Kalpadrumāvadānamālā · Verses 281-300

iti śrutvā guror vākya sa subhūtir guṇotsukaḥ
tatheti pratisaṃśrutya dhyānacaryām upāśrayat* //

tato 'nyad vanam āśritya guror ājñāsamādhṛtaḥ
sarvendriyavinirgatyā vyaharaddhyānatatparaḥ //

tatrādhivasato 'syāpi krodhāgniḥ samudīritaḥ
karmādhānabalābhyāsān naiva śāntim upāyayau //

tatra ca vanaṣaṇḍe yā vasantī vanadevatā
sā subhūtiṃ mahākrodhaṃ dṛṣṭvaivaṃ samacintayat* //

subhūtir brāhmaṇo hy eṣa sarvavedārthapāragaḥ
sarvamantravidhānajñaḥ sutīkṣṇakrodhabāhulaḥ //

kadācit kupitaś cāyaṃ krodhataḥ śāpavahninā
dhakṣyati parvatāṃś cāpi sapakṣijantumānavān* //

samādhidhyānayukto 'pi naiva cittasamāhitaḥ
jñānavijñānadharmeṣu viśeṣaṃ nādhigacchati //

yadi bauddheṣu dharmeṣu niyukto 'yaṃ dvijottamaḥ
kṣipraṃ kleśān vinirjitya bodhicittaṃ ca lapsyati //

bodhicitte pralabdhe tu tadā lokahite caret*
bodhisatvo mahāvijño bhaviṣyati na saṃśayaḥ //

iti niścitya sā devī kāruṇyahitamānasā
taṃ subhūtiṃ samāgamya jagādaivaṃ puraḥ sthitā //

śṛṇu vatsa mahābhāga yan mayā hitam ucyate
dhanyo 'si tvaṃ mahādhīra maharṣir dvijasattama //

kimarthaṃ vasase caivam ekākī nirjane vane
niścittaḥ pratisaṃlīnaḥ kāṣṭhapāṣāṇavadvṛthā //

dharmārthakāmamokṣeṣu yadi vāñchāsti te yate
buddhasya vacanaṃ śrutvā cara saṃbodhisatpathe //

buddho hi bhagavān nāthaḥ sarvajño lokanāyakaḥ
munīndraḥ śrīdhanaḥ śāstā sarvadharmānupālakaḥ //

tasyaiva dharmatā śuddhā daśakuśalasaṃmatā
ṣaṭ ca pāramitāḥ khyātāḥ paratreha śivaṃkarāḥ //

dhanyās te bhikṣavaś caiva buddhasyopāsakāś ca ye
sarvasatvahitārthena saṃbodhiguṇasādhakāḥ //

tvaṃ cāpi hi tathā matvā svaparātmahitārthataḥ
triratnaśaraṇaṃ gatvā cara brahman vratottamam* //

tataḥ kleśagaṇān hitvā brahmacāriñ jinendravat*
sākṣād arhatpadaṃ prāpya nirvṛtisukham āpnuyāḥ //

iti śrutvā subhūtiḥ sa triratnaguṇavarṇanām*
tathānumoditaḥ prāha tāṃ devatāṃ puraḥ sthitām* //

tathāhaṃ devate yāmi saṃbuddhadarśanaṃ prati
triratnasamayaṃ prāptum iccāmi tvatprasādataḥ //