpalam
pibedāmena payasā raktātīsāranāśanam

mauco rasastilā lodhramutpalaṃ kamalaṃ tathā
pibet kṣīreṇa saṃyuktaṃ raktātīsāranāśanam

payasyā candanaṃ lodhraṃ padmakesarameva ca
payasā madhusaṃyuktaṃ pibedraktātisāriṇī

raktaṃ nirvāhate yāvat kṛcchrāt sagudavedanam
kupyapāṣāṇataptena payasā bhojitāṃ tataḥ

madhukaṃ ghṛtamaṇḍena tvathaināmanuvāsayet
garbhiṇyā vātikī yasyā jāyate parikīrtikā

bṛhatībilvamānantairyūṣaṃ kṛtvā tu bhojayet
parikīrtikāyāṃ garbhiṇyāḥ paittikāyāmidaṃ hitam

madhukaṃ haṃsapādī ca vitunnakamathāpi ca
pāyayenmadhusaṃyuktaṃ supiṣṭaṃ taṇḍulāmbunā

ślaiṣmikāyāṃ tu kartavyaṃ yathāvattannibodhata
kaṇṭakārī śvadaṃṣṭrā ca aśvatthaṃ ceti tat samam

saṃpannalavaṇaṃ kṛtvā bhojayet pāyayedapi
śālaparṇīṃ pṛśniparṇīṃ bṛhatīṃ kaṇṭakārikām
bilvāgnimanthaśyonākaṃ kāśmaryamatha pāṭalim

yūṣaṃ kṛtvā tu saṃpannaṃ bhojayet pāyayedapi
atha cedatra garbhiṇyā mukhapāko bhavediha

haridrādāruniṣkvāthaṃ grāhayet kavalaṃ tataḥ
tataḥ snehena kṛtvā tu tataḥ syāccharkarodakam

lodhrodakena kṛtvā tu kuryāttatpratisāraṇam
anantāṃ ca samaṅgāṃ ca ghṛṣīṃ mocarasaṃ tathā

madhunā sahamaśnīyāttataḥ saṃpadyate sukhī
ākṣepake samutpanne tathaivāpyapatānake

mātuluṅgarasaḥ peyo biḍasaindhavasaṃyutaḥ
agnimanthasya niryūhaḥ kvathito varuṇasya vā

lāvo vā taittiro vā'pi rasaḥ snigdhaḥ praśasyate
pānārthaṃ vātaśamano vādūlo rasa eva ca

asaṃsṛṣṭe tu kartavyo vidhireṣa sukhāvahaḥ
pittopasṛṣṭe tu hito jāṅgalo madhuro rasaḥ

śṛto madhurakaiḥ sarvairdāḍimāmlasamāyutaḥ
vātaśleṣmasamutthe tu vyamlastu kaṭuko rasaḥ

yavakṣāreṇa saṃyukto jāṅgalaḥ satataṃ hitaḥ
mṛdavaḥ pāṇitāpāśca pittavarjye hitāstathā

ghṛtaseko'thavā kāryo jīrṇe garbhe viśeṣataḥ
uṣṇo vā yadi vā śīto vyādhimāsādya tattvataḥ

atha chardicikitsāṃ tu procyamānāṃ nibodhata
mātuluṅgaraso lājāḥ kolamajjā tathā'ñjanam

tathā dāḍimasāraśca śarkarā kṣaudrameva ca
eṣa vātātmikāṃ chardiṃ hanti leho viśeṣataḥ

dāḍimāmlo rasaḥ pakvo hṛdyo lavaṇavarjitaḥ
vātacchadiharo rājan māhiṣo vā susaṃskṛtaḥ

śarkarāmadhusaṃyuktaṃ lājacūrṇasamāyutam
cāturjātakakalkena hṛdyaṃ puṣpaiḥ suvāsitam

pittacchardipraśamanaṃ hitaṃ taṇḍuladhāvane
hitā lājamayī peyā sitākṣaudreṇa saṃyutā

jāṅgalo vā rasaḥ pathyaḥ śarkarāmadhurīkṛtaḥ
āmrajambūpravālāni sitāni suśṛtāni tu

kṣaudrayuktāni peyāni śleṣmacchardyāṃ viśeṣataḥ
bhojanārthe hitaṃ yūṣaṃ mudgairdāḍimasāritam

vyapetasnehalavaṇaṃ hṛdyaṃ chardivināśanam
sannipātasamutthāyāṃ saṃsṛṣṭānyavacārayet

krimijāyāṃ tu kartavyaṃ yat purastāt pravakṣyate
varṣābhūmūlaniṣkvāthaṃ yojayedbhadradāruṇā

tat pibenmadhusaṃyuktaṃ śophaṃ strī pūrvayā saha
pippalyaṅkoṭhamūlāni vājiliṇḍarasastathā

dadhi māhiṣamityetat kāmalāyāścikitsitam
mātuluṅgarasaḥ peyaḥ saindhavena suyojitaḥ

vātike hṛdi śūle tu pradhāna iti niścayaḥ
priyaṅgavo'tha pippalyo bhadramustā hareṇavaḥ

kṣaudraṃ badaracūrṇaṃ ca pibet pittārdite hṛdi
pippalīcūrṇakalkastu patraṃ cocaṃ priyaṅgavaḥ

mātuluṅgarasaścaiva lehaḥ śleṣmārdite hṛdi
kulīraśṛṅgī śaraṭaṃ bhārgī pippalya eva ca

vātakāsaharo leho mātuluṅgarasaplutaḥ
madhūlikā tu gokṣīrī pippalī śarkarā tathā

drākṣākṣaudrasamāyukto leho vai pittakāsahā
pippalyastriphalā rāsnā bhadradāru samākṣikam

śleṣmakāsaharo lehaḥ kuśalaiḥ parikīrtitaḥ
madhukaṃ śaṅkhacūrṇaṃ ca jīvalākṣā'tha mākṣikam

lehaḥ śarkarayā yuktaḥ kṣatakāsavināśanaḥ
mayūrasya tu romāṇi śvāvicchalyakayorapi

pippalītaṇḍulāścaiva kolamūlaṃ ca tatsamam
cūrṇitaṃ madhusarpirbhyāṃ lihecchvāsakaphāpaham

guḍo rāsnā'tha pippalyo drākṣā samaricā tathā
haridrā ca samaṅgāni cūrṇānyetāni lehayet

tailena śvāsakāseṣu tamake caiva pūjitaḥ
abhayā''malakaṃ vā'pi śalyakasya tvacā yutam

antargṛhaṃ sahoṣṭrāsthi dadhitailena lehayet
pippalyāmalakī mustā tathā phāṇitaśarkarā

harītakīti cūrṇāni madhutailena lehayet
śamanaṃ sarvakāsānāṃ śvāsānāṃ ca praśasyate

bhadradāruharītakyau saindhavaṃ kuṣṭhameva ca
ghṛtaṃ ca phāṇitaṃ caiva leha ūrdhvānilāpahaḥ

pippalī gairikaṃ bhārgī hiṅgu karkaṭakī tathā
samāni ca bhavelleho hikkāpraśamanaḥ striyāḥ

pippalī pippalīmūlaṃ mustā tagarameva ca
dīpanīyaṃ bhavedetat kṣīreṇa tu samākṣikam

śatāvarī darbhamūlaṃ madhukaṃ kṣīramoraṭaḥ
pāṣāṇabhedakośīraṃ katakasya phalāni ca

eṣāṃ kvātharasaṃ kalkaṃ kṣīraṃ vā pāyayedbhiṣak
mūtragraheṣu sarveṣu siddhamityāha kaśyapaḥ

vātagulmasya bhaiṣajyaṃ yonigulmasya cāpyatha
yathāvat pūrvamuddiṣṭaṃ samāsena cikitsitam

vātike paittike caiva ślaiṣmike ca viśeṣataḥ
caturthe māsi nārīṇāmidaṃ kuryāccikitsitam

sarpirbhirannapānairvā kṣīreṇekṣurasena vā
vāmayet phalayuktena yathāvaditi kaśyapaḥ

caturaṅgulasiddhena rasena payasā'pi vā
virecayettu matimān ya icchet sukhamātmanaḥ

pūtīkapatrairbhṛṣṭairvā puṣpairvāṭyālakasya vā
amlāṃ yavāgūṃ prapibennātivegā yathā bhavet

eraṇḍapatraṃ kṣīreṇa vātarogānvitā pibet
vātamūtravirodhe tu śūle vā'pi samutthite

pañcame māsi garbhiṇyā vyaktāmlalavaṇaṃ tataḥ
āsthāpanaṃ hitaṃ nāryā madhuraṃ cānuvāsanam

granthīnāṃ piḍakānāṃ ca śothe caiva viśāmpate
rohiṇyāṃ vidradhau vā'pi ṣaṣṭhamāse viśeṣataḥ
yathāsvaṃ bheṣajaṃ kuryāddāruṇaṃ śāstrapāragaḥ

pīnamāṃsopaśamanaṃ kṣārakārmāgnikarma ca
bhagnāsthiśleṣaṇaṃ caiva śastrakarma tathaiva ca

saptame māsi nārīṇāṃ sarvametat prayojayet
daṣṭā sarpeṇa pītā vā yā viṣaṃ garbhiṇī nṛpa

vamanādirviṣaghnaistu saṃsṛṣṭaḥ syādupakramaḥ
pāṭhā'mṛtā somavalkaṃ dve sahe kuṭajaṃ tathā

kṣīrakvathitametattu peyaṃ nāryā viṣāpaham
śirīṣaṃ pāṭalīmūlaṃ taṇḍulīyakameva ca

sinduvāritamūlaṃ ca mūlaṃ sahacarasya ca
niṣkvāthya sādhayetpeyāṃ prakṣudrāṃ viṣanāśanīm

khaḍayūṣādikaṃ cāpi yuktyā'nnamaśitaṃ hitam
dvitīye vakṣyate yacca sthāne taccāpi kārayet

garbhiṇī durbalākārā yā bhavatyāsitā satī
jvaraścābhidravatyenāṃ tasyā garbho vipadyate

bahu bhuṅkte tu yā'tyarthaṃ bahuśo bahumūrcchitā
bhavettasyāḥ patedgarbho garbhiṇyāstu na saṃśayaḥ

netre mustotthitākāre karṇau pādau ca śītalau
keśāśca jaṭilā yasyāstasyā garbho vipadyate

upariṣṭāttu yo nābhyā ubhe pārśve niṣevate
madhye vā tiṣṭhate nāryāḥ so'pi garbho vipadyate

ruk sandhimokṣe yasyāḥ syānmṛṣṭānne cārucistathā
niśceṣṭasvapnakāmāyāstasyā garbho vipadyate

sandhiśotho'ṅgapākaśca vikrāmaśca gururbhavet
yasyāstasyāḥ suto jāto mriyate nātra saṃśayaḥ

śocantyāḥ paridevinyāḥ pradhyāyinyāstathaiva ca
aṅgulīsphoṭaśīlāyā jātaḥ putro na jīvati

durgandhi ca payo yasyā jaṭilāśca śiroruhāḥ
malināśca tatastasyā jātaḥ putro na jīvati

pūtigandhi mukhaṃ yasyāḥ śūlaṃ caivopajāyate
nidrā vā'bhidravatyenāṃ mūḍhagarbhā na jīvati

mayūragrīvasaṃkāśaṃ yā paśyati hutāśanam
śūnapādamukhī caiva mūḍhagarbhā na jīvati

pārśvaśūlaṃ ca tṛṣṇā ca saṃjñānāśastathaiva ca
śvāsaśca vartmarodhaśca yasyāḥ sā'pi na jīvati

kaṭigraho yoniśūlaṃ pūtigandhi mukhaṃ tathā
saṃjñānāśaḥ pralāpo vā garbhiṇyāḥ sā na jīvati

nāsā tu kākavadyasyāḥ srastanetrā ca yā bhavet
tathā śakuntagandhā ca garbhaḥ śastreṇa mucyate

ajāśvagandhā śvetā yā māyūraṃ māṃsamicchati
garbhastasyāpi śastreṇa nāryā nirhriyate nṛpa

raktavastraparīdhānā raktamālyānulepanā
smayate sā śayānā vā śmaśānaṃ yā'dhirohati

mūḍhagarbhā sagarbhā vā garbhiṇī sā vinaśyati
kharaṃ varāhaṃ mahiṣaṃ śvānamuṣṭraṃ tathaiva ca

svapne'dhirohate yā tu sagarbhā sā vinaśyati
nityasnātā ca mṛṣṭā ca śuklavastradharā śuciḥ

devavipraparā saumyā garbhiṇī tu sadā bhavet
bahuputrāmanantāṃ ca īśvarīṃ muditāṃ tathā

brāhmīṃ ca sahadevāṃ ca tathā caivendravāruṇīm
jīvakarṣabhakau bhārgīṃ samaṅgāṃ ca tathaiva ca

rohapādān vaṭaśuṅgānātmaguptāṃ tathaiva ca
ariṣṭaṃ pūtanāṃ keśīṃ śatavīryāṃ ca pārthiva

sahasravīryāṃ caitāni prājāpatyena saṃharet
saṃdadhedatha puṣyeṇa dhārayeduttareṣu ca

traivṛtaṃ tu maṇiṃ kṛtvā taṃ śroṇyāṃ garbhiṇī sadā
prajātā śirasā rājan dhārayet kārayettathā

sūtikāyā viśeṣeṇa rakṣoghnāni hitāni ca
jvarādyānāṃ vikārāṇāṃ yatra yatreha lakṣaṇam

annādānāṃ pravakṣyāmi tajjñeyaṃ garbhiṇīṣvapi
iti ha smāha bhagavān kaśyapaḥ

iti khileṣvantarvatnīcikitsitaṃ nāma daśamo'dhyāyaḥ

sūtikopakramaṇīyādhyāya ekādaśaḥ
athātaḥ sūtikopakramaṇīyaṃ nāmādhyāyaṃ vyākhyāsyāmaḥ

iti ha smāha bhagavān kaśyapaḥ

upakramaṃ tu sūtānāṃ saviśeṣamataḥ param
saṃpravakṣyāmi kārtsnyena tannibodha yathākramam

garbhāt prabhṛti sūtāyāṃ bhiṣagbhavati kāryavān
kathaṃ nu kāle saṃpūrṇe sūyedityaparāparam

prāpte prasavakāle ca bhayamutpadyate yataḥ
asminnekaḥ sthitaḥ pādo bhavedanyo yamakṣaye

sūtāyāścāpi tatra syādaparā cenna nirgatā
prasūtā'pi na sūtā strī bhavatyevaṃ gate sati

duṣprajātāmayāḥ santi catuḥṣaṣṭiriti sthitiḥ
yonirbhraṣṭā kṣatā caiva vibhinnā mūtrasaṅginī

saśophasrāviṇī caiva prasuptā vedanāvatī
pārśvapṛṣṭhakaṭīśūlaṃ hṛdi śūlaṃ viṣūcikā

plīhā mahodaratvaṃ ca śākhāvāto'ṅgamardakaḥ
bhrakṣepako hanustambho manyāstambho'patānakaḥ
makkallo vidradhiḥ śophaḥ pralāponmādakāmalāḥ

daurbalyaṃ bhramalī kārśyaṃ bhaktadveṣo'vipācakaḥ
jvarātisārau vaisarpaśchardistṛṣṇā pravāhikā

hikkā śvāsaśca kāsaśca pāṇḍurgulmaśca raktajaḥ
ānāhādhmāpane cobhe varcomūtragrahāvapi

mukharogo'kṣirogaśca pratiśyāyagalagrahau
rājayakṣmā'rditaṃ kampaḥ karṇasrāvaḥ prajāgaraḥ

uṣṇavāto grahāvādhastanarogo'tha rohaṇī
vātāṣṭhīlā vātagulmaraktapittavicarcikāḥ

ityete sūtikārogāścatuḥṣaṣṭirudāhṛtāḥ
tebhyaḥ sarvebhya evāsau rakṣitavyā kathaṃ tviti

tadvidāmapi samoho bhiṣajāmupajāyate
kiṃ punarye'lpamatayaḥ paratantropaśikṣitāḥ

tasmātsuniścitārthena tadvidyenā'nudarśinā
apramattena saṃbhāvyaṃ sūtikānāmupakrame

tadupakramasāmānyaṃ viśeṣāpakramaṃ tathā
vakṣyāmi vyāsato deśavideśakulasātmyataḥ

prajātamātrāmāśvāsya sṛtāṃ śaklā vijāvikā
nyubjāṃ śayānāṃ saṃvāhya pṛṣṭhe saṃśliṣya kukṣiṇā

pīḍayedghaṭṭamudaraṃ garbhadoṣapravṛttaye
mahatā'duṣṭapaṭṭena kukṣipārśve ca veṣṭayet

tenodaraṃ svasaṃsthānaṃ yāti vāyuśca śāmyati
carmāvanaddhāmāsandīṃ balātailoṣṇapūritām

apyāsīta sadā sūtā tathā yoniḥ prasīdati
priyaṅgukānāṃ kṛsaraiḥ svabhyaktāṃ svedayettataḥ

svinnāmuṣṇāmbunā snātāṃ viśrāntāṃ vigataklamām
kuṣṭhaguggulvagurubhirdhūpayedghṛtasaṃyutaiḥ

tato'gnibalavadvīkṣya tryahaṃ pañcāhameva vā
maṇḍānupānamanvakṣaṃ pibet snehaṃ hitāśinī

snehavyuparame'śnīyādalpasnehāmasaindhavām
yavāgūṃ tryahamevātra pippalīnāgarāśritām

syādvyapetauṣadhā paścātsasnehalavaṇottarā
kulatthayūṣaḥ sasnehalavaṇāmlastataḥ param

tathaiva jāṅgalarasaḥ śākānīmāni cāpyataḥ
ghṛtabhṛṣṭāni kūṣmāṇḍamūlakairvārukāṇi ca

snehasvedau ca seveta māsamekamatandritā
uṣṇodakopacāraṃ ca svasthavṛttamataḥ param

trividhaṃ deśamāśritya vakṣyāmi trividhaṃ vidhim
ānūpadeśe bhūyiṣṭhaṃ vātaśleṣmātmakā gadāḥ

tatrābhisyandabhūyastvādādau sneho vigarhitaḥ
maṇḍādiratra kartavyaḥ saṃsargo'gnibalāvahaḥ

svedo nivātaśayanaṃ sarvamuṣṇaṃ ca śasyate
niyataṃ jāṅgale deśe vātapittātmakā gadāḥ

tadatra snehasātmyatvāt snehādiḥ syādupakramaḥ
kāryaḥ prajātamātrāyā viśeṣaścātra budhyate

kumāraprasave tailaṃ kumārīprasave ghṛtam
pibejjīrṇe yavāgūṃ ca dīpanīyopasaṃskṛtām

pañcāhaṃ saptarātraṃ vā tato maṇḍādyupakramaḥ
deśe sādhāraṇe cāsyā hitaḥ sādhāraṇo vidhiḥ

vaideśyāśca prayacchanti vividhā mlecchajātayaḥ
raktaṃ māṃsasya niryūhaṃ kandamūlaphalāni ca

kulasātmyaṃ ca budhyeta yasmin yasmin yathā yathā
aucityāt kulasātmyasya tattathaivānuvartate

ato naikāntikatvācca sūtikopakramasya ca
deśaṃ ca jātisātmyaṃ ca saṃpradhārya prayojayet

uktaṃ tadvyādhibhaiṣajyaṃ duṣprajātopacārike
keṣāṃcidiha vakṣyāmi vyādhīnāmata uttaram

sarveṣāmeva rogāṇāṃ jvaraḥ kaṣṭatamo mataḥ
tadasyādau vidhiṃ vakṣye nidānākṛtibheṣajaiḥ

ṣaḍvidhastu prasūtānāṃ nārīṇāṃ jāyate jvaraḥ
nijāgantuvibhāgena nidānaṃ tasya me śṛṇu

vegasaṃdhāraṇādraukṣyādvyāyāmādatyasṛkkṣayāt
śokādatyagnisaṃtāpāt kaṭvamloṣṇātisevanāt

divāsvapnāt purovātādgurvabhiṣyandibhojanāt
stanyāgamādgrahābādhādajīrṇādduṣprajāyanāt

jvaraḥ saṃjāyate nāryāḥ ṣaḍvidho hetubhedataḥ
sa eva pūrvarūpeṣu vyabhicīrṇo virodhibhiḥ

saṃsṛṣṭaiḥ snehaśītāmbusnānapānāśanādibhiḥ
sannipātajvaro ghoro jāyate durupakramaḥ

tasya tīvrābhirāvībhiḥ pratataṃ vāhanaśramaiḥ
śaithilyaṃ cāgate dehe saṃkṣubdheṣvanilādiṣu

klānteṣvindriyamārgeṣu sāraśūnyeṣu dhātuṣu
eko'pi doṣaḥ kupitaḥ kṛcchrato vahate mahat

parijīrṇaṃ yathā vastraṃ maladigdhaṃ samantataḥ
kleśena śodhyate tajjñaiḥ pradṛśya tattadāśrayam

tathā śarīraṃ sūtāyāḥ parikliṣṭaṃ parisrutam
bhṛśaṃ doṣabalairdigdhaṃ kleśena pariśodhyate

yathā ca jīrṇaṃ bhavanaṃ sarvataḥ ślathabandhanam
varṣavātavikampānāmasahaṃ syāttathāvidham

tathā śarīraṃ sūtāyāḥ svinnaṃ prasravaṇaśramaiḥ
vātapittakaphotthānāṃ vyādhīnāmasahaṃ bhavet

doṣaireva śarīrāṇi dhāryante sarvadehinām
teṣu kṣīṇeṣu sūtāyā jvaraḥ saṃtāpalakṣaṇaḥ

dehaṃ santāpayatyāśu śuṣkendhanamivānalaḥ
taddhetumātravṛddhānāṃ doṣāṇāṃ tu yathocchrayam

kuryādupaśamaṃ dhīmān dhātūnāṃ ca prasādanam
ṣaḍbhirmāsaiḥ prasūtāyā dhātavo rudhirādayaḥ

pratyāgacchantyarogāyā yathāsvaṃ parisaṃsthitim
etaccānyacca saṃcintya cikitsāṃ saṃprayojayet

ataḥ paraṃ jvarāṇāṃ tu lakṣaṇaṃ saṃpravakṣyate
viṣamoṣmā'ṅgamardaśca jṛmbhathū romaharṣaṇam

kaṣāyavirasāsyatvaṃ śītadveṣoṣṇakāmate
dantaharṣaḥ pralāpaśca śuṣkodgāraḥ prajāgaraḥ

ādhmānamaṅgasaṃkoco vātajvaranidarśanam
tṛṣṇā dāhaḥ pralāpaśca vamathuḥ kaṭukāsyatā

pītāsyanakhadantākṣiviṇmūtratvaṃ ca lakṣyate
kaṇṭhasya śoṣaḥ sarvaṃ ca pradīptamiva manyate

bhramaḥ śītābhilāṣaśca pittajvaranidarśanam
uṣṇābhikāmatā kāsaḥ śiroruggātragauravam

mandoṣmatā pratiśyāyaḥ śuklamūtrapurīṣatā
nidrā tandrīrhimadveṣaḥ ṣṭhīvanaṃ madhurāsyatā

gātrasādo'nnavidveṣaḥ kaphajvaranidarśanam
muhuḥ śītaṃ muhurdāho muhurūṣmā samo'samaḥ

kṛcchraviṇmūtravātatvaṃ vātāṅgāntrābhisaṃjanam
dāhastṛṣṇā pralāpaśca pittādvikṣiptacittatā

gurutvaṃ kaṇṭhasaṃrodhaḥ kaphācca pratiśītatā
sannipātajvarasyaitallakṣaṇaṃ samudāhṛtam

tṛtīye'hni caturthe vā nāryāḥ stanyaṃ pravartate
payovahāni srotāṃsi saṃvṛtānyabhighaṭṭayet

karoti stanayoḥ stambhaṃ pipāsāṃ hṛdayadravam
kukṣipārśvakaṭīśūlamaṅgamardaṃ śirorujām

etat stanyāgamotthasya jvarasyoktaṃ svalakṣaṇam
sa hi pīyūṣasaṃśuddhau kramamātreṇa tiṣṭhati

grahāvalokitatrāsavātāghātāvadhūnanaiḥ
jvaryate cet prasūtā strī tasya vakṣyāmi lakṣaṇam

udvepako niṣṭananaṃ cakṣuṣo vibhramaḥ śramaḥ
kampanaṃ hastanetrāṇāṃ hāridramukhanetratā

kṣaṇena śyāvatāṅgānāṃ kṣaṇena ca savarṇatā
suprabodhaḥ saha--krośaḥ keśaluñcanam

pavanajvararūpāṇi bhūyiṣṭhāni karoti ca
vidhirgrahaghno'sya hitaḥ kramo yaścānilajvare

śleṣmābhiṣyandinīṃ sthūlāmaklinnāmalpaniḥsrutām
vidagdhabhaktāṃ snigdhāṃ ca laṅghanenopapādayet

rūkṣāṃ niḥsrutaraktāṃ ca kṛśāṃ vātajvarāditām
kṣuttṛṣṇābhihatāṃ klāntāṃ śamanenopapādayet

tasyāstadahareveha peyādiḥ krama iṣyate
laṅghitāyāśca maṇḍādirityeṣa dvividhaḥ kramaḥ

peyā hi dīpatyagni dhātūn saṃśamayatyapi
garbhadoṣāvaśeṣaghno maṇḍo doṣavipācanaḥ

tasmāt peyā ca maṇḍaśca kramādau vihitau hitau
akṛtaśca kṛtaścaiva dvistriryūṣarasau tathā

svedo'patarpaṇaṃ yuktyā pācanauṣadhasevanam
kaṣāyo'bhyañjanaṃ sarpirjvaraghnaḥ paramo vidhiḥ

śītopavāse vyāyāmamāyāsamahitāśanam
taddhetusevanaṃ caiva kṣipraṃ jvarabalāvaham

garbhāśaye cyute nāryā doṣāstadanugāminaḥ
cyavanti tasmādvamanaṃ nasyaṃ bastirvirecanam

na kāryamalpadoṣāyāḥ śarīre parisaṃsthite
tadeva yuktitaḥ kāryaṃ vīkṣya doṣabalābalam

vamana vā virekaṃ vā tīkṣṇa tīkṣṇauṣadhānvitam
na hyaticyutadoṣāyāṃ jvaritāyāḥ praśasyate

saṃtapte tūṣmaṇā dehe dhātavaḥ paripācitāḥ
bhūyastīkṣṇauṣadhaṃ prāpya gaccheyuramitāṃ gatim

utkliśyamāne hṛdaye kaphe cāpyurasi sthite
kaphajvare kṣame dehe vidadhyādvamanaṃ mṛdu

arucau kaṇṭhasaṃrodhe kaphe caiva śirogate
aśakyamāne kavale nasyaṃ tatra vidhāpayet

saṃsargapācite doṣe jvare ca mṛdutāṃ gate
pañcāhāt saptarātrādvā kaṣāyamavacārayet

pācanīyaṃ tu pañcāhāt saptāhādānulomikam
kaphapittajvare dadyāt pañcāhe śamanauṣadham

svabhāvataikṣṇyādalpena kālena paripacyate
durbalatvācca dhātūnāṃ cyutatvādāmayasya ca

vātajvare jite'bhyaṅgaistathaiva rasabhojanaiḥ
pakvāśayasthe vimale vidadhyādānulomikam

bhojayellaghu cāpyannaṃ tanubhirjāṅgalai rasaiḥ
yaśca naivaṃ śamaṃ yāti vātapittātmako jvaraḥ

sarpistaṃ śamayedāśu dāvāgnimiva toyadaḥ
vimale'gnau mṛdau sarpireva parāyaṇam

snehavadhyāstu bhūyiṣṭhaṃ vyādhayo duṣprajātayaḥ
sannipātajvare nāryā mārute ca balīyasi

saṃskṛtaṃ rasayūṣābhyāṃ purāṇaṃ sarpiriṣyate
tatra vātajvare tāvat pravakṣyāmi cikitsitam

kravyādānāṃ ca māṃsāni dhānyamāṣatilā yavāḥ
daśamūlamapāmārgabhaṇṭyeraṇḍāṭarūṣakāḥ

aśvagandhāṃ śvadaṃṣṭrāṃ ca vaṃśapatraṃ ca saṃharet
ityeṣa saṃkarasvedaḥ sakarīṣo'mlasaṃyutaḥ

vātajvare'vacāryaḥ syāt saṃsargādau sukhāvahaḥ
dve pañcamūlyau vṛścīvamekeṣīkāṃ punarnavām

sahasravīryāṃ nādeyīṃ śatavīryāṃ śatāvarīm
viśvadevāṃ śukanasaṃ sahadevāṃ sanākulīm

rāsnā'jagandhe pūtīkaṃ devāhvāṃ devatāḍakam
bale dve haṃsapādīṃ ca kvāthārthamupasaṃharet

kṛṣṇāgaruṃ vyāghranakhaṃ śatapuṣpāṃ palaṅkaṣām
kāyasthāṃ ca vayasthāṃ ca corakaṃ jaṭilāṃ jaṭām

apetarākṣasīṃ yakṣaguhāṃ mahoṣṭralomikām
hareṇukāṃ haimavatīṃ kairavaṃ suvahāṃ vacām

vṛścikālīṃ ca bhārgīṃ ca śyāmāṃ śigruṃ ca kalkaśaḥ
saṃhṛtya tailaṃ vipacedvātajvaranibarhaṇam

mahataḥ pañcamūlasya pibet kvāthaṃ sasaindhavam
peyo vidārigandhāyā niṣkvātho vā sasaindhavaḥ

rāsnāṃ saraladevāhvayaṣṭīmadhukasaṃyutām
bṛhatīṃ saralaṃ dāruṃ bhārgīṃ varuṇakaṃ tathā

eraṇḍamūlaṃ rāsnāṃ ca vṛścikālīṃ ca saṃharet
etadutkvathitaṃ koṣṇaṃ pibedvātajvarāpaham

pibedantarapānaṃ ca bilvamūlaśṛtaṃ jalam
pañcamuṣṭikayūṣeṇa yuktāmlalavaṇena ca

bhuñjīta bhojanaṃ kāle jāṅgalānāṃ rasena vā
yavakolakulatthānāṃ pañcamūladvayasya ca

kvāthe dadhiyavakṣāracavyacitrakanāgaraiḥ
pippalībhiśca tat siddhaṃ sarpirjvaraharaṃ pibet

vātaśleṣmavibandhaghnaṃ grahaṇīdīpanaṃ param
śyāmātilvakasiddhena sarpiṣā ca virecayet

sa cedvātolbaṇatvācca vepathurnopaśāmyati
svabhyaktāmuṣṇatailena dhūpayet suradāruṇā

sukhoṣṇairamlapiṣṭaiśca sarvagandhaiḥ pralepayet
syonākavāsāvaṃśānāṃ tarkāryeraṇḍayostathā

apāmārgasya kāśmaryā bhaṅgoṣṇāmle'vagāhayet
sukhāvagāḍhāmāśvastāṃ māṃsādyājinakambalaiḥ

kuṣṭhagugguludhūpena ghṛtamiśreṇa dhūpayet
uṣṇāni cānnapānāni ---

uṣṇo varjyaśca pavanaḥ pitte coṣṇaṃ viruddhyate
atīkṣṇopadravaṃ tasmāt pittajvaramupakramet

kaṣāyatiktamadhuraiḥ pradehābhyañjanauṣadhaiḥ
śārṅgiṣṭhāṃ maruvāṃ pāṭhāṃ naktamālaṃ savatsakam

nimbamāragvadhośīramāsutaṃ madhunā pibet
sthirādyaṃ pañcamūlaṃ ca kesaraṃ sakaśerukam

gopīṃ parpaṭakośīraṃ dhānyakaṃ ceti sādhayet
pādāvaśiṣṭaṃ tacchītaṃ pibet samadhuśarkaram

mustadvisārivośīrayaṣṭikālodhrapadmakaiḥ
sasaptaparṇairaṣṭāṅgairvāryardhāḍhakamāplutam

tanniśāmuṣitaṃ pūtaṃ pātavyaṃ śarkarāyutam
karṣeṇa kaṭurohiṇyāḥ ślakṣṇapiṣṭena cānvitam

sarvābhiṣavarājo'yaṃ sarvajvaranivāraṇaḥ
mṛdvīkā nāgapuṣpaṃ ca maricānyatha śarkarā

patramelā ca cavyaṃ ca pānakaṃ paittike jvare
bhadraśrīstinduko mustā payasyā madhukaṃ vacā

kaṣāya eṣāṃ pātavyo jvarātīsāranāśanaḥ
pibenmudgarasaṃ vā'pi pṛśniparṇīsthirāyutam

sārivācandanośīradrākṣāpadmakasādhitam
lājapeyāṃ pibecchardimūrcchādāhajvarāpahām

mudgayūṣeṇa vā'śnīyānmadhureṇa rasena vā
madhukaṃ kesaraṃ gopī nimbapatraṃ kaśerukam

śarkarāmadhusaṃyukto leho mukhaviśodhanaḥ
śāntavege jvare cāsyai dadyānmṛdu virecanam

caturaṅgulamṛdvīkātrivṛtkalkena buddhimān
pradiheddārusaṃyuktaistālīsośīracandanaiḥ

madhukasya ca kalkena kalkena tagarasya ca
tailamabhyañjanaṃ siddhaṃ pītaṃ jvaramapohati

paṭolasya guḍūcyāśca rohiṇyāragvadhasya ca
candanasya ca kalkena siddhaṃ sarpirjvarāpaham

candanādyena vā siddhaṃ paṭolādyena vā ghṛtam
pāyayettiktasarpirvā tittirādyamathāpi vā

amlāni cānnapānāni tathoṣṇakaṭukāni ca
pittajvare vivarjyāni pratyanīkāni cācaret

samyaksaṃsargayogena bhagnavegaṃ kaphajvaram
jayedbhaiṣajyapānaiśca sarpiṣā'bhyañjanena ca

bṛhatyau puṣkaraṃ dāru pippalyo nāgaraṃ śaṭī
kvāthameṣāṃ pibeduṣṇamādau doṣavipācanam

dvipañcamūlīṃ bhārgīṃ ca karkaṭākhyāṃ durālabhām
nāgaraṃ pippalīṃ dāruṃ pibedvā saindhavānvitam

paṭolaṃ dhānyakaṃ mustā mūrvā pāṭhā nidigdhikā
kaṣāya eṣāṃ pātavyaḥ ṣaḍaṅgo madhusaṃyutaḥ

nāgarāmaradārubhyāṃ śṛtamuṣṇaṃ pibejjalam
bālamūlakayūṣeṇa jāṅgalānāṃ rasena vā

kaṭūṣṇadravyayuktena mandasnigdhena bhojayet
pibedgomūtrasaṃyuktaṃ trivṛtkalkavirecanam

kāle kalyāṇakaṃ sarpiḥ pibedvā dāśamaulikam
lākṣā mustā haridre dve śatāhvā bhadrarohiṇī

devapuṣpā vacā dāru saralaṃ ceti taiḥ samaiḥ
pacettailaṃ tadetena kuryādabhyañjanaṃ bhiṣak

kuṣṭhāgaruvyāghranakhaṃ māṃsī dhānyakasāmakam
vakraṃ hareṇuṃ hrīberaṃ sthauṇeyaṃ kesaraṃ tvacam

ele dve saralaṃ dāru mūrvā kālānusārivā
barhiṣṭaṃ śatapuṣpā ca pṛthvīkā devapuṣpakam

etairhi samabhāgaistu tailaṃ dhīro vipācayet
etadabhyañjanādeva kaphajvaramapohati

śeṣaṃ vātajvarahitaṃ kāryamatra cikitsitam
madhurāṇyannapānāni snigdhāni ca gurūṇi ca

kaphajvare vivarjyāni pratyanīkāni cācaret
sannipātajvarasyātaḥ pravakṣyāmi cikitsitam

sa sarvalakṣaṇo'sādhyaḥ kṛcchrasādhyo'lpalakṣaṇaḥ
balahīnasya naṣṭāgneḥ sarvathā naiva siddhyati

kimaṅga sūtikānāṃ tu kṣīṇadhātubalaujasām
tathā'pi yatnamātiṣṭhedānṛśaṃsyādbhiṣagvaraḥ

sannipāteṣu doṣeṣu yo doṣo balavān bhavet
tamevādau praśamayeccheṣadoṣamataḥ param

alpāntarabaleṣveṣu doṣeṣu matimān bhiṣak
śleṣmāṇamādau śamayet sa hyeṣāmanubandhakṛt

gurutvātkṛcchrapākitvādūrdhvakāyāśrayāttathā
tasmājjvareṇa durdiṣṭaṃ vātapittakaphātmake

tasyāṃ tasyāmavasthāyāṃ tattat kāryaṃ cikitsitam
sāmānyena tu vakṣyāmi tadviśeṣaṃ bhiṣagjitam

kuśakāśaśvadaṃṣṭrārkasudhairaṇḍaparūṣakaiḥ
--- nnayavadroṇaṃ carmaṇyāstīrya yuktitaḥ

svedayet sūtikāṃ tatra guruprāvaraṇāvṛtām
nāgaraṃ daśamūlaṃ ca kaṭvaṅgaṃ dārukadvayam

pippalyastriphalā bhārgī karkaṭākhyā durālabhā
sasaindhavaḥ kaṣāyo'yaṃ jvare pūrvāparāhṇike

madhuhiṅgusamāyukto deyaḥ sāyāhnike jvare
paṭolamustāmadhukarohi ---

sarpiṣā saha pātavyaṃ sannipāte'nilottare
etadeva triphalayā yuktaṃ ca suradāruṇā

pāyayenmadhunā'loḍya sannipāte kaphottare
elāmadhūkamadhukaśītapākīparūṣakaiḥ

triphalāsārivāpāṭhāmañjiṣṭhācaturaṅgulaiḥ
pittottare tvabhinyāse pibet samadhuśarkaram

bhārgī śṛṅgī trivṛddantī daśamūlī durālabhā
kaṭvaṅgaṃ triphalā śuṇṭhī pippalī ceti taiḥ śṛtam

kvāthaṃ sasaindhavakṣāraṃ pāyayeccānulomikam
gomūtrayuktāṃ trivṛtāṃ kevalāṃ vā vacāṃ pibet

anulomaṃ gate doṣe saṃjāte grahaṇībale
--- tataḥ sarpirvā sādhu saṃskṛtam

madhukenātiviṣayā rohiṇyā bhadradāruṇā
siddhaṃ sarpiḥ pibet kāle sannipātajvarāpaham

kalyāṇakaṃ mahāntaṃ vā pañcagavyamathāpi vā
śītoṣṇairauṣadhaistailaṃ sarvairevopasaṃskṛtam

abhyañjanaṃ vidhātavyaṃ yaccānyattrimalāpaham
harītakyā priyaṃgvā ca mālatyā''malakena ca

mukhaprakṣālanaṃ kāryaṃ vāsayā khadireṇa vā
ślakṣṇapiṣṭaṃ tathā'mrāsthi rasāñjanasamanvitam

dantamāṃsauṣṭhajihvānāṃ pradhānaṃ pratisāraṇam
santapyamāne śirasi dadhisarjarasākṣataiḥ

sāśvagandhairmadhuyutairlalāṭamupalehayet
laghvannakṛtasaṃsarge niraṣṭāhapare jvare

saṃsarge sannipāte vā sapralāpe'nilottare
saśūlabaddhaviṇmūtre saśvāse ca viśeṣataḥ

purāṇasarpiḥ saṃskāro vidheyo jāṅgalo rasaḥ
daśamūlakulatthānāṃ yavānāṃ kuvalasya ca

kulīraśṛṅgyā rāsnāyāḥ śaṭīpuṣkaramūlayoḥ
bhārgyā durālabhāyāśca niryūhe sādhu sādhitaḥ

tenāsya viguṇo vāyurjvaraścāsya praśāmyati
pācanīyairupakrānte bhagnavege sati jvare

pakvāvaśeṣe ca male bale mandatvamāgate
peyaṃ suśītaṃ sakṣaudramidaṃ saṃśamanadvayam

pippalī sadurālambhā mṛdvīkā vā sapippilī
guḍūcyāmalakānāṃ ca svarase sādhitaṃ ghṛtam

kalkena sārivāśuṇṭhīlodhradāḍimacandanai
taddhi maṅgalyakaṃ nāma viṣamajvaranāśanam

jvarāṇāṃ cāpi sarveṣāmetadevāmṛtopamam
iti ha smāha bhagavān kaśyapaḥ
iti khileṣu sūtikopakramaṇīyo nāmaikādaśo'dhyāyaḥ
atha jātakarmottarādhyāyo dvādaśaḥ
athāto jātakarmottaramadhyāyaṃ vyākhyāsyāmaḥ

iti ha smāha bhagavān kaśyapaḥ

atha khalu śiśorjātasya tatkarmaṇyabhinirvṛtte prathama eva māsi kṛtarakṣāhomamaṅgalasvastyayanasya sūryodayadarśanopasthānaṃ pradoṣe candramasaḥ

caturthe māsi snātālaṅkṛtasyāhatavāsasā saṃvītasya sasiddhārthakamadhusarpiṣā rocanayā cānvālabdhasya dhātryā sahāntargṛhānniṣkramaṇaṃ devatāgārapraveśanaṃ ca / tatrāgniṃ prajvalantaṃ ghṛtākṣatairabhyarcya brahmāṇamīśvaraṃ viṣṇuṃ skandaṃ mātṝścānyāni ca kuladaivatāni gandhapuṣpadhūpamālyopahārairmakṣyaiśca bahubhirbahuvidhaiḥ saṃpūjya tato brāhmaṇavācanaṃ kṛtvā teṣāmāśiṣo gṛhītvā'bhivādya ca gurūn punaḥ svamāgāraṃ praviśet / praviṣṭaṃ cainamanena mantreṇābhyukṣya bhiṣagvarteta

śaracchataṃ jīva śiśo tvaṃ devairabhirakṣitaḥ
dvijairapyāśiṣā pūto gurubhiścābhinanditaḥ iti

ṣaṣṭhe māsi puṇyāhe'bhyarcya devatāṃ dvijāṃśca bhojanena santarpya dakṣiṇābhiḥ svasti vācya ca gṛhamadhye vāstumadhye vā śucau deśe gomayenādbhiśca caturhastamātraṃ sthaṇḍilamupalipya maṇḍalaṃ caturasraṃ vā hiraṇyasuvarṇarajatatāmrakāṃsyaśīsāyasāni maṇayo muktāpravālādayaḥ sarve sarvāṇi dhānyāni vrīhayaḥ sarvasatāleṣṭaka kṣīradadhighṛtamadhugomayagomūtrakārpāsādīni bālakrīḍanakāni piṣṭamayāni tadyathā--gogajoṣṭrāśvagardabhamahiṣameṣacchāgamṛgavarāhavānararuruśarabhasiṃhavyāghrakapitarakṣuvṛkakūrmamīnaśukasārikākokilakala-viṅkacakravākahaṃsakrauñcasārasamayūrakrakaracakorakapiñjalacaraṇāyudhavartakākārāṇi śailakagṛhakarathakayānakasyandanakaśallikājijjhirikākhairikeśīkātumbīkāduṣpravāha-kabhadrakasaṃcollakapīṭhapa --- ndikāduhitṛkākumārakagolagandukādīnyanyāni ca strīkautukānīti bhiṣak tasya
maṇḍalaṃ sannidhāya vasudhāyai ardhyaṃ dattvā'nena mantreṇa

tvamagrajā tvaṃ prabhavā'vyayā ca
lokasya dhātrī sacarācarasya /
tvamījyase tvaṃ yajase mahīha
mātre'va naḥ pāhi kumāramenam

taṃ brahmā anumanyatāṃ svāhā / tatastaṃ maṇḍalamadhye tathaiva snātamalaṅkṛtamahatavāsasaṃ kumāraṃ prāṅmukhamupaveśayenmuhūrtaṃ muhūrttamupaviśya yaddhastābhyāṃ prathamaṃ gṛhṇīta parimṛśedvā kṛṣyādvā tadbhāgī bhaviṣyatīti hṛdi nimittaṃ kṛtvotthāpyottarakālamavahitayā dhātryā'nvitaḥ kumāreṇa vā etaireva krīḍanakaistaijasairitaraiśca laghubhirakharairatīkṣṇairavakraṅgamairanavopaskarairākarṣaṇāharaṇaśaktai rucibhirghoṣavadbhirvinodyamānaḥ sopāśrayāstaraṇopetāyāṃ bhūmau pratidinamabhyāsārthaṃ sakṛdupaviśediti

tatra ślokāḥ--
upalipte śucau deśe śastratoyāgnivarjite
upaviṣṭaṃ sakṛccainaṃ na cirāt sthāpayed budhaḥ

staimityaṃ kaṭidaurbalyaṃ pṛṣṭabhaṅgaḥ śramo jvaraḥ
viṇmūtrānilasaṃrodhādhmānaṃ cātyupaveśanāt

āsīnasyātibālasya satataṃ bhūmisevanāt
āsannānyeva duḥkhāni nirghātaṃ gātrabhedanam

nirghātājjarjarāṅgatvaṃ vedanā jvarasaṃbhavaḥ
tato na vṛddhirbālasya kaṭhorāṅgatvameva ca

makṣikākrimikīṭānāṃ velājhañjhānilasya ca
sarpākhunakulādīnāṃ gamyo bhavati nityaśaḥ

tasmānnāticiraṃ naiko na bālo na ca rogitaḥ
upaveśyo bhavedbālo nāpuṇyāhakṛtādikaḥ १४ iti
tasminneva māsi vividhānāṃ phalānāṃ prāśanaṃ bhiṣaganutiṣṭhet / taddhi dantajātasyānnaprāśanaṃ daśame vā māsi praśaste'hani prājāpatye nakṣatre''bhyarcya devatāṃ brāhmaṇāṃśca samāṃsenānnena dakṣiṇāvatā svasti vācya gomayopalipte sthaṇḍile darbhānāstīrya sumanaso'vakīrya caturṣu sthāneṣu gandhamālyālaṅkṛtān pūrṇakalaśān svastikāṃśca sthāpya krīḍanakavihitāni pūrvavadupakaraṇāni sarvāṇyevopakalpya lāvakakapiñjalatittiracaraṇāyudhānāmanyatamasya māṃsenānyaiśca vicitrasusaṃskṛtakāmikairvyañjanaiḥ samuditamannapānaṃ madhye nidhāya tato bhiṣak sutamalaṅkṛtamahatavastraparihitamanuṣṭhitarakṣāvidhānaṃ kumāraṃ prāṅmukhaḥ pratyaṅmukhamupaveśyāgniṃ prajvālyānnaṃ sarvavyañjanopetaṃ gṛhītvā'nena mantreṇa juhuyāt

yathā surāṇāmamṛtaṃ nāgendrāṇāṃ yathā sudhā
tathā'nnaṃ prāṇināṃ prāṇā annaṃ cāhuḥ prajāpatim

tadudbhavastrivargaśca lokāścaiva yathā hyamī
juhomi tasmāttvayyannamagne'mṛtasukhopagam

prajāpatiranumanyatāṃ svāhā / hutaśeṣasyāṅguṣṭhamātraṃ sumṛditaṃ kṛtvālabhya bālaṃ tato'sya mukhe dadyāttrīṇi pañca vā vārān prāśyopaspṛśeccainam utthāpyordhvaṃ dvādaśamāsikasyānnamabhilaṣato'lpaśaścamāni dadyāditi

tatra ślokāḥ--
śālīnāṃ ṣaṣṭikānāṃ vā purāṇānāṃ viśeṣataḥ
taṇḍulairnistuṣairbhṛṣṭaiḥ kṣālitaiḥ sādhitā dravāḥ

sasnehalavaṇā lehyā bālānāṃ puṣṭivardhanāḥ
godhūmānāṃ tathā cūrṇaṃ yavānāṃ vā'pi sātmyataḥ

viḍaṅgalavaṇasnehaiḥ pakvoṣṇaṃ lehanaṃ hitam
bhṛśaṃ bhinnapurīṣasya kodravānāṃ nidhāpayet

mṛdvīkāmadhusarpīṃṣi dadyāt pittātmanaḥ sadā
mātuluṅgarasopetaṃ vāte salavaṇāśanam

ekāntaraṃ dvyantaraṃ vā deśāgnibalakālavit
yadā vā kṣudhitaṃ paśyettadainam sātmyamāśayet

iti ha smāha bhagavān kaśyapaḥ
iti khileṣu jātakarmottaraṃ nāma dvādaśo'dhyāyaḥ
atha kukkuṇakacikitsitādhyāyastrayodaśaḥ
athātaḥ kukkuṇakacikitsitaṃ vyākhyāsyāmaḥ

iti ha smāha bhagavān kaśyapaḥ

yadā mātā kumārasya madhurāṇi niṣevate
matsyaṃ māṃsaṃ payaḥ śākaṃ navanītaṃ tathā dadhi

surāsavaṃ piṣṭamayaṃ tilapiṣṭāmlakāñjikam
abhiṣyandīni sarvāṇi kāle kāle niṣevate

bhuktvā bhuktvā divā śete visaṃjñā ca vibudhyate
tasya doṣāḥ prakupitā dūraṃ gatvā ca tiṣṭhate

doṣeṇāvṛtamārgāyāstataḥ stanyaṃ ca duṣyate
praduṣṭadoṣasaṃjñaṃ tu yadā pibati dārakaḥ

lavaṇāmlaniṣevitvānmātāputrau rasādiha
āhāradoṣātasyāstu bālasyānannabhojinaḥ

anupraveśādākṣepāduṣṇasattvāvanādapi
jāyate nayanavyādhiḥ śleṣmalohitasaṃbhavaḥ

abhīkṣṇamasraṃ sravate na ca kṣīvati durmanāḥ
nāsikāṃ parimṛdnāti karṇaṃ vāñchati duḥkhitaḥ

lalāṭamakṣikūṭaṃ ca nāsāṃ ca parimardati
netre kaṇḍūyate'bhīkṣṇaṃ pāṇinā cāpyatīva tu

sa prakāśaṃ na sahate aśru cāsya pravartate
vartmani śvayathuścāsya jānīyāttaṃ kukkuṇakam

tasya cikitsitaṃ śreṣṭhaṃ vyākhyāsyāmi yathā tathā
dhātrīṃ tu tasya vāmayedyuktaṃ caiva vipācayet

tasyā vāntaviriktāyā nirduhya ca stanāvubhau
bhojanāni ca sarvāṇi yathāyuktaṃ pradāpayet

pathyaṃ bhuñjīta khādeta viparītaṃ ca varjayet
prayatā śuddhavastrā syādakliṣṭā'malinā tathā

tato vartmani bālasya nirbhujyātha pramṛjya ca
nirmucya rudhiraṃ duṣṭaṃ kuryāddhīro'vasecanam

eraṇḍaṃ rohiṣaṃ caiva tvakkṣīrīṃ varuṇaṃ tathā
niṣkvāthametat kṛtvā ca kumāraṃ pariṣecayet

phaṇijjhakasya patrāṇi surasasya ca pīḍayet
jātiprasannāmaṇḍena yaṣṭīmadhukameva ca

etadāścotanaṃ tasya śāradena jalena tu
tryahametat prayuñjīta dvyahaṃ vā'pi vidhānavit

ne karājasya patrāṇi bilvasyācchavanāṃ tathā
surāgramaṇḍasaṃpiṣṭaṃ śreṣṭhamāścotanaṃ matam

kolānyutkvāthya kalkaṃ vā yaṣṭīmadhukasaṃyutam
netrāmaye mukhālepaḥ kaśyapastatpraśaṃsati

nekarājīṃ ca nīlīṃ ca surasaṃ gaurasarṣapāḥ
haridrāṃ caiva tat sarvaṃ kalkaṃ kurvīta bhāgaśaḥ

etadālepanaṃ kuryādrogaghnaṃ nayanāmaye
vedanāmakṣirogaṃ ca kṣipramavāpakarṣati

haridrātvacamāhṛtya pippalīṃ cātha bhāgaśaḥ
varaprasannayā maṇḍaṃ kuryādañjanavartikām

pillikā copalepaśca netrayostena śāmyati
athāsyāścyotanaṃ kuryāt sauvīrakamanuttamam
prapauṇḍarīkaṃ lodhraṃ ca haridrāṃ śarkarāṃ madhu

pariṣeko bhavecchreṣṭho jalenoṣṇena yojayet
akṣirogeṣu sarveṣu yoga eṣa praśasyate

ācāryānumataṃ śreṣṭhaṃ rātrau cainaṃ prayojayet
āṭarūṣakapatrāṇi madhūkaṃ saindhavaṃ tathā

puṇḍarīkasya patrāṇi tathā nīlotpalāni ca
sukhodakena saṃyuktaḥ pariṣeko hito bhavet

kaphātmake tvabhiṣyande siddhametaṃ narādhipaḥ
amṛtāyāstu niṣkvāthe kuṣṭhaṃ ca guḍameva ca

vinīya piṣṭaṃ toyena pariṣeko'kṣirogiṇām
pariṣekāstu balānāṃ dantajanmani ye mayā

kīrtitāste prayoktavyāḥ paribhūtākṣirogiṣu
gavyena madhunā piṣṭvā śaṅkhena saha saindhavam

saptarātraṃ pralepyaṃ tu tena srautasamañjanam
taṃ piṣṭvā guḍikāṃ kṛtvā chāyāyāṃ pariśoṣayet

puṣye sarvāstu siddhāstā guḍikāḥ patrasannibhāḥ
pṛśniparṇyāstu bhāgau dvāvaṃśumatyāstathā bhavet

trayaścaivorupūgasya bṛhatyā bhāgameva tu
rajasaścāyasaścātha tathā tāmrāyasasya ca

ajākṣīreṇa piṣṭvā tu śoṣayed guṭikāṃ kṛtām
ajānāṃ liṇḍikābhistāḥ śamīpatraiśca dhūpayet

tathaivārdrāśca śuṣkāśca bālānāmakṣirogake
rasāñjanaṃ ca yanmukhyaṃ haridrātvacameva ca

prasannayā'ñjanaṃ tvetat kuryādañjanavartikām
pippalīṃ śṛṅgaberaṃ ca samabhāgāni peṣayet

surāgreṇa tataḥ kuryāt pillikāñjanavartikām
athavā'tibhavennetraśūlaṃ bālasya lakṣayet

stabdhanetraśca dṛśyeta tatremaṃ vidhimācaret
pippalīṃ śṛṅgaberaṃ ca parṇāni surasasya ca

kālamālakaparṇāni tathaiva ca kuṭherakam
taṃ prapiṣya surāgreṇa kuryādañjanavartikām

pillikāmupadehaṃ ca na cirādeva nāśayet
kapitthasyātha bilvasya khadirasya ca peṣayet

ajākṣīrasya pātraṃ ca tataḥ ścyotanamuttamam
kapitthasyā'ṭajīnāṃ ca patrāṇi surasasya ca

ajākṣīreṇa piṣṭāni kuryādāścyotanaṃ bhiṣak
madhukaṃ parvatīyāṃ ca haridrāṃ peṣayet samām

ajākṣīreṇa tat kuryādāścyotanamanuttamam
sarpirmaṇḍaṃ surāgraṃ ca aindrīṃ candanameva ca

salilena prapiṣṭāni kuryādañjanavartikām
padmakaṃ cotpalaṃ caiva madhukaṃ ca prapeṣayet

akṣiroge mukhālepamajākṣīreṇa śarkarām
śṛṅgabero'tha mañjiṣṭhā kārpāsakulakāni ca

salilena prapiṣṭāni mukhālepanamuttamam
triphalāmañjanaṃ caiva tathaiva ca rasāñjanam

madhunā samabhāgāni kuryādāśu rasakriyām
pippalīṃ śṛṅgaberaṃ ca maricāni tathā'ñjanam

triphalāṃ śaṅkhanābhiṃ ca saindhavaṃ tāmrajaṃ rajaḥ
ete bhāgāḥ samāḥ piṣṭāśchāyāyāṃ guḍikāḥ kṛtāḥ

śoṣayitvā vikāreṣu naikajeṣu pradāpayet
timire toyasaṃsṛṣṭā kothake mārkavena tu

rasena piṣṭvā siddhasya drākṣākṣudrodakena tu
guḍikā kokilā nāma cakṣurvyādhiṣu saṃmatā

hitabhojiṣu yoktavyā bāleṣu bhiṣaguttamaiḥ
niryāso naktamālasya ghṛtamaṇḍena sādhitaḥ

stanyakṣīreṇa timire kaṇḍau caiva hito bhavet
suvarṇagairikaṃ lākṣā saindhavaṃ maricāni ca

saśarkaraṃ trikaṭukaṃ guṭikāṃ hyupakalpayet
eṣā lohitikā nāma guḍikā tu smṛtā budhaiḥ

prayoktavyā'kṣisaṃrambhe kṣipraṃ nirvāṇamicchatā
pippalyastriphalā caiva vacā kaṭukarohiṇī

ṣaḍetāḥ samabhāgāḥ syuḥ saptamaṃ tāmrajaṃ rajaḥ
jalapiṣṭā bhavedetāḥ sūryataptāḥ punaḥ punaḥ

guḍikāḥ kārayettā hi chāyāyāṃ pariśoṣayet

rūkṣāṃ ghṛtena piṣṭāṃ dugdhenājena kothake dadyāt
pāśavarasena timire rājiṣu madhukena deyā tu

kothake marmaje sarvā sarvābhiṣyanda eva ca
saindhavena samāyuktā hanyāt kaṇḍūṃ jalānvitā

dvīpiśatrośca patrāṇi niṣkvāthamupahārayet
etena cākṣirogaṃ tu koṣṇena pariṣecayet

saralaṃ madhukaṃ caiva devadāruṃ ca peṣayet
kalkenaitena vadanaṃ vedanāsu pralepayet

rasāñjanaṃ tārkṣyaśilāṃ kṣaudreṇa saha saṃyutām
āścyotanaṃ prayuñjīta netrāvyādhivināśanam

śarkarāṃ śṛṅgaberaṃ ca stanyaṃ gopittameva ca
rasāñjanaṃ samadhukaṃ kuryādāścyotanaṃ bhiṣak

haridrāṃ śaṅkhanābhiṃ ca salilena prapeṣayet
kṣīrasya mātrayā caiva kuryādāścyotanaṃ hitam

haridrāṃ parvatīyāṃ tu sūryatejasi pācayet
tāmrapaṭṭeṣu piṣṭāṃ ca sārasenāvasecayet

śītaṃ ca paripūtaṃ ca stanyena saha saṃyutam
āścyotanaṃ prayuñjīta netravyādhivināśanam

sarpiṣaśca bhavedbhāgaḥ kṣaudreṇa dviguṇaṃ bhavet
tatkāle pralipedbālo netravyādhau pramucyate

haridrāṃ śaṅkhanābhiṃ ca bhadramustaṃ ca kāḍhakam
piṣṭvā vyāghranakhaṃ caiva madhukaṃ caiva bhāgaśaḥ

śirīṣabījaṃ prathamaṃ tābhyāṃ kurvīta pūpikām
tāmrapātre satailāstāḥ sūryatejasi pācitāḥ

dvādaśe'hni nivāte ca nīrajaskāḥ prayatnataḥ
śilāmaye tato bhāṇḍe tailaṃ tāṃ caiva pūpikām

āturāṇyatha netrāṇi tailenānena pūrayet
vyādhimāśu nṛṇāṃ hanti prayogaścet praśasyate

harītakīmāmalakīṃ haridrāṃ girijāmapi
madhukaṃ ca samaṃ sarvaṃ salilena prapeṣayet

etadāścyotanaṃ mukhyaṃ vyādhīnāṃ śamanaṃ hitam
sthavirāṇāṃ śiśūnāṃ ca etadāścyotanaṃ hitam

haridrāśakalīkānāmārdrāṇāṃ karṣamāvapet
tāmrapātre mitaṃ dadyāt sāramasyāḍhakaṃ mitam

daśabhāgāvaśeṣaṃ tu mṛdvagnimupasādhitam
śītaṃ ca paripūtaṃ ca mukhyamāśyotanaṃ hitam

śakalīkamathākṣīṇāṃ dhārayennayanāmaye
grīvāyāmuttamāṅge vā tathā rogāt pramucyate

ālaṅkatakamūlāṇi vāstukasya yavasya ca
āghṛṣya nava eṣāṃ tu mūrdhni kurvīta kaṇṭakān

akṣirogaṃ śirorogaṃ sarvametena śāmyati
balāmatibalāṃ caiva trivṛtāṃ caiva garbhiṇī

savye pāṇipuṭe kṛtvā pīḍayettamapūrvaśaḥ
taṃ rasaṃ kṣaudrasaṃsṛṣṭaṃ kaṇṭhamasyāḥ pralepayet

sapippalīśṛṅgaberāṃ haritālamanaḥśilām
rasāñjana tārkṣyaśilāṃ sumanākorakāṇi ca

saptamo'tra guḍasyāṃśo madhunā saha peṣitaḥ
eṣā kalyāṇikā nāma sarvarogarasakriyā

maricaṃ śṛṅgaberaṃ ca samabhāgāni kārayet
dadhinā'mlena piṣṭvā tu tāmrapaṭṭaṃ pralepayet

saptarātraṃ pralipyaiva tato dadhnā prapeṣayet
vartyo'tha tanukāḥ kāryā dadyāt kautukamañjanam

mṛdupūrvamadoṣaṃ tu mātrāyuktaṃ ca bheṣajam
sādeśyāttatkulīnāṃ ca kuryādbāle bhiṣak kriyām

kaṭukīyā hi kecit syānmadhurīyāstathā'pare
mṛdu tasmai upakrāmyaṃstīkṣṇamapyalpamācaret

iti vāryovidāyedaṃ mahīpāya mahānṛṣiḥ
śaśaṃsa sarvamakhilaṃ bālānāmatha bheṣajam

lodhraṃ sayaṣṭīmadhukaṃ tu piṣṭaṃ
ghṛtena bhṛṣṭaṃ tu nibadhya vastre
kvāthaṃ guḍūcyāḥ parimṛjya tapte
nihanti sarvākṣigatānvikārān

iti ha smāha bhagavān kaśyapaḥ

iti vṛddhakāśyapīyāyāṃ saṃhitāyāṃ kukkuṇakacikitsādhyāyastrayodaśaḥ

atha visarpacikitsitādhyāyaścaturdaśaḥ
athāto vaisarpacikitsitaṃ vyākhyāsyāmaḥ

iti ha smāha bhagavān kaśyapaḥ

kaśyapaṃ bhiṣajāṃ śreṣṭhamādityasamatejasam
hutāgnihotramāsīnamapṛcchad vṛddhajīvakaḥ

bhagavan maṇḍalībhūtaṃ tvagraktaṃ māṃsameva ca
vidahan dṛśyate vyādhirāśīviṣaviṣopamaḥ

duḥsahaḥ sukumārāṇāṃ kumārāṇāṃ viśeṣataḥ
tasya dāruṇarūpasya dīptāgnisamatejasaḥ

samutpatti ca rūpaṃ ca cikitsāṃ ca mahāmune
vaktumarhasi tattvena bālānāṃ hitakāmyayā

iti pṛṣṭaḥ sa śiṣyeṇa provācedaṃ mahāmuniḥ
dakṣakrodhādbhagavato rudrasyāmitatejasaḥ

saṃdaṣṭauṣṭhapuṭasyauṣṭhādyadraktaṃ prāpatad bhuvi
lohitāṅko'bhavattasmādvaisarpaścāgnisannibhaḥ

tasmānnirdāhināvetau bhṛśaṃ pīḍākṛtau nṛṇām
vividhaṃ sarpaṇāddehe vaisarpastu nirucyate

kṣatādbhagnādathotpiṣṭādāmacchedādvidhāraṇāt
dadhyamlamandakasurāśuktasauvīrakasya ca

tilamāṣakulatthānāṃ palāṇḍorlaśunasya ca
grāmyānūpaudakānāṃ ca māṃsānāmatisevanāt

virodhigurvabhiṣyandapūtiparyuṣitāśanāt
divāsvapnādajīrṇācca śākapiṣṭānnasevanāt

viṣopahatavāyvambuvastrapānānnasevanāt
evamādibhirapyanyairduṣṭā vātādayaḥ śiśoḥ

vaisarpaṃ janayantyāśu raktādīn saṃpradūṣya tu
evameva prakupitairdoṣairduṣṭaṃ yadā payaḥ

sevate tasya taddoṣādvaisarpaḥ saṃprajāyate
vātikaḥ paittikaścaiva ślaiṣmiko dvandvajāstrayaḥ

sannipātācca saptaite vaisarpāḥ samudāhṛtāḥ
na vinā raktapittābhyāṃ vaisarpo jātu jāyate

raktāśrayo raktabhavaḥ pittaṃ rakte vyavasthitam
tasmādraktāvaseko'tra bheṣajaṃ paramucyate

balakālavayodoṣadeśadehavyapekṣayā
lakṣaṇānyata ūrdhvaṃ tu pravakṣyāmyanupūrvaśaḥ

hetubhiḥ pūrvamuddiṣṭairyadā prakupito'nilaḥ
raktādīnyabhidūṣyāśu vai ---

vātaraktajvara --- sphoṭāṃścaiṣa na -- yet
ūrdhvādhaḥśuddhadehānāṃ bahirmārgāśrite male
āditaścālpadoṣāṇāṃ kriyāṃ kuryādimāṃ bhiṣak
laṅghayitvā yathākālaṃ kaṣāyaiḥ samupakramet
pradehaiḥ pariṣekaiśca snehairabhyañjanairapi
raktāvasekaiḥ pathyaiśca pānānnauṣadhasevanaiḥ
vātavaisarpiṇaṃ pūrvamanubandhaviśeṣataḥ
purāṇaṃ prapurāṇaṃ vā kaumbhaṃ vā pāyayed ghṛtam
tailaṃ salavaṇaṃ cāsya kṣipramabhyañjane hitam
āranālena surayā balayā vā vipācitam
madhukasya ca kalkena guḍūcyā svarasena ca
tulyakṣīraṃ pacettailaṃ tadasyābhyañjane hitam
balāṃ rāsnāṃ bṛhatyau dve varcīvaṃ sapunarnavam
pāṭalāṃ suṣavīṃ caiva madhukaṃ devadārukam
piṣṭvā vipakvaṃ dadhnā ca tailamabhyañjane hitam
bilvāgnimanthakāśmaryaśyonākairaṇḍapāṭalaiḥ
payasā cāmbunā vā'pi śṛtena pariṣecayet
bhṛṣṭaiḥ payasi nirvātairatasītilasarṣapaiḥ
kṣīrapiṣṭaiḥ pralimpedvā vātavaisarpapīḍitam
suṣavīṃ surabhīṃ rāsnāṃ varcīṃvaṃ sapunarnavam
ekāṣṭhīlāṃ palāśaṃ ca devadāruṃ ca peṣayet
jalenāmlena vā tena snigdhoṣṇena pralepayet
tilvakena trivṛtayā nīlinyā vā pṛthakpṛthak
vipakvaṃ pāyayet sarpiḥ samastairvā virecanam
ābhiḥ kriyābhiḥ praśamaṃ na prayāti yadā'nilaḥ
svabhyaktaṃ svedayedvastrairveśavāreṇa vā punaḥ
uktābhirābhiḥ snigdhābhiḥ pāyasaiḥ kṛsareṇa vā
śuṣkamūlakakalkairvā kalkaiḥ śobhāñjanasya vā
sukhoṣṇaiḥ pradihedenaṃ nātyuṣṇaṃ vā''caredvidhim
svedaiḥ praśānte tvanile prakupyet pittamagnivat
yathā na ca prakupyeta pittaṃ vāyuśca śāmyati
tathā bhiṣak prayuñjīta vātapittaharīṃ kriyām
paittike tiktakaṃ sarpiruktaṃ jvaracikitsite
nirāmaṃ pāyayedvaidyaḥ snigdhaṃ jñātvā virecayet
candanaṃ padmakośīraṃ tathā candanasārivām
mṛdvīkāṃ ca vidārīṃ ca kāśmaryāṇi parūṣakam
vāsāśṛtaṃ pibedetadbaisarpajvaranāśanam
uśīraṃ madhukaṃ drākṣāṃ kāśmaryāṇyutpalāni ca
kaśerukāmikṣugaṇḍaṃ parūpakaphalāni ca
pūrvakalpena peyāni jvaravaisarpaśāntaye
kairātaṃ madhukaṃ lodhraṃ candanaṃ sabibhītakam
padmotpalaṃ nāgapuṣpaṃ nāgaraṃ sadurālabham
niṣkvāthya śītaṃ madhunā peyaṃ vaisarpaśāntaye

paṭolaṃ candanaṃ mūrvā guḍūcīṃ kaṭurohiṇīm
mustāṃ pāṭhāṃ sayaṣṭīkāṃ pūrvakalpena pācayet
vyāghātakaṃ haridre dve kuṭajaṃ kaṭurohiṇīm
guḍūcīṃ madhukaṃ caiva candanaṃ ceti tat pibet
picumandaṃ paṭolaṃ ca dārvīṃ kaṭukarohiṇīm
guḍūcīṃ madhukaṃ caiva candanaṃ ceti tat pibet
picumandaṃ paṭolaṃ ca dārvīṃ kaṭukarohiṇīm
trāyamāṇāṃ sayaṣṭīkāṃ pibedbaisarpaśāntaye
paṭolanimbamustānāṃ candanośīrayorapi
mustakāmalakośīrasārivāṇāmathāpi vā
dadyāt kaṣāyaṃ pānena pittavaisarpaśāntaye
paṭolamustāmalakaśṛtaṃ vā saghṛtaṃ pibet
udumbaratvaṅmadhukaṃ priyaṅgvo nāgakeśaram
padmotpalānāṃ kiñjalkaṃ pradehaḥ saghṛto hitaḥ
aśvatthodumbaraplakṣavaṭavetasajāmbavaiḥ
tvagbhiḥ supiṣṭairālepaḥ śatadhautaghṛtāplutaiḥ
śakubhodumbarāśvatthavaṭalodhratvacaḥ samāḥ
vetasatvak saśālūkā na'--- peṣayet
sahaviṣkaḥ pralepo'yaṃ dāharāganivāraṇaḥ
uśīraṃ candanaṃ caiva śāḍvalaṃ śaṅkhamutpalam
vetasasya ca mūlāni pradehaḥ syāt sataṇḍulaḥ
hrīberaṃ candanośīraṃ mañjiṣṭhāṃ kumudotpalam
śārivāṃ padmakiñjalkaṃ pralepanamanuttamam
vidārīṃ candanośīraṃ tathā candanasārivām
madhukaṃ kṣīraśuklāṃ ca dadyādālepanaṃ bhiṣak
tālīśaṃ padmakośīraṃ mañjiṣṭhāṃ candanadvayam
prapauṇḍarīkaṃ madhukaṃ pralepo dāhanāśanaḥ
muktāśaṅkhapralepaiśca śuktisphāṭikagairikaiḥ
saghṛtaiḥ pradihedenaṃ samastairlābhato'pi vā
kadalīkuśakāśānāṃ tathaiva naḍavetrayoḥ
mūlāni candanośīraṃ padmakarṣabhajīvakam
kumudotpalapatrāṇi mūrvāsaugandhikāni ca
mṛṇālaviśaśālūkatṛṇaśolekṣuvālikāḥ
prapauṇḍarīkaṃ madhukaṃ tālīśaṃ sakaśerukam
ikṣuvetasamūlāni sānantāḥ kṣīriṇāṃ tvacaḥ
śatāvarīṃ samañjiṣṭhāṃ kumbhīkāmiti saṃharet
saṃkṣodyaitāni matimān vāsayet salile niśi
rasaṃ tamatha nisrāvya pariṣekaṃ tu dāpayet
ghṛtaṃ vā vipacedebhirmrakṣaṇaṃ payasā saha
etenaiva kaṣāyeṇa payastulyaṃ pacedbhiṣak
caturbhāgāvaśiṣṭaṃ ca khajenābhipramanthayet
tatrotthitaṃ ghṛtaṃ bhūyaḥ payasā'ṣṭaguṇena tu
kalkaiḥ payasyāmadhukacandanānāṃ vipācitam
abhyaṅge bhojane pāne dadyādvaisarpanāśanam
ghṛtena pariṣakta --- ntara /
yaṣṭīmadhukatoyena kṣīreṇekṣurasena vā
vaṭādivalkatoyena śītena pariṣecayet
pradihedvā vaṭādīnāṃ kalkena saghṛtena tu
tathā sahasradhautena śatadhautena vā punaḥ
sarpiṣā pradihedenaṃ dāhe kṣīrotthitena vā
sadāharāmapāke tu śvayathau viprasarpati
antarviśuddhadehānāṃ jalaukābhiharedasṛk
niḥsrāvya duṣṭaṃ rudhiraṃ kuryādraktaprasādanam
saghṛtaiḥ kṣīriṇāṃ kalkairyathoktaiḥ śītalairapi
āditaḥ śleṣmavaisarpe vamanaṃ saṃprakalpayet
laṅghanaṃ vā'lpadoṣāṇāṃ tataḥ kuryādimāṃ kriyām
mustāṃ pāṭhāṃ haridre dve kuṣṭhaṃ tejovatīṃ vacām
śārṅgiṣṭhāṃ triphalāṃ mūrvāmagniṃ haimavatīmapi
vatsakātiviṣe caiva tathā kaṭukarohiṇīm
niṣkvāthya pāyayedenaṃ piṣṭaistaiśca pralepayet
āragvadhaṃ somavalkaṃ kuṭajātiviṣe ghanam
pāṭhāṃ mūrvāṃ saśārṅgiṣṭhāṃ kuṣṭhaṃ ca vipacedbhiṣak
tatkaṣāyaṃ pibet kāle supiṣṭaistaiśca lepayet
tenāsya kaṇḍūḥ koṭhāni śophaścāśu praśāmyati
śṛtaṃ vā'pyamṛtāśuṇṭhīparpaṭaiḥ sadurālabhaiḥ
pibet kaṣāyaṃ madhunā vaisarpajvarapīḍitaḥ
triphalośīramustāni eraṇḍaṃ devadāru ca
niṣkvāthya pariṣektavyo nimbapatrodakena vā
śigrutvaksurasāsphoṭakālamālaphaṇijjhakaiḥ
sāṭarūṣaiḥ śṛtaṃ toyaṃ pradadyāt pariṣecanam
khadirodakaseko vā gomūtreṇāthavā hitaḥ
gṛhadhūmaṃ haridre dve mālatīpallavāni ca
viḍaṅgaṃ dve haridre ca pippalyastalalaṇḍikā
mustā'mṛtā haridre dve paṭolāriṣṭapallavāḥ
kuṭajātiviṣe mustaṃ kuṣṭhaṃ ceti prapeṣayet
āgāradhūmaṃ rajanīṃ saindhavaṃ ca pralepanam
ślokārdhavihitā hyete yogāḥ svalpaghṛtāyutāḥ
pradehārthe prayoktavyāḥ śophakaṇḍūrujāpahāḥ
saptaparṇaṃ sakhadiraṃ mustamāragvadhatvacam
kuraṇṭakaṃ devadāru pralepanamanuttamam
palāśabhasma caikāṅgaṃ lepo gomūtrasaṃyutaḥ
sakṣāraṃ sārṣapaṃ tailamathavā'pi sasaindhavam
abhyaṅgārthe prayoktavyaṃ tailaṃ kārañjameva vā
kuṣṭhasaindhavacūrṇaṃ vā tailāktasyāvagharṣaṇam
svarjikātiviṣe mustaṃ tvagelelvārthavatsakaiḥ
śatāhvāgarukuṣṭhaiśca piṣṭaistailaṃ vipācayet
tadasyābhyañjane yojyaṃ kaṇḍūkoṭhārunāśanam
śigrumūlamahiṃsrāṃ ca piṣṭvā sarpirvipācayet
tenāsyābhyañjayedgātraṃ kuṣṭhatailena vā punaḥ
etena vidhinā vyādhiryadi naivopaśāmyati
kaṇḍūmadbhiḥ sadāhaiśca maṇḍalairvidahedapi
tato virecanaṃ dadyādraktaṃ cāsyāvasecayet
vinirhṛte duṣṭarakte kuryādraktaprasādanam
saghṛtaistriphalākalkairmadhukodumbarānvitaiḥ
iti vātādijānāṃ te vaisarpāṇāṃ cikitsitam
samāsavyāsayogaiśca pṛthaktvena ca kīrtitam
etadeva ca saṃsṛṣṭaṃ saṃsṛṣṭeṣu prayojayet
yavānnaṃ śālayo mudgā masūrāḥ sahareṇavaḥ
bhojanārthe purāṇāḥ syurjāṅgalāśca mṛgādvijāḥ
masūrikāḥ savisphoṭāḥ kakṣyāṃ pāmāṃ tathaiva ca
saṃsṛṣṭapittaraktotthā vaisarpavadupakramet
iti ha smāha bhagavān kaśyapaḥ
iti uttareṣu khilasthāne bhārgavīyāyāṃ saṃhitāyāṃ vaisarpacikitsādhyāyaścaturdaśaḥ

atha carmadalacikitsitādhyāyaḥ pañcadaśaḥ
athātaścarmadalacikitsitaṃ nāmādhyāyaṃ vyākhyāsyāmaḥ

iti ha smāha bhagavān kaśyapaḥ

atha khalu bhagavantamṛṣigaṇaparivṛtaṃ brāhmā śriyā dedīpyamānamṛṣiśreṣṭhaṃ kaśyapamabhivāṃdya papraccha bhārgavaḥ--bhagavan ka eṣacarmadalo nāma vyādhirvisarpamāṇo'gnidagdhopamarūpo'tyābādhakaro bālānāmaṅgeṣūpapadyate kathaṃ cotpadyate kṣīrapāṇāṃ kumārāṇāṃ kṣīrānnādānāṃ tu navā'nnādavayaḥsthānām atra ko hetuḥ kimātmakaḥ katividhaḥ kāni cāsya
lakṣaṇāni upadravāśca ke ityevaṃ vyākhyātumarhasīti

atha bhagavānabravīdvatsa śrūyatāmiha khalu kṣīrapāṇāṃ kumārāṇāṃ stanyadoṣeṇa kṣīrānnādānāṃ stanyadoṣeṇāhāradoṣeṇa ca sukumārāṇāmasthiradhātūnāṃ bālānāṃ garbhaśayyocitamṛduśarīrāṇāṃ vastrāṅkādhāraṇoṣṇānilātapasvedopanāhasvamalamūtrapurīṣasaṃspaśāśaucapāṇipīḍanā'tī-vodvartanakulapravṛttyādibhirupāyairmukhagalahastapādavṛṣaṇāntarakaṭyaṅga
sandhiṣu cotpadyate

nacānnādavayaḥsthānāmiti kiṃ kāraṇaṃ sthirakaṭhinasaṃhatatvagasthidhātūnāṃ tathā nityavyāyāmopacitagātrāṇāṃ kleśaṃ sahatāṃ na bhavatyeṣa
vyādhiriti

vāyubhūyiṣṭhatvādvāyvātmakamevodāharanti / carmadalamiti carmāvadāraṇāt / sa caturvidho--vātikaḥ ślaiṣmikaḥ sānnipātika iti

tatra yā bālasya mātā vā dhātrī vā rūkṣasamudācārāhārodāvartanopavasanaśīlā tathā'ticaṅkramaṇavyāyāmakleśānatyarthamupasevate tasyā vāyuḥ prakupitaḥ stanyaṃ dūṣayati / tasya lakṣaṇam -- udake prakṣiptaṃ plavate vicchidyate chatrāyate śyāvāvabhāsaṃ rasena tiktakaṣāyaṃ virasaṃ ceti / tat pibato jantorimāni rūpāṇi bhavanti--sakaṇḍūsphuṭitaparuṣaśyāvāvabhāsānyaṅge maṇḍalāni piplutaṃ tanu vivarṇamatisāryate pravepakamukhaśoṣaromaharṣānvitaśca vātacarmadalaḥ

yadā tu dhātrī krodhasaṃtāpoṣṇāmlalavaṇakaṭukavidagdhādhyaśanavivaśānupasevate tasyāḥ pittaṃ prakupitaṃ vāyunā vikṣipyamāṇaṃ stanyavahābhiḥ sirābhiranusṛtya stanyaṃ dūṣayati / tasya lakṣaṇāni--udake prakṣiptaṃ haritaraktāsitāvabhāsaṃ bhavatyatha rasena kaṭvamlalavaṇatiktaṃ sparśenoṣṇamiti / tat pibato jantorimāni rūpāṇi bhavanti--raktanīlāvabhāsāni śyāvapītābhāni śuṣkacchavīnyuṣṇāni kuthitadoṣapūrṇāni maṇḍalānyutpadyante'sya visarpīṇitvaṅmāṃsadāraṇāni prabhinnāni padmapatraprakāśānyagnidagdhopamāni bhavanti / ato'tisāryate haritapītagudapākakaramabhīkṣṇaṃ dāhamukhaśoṣacchardiyacca vadanānvitaśca pittacarmadalaḥ

atha yā dhātrī gurvamlalavaṇamadhurābhiṣyandidivāsvapnālasyāhitāni cātyarthamupasevate tasyāḥ prakupitaḥ śleṣmā vāyunā samudīryamāṇaḥ stanyamabhidūṣayati / tasya lakṣaṇaṃ--jale niṣīdatyadhastādrūpeṇa sāndraṃ snehabahalaṃ sparśena śītapicchilaṃ rasena madhuramiti / tat pibato jantorimāni rūpāṇi bhavanti--śītastimitasnigdhasāndrairmaṇḍalaiḥ śvetābhairbahubhirnātyarthavedanākaraiḥ sarṣapamātrībhiḥ piḍakābhirupacitaiścirapākibhiḥ sakaṇḍūtodayutairupacīyate tato'sya pratiśyāyārocakāṅgagauravakāsapākā utpadyante bahulaṃ picchilaṃ cā'nubaddhamatisāryate niṣṭanati śleṣmāṇaṃ chardayati tandrābhibhūtaḥ śvetatālvoṣṭhaśca bhavatīti
śleṣmacarmadalaḥ

tadā tu tridoṣasaṃsṛṣṭaṃ kṣīramanupibati tadā'syāṅge maṇḍalāni prādurbhavanti kṛṣṇaraktāvabhāsāni dagdhaguḍaprakāśāni vā tribhirguṇairanvitāni kṣiprapākīni vigandhīnyavadīrṇāni pūtikuṇapavisrāvīṇi ceti / taiḥ sa sarvāvanaddhāṅgo niṣṭanatyaniśaṃ kṛcchreṇa roditi stanaṃ nābhinandati kṛṣṇamaruṇavarṇāvabhāsaṃ cā'tisāryate / so'sādhyaḥ sannipātātmaka
iti

charditṛṣṇājvarādhmānaśvayathuhikkāśvāsasvarabhedopadravānvitaśca pratyākhyeyaḥ

bhavanti cātra ślokāḥ--
nopakramedasādhyaṃ tu sādhyaṃ yatnena sādhayet
yat paśyed dvandvajaṃ rūpe pākaṃ vā rūpato'dhikam

tasya tasya viditvā tu kriyāṃ samyak prayojayet
yenopakramyamāṇo'pi śāntiṃ naiti punaḥ punaḥ

tenaivotpātarogo'yaṃ na viśvāsyaḥ kathañjana
tasmāt samyagupakramyo yathā vakṣye cikitsitam

tatrāditaścaiva dhātrīṃ snehābhyaṅgasvedopapannāṃ nīlikācūrṇayutaṃ sarpiḥ pāyayet trivṛccūrṇaghṛtaṃ vā / tataḥ saṃsargopapāditālaghusnigdhairyūṣairdrāḍimasaindhavayutairmṛdumodanamaśnīyānnivātaśayanāsanaparā / vyāyāmājīrṇamathunaṃ ca nānucaret / vidārigandhairaṇḍabṛhatīgokṣurakapunarnavāpṛśniparṇya iti kaṣāyamenāṃ pāyayet stanyaśodhanārthaṃ dvipañcamūlakaṣāyaṃ vā / rāsnā sugandhā nākulīti kalkaḥ stanālepaḥ tathā'jagandhā'valgujakabṛhatīkaṇṭakārikāyutaḥ pradehaḥ śatāhvāmadhukājagandhākāśmaryabṛhatīkaṇṭakārikābalāpīluguḍūcīkalko vā bhadramustātvaggarukalko vā purāṇasarpistilakalko veti / athorupūgapalāśapāṭalirāsnākvāthaḥ pariṣekaḥ payasā vā sukhoṣṇena ceti / devadārurāsnābarhiṇamajjeti tailaṃ vipakvamabhyañjanīyaṃ bilvadevadārucūtamuktiphalavipakvaṃ vā dvibalābilvamūlasuradārvāmrapeśikā vipakvaṃ veti vātacarmadalacikitsitamuktam

atha paittike vakṣyāmaḥ / tadyathā--dhātrīṃ snehābhyaṅgopapannāṃ vamanavirecanenopakramet nimbodakapippalīkalkena vāmayet pippalīlavaṇayuktena vā doṣanirharaṇārthaṃ mṛdvīkekṣurasābhayādibhirvirecayenmṛdvīkāmalakasaṃyogena vā āragvadhaphalamajjakaṣāyasaṃyuktena vā kṣīreṇeti yathābalaṃ vīkṣya / saṃsargaṃ kārayedyavāgvā yūṣakṛtākṛtavidhānena vā / kāśmaryamadhukaparūṣakaśītapākya iti kṛtvā suśītaṃ śarkarāmadhulikhitaṃ kaṣāyaṃ pāyayet stanyaśodhanārthaṃ payasyāsārivāmṛtāmadhūkamṛdvīkānāṃ kaṣāyaṃ śarkarāyutaṃ ceti / prapauṇḍarīkasārivośīracandanakalkaḥ stanālepaḥ madhukakṣīraśuklācandanarasāñjanatuṅgayutaḥ pradehaḥ yaṣṭīmadhukacandanakalko vā madhukacandanabhadramustāmañjiṣṭhārasāñjanakalko vā rasāñjanasārivāmadhukacandanośīrakalko vā kakubhodumbarāśvatthavaṭanalamūlaśālūkavañjulakalko vā ghṛtayutaḥ viśamṛṇālapadmakamañjiṣṭhāpadmarasāñjanakalko veti / madhukamadhuparṇī veḍavetasaśatāvarīnalamūlakadalīkuśakāśapadmotpalekṣuvidārīvaṭodumbaratvagjambū-kumbhīkā madhurā cetyetāni jalāḍhake paktvā caturbhāgāvaśeṣe ghṛtaprasthaṃ pācayet kaṣāyadviguṇakṣīreṇa sagarbhaḥ syānmañjiṣṭhāvitūrṇakapayasyādhātakyuśīra candanakṣīrakākolīprapauṇḍarīkakṣīraśuklātālīsamṛdvīketi supiṣṭaṃ vidadhyādetena siddhenābhyajya tato'vacūrṇayellodhramadhukadāruharidrāmalakītvakpatracūrṇenaitenetyevam asmājjvaradāharāgapākavraṇādayaścopaśāmyantīti pittacarmada lacikitsitamuttamam

ata ūrdhvaṃ ślaiṣmike vakṣyāmaḥ--atha dhātrīṃ pūrveṇa vidhinopacārya nimbakaṣāyamadanaphalasiddhāṃ vyaktalavaṇāṃ yavāgūṃ pāyayenmadanaphalatilapiṣṭataṇḍulasiddhāṃ vā vamanavidhānena sukhasalavaṇasnigdhāyāḥ śleṣmoddharaṇārthaṃ ca pippalyuṣṇodakaṃ pītvā cchardayet kṛtavamanāyāḥ śirovirecanaṃ vidadhyānmudgasatīnavetrāgrapaṭolanimbamustakānāmanyatamaparigṛhītena yūṣeṇa mṛdumodanaṃ bhojayet / kuṭajaphalamustāpriyaṅguśārṅgiṣṭhāpāṭhālodhraguḍūcīmūrvetyakṣamātrāṇi yathālābhaṃ sukhoṣṇodakenānupibet pāṭhāśṛṅgaberakalkaṃ vā kuṭajaphalapāṭhākalkaṃ vā kirātatiktakamustācūrṇaṃ vā madhunā lihet / bhadramustāriṣṭapaṭolamūrvādāruharidrātriphalāsaptaparṇatvagityetaiḥ kaṣāyamāsutaṃ madhunā pākavyapadeśataścopayojayet mustakamālatīpatrakalkena stanāvālepayet / atha virecanaṃ trivṛttriphaloṣṇodakalavaṇasaṃyuktamupayojya yūṣaścāhāravidhiḥ / kuṭajāriṣṭāragvadhamadanasvādukaṇṭakamustakanaktamālayutaḥ pradehaḥ kuṣṭaśukanāsārohiṇīmustakakirātatiktātiviṣāyuto vā surasaśigrumustākālamālakaviḍaṅgahiṅguparṇīti vā triphalādāruharidrākalko vā haridrārasāñjanakalko veti / bhadramustośīrāphoṭāṭarūṣakaharidrākarañjasumanāriṣṭasiddhaṃ tailamabhyañjanīyamiti

bhavati cātra ślokaḥ
eṣā carmadalotpattirvyākhyātā varṇarūpataḥ
sādhyāsādhyavidhānaiśca pratīkāryo yathākramam

iti ha smāha bhagavān kaśyapaḥ
iti khileṣu carmadalacikitsādhyāyaḥ pañcadaśaḥ

athāmlapittacikitsitādhyāyaḥ ṣoḍaśaḥ
athāto'mlapittacikitsitaṃ vyākhyāsyāmaḥ

iti ha smāha bhagavān kaśyapaḥ

viruddhādhyaśanājīrṇādāme cāme ca pūraṇāt
piṣṭānnānāmapakvānāṃ madyānāṃ gorasasya ca

gurvaviṣyandibhojyānāṃ vegānāṃ dhāraṇasya ca
atyuṣṇasnigdharūkṣāmladravāṇāmatisevanāt

phāṇitekṣuvikārāṇāṃ kulatthānāṃ ca śīlanāt
bhṛṣṭadhānyapulākānāṃ pṛthukānāṃ tathaiva ca

bhuktvā bhuktvā divāsvapnādatisnānāvagāhanāt
antarodakapānācca bhuktaparyuṣitāśanāt

vātādayaḥ prakupyanti teṣāmanyatamo yadā
mandīkaroti kāyāgnimagnau mārdavamāgate

etānyeva tathā bhūyaḥ sevamānasya durmateḥ
yatkiñcidaśitaṃ pītaṃ dehinastaddhi dahyati

vidagdhaṃ śuktatāṃ yāti śuktamāmāśaye sthitam
tadamlapittamityāhurbhūyiṣṭhaṃ pittadūṣaṇāt

jantoryadanubadhnāti laulyādaniyatātmanaḥ
aviśuṣke yathā kṣīraṃ prakṣiptaṃ dadhibhājane

kṣipramevāmlatāmeti kūrcībhāvaṃ ca gacchati
rasadhātau tathā vyamle bhuktaṃ muktaṃ vidahyate

avyāpanne tvadhiṣṭhāne jāgrataḥ svapato'pi vā
preryamāṇaḥ samānena praśvāsocchvāsayogataḥ

dhamyamāna udānena samyak pacati pācakaḥ
ityuddiṣṭaṃ samutthānaṃ liṅgaṃ vakṣyāmyataḥ param

viḍbhedo gurukoṣṭhatvamamlotkleśaḥ śirorujā
hṛcchūlamudarādhmānamaṅgasādo'ntrakūjanam

kaṇṭhorasī vidahyete romaharṣaśca jāyate
sāmānyalakṣaṇaṃ tvetadviśeṣaścopadekṣyate

vātācchūlāṅgasādau ca jṛmbhā snigdhopaśāyitā
pittādbhramo vidāhaśca svāduśītopaśāyitā

kaphād gurutvaṃ chardiśca syādrūkṣoṣṇopaśāyitā

vyādhirāmāśayottho'yaṃ kaphapitte tadāśraye
tasmādādita evāsya mūlacchedāya buddhimān

akṣīṇabalamāṃsasya vamanaṃ saṃprakalpayet
nānyo mānyaḥ kramo hyasya śāntaye vamanādṛte

mūlacchedādiva taroḥ skandhaśākhāviparyaye
doṣaśeṣaśca vāntasya yaḥ syāttadanubandhakṛt

tasyopaśamanaṃ kuryāllaṅghanairlaghubhojanaiḥ
sātmyakālopapannaiśca yogaiḥ śamanapācanaiḥ

doṣotkleśe na sahasā dravamauṣadhamācaret
vamanīyādṛte taddhi na samyak paripacyate

ceṣṭāhāraviśeṣeṇa kiñcit pariṇate tataḥ
pītaṃ tu kurute yasmācchamapācanabhedanam

nāgarātiviṣe mustā nāgarātiviṣe'bhayā
trāyamāṇā paṭolasya patraṃ kaṭukarohiṇī

trayastrikārṣikā hyete pātavyā doṣadarśanāt
kirātatiktakvātho vā rohiṇyā vā'tha kevalaḥ

saṃsargahṛtadoṣasya viśuddhāmāśayasya ca
yatenāgnisamādhāne prayateta vicakṣaṇaḥ

yathā gomayacūrṇādyaiḥ sūkṣmaiḥ sandhuttito'nalaḥ
krameṇāpyāyitabalo dahatyārdramapīndhanam

tathā viśuddhadehānāṃ kāyāgniḥ samudīritaḥ
pācayatyannapānāni sāravantyapi dehinām

samyakpariṇateṣveṣu na syurāmānvayā gadāḥ
jāyate ca tadotsāhastuṣṭiḥ puṣṭirvapurbalam

tataḥ kramaviśeṣeṇa jātaprāṇasya dehinaḥ
pakvāśayagatān doṣān sraṃsanena vinirharet

lavaṇāmbunā sukhoṣṇena kṣīreṇekṣurasena vā
madhūdakena tiktairvā vamanaṃ saṃprakalpayet

triphalā trāyamāṇā ca kaṭukā rohiṇī trivṛt
pañcaiṣāmardhapalikāstrivṛtā tvardhabhāgikā

pītvā virecanaṃ hyetadamlapittādvimucyate
paṭolapatraṃ triphalātvacaścārdhapalonmitāḥ

trāyantīrohiṇīnimbayaṣṭikāḥ karṣasaṃmitāḥ
paladvayaṃ masūrāṇāṃ caikadhyaṃ tadvipācayet

jalāḍhake'ṣṭabhāgaṃ tu pūtaśeṣaṃ punaḥ pacet
sarpiṣaḥ kuḍavaṃ dattvā prasthārdhamavaśeṣitam

tat pītvā nātiśītoṣṇaṃ sukhenāśu viricyate
ciraprasaktamapyetadamlapittaṃ vyapohati

vātapittaṃ jvaraṃ kuṣṭhaṃ vaisarpaṃ vātaśoṇitam
vidradhi raktagulmaṃ ca visphoṭāṃścāśu nāśayet

purāṇāḥ śālayo mudgā masūrāḥ sahareṇavaḥ
gavyaṃ sarpiḥ payo vā'pi jāṅgalāśca mṛgadvijāḥ

kalāyaśākaṃ pautīkaṃ vāsāpuṣpaṃ savāstukam
yāni cānyāni śākāni tiktāni ca laghūni ca

bhojanenā'tiśasyante yaccānyadavidāhi ca
tatsātmyānāṃ prayogāṇāṃ yathoktānāṃ ca śīlanam

laśunasya harītakyāḥ pippalyāḥ sarpiṣastathā
madirāyāśca jīrṇāyāḥ kālāgnibalavṛddhaye

vyādherasya yathoktānāṃ nidānānāṃ ca varjanam
yuktāhāravihārasya yuktavyāyāmasevinaḥ

śuktako'yamalolasya śāmyatyātmavataḥ sataḥ
yaśca yasyānubandhaḥ syāddoṣastasyopaśāntaye

prayateta bhiṣaṅ nityaṃ tacchāntau sa praśāmyati
ānūpadeśe prāyeṇa saṃbhavatyeṣa dehinām

tasmājjāṅgalajairenamauṣadhaiḥ samupakramet
apraśāmyati caitasminnapi deśāntaraṃ vrajet

sa eva deśo yatra syādārogyaṃ te ca bāndhavāḥ
gacchanti ye na gacchanti ye cāsya hitakāriṇaḥ

nityālolasya dīnasya paridūnasya dehinaḥ
kriyāḥ sarvāḥ prahīyante svajano vijanībhavet

tasmāt satatamārogye prayateta vicakṣaṇaḥ
arogo jīvitaphalaṃ sukhaṃ samadhigacchati

jvarātīsārapāṇḍutvaśūlaśothārucibhramaiḥ
upadravairimairjuṣṭaḥ kṣīṇadhāturna siddhyati

iti ha smāha bhagavān kaśyapaḥ
iti khileṣvamlapittacikitsādhyāyaḥ ṣoḍaśaḥ

atha śothacikitsādhyāyaḥ saptadaśaḥ
athātaḥ śothacikitsitaṃ nāmādhyāyaṃ vyākhyāsyāmaḥ
iti ha smāha bhagavān kaśyapaḥ

vāntasyātha viriktasya karśitasya jvarādibhiḥ
mahopavāsakliṣṭasya viruddhājīrṇabhojinaḥ

sadyaścātyarthalavaṇakṣāroṣṇāmlakaṭūn rasān
śūkarorabhramāṃsādi dadhimṛdbhakṣaṇādi ca

śītapravātavyāyāmavyavāyāṃścātisevataḥ
tathaiva duṣprajātāyā nāryāḥ kṛcchreṇa vā punaḥ

sūtāyā niḥsrutāyāśca dviṣantyāḥ svamupakramam
etadeva nidānaṃ ca śīlayantyāstatastayoḥ

śothaḥ saṃjāyate śīghraṃ dāruṇaḥ sa caturvidhaḥ
vātikaḥ paittikaścaiva ślaiṣmikaḥ sānnipātikaḥ

āgantuḥ kṣataniṣpiṣṭacyutamagnādisaṃbhavaḥ
daṣṭāvamūtritāghrātasaṃsparśagarayogajaḥ

prakopahetuḥ sarveṣāṃ sāmānyenaiva kīrtitaḥ
pūrvaṃ jvaranidāne tu proktaḥ pratyekaśo mayā

yathāvadeṣāṃ rūpāṇi saṃpravakṣyāmyataḥ param
aparāhṇe dhruvā vṛddhiḥ śvayathoranilātmanaḥ

pūrvāhṇe ślaiṣmikasya syānmadhyāhne paittikasya tu
pūrvāmadhyāpare yāme hrāsaścaiṣāṃ yathākramam

śyāvavarṇaḥ savarṇo vā kṣiprotthānanivartanaḥ
pipīlikākīrṇa iva tāmyate paritudyate

viṣamajvarajuṣṭasya cirāccaiva vidahyate
bhinnaromā calo'ṅgulyā nimno bhavati pīḍitaḥ

sirāsnāyutvagāyāmairadhaḥkāye ca vardhate
snigdhoṣṇopaśayī rūkṣaḥ śvayathurvātasaṃbhavaḥ

nīlalohitapītābhaḥ pīḍyate dhūpyate muhuḥ
kṣiprapākī saviḍbhedastṛṣṇādāhajvarānvitaḥ

nābhyāṃ ca bastimūle ca vṛddhiścāsya viśeṣataḥ
nityaṃ ca rocate śītaṃ śvayathuḥ pittasaṃbhavaḥ

sthiraḥ śīto'tibahalaḥ ślakṣṇaḥ pāṇḍuravedanaḥ
sotkleśārocakasvāpakaṇḍūkāṭhinyagauravaḥ

cirād vṛddhimavāpnoti cirācca vinivartate
urogaṇḍākṣikūṭeṣu vṛddhiścāsya viśeṣataḥ

śītajvarakaraḥ śītadveṣī śophaḥ kaphātmakaḥ
nīlapītāruṇābhāsaḥ sirājālopasantataḥ

anekopadravasrāvaḥ sarvarūpasamanvitaḥ
sutīvravedano'sādhyaḥ śvayathuḥ sānnipātikaḥ

raktaśyāvāruṇo'tyuṣṇastodabhedarujānvitaḥ
āgantuḥ saviṣastāmriḥ kṛṣṇo vāśu visarpitaḥ

hṛllāsārucitṛṇmūrchājvarārucikaro bhṛśam
iti ṣaḍvidhamuddiṣṭaṃ śvayathorlakṣaṇaṃ mayā

nṛṇāṃ tu pādaprabhavaḥ strīṇāṃ ca mukhasaṃbhavaḥ
ubhayoryaśca guhyasthaḥ sarvagaśca na siddhyati

mārutaḥ sarvaśophānāṃ mūlaheturudāhṛtaḥ
yathā ca pittaṃ dāhasya śaityasya ca yathā kaphaḥ

tvagraktamāṃsamedāṃsi śotho'dhiṣṭhāya vardhate
tadasyāśu kriyāṃ kuryāddāruṇasya yatthottaram

kaphapittottare śophe kṣāmadehasya dehinaḥ
vamanādyāṃ kriyāṃ kuryāttadyuktamanilottare

śālyannamudgamaṇḍena śothī bhuñjīta mātrayā
sabālamūlakavyoṣapippalīkena vā''ditaḥ

laghvāmāśayakoṣṭhasya pañcagavyena sarpiṣā
kalyāṇakena tiktena daśamūlādikena vā

snigdhasvinnasya vamanaṃ vidadhyācca virecanam
tato daśāhān so'śnīyāt payasā vā'pyabhojanam

tato yavānnaṃ takreṇa śīlayecca yathābalam
pañcamuṣṭikayūṣeṇa jāṅgalānāṃ rasena vā

dradhimadyasurāsnehaśākapiṣṭāmlasevanam
asātmyāni nidānaṃ ca varjayet pathyamācaret

saguḍaṃ śṛṅgaberaṃ ca bhakṣayet prātarutthitaḥ
harītakīṃ guḍayutāṃ trisamāṃ vā'bhyaset sadā

pippalīvardhamānaṃ vā pippalyo madhukena vā
devardāvabhayāśuṇṭhīcūrṇakalkamathāpi vā

pibettrayāṇāmeteṣāṃ kvāthaṃ ca sapunarnavam
mahauṣadhaṃ citrakaṃ vā pippalyo devadāru vā

takreṇa payasā vā'tha sevamānaḥ sukhī bhavet
citrāmūlāgnikaśyāmātrivyoṣairvā śṛtaṃ payaḥ

mahauṣadhaṃ devadārukalkaṃ vā payasā pibet
gandharvahastaṃ trivyoṣaṃ śyāmāmūlaṃ ca pañcamam

kṣīrasiddhaṃ pibedetadyasya syācchvayathurmahān
gomūtraṃ mahiṣīmūtramuṣṭramūtramatho pibet

yathāsvaṃ kṣīramiśraṃ vā śīlayecchophaśāntaye
sarpiḥ punarnavākvāthe kalkairebhirvipācayet

vyoṣamustā --- dine dine
sarveṣāmeva śothānāṃ prayogo'yaṃ vidhīyate

ayorajastrikaṭukaṃ trivṛtā kaṭurohiṇī
triphalāyā rasenaitat pītvā cūrṇaṃ sukhī bhavet

triphalā trivṛtā dantī viḍaṅgaṃ gajapippalī
trivyoṣaṃ rohiṇī dāru citrakaṃ ceti cūrṇayet

ayorajastad dviguṇaṃ kṣīreṇābhyasya mucyate
trivyoṣatriphalāmustāviḍaṅgacitrakāḥ samāḥ

navaite sudhṛtā bhāgā navāyorajasastathā
taccūrṇaṃ madhunā līḍhvā bhuñjīta yavaṣaṣṭikam

śuṣkamūlakayūṣeṇa mustāktapayasā'pi vā
bhallātakaṃ trivṛddantī trivyoṣaṃ triphalā'gnikaḥ

tilā guḍā viḍaṅgaṃ ca madhu sarpirayorajaḥ
nāmnā kaṭukabindurhi lehaḥ śothapramardanaḥ

sāmānyenaitadākhyātaṃ pṛthaktvena nibodha me
tatrāditaḥ pravakṣyāmi vātikasya bhiṣagjitam

kulatthayavakolānāmubhayoḥ pañcamūlayoḥ
niryūhe sādhitaṃ tailaṃ kalkairetaiḥ samāṃśikaiḥ

śatāvarīkṛṣṇagandhāyaṣṭīmadhukajīvanaiḥ
sakṣīraistat pibet kāle kuryādabhyañjanaṃ ca tat

śatāhvāṃ madhukaṃ dāru saśvetāṃ ca gavādanīm
vatsādanīṃ ca piṣṭvā taiḥ sukhoṣṇaiḥ śothamādihet

varcīvaṃ bilvameraṇḍaṃ tarkārīṃ sapunarnavām
niṣkvāthya vāriṇoṣṇena śvayathuṃ pariṣecayet

tilānāṃ sarṣapāṇāṃ ca godhūmasya yavasya ca
cūrṇānāṃ tailamiśrāṇāmupanāhaṃ vidhāpayet

tathaivairaṇḍabījānāṃ bhṛṣṭānāṃ vopanāhanam
eraṇḍo bilvamūlaṃ ca bṛhatī kaṇṭakārikā

karañjaściribilvaśca śvadaṃṣṭrā ca samāṃśikā
lepo'yaṃ sarpiṣā yukto vātaśvayathunāśanaḥ

eṣa eva yathālābhaṃ pariṣekaḥ sukhāvahaḥ
śārivā mūlakaṃ śuṣkaṃ śukanāsā mahauṣadham

kuṣṭhaṃ mustā jalaṃ lambā pralepaḥ śophanāśanaḥ
śvadaṃṣṭrairaṇḍamūlaṃ ca bilvamūlaṃ mahauṣadham

purāṇamūlakaṃ caiṣāṃ kvāthe kṣīraṃ vipācayet
kṣīrāvaśeṣamāhṛtya kāle saghṛtaśarkaram

yathāgni pācayedenaṃ vātaśvayathunāśanam
eraṇḍatailaṃ payasā gavāṃ mūtreṇa vā pibet

tenāsya doṣaśeṣaśca śvayathuśca nivartate
laghūnyannāni bhuñjīta snigdhoṣṇasahitāni ca

atha pittasamutthasya pravakṣyāmi cikitsitam
abhayā''malakīdantītrikarmamadhucandanaiḥ

saṃjīvanīyamañjiṣṭhairmadhūkakusumaiḥ samaiḥ
sakṣīraiḥ pācitaṃ sarpiḥ śophasyābhyañjanaṃ param

pānaṃ caitat pradātavyaṃ śopharoganivāraṇam
jīvakarṣabhakāvaindrī madhuparṇī śatāvarī

muditā vetasaṃ caiva pralepaḥ sarasāñjanaḥ
tālīśośīramuditācandanaṃ sarasāñjanam

madhukaṃ padmakaṃ ceti lepaḥ śvayathunāśanaḥ
śatāvarīṃ haṃsapadīṃ madhuparṇīṃ ca citrakam

bandāṃ tālīsapatraṃ ca piṣṭvā śvayathumādihet
kṣīradrumāṇāṃ tvaṅmūlakvāthastu pariṣecane

sadāharāgapāke ca hitaḥ sakṣīraśarkaraḥ
trivṛnmadhukamṛdvīkākāśmaryābhiḥ śṛtaṃ payaḥ

virecanīyamanyadvā yathāvasthaṃ prayojayet
nātyacchasnigdhaśītāni svādūni ca laghūni ca

payo dravāṇi bhuñjīta yathoktāni ca mātrayā
śvayathoḥ kaphajasyāpi cikitsāṃ śṛṇvataḥ param

hrīberāgarudārūṇi cavyacitrakanāgaram
abhayā pippalīmūlaṃ rajanyau hiṅgu mātrayā

kvāthaṃ gomūtrapiṣṭaṃ vā pibecchophanibarhaṇam
citrakāragvadhau mūrvāviḍaṅgāmalakābhayāḥ

pippalīśārivāpāṭhākaṣāyaṃ madhunā pibet
devadāru ca pāṭhāṃ ca śṛṅgaberaṃ ca bhāgaśaḥ

tathā puṣkaramūlaṃ ca gomūtrakvathitaṃ pibet
pāṭhā mustā'bhayā dāru citrako viśvabheṣajam

pippalyativiṣā mūrvā tathā tāḍakapatrikā
bādhāsu tat pibet pūtaṃ kaphaśvayathunāśanam

tagarāgarumustāni saralaṃ devadāru ca
kuṣṭhaṃ tvacā ca lepo'yaṃ kaphaśvayathuvāraṇaḥ

kālāṃ godhāpadīṃ hiṃsrāṃ suṣavīṃ tālapatrikām
piṣṭvā śītakamūlaṃ ca śothamasya pralepayet

kuṣṭhacchatrākavalkaṃ ca yātumūlaṃ trikaṇṭakam
bhadradāruṃ sugandhāṃ ca piṣṭvoṣṇaiḥ śophamādihet

mūlakāni ca śuṣkāṇi bhadramustaṃ saśārivam
gomūtrapiṣṭo lepo'yaṃ śvayathovinivāraṇaḥ

palāśabhasma caikāṅgalepo gomūtrasaṃyutaḥ
ślaiṣmike śvayathāveṣa pariṣeko vidhīyate

pañcamūlaśṛtaṃ toyaṃ gomūtraṃ vā'pi kevalam
nimbāṅkoṭhorupūgānāṃ tarkāryāḥ kuṭajasya ca

naktamālasya vaṃśasya patrakvātho'vagāhanaḥ
triphalā citrakavace dve haridre kuṭherakaḥ

śyāmākhuparṇīkaṭukākākamācīsuvarcalāḥ
vārtākī niculaṃ nimbo viḍaṅgaṃ viśvabheṣajam

rāsnā punarnavā mūrvā kuṣṭhaṃ vyāghranakhaṃ vṛṣam
śigrumūlamathārkaṃ ca yathālābhaṃ samāhṛtaiḥ

gomūtrapiṣṭairlepaḥ syāt kvathitaiḥ pariṣecanam
etaireva dravaiḥ pakvairabhyaṅgaḥ śothanāśanaḥ

paṭolamūlaṃ triphalā viḍaṅgaṃ rajanīti ṣaṭ
kārṣikāḥ syustathaikasmāddviguṇaṃ rocanīphalam

nīlikā triguṇā deyā trivṛtā tu caturguṇā
cūrṇametadgavāṃ mūtrasaṃyutaṃ mātrayā pibet

kāle virikto bhuñjīta jāṅgalānāṃ rasena tu
triphalā saralaṃ dāru rajanyo rohiṇī vacā

pippalī pippalīmūlaṃ nāgarātiviṣe ghanam
kṣāradvayaṃ viḍaṅgaṃ ca pāṭhā'garu sacitrakam

ayorajaśca cūrṇāni gomūtreṇa vipācayet
drākṣāvalayamāhṛtya guṭikā badaropamāḥ

kṛtvā'thaikāṃ tato dve vā pibeduṣṇena vāriṇā
mucyate kaphajācchophādevaṃ śvayathupīḍitaḥ

eṣā hi grahaṇīdoṣaṃ pāṇḍurogaṃ kaphātmakam
kaphārśāṃsi ca vṛddhiṃ ca pramehaṃ ca śamaṃ nayet

pañcamūlaṃ varuṇakaṃ saralaṃ devadāru ca
hastikarṇapalāśaśca phalāni niculasya ca

palāśaḥ kākalā kālā guḍūcī devapuṣpakam
ahiṃsrā śreyasī hiṃsrā kṛṣṇagandhā punarnavā

kāyasthā ca vayaḥsthā ca corako jaṭilā jaṭā
alambuṣaṃ sorupūgaṃ prapunnāḍaṃ sanāgaram

śigrargodhāpadī bhārgī tarkārī śuṣkamūlakam
etaiḥ siddhaṃ yathālābhaṃ tailamabhyañjanaistribhiḥ

nihantyudīrṇaśvayathuṃ jantorvātakaphottaram
ubhe haridre mañjiṣṭhā yaṣṭīmadhukacandanam

pippalyo bālakaṃ caiva pītadruḥ padmakaṃ tathā
māṃsyuśīraṃ satagaramelā'garu kuṭannaṭam

śrīveṣṭakaṃ sarjarasaṃ mūrvākuṣṭhapriyaṅgavaḥ
etaistailaṃ vipaktavyamabhyaṅgācchothanāśanam

kriyaiṣā doṣajasyoktā''gantorvaisarpavat kriyā
agnisādo jvarastṛṣṇā kārśyārucitamobhramāḥ

śvāsavraṇātisārāśca svaiścikitsyā upadravāḥ

iti ha smāha bhagavān kaśyapaḥ
iti khileṣu śvayathucikitsādhyāyaḥ saptadaśaḥ

atha śūlacikitsādhyāyo'ṣṭādaśaḥ
athātaḥ śūlacikitsitaṃ vyākhyāsyāmaḥ

iti ha smāha bhagavān kaśyapaḥ

kṣobhāttrāsādhyayanātiprasaṅgāt
kṣutkāle cātyambhasaḥ pānadoṣāt
vegānāṃ vā nigrahādyānayānādāmādbhraṃśasādrūkṣadhānyāśanādvā

kruddho vāyuḥ kartanāyāmatodaiḥ
kampādhmānairāviśan kukṣideśe /
śūlaṃ pittenānvitaḥ śleṣmaṇā vā
dvābhyāṃ vā'pi preryamāṇaḥ karoti

vātācchūlaṃ kṣudhitasyograrūpaṃ
ghorairvegairyannirucchvāsakartṛ / vidyādbhukte jīryati svedadāha tṛṣṇārtasya pratataṃ pittaśūlam

mandābādhaṃ stimitaṃ bhuktamātre
kaphodrekāt stambhahṛllāsakartṛ /
vidyācchūlaṃ sannipātāccaturthaṃ
sarvairliṅgairduḥsahaṃ tattvasādhyam

vāyuḥ prokto balavānugravegaḥ
so'yaṃ kruddho dehamāśveva hanti /
tasmādādāvarditaṃ vātaśūlenā'bhyaktāṅgaṃ svedayedāśu vaidyaḥ

vātaghnoṣṇairavagāhopanāhaiḥ
piṇḍasvedairuṣṇakaiḥ pāyasairvā /
eṇādīnāṃ jāṅgalānāṃ rasāṃśca
lāvādīnāṃ cānvitān saindhavena

snigdhoṣṇāmlān śīlayedvātaśūlī
vātaghnairvā sādhitaṃ kṣīramuṣṇam

tailaṃ śuktaṃ mastu sauvīrakaṃ ca
pibecchūlī saha sauvarcalena
śyāmāṃ śuṇṭhīṃ saindhavaṃ tumburūṇi
hiṅgu kṣāraṃ yāvaśūkaṃ viḍaṃ ca

ślakṣṇaṃ piṣṭvā pravarāhvaṃ śaṭi ca
peyaṃ koṣṇaṃ cāmbhasā vātaśūle
kṣīraṃ pītvā śītalaṃ pittaśūlī
vamet kāmaṃ śarkarāvāriṇā vā

śūlārtaṃ vā śaṅkhakundendugaurairmuktāhāraiḥ saṃspṛśet paṅkajairvā /
raupyaiḥ kāṃsyaiḥ sphāṭikaiḥ kāñcanairvā
toyāsiktairbhājanaiścandraśītaiḥ

yasmiñchūlaṃ saṃspṛśettaṃ pradeśaṃ
bhūyo bhūyaḥ kadalīnāṃ dalairvā /
mṛdvīṃ śayyāṃ visinīpatrabhaktinyāsopetāṃ candanāmbuprasiktām

śīte veśmanyahatāṃ sopadhānāṃ
sevetāntaḥprasphuratpadmapatrām
hṛdyāḥ śītā madhurā bhedanīyāḥ
peyāḥ siddhāḥ śītalā vā kaṣāyāḥ

kṣaudronmiśrāḥ svādavaḥ pittaśūlasyocchedārthaṃ śarkarācūrṇayuktāḥ /
sāme sotkleśe bhojane vā vidagdhe
saṃśuddhyarthaṃ saindhavoṣṇodakena

kuryāt kāmaṃ vamanaṃ śleṣmaśūle
vāntaṃ cainaṃ laṅghitaṃ supratāntam
kṣāropetaṃ pāyayet pācanīyaṃ
pippalyādikvāthamuṣṇaṃ sahiṅgu

tatsiddhāṃ vā bhojayettaṃ yavāgūṃ
saṃsṛṣṭānnaḥ kramaśo vā niṣevet
cūrṇaṃ sarpirvaṭakakṣārabastīn
kalkakvāthān bhāgaśaḥ kalpaśaśca

śūlāṭopānāhagulmāmayaghnaṃ
siddhaṃ proktamṛṣibhirdhyānayogāt

hiṅgupāṭhātrikaṭukakṣārasaindhavacitrakān
hapuṣāmabhayāṃ cavyamajājīdhānyapuṣkarān

amlavetasavṛkṣāmlayavānīdāḍimāni ca
śaṭiṃ sauvarcalaṃ caiva sūkṣmacūrṇāni kārayet

etaddhi cūrṇamuṣṇāmbudadhimastupturāsavaiḥ
pītamānāhahṛdbastiśūlagulmārtināśanam

plīhārśograhaṇīdoṣakāsaśvāsānurograham
mātuluṅgarasairyuktaṃ hanti mūtragrahaṃ tathā

amlavetasavṛkṣāmlayavānīkṣāracitrakam
hiṅgucavyoṣakaśaṭījīvantītrikaṭūni ca

pippalīṃ pippalīmūlaṃ badaraṃ śirivārikām
nāgadantīṃ ca bilvaṃ ca tathā lavaṇapañcakam

samabhāgāni matimān sūkṣmacūrṇāni kārayet
rasena mātuluṅgasya vaṭakān kārayettataḥ

gulmodāvartaśūleṣu pibedetānmahāguṇān
sukhoṣṇavārimadyāmlairmūtrakṛcchre tathaiva ca

hṛdrogeṣu gudabhraṃśameḍhrabastirujāsu ca
viḍadāḍimahiṅgūni saindhavaṃ maricaṃ tathā

mātuluṅgarasairyuktaṃ śūlāṭopaharaṃ pibet
etāni vyoṣapṛthvīkācavyacitrakasaindhavaiḥ

sājājipippalīmūlayutairvā pathyamuttamam
sauvarcalavacāhiṅgutryūṣaṇaṃ saharītakam

sureśayavasaṃyuktaṃ hanti śūlabalaṃ kṣaṇāt
palikān ghṛtasaṃyuktān saktusaindhavacitrakān

vacāṃ caivaikataḥ kṛtvā kaṭāhe pradahedbhiṣak
pradīptamavatāryātha taṃ kṣāraṃ mātrayā pibet

taṇḍulodakasaṃyuktaṃ śūlagulmarujāpaham
pañcamūlayavakvāthayuktameraṇḍajaṃ pibet

tailaṃ vāyvātmake śūle drākṣākvāthayutaṃ tathā
saśarkaraṃ pittaśūle pittagulme pliheṣu ca

dāḍimavyoṣahapuṣāpṛthvīkākṣāracitrakaiḥ
sājājipippalīmūlacavyadīpyakasaindhavaiḥ

samāṃśairvipacet sarpiḥ sakṣīraṃ mṛdunā'gninā
kolamūlakayūṣeṇa saṃyuktaṃ vātagulmanut

śūlānāhaśvāsakāsaviṣamajvarahṛdgrahān
arucigrahaṇīdoṣaśūlapāṇḍvāmayāṃstathā

yonidoṣāṃśca hantyetadamṛtapratimaṃ ghṛtam
bilvakuṣṭhayavakṣāravacācitrakasaindhavaiḥ

enīyakaviḍavyoṣatintiḍīkāmlavetasaiḥ
hiṅgusauvarcalājātidāḍimendrayavaistathā

punarnavākāravībhyāṃ haṃsapadyā ca sādhitam
ghṛtaṃ caturguṇe dadhni śuktakātikasaṃyutam

dvipañcamūlakolānāṃ kulatthānāṃ rasena ca
śūlagulmānilotkampagranthīnarditahṛdgrahān

vātakuṇḍalikāvartametat sarpirapohati
sauvarcalayavakṣāravacātryūṣaṇacitrakaiḥ

harītakīviḍaṅgābhyāṃ payasā caiva sādhitam
saṃyuktaṃ bhadrarohiṇyā daśāṅgaṃ śūlanud ghṛtam

plīhagulmakrimiśvāsakāsahikkāvināśanam
śatapuṣpāvacākuṣṭhapippalīphalasaindhavaiḥ

sarṣapadvayasaṃyuktāṃ phalavati prayojayet
eṣā''dhmānamudāvartaṃ śūlaṃ cāśu vyapohati

uṣṇodakasnehayuktaṃ mūtrakṣaudrāmlakāñjikaiḥ
saṃyojyaikatra matimānebhiścūrṇaiḥ samāvapet

śatāhvāpippalīkuṣṭhavacānāṃ devadāruṇaḥ
pūtīkasya hareṇūnāṃ bilvānāṃ madanasya ca

śūlānāhavibandhaghnamimaṃ bastiṃ pradāpayet
āsthāpanapramāṇena snigdhasvinnasya dehinaḥ

saṃruddhe vāyunā mūtre pratistabdhe tathodare
purīṣe ca vimārgasthe cūrṇabastirayaṃ hitaḥ

vāridroṇe palānyaṣṭau pacedgandhapalāśakāt
tataḥ kaṣāyaṃ tu vacāpippalīphalasaindhavaiḥ

saṃyuktaṃ kṣaudratailābhyāṃ śatāhvākuḍavena ca
dadyānnirūhamānāhapārśvahṛdbastiśūlinām

balavarṇāgnijananaṃ śroṇigulmarujāpaham
kulatthayavakolāni pañcamūladvayaṃ tathā

kvāthayettaṃ jaladroṇe tatastaṃ tailasaṃyutam
kaṣāyaṃ pippalīkuṣṭhavacendrayavasarṣapaiḥ

hareṇukāsaindhavābhyāṃ tagareṇa ghṛtena vā
tannirūhamudāvartakuṣṭhagulmopaśāntaye

dadyāccaivedamāśveva balavarṇāgnivardhanam
tailapakvāśanaṃ dhīraḥ kalkapeṣyairvipācitam

pippalībilvamadhukaśatāhvāphalacitrakaiḥ
devadāruvacākuṣṭhapuṣkarākhyaiśca saṃyutam

samāṃśaidviguṇakṣīraṃ tadudāvartināṃ hitam
śūlānāhagudabhraṃ śavarcomūtravinigrahān

kaṭyūrupṛṣṭhaśūlārśomūḍhavātāṃśca nāśayet
gudaśūlaṃ tathotthānaṃ bahuśaḥ sapravāhikam

kuṣṭhaṃ viḍaṅgātiviṣādārudārvīhareṇukāḥ
elā'jamodā hrīberaṃ nāgaraṃ puṣkaraṃ śaṭī

sthirā sakaṭphalā rāsnā pippalyaścavyacitrakam
śyāmā śatāhvā yaṣṭyāhvā saindhavaṃ madanaṃ vacā

niculaṃ nīlinī dantī bilvaṃ cākṣārdhasaṃśritaiḥ
gandharvatailaṃ tailaṃ vā pacettadanuvāsanam

gulmāḍhyavātaśūlārśaḥplīhodāvartavṛddhinut
sakuṇḍalaṃ mūtrakṛcchramānāhaṃ ca vyapohati

śatārdhaṃ daśamūlasya madanānāṃ tathā''ḍhakam
pūtīkadantīsurabhīśvadaṃṣṭrāṇāṃ ca buddhimān

palāni viṃśatiṃ dadyādekaikasya tamekataḥ
yavakolakulatthānāṃ prasthayuktaṃ jalonmane

kvāthayet pādaśeṣaṃ tu tasmiṃstailāḍhakaṃ pacet
gomūtrārdhāḍhakaṃ yavapippalīsaindhavatrikam

--- yavaśatāhvānāṃ --- valīnakaiḥ
kuṣṭhavaktrasya cāyuktametat syādanuvāsanam

ūrustambhakaṭīpṛṣṭhagudavaṃkṣaṇaśūliṣu
plīhodāvartagulmeṣu phalatailaṃ prayojayet

iti śūlacikitsā te vistareṇa prakīrtitā
siddhaiḥ prayogairvividhaiḥ prāṇināṃ hitakāmyayā

iti ha smāha bhagavān kaśyapaḥ
iti khileṣu śūlacikitsādhyāyo'ṣṭādaśaḥ

athāṣṭajvaracikitsitottarādhyāya ekonaviṃśatitamaḥ
athāto'ṣṭajvaracikitsitottaramadhyāyaṃ vyākhyāsyāmaḥ

iti ha smāha bhagavān kaśyapaḥ

ekadvitrisamutthānāṃ nidānaṃ prāgudāhṛtam
cikitsāṃ saṃpravakṣyāmi sannipātasya hetuvat

ahitā --- /
----- guḍasaṃyutaḥ
bilvo'gnimanthaḥ śyonākaḥ kāśmaryaḥ pāṭalistathā
eṣāṃ tu mūlaṃ niṣkvāthya pibet sakṣārasaindhavam
samaṅgī madhukaṃ mustaṃ bhadradārvatha śarkarā
vātajvare prayoktavyaṃ guḍūcyā saha pānakam
vidārigandhā hyeraṇḍaṃ bṛhatyau pṛśniparṇikā
bhadradārusamāyukto vātajvaraharo mataḥ
vidārigandhā kalaśī tathā gandharvahastakaḥ
madhukaṃ bhadradāruśca kvāthaḥ śarkarayā yutaḥ
vātajvaraharo deyo mātuluṅgarasāplutaḥ
eraṇḍaṃ varuṇaṃ caiva bṛhatyau madhukaṃ tathā
vātajvaraharaḥ kvātho rāsnākalkasamāyutaḥ
dvipañcamūlaniṣkvāthaḥ koṣṇo vā yadi vā himaḥ
rāsnākalkasamāyukto vātajvarahito mataḥ
rāsnāsaraladevāhvayaṣṭīmadhukasaṃyutaḥ
peyo vidārigandhādyo niṣkvātho vā sasaindhavaḥ
pañcamuṣṭikayūṣeṇa yuktāmlalavaṇena ca
bhuñjīta bhojanaṃ kāle jāṅgalānāṃ rasena ca
pibedantarapānaṃ ca bilvamūlaśṛtaṃ jalam
dve pañcamūle varcīvamekeṣīkāṃ punarnavām
sahasravīryāṃ nādeyīṃ śatavīryāṃ śatāvarīm
viśvadevāṃ śukanasāṃ sahadevāṃ sanākulīm
rāsnājagandhe pūtīkaṃ devāhvaṃ devatāḍakam
bale dve haṃsapādīṃ ca kvāthotthīmupalaṅkaśām
kṛṣṇāgaruṃ vyāghranakhaṃ śatapuṣpāṃ palaṅkaṣām
kāyasthāṃ ca vayasthāṃ ca corakaṃ jaṭilāṃ jaṭām
apetarākṣasīṃ yakṣāṃ guhāhvāmuṣṭralomikām
hareṇukāṃ haimavatīṃ kaiṭaryaṃ suvahāṃ vacām
vṛścikālīṃ ca bhārgīṃ ca --- syā śigruṃ ca kalkaśaḥ
saṃhṛtya tailaṃ vipacedvātajvaranibarhaṇam
purāṇasarpiḥsaṃskāro vidheyo jāṅgalo rasaḥ
daśamūlakulatthānāṃ yavānāṃ kuḍavasya ca
kulīraśṛṅgyā rāsnāyāḥ śaṭīpuṣkaramūlayoḥ
bhārgyā durālabhāyāśca niryūhaḥ sādhu sādhitaḥ
tenāsya viguṇo vāyurjvaraścāśu praśāmyati
vātaśleṣmasamutthasya vyākhyāsyāmi cikitsatam
bṛhatyau puṣkaraṃ dāru pippalyo nāgaraṃ śaṭī
kvāthameṣāṃ pibeduṣṇamādau doṣavipācanam
dvipañcamūlaṃ bhārgīṃ ca karkaṭākhyāṃ durālabhām
nāgaraṃ pippalīṃ dāru pibedvā saindhavānvitam
paṭolaṃ dhānyakaṃ mustā mūrvā pāṭhā nidigdhikā
kaṣāya eṣāṃ pātavyaḥ ṣaḍaṅgo madhusaṃyutaḥ
triphalā jīvanīyāni pippalīmūlaśarkare
siddho grahaghnasaṃyukto vātaśleṣmajvarāpahaḥ
nāgaraṃ daśamūlaṃ ca kaṭvaṅgaṃ dārukadvayam
pippalyastriphalā bhārgī karkaṭākhyā durālabhā
vātaśleṣmajvare peyaṃ sukhoṣṇaṃ saindhavānvitam
tiktakaṃ kaṭurohiṇyāḥ kalkamakṣasamaṃ bhiṣak
hiṅgusaindhavasaṃsṛṣṭaṃ pibet kṣipraṃ sukhāmbunā
kaphaje'nilaje caiva jvare pītaṃ sukhāvaham
mahataḥ pañcamūlasya kvāthaḥ ślaiṣmikavātike
nāgarāmaradārubhyāṃ śṛtamuṣṇaṃ pibejjalam
bālamūlakayūṣeṇa jāṅgalānāṃ rasena vā
kaṭūṣṇadravyayuktena mandasnigdhena bhojayet
lākṣāpriyaṅgumañjiṣṭāyaṣṭikośīrabālakaiḥ
candanāgarubāhlīkaśrīveṣṭakakuṭannaṭaiḥ
mūrvāśatāhvāsaralasālaniryāsarocakaiḥ
kṣīradroṇe'rdhapalikairbhiṣaktailāḍhakaṃ pacet
tat sādhu siddhamāhṛtya svanuguptaṃ nidhāpayet
lākṣādikamidaṃ taila ---
pipalyo'tiviṣā mustā sthirāḍhyā sadurālabhā
sacandanayavośīrasārivāḥ sanidigdhikāḥ
rohiṇyāmalakaṃ bilvaṃ trāyamāṇātisādhitam
ghṛtaṃ hanti śiraḥ śūlaṃ kāsaṃ jīrṇajvaraṃ kṣayam
vamanaṃ kapharogāṇāṃ paittikānāṃ virecanam
śodhanaṃ śamanaṃ kāryaṃ kṛśe śamanaśodhanam
maṇḍādiriṣyate sāme vavāgūrvātaje tathā
viṣauṣadhiprajātānāṃ pittaghnīṃ kārayet kriyām
sannipātajvarasyātaḥ pravakṣyāmi cikitsitam
sa sarvalakṣaṇo'sādhyaḥ kṛcchrasādhyo'lpalakṣaṇaḥ
balahīnasya naṣṭāgneḥ sarvathā naiva sidhyati
kimaṅga bālakānāṃ tu kṣīṇadhātubalaujasām
tathā'pi yatnamātiṣṭhedānṛśaṃsyādbhiṣagvaraḥ
sannipāteṣu doṣeṣu yo doṣo balavān bhavet
tamevādau praśamayeccheṣaṃ doṣamataḥ param
alpāntarabaleṣveṣu doṣeṣu matimān bhiṣak
śleṣmāṇamādau śamayet sa hyeṣāmanubandhakṛt
gurutvāt kṛcchrapākitvādūrdhvakāyāśrayāttathā
tasmājjvare yaduddiṣṭaṃ vātapittakaphātmake
tasmāttasyāmavasthāyāṃ tattat kāryaṃ cikitsitam
pippalyādivacādāruvayasthāsaralānvitaḥ
peyaḥ kaphottare sāme sahiṅgukṣārasaindhavaḥ
doṣāstenāśu pacyante vibandhaścopaśāmyati
nāgaraṃ kaṭphalaṃ dhānyaṃ mustaṃ parpaṭakaṃ vacā
devadārvabhayā bhārgī bhūtīkaṃ daśamaṃ bhavet
śṛtaṃ saindhavahiṅgubhyāṃ peyaṃ vātakaphottare
ūrdhvajatrvaṅgarogāṇāṃ jvaritānāṃ praśasyate
śaṭīpauṣkarapippalyo bṛhatī kaṇṭakārikā
śuṇṭhī karkaṭakī bhārgī durālambhā yavānikā
śūlānāhavibandhaghnaṃ śaṭyādyaṃ kaphavātanut
viḍaṅgātiviṣe bhārgī pauṣkaraṃ citrakaṃ śaṭī
śārṅgeṣṭā pippalī śuṇṭhī pibedvātakaphottare
durālabhāvacādārupippalīmūlanāgaram
--- puṣkaraṃ śaṭī /
kvāthaṃ salavaṇaṃ deyaṃ hiṅgukṣārānvitaṃ pibet
sannipāte vibandhe ca vātaśleṣmottare jvare
jīvakarṣabhakau śṛṅgī mūlaṃ puṣkarajaṃ śaṭī
sannipāte'nilakaphe kāse caiṣāṃ praśasyate
bṛhatyau puṣkaraṃ dāru pippalyo nāgaraṃ śaṭī
kvāthameṣāṃ pibeduṣṇamādau doṣavipācanam
durālabhā vacā dāru pippalī bhadrarohiṇī
mahauṣadhaṃ karkaṭakī bṛhatī kaṇṭakārikā
kvāthaḥ salavaṇaḥ peyaḥ sannipātajvarāpahaḥ
devadāru vacā mustaṃ kairātaṃ kaṭurohiṇī
guḍūcī nāgaraṃ kvāthaḥ sannipātajvarāpahaḥ
urograhe kaṇṭharoge mukharoge ca śasyate
triphalā rohiṇī nimbaṃ paṭolaṃ kaṭukatrayam
pāṭhā guḍūcī vetāgraṃ saptaparṇaḥ savatsakaḥ
kirātatiktakaṃ mustā vacā cetyekataḥ śṛtam
kaphottaraṃ nihantyetat pānādagniṃ ca dīpayet
paṭolamustamadhukarohiṇīkvathitaṃ jalam
yogametaṃ triphalayā yuktaṃ ca suradāruṇā
pāyayenmadhunā''loḍya sannipāte kaphottare
āragvadhavacānimbapaṭolośīravatsakam
śārṅgeṣṭā'tiviṣā mūrvā triphalā sadurālabhā
bhadramustā balā pāṭhā madhukaṃ bhadrarohiṇī
kaṣāya eṣa śamayejjvaramāśu tridoṣajam
jāḍyaṃ saśophamādhmānaṃ gurutvaṃ cāpakarṣati
nāgaraṃ daśamūlaṃ ca kaṭvaṅgaṃ dā ---
--- śiśuṃ prāśayeyuḥ kathañcana
navasadyaḥkṣatānāṃ tad vraṇānāṃ rohaṇaṃ bhavet
kṣatajaṃ prāpya hi viṣaṃ darśayatyātmano balam
prasādayati taccāśu sandhatte ca madhu vraṇam
tasmāt svabhāvato nṝṇāṃ sahoṣṇenāśitaṃ madhu
viruddhatvāttribhirdoṣairjīvitāntāya kalpate
tulyatvāduṣṇayogācca yathā ca madhusarpiṣī
iti ha smāha bhagavān kaśyapaḥ
iti khileṣu madhuviśeṣaṇīyo nāmaikaviṃśatitamo'dhyāyaḥ

atha kṣīraguṇaviśeṣīyādhyāyo dvāviṃśatitamaḥ
athātaḥ kṣīraguṇaviśeṣīyaṃ vyākhyāsyāmaḥ

iti ha smāha bhagavān kaśyapaḥ

gormahiṣyā ajāyāśca nāryā uṣṭryā aveḥ striyāḥ
turaṅgyā iti coktāni pūrvameva payāṃsi tu

bhūyaśca guṇavaiśeṣyāt kṣīrāṇyaṣṭau nibodha me
prajāpateḥ purecchātaḥ prajānāṃ prāṇadhāraṇam

pañcabhūtaguṇaṃ cāpi bhūruhāṃ janma kathyate
vanaspatīnāṃ vṛkṣāṇāṃ vānaspatyagaṇasya ca

vīrudhāmoṣadhīnāṃ ca gulmānāmapi jīvaka
vividhānāṃ tṛṇānāṃ ca sasyānāṃ caiva dehinām

evamādigaṇo yastu bhūmeḥ sāra udāhṛtaḥ
somasya vāyutejopāṃ buddhiśceti prajāpateḥ
tadāhāraguṇotpannaṃ gavādīnāmataḥ param
yathā sarvauṣadhīsāraṃ kṣīrode mathite purā
saṃbhūtamamṛtaṃ divyamamarā yena devatāḥ
tathā sarvauṣadhīsāraṃ gavādīnāṃ tu kukṣiṣu
kṣīramutpadyate tasmāt kāraṇādamṛtopamam
jarāyujānāṃ bhūtānāṃ viśeṣeṇa tu jīvanam
kṣīraṃ sātmyaṃ hi bālānāṃ kṣīraṃ jīvanamucyate
kṣīraṃ puṣṭikaraṃ vṛddhikaraṃ balavivardhanam
kṣīramojaskaraṃ puṃsāṃ kṣīraṃ prāṇaguṇāvaham
garbhadhānakaraṃ kṣīraṃ bandhyānāmapi yoṣitām
kṣīṇānāṃ ca kṛśānāṃ ca śophināṃ rājayakṣmiṇām
vyāyāmaśramanityānāṃ strīnityānāṃ ca dehinām
saṃkṣīṇaretasāṃ cāpi garbhasrāve ca dāruṇe
raktapittāmaye'rśassu madakṣīṇe jvare tathā
garbhaśoṣe ca vātānāṃ kṣīraṃ paramamucyate
sāmānyādiha dugdhānāṃ purā coktā guṇādayaḥ
pṛthaktvena ca vakṣyāmi gavādīnāṃ viśeṣaṇam
tṛṇagulmauṣadhīnāṃ ca agrāgraṃ paya eva hi
khādanti madhuraprāyaṃ lavaṇaṃ ca viśeṣataḥ
tatsāraguṇavaiśeṣyādgavāṃ kṣīraṃ praśasyate
madhuro hi rasaḥ śreṣṭho rasānāṃ parikīrtitaḥ
tannityaṃ vā gavāṃ kṣīraṃ madhuraṃ bṛṃhaṇaṃ matam
auṣadhāgrātibhakṣatvādvirecayati tat payaḥ
etasmāt kāraṇāduktaṃ gavāṃ kṣīraṃ rasāyanam
eṣa vaiśeṣikaguṇo gokṣīrasya prakīrtitaḥ
krimikīṭapataṅgaiśca sarpairapi tṛṇāśritaiḥ
saha nānātṛṇaṃ hīnaṃ mahiṣyo bhakṣayanti hi
avagāhanti toyāni garbhāṇi ca viśeṣataḥ
etasmāt kāraṇāttāsāṃ kṣīraṃ kaṣāyaśītalam
śītatvāddurjaraṃ snigdhaṃ gurudāhanibarhaṇam
gavāṃ kṣīrāccālpā guṇaṃ mahiṣīṇāṃ payo matam
ajānāmalpakāyatvāt kaṭutiktānibarhaṇāt
alpatvācca balitvācca laghu doṣaharaṃ payaḥ
alpatvāttadghanaṃ kṣīraṃ ghanatvādapi bṛṃhaṇam
śītaṃ saṃgrāhi madhuraṃ balyaṃ vātānulomanam
mahāśayatayā śyāmamadhuraprāyasevanāt
bahutvācca ghanatvācca balyaṃ puṣṭikaraṃ payaḥ
guru vṛṣyaṃ ca nirdiṣṭaṃ madhuraṃ ca viśeṣataḥ
alpāhāratayoṣṭrīṇāṃ priyaṃ cā''lavaṇaṃ ---
---
atīte prathame māsi prāvṛṭproṣṭhapadāgame
divyaṃ khāt patitaṃ toyaṃ nāmnā haṃsodakaṃ śivam
āpūtaṃ sūryatejobhiragastyenā'viṣīkṛtam
--- ti
snigdhaṃ vṛṣyaṃ ca balyaṃ ca hemante guru varṣati
śiśire varṣati jalaṃ kaphavātaprakopanam
vasante varṣati jalaṃ kaṣāyasvādurūkṣaṇam
tatra ---
--- patitaṃ kṣitau /
tat pātropekṣitavati pātradoṣeṇa tattvataḥ
nānārasatvaṃ bhajate toyaṃ saṃprāpya bhūtalam
sarvāmbu sadyaḥpatitamapraśastamanārtavam
ta --- /
---rūdakam
kaphānilakaraṃ pitte hitaṃ śītātikārakam
raktāpittaharaṃ rūkṣamavaśyāyodakaṃ laghu
etaccaturvidhaṃ proktaṃ tattvenāmbho'ntarikṣajam /
sahṛ ---
--- śleṣmaprakopanāḥ /
kṣārodāḥ prāksṛtā nadyaḥ kaphaghnāḥ pittakopanāḥ
laghūdakāḥ pratīcīgā vātalāḥ kaphanāśanāḥ
kṣāraṃ tābhyastu sāmudraṃ madhuraṃ guru pacyate
--- /
---- lavaṇaṃ jalam
sābhiṣyandi svādupāki śītaṃ pittaghnamaudbhidam
sattvakledamalādduṣṭaṃ palvalāmbu guru smṛtam
kaṣāyamadhuraṃ svādu vimalaṃ sārasaṃ jalam
kaupaṃ pi ---
---- /
ityaṣṭadhā jalaṃ proktaṃ bhūmijaṃ vṛddhajīvaka
laghu prakāmaṃ sasnehaṃ śītaṃ sarvarasānvitam
tṛṣṇāpahaṃ manohlādi śleṣmaghnaṃ krimināśanam
rakṣoghnaṃ jīvanaṃ vṛṣyaṃ mūrcchāghnaṃ ---
--- sūkṣmaprāṇisamākulam /
bahalaṃ kaluṣaṃ caiva tathā picchilamāvilam
grāmakṣetrarasairduṣṭaṃ viṣamūlopadūṣitam
śakuntakrimiśaivālayuktamatyuṣṇacikkaṇam
---
--- gurviṇīṣu ca varjayet /
dhātrīṇāṃ ca viśeṣeṇa svasthānāṃ rogiṇāmapi
pūrvoktaguṇabāhulyāt pānīyaṃ sevyamiṣyate
vipāke madhuraṃ śaityādvāri pittaghnamucyate
--- /
---- ṇaśītamuṣṇamathāpi vā /
bhaktasya pūrvaṃ pītaṃ vā kṛśatvaṃ kurute śiśoḥ
bhaktasya madhye pītaṃ tanmadhyamatvaṃ niyacchati
bhaktasyopari pītaṃ tu pīnatvaṃ saṃprayacchati
--- niṣkvāthoṣṇāmbu pācanam
śrame bhedeṣu tṛṣṇāsu mūrcchāsvatipipāsite
niṣkvāthalāghavādambu salilaṃ taptaśītalam
nirdiśet sarvadoṣaghnaṃ bālānāṃ --- /
--- muṣṇodakaṃ śiśoḥ /
raktapittāmayaṃ tyaktvā prāyo vātakaphātmake
roge śiśurvā dhātrī vā gurviṇī voṣṇakaṃ pibet
kvacidrogaviśeṣeṇa taptaśītaṃ hitaṃ bahu
athāntarikṣaṃ śaradi praśastaṃ
saṃtapyamānaṃ ca ravermayūkhaiḥ /
pibetsaro vā'tha nadīṃ taḍāgaṃ
hemantakāle śiśire ca bālaḥ
vāpyaudbhidaṃ prāsravaṇaṃ hi toyaṃ
grīṣme praśastaṃ kusumāgame ca / varṣāsu kaupaṃ salilaṃ praśasta mārogyahetoratha taptaśītalam
iti ha smāha bhagavān kaśyapaḥ
iti khileṣu pānīyaguṇaviśeṣīyādhyāyaḥ

atha māṃsaguṇaviśeṣīyādhyāyaścaturviṃśaḥ
athāto māṃsaguṇaviśeṣīyaṃ vyākhyāsyāmaḥ

iti ha smāha bhagavān kaśyapaḥ

māṃsaṃ vṛṣyaṃ ca balyaṃ ca māṃsaṃ prāṇavivardhanam
māṃsaṃ puṣṭikaraṃ vṛddhakṛśānāṃ māṃsavardhanam

kṣayiṇāṃ kṣīṇadehānāṃ māṃsameva parāyaṇam
na māṃsatulyamanyattvārogyavīryavivardhanam

narāṇāṃ kṣīṇaśukrāṇāṃ māṃsaṃ retobhivardhanam
bandhyānāmapi nārīṇāṃ kumārāṇāṃ tathaiva ca

garbhādhānakaraṃ māṃsamante puṣṭikaraṃ tathā
garbhiṇīnāṃ ca nārīṇāṃ vātapraśamanaṃ param

strīṇāṃ prasavakāle tu māṃsa --- meva ca
garbhakāle ca bālānāṃ sarasaṃ paramauṣadham

strīpriyāṇāṃ tathā puṃsāṃ nityavyāyāmasevinām
kṣīṇānāṃ yakṣmiṇāṃ caiva jvarakṣīṇāśca ye narāḥ

vātāhatāstu ye sattvāsteṣāṃ māṃsaraso hitaḥ
susaṃskṛto māṃsaraso biḍajīrakahiṅgubhiḥ

snehe siddhaśca payasā viśeṣādvātike smṛtaḥ
vātapittottare puṃbhiḥ śarkarāmadhurīkṛtaḥ

snigdho māṃsarasaḥ peyastathā raktāmayārditaiḥ
kṣīṇasiddho māṃsaraso madhuro lavaṇo'pi vā

bālānāṃ kṣīṇadehānāṃ garbhakāle ca śasyate
hitaṃ ca bālakāmānāṃ māṃsasvarasasādhitaḥ

susiddhaṃ lavaṇe siddhaṃ māṃsaṃ kaṭukarocanam
kāyāgnidīpanaṃ caiva rasā --- po hitaḥ

vesavāraḥ samadhuro lāvaṇo vā'pi rocanaḥ
piṣṭacūrṇitapakvaṃ vā praku---vāpivānnatat

śūlyamaṅgārataptaṃ ca māṃsaṃ śleṣmāmaye hitam
sāmlaḥ salavaṇaścaiva
hitastasmāttu jīvaka

piṣṭaṃ vā khaṇḍaśo vā'pi māṃsaṃ puṭakasādhitam
sahiṅgusaindhavabiḍairmaricāmlasajīrakaiḥ

sāṅkurairdhānyakaiścaiva śṛṅgaberārdrakairapi
palāśe bhūstṛṇopetaṃ māṃsaṃ siddhaṃ prayojayet

atha māṃsarasaṃ sarpiḥ
siddhaṃ sakṣīramiṣyate /
rasapākaviśeṣeṇa tadbalyaṃ
tadrasāyanam

ataḥ paraṃ tu māṃsānāṃ rasapākaviśeṣaṇam
vakṣye guṇaviśeṣaṃ ca vṛddhajīvaka tacchṛṇu

kaphapittakaraṃ māṃsaṃ gavāṃ vāte hitaṃ guru
vidāhi bṛṃhaṇaṃ caiva khaṅgamāṃsaṃ ca tatsamam

nyaṅkūnāṃ vihitaṃ vāte kaphapittaharaṃ laghu
sakṣāraṃ dāntinaṃ māṃsaṃ bṛṃhaṇaṃ kaṭutiktakam

vīryeṇoṣṇaṃ ca tadvidyāt kaphapittaṃ karoti ca
gokarṇamāṃsaṃ tattulyaṃ gavayasya rurorapi

rase pāke ca madhuraṃ vātapittaharaṃ guru
uṣṇaṃ caiva cchāgamāṃsamāvikaṃ cāpi tadguṇam

vṛṣyaṃ tu māṃsaṃ vārāhaṃ madhuraṃ guru pacyate
tadguṇaṃ māhiṣaṃ viddhi śaukaraṃ syāttato guru

gardabhasya tathā'śvasya māṃsaṃ yat pṛṣatasya ca
kaphaghnaṃ vātalaṃ rūkṣaṃ kaṭutiktāhvayaṃ laghu

śvadaṃṣṭro vṛṣadaṃṣṭraśca ṛṣyaḥ śarabha eva ca
vātaghnā uṣṇavīryāśca rasataḥ kaṭukānvayāḥ

golāṅgūlā vānarāśca tattulyā madhurottarāḥ
vṛkarkṣakokajambūkāḥ siṃhā vyāghratarakṣavaḥ

svādyamāṃsāstvime vṛṣyā uṣṇāḥ pittavivardhanāḥ
kaṣāyatiktā rasato vātaghnāḥ kaṭupākinaḥ

nakulo mūṣikaḥ śvāvidbabhruḥ śalyaka eva ca
kaṣāyamadhurāḥ śītā vṛṣyā godhāśca tadgaṇāḥ

ye syuḥ śaśakuraṅgādyāḥ sṛmaraścamarāśca ye
laghavo---ṣṇāḥ pittalā nātibṛṃhaṇāḥ

bārhiṇaṃ madhuroṣṇaṃ tu viṣaghnaṃ guru bṛṃhaṇam
tulyaṃ kaukkuṭajaṃ vanyaṃ tattulyaṃ grāmyakaukkuṭam

viṣkirāḥ krauñcavartīkā mayūreṇa samāḥ smṛtāḥ
tasmāllaghustu vartīro vartīkā laghavo laghuḥ

tittiristu kaṭuḥ pāke soṣṇastu kaphavātajit
kapiñjalaścakoraśca upacakraśca tatsamāḥ

lohapṛṣṭho raktapṛṣṭho raktākṣo jīvajīvakaḥ
tathā'nye himavajjātā madhurā vṛṣyabṛṃhaṇāḥ

guravaḥ śītalāḥ pāke kaṣāyā rasatastathā
khañjarīṭo vapukkāraḥ krakaro dīrghapuṃsakaḥ

koyaṣṭikaḥ kapotaśca raktapādo vasantakaḥ
bhṛṅgarājo'tha hārītaḥ kokilaḥ śukasārikāḥ

ete cānye ca pracchadā śītamārutakopakāḥ
kaṣāyamadhurāḥ svāde kaphaghnāḥ kaṭupākinaḥ

gṛdhraḥ kākaḥ śyenacāṣau bhāsolūkakuliṅgakāḥ
śaśantā mūṣikāḥ koḍāstathā'nye māṃsabhojanāḥ

prasahāste tu madhurā vātaghnā kaṭupākinaḥ
bṛṃhaṇāścoṣṇavīryāśca satataṃ śoṣiṇāṃ hitāḥ

plavā bakā balākāśca tīdāryaḥ kurarāstathā
--- raktākṣā mallikākṣāḥ savāraṭāḥ

nandīmukhā megharāvāḥ śarākhyā jalakukkuṭāḥ
samudrakākāḥ kuharā goṭubhā gaṇḍamālakāḥ

kāraṇḍavāḥ sajomūtāstathā'nye jalacāriṇaḥ
pāke ca madhurā vṛṣyā guravaśca ---

---

haṃsastu gururatyarthaṃ vṛṣyo'tha kaphapittalaḥ
śarāriḥ pākahaṃsaśca cakravākastathaiva ca

jālapādāstathā'nye ca haṃsatulyā guṇaiḥ smṛtāḥ
krauñcaḥ kuliṅgo draviḍaḥ padmapuṣkarasādakaḥ

vārdhīṇasaḥ sārasaśca sāraṅgo dhāmṛṇyalikaḥ
ete cānye cābucarāḥ pakṣiṇo guravaḥ smṛtāḥ

rase pāke ca madhurā uṣṇāḥ salavaṇānvayāḥ
vṛṣyā vātaharāścaiva kaphapittavivardhanāḥ

nalamīno jhaṣaścaiva pāṭhīnaścarmapīvaraḥ
celīmaḥ śakulārbhaśca śilīndhro gargarastathā

puṣkaro gokaro mūco vāraḍaḥ śūlapāṭalaḥ
kṛṣṇamatsyaḥ śvetamatsyo gomatsyo rohitastathā

śakalī mahāśakalī campaḥ kundo'tha madguraḥ
ilyaḥ śaṅkuścicaraṇo rājīvaḥ śapharī tathā

ete cānye ca bahavo vividhā matsyajātayaḥ
rase pāke ca madhurā vātaghnā vṛṣyabṛṃhaṇāḥ

uṣṇavīryāśca te jñeyā guravaḥ kaphapittalāḥ
laghvāśayāste'nye tu kiñcittiktānvayāntarāḥ

rohito nalamīnaśca --- laghavaḥ smṛtāḥ /
kūrmo duṭiśca nakraśca makaro'vakuśastathā

timiḥ sahasradaśanastathaiva ca timiṅgilaḥ
iñcakaḥ śuktikaḥ śaṅkho'valūko jalasūkaraḥ

śambūkaścandrikaḥ śṛṅgī karkaṭaḥ śakuṭīpayaḥ
ete cānye ca jalajā madhurā rasapākayoḥ

guravaścoṣṇavīryāśca guravaḥ kaphapittalāḥ
ānūpe tūttamaścchāgaḥ śreṣṭho matsyeṣu rohitaḥ

jalaje śuktikūrmau ca vāraṭo'pyatha pakṣiṣu
eṇo mṛgeṣu pravaraḥ pratudeṣu śuko varaḥ

viṣayeṣu --- gnyo lāvaḥ khageṣu tu /
tittiro viṣkireṣvagnyaḥ kāko'gnyaḥ prasaheṣu tu

laghūktaṃ rudhiraṃ māṃsād guru medaśca carma ca
majjāvase gurutare tebhyo guru śiraḥ smṛtam

laghuḥ skandho hi śirasastasmāt pārśvaṃ laghu smṛtam
pārśvāt sakthi laghu proktaṃ pādamāṃsaṃ guru smṛtam

vasā medaśca majjā ca vātapittahitāḥ smṛtāḥ
rase pāke ca madhurāḥ snehācchleṣmaprakopanāḥ

raktaṃ raktapraśamanaṃ māṃsaṃ māṃsamvivardhanam
guravaḥ prāṇino bālā yuvāno vṛṣyabṛṃhaṇāḥ

vṛddhāstu vātalā rūkṣāḥ puṃbhyastu laghavaḥ striyaḥ
mṛgāllaghutaraḥ pakṣī pakṣibhyo'mbucaro guruḥ

mahāśarīrāścālpakāyā laghavo jīvaka smṛtāḥ
vijñeyāścālpabhugbhyo'pi guravo bahubhojanāḥ

laghavo'lpabhūmicarā alasebhyo vidūragāḥ
laghudeśacarā alpā laghavo laghubhojanāḥ

gurudeśacarāḥ sthūlā guravo gurubhojanāḥ
pāśabaddhaṃ guru māṃsaṃ rūkṣaṃ kṣudvyādhibhirhatam

śvabhirhataṃ pītaraktaṃ nātibṛṃhaṇamucyate
piṣairhatamabhakṣyaṃ syācchuṣkaṃ nātiguṇāvaham

sadyo'parikliṣṭahataṃ māṃsaṃ dhātuṃ vivardhayet
pūtimāṃsaṃ gurvasāraṃ tadavṛṣyamabṛṃhaṇam

evaṃ māṃsaviśeṣajñaḥ kalpayedbhojane sadā
bālānāṃ gurviṇīnāṃ vā bālaputrāsu vā bhiṣak

duṣprajātāsu vā strīṣu bāle vā kṛśite sadā
prayuñjan siddhimāpnoti tattvavid vṛddhajīvaka

iti ha smāha bhagavān kaśyapaḥ
iti khileṣu māṃsaguṇaviśeṣīyādhyāyaścaturviṃśatitamo'dhyāyaḥ

atha deśasātmyādhyāyaḥ pañcaviṃśaḥ
athāto deśasātmyādhyāyaṃ vyākhyāsyāmaḥ

iti ha smāha bhagavān kaśyapaḥ

kaśyapākhyamṛṣiśreṣṭhaṃ pṛṣṭavān --- rocataḥ
deśasātmyamajānantaḥ kathaṃ kuryuścikitsitam

kasya deśasya madhye tu kurukṣetraṃ pratiṣṭhitam
ityevamukto bhagavān kāśirājo mahāmuniḥ

idamuttaramakliṣṭaṃ vyākhyātumupacakrame
kurukṣetraṃ madhyadeśādyojanānāṃ śataṃ param

samastān ṣaḍrasān prāyo bhuñjate madhyadeśajāḥ
bhakṣyabhojyānnavīrāste tu bhuñjanto vā'sakṛttathā

pūrvadeśastu vijñeyo madhuraḥ śītalo guruḥ
kumāravartanīmādau kaṭīvarṣastathaiva ca

magadhāsu mahārāṣṭramṛṣabhadvīpameva ca
pauṃḍravardhanakaṃ cāpi mṛttikāvardhamānakam

karvaṭaṃ ca samātaṅgaṃ tāmaliptaṃ sacīrakam
priyaṅgumatha kauśalyaṃ kaliṅgapṛṣṭhapūrakam

eṣu plīhavino martyā galagaṇḍikameva ca
guḍaśālyodanaprāyā matsyabhojanasevinaḥ

prāyaśo madhurāhārā vātaśleṣmātmakā narāḥ
teṣāṃ kaṭukatiktaṃ ca rūkṣamuṣṇaṃ ca bhojanam

yaccānyadapi śleṣmaghnaṃ teṣāṃ tattat prayojayet
kañcīpadā navadhvānā kāvīrāstulyayorapi

vānasī kumudārājyaṃ ciripālistathaiva ca
cīrarājyañca corāṇāṃ pulindaṃ draviḍeṣu ca

karaghāṭaśanānāṃ ca vivehā maṇḍapeṣu ca
kāntāraṃ ca varāhaṃ ca ghaṭāsvābhīrameva ca

dakṣiṇāṃ diśamāśritya deśā vi ---
---
khilasthānasyaitāvāneva bhāga upalabdhaḥ
kāśyapasaṃhitā vṛddhajīvakīyatantraṃ ca
etāvatyevopalabdhabhāge
viśrāmyati