Jnaneshwari · Chapter 5

arjuna uvācaḥ saṃnyāsaṃ karmaṇāṃ kṛṣṇa punaryogaṃ ca śaṃsasi /
yat śreyaṃ etayorekeṃ tat me brūhi suniścitam

māgāṃ sakaḻa karmācā saṃnyāsu / tumhīṃci niropilā hotā bahuvasu /
tarī karmayogīṃ kevīṃ atirasu / pokhītasāṃ puḍhatī

aiseṃ dvyartha heṃ bolatāṃ / āmhāṃ neṇatayāṃciyā cittā /
āpuliye cāḍe anaṃtā / umajū nohe

ekeṃ ekasārāteṃ bodhije / tarī ekaniṣṭhaci bolije /
heṃ āṇikīṃ kāya sāṃgije / tumhāṃprati

tarī yācilāgīṃ tumateṃ / myāṃ rāūḻāsī vinavile hote /
je hā paramārthu dhvaniteṃ / na bolāvā

parī māgīla aso devā / ātāṃ prastutīṃ ukalu dekhāvā /
sāṃge dohīṃmāji baravā / mārgu kavaṇa

jo pariṇāmīṃcā nirvāḻā / acuṃbitu ye phaḻā /
āṇi anuṣṭhitā prāṃjaḻā / sāviyāci

jaiseṃ nidrece sukha na moḍe / āṇi mārgu tarī bahusāla sāṃḍe /
taiseṃ sokāsanāṃ sāṃgaḍe / sohapeṃ hoya

yeṇeṃ arjunāceni bole / devo manīṃ rijhale /
maga hoīla aikeṃ mhaṇitale / saṃtoṣoniyāṃ

dekhā kāmadhenu aisī māye / sadaivā jayā hoye /
to caṃdruhi parī lāhe kheḻāvayā

pāheṃ pāṃ śaṃbhūcī prasannatā / tayā upamanyūciyā ārtā /
kāya kṣīrābdhi dūdhabhātā / deījecinā

taisā audāryācā kuruṭhā / kṛṣṇa āpu jāhaliyā subhaṭā /
kāṃ sarva sukhāṃcā vasauṭā / toci nohāvā

etha camatkāru kāyasā / gosāvī lakṣmīkāṃtāaisā /
ātāṃ āpuliyā savesā / māgāvā kīṃ

mhaṇoni arjune mhaṇitale / teṃ hāṃsoni yereṃ didhale /
teṃci sāṃgena bolile / kāya kṛṣṇeṃ

to mhaṇe gā kuṃtīsutā / he saṃnyāsayogu vicāritāṃ /
mokṣakara tatvatā / donīhi hotī

tarī jāṇāṃ neṇāṃ sakaḻāṃ / hā karmayogu kīra prāṃjaḻā /
jaisī nāva striyāṃ bāḻāṃ / toyataraṇīṃ

taiseṃ sārāsāra pāhije / tarī sohapā hāci dekhije /
yeṇeṃ saṃnyāsaphaḻa lāhije / anāyāseṃ

ātāṃ yācilāgīṃ sāṃgena / tuja saṃnyāsiyāce cinha /
maga sahajeṃ he abhinna / jāṇasī tūṃ

tarī geliyāci se na karī / na pavatāṃ cāḍa na dharī /
jo suniścaḻu aṃtarīṃ / meru jaisā

āṇi mī mājheṃ aisī āṭhavaṇa / visarale jayāce aṃtaḥkaraṇa /
pārthā to saṃnyāsī jāṇa / niraṃtara

jo maneṃ aisā jāhalā / saṃgī toci sāṃḍilā /
mhaṇoni sukheṃ sukha pāvalā / akhaṃḍita

ātāṃ gṛhādika āghaveṃ / teṃ kāṃhīṃ nalage tyajāveṃ /
jeṃ gheteṃ jāhaleṃ svabhāveṃ / niḥsaṃgu mhaṇaūni

dekheṃ agni vijhoni jāye / maga je rāṃkhoṃḍī kevaḻu hoye /
taiṃ te kāpuseṃ giṃvasūṃ ye / jiyāparī

taisā asateni upādhī / nākaḻije jo karmabaṃdhīṃ /
jayācīce buddhī / saṃkalpu nāhīṃ

mhaṇoni kalpanā jaiṃ sāṃḍe / taiṃci gā saṃnyāsu ghaḍe /
yā kāraṇe donī sāṃgaḍe / saṃnyāsayogu

eऱhavīṃ tarī pārthā / je mūrkha hotī sarvathā /
te sāṃkhyakarmasaṃsthā / jāṇatī kevīṃ

sahajeṃ te ajñāna / mhaṇoni mhaṇatī he bhinna /
eऱhavī dīpāpratī kāī anāna / prakāśu āhātī

paiṃ samyak ekeṃ anubhaveṃ / jihīṃ dekhileṃ tatva āghaveṃ /
te donhīteṃhī aikyabhāveṃ / mānitī gā

āṇi sāṃkhyīṃ jeṃ pāvije / teṃci yogīṃ gamije /
mhaṇoni aikyatā dohīṃte sahajeṃ / iyāparī

dekheṃ ākāśā āṇi avakāśā / bhedu nāhīṃ jaisā /
taise aikya yogasaṃnyāsā / voḻakhe jo

tayāsīci jagīṃ pāhaleṃ / āpaṇapeṃ teṇeṃci dekhileṃ /
jayā sāṃkhyayoga jāṇavale / bhedeṃviṇa

jo yuktipaṃtheṃ pārthā / caḍhe mokṣaparvatā /
to mahāsukhācā nimathā / vahilā pāve

yerā yogasthiti jayā sāṃḍe / to vāyāṃci gā havyāsīṃ paḍe /
pari prāpti kahīṃ na ghaḍe / saṃnyāsācī

jeṇeṃ bhrāṃtīpāsūni hirataleṃ / guruvākyeṃ mana dhutaleṃ /
maga ātmasvarupīṃ ghātaleṃ / hārauniyāṃ

jaiseṃ samudrīṃ lavaṇa na paḍe / tavaṃ vegaḻe alpa āvaḍe /
maga hoya siṃdhūci evaḍheṃ / miḻe tevhāṃ

taiseṃ saṃkalponi kāḍhileṃ / jayāceṃ manaci caitanya jāhaleṃ /
teṇeṃ ekadeśiyeṃ pari vyāpileṃ / lokatraya

ātāṃ kartā karma karāveṃ / heṃ khuṃṭaleṃ tayā svabhāveṃ /
āṇi karī jaऱhī āghaveṃ / taऱhī akartā to

je pārthā tayā dehīṃ / mī aisā āṭhaū nāhīṃ /
tarī kartṛtva kaiceṃ kāī / ure sāṃge

aiseṃ tanutyāgeṃvīṇa / amūrtāce guṇa /
disatī saṃpūrṇa / yogayuktāṃ

eऱhavīṃ āṇikāṃciye parī / tohī eka śarīrī /
aśeṣāhī vyāpārīṃ / vartatu dise

tohī netrīṃ pāhe / śravaṇīṃ aikatu āhe /
pari tethīṃcā sarvathā nohe / navala dekheṃ

sparśāsi tarī jāṇe / parimaḻu sevī ghrāṇeṃ /
avasarocita bolaṇeṃ / tayāhi āthī

āhārāteṃ svīkārī / tyajāveṃ teṃ parihari /
nidreciyā avasarīṃ / nidije sukheṃ

āpuleni icchāvaśeṃ / tohī gā cālatu dise /
paiṃ sakaḻa karma aiseṃ / rahāṭe kīra

heṃ sāṃgoṃ kāī ekaika / dekheṃ śvāsocchāsādika /
āṇi nimiṣonnimiṣa / ādikaruni

pārthā tayāce ṭhāyīṃ / heṃ āghaveṃci āthi pāhīṃ /
pari to kartā navhe kāṃhī / pratītibaḻeṃ

jaiṃ bhrāṃtī seje sutalā / taiṃ svapnasukheṃ bhutalā /
maga to jñānodayī ceilā / mhaṇoniyāṃ

ātāṃ adhiṣṭhānasaṃgatī / aśeṣāhī iṃdriyavṛttī /
āpulāliyā arthīṃ / vartata āhātī

dīpāceni prakāśeṃ / gṛhīṃce vyāpāra jaise /
dehīṃ karmajāta taise / yogayuktā

to karmeṃ karī sakaḻeṃ / parī karmabaṃdhā nākaḻe /
jaiseṃ na sipeṃ jaḻīṃ jaḻeṃ / padmapatra

dekhe budhdīcī bhāṣa neṇije / manācā aṃkura nudaije /
aisā vyāpāru to bolije / śārīru gā

heṃca marāṭhe pariyeśīṃ / tarī bāḻakācī ceṣṭā jaiśī /
yogiye karme karitī taiśīṃ / kevaḻā tanū

maga pāṃcabhautika saṃcaleṃ / jevhāṃ śarīra ase nideleṃ /
tetha manaci rāhāṭeṃ ekaleṃ / svapnīṃ jevīṃ

navala aikeṃ dhanurdharā / kaisā vāsanecā saṃsārā /
dehā hoūṃ nedī ujagarā / pari sukhaduḥkheṃ bhogī

iṃdriyāṃcāṃ gāṃvīṃ neṇije / aisā vyāpāru jo nipaje /
to kevaḻu gā mhaṇije / mānasācā

yogiye tohī karitī / pari karmeṃ teṇeṃ na baṃdhijatī /
je sāṃḍilī āhe saṃgatī / aṃhabhāvācī

ātāṃ jāhāliyā bhramahata / jaiseṃ piśācāceṃ citta /
maga iṃdriyāṃce ceṣṭita / vikaḻu dise

svarūpa tarī dekhe / āḻavileṃ āike /
śabdu bole mukheṃ / pari jñāna nāhī

heṃ aso kājeṃviṇa / jeṃ jeṃ kāhī kāraṇa /
teṃ kevaḻa karma jāṇa / iṃdriyāṃce

maga sarvatra jeṃ jāṇateṃ / te buddhīceṃ karma nirūteṃ /
voḻakha arjunāteṃ / mhaṇe hari

te buddhī dhure karunī / karma karitī citta deūnī /
pari te naiṣkamyāpāsunī / mukta disatī

jeṃ buddhīciye ṭhāvūni dehī / tayāṃ aṃhakārācī seci nāhīṃ /
mhaṇoni karma karitāṃ pāhī / cokhāḻale

agā karitenavīṇa karma / teṃci teṃ naiṣkarmya /
heṃ jāṇatī suvarma / gurugamya jeṃ

ātāṃ śāṃtarasāceṃ bhariteṃ / sāṃḍīta āhe pātrāteṃ /
jeṃ bolaṇeṃ bolāparauteṃ / bolavaleṃ

etha iṃdriyāṃcā pāṃgu / jayā phiṭalā āhe cāṃgu /
tayāsīci āthī lāgu / parisāvayā

hā aso atiprasaṃgu / na saṃḍī pāṃ kathālāgu /
hoīla ślokasaṃgati bhaṃgu / mhaṇoniyāṃ

jeṃ manā ākaḻitāṃ kuvāḍeṃ / ghāghusitāṃ buddhī nātuḍe /
teṃ daivāceni suravāḍeṃ / sāṃgavaleṃ tuja

jeṃ śabdātīta svabhāveṃ / teṃ bolīṃci jarī phāve /
tarī āṇikeṃ kāya karāveṃ / sāṃge kathā

hā ārtiviśeṣu śrotayāṃcā / jāṇoni dāsa nivṛtīcā /
mhaṇe saṃvādu doghāṃcā / parisoni parisā

maga kṛṣṇa mhaṇe pārthāteṃ / ātāṃ prāptāceṃ cinha purateṃ /
sāṃgena tuja niruteṃ / citta deī

tarī ātmayogeṃ āthilā / jo karmaphaḻāśīṃ viṭalā /
to ghara righoni varilā / śāṃti jagīṃ

yeru karmabadheṃ kirīṭī / abhilāṣāciyā gāṃṭhīṃ /
kaḻāsalā khuṃṭī / phaḻabhogācāṃ

jaisā phaḻāciyā hāṃve / taiseṃ karma kari āghaveṃ /
maga na kījeci yeṇeṃ bhāveṃ / upekṣī jo

to jayākaḍe vāsa pāhe / teutī sukhācī sṛṣṭī hoye /
to mhaṇe tetha rāhe / mahābodhu

navadvāreṃ dehīṃ / to asatuci pari nāhīṃ /
karituci na karī kāṃhī / phalatyāgī

jaisā kāṃ sarveśvaru / pāhije taṃva nirvyāpāru /
pari toci racī vistāru / tribhuvanācā

āṇi kartā aiseṃ mhaṇipe / tarī kavaṇeṃ karmīṃ na śiṃpeṃ /
je hātopāvo na liṃpe / udāsavṛtīcā

yoganidrā tarī na moḍe / akartepaṇā saḻu na paḍe /
pari mahābhūtāṃce daḻavāḍeṃ / ubhārī bhale

jagācā jīvīṃ āhe / pari kavaṇācā kahīṃ nohe /
jagaci heṃ hoya jāye / to śuddhīhi neṃṇe

pāpapuṇyeṃ aśeṣeṃ / pāsīṃci asatu na dekheṃ /
āṇi sākṣīhī hoūṃ na ṭhake / yerī goṭhī kāyasī

pai mūrtīceni meḻeṃ / to mūrtaci hoūni kheḻe /
pari amūrtapaṇa na maiḻe / dādulayāceṃ

to sṛjī pāḻī saṃhārī / aise bolatī je carācarīṃ /
te ajñāna gā avadhārīṃ / paṃḍukumarā

teṃ ajñāna jaiṃ samūḻa tuṭe / taiṃ bhrāṃtīceṃ masaireṃ phiṭe /
maga akartṛtva pragaṭe / īśvarāceṃ

etha īśvaru eku akartā / aise mānale jarī cittā /
tarī toci mī heṃ svabhāvatā / ādīci āhe

aiseni vivekeṃ udo cittīṃ / tayāsī bhedu kaiṃcā trijagatīṃ /
dekheṃ āpuliyā pratīti / jagaci mukta

jaiśī pūrvadiśecyā rāuḻīṃ / udayāci sūrye divāḻī /
kī yerīhī diśāṃ tiyeci kāḻī / kāḻimā nāhī

buddhiniścayeṃ ātmajñāna / brahmarupa bhāvī āpaṇā āpaṇa /
brahmaniṣṭhā rākhe pūrṇa / tatparāyaṇa aharniśīṃ

aiseṃ vyāpaka jñāna bhaleṃ / jayāṃciyā hṛdayāte giṃvasita āleṃ /
tayāṃcī samatā dṛṣṭi boleṃ / viśeṣūṃ kāī

eka āpaṇapeṃci pāṃ jaiseṃ / te dekhatīṃ viśva taise /
heṃ bolaṇeṃ kāyaseṃ / navalu etha

parī daiva jaiseṃ kavatikeṃ / kahīṃci dainya na dekhe /
kāṃ viveku hā noḻakhe / bhrāṃtīteṃ jevīṃ

nātarī aṃdhakārācī vānī / jaisā sūryo na dekhe svapnīṃ /
amṛta nāyake kānī / mṛtyukathā

heṃ aso saṃtāpu kaisā / caṃdru na smare jaisā /
bhūtīṃ bhedu neṇatī taisā / jñāniye te

maga hā maśaku hā gaju / kīṃ hā śvapacu hā dvipu /
paila itaru hā ātmaju / heṃ urela keṃ

nā tarī he dhenu heṃ śvāna / eka guru eka hīna /
heṃ aso kaiceṃ svapna / jāgatayā

etha bhedu tarī kīṃ dekhā / jari aṃhabhāvā uralā hoāvā /
to ādhīṃci nāhīṃ āghavā / ātāṃ viṣamu kāī

mhaṇoni sarvatra sadā sama / teṃ āpaṇaci advaya brahma /
heṃ saṃpūrṇa jāṇeṃ varma / samadṛṣṭīceṃ

jihīṃ viṣayasaṃgu na sāṃḍitā / iṃdriyāṃteṃ na daṃḍitāṃ /
pari bhogilī nisaṃgatā / kāmeṃviṇa

jihīṃ lokāṃceni ādhāreṃ / laukikeṃci vyāpāreṃ /
pari sāṃḍile nidasureṃ / laukiku heṃ

jaisā janāmājī khecaru / asatuci janā nohe gocaru /
taisā śarīrīṃ pari saṃsāru / noḻakheṃ tayāṃteṃ

heṃ aso pavanāceni meḻeṃ / jaiseṃ jaḻīṃci jaḻa loḻe /
teṃ āṇikeṃ mhaṇatī vegaḻeṃ / kalloḻa he

taiseṃ nāma rupa tayāceṃ / eऱhavīṃ brahmaci to sāceṃ /
mana sāmyā āleṃ jayāceṃ / sarvatra gā

aiseni samadṛṣṭī jo hoye / tayā puruṣā lakṣaṇahī āhe /
arjunā saṃkṣepe sāṃgena pāheṃ / acyuta mhaṇe

tarī mṛgajaḻāceni pūreṃ / jaiseṃ na loṭije kāṃ girivareṃ /
taisā śubhāśubhīṃ na vikare / pātalāṃ jo

toci to nirutā / samadṛṣṭī tatvatā /
hari mhaṇe paṃḍusutā / toci brahma

jo āpaṇape sāṃḍuni kahīṃ / iṃdriyagrāmāvarī yeṇeṃci nāhīṃ /
to viṣaya na sevī heṃ kāī / vicitra yetha

sahajeṃ svasukhāceni apāreṃ / suravāḍe aṃtareṃ /
racilā mhaṇaūni bāhireṃ / pāula na ghalī

sāṃge kumudadaḻāceni tāṭeṃ / jo jevilā caṃdrakiraṇeṃ cokhaṭe /
to cakoru kāī vāḻuvaṃṭe / cuṃbitu āhe

taiseṃ ātmasukha upāileṃ / jayāsi āpaṇapeciṃ phāvaleṃ /
tayā viṣayo sahaje sāṃḍavale / mhaṇo kāī

eऱhavīṃ tarī kautukeṃ / vicāruni pāheṃ pāṃ nikeṃ /
yā viṣayāṃceni sukhe / jhakavitī kavaṇa

jihīṃ āpaṇapeṃ nāhīṃ dekhileṃ / teci ihīṃ iṃdriyārthīṃ raṃjale /
jaiseṃ raṃku kā āḻukaileṃ / tuṣāteṃ sevī

nātarī mṛgeṃ tṛṣāpīḍiteṃ / saṃbhrameṃ visaroni jaḻāṃte /
maga toyabuddhī baraḍīteṃ / ṭhākūni yetī

taiseṃ āpaṇapeṃ nāhīṃ diṭhe / jayāteṃ svasukhāce sadā kharāṃṭe /
tayāsīci viṣaya he gomaṭe / āvaḍatī

eऱhavīṃ viṣayīṃ kāi sukha āhe / he bolaṇeṃci sārikheṃ nohe /
tarī vidyutsphuraṇeṃ kāṃ na pāhe / jagāmājīṃ

sāṃgeṃ vātavarṣaātapu dhare / aise abhrachāyāci jarī sare /
tarī trimāḻikeṃ dhavaḻāreṃ / karāvīṃ kāṃ

mhaṇoni viṣayasukha jeṃ bolije / teṃ neṇatāṃ gā vāyāṃ jalpije /
jaiseṃ mahūra kāṃ mhaṇije / viṣakaṃdāteṃ

nātarī bhaumā nāma maṃgaḻu / rohiṇīteṃ mhaṇatī jaḻu /
taisā sukhapravādu baraḻu / viṣayiku hā

he aso āghavī bolī / sāṃga pā sarpaphaṇīcī sāulī /
te śītala hoīla ketulī / mūṣakāsī

jaisā āmiṣakavaḻu pāṃḍavā / mīnu na sevī taṃvaci baravā /
taisā viṣayasaṃgu āghavā / nibhrāṃta jāṇeṃ

he viraktāṃciye diṭhī / jaiṃ nyāhāḻije kirīṭī /
taiṃ pāṃḍurogāciye puṣṭi- /sārikheṃ dise

mhaṇoni viṣayabhogī jeṃ sukha / teṃ sādyaṃtaci jāṇa duḥkha /
pari kāya kīje mūrkha / na sevitāṃ na sare

teṃ aṃtara neṇatī bāpuḍe / mhaṇoni agatya sevaṇeṃ ghaḍe /
sāṃge pūyapaṃkīce kiḍe / kāya ciḻasī ghetī

tayāṃ duḥkhiyāṃ duḥkhaci jivhāra / te viṣayakardamīṃce dardura /
te bhogajaḻīṃce jalacara / sāṃḍitī kevī

āṇi duḥkhayoni jiyā āhātī / tiyā nirarthakā tarī navhatī /
jarī viṣayāṃvarī viraktī / dharitī jīva

nātarī garbhavāsādi saṃkaṭa / kāṃ janmamaraṇīṃce kaṣṭa /
he visāṃvevīṇa vāṭa / vāhāvī kavaṇeṃ

jarī viṣayīṃ viṣayo sāṃḍijela / tarī mahādoṣī keṃ vasijela /
āṇi saṃsāru hā śabdu navhela / laṭikā jagīṃ

mhaṇoni avidyājāta nāthileṃ / teṃ tihīṃci sāca dāvileṃ /
jihīṃ sukhabuddhī ghetaleṃ / viṣayaduḥkha

yā kāraṇeṃ gā subhaṭā / hā vicāritāṃ viṣaya vokhaṭā /
tūṃ jhaṇeṃ kahīṃ yā vāṭā / visaroni jāśī

pai yāteṃ virakta puruṣa / tyajitī kāṃ jaiseṃ viṣa /
nirāśā tayāṃ duḥkha / dāvileṃ nāvaḍe

jñāniyāṃcyā hana ṭhāyīṃ / yācī mātuhī kīra nāhīṃ /
dehīṃ dehabhāvo jihīṃ / svavaśa kele

jayāṃteṃ bāhyācī bhāṣa / neṇijeci niḥśeṣa /
aṃtarīṃ sukha / eka āthī

pari teṃ vegaḻepaṇeṃ bhogije / jaise pakṣiye phaḻa cuṃbije /
taiseṃ navhe tetha visarije / bhogitepaṇahī

bhogīṃ avasthā eka uṭhī / te aṃhakārācā acaḻu loṭī /
maga sukheṃsi āṃṭhī / gāḍhepaṇeṃ

tiye āliṃganameḻīṃ / hoya āpeṃāpa kavaḻī /
tetha jaḻa jaiseṃ jaḻī / vegaḻeṃ na dise

kāṃ ākāśīṃ vāyu hārape / tetha donhī he bhāṣa lope /
taise sukhaci ure svarupeṃ / suratīṃ tiye

aisī dvaitācī bhāṣa jāya / maga mhaṇoṃ jarī ekaci hoya /
tarī tetha sākṣī kavaṇu āhe / jāṇateṃ je

mhaṇoni aso heṃ āghaveṃ / etha na bolaṇeṃ kāya bolāveṃ /
te khuṇāci pāvela svabhāveṃ / ātmārāma

je aiseni sukheṃ mātale / āpaṇapāṃci āpaṇa guṃtale /
te mī jāṇe nikhaḻa votale / sāmyarasāce

te ānaṃdāce anukāra / sukhāce aṃkura /
kīṃ mahābodheṃ vihāra / kele jaise

te vivekāceṃ gāṃva / kī parabrahmīce svabhāva /
nātarī aḻaṃkārale avayava / brahmavidyece

te sattvāce sāttvika / kī caitanyāce āṃgika /
heṃ bahu aso ekaika / vānisī kāī

tūṃ saṃtastavanī ratasī / tarī kathecī se na karisī /
kīṃ nirāḻī bola dekhasī / sanāgara

pari to rasātiśayo mukuḻīṃ / maga graṃthārthadīpu ujaḻīṃ /
karī sādhuhṛdayarāuḻīṃ / maṃgaḻa ukhā

aisā śrīgurucā uvāyilā / nivṛttidāsāsī pātalā /
maga to mhaṇe kṛṣṇa bolilā / teṃci āikā

arjunā aṃnata sukhācyā ḍohīṃ / ekasarā taḻuci ghetalā jihīṃ /
maga sthirāūnī tehī / teṃci jāhale

athavā ātmaprakāśeṃ cokheṃ / jo āpaṇapeṃci viśva dekhe /
to deheṃci parabrahma sukheṃ / mānūṃ yeīla

jeṃ sācokāreṃ parama / nā teṃ akṣara niḥsīma /
jiye gāṃvīṃce niṣkāma / adhikāriye

je maharṣīṃ vāḍhale / viraktāṃ bhāgā phiṭaleṃ /
je niḥsaṃśayā pikaleṃ / niraṃtara

jihīṃ viṣayāṃpāsoni hirataleṃ / citta āpuleṃ āpaṇa jiṃtile /
te niścita jetha sutale / cetīcinā

teṃ parabrahma nirvāṇa / jeṃ ātmavidāṃceṃ kāraṇa /
teci te puruṣa jāṇa / paṃḍukumarā

te aise kaiseni jāhale / je dehīṃci brahmatvā āle /
heṃ hī pusasī tarī bhaleṃ / saṃkṣepe sāṃgo

tarī vairāgyaceni ādhāreṃ / jihīṃ viṣaya davaḍuni bāhireṃ /
śarīrīṃ ekaṃdareṃ / keleṃ mana

sahajeṃ tihīṃ saṃdhī bheṭī / jetha bhrupallavāṃ paḍe gāṃṭhī /
tetha pāṭhamorī diṭhī / pārukhoniyāṃ

sāṃḍūni dakṣiṇa vāma / prāṇāpānasama /
citteṃsīṃ vyoma- / gāmiye karitī

tetha jaisīṃ rathyodakeṃ sakaḻeṃ / gheūni gaṃgā samudrī miḻe /
maga ekaika vegaḻeṃ / nivaḍu naye

taisī vāsanāṃtarācī vivaṃcanā / maga āpaisī pārukhe arjunā /
je veḻī gaganīṃ layo manā / pavaneṃ kīje

jetha heṃ saṃsāracitra umaṭe / to manorupu paṭu phāṭe /
jaiseṃ sarovara āṭe / maga pratimā nāhīṃ

taiseṃ manapaṇa mudala jāye / maga aṃhabhāvādika keṃ āhe /
mhaṇoni śarīreṃci brahma hoye / anubhavī to

āmhī māgāṃ hana sāṃgitaleṃ / je dehīṃci brahmatva pāvale /
te yeṇeṃ mārge āle / mhaṇaūniyā

āṇi yamaniyamāṃce ḍoṃgara / abhyāsāce sāgara /
kramoni he pāra / pātale te

tihīṃ āpaṇapeṃ karuni nirlepa / praṃpacāceṃ ghetaleṃ māpa /
maga sācāceṃci rupa / hoūni ṭhele

aisā yogayuktīcā uddeśu / jetha bolilā hṛṣīkeśu /
tetha arjunu sudaṃśu / mhaṇoni camatkāralā

teṃ dekhiliyā kṛṣṇeṃ jāṇitaleṃ / maga hāṃsoni pārthāteṃ mhaṇitaleṃ /
teṃ kāī pāṃ citta uvāileṃ / iye bolīṃ tujhe

taṃva arjuna mhaṇe devo / paracittalakṣaṇāṃcā rāvo /
bhalā jāṇitalā jī bhāvo / mānasu mājhā

myāṃ jeṃ kāhīṃ vivaruni pusāveṃ / te ādhīṃci kaḻale deveṃ /
tarī bolileṃ teṃci sāṃgāveṃ / vivaḻa karuni

eऱhavīṃ tarī avadhārā / jo dāvilā tumhīṃ anusārā /
to pavhaṇyāhūni pāyautārā / sohapā jaisā

taisā sāṃkhyāhūni prāṃjaḻā / tarī āmhāṃsārikhiyāṃ abhoḻāṃ /
etha āhāti kāṃhī pari kāḻā / to sāhoṃ ye vara

mhaṇoni eka veḻa devā / toci paḍatāḻā gheyāvā /
vistarela tarī sāṃgāvā / sādyaṃtuci

taṃva kṛṣṇa mhaṇatī ho kāṃ / tuja hā mārga gamalā nikā /
tarī kāya jāhaleṃ aiṃkijo kāṃ / sukheṃ boloṃ

arjunā tu parisasī / parisoni anuṣṭhisī /
tarī āmhāṃsīci vānī kāyasī / sāṃgāvayācī

ādhīṃca citta māyeceṃ / varī miṣa jāhaleṃ paḍhiyaṃtāce /
ātāṃ teṃ adbhutapaṇa snehāceṃ / kavaṇa jāṇe

te mhaṇoṃ kāruṇyarasācī vṛṣṭi / kīṃ navayā snehācī sṛṣṭi /
heṃ ase neṇije dṛṣṭī / harīcī vānūṃ

je amṛtācī votalī / kīṃ premaci piūna mātalī /
mhaṇoni arjunamoheṃ guṃtalī / nighoṃ neṇe

heṃ bahu jeṃ jeṃ jalpijela / tetheṃ kathesi phāṃku hoīla /
pari sneha rupā nayela / bolavarī

mhaṇoni visurā kāya yeṇeṃ / to īśvaru ākaḻāvā kavaṇeṃ /
jo āpuleṃ māna neṇe / āpaṇaci

tarī māgīlā dhvanīāṃtu / maja gamalā sāviyāci mohitu /
je balātkāreṃ ase mhaṇatu / parisa bāpā

arjunā jeṇeṃ bhedeṃ / tujheṃ kāṃ citta bodhe /
taiseṃ taiseṃ vinodeṃ / nirupijela

to kāisayā nāma yogu / tayācā kavaṇa upegu /
athavā adhikāraprasaṃgu / kavaṇā yetha

aiseṃ jeṃ jeṃ kāṃhī / ukta ase iye ṭhāī /
teṃ āghaveṃci pāhīṃ / sāṃgena ātāṃ

tūṃ citta deūni avadhārīṃ / aiseṃ mhaṇoni śrīharī /
bolijela te puḍhārī / kathā āhe

śrīkṛṣṇa arjunāsī saṃgu / na sāṃḍoni sāṃgela yogu /
to vyakta karu prasaṃgu / mhaṇe nivṛttidāsu