ઈશ્વરપ્રત્યભિજ્ઞાવિમર્શિની · અધ્યાય 1.4

સ હિ પૂર્વાનુભૂતાર્થોપલબ્ધા પરતોઽપિ સન્ ।
વિમૃશન્સ ઇતિ સ્વૈરી સ્મરતીત્યપદિશ્યતે ॥

ભાસયેચ્ચ સ્વકાલેઽર્થાત્પૂર્વાભાસિતમામૃશન્ ।
સ્વલક્ષણં ઘટાભાસમાત્રેણાથાખિલાત્મના ॥

ન ચ યુક્તં સ્મૃતેર્ભેદે સ્મર્યમાણસ્ય ભાસનમ્ ।
તેનૈક્યં ભિન્નકાલાનાં સંવિદાં વેદિતૈષ સઃ ॥

નૈવ હ્યનુભવો ભાતિ સ્મૃતૌ પૂર્વોઽર્થવત્પૃથક્ ।
પ્રાગન્વભૂવમહમિત્યાત્મારોહણભાસનાત્ ॥

યોગિનામપિ ભાસન્તે ન દૃશો દર્શનાન્તરે ।
સ્વસંવિદેકમાનાસ્તા ભાન્તિ મેયપદેઽપિ વા ॥

સ્મર્યતે યદ્દૃગાસીન્મે સૈવમિત્યપિ ભેદતઃ ।
તદ્વ્યાકરણમેવાસ્યા મયા દૃષ્ટમિતિ સ્મૃતેઃ ॥

યા ચ પશ્યામ્યહમિમં ઘટોઽયમિતિ વાવસા ।
મન્યતે સમવેતં સાપ્યવસાતરિ દર્શનમ્ ॥

તન્મયા દૃશ્યતે દૃષ્ટોઽયં સ ઇત્યામૃશત્યપિ ।
ગ્રાહ્યગ્રાહકતાભિન્નાવર્થૌ ભાતઃ પમાતરિ ॥