Kalika Purana · Chapter 5

kālikāpurāṇam pañcamo'dhyāyaḥ kālīstutiḥ
atha kālikā purāṇa adhyāya ५
// mārkaṇḍeya uvāca //
atha brahmā tadovāca dakṣāya sumahātmane /
marīcipramukhebhyaśca vacanañcedamañjasā

// brahmovāca //
bhavitrī śambhupatnī kā kā taṃ sanmohayiṣyati /
iti sañcintayan kāntāṃ na sthirīkartumutsahe

viṣṇumāyāmṛte dakṣa mahāmāyāṃ jaganmayīm /
nānyā tanmohakartrī syāt sandhyāsāvitryumāmṛte

tasmādahaṃ viṣṇumāyāṃ yoganidrāṃ jagatprasūm /
staumi sā cārurūpeṇa śaṅkaraṃ mohayiṣyati

bhavāṃstu dakṣa tāmeva yajatāṃ viśvarūpiṇīm /
yathā tava sutā bhūtvā harajāyā bhaviṣyati

// mārkaṇḍeya uvāca //
evaṃ vacanamākarṇya brahmaṇa: paramātmanaḥ /
uvāca dakṣaḥ sraṣṭāraṃ marīcyādibhirīritaḥ

// dakṣa uvāca //
yathāttha bhagavaṃstathyaṃ tvaṃ lokeśa jagaddhitam /
tat kariṣyāmahe samyag yathā syāttanmanoharā

tathā tathā bhaviṣyāmi yathā mama sutā svayam /
viṣṇumāyā bhavet patnī bhūtvā śambhormahātmanaḥ

// mārkaṇḍeya uvāca //
evameveti tairuktaṃ marīcipramukhaistadā /
yaṣṭuṃ dakṣaḥ samārebhe mahāmāyāṃ jaganmayīm

kṣīrodottaratīrasthastāṃ kṛtvā hṛdayasthitām /
tapastaptuṃ samārebhe draṣṭuṃ pratyakṣato'mbikām

dīvyavarṣeṇa dakṣo'pi sahasrāṇāṃ trayaḥ samāḥ /
tapaścacāra niyataḥ saṃyatātmā dṛḍhavrataḥ

mārutāśī nirāhāro jalāhārī ca parṇabhuk /
evaṃ nināya tatkālaṃ cintayaṃstāṃ jaganmayīm

gate dakṣe tapaḥ kartuṃ brahmā sarvajagatpatiḥ /
jagāma mandarābhyāsaṃ puṇyātpuṇyataraṃ varam

tatra gatvā jagaddhātrīṃ viṣṇumāyāṃ jaganmayīm /
tuṣṭāva vāgbhirarthyābhirekatānaṃ śataṃ samāḥ

// brahmovāca //
vidyāvidyātmikāṃ śuddhāṃ nirālambāṃ nirākulām /
staumi devīṃ jagaddhātrīṃ sthūlāṇīyaḥ svarūpiṇīm

yasyā udeti ca jagatpradhānākhyaṃ jagatparam /
yasyāstadaṃśabhūtāṃ tvāṃ staumi nidrāṃ sanātanīm

tvaṃ citiḥ paramānandā paramātmasvarūpiṇī /
śaktistvaṃ sarvabhūtānāṃ tvaṃ sarveṣāṃ ca pāvanī

tvaṃ sāvitrī jagaddhātrī tvaṃ sandhyā tvaṃ ratirdhṛtiḥ /
tvaṃ hi jyotiḥ svarūpeṇa saṃsārasya prakāśinī /
tathā tamaḥ svarūpeṇa cchādayantī sadā jagat

tvameva sṛṣṭirūpeṇa saṃsāraparipūraṇī

sthitirūpeṇa ca harerjagatāṃ ca hitaiṣiṇī /
tathaivāntasvarūpeṇa jagatāmantakāriṇī

tvaṃ medhā tvaṃ mahāmāyā tvaṃ svadhā pitṛmodinī /
tvaṃ svāhā tvaṃ namaskāra vaṣaṭkārau tathā smṛtiḥ

tvaṃ puṣṭistvaṃ dhṛtimaitrī karuṇā muditā tathā /
tvameva lajjā tvaṃ śāntistvaṃ kāntirjagadīśvarī

mahāmāyā tvaṃ ca svāhā svadhā ca pitṛdevatā

yā sṛṣṭiśaktirasmākaṃ sthitiśaktiśca yā hareḥ /
antaśaktistathaiśānī sā tvaṃ śaktiḥ sanātanī

ekā tvaṃ dvividhā bhūtvā mokṣasaṃsārakāriṇī /
vidyāvidyāsvarūpeṇa svaprakāśāprakāśataḥ

tvaṃ lakṣmīḥ sarvabhūtānāṃ tvaṃ chāyā tvaṃ sarasvatī /
trayīmayī trimātā tvaṃ sarvabhūtasvarūpiṇī

udgīti: sāmavedasya yā pitṛgaṇarañjanī /
tvaṃ vediḥ sarvayajñānāṃ sāmidhenī tathā haviḥ

yadavyaktamanirdeśyaṃ niṣkalaṃ paramātmanaḥ /
rūpaṃ tathaiva tanmātraṃ sakalaṃ ca jaganmayam

yā mūrttirvitatā sarvadharitrī vibhratī kṣitim /
sā tvaṃ viśvambhare loke śaktibhūtipradā sadā

tvaṃ lakṣmīścetanā kāntistvaṃ puṣṭistvaṃ sanātanī /
tvaṃ kālarātristvaṃ muktiḥ śāntiḥ prajñā tathā smṛtiḥ

saṃsārasāgarottāra- taraṇi: sukhamokṣade /
prasīda sarvajagatāṃ tvaṃ gatistvaṃ matiḥ sadā

tvaṃ nityā tvamanityā ca tvaṃ carācaramohinī /
tvaṃ sandhinī sarvayoga-sāṅgopāṅgavibhāvinī

cintā kīrtiryatīnāṃ tvaṃ tvaṃ tadaṣṭāṅgasaṃyutā /
tvaṃ khaḍginī śūlinī ca cakriṇī ghorarūpiṇī

tvamīśvarī janānāṃ tvaṃ sarvānugrahakāriṇī /
viśvādistvamanādistvaṃ viśvayonirayonijā /
anantā sarvajagatastvamevaikāntakāriṇī

nitāntanirmalā tvaṃ hi tāmasīti ca gīyase /
tvaṃ hiṃsā tvamahiṃsā ca tvaṃ kālī caturānanā

tvaṃ parā sarvajananī damanī dāminī tathā /
tvayyeva līyate viśvaṃ bhāti tattvaṃ bibharṣi ca

tvaṃ sṛṣṭihīnā tvaṃ sṛṣṭistvamakarṇāpi saśrutiḥ /
tapasvinī pāṇipādahīnā tvaṃ nitarāṃ grahā

tvaṃ dyaustvamāpastvaṃ jyotirvāyustvaṃ ca nabho manaḥ /
ahaṅkāro'pi jagatāmaṣṭadhā prakṛtiḥ kṛtiḥ

jagannābhirmerurūpadhāriṇī nālikāparā /
parāparātmikā śuddhā māyā mohātikāriṇī

kāraṇaṃ kāryabhūtañca satyaṃ śāntaṃ śivāśive /
rūpāṇi tava viśvārthe rāgavṛkṣaphalāni ca

nitānta hasvā dīrghā ca nitāntāṇubṛhattanuḥ /
sūkṣmāpyakhilalokasya vyāpinī tvaṃ jaganmayī

mānahīnā vimānāti - vimānonmānasambhavā /
yadaṣṭivyaṣṭisambhogarāgādigalitāśayā /
tatte mahimni tadrūpaṃ tava bhrāntyādikaṃ ca yat

iṣṭaniṣṭhāvipākajñā yatheṣṭāniṣṭakāraṇam /
sargādimadhyāntamayaṃ nimnaṃ rūpaṃ tathaiva ca

vicārāṣṭāṅgayogena sampādyaivaṃ muhurmuhuḥ /
yat sthirīkriyate tattvaṃ tatte rūpaṃ sanātanam

vāhyāvāhye sukhaṃ duḥkhaṃ jñānājñāne layālayau /
upatāpastathā śāntirbhūtistvaṃ jagataḥ pateḥ

yasyāḥ prabhāvaṃ no vaktuṃ śaknoti bhuvanatraye /
tasyaiva sanmohakarī sā tvaṃ kiṃ stūyase mayā

yoganidrā mahānidrā mohanidrā jaganmayī /
viṣṇumāyā ca prakṛtiḥ kastvāṃ stutyā vibhāvayet

mama viṣṇoḥ śaṅkarasya yā vapurvahanātmikā /
tasyāḥ prabhāvaṃ ko vaktuṃ guṇān vettuṃ ca kaḥ kṣamaḥ

prakāśa karaṇajyoti: svarūpāntaragocarā /
tvameva jaṅgamastheyarūpaikā bāhyagocarā

prasīda sarvajagatāṃ jananī strīsvarūpiṇī /
viśvarūpiṇi viśveśe prasīda tvaṃ sanātani

// mārkaṇḍeya uvāca //
evaṃ saṃstūyamānā sā yoganidrā viriñcinā /
āvirbabhūva pratyakṣaṃ brahmaṇa: paramātmanaḥ

strigdhāñjanadyutiścārurūpottuṅagā caturbhujā /
siṃhasthā khaḍganīlābjahastā muktakacotkarā

samakṣamatha tāṃ vīkṣya sraṣṭā sarvajagadguruḥ /
bhaktyā vinamratuṅgā sastuṣṭāva ca nanāma ca

// brahmovāca //
namo namaste jagataḥ pravṛttinivṛttirūpe sthitisargarūpe /
carācarāṇāṃ bhavatī ca śaktiḥ sanātanī sarvavimohanīti

yā śrīḥ sadā keśavamūrttimāyā viśvambharā yā sakalaṃ vibhartti /
hīryoginī yā mahitā manojñā sā tvaṃ namaste paramātmasāre

yāmādipūrve hṛdi yogino yāṃ vibhāvayanti pramitipratītām /
prakāśaśuddhādiyutāṃ virāgāṃ sā tvaṃ hi vidyā vividhāvalambā

kūṭasthamavyaktamacintya rūpaṃ tvaṃ vibhratī kālamayaṃ jaganti /
vikārabījaṃ prakaroṣi nityaṃ pratnāni nyūlānyatha madhyamāni

sattvaṃ rajo'tho tama ityamīṣāṃ vikārahīnā samavasthitiryā /
sā tvaṃ guṇānāṃ jagadekaheturvāhyāntarālaṃ bhavatīva yāti

aśeṣajagatāṃ bīje jñeyajñānasvarūpiṇi /
jagaddhitāya jagatāṃ viṣṇumāye namo'stute

// mārkaṇḍeya uvāca //
ityākarṇya vacastasya kālī lokavimohinī /
brahmāṇamūce jagatāṃ sraṣṭāraṃ ghanaśabdavat

// devyuvāca //
brahman kimarthaṃ bhavatā stutāhamavadhāraya /
ucyatāṃ yadadhṛṣyo'sti tacchīghraṃ purato mama

pratyakṣaṃ mayi jātāyāṃ siddhiḥ kāryasya niścitā /
tasmātte vāñchitaṃ brūhi yat kariṣyāmi bhāvitā

// brahmovāca //
ekaścarati bhūteśo na dvitīyāṃ samīhate /
taṃ mohaya yathā dārān svayaṃ sa ca jighṛkṣati

tvadṛte tasya no kācid bhaviṣyati manoharā /
tasmāttvamekarūpeṇa bhavasya bhava mohanī

yathā dhṛtaśarīrā tvaṃ lakṣmīrūpeṇa keśavam /
āmodayasi viśvasya hitāyaitaṃ tathā kuru

kāntābhilāṣamātraṃ me nininda vṛṣabhadhvajaḥ /
kathaṃ punaḥ sa vanitāṃ svecchayā saṃgrahīṣyati

hare'gṛhītakānte tu kathaṃ sṛṣṭiḥ pravartate /
ādyantamadhyahetau ca tasmiñchambhau virāgiṇi

iti cintāparo nāhaṃ tvadanyaṃ śaraṇantviha /
lavdhavāṃstena viśvasya hitāyaitat kurusva me

na viṣṇurasya mohāya na lakṣmīrna manobhavaḥ /
na cāpyahaṃ jaganmātastasmāt tvaṃ mohayeśvaram

kīrtistvaṃ sarvabhūtānāṃ yathā tvaṃ hrīryatātmanām /
yathā viṣṇoḥ priyaikā tvaṃ tathā sanmohayeśvaram

// mārkaṇḍeya uvāca //
atha brahmāṇamābhāṣya kālī yogamayī punaḥ/
yaduvāca mahābhāgāstacchṛṇvantu dvijottamāḥ

// śrīkālikāpurāṇe kālīstutirnāma pañcamo'dhyāyaḥ

kālikā purāṇa hindī anuvāda paḍhane ke lie dekheṃ-[https://ptvaishnavi.blogspot.com/2023/02/Kalika-puran-adhyay-5.html DP Karmakand]