Jātakamālā · Verses 132-7

bodhisattvaḥ prāha |
etad bhāsuravahnipiṅgalaśikhājvālākalāpojjvalaṃ
ko 'nyo 'vabhramitaṃ prayāsyati samaṃ chittvā paraḥ caiṣyati |
puruṣaḥ prāha |
yo mātary apakārakāryam aparaḥ kṛtvā samāyāsyati
tasyedaṃ śirasi bhramiṣyati punar mūrdhnā [!] tava pracyutaḥ

atha bodhisattvas tena mūrdhnā [!] pravidāhajena tīvreṇa duḥkhena samākulahṛdayo 'pi sattveṣv ananteṣu samutpāditatīvrakāruṇyāśayas taṃ puruṣam ābabhāṣe |
kṣapitasakalarāgakleśajālāndhakārā gaganatalanilīnā yogino ye namasyāḥ |
sphuritakaṭakahārāḥ prajvalanmaulayo ye punar amarasamūhās te 'pi śṛṇvantu santaḥ

kṛtvā duścaritaṃ svamātari jagat kṛtsnaṃ yadi prodvahed
etatprajvalitāgnirāgakapilaṃ cakraṃ bṛhan mūrdhani |
kalpān kalpasamair ahobhir ayutān voḍhuṃ cirāyotsahe
sattvārthaṃ pratipadya mānava hi me cittaṃ na saṃkhidyate

atha tasya sarvasattvapriyasya maitrakanyakasya bodhisattvasya vacanānantaram eva mūrdhnā [!] samutpatyotkṣiptam iva tac cakraṃ saptatālocchrayāc cākraṃ nabhastalaṃ samutpatyāvatasthe |
reje tac capalānilāhatacalajjvālākalāpojjvalaṃ
cakraṃ khe parivartamānam asakṛtpronmuktabhīmasvanam |
udyan [!] bimbam ivāruṇasya sakalaṃ pronmuktaraśmyutkaraṃ
ratnādyaiḥ pravilambamānam amalair vaiḍūryabhittyāśrayaiḥ

tataḥ sravannirjharavāricālinaḥ samīraṇollāsitapuṣpaśākhinaḥ |
nabhovicumbyāyataśṛṅgabāhavaś cakampire bhūmibhṛto hatā iva

bhujaṃgavikṣobhasamudgatormayaḥ payodharadhvānagabhīranādinaḥ |
jalālayā ratnaśikhānivāsinas tadātivelāsalilair lalaṅghire

pramuktaniḥśeṣamayūkhabhāsuraṃ rarāja khe maṇḍalam aṃśumālinaḥ |
raver mayūkhāṅkuradanturāntarād diśaḥ samantād dadṛśuḥ sphuṭaśriyaḥ

sphurattaḍiddāmavirājitorasaḥ surendracāpapratibaddhakaṅkaṇāḥ |
payomucaḥ kiṃcidavāśrutāmbhaso vitānavad vyomani te virejire

srajo vicitrā vinipetur ambarād vituṣṭuvur harṣatarā divaukasaḥ |
cirapragāḍhavyasanā hatārtayaḥ kṣaṇād abhūvan bahavo nirāmayāḥ

jvalati viṣamacakre prāntadīrṇordhvakāyo
galitarudhiradhārāsiktasarvāṅgakāyaḥ |
bhagavati guṇarāśau saṃprasādya svacittaṃ
svagṛham iva sa sādhur dyām ayāt tatkṣaṇena

dānodakamahattīrthe śīlaśaucasunirmale |
kṣamāsurabhiśītācche vīryāgādhapravāhake

dhyānastimitagambhīre prajñāpadmaprabodhake |
tasmin bodhimahātīrthe sthitvā bodhipurotsukaḥ

prakṣālayañ cheṣapāpaṃ tuṣite 'sau yayau mudā |
tatrastho 'py aciraṃ reme dṛṣṭvā lokaṃ kṛpānvitaḥ

tat kim idam upanītam | evaṃ hi mātary apakāriṇaḥ prāṇina ihaiva vyasanaprapātapātālāvalambino bhavantīti satatasamupajāyamānapremaprasādabahumānamānasaiḥ satpuruṣair mātaraḥ śuśrūṣaṇīyā iti ||
iti śrīdivyāvadāne maitrakanyakāvadānaṃ samāptam ||
7. Matsarananda
svayaṃkṛtaḥ sarvasukhoparodhī mātsaryatulyo 'sti kalir na loke |
yatrābhirūḍhā vyasanaughamagnā bhavanti niśvāsaparā manuṣyāḥ

evam idam ucyamānam alaṃ saṃvegāya | tadyathānuśrūyate |
śrāvastyāṃ nando nāma sārthavāḥ prativasati sma | tasya janmāntare pātrātiśayapratipāditatvāt taddānabījasyāparimāṇo bhogaskandhaḥ prādur babhūva | mātsaryābhyāsāt tu notsahate sma kiṃ cid api kasmai cit pradātum |
tasya kṣetrātiśayapatitaṃ dānabījaṃ purāṇaṃ
naikākāraṃ vibhavanicayaṃ sphītam āviś cakāra |
pūrvaṃ dānākṛtaparicayādhyāśayatvāt tu nāsau
dātuṃ kiṃ cit prabhavati tadā matsarākrāntacetāḥ

tyāgasyaiva phalānubandhamadhurāṃ citrāṃ vipākaśriyaṃ
saṃprāpya praharanty anartharucayo mūleṣu ye saṃpadām |
te saṃtyajya nidāghakālasubhagān indoḥ karāñ śīkarān
hlādāyānupatanti dāvadahanāṃś cañcacchikhāsaṃcayān

naivātmanāsau bubhuje kadaryo bhogān dadau nāpi suhṛjjanebhyaḥ |
mātsaryabhūtagrahalubdhacetā dravyārjanaṃ kevalam eva cakre

praviṣṭapūrvā na gṛhaṃ kadā cid dvijātayas tasya kapālahastāḥ |
śuśrāva sa pravrajitānanebhyo na dakṣiṇādeśanamaṅgalāni

vanīyakās tasya gṛhājirebhyo vrajanti niśvasya viśuṣkavaktrāḥ |
baliṃ na kākā api nāma tasya smaranti sikthaprakaropahāram

vivāhakāleṣv api nāma tasya vāditraśabdo na samuccacāra |
āvāhakāleṣv api tasya gehe suhṛjjanā dīnamukhā babhūvuḥ