Kaliviḍambana · Verses 1-20

na bhetavyaṃ na boddhavyaṃ na śrāvyaṃ vādino vacaḥ
jhaṭiti prativaktavyaṃ sabhāsu vijigīṣubhiḥ //

asaṃbhramo vilajjatvam avajñā prativādini
hāso rājñaḥ stavaś ceti pañcaite jayahetavas //

uccair udghoṣya jetavyaṃ madhyasthaś ced apaṇḍitas
paṇḍito yadi tatraiva pakṣapāto 'dhiropyatām //

lobho hetur dhanaṃ sādhyaṃ dṛṣṭāntas tu purohitas
ātmotkarṣo nigamanam anumāneṣv ayaṃ vidhis //

abhyāsyaṃ lajjamānena tattvaṃ jijñāsunā ciram
jigīṣunā hriyaṃ tyaktvā kāryaḥ kolāhalo mahān //

pāṭhanair granthanirmāṇaiḥ pratiṣṭhā tāvad āpyate
evam ca tathyavyutpattir āyuṣo 'nte bhaven na vā //

stotāraḥ ke bhaviṣyanti mūrkhasya jagatītale
na stauti cet svayaṃ ca svaṃ kadā tasyāstu nirvṛtis //

vācyatāṃ samayo 'tītaḥ spaṣṭam agre bhaviṣyati
iti pāṭhayatāṃ granthe kāṭhinyaṃ kutra vartate //

agatitvam atiśraddhā jñānābhāsena tṛptatā
trayaḥ śiṣyaguṇā hy ete mūrkhācāryasya bhāgyajās //

yadi na kvāpi vidyāyāṃ sarvathā kramate matis
māntrikās tu bhaviṣyāmo yogino yatayo 'pi vā //

avilambena saṃsiddhau māntrikair āpyate yaśas
vilambe karmabāhulyaṃ vikhyāpyāvāpyate dhanam //

sukhaṃ sukhiṣu duḥkhe 'pi jīvanaṃ duḥkhaśāliṣu
anugrahāyate yeṣāṃ te dhanyāḥ khalu māntrikās //

yāvad ajñānato maunam ācāro vā vilakṣaṇas
tāvan māhātmyarūpeṇa paryavasyati māntrike //

cārān vicārya daivajñair vaktavyaṃ bhūbhujāṃ phalam
grahacāraparijñānaṃ teṣām āvaśyakaṃ yatas //

putra ity eva pitari kanyakety eva mātari
garbhapraśneṣu kathayan daivajño vijayī bhavet //

āyuspraśne dīrgham āyur vācyaṃ mauhūrtikair janais
jīvanto bahumanyante mṛtāḥ prakṣyanti kaṃ punas //

sarvaṃ koṭidvayopetaṃ sarvaṃ kāladvayāvadhi
sarvaṃ vyāmiśram iva ca vaktavyaṃ daivacintakais //

nirdhanānāṃ dhanāvāptiṃ dhaninām adhikaṃ dhanam
bruvāṇāḥ sarvathā grāhyā lokair jyautiṣikā janās //

śatasya lābhe tāmbūlaṃ sahasrasya tu bhojanam
daivajñānām upālambho nityaḥ kāryaviparyaye //

api sāgaraparyantā vicetavyā vasuṃdharā
deśo hy aratnimātre 'pi nāsti daivajñavarjitas //