Kalika Purana · Chapter 21

kālikāpurāṇam ekaviṃśo'dhyāyaḥ candraśāpamokṣaṇam
atha kālikā purāṇa adhyāya २१
// brahmovāca //
gacchantu bhoḥ suragaṇā dakṣasya sadanaṃ prati /
prasādayata candrārthe sa ca pūrṇo bhavedyathā

pūrṇe candre jagatsarvaṃ prakṛtisthaṃ bhaviṣyati /
yuṣmā kaṃca bhavecchāntiroṣadhīnāñca sambhavaḥ

// mārkaṇḍeya uvāca //
iti brahmavacaḥ śrutvā devāḥ śakrapurogamāḥ /
prayayurhṛṣṭamanasastadā dakṣaniveśanam

yathānyāyamupasthāya sarve munivaraṃ surāḥ /
procuḥ prajāpatiṃ dakṣaṃ praṇamya ślakṣṇayā girā

// devā ūcuḥ //
prasīda sīdatāṃ brahmannasmākaṃ bahuduḥkhinām /
uddharasva mahābuddhe trāhi naḥ śokasāgarāt

yadrūpaṃ brahmasaṃjñantu sṛṣṭikṛt paramātmanaḥ /
tadaṃśastvaṃ paraṃ jyotirviprarūpa namo'stute

rakṣaṇāt sarvajagatāṃ prajāpālanakāraṇāt /
dakṣaḥ prajāpatiśceti yogeśastaṃ numo vayam

dakṣāya sarvajagatāṃ dakṣāya kuśalātmanām /
dakṣāyātmahitāyāśu namastubhyaṃ mahātmane

satataṃ cintyamānasya yogibhirniyatendriyaiḥ /
sārasya sārabhūtastvaṃ dakṣāya paramātmane

yogivṛttiranādhṛṣya pāragāṇāṃ parāyaṇaḥ /
ādyantamuktaḥ sahasā tasmai nityaṃ namo namaḥ

// mārkaṇḍeya uvāca //
iti teṣāṃ vacaḥ śrutvā dakṣo yajñabhujāṃ tathā /
prāha prasannavadanaḥ śakramābhāṣya mukhyataḥ

// dakṣa uvāca /
kutaḥ śakra mahābāho bhavatāṃ duḥkhamāgatam /
duḥkhahetuṃ vada vibho śrotumicchāmyahantu tam

mamāsti vā kiṃ kartavyaṃ bhavatāṃ duḥkhahānaye /
tadahaṃ yadi śaknomi kariṣyāmi hitaṃ samam

// mārkaṇḍeya uvāca //
tacchrutvā vacanaṃ tasya brahmasūnormahātmanaḥ /
jagāda vākpatiḥ śakro vītihotro'tha taṃ munim

// ta ūcuḥ //
kṣayī jāto niśānāthastasmin kṣīṇe kṣayaṃ gatāḥ /
sarvauṣadhyo dvijaśreṣṭha taddhāniryajñahānikṛt

yajñe vinaṣṭe sakalāḥ prajāḥ kṣuddhayakātarāḥ /
vṛṣṭyabhāvānmahadduḥkhaṃ prāpya naṣṭāśca kāścana

kṣayo'yaṃ rātrināthasya yaste kopāt pravartate /
sa sarvajagato brahmannabhāvārthamupasthitaḥ

nādhunā tat tribhuvane yanna kṣubdhaṃ nu kiñcana /
viplutaṃ vāsti viprendra sthāvarāḥ patagāśca vā

na yajñāḥ sampravartante na tapasyanti tāpasāḥ /
āhāraduḥkhānniśrīkā: prajā kṣīṇā bhayāturāḥ

evaṃ pravṛtte viprendra viplave'smāt rasātalāt /
daityā na yāvadutthāya bādhante tāvaduddhara

prasīda dakṣa candrasya taṃ pūraya tapobalāt /
pūrṇe candre jagatsarvaṃ prakṛtisthaṃ bhaviṣyati

// mārkaṇḍeya uvāca //
iti teṣāṃ vacaḥ śrutvā prajāpatisutastadā /
uvāca tān suragaṇān hṛdayācchalyamuddharan

// dakṣa uvāca //
yanme vaco niśānāthe pravṛttaṃ śāpakāraṇam /
na kenāpi nidānena mithyā kartuṃ tadutsahe

kintu madvacanaṃ yasmānnaikāntena mṛṣā bhavet /
candro'pi vardha yasmāttadupāyamudekṣata

tatrāpyayamupāyo'sti māsārthaṃ yātu candramāḥ /
kṣayaṃ vṛddhiñca māsārdhaṃ samaṃ bhāryāsu vartatām

tasya tadvacanaṃ śrutvā taṃ prasādya prajāpatim /
sarve suragaṇāstatra gatā yatrāsti candramāḥ

evamukte tu vacane dakṣeṇa muninā dvijāḥ /
atha candraṃ samādāya bhāryābhiḥ sahitaṃ tadā /
jagmuste brahmabhavanaṃ muditāḥ surasattamāḥ

tatra gatvā mahābhāgāḥ yathā dakṣeṇa bhāṣitam /
tatsarvaṃ kathayāmāsurbrahmaṇe paramātmane

brahmā dakṣavacaḥ śrutvā devānāṃ vacanāttadā /
candrabhāgaṃ mahāśailaṃ jagāma sahitaḥ suraiḥ

tatragatvā suraśreṣṭhaḥ prajānāṃ hitakāmyayā /
snāpayāmāsa śubhrāṃśuṃ vṛhallohitapuṣkare

bhūtabhavyabhavajjñāna: pūrvameva pitāmahaḥ /
etadarthañcakārā sara: pūrṇaṃ jagadguruḥ

tatra snātasya jantostu nīrogatvaṃ prajāyate /
cirāyuṣyañca satataṃ vṛhallohitasaṃjñake

tatra snātasya candrasya śarīrāttatkṣaṇaṃ gadaḥ /
rājayakṣmā niḥ sasāra pūrvarūpo yathoditaḥ

niḥsṛtya rājayakṣmāpi brahmāṇañca jagatpatim /
praṇamyāhaṃ kiṃ kariṣye kva gacchāmītyuvāca tam

sthānaṃ patnīñca lokeśa kṛtyaṃ mama sanātanam /
nideśayānurūpe me sraṣṭā tvaṃ jagatāṃ yataḥ

// mārkaṇḍeya uvāca //
tato brahmāpi taṃ puṣṭaṃ nirīkṣyenduṃ śarīragaiḥ /
amṛtaistenātiyuktaiḥ kṣīṇañcāpi niśāpatim // ३६ /
dorbhiḥ hastaiḥ taṃ gṛhītvā girau niṣpīḍya vai muhuḥ /
amṛtaṃ gālayāmāsa śarīrādrājayakṣmaṇaḥ

amṛtāni ca yānyāśu gālitāni tadā jale /
kṣīrodasya ca cikṣepa madhye rahasi lokabhṛt

tasmādasyāmṛtādindoḥ kalāḥ kṣīṇāstu yāḥ purā /
tāsāṃ jagrāha lavaśaścarṇān kṣīrodasāgarāt

kalāmātrāvaśeṣaṣya saṃsargādrājayakṣmaṇaḥ /
kṣīṇāḥ kalāḥ pañcadaśa yāḥ pūrvamamṛtātmikāḥ /
tā rājayakṣmagarbhasthācūrṇībhūtāstu pīḍayā

tejojyotsnā sudhābhistu nibaddhaṃ yat kalāpateḥ

śarīraṃ tat tridhā bhūtaṃ garbhasthaṃ rājayakṣmaṇaḥ

jyotiścūrṇamabhūt jyotsnā līnā rājādiyakṣmaṇi /
dravībhūtāḥ sudhāḥ sarvāḥ garbhe rogasya ca sthitāḥ

yadā niryālayāmāsa sudhāṃ brahmā kṣamāntarāt /
tadā jyotsnāsudhājyotiḥ sarvaṃ tasmādbahirgatam

kṣīrodasāgare kṣiptaṃ tat sarvaṃ vidhinā tadā /
devān girau parityajya svayaṃ gatvā drutaṃ tataḥ

tato'mṛtāni prakṣālya kalācūrṇāni vāribhiḥ /
jyotsnāñcāpyājagāmāśu gṛhītvā tattrayaṃ girim

kṣīrodāgirimāsādya candrabhāgaṃ tadā vidhiḥ /
devamadhye kalācūrṇaṃ sudhājyotsnā nyavīviśat

saṃsthāpya tattrayaṃ brahmā devānāṃ madhyataḥ sthitaḥ /
jagāda rājayakṣmāṇaṃ tat sthānādi nideśayan

// brahmovāca //
sarvadā yo divārātraṃ sandhyāyāṃ vanitārataḥ /
sevate surataṃ tasmin rājayakṣman vasiṣyasi

pratiśāya-śvāsakāsa- saṃyukto maithunaṃ caret /
sa te praveśyaḥ satataṃ śleṣmaṇaśca tathāvidhaḥ

kṛṣṇākhyā mṛtyuputrī yā bhavataḥ sadṛśī guṇaiḥ /
sā te'stu bhāryā satataṃ bhavantamanuyāsyati // ५१ / /
kṣīṇatvaṃ bhavataḥ kṛtyaṃ tatastvaṃ viṣayaṃ kuru /
drutaṃ gaccha yathākāmaṃ candrāt tvaṃ vimukho bhava

// mārkaṇḍeya uvāca //
evaṃ visṛṣṭo vidhinā rājayakṣmā mahāgadaḥ /
paśyatāṃ sarvadevānāmantardhānaṃ jagāma ha

antarhite mahāroge brahmā lokapitāmahaḥ /
candraṃ samagrayāmāsa kalāpañcadaśaidhitam

tena kṣīrodadhautena sudhāpūtena cātmabhūḥ /
sajyotsnaistu kalācūrṇaiḥ pūrvavaccākarodvidhum

sa ṣoḍaśakalāpūrṇaḥ pūrvavadvibhau yadā /
candrastadā sarvadevā mumudustasya darśanāt

atha candrastadā pūrṇaḥ praṇipatya pitāmaham /
uvācedaṃ surasadomadhyago nāti harṣitaḥ

// soma uvāca /
na śyāma pūrvavad brahmañchaśarīre mama vartate /
na vīryaṃ vā tathotsāho niṣīdantyaṃgasandhayaḥ

notsahe pūrvavacceṣṭāṃ vidhātuṃ sutarāmaham /
ceṣṭāhī nastvanudinaṃ varteyaṃ kena lokakṛt

// brahmovāca //
grastasya yakṣmaṇā soma yadabhūdaṃgasandhayaḥ /
pūrvaṃ viśīrṇā bhavatastatpūrṇamabhavannahi

adhunā bhavato dehacūrṇaṃ niḥsāritaṃ mayā /
śarīrāt sāmṛtajyotsnamañjasā rājayakṣmaṇaḥ

teṣāṃ prakṣālanavidhau lavaśo yatsthitaṃ jale /
jyotsnāyāśca sudhāyāśca tena hīno bhavān yataḥ

tato'ṅgasandhayo rājaṃstava sīdanti sāmpratam /
tasyopāyaṃ vidhāsyāmi yathā nārtiṃ labhedbhavān

prājāpatyaḥ puroḍāśo havanīyaḥ puro'dhvare /
aindrastato'nu cāgneyaḥ pradeyaḥ sarvataḥ kratau

tato nu bhavato bhāgaḥ puroḍāśo mayā kṛtaḥ /
tena bhāgena bhuktena nityaṃ yajñakṛtena hi /
pūrvavat te samutsāhaḥ śyāmavīryaṃ bhaviṣyati

ye cāmṛtakaṇāstoye kṣīrodasya sthitāstava /
śarīracūrṇaṃ vā yatte jyotsnāyāścāpi ye lavāḥ

tat sarvaṃ bhavato jyotsnāyogādanudinaṃ vidho /
vṛddhiṃ yāsyati satataṃ kṣīrasāgaragarbhagam

svārociṣe'ntare prāpte dvitīye śaṅkarāṃśajaḥ /
durvāsā bhavitā vipraḥ pracaṇḍaścaṇḍa bhānuvat

sa devendrasyāvinayācchāpaṃ datvā sudāruṇam /
kariṣyati tribhuvanaṃ niḥśrīkaṃ sasurāsuram

śriyā hīne tato loke bhavitā lokaviplavaḥ /
yathā tava kṣayāt soma pravṛttaḥ sarvaviplavaḥ

tanmānuṣapramāṇena tṛtīye tu kṛte yuge /
bhaviṣyati sthāsyati ca yāvad yugacatuṣṭayam

tataścaturthe samprāpte saha devaiḥ kṛte yuge /
kṣīrodaṃ nirmathiṣyāmaḥ śambhurviṣṇurahaṃ tathā /
manthānaṃ mandaraṃ kṛtvā netraṃ kṛtvā tu vāsukīm

yajñabhāgeṣu līneṣu devānnārthaṃ vayaṃ tataḥ /
mathiṣyāmaḥ samaṃ devaiḥ kṣīrodaṃ saha dānavaiḥ //७३/
tvaccharīrāmṛtamidaṃ yatsthitaṃ kṣīrasāgare /
tat pramathya grahīṣyāmo rāśībhūtaṃ tathā kṣayam //७४/
sarvauṣadhyantare kṛtvā tvaccharīraṃ tadā vayam /
kṣepsyāmaḥ sāgarajale śarīrārthaṃ vidho tava

nirmathya sāgaraṃ paścāt samuddhārya yadāmṛtam /
tadā tava vapustasmin pūrvavat sambhavaviṣyati

ojovīryādbhutaṃ kāntamakṣayaṃca sudhātmakam /
dṛḍhāṅgasandhikaṃ cāru bhaviṣyati vapustava

// mārkaṇḍeya uvāca //
sudhāṃśumevamābhāṣya brahmā lokapitāmahaḥ /
vidhoḥ kṣayāya māsārdhaṃ vṛddhaye yatnavānabhūt

yathā dakṣeṇa gaditaṃ māsārthaṃ yātu candramāḥ /
kṣayaṃ vṛddhiṃ ca māsārdhaṃ yatnaṃ tatrākarodvidhiḥ

tataḥ ṣoḍaśadhā candraṃ surajyeṣṭho vibhaktavān /
vibhajya ca surān sarvān samuvācedamuttamam

kalāḥ ṣoḍaśa candrasya tatraikā śambhumūrdhani /
tiṣṭhatvadyāvadhi parā kṣayaṃ yāntu kṣayaṃ vinā

kṣayeṇa yadi rogeṇa māsārdhaṃ dakṣavākyataḥ /
kṣayāya pīḍyate candro nopaśāntistadā bhavet

kiṃtvasya yā kalā śambhau jyotsnā gacchatu tāṃ prati /
caturdaśakalāsaṃsthāḥ pratimāsaṃ surottamāḥ

caturdaśakalāsaṃsthānyamṛtāni pibantu vai /
pratipattithimārabhya bhavantastāṃ caturdaśīm

tejobhogāḥ sūryyabimbaṃ caturdaśatithau kramāt /
praviśantu kṣayaṃ tvevaṃ kṛṣṇapakṣe vidhorbhavet

yātu śeṣa kalā darśe haritpatre palāyitā /
tiṣṭhatu prathame bhāge tithau tasyāṃ niśāpateḥ

dvitīye darśabhāge tu rohiṇyā yātu mandiram /
tṛtīye tu sarasvatyāṃ snātvā samutthito vidhuḥ

caturthe balasampūrṇastithibhāge vibhāvasoḥ /
maṇḍalaṃ yātu candro'yaṃ savimbasthaghoṭakaḥ

yāvat kālena hi kalā prathamā kṣayamāpnuyāt /
evamevaṃ kṛṣṇapakṣe tāvat sā pratipad bhavet

dvitīyādau kṛṣṇapakṣe vṛddhi - hrāsastathāvidhaḥ /
tithīnāṃ vṛddhihetuśca śukle kṛṣṇe tathā bhavet

tataḥ punaḥ śuklapakṣe yāvat pūrvakaloditā /
vṛddhiṃ naiti bhavettāvat pratipattithirāditaḥ

tato dvitīyabhāgasya yā jyotsnā haramūrdhani /
sthitā yā vai kalā yātu gatā sā punareṣyati

yuṣmābhistu bhavet peyamamṛtaṃ yaddine dine /
taddvitīyāditithibhiḥ pūrṇāntābhiḥ sadaiva hi /
svayamutpatsyate candro jyotsnāyogāt surottamāḥ

yathā dine dine bhāgāḥ kṣayaṃ yānti tathā vidhoḥ /
vṛddhiṃ gacchantyanudinaṃ śuklapakṣe'nvahaṃ surāḥ

tejobhāgaḥ sūryabimbāt punareva sameṣyati /
prayāsyati kṛṣṇapakṣe yathā bhāgakramaṃ tathā

jyotsnā haraśiraścandrāt pratyahaṃ punareṣyati /
tejobhāgaḥ sūryabimbādamṛtaṃ varṣati svayam //९६ /
evaṃ vṛddhiḥ śuklapakṣe sudhāṃśoḥ sambhaviṣyati /
pakṣayoḥ śuklakṛṣṇatvaṃ candravṛddhikṣayādbhavet

yāvat kālena yo bhāgaḥ kṣayaṃ vṛddhiṃca yāsyati /
tāvat kālamabhivyāpya tithi: sthāsyati sā punaḥ

cireṇa vṛddhiryadi vā kṣayo vā drutena vṛddhiryadivā kṣayo vā /
drutātithīnāntu sadā kṣayaḥ syāccirātu vṛddhistithiṣu praveśe

havyaṃ kavyañca candreṇa vinā na sambhaviṣyati /
tasmāttayoḥ pravṛddhayarthaṃ candraṃ rakṣantu devatāḥ

āsvādanīyaḥ śubhrāṃśuḥ kalāśeṣo'numāsataḥ /
amāvāsyāparādheṃ tu pitṛbhī rohiṇīgṛhe

tasyaivāsvādanāt kavyaṃ vṛddhiṃ yāsyati cānvaham /
tena kavyena pitarastṛptiṃ yāsyanti vai parām

// mārkaṇḍeya uvāca //
tataḥ suragaṇāḥ sarve yathoktaṃ vidhinā tathā /
cakrurlokahitārthāya candrasya kṣaya vṛddhaye

mahādevo'pi candrārdhaṃ svarūpaṃ paramātmanaḥ /
jagrāha devairvidhinā śirasā gadito bhṛśam

yattejaḥ paramaṃ nityamajamavyayamakṣayam /
tatsvarūpā candrakalā śāpatastu kṣayaṃ gatā

praviśati yadā jyotirānandamajaraṃ param /
yoginastu tadā teṣāṃ cintanaṃ līnameṣyati

mahādevaśira: saṃsthe līne citte sudhānidhau /
candradvārā bhavenmuktirityevaṃ vaidikī śrutiḥ

etaj jñātvā mahādevaḥ kṣayavṛddhyavinākṛtam /
hitāya sarvalokānāṃ jagrāha śirasā vidhum

candrajyotsnāsamāyogādauṣadhyo yānti vṛddhaye /
sarvoṣadhiṣu vṛddhāsu pravartante tato'dhvarāḥ

adhvareṣu pravṛtteṣu svān svān bhāgāṃstu devatāḥ /
parigṛhṇanti pitarastathā kavyāni bhūriśaḥ

amṛtaṃ brahmaṇā sṛṣṭaṃ yad devebhyaḥ purātanam /
tena tṛpyanti hīnā ye havyabhāgena devatāḥ

yajñenāpyāyitaṃ tacca jyotsnābhirvṛddhimeti vai /
yajñajyotsnā vinābhūtaṃ tacca syāt kṣīṇamanyathā

ato'mṛtasya yajñasya candramāḥ kāraṇaṃ svayam /
ato dakṣasya śāpāttu rakṣāyai taccikīrṣitam

adyāpi kṛṣṇapakṣe tu sudhāṃśuḥ pīyate suraiḥ /
tejaḥ sūryaṃ yāti śambhuṃ candrārdhaṃ jyotsnikā yathā

punaśca śuklapakṣe tu śeṣodeti kalā tataḥ /
jyotsnādvitīyo bhāgastu tejobhāgo dvitīyakaḥ

anye'tyugraśiraścandrāt sūryavimbād yathākramam /
kalāḥ ṣoḍaśa candrasya tatraikā śambhuśekhare

sitāsitāvubhau pakṣau śeṣāṇāmudayakṣayau /
iti vaḥ sarvamākhyātaṃ vibhaktaścandramā yathā /
brahmaṇā parvataśreṣṭhe yatho taccandrabhāgataḥ

yajñabhāge sthite yasmāddevānnamakarodvidhum /
kavye sthite'pi pitrannaṃ tithivṛddhi-kṣayo yathā

idaṃ puṇyatamākhyānaṃ yaḥ śṛṇoti sakṛnnaraḥ /
rājayakṣmā tasya kule na kadācid bhaviṣyati

yakṣmaṇā paribhūto yaḥ śṛṇoti vacanaṃ vidheḥ

idaṃ svastyayanaṃ puṇyaṃ guhyādguhyātamaṃ śubham /
yaḥ śṛṇotyekacittaḥ san sa mahāpuṇyabhāgbhavet

// iti śrīkālikāpurāṇe candraśāpa-mokṣaṇaṃ nāma ekaviṃśo'dhyāyaḥ

kālikā purāṇa hindī anuvāda paḍhane ke lie dekheṃ-[https://ptvaishnavi.blogspot.com/2023/03/Kalika-puran-adhyay-21.html DP Karmakand]