Kalika Purana · Chapter 44

kālikāpurāṇam catuścatvāriṃśo'dhyāyaḥ kālīharasamāgamaḥ
atha śrīkālikā purāṇa adhyāya ४४
// mārkaṇḍeya uvāca //
atha śrutvā vacaḥ śambhorgirijātīva harṣitā /
mene prāptaṃ tadā śambhuṃ sundaraṃ dayitaṃ patim

atha prāha tadā kālī sakhīvaktreṇa śaṅkaram /
yathā sa śṛṇute vākyaṃ śrotumicchaṃśca śaṅkaraḥ

na sandhāvatibhedena pravartante'tra sajjanāḥ /
maryādayā harastaṃ me pāṇiṃ gṛhṇātu śaṅkaraḥ

pitṛdattā bhavet kanyā tapodattā bhavennahi /
tapasā cet pradattāhaṃ māṃ tātaśca pradāsyati

tasmāt samprārthya pitaraṃ himavantaṃ nageśvaram /
vaivāhikena vidhinā pāṇiṃ gṛhṇātu me haraḥ

// mārkaṇḍeya uvāca //
ityuktvā virarāmātha kālī lajjāsamanvitā /
haro'pi tadvacaḥ satyaṃ tathyaṃ yogyaṃ tadāgrahīt

tataḥ sa sagaṇaḥ śambhustatra vāsaṃ tadākarot /
gaṅgāvataraṇe sānau yathāpūrvaṃ tathādhunā

kālī piturgṛhaṃ yātā sakhībhiḥ parivāritā /
nālokayantī sā dīnā gurūṇāṃ vadanaṃ satī

etasminnantare saptamarīcipramukhān munīn /
cintayāmāsa śaśibhṛt kālīṃ prārthayituṃ tadā

cintitāḥ saptamunayastatkṣaṇānmadanāriṇā /
ākṛṣṭā iva kenāpi tatsakāśamupāgatāḥ

tān munīn dadṛśe śambhuḥ saptāgnīniva dīpitān /
arundhatīṃ vasiṣṭhasya sakāśe dadṛśe satīm

arundhatīṃ tato dṛṣṭvā vasiṣṭhasya samīpataḥ /
mene yoṣidgrahaṃ dharma munibhiścāpyavarjitam

tataste munayaḥ sarve sampūjya vṛṣabhadhvajam /
idamūcuḥ praharṣeṇa smaraṇākarṣitāḥ priyam

// ṛṣaya ūcuḥ //
yat pratyakṣaṃ dṛśyate śuddharūpaṃ candraprakhyaṃ candrakhaṇḍopaśobhi /
antaḥ prajñaṃ bhāvitaṃ tanmunīnāṃ bhāgyaṃ dṛṣṭaṃ bhāgadheyena muktaiḥ

prajñātantraṃ dhyānatantraṃ purastānnityaṃ dhyeyaṃ dhyāyināṃ svaprakāśam /
puñjībhūtaṃ bāhyatattvena śaśvad yogyaprāpyaṃ dhāma śambhorudāram

dṛṣṭvā yasyaivāgrabhāgaṃ sa netraṃ trāṇāya syād darśanaṃ sūryatulyam /
taddhāmedaṃ sthāna sarvasya nityaṃ bhaktyā stutyaṃ taṃ namaḥ śambhudeham

prakāśate yaḥ prathamādibhāgataḥ sthita: sa vāme ya ihaiva netā /
so'smākamastu prathamaṃ svasiddhyai harasya śaktyā vidhṛto lalāṭe

yaḥ pradhānātmakaḥ sattvarajobhyāṃ tamasānvitaḥ /
puruṣa: sarvajagatāṃ sa haro naḥ prasīdatu

// mārkaṇḍeya uvāca //
iti saṃstutya deveśaṃ munayo vinayānatāḥ /
ūcuḥ kimarthaṃ bhavatā smṛtāstanno nigadyatām

teṣāṃ tadvacanaṃ śrutvā śaṅkaraḥ prahasanniva /
jagāda tānmunīn sarvānābhāṣya ca pṛthak pṛthak

// īśvara uvāca //
hitāya sarvajagatāṃ sambhogāyātmanastathā /
dārān grahītumicchāmi tathā santānavṛddhaye

sahāyaṃ tatra kurvantu bhavanto mama sāmpratam /
madarthe ca tataḥ kālīṃ yācantāṃ tuhinācalam

mahatā tapasā kālī māṃ patiṃ laghu vindatām /
kintu grahīṣye vidhinā tasmād yācantu taṃ girim

yathā yathā svayaṃ kālīṃ śailo dātuṃ samutsahet /
tathā tathā vidadhvaṃ hi yūyaṃ vāgvibhavānvitāḥ

// mārkaṇḍeya uvāca //
haraṃ sambodhya munayo hyagacchan girirāḍgṛham /
tena prapūjitāste tu procustaṃ munayo girim

// munayaḥ ūcuḥ //
yaścandraśekharo devo devadevaśca yo mataḥ /
śāpānugrahaṇe śakto ya eko jagatāṃ patiḥ

yaḥ saṃharati sarvāṇi jaganti pralayodbhave /
yo vibhūtiprado bhakte nānārūpo manoharaḥ /
sa te duhitaraṃ kālīṃ bhāryāmādātumicchati

yadi paśyasi tvaṃ yogyaṃ varaṃ taṃ duhituḥ samam /
tadā prayaccha tanayāṃ kālīṃ śaśibhṛte gire

// mārkaṇḍeya uvāca //
ityuktastairgiripatiściraṃ svahṛdayasthitam

duhituśca priyaṃ jñātvā prāpya sadvacanānmudam /
āha cedaṃ prakāśena yuṣmābhistvahamāgataiḥ

pāvito muniśārdūlaiḥ pūritaśca manorathaḥ /
dāsyāmi śambhave putrīṃ yuṣmābhiḥ prārthitastvaham

pūrvameva tapastaptvā tayeśaḥ patirīhitaḥ /
dhāturniyojanamidaṃ ko'nyathā kartumutsahet

ko'nyaḥ prārthayituṃ śaktaḥ sutāṃ mama vinā harāt /
hareṇāvagṛhītāyā tāmanyaḥ kaḥ samutsahet

haraṃ gṛhītvā manasā nānyaṃ sāpīha vāñchati /
ityuktvā menayā sārdhaṃ sutāṃ dātuṃ ca śambhave /
aṅgīkṛtya visṛṣṭāste hyanuprāpurmaheśvaram

te gatvā munayaḥ sarve marīcipramukhā dvijāḥ

śailarājo yadācaṣṭa tadūcurmadanāraye /
himavāṃstanayāṃ dātuṃ tubhyamutsahate haraḥ

yadidānīṃ tvayā kurtuṃ yujyate kriyatāṃ tu tat /
asmāṃścāpyanujānīhi hara gantuṃ nijāspadam

siddhaṃ jñātvā haraḥ sādhyaṃ muditastān visṛṣṭavān /
yathāyogyaṃ samābhāṣya kramādekaikaśo munīn

kālīvivāhāvasare yūyamāyāta māṃ prati /
iti te vai hareṇoktaṃ pratiśrutyarṣayo yayuḥ

athānyonyapriyatayā kṛtvā kṛtvā gatāgatam /
samayaṃ kārayāmāsa vivāhāya haro girim

mādhave māsi pañcamyāṃ site pakṣe gurordine /
candre cottaraphālgunyāṃ bharaṇyādau sthite ravau

āgatā munayastatra marīcipramukhā muhuḥ /
hareṇa cintitāḥ sarve tathā brahmādayaḥ surāḥ

tathā ca sarve dikpālā munayaśca tapodhanāḥ /
śacyā saha tathā śakro brahmāṇyādyāstu mātaraḥ /
nāradaśca gatastatra devarṣirbrahmaṇaḥ sutaḥ

etaiḥ paricaraiḥ sārdhaṃ gaṇairāpyāyitaḥ svakaiḥ /
vaivāhikena vidhinā giriputrīṃ haro'grahīt // ४४ / /
vivāhe girijā śambhoḥ sarpā ye'ṣṭau tanau sthitāḥ /
te jāmbunadasaṃnaddhā alaṅkārāstadābhavan

dvibhujo'bhūnmahādevo jaṭāḥ keśatvamāgatāḥ /
śirasthitaścandrakhaṇḍa: so'rciṣā jvalito'bhavat

vicitravasanaṃ vyāghrakṛttirāsīttadā dvijāḥ /
vibhūtilepo hyasyābhūt sugandhimalayodbhavaḥ

gaurarūpo harastatra babhūvādbhutadarśanaḥ

tato devāḥ sagandharvāḥ siddhavidyādharoragāḥ /
vismayaṃ paramaṃ jagmurharaṃ dṛṣṭvā tathāvidham

himavān muditaścāsīt sahaputraiśca menayā /
jñātayaścāsya mumuhurharaṃ dṛṣṭvā tathāvidham // ५० /
// brahmovāca //
idaṃ brahmā tatra jagau haraṃ dṛṣṭvā manoharam

sarvaṃ śivakaraṃ yasmāt suveśamabhavatsurāḥ /
tasmācchivo'yaṃ lokeṣu nāmnākhyāto'dhikaḥ śivaḥ

maheśvaramumāyuktamīdṛśaṃ yaḥ smareddhṛdā /
satataṃ tasya kalyāṇaṃ vāñchitaṃ ca bhaviṣyati

// mārkaṇḍeya uvāca //
evaṃ kālī mahāmāyā yoganidrā jagatprasūḥ /
pūrvaṃ dākṣāyaṇī bhūtvā paścād girisutābhavat

svayaṃ samarthāpi satī kālī sammohituṃ haram /
tathāpyugraṃ tapastepe hitāya jagatāṃ śivā /
evaṃ sammohayāmāsa kālikā candraśekharam

ityetat kathitaṃ sarvaṃ tyaktadehā satī yathā /
himavattanayā bhūtvā punaḥ prāpa maheśvaram

idaṃ yaḥ kīrtayet puṇyaṃ kālikācaritaṃ dvijāḥ /
nādhayo vyādhayastasya dīrghāyuḥ sa ca jāyate

idaṃ pavitraṃ paramamidaṃ kalyāṇavardhanam /
śrutvāpi sakṛdevedaṃ śivalokāya gacchati

yaḥ śrāddhe śrāvayedviprān kālikācaritaṃ mahat /
pitarastasya kaivalyamāpnuvanti na saṃśayaḥ

yaḥ śrāvayed brāhmaṇānāṃ sannidhau vā samāgataḥ /
tatra svayaṃ haro gatvā śṛṇoti saha māyayā

iti vaḥ kathitaṃ puṇyaṃ sarvapāpapraṇāśanam /
yuṣmabhyaṃ rocate cānyadyattat pṛcchantu sattamāḥ

// iti śrīkālikāpurāṇe kālīharasamāgamo nāma catuścatvāriṃśo'dhyāyaḥ

kālikā purāṇa hindī anuvāda paḍhane ke lie dekheṃ-[https://ptvaishnavi.blogspot.com/2023/08/Kalika-puran-adhyay-44.html DP Karmakand]