કલ્પદ્રુમાવદાનમાલા · શ્લોક 281-300

ઇતિ શ્રુત્વા ગુરોર્ વાક્ય સ સુભૂતિર્ ગુણોત્સુકઃ
તથેતિ પ્રતિસંશ્રુત્ય ધ્યાનચર્યામ્ ઉપાશ્રયત્* ॥

તતો ઽન્યદ્ વનમ્ આશ્રિત્ય ગુરોર્ આજ્ઞાસમાધૃતઃ
સર્વેન્દ્રિયવિનિર્ગત્યા વ્યહરદ્ધ્યાનતત્પરઃ ॥

તત્રાધિવસતો ઽસ્યાપિ ક્રોધાગ્નિઃ સમુદીરિતઃ
કર્માધાનબલાભ્યાસાન્ નૈવ શાન્તિમ્ ઉપાયયૌ ॥

તત્ર ચ વનષણ્ડે યા વસન્તી વનદેવતા
સા સુભૂતિં મહાક્રોધં દૃષ્ટ્વૈવં સમચિન્તયત્* ॥

સુભૂતિર્ બ્રાહ્મણો હ્ય્ એષ સર્વવેદાર્થપારગઃ
સર્વમન્ત્રવિધાનજ્ઞઃ સુતીક્ષ્ણક્રોધબાહુલઃ ॥

કદાચિત્ કુપિતશ્ ચાયં ક્રોધતઃ શાપવહ્નિના
ધક્ષ્યતિ પર્વતાંશ્ ચાપિ સપક્ષિજન્તુમાનવાન્* ॥

સમાધિધ્યાનયુક્તો ઽપિ નૈવ ચિત્તસમાહિતઃ
જ્ઞાનવિજ્ઞાનધર્મેષુ વિશેષં નાધિગચ્છતિ ॥

યદિ બૌદ્ધેષુ ધર્મેષુ નિયુક્તો ઽયં દ્વિજોત્તમઃ
ક્ષિપ્રં ક્લેશાન્ વિનિર્જિત્ય બોધિચિત્તં ચ લપ્સ્યતિ ॥

બોધિચિત્તે પ્રલબ્ધે તુ તદા લોકહિતે ચરેત્*
બોધિસત્વો મહાવિજ્ઞો ભવિષ્યતિ ન સંશયઃ ॥

ઇતિ નિશ્ચિત્ય સા દેવી કારુણ્યહિતમાનસા
તં સુભૂતિં સમાગમ્ય જગાદૈવં પુરઃ સ્થિતા ॥

શૃણુ વત્સ મહાભાગ યન્ મયા હિતમ્ ઉચ્યતે
ધન્યો ઽસિ ત્વં મહાધીર મહર્ષિર્ દ્વિજસત્તમ ॥

કિમર્થં વસસે ચૈવમ્ એકાકી નિર્જને વને
નિશ્ચિત્તઃ પ્રતિસંલીનઃ કાષ્ઠપાષાણવદ્વૃથા ॥

ધર્માર્થકામમોક્ષેષુ યદિ વાઞ્છાસ્તિ તે યતે
બુદ્ધસ્ય વચનં શ્રુત્વા ચર સંબોધિસત્પથે ॥

બુદ્ધો હિ ભગવાન્ નાથઃ સર્વજ્ઞો લોકનાયકઃ
મુનીન્દ્રઃ શ્રીધનઃ શાસ્તા સર્વધર્માનુપાલકઃ ॥

તસ્યૈવ ધર્મતા શુદ્ધા દશકુશલસંમતા
ષટ્ ચ પારમિતાઃ ખ્યાતાઃ પરત્રેહ શિવંકરાઃ ॥

ધન્યાસ્ તે ભિક્ષવશ્ ચૈવ બુદ્ધસ્યોપાસકાશ્ ચ યે
સર્વસત્વહિતાર્થેન સંબોધિગુણસાધકાઃ ॥

ત્વં ચાપિ હિ તથા મત્વા સ્વપરાત્મહિતાર્થતઃ
ત્રિરત્નશરણં ગત્વા ચર બ્રહ્મન્ વ્રતોત્તમમ્* ॥

તતઃ ક્લેશગણાન્ હિત્વા બ્રહ્મચારિઞ્ જિનેન્દ્રવત્*
સાક્ષાદ્ અર્હત્પદં પ્રાપ્ય નિર્વૃતિસુખમ્ આપ્નુયાઃ ॥

ઇતિ શ્રુત્વા સુભૂતિઃ સ ત્રિરત્નગુણવર્ણનામ્*
તથાનુમોદિતઃ પ્રાહ તાં દેવતાં પુરઃ સ્થિતામ્* ॥

તથાહં દેવતે યામિ સંબુદ્ધદર્શનં પ્રતિ
ત્રિરત્નસમયં પ્રાપ્તુમ્ ઇચ્ચામિ ત્વત્પ્રસાદતઃ ॥