Kalika Purana · Chapter 34

kālikāpurāṇam catustriṃśo'dhyāyaḥ punasṛṣṭivarṇanam
atha śrīkālikā purāṇa adhyāya ३४
// mārkaṇḍeya uvāca //
yathā punarabhūt sṛṣṭirakālapralaye gate /
yena caivoddhṛtā pṛthvī tacchṛṇavantu dvijottamāḥ

vyatīte pralaye viṣṇuḥ kūrmarūpī mahābalaḥ /
pṛṣṭhe nidhāya pṛthivīmuddhṛtyātha saparvatām /
samāṃcakāra sakalāṃ pūrvavatparameśvaraḥ

śarabhasya varāhasya tatputrāṇāṃ padakramaiḥ /
yatra bhūmirviśīrṇābhūttāṃ tāṃ samāṃ kamaṭho'karot

kṛtvā samāṃ tato bhūmiṃ pūrvavat parameśvaraḥ /
anantaṃ dhārayāmāsa pṛthivītalasaṃśritam

tato brahmā ca viṣṇuśca haraśca parameśvaraḥ /
nāvodarasthitān saptamunīnmanuṃ svāyambhuvaṃ tadā /
naranārāyaṇau cobhau dakṣañcocuḥ samāgatāḥ

śṛṇvantu munayaḥ sarve brūmodhunā ca yat

sṛṣṭirnaṣṭā varāhasya śarabhasya ca saṅgarāt /
ato'smākaṃ yathākāryā sṛṣṭirākarṇayantu tat

naranārāyaṇāvetau sṛṣṭyarthaṃ samupasthitau /
saṃsthāpanāya devānāṃ paramaṃ tapyatāṃ tapaḥ

āpyāya tapasā cobhau janalokagatān surān /
ānayantvaparāñchaśvat saṃsṛjantu gaṇān bahūn

nakṣatrāṇi grahāṃścaiva teṣāṃ sthānāni vai mune /
egrostapasā yāntu sthiratāṃ pūrvavanmano

sūryasya rathasaṃsthānaṃ tathā candrarathasthitim /
karotvayaṃ mahābhāgaḥ svayameva janārdanaḥ

pṛthivyāṃ sarvabījāni svāyambhuvamano tvayā /
upyantāṃ sarvataḥ śasyapūrṇā bhavatu medinī

prarohayauṣadhīvṛkṣān latāvallīśca sarvataḥ /
svāyambhuva mahāntyetat prāptānyṛtuphalāni ca

dakṣaḥ saptamunīndrastu yajñena yajatāṃ harim /
varāhaputradehotthamagnitrayamidaṃ yajan

asau yajño varāhasya dehājjātastu sṛṣṭaye /
anenaiva tu yajñena dakṣaḥ sṛṣṭiṃ tanotvimām

naranārāyaṇābhyāṃ tu munibhiḥ saptabhistathā /
dakṣeṇa bhavatā cāpi yajñenaibhistathāgnibhiḥ /
sampūryatāmiyaṃ sṛṣṭiḥ svarge bhuvi rasātale

vayaṃ ca sṛṣṭimāpyāyya yathā sampadyate tviyam /
yatiṣyāmastathā nityaṃ yūyaṃ kuruta sarjanam

tataḥ sampadyatāṃ sṛṣṭiryathā pūrvaṃ tathaiva ca /
prathamaṃ tvantu bījāni prarohaya mano'dhunā

// mārkaṇḍeya uvāca //
ityādiśya mahābhāgā vidhiviṣṇuvṛṣadhvajāḥ /
yathāsthānaṃ sthāpayituṃ parvatān prayayustataḥ

merumandarakailāsahimavatprabhṛtiṣvatha/
purāṇi sarvadevānāṃ te vai cakruḥ pṛthak pṛthak

parityajya tato nāvamavadhṛtya vasundharām /
svāyambhuvaḥkṣitau bījānyavapat sarvasampade

tato vṛkṣalatāvallīgulmāni ca vanāni ca /
bālaśasyāni dhānyāni tathaivauṣadhayaḥ samāḥ

bījakāṇḍaprarohāśca pratānā jalajāni ca /
praphullāni vikośāni phalakandadalāni ca /
babhuvuḥ śādvalānyeva sarveṣāṃ prāṇavṛddhaye

pṛthivī śasyasampannā vṛkṣāste śādvalāḥ śubhāḥ /
dṛṣṭāḥ pūrvaṃ yathā tasmānmanunā cittaharṣiṇā

tato naro mahāyogī tapastepe mahattamam /
nārāyaṇaśca devānāṃ bhāvanāya mahāmatiḥ // २५ /
nārāyaṇo naraśvobhau paramāvṛṣisattamau /
tapasārādhya paramaṃ tejomayamanāmayam

ānityā janagaṇān devān devarṣisattamān /
ye mṛtā amarāḥ pūrvaṃ gaṇaśastān pṛthak pṛthak

tapobalena mahatā sarjayāmāsaturmunī /
sūryācandramasau devau dikpālāṃśca tathā daśa /
janārdanaḥ svayaṃ cakre pātālatalavāsinaḥ

sūryācandramasoścakre yathāsaṃsthānamacyutaḥ /
pūrvavad yojayāmāsa divārātrasthitau ca tau

oṣadhiṣu ca jātāsu yajñavṛkṣeṣu sattamāḥ /
śasyabījeṣu jāteṣu deveṣu ca pṛthak pṛthak /
dakṣaḥ kartuṃ samārebhe jyotiṣṭomaṃ mahādhvaram

kaśyapo'trirvasiṣṭhaśca viśvāmitro'tha gautamaḥ /
jamadagnirbharadvāja ete saptarṣayo'malāḥ

etaiḥ saptamunīndraistu dakṣo brahmasutaḥ svayam /
mahāyajñaṃ tataścakre yāvaddvādaśavatsarān

hūyamāneṣu tatraiva triṣvagniṣu punaḥ punaḥ /
ijyamāne varāhe tu yajñarūpe tadā dvijaiḥ /
caturvidhāḥ prajā jātā yajñādeva dvijottamā

tato dakṣasya saṃjātāḥ putryaḥ puṇyātrayodaśa /
svarūpaguṇasampannāḥsṛṣṭayarthamamitaprajāḥ

tāḥ putrīḥ pradadau dakṣaḥ kaśyapāya mahātmane /
tābhyo jātāśca bahavastairvyāptaṃ sakalaṃ jagat

sa sarvāsāṃ prajānāṃ tu kaśyapo janako hyabhūt /
niḥsṛtaṃ dvijaśārdūlāḥ kaśyapāt sakalaṃ jagat

tāsāṃ nāmāni tajjātāḥ prajāḥ sarvāḥ pṛthak pṛthak /
śṛṇvantu munayaḥ sarve samyak kathayato mama

aditirditirdanu; kālā danāyūḥ siṃhikā muniḥ /
krodhā pradhā variṣṭhā ca vinatā kapilā tathā /
kadrūstrayodaśasutā etā dakṣasya kīrtitāḥ

saṃjāto dakṣiṇāṅguṣṭhānmanasā dhyāyato vidheḥ /
tena devamanuṣyeṣu dakṣa ityeva kathyate

brahmaṇo mānasāḥ putrā daśa pūrvaṃ prakīrtitāḥ /
teṣāṃ ṣaṭsṛṣṭikartāro vyatīte'smin janakṣaye /
marīciratryaṃgirasau pulastyaḥ pulahaḥ kratuḥ

marīcestanayo jātaḥ kaśyapo lokabhāvanaḥ /
asyaiva dakṣakanyābhyaḥ prajā jajñe'tha bhūriśaḥ

asya jāyāprajātānāṃ nāmato vinibodhata /
dhātā mitro'ryamā śakro varuṇaḥ soma eva ca

bhargo vivasvān pūṣā ca savitṛtvaṣṭaviṣṇavaḥ /
aditerdvādaśasutā ādityāste prakīrtitāḥ

eṣāṃ kanīyān guṇavān sadā yastapati prajāḥ /
sa vai vaṃśakaro mukhyo gadyate vo divākaraḥ

eka eva diteḥ putro hiraṇyakaśipurbalī

catvārastasya tanayā hṛṣṭā madabalānvitāḥ /
prahlādo hyatha saṃhlādo vāṣkalaḥ śivireva ca

prahlādasya trayaḥ putrāsteṣāmādyo virocanaḥ /
kumbho nikumbho balavāṃstrayaḥ prāhlādayaḥ smṛtāḥ

virocanasuto jāto dānaśauṇḍo balirmahān /
baleśca putro vidito bāṇo nāma mahābalī

śambhoranucaraḥ śrīmān mahākālāhvayaśca saḥ /
bāṇasya ca śataṃ putrāḥ kusumbhamakarādayaḥ

catvāriṃśaddanoḥ putrāḥ vipracittipuraḥsarāḥ /
śambaro namuciścaiva pulomā ca tathaiva ca

asilomā tathā keśī durjayo'yaḥ śirāstathā /
aśvaśīrṣo kṣayaḥ śaṅkurviyanmūrdhā mahābalaḥ

vegavān ketumāṃścaiva svayaṃ svarbhānureva ca /
aśvo hyaśvapatiḥ kuṇḍo vṛṣaparvājakastathā

aśvagrīvaśca sūkṣmaśca turuṇḍurmāṇḍalastathā /
ūrdhabāhuścaikacakro virūpākṣo harāharau

niyantraśca nikumbhaśca kupaṭaścapaṭustathā /
sarabha: sulabhaścaiva sūryācandramasau tathā

anyāvetau danoḥ putrau sūryācandramasau tathā /
divākara niśānāthau tāvanyau devapuṅgavau

eṣāṃ putraiśca pautraiśca tatputraiścaiva bhūribhiḥ /
jagad vyāptamidaṃ sarvaṃ balavīryasamanvitaiḥ

danāyūṣo'bhavan putrāścatvāro balavattarāḥ /
vīrabhadro vikṣaraśca vatso vṛttastathaiva ca

eṣāṃ caturṇāṃ bahavaḥ putrā jātā dvijottamāḥ /
rūpasatvabalopetā ekaikasya śataṃ śatam

kālāyāstanayā jātā: kāleyā iti viśrutāḥ /
vikhyātāste mahāvīryāścatvāro dānāvādhipāḥ

vināśanaśca krodhaśca krodhahantā tathaiva ca /
krodhaśakrastathā caite kālāputrāḥ prakīrtitāḥ

siṃhikāyāḥ suto jāto rāhuścandrārkamardanaḥ /
sucandraścandrahantā ca tathā candravimardanaḥ

gaṇaḥ krodhavaśonāma krūrakarmārimardanaḥ /
krodhāyāstanayā jātāḥkrūrakarmakarāstathā

siṃhikā caiva krodhā ca dve sute krūrike sadā /
tābhyāṃ ca prabhavo vaṃśo hyata: krūrataraḥ smṛtaḥ

eka eva muneḥ putro jātaḥ śukraḥ kavirmahān /
daityadānavakāleyaprabhṛtīnāṃ sadā guruḥ

catvārastasya tanayā jātā asurayājakāḥ /
tvaṣṭāvarastathātriśca saukalaśceti vāgminaḥ /
tejasā sūryasadṛśā brahmaloka - prabhāvanāḥ

asurāṇāṃ sadaityānāṃ kāleyānāṃ tathaiva ca

krodhātmajānāñca tathā siṃhikātanayasya ca /
sūtiprasūtibhiḥ sarvaṃ jagadvyāptaṃ carācaram

teṣāṃ tu yānyapatyāni vardhitāni kramādvijāḥ /
teṣāṃ bahutvāt saṅkhyātuṃ cireṇāpi na śakyate

tārkṣyaścāriṣṭanemiśca anūrurgaruḍastathā /
āruṇirvāruṇiścaiva vinatātanayāḥ smṛtāḥ

śeṣo vāsukirājaśca takṣakaḥ kulikastathā /
kūrmaśca sumanāceti kādraveyāḥ prakīrtitāḥ

bhīmasenograsenaśca suparṇo garuḍastathā /
gopatirdhṛtarāṣṭraśca sūryavarcāśca vīryavān

arkadṛṣṭaḥ prayuktaśca viśrutaḥ suśrutastathā /
bhīmaścitrarathaścaiva vikhyātaḥ sarvaviddalī //७२/
śāliśīrṣaśca parjanya:kalirnārada eva ca /
ityete deva gandharvā muniputrāḥ prakīrtitāḥ

anavadyāṃ sānurāgāṃ saṃvarāṃ mārgaṇāṃ priyām /
asūyāṃ subhagāṃ bhīmāmiti kanyāmasūyata /
prādhā sarvaguṇotthānāt kaśyapāttu tapodhanāt

viśvāvasuḥ sucandraśca suparṇaḥ siddhaḥ eva ca

barhiḥ pūrṇaśca pūrṇāṅgo brahmacārī ratipriyaḥ /
bhānuśca daśamaścaite prādhāputrāḥ prakīrtitāḥ

ityete devagandharvāḥ santataṃ puṇyalakṣaṇāḥ /
prādhāsūta mahāmāgā devī devarṣisattamāt

alambuṣā miśrakeśī gāminī ca manoramā /
vidyutpannānadhārambhā hyaruṇā rakṣitātulā

subāhuḥ suratā caiva murajā supriyā tathā /
vapustilottamā ceti mukhyā apsarasaḥ smṛtāḥ

atibāhustumburuśca hāhā hūhūstathaiva ca /
gandharvāṇāmi mukhyā devatulyāḥ prakīrtitāḥ

amṛtaṃ brāhmaṇā gāvo munayo'psarasastathā /
kapilātanayāḥ proktā mahābhāgā mahotsavāḥ

iti dakṣasutānāṃ ye kaśyapāttanayāḥ smṛtāḥ /
tairidaṃ sakalaṃ vyāptaṃ jagatsthāvarajaṅgam

evaṃ yajñavarāhasya yajñarūpasya pātanāt /
tribhyo'gnibhyo manostasmāt svāyambhuvamahātmanaḥ

munibhyaścaiva saptamyaḥ kaśyapādibhya eva ca /
naranārāyaṇābhyāṃ tu vyatīte'kālike laye /
punaḥ prajā: purā sṛṣṭā hariṇānekarūpiṇā

evaṃ punarabhūt sṛṣṭiḥ sṛṣṭisthityantakāriṇaḥ /
harestasya prasādena naranārāyaṇātmanaḥ

// iti śrīkālikāpurāṇe punaḥ sṛṣṭivarṇane catustriṃśo'dhyāyaḥ

kālikā purāṇa hindī anuvāda paḍhane ke lie dekheṃ-[https://ptvaishnavi.blogspot.com/2023/07/Kalika-puran-adhyay-34.html DP Karmakand]