Harivamsa · Chapter 104

tataḥ kṛṣṇo bhojayitvā śatāni subahūni ca
viprāṇām ṛṣikalpānāṃ kṛtakṛtyo 'bhavat tadā //

tataḥ saha mayā bhuktvā vṛṣṇibhojaiś ca sarvaśaḥ
sātyakiṃ purataḥ kṛtvā bhojayām āsa vṛṣṇipān ||
tataḥ sabhāṃ praviṣṭāḥ sma saha vṛṣṇipuraḥsaraiḥ |
vicitrāś ca kathā divyāḥ kathayām āsa bhārata //

tataḥ kathānte tatrāham abhigamya janārdanam
apṛcchaṃ tad yathāvṛttaṃ kṛṣṇaṃ yad dṛṣṭvān aham //

kathaṃ samudraḥ stabdhodaḥ kṛtas te kamalekṣaṇa
parvatānāṃ ca vivaraṃ kṛtaṃ te katham acyuta //

tamas tac ca kathaṃ ghoraṃ ghanaṃ cakreṇa pāṭitam
yac ca tat paramaṃ tejaḥ praviṣṭo 'si kutaś ca tat //

kim arthaṃ tena te bālās tadā cāpahṛtāḥ prabho
yac ca te dīrgham adhvānaṃ saṃkṣiptaṃ tat kathaṃ punaḥ //

kathaṃ cālpena kālena kṛtaṃ nas tad gatāgatam
etat sarvaṃ yathāvṛttam ācakṣva mama keśava //

maddarśanārthaṃ te bālā hṛtās tena mahātmanā
viprārtham eṣyate kṛṣṇo nāgacched anyatheti hi //

brahmatejomayaṃ divyam āścaryaṃ dṛṣṭavān asi
ahaṃ sa bharataśreṣṭha mattejas tat sanātanam //

prakṛtiḥ sā mama parā vyaktāvyaktā ca bhārata
tāṃ praviśya bhavantīha muktā bharatasattama //

sā sāṃkhyānāṃ gatiḥ pārtha yogināṃ ca tapasvinām
tat padaṃ paramaṃ brahma sarvaṃ vibhajate jagat //

mām eva tad dhanaṃ tejo jñātum arhasi bhārata
samudraḥ stabdhatoyo 'ham ahaṃ stambhayitā jalam //

ahaṃ te parvatāḥ sapta ye dṛṣṭvā vividhās tvayā
paṅkabhūtaṃ hi timiraṃ dṛṣṭavān asi yad dhi tat |
ahaṃ tamo ghanībhūtam aham eva ca pāṭakaḥ //

ahaṃ ca kālo bhūtānāṃ dharmaś cāhaṃ prakīrtitaḥ
candrādityau mahāśailāḥ saritaś ca sarāṃsi ca |
cāturvarṇyaṃ matprasūtaṃ cāturāśramyam eva ca //

catasraś ca diśaḥ sarvā mamaivātmā caturvidhaḥ
cāturvedyasya kartāham iti budhyasva bhārata //

bhagavan sarvabhūteśa vettum icchāmi te prabho
priyo me 'si jagatpate |
punaś ca paramaṃ tattvaṃ |
paraṃ tattvaṃ suraśreṣṭha tvāṃ prapanno 'smi mādhava |
pṛcchāmi tvāṃ prapanno 'haṃ namas te puruṣottama //

brahma ca brāhmaṇāś caiva tapaḥ satyaṃ ca bhārata
ukthyaṃ bṛhadrathaṃ caiva mattas tad viddhi pāṇḍava //

priyas te 'haṃ mahābāho priyo me 'si dhanaṃjaya
tena te kathayiṣyāmi nānyathā vaktum utsahe |
vetsyase māṃ yathātattvaṃ tad vyākhyāsyāmi te 'nagha //

ahaṃ yajūṃṣi sāmāni ṛcaś cātharvaṇāni ca
brahmā rudras tathendraś ca varuṇaś ca tathā yamaḥ |
kuberaś ca tathā cānye dikpālāḥ sanakādayaḥ |
ṛṣayo devatā yajñā mattejo bharatarṣabha //

pṛthivī vāyur ākāśam āpo jyotiś ca pañcamam
candrādityāv ahorātre pakṣā māsās tathā kṣapāḥ
muhūrtāś ca kalāś caiva kṣaṇāḥ saṃvatsarās tathā //

mantrāś ca vividhāḥ pārtha yāni śāstrāṇi kānicit
vidyāś ca veditavyaṃ ca mattaḥ prādurbhavanti vai //

manmayaṃ viddhi kaunteya kṣayaṃ sṛṣṭiṃ ca bhārata
sac cāsac ca mamaivātmā sad asac caiva yat param //

evam ukto 'smi kṣṛṇena prīyatā bharatarṣabha
tathaiva ca mano nityam abhavan me janārdane //

etac chrutaṃ ca dṛṣṭaṃ ca māhātmyaṃ keśavasya me
yan māṃ pṛcchasi rājendra bhūyaś cāto janārdane //

etac chrutvā kuruśreṣṭho dharmarājo yudhiṣṭhiraḥ
pūjayām āsa manasā govindaṃ puruṣottamam //

vismitaś cābhavad rājā saha sarvaiḥ sahodaraiḥ
rājabhiś ca tathāsannair ye tatrāsan samāgatāḥ //