Jātakamālā · Verses 27-46

anekāpāyasaṃrāddhaṃ rājyaṃ yenaiva bhūbhṛtāṃ |
tenaivāsya kṣamas tyāgaḥ kupitasyeva bhoginaḥ

dharmād eva ca saṃprāpya rājyaśrīsukhasaṃpadaḥ |
audāsīnyaṃ kathaṃ nāma kuryāt tatraiva paṇḍitaḥ

api ca bhadantaḥ ||
vinā śramais tuccham asāram adhruvaṃ sukhaṃ na kāmāśrayam apy avāpyate |
aśeṣalokatrayasaṃpadāspadaṃ padaṃ kim aṅgāpratimasvayaṃbhuvāṃ

niveśya kāmeṣu caleṣu mānasaṃ mudhaiva khinnā vayam anyajanmasu |
jagaddhitāya tv adhunābhivāñchitā bhavantu nas tv antakarāḥ pariśramāḥ

kathaṃ nu tasmin na yateta buddhimān nibadhya yasminn abhilāṣamātrakaṃ |
asaṃstutānām api caikabandhutāṃ jano janānām upayāti tatkṣaṇāt

tadatyayāśaṅkibhiś cāmātyaiḥ sa mahātmā punaḥ punaḥ pratibodhyamāno 'pi naiva teṣāṃ vacanaṃ pramāṇayām āsa ||
tyaktaspṛhatvāt kṣitipasya tasya sarvatra kāruṇyamayī pravṛttiḥ |
guṇānurāgāt sa tathāpi teṣāṃ pūjāṃ munīnāṃ prati sādaro 'bhūt

guṇodgatā eva guṇoditeṣu bhavanti pūjāpratipattinamrāḥ |
ya eva ratnātiśayāntarajñās ta eva teṣv atyadhikaṃ yatante

phalābhilāṣopahatāntarātmā parīkṣate pātraviśeṣam eva |
kṛpālukas tv arthitayaiva tuṣṭaḥ pravartate yācanakeṣu sāraṃ

vanaspatīnām iva janma yeṣāṃ paropakāraikarasasvabhāvaṃ |
labheta teṣāṃ hṛdaye 'vakāśaṃ khalā phalāśā viduṣāṃ kathaṃ ca

atha sa mahāsattvo guṇānuvṛttisthirānurāgeṇa mahatā balena parivṛtaḥ svapuravarād viniryayau || nirgacchantaṃ cainaṃ dūrvāpravālakusumaphalavyagrātyucchritaikapāṇayo dvijavarā jaya jaya mahārājety uccair ānandayām āsuḥ || atha sa mahātmā laukikamaṅgalāpariniṣpattim abhiprakāśayan buddhānām eva ca bhagavatāṃ guṇānuvādaṃ maṅgalaṃ codbhāvayan vyāpinā svareṇa tān amaṅgale maṅgalābhiniveśino viprān abravīt ||
sarvānarthopasaṃhārapragalbhaiḥ kleśaśatrubhiḥ |
parājitānāṃ ko nāma vijayaḥ klībacetasāṃ

durbhedaṃ yo bibheda pravicayakiraṇair dhvāntam antarniviṣṭaṃ
tṛṣṇāvallīṃ samūlāṃ bhavataruśikharārohinīṃ yo dadāha |
āgṛhya krodhasarpaṃ hṛdayabilatalāt ko 'pi cikṣepa yo 'sau
lokālokasvabhāvaḥ sa jayati bhagavān bhagnasaṃsāracakraḥ

aśrāntaṃ suvidūragocaracaraṃ durnigrahaṃ durgrahaṃ
duṣpūraṃ viṣayābhilāṣakṛpaṇaṃ māyāsvabhāvaṃ calaṃ |
ekāntavyavadānamārgavimukhaṃ saṃkleśapakṣonmukhaṃ
yaś cittaṃ damayāṃ babhūva sa jayatv avyagracetā muniḥ

antardyotir apāsya yasya tamasām āyāminīṃ vāsanām
akliṣṭām api nirdadhāva nivṛtiṃ kālatrayavyāpinīṃ |
sarvākāraparopakāraviṣayaṃ yasyāparapratyayaṃ
prajñānaṃ bhagavān asau vijayate buddho jagacchaṅkaraḥ

sa krameṇa vyatītya tālahiṃtālatamālanaktamālaniculabakulakānanopaśobhitaṃ svaviṣayam khadirabadarabilveṅgudaśamīpalāśagahanadurgām aṭavīṃ prapede || tasya khalu mahāsattvasya puṇyatarṣeṇa drutataraṃ vrajataḥ ||
rajobhiḥ sainyānāṃ śalabhakulasaṃpātakapilair
niruddhaṃ khaṃ reje pulinam iva paryastam udadheḥ |
kva cit pāṇikṣepair madasurabhiśīkāraśiśirair
jalair nāgendrāṇāṃ navatamavanīhārapaṭalaiḥ

so 'tikramya tām aṭavīm anukrameṇa meghasya rājño viṣayam anuprāptaḥ | tadāgamanasaṃbhrāntaś ca megho mahīpatir viditatadguṇaprabhāvaḥ pratyudgamyainaṃ sabahumānapraharṣavismayavikacalocano mahatā satkāreṇa mānayitvā mahārhāsanopaviṣṭaṃ tat tat priyam avocat ||
susvāgataṃ kṣitīndrāya dhanyam āgamanaṃ tava |
subhāṣitam idaṃ loke jīvan bhadrāṇi paśyasi

ko nu saṃbhāvayet puṇyāṃ pramodāmṛtapeśalāṃ |
āvayoḥ saṃgatim imāṃ himavadvindhyayor iva

dṛśyase caritair eva kāmaṃ lokāntacāribhiḥ |
sākṣād vo darśanaṃ yat tu tan maṅgalyaphalodayaṃ

pratyakṣam api kalyāṇaṃ manorathavidūragaṃ |
na śraddhatte janaḥ prāyaḥ prītipreṅkholitāśayaḥ

svapno 'yam uta māyeti niścayaṃ na labhāmahe |
bhavantam api paśyanto locanānandabāndhavaṃ

kac cid aklāntakāyas tvaṃ rājan kac cid anāmayaḥ |
kac cid viśrambhaniḥsaṅgaḥ praṇayābhimukho mayi