Jātakamālā · Verses 41-60

kiṃ ca bhūyaḥ ||
kaler ājñābhaṅgo bhavati sucirāj janmasamaye
muner yasya prāṇipriyahitasamādhānaviduṣaḥ |
jagannāthe tasmin bhagavati bhavopadravahare
praduṣṭānāṃ kā vā bhavatu gatir anyā param ataḥ

unmīlitā iva diśo daśa yasya dīptaiḥ
kīrtyaṃśubhir ghanatamaḥpaṭalāvanaddhāḥ |
tasmin pradoṣam upagacchati yas tapasvī
svair eva karma bhir asau prahataḥ kṣatātmā

yo māteva piteva bāndhava iva prāṇiṣv anukrośavān
ātmasnehaparāṅmukhena manasā janmāṭavīgahvare |
prajñāvīryakṛpābhyupāyasacivaḥ kleśair anākampitaḥ
prāpto bodhim anuttarāṃ sa bhagavān kāṃ satkriyāṃ nārhati

jagaddhitādhānavidhānadīkṣāṃ babhāra śāstā bhṛśadurvahāṃ yaḥ |
manaḥprasādāyatane 'pi tasmin kathaṃ nu cittāni vidūṣayanti

asajjanasamāgamasya kaṭukāvasānaṃ phalaṃ
narendra samupasthitaṃ tad adhunā tavāpāyikam |
idaṃ samanucintya sādhujanasaṃgamaḥ sevyatāṃ
tatas tava bhaviṣyati vyasanapañjarān nirgamaḥ

evaṃ gate 'pi kriyatām prayatnaḥ pāpaprahāṇe kuśalodaye ca |
apy eva nāma vyasanāmburāśeḥ syāt te 'vasānaṃ naralokapāla

anekarūpavyasanopamṛṣṭāṃ samudravelājalalolaśīlām |
narendralakṣmīm upaguhya pāpaṃ kṛtaṃ tvayā duḥkhaśatāvasānam

bahuprakārātyayadāruṇeṣu vicāryamāṇālpasukhodayeṣu |
viṣajya kāmeṣu manas tvayātmā svayaṃ kṛto durgatiduḥkhasākṣī

abhisandhikṛtasya karmaṇo na hi nāśaṃ pravadanti sūrayaḥ |
api kalpasahasrakoṭibhiḥ phaladaṃ tan niyamena jāyate

ata eva jagau jagadvaro jagadālokakaraḥ kṛpāmayaḥ |
bhagavān bhavabhoganiḥspṛhaḥ sa hi karmasvakatāṃ śarīriṇām

salilānalarājataskarair dhanam atraiva vilupyate nṛṇām |
prabhavanti tu tena karmaṇā svam ataḥ karma nṛṇāṃ śubhāśubham

parivartati niścalekṣaṇaḥ kṣaṇamātrapratibaddhajīvitaḥ |
maraṇābhimukho yadā naro nanu karmaiva tadā parāyaṇam

svajano janavan nivartane gṛhavittādyaparair vilupyate |
sva kṛtaṃ tv anuyāti dehināṃ bhavasaṃkrāntyanukūlavartinām

api ca he mahārāja ||
maraṇavaśagatasya jantor vivṛddholbaṇaśvāsaśuṣkauṣṭhakaṇṭhasya
hikkāpraveśānubandhād vinirdhūyamānorasaḥ
kalavikalapadākṣare bhāṣite vihvale cakṣuṣi cchidyamāneṣu
marmasv anāmantrya roṣād iva prasthi tair vā yubhiḥ |
mahati śithilatāṃ gate sandhisaṃghātayantre rujātīkṣṇasūcī-
nipātāntare kvāpi gantuṃ kṛtābhyudyame jīvite
timiragahanasaṃkaṭaṃ nirjanaṃ mārgam ākrāmato nāsti puṇyād
ṛte kaś cid anyaḥ sakhā tat prayatnaṃ kuru śreyasi

api ca mahārāja ||
avaśyaṃ tyaktavyaḥ paramadayito bāndhavajanaḥ
praveṣṭavyaṃ ghoraṃ sabhayam asahāyena gahanam |
pravāse vastavyaṃ suciram api cāsaṃstutajane
tad asmāt kartavyaṃ bahukuśalapātheyam asakṛt

atha sa rājā tena bhikṣuṇā tathā saṃvejito yathā kṣaṇenopalabdhakuśalamūlopacayābhilāṣas tīvrabhayaviṣādavyākulamānasaś ca provāca ||
tad adhunā karavāṇi bhadanta he vada vadāsti dayā yadi te mayi |
nipatitaṃ mahati vyasanārṇave kṛpaṇakaṃ kṛpayoddhara māṃ yate

jaladamārutacandanaśītalair api vayaṃ vacanais tava tāpitāḥ |
svakṛtaduṣkṛtaśaṅkuśatakṣatā viṣayalaulyaparājitamānasāḥ

vipariṇāmakaṭūni mayā purā viṣayasaṅgasukhāny akṛtātmanām |
samupaguhya kṛtaṃ bahu duṣkṛtaṃ dahati yan mama saṃprati mānasam

dhig avaraṃ viṣamaṃ viṣayāśrayaṃ sukham anāryaniṣevitam adhruvam |
yad upagamya narā viṣayadviṣām iha bhavanti sadā karuṇāspadam

avinayo 'nugato mṛditaṃ yaśo na gaṇitaṃ kulam āyatir u jjhitā |
⏑ ⏑ ⏑ – kaluṣaṃ vivṛto 'nayo viṣayalaulya tayā ⏑ ⏑ yāgayā