Gopatha Brahmana · Chapter 5

(GBr_1,4.24col) ity atharvavede gopathabrāhmaṇapūrvabhāge caturthaḥ prapāṭhakaḥ ||
(GBr_1,5.1a) om abhiplavaḥ ṣaḍahaḥ
(GBr_1,5.1b) ṣaḍ ḍhy ahāni bhavanti jyotir gaur āyur gaur āyur jyotiḥ_
(GBr_1,5.1c) abhiplavaḥ pañcāhaḥ
(GBr_1,5.1d) pañca hy evāhāni bhavanti
(GBr_1,5.1e) yad dhy eva prathamam ahas tad uttamam ahaḥ_
(GBr_1,5.1f) abhiplavaś caturahaḥ_
(GBr_1,5.1g) catvāro hi stomā bhavanti trivṛt pañcadaśaḥ saptadaśa ekaviṃśa eva_
(GBr_1,5.1h) abhiplavas tryahas
(GBr_1,5.1i) tryāvṛttir jyotir gaur āyuḥ_
(GBr_1,5.1j) abhiplavo dvyahaḥ_
(GBr_1,5.1k) dve hyeva sāmanī bhavato bṛhadrathantare eva_
(GBr_1,5.1l) abhiplava ekāha
(GBr_1,5.1m) ekāhasya hi stomais tāyate
(GBr_1,5.1n) caturṇām ukthyānāṃ dvādaśa stotrāṇy atiricyante
(GBr_1,5.1o) sa saptamo 'gniṣṭomas
(GBr_1,5.1p) tathā khalu saptāgniṣṭomā māsi saṃpadyanta iti brāhmaṇam

(GBr_1,5.2a) athāto gādhapratiṣṭhā
(GBr_1,5.2b) samudraṃ vā ete prataranti ye saṃvatsarāya dīkṣante
(GBr_1,5.2c) teṣāṃ tīrtham eva prāyaṇīyo 'tirātras
(GBr_1,5.2d) tīrthena hi prataranti
(GBr_1,5.2e) tad yathā samudraṃ tīrthena pratareyus tādṛk tat_
(GBr_1,5.2f) gādhaṃ pratiṣṭhā caturviṃśam ahar yathopakakṣadagdhaṃ vā kaṇṭhadagdhaṃ vā yato viśramya prasnāyeyus tādṛk tat
(GBr_1,5.2g) prasnayo 'bhiplavaḥ
(GBr_1,5.2h) prasneyaḥ pṛṣṭhyaḥ_
(GBr_1,5.2i) gādhaṃ pratiṣṭhābhijid yathopakakṣadagdhaṃ vā kaṇṭhadagdhaṃ vā yato viśramya prasnāyeyus tādṛk tat_
(GBr_1,5.2j) nīvidagdha eva prathamaḥ svarasāmā
(GBr_1,5.2k) jānudagdho dvitīyaḥ
(GBr_1,5.2l) kulphadagdhas tṛtīyaḥ_
(GBr_1,5.2m) dvīpaḥ pratiṣṭhā viṣuvān yathopakakṣadagdhaṃ vā kaṇṭhadanghaṃ vā yato viśramya prasnāyeyus tādṛk tat
(GBr_1,5.2n) kulphadagdha eva prathamo 'rvāk svarasāmā
(GBr_1,5.2o) jānudagdho dvitīyaḥ_
(GBr_1,5.2p) nīvidagdhas tṛtīyaḥ_
(GBr_1,5.2q) gādhaṃ pratiṣṭhā viśvajid yathopakakṣadagdhaṃ vā kaṇṭhadagdhaṃ vā yato viśramya prasnāyeyus tādṛk tat
(GBr_1,5.2r) prasneyaḥ pṛṣṭhyaḥ prasneyo 'bhiplavaḥ prasneye gavāyuṣī prasneyo daśarātraḥ_
(GBr_1,5.2s) gādhaṃ pratiṣṭhā mahāvrataṃ yathopakakṣadagdhaṃ vā kṇṭhadagdhaṃ vā yato viśramya prasnāyeyus tādṛk tat
(GBr_1,5.2t) teṣāṃ tīrtham evodayanīyo 'tirātras
(GBr_1,5.2u) tīrthena hy udyanti
(GBr_1,5.2v) tad yathā samudraṃ tīrthenodeyus tādṛk tat_
(GBr_1,5.2w) atha ha smāha śvetaketur āruṇeyaḥ saṃvatsarāya nv ahaṃ dīkṣā iti [ed. dikṣā]
(GBr_1,5.2x) tasya ha pitā mukham udīkṣyovāca vettha nu tvam āyuṣmant saṃvatsarasya gādhapratiṣṭhe iti [ed. vattha, corr. Patyal]
(GBr_1,5.2y) vedeti_
(GBr_1,5.2z) etad dha smaitad vidvānāheti brāhmaṇam

(GBr_1,5.3a) puruṣo vāva saṃvatsaras
(GBr_1,5.3b) tasya pādāv eva prāyaṇīyo 'tirātraḥ
(GBr_1,5.3c) pādābhyāṃ hi prayanti tayor yac chuklaṃ tad ahno rūpam_
(GBr_1,5.3d) yat kṛṣṇaṃ tad rātreḥ_
(GBr_1,5.3e) nakhāni nakṣatrāṇāṃ rūpam_
(GBr_1,5.3f) lomāny oṣadhivanaspatīnām
(GBr_1,5.3g) ūrū caturviṃśam ahaḥ_
(GBr_1,5.3h) uro 'bhiplavaḥ
(GBr_1,5.3i) pṛṣṭhaṃ pṛṣṭhyaḥ
(GBr_1,5.3j) śira eva trivṛt trivṛtaṃ hy eva śiro bhavati tvag asthi majjā mastiṣkam_
(GBr_1,5.3k) grīvāḥ pañcadaśaś caturdaśa hy evaitasyāṃ karūkarāṇi bhavanti
(GBr_1,5.3l) vīryaṃ pañcadaśam_
(GBr_1,5.3m) tasmād ābhiraṇvībhiḥ satībhir guruṃ bhāraṃ harati
(GBr_1,5.3n) tasmād grīvāḥ pañcadaśaḥ_
(GBr_1,5.3o) uraḥ saptadaśa._
(GBr_1,5.3p) aṣṭāv anye jatravo 'ṣṭāv anya uraḥ saptadaśam_
(GBr_1,5.3q) tasmād uraḥ saptadaśaḥ_
(GBr_1,5.3r) udaram ekaviṃśaḥ_
(GBr_1,5.3s) viṃśatir hy evaitasyāntara udare kuntāpāni bhavanty udaram ekaviṃśam_
(GBr_1,5.3t) tasmād udaram ekaviṃśaḥ_
(GBr_1,5.3u) pārśve triṇavas
(GBr_1,5.3v) trayodaśānyāḥ parśavas trayodaśānyāḥ pārśve triṇave
(GBr_1,5.3w) tasmāt pārśve triṇavaḥ_
(GBr_1,5.3x) anūkaṃ trayastriṃśaḥ_
(GBr_1,5.3y) dvātriṃśatir hy evaitasya pṛṣṭīkuṇḍīlāni bhavanti_
(GBr_1,5.3z) anūkaṃ trayastriśam_
(GBr_1,5.3aa) tasmād anūkaṃ trayastriṃśas
(GBr_1,5.3bb) tasyāyam eva dakṣiṇo bāhur abhijit
(GBr_1,5.3cc) tasyeme dakṣiṇe trayaḥ prāṇāḥ svarasāmānaḥ_
(GBr_1,5.3dd) ātmā viṣuvān_
(GBr_1,5.3ee) tasyeme savye trayaḥ prāṇā arvāk svarasāmānas
(GBr_1,5.3ff) tasyāyaṃ savyo bāhur viśvajit_
(GBr_1,5.3gg) uktau pṛṣṭhyābhiplavau
(GBr_1,5.3hh) yāv avāñcau prāṇau te gavāyuṣī
(GBr_1,5.3ii) aṅgāni daśarātraḥ_
(GBr_1,5.3jj) mukhaṃ mahāvratam_
(GBr_1,5.3kk) tasya hastāv evodayanīyo 'tirātraḥ_
(GBr_1,5.3ll) hastābhyāṃ hy udyanti

(GBr_1,5.4a) puruṣo vāva saṃvatsaras
(GBr_1,5.4b) tasya prāṇa eva prāyaṇīyo 'tirātraḥ
(GBr_1,5.4c) prāṇena hi prayanti
(GBr_1,5.4d) vāg ārambhaṇīyam ahaḥ_
(GBr_1,5.4e) yadyad ārabhate vāg ārabhate
(GBr_1,5.4f) vācaiva tad ārabhate
(GBr_1,5.4g) tasyāyam eva dakṣiṇaḥ pāṇir abhiplavas
(GBr_1,5.4h) tasyedaṃ prātaḥsavanam idaṃ mādhyandinaṃ savanam idaṃ tṛtīyasavanam_
(GBr_1,5.4i) gāyatryā āyatane
(GBr_1,5.4j) tasmād iyam asyai hrasiṣṭhā
(GBr_1,5.4k) tasyedaṃ prātaḥsavanam idaṃ mādhyandinaṃ savanam idaṃ tṛtīyasavanam_
(GBr_1,5.4l) triṣṭubha āyatane
(GBr_1,5.4m) tasmād iyam asyai variṣṭhā
(GBr_1,5.4n) tasyedaṃ prātaḥsavanam idaṃ mādhyandinaṃ savanam idaṃ tṛtīyasavanam_
(GBr_1,5.4o) jagatyā āyatane
(GBr_1,5.4p) tasmād iyam anayor variṣṭhā
(GBr_1,5.4q) tasyedaṃ prātaḥsavanam idaṃ mādhyandinaṃ savanam idaṃ tṛtīyasavanam_
(GBr_1,5.4r) paṅktyā āyatane
(GBr_1,5.4s) pṛthur iva vai paṅktis
(GBr_1,5.4t) tasmād iyam āsāṃ prathiṣṭhā
(GBr_1,5.4u) tasyedaṃ prātaḥsavanam idaṃ mādhyandinaṃ savanam idaṃ tṛtīyasavanam_
(GBr_1,5.4v) virāja āyatane_
(GBr_1,5.4w) annaṃ vai śrīḥ_
(GBr_1,5.4x) virāḍ annādyam
(GBr_1,5.4y) annnādyasya śriyo 'varuddhyai
(GBr_1,5.4z) tasmād iyam āsāṃ variṣṭhā
(GBr_1,5.4aa) tasyedaṃ prātaḥsavanam idaṃ mādhyandinaṃ savanam idaṃ tṛtīyasavanam_
(GBr_1,5.4bb) atichandasa āyatane_
(GBr_1,5.4cc) atichando vai chandasām āyatanam_
(GBr_1,5.4dd) tasmād idaṃ prathiṣṭhaṃ phalakam_
(GBr_1,5.4ee) tasyedaṃ prātaḥsavanam idaṃ mādhyandinaṃ savanam idaṃ tṛtīyasavanam_
(GBr_1,5.4ff) sa itaḥ sa ito 'bhiplavaḥ sa ita ātmā pṛṣṭhyaḥ
(GBr_1,5.4gg) plavatīvābhiplavas
(GBr_1,5.4hh) tiṣṭhatīva pṛṣṭhyaḥ
(GBr_1,5.4ii) plavata iva hy evam aṅgais
(GBr_1,5.4jj) tiṣṭhatīvātmanā
(GBr_1,5.4kk) tasyāyam eva dakṣiṇaḥ karṇo 'bhijit
(GBr_1,5.4ll) tasya yad dakṣiṇam akṣṇaḥ śuklaṃ sa prathamaḥ svarasāmā
(GBr_1,5.4mm) yat kṛṣṇaṃ sa dvitīyaḥ_
(GBr_1,5.4nn) yan maṇḍalaṃ sa tṛtīyaḥ_
(GBr_1,5.4oo) nāsike viṣuvān maṇḍalam eva prathamo 'rvāk svarasāmā
(GBr_1,5.4pp) yat kṛṣṇaṃ sa dvitīyaḥ_
(GBr_1,5.4qq) yac chuklaṃ sa tṛtīyas
(GBr_1,5.4rr) tasyāyaṃ savyaḥ karṇo viśvajit_
(GBr_1,5.4ss) uktau pṛṣṭhyābhiplavau
(GBr_1,5.4tt) yāv avāñcau prāṇau te gavāyuṣī
(GBr_1,5.4uu) aṅgāni daśarātraḥ_
(GBr_1,5.4vv) mukhaṃ mahāvratam_
(GBr_1,5.4ww) tasyodāna evodayanīyo 'tirātraḥ_
(GBr_1,5.4xx) udānena hy udyanti

(GBr_1,5.5a) puruṣo vāva saṃvatsaraḥ
(GBr_1,5.5b) puruṣa ity ekam_
(GBr_1,5.5c) saṃvatsara ity ekam
(GBr_1,5.5d) atra tat samam_
(GBr_1,5.5e) dve ahorātre saṃvatsarasya
(GBr_1,5.5f) dvāv imau puruṣe prāṇāv iti_
(GBr_1,5.5g) atra tat samam_
(GBr_1,5.5h) trayo vā ṛtavaḥ saṃvatsarasya
(GBr_1,5.5i) traya ime puruṣe prāṇā iti_
(GBr_1,5.5j) atra tat samam_
(GBr_1,5.5k) ṣaḍ vā ṛtavaḥ saṃvatsarasya
(GBr_1,5.5l) ṣaḍ ime puruṣe prāṇā iti_
(GBr_1,5.5m) atra tatsamam_
(GBr_1,5.5n) sapta vā ṛtavaḥ saṃvatsarasya
(GBr_1,5.5o) sapteme puruṣe prāṇā iti_
(GBr_1,5.5p) atra tat samam_
(GBr_1,5.5q) dvādaśa māsāḥ saṃvatsarasya
(GBr_1,5.5r) dvādaśeme puruṣe prāṇā iti_
(GBr_1,5.5s) atra tat samam_
(GBr_1,5.5t) trayodaśa māsāḥ saṃvatsarasya
(GBr_1,5.5u) trayodaśeme puruṣe prāṇā iti_
(GBr_1,5.5v) atra tat samam_
(GBr_1,5.5w) caturviṃśatir ardhamāsāḥ saṃvatsarasya
(GBr_1,5.5x) caturviṃśo 'yaṃ puruṣaḥ_
(GBr_1,5.5y) viṃśatyaṅguliś caturaṅga iti_
(GBr_1,5.5z) atra tat samam_
(GBr_1,5.5aa) ṣaḍviṃśatir ardhamāsāḥ saṃvatsarasya
(GBr_1,5.5bb) ṣaḍviṃśo 'yaṃ puruṣaḥ
(GBr_1,5.5cc) pratiṣṭhe ṣaḍviṃśe iti_
(GBr_1,5.5dd) atra tat samam_
(GBr_1,5.5ee) trīṇi ca ha vai śatāni ṣaṣṭiś ca saṃvatsarasyāhorātrāṇīti_
(GBr_1,5.5ff) etāvanta eva puruṣasya prāṇā iti_
(GBr_1,5.5gg) atra tat samam_
(GBr_1,5.5hh) sapta ca ha vai śatāni viṃśatiś ca saṃvatsarasyāhāni ca rātrayaś ceti_
(GBr_1,5.5ii) etāvanta eva puruṣasyāsthīni ca majjānaś ceti_
(GBr_1,5.5jj) atra tat samam_
(GBr_1,5.5kk) caturdaśa ca ha vai śatāni catvāriṃśac ca saṃvatsarasyārdhāhāś cārdharātrayaś ceti_
(GBr_1,5.5ll) etāvanta eva puruṣasya sthūrā māṃsānīti_
(GBr_1,5.5mm) atra tat samam
(GBr_1,5.5nn) aṣṭāviṃśatiś ca ha vai śatāny aśītiś ca saṃvatsarasya pādāhāś ca pādarātrayaś ceti_
(GBr_1,5.5oo) etāvanta eva puruṣasya snāvā bandhyā iti_
(GBr_1,5.5pp) atra tat samam_
(GBr_1,5.5qq) daśa ca ha vai sahasrāṇy aṣṭau ca śatāni saṃvatsarasya muhūrtā iti_
(GBr_1,5.5rr) etāvanta eva puruṣasya peśaśamarā iti_
(GBr_1,5.5ss) atra tat samam_
(GBr_1,5.5tt) yāvanto muhūrtāḥ pañcadaśa kṛtvas tāvantaḥ prāṇāḥ_
(GBr_1,5.5uu) yāvantaḥ prāṇāḥ pañcadaśa kṛtvas tāvanto 'pānāḥ_
(GBr_1,5.5vv) yāvanto 'pānāḥ pañcadaśa kṛtvas tāvanto vyānāḥ_
(GBr_1,5.5ww) yāvanto vyānāḥ pañcadaśa kṛtvas tāvantaḥ samānāḥ_
(GBr_1,5.5xx) yāvantaḥ samānāḥ pañcadaśa kṛtvas tāvanta udānāḥ_
(GBr_1,5.5yy) yāvanta udānāḥ pañcadaśa kṛtvas tāvanty etādīni
(GBr_1,5.5zz) yāvanty etādīni tāvanty etarhīṇi
(GBr_1,5.5aaa) yāvanty etarhīṇi tāvanti svedāyanāni
(GBr_1,5.5bbb) yāvanti svedāyanāni tāvanti kṣiprāyaṇāni
(GBr_1,5.5ccc) yāvanti kṣiprāyaṇāni tāvanto romakūpāḥ_
(GBr_1,5.5ddd) yāvanto romakūpāḥ pañcadaśa kṛtvas tāvanto varṣato dhārās
(GBr_1,5.5eee) tad etat krośaśatikaṃ parimāṇam_
(GBr_1,5.5fff) tad apy etad ṛcoktaṃ <śramād anyatra parivartamānaś caran vāsīno yadi vā svapann api | ahorātrābhyāṃ puruṣaḥ kṣaṇena kati kṛtvaḥ prāṇiti cāpānīti ca śataṃ śatāni parivatsarāṇām aṣṭau ca śatāni saṃvatsarasya muhūrtān yān vadanty ahorātrābhyāṃ puruṣaḥ samena kati kṛtvaḥ prāṇiti cāpānīti ca [ŚBM 12.3.2.7-8]>_iti brāhmaṇam

(GBr_1,5.6a) saṃvatsarasya samatā veditavyeti ha smāha vāsyuḥ_
(GBr_1,5.6b) ekam eva purastād viṣuvato 'tirātram upayanty ekam upariṣṭāt
(GBr_1,5.6c) tripañcāśatam eva purastād viṣuvato 'gniṣṭomān upayanti tripañcāśatam upariṣṭāt_
(GBr_1,5.6d) viṃśatiśatam eva purastād viṣuvata ukthyān upayanti viṃśatiśatam upariṣṭāt
(GBr_1,5.6e) ṣaḍ eva purastād viṣuvataḥ ṣoḍaśina upayanti ṣaḍ upariṣṭāt
(GBr_1,5.6f) triṃśad eva purastād viṣuvataḥ ṣaḍahān upayanti triṃśad upariṣṭāt
(GBr_1,5.6g) saiṣā saṃvatsarasya samatā
(GBr_1,5.6h) sa ya evam etāṃ saṃvatsarasya samatāṃ veda saṃvatsareṇa sātmā saloko bhūtvā devān apyetīti brahmaṇam

(GBr_1,5.7a) athāto yajñakramāḥ_
(GBr_1,5.7b) agnyādheyam
(GBr_1,5.7c) agnyādheyāt pūrṇāhutiḥ
(GBr_1,5.7d) pūrṇahuter agnihotram
(GBr_1,5.7e) agnihotrād darśapūrṇamāsau
(GBr_1,5.7f) darśapūrṇamāsābhyām āgrayaṇam
(GBr_1,5.7g) āgrayaṇāc cāturmāsyāni
(GBr_1,5.7h) cāturmāsyebhyaḥ paśubandhaḥ
(GBr_1,5.7i) paśubandhād agniṣṭomaḥ_
(GBr_1,5.7j) agniṣṭomād rājasūyaḥ_
(GBr_1,5.7k) rājasūyād vājapeyaḥ_
(GBr_1,5.7l) vājapeyād aśvamedhaḥ_
(GBr_1,5.7m) aśvamedhāt puruṣamedhaḥ
(GBr_1,5.7n) puruṣamedhāt sarvamedhaḥ
(GBr_1,5.7o) sarvamedhād dakṣiṇāvantaḥ_
(GBr_1,5.7p) dakṣiṇāvadbhyo 'dakṣiṇāḥ_
(GBr_1,5.7q) adakṣiṇāḥ sahasradakṣiṇe pratyatiṣṭhan_
(GBr_1,5.7r) te vā ete yajñakramāḥ
(GBr_1,5.7s) sa ya evam etān yajñakramān veda yajñena sātmā saloko bhūtvā devān apyetīti brāhmaṇam

(GBr_1,5.8a) prajāpatir akāmayatānantyam aśnuvīyeti
(GBr_1,5.8b) so 'gnīn ādhāya pūrṇāhutyāyajata
(GBr_1,5.8c) so 'ntam evāpaśyat
(GBr_1,5.8d) so 'gnihotreṇeṣṭvāntam evāpaśyat
(GBr_1,5.8e) sa darśapūrṇamāsābhyām iṣṭvāntam evāpaśyat
(GBr_1,5.8f) sa āgrayaṇeneṣṭvāntam evāpaśyat
(GBr_1,5.8g) sa cāturmāsyair iṣṭvāntam evāpaśyat
(GBr_1,5.8h) sa paśubandheneṣṭvāntam evāpaśyat
(GBr_1,5.8i) so 'gniṣṭomeneṣṭvāntam evāpaśyat
(GBr_1,5.8j) sa rājasūyeneṣṭvā rājeti nāmādhatta
(GBr_1,5.8k) so 'ntam evāpaśyat
(GBr_1,5.8l) sa vājapeyeneṣṭvā samrāḍ iti nāmādhatta
(GBr_1,5.8m) so 'ntam evāpaśyat
(GBr_1,5.8n) so 'śvamedheneṣṭvā svarāḍ iti nāmādhatta
(GBr_1,5.8o) so 'ntam evāpaśyat
(GBr_1,5.8p) sa puruṣamedheneṣṭvā virāḍ iti nāmādhatta
(GBr_1,5.8q) so 'ntam evāpaśyat
(GBr_1,5.8r) sa sarvamedheneṣṭvā sarvarāḍ iti nāmādhatta
(GBr_1,5.8s) so 'ntam evāpaśyat
(GBr_1,5.8t) so 'hīnair dakṣiṇāvadbhir iṣṭvāntam evāpaśyat
(GBr_1,5.8u) so 'hīnair adakṣiṇāvadbhir iṣṭvāntam evāpaśyat
(GBr_1,5.8v) sa sattreṇobhayato 'tirātreṇāntato 'yajata
(GBr_1,5.8w) vācaṃ ha vai hotre prāyacchat
(GBr_1,5.8x) prāṇam adhvaryave cakṣur udgātre mano brahmaṇe 'ṅgāni hotrakebhya ātmānaṃ sadasyebhyaḥ_
(GBr_1,5.8y) evam ānantyam ātmānaṃ dattvānantyam āśnuta
(GBr_1,5.8z) tad yā dakṣiṇā ānayat tābhir ātmānaṃ niṣkrīṇīya
(GBr_1,5.8aa) tasmād etena jyotiṣṭomenāgniṣṭomenātmaniṣkrayaṇena sahasradakṣiṇena pṛṣṭhaśamanīyena tvareta
(GBr_1,5.8bb) yo hy aniṣṭvā pṛṣṭhaśamanīyena praityātmānaṃ so 'niṣkrīya praitīti brāhmaṇam

(GBr_1,5.9a) yad vai saṃvatsarāya saṃvatsarasado dīkṣante katham eṣām agnihotram anantaritaṃ bhavati
(GBr_1,5.9b) vrateteti brūyāt
(GBr_1,5.9c) katham eṣāṃ darśo 'nantarito bhavati
(GBr_1,5.9d) dadhnā ca puroḍāśena ceti brūyāt
(GBr_1,5.9e) katham eṣāṃ paurṇamāsam anantaritaṃ bhavati_
(GBr_1,5.9f) ājyena ca puroḍāśena ceti brūyāt
(GBr_1,5.9g) katham eṣām āgrayaṇam anantaritaṃ bhavati
(GBr_1,5.9h) saumyena caruṇeti brūyāt
(GBr_1,5.9i) katham eṣāṃ cāturmāsyāny anantaritāni bhavanti
(GBr_1,5.9j) payasyayeti brūyāt
(GBr_1,5.9k) katham eṣāṃ paśubandho 'nantarito bhavati
(GBr_1,5.9l) paśunā ca puroḍāśena ceti brūyāt
(GBr_1,5.9m) katham eṣāṃ saumyo 'dhvaro 'nantarito bhavati
(GBr_1,5.9n) grahair iti brūyāt
(GBr_1,5.9o) katham eṣāṃ gṛhamedho 'nantarito bhavati
(GBr_1,5.9p) dhānākarambhair iti brūyāt
(GBr_1,5.9q) katham eṣāṃ pitṛyajño 'nantarito bhavati_
(GBr_1,5.9r) aupāsanair iti brūyāt
(GBr_1,5.9s) katham eṣāṃ mithunam anantaritaṃ bhavati
(GBr_1,5.9t) hiṃkāreneti brūyāt
(GBr_1,5.9u) saiṣā saṃvatsare yajñakratūnām apītiḥ
(GBr_1,5.9v) sa ya evam etāṃ saṃvatsare yajñakratūnām apītiṃ veda yajñena sātmā saloko bhūtvā devān apy etīti brāhmaṇam

(GBr_1,5.10a) devā ha vai sahasrasaṃvatsarāya didīkṣire
(GBr_1,5.10b) teṣāṃ pañca śatāni saṃvatsarāṇāṃ paryupetāny āsann athedaṃ sarva śaśrāma ye stomā yāni pṛṣṭhāni yāni śastrāṇi
(GBr_1,5.10c) te devā ihasāmivāsurupa taṃ yajñakratuṃ jānīmo yaḥ sahasrasaṃvatsarasya pratimā
(GBr_1,5.10d) ko hi tasmai manuṣyo yaḥ sahasrasaṃvatsareṇa yajeteti
(GBr_1,5.10e) tad ayātayāma madhye yajñasyāpaśyan_
(GBr_1,5.10f) tenāyātayāmnā yā vede vyaṣṭir āsīt tāṃ pañcasv apaśyann ṛci yajuṣi sāmni śānte 'tha ghore
(GBr_1,5.10g) tā vā etāḥ pañca vyāhṛtayo bhavanty o śrāvayāstu śrauṣaḍ yaja ye yajāmahe vauṣaḍ iti
(GBr_1,5.10h) te devā ihasāmivāsurupa taṃ yajñakratuṃ jānīmo yaḥ sahasrasaṃvatsarasya pratimā [ed. davā]
(GBr_1,5.10i) ko hi tasmai manuṣyo yaḥ sahasrasaṃvatsareṇa yajeteti
(GBr_1,5.10j) tata etaṃ tāpaścitaṃ sahasrasaṃvatsarasyāñjasyam apaśyan_
(GBr_1,5.10k) te hy eva stomā bhavanti tāni pṛṣṭhāni tāni śastrāṇi
(GBr_1,5.10l) sa khalu dvādaśa māsān dīkṣābhir eti dvādaśamāsān upasadbhir dvāśamāsāṃt sutyābhiḥ_
(GBr_1,5.10m) atha yad dvādaśa māsān dīkṣābhir eti dvādaśamāsān upasadbhis tenaitāv agnyarkāv āpnoti_
(GBr_1,5.10n) atha yad dvādaśa māsāṃt sutyābhis tenedaṃ mahaduktham avāpnoti
(GBr_1,5.10o) te devā ihasāmivāsurupa taṃ yajñakratuṃ jānīmo yaḥ sahasrasaṃvatsarasya pratimā
(GBr_1,5.10p) ko hi tasmai manuṣyo yaḥ sahasrasaṃvatsareṇa yajeteti
(GBr_1,5.10q) tata etaṃ saṃvatsaraṃm tāpaścitasyāñjasyam apaśyan_
(GBr_1,5.10r) te hy eva stomā bhavanti tāni pṛṣṭhāni tāni śastrāṇi
(GBr_1,5.10s) te devā ihasāmivāsurupa taṃ yajñakratuṃ jānīmo yaḥ sahasrasaṃvatsarasya pratimā
(GBr_1,5.10t) ko hi tasmai manuṣyo yaḥ sahasrasaṃvatsareṇa yajeteti
(GBr_1,5.10u) tata etaṃ dvādaśāhaṃ saṃvatsarasyāñjasyam apaśyan_
(GBr_1,5.10v) te hy eva stomā bhavanti tāni pṛṣṭhāni tāni śastrāṇi
(GBr_1,5.10w) sa khalu dvādaśāhaṃ dīkṣābhir eti dvādaśāham upasadbhir dvādaśāhaṃ sutyābhiḥ_
(GBr_1,5.10x) atha yad dvādaśāhaṃ dīkṣābhir eti dvādaśāham upasadbhis tenaitāv agnyarkāv āpnoti_
(GBr_1,5.10y) atha yad dvādaśāhaṃ sutyābhis tenedaṃ mahaduktham avāpnoti
(GBr_1,5.10z) te devā ihasāmivāsurupa taṃ yajñakratuṃ jānīmo yaḥ sahasrasaṃvatsarasya pratimā [ed. ihasamivāsurupa]
(GBr_1,5.10aa) ko hi tasmai manuṣyo yaḥ sahasrasaṃvatsareṇa yajeteti
(GBr_1,5.10bb) tata etaṃ pṛṣṭhyaṃ ṣaḍahaṃ dvādaśāhasyāñjasyam apaśyan_
(GBr_1,5.10cc) te hy eva stomā bhavanti tāni pṛṣṭhāni tāni śastrāṇi
(GBr_1,5.10dd) te devā ihasāmivāsurupa taṃ yajñakratuṃ jānīmo yaḥ sahasrasaṃvatsarasya pratimā
(GBr_1,5.10ee) ko hi tasmai manuṣyo yaḥ sahasrasaṃvatsareṇa yajeteti
(GBr_1,5.10ff) tata etaṃ viśvajitaṃ pṛṣṭhyaṣaḍahasyāñjasyam apaśyan_
(GBr_1,5.10gg) te hy eva stomā bhavanti tāni pṛṣṭhāni tāni śastrāṇi
(GBr_1,5.10hh) te devā ihasāmivāsurupa taṃ yajñakratuṃ jānīmo yaḥ sahasrasaṃvatsarasya pratimā
(GBr_1,5.10ii) ko hi tasmai manuṣyo yaḥ sahasrasaṃvatsareṇa yajeteti
(GBr_1,5.10jj) sa vā eṣa viśvajid yaḥ sahasrasaṃvatsarasya pratimā_
(GBr_1,5.10kk) eṣa ha prajānāṃ prajāpatir yad viśvajid iti brāhmaṇam

(GBr_1,5.11a) puruṣaṃ ha vai nārāyaṇaṃ prajāpatir uvāca yajasya yajasveti
(GBr_1,5.11b) sa hovāca yajasva yajasvety evaṃ hāttha mā
(GBr_1,5.11c) trir api kṣata me vasavaḥ prātaḥsavanenāgū rudrā mādhyaṃdinasavanenādityās tṛtīyasavanena
(GBr_1,5.11d) yajñavāstuny eva paryaśiṣo yajñavāstum ity evam āśiṣo 'haṃ vā etad veda yajñe vasavaḥ prātaḥsavanenāgū rudrā mādhyaṃdinasavanenādityās tṛtīyasavanena yajñavāstuny eva paryaśiṣo yajñavāstum ity evam āśiṣo vidvāṃso nūnaṃ tvā yājayeyuḥ_
(GBr_1,5.11e) ete ha vā avidvāṃso yatrānṛgvid dhotā bhavaty ayajurvid adhvaryur asāmavid udgātābhṛgvaṅgirovid brahmā
(GBr_1,5.11f) yajasvaiva hanta tu te tad vakṣyāmi
(GBr_1,5.11g) yathā sūtre maṇir iva sūtram etāny ukthāhāni bhavanti sūtram iva vā maṇāv iti
(GBr_1,5.11h) tasmād ya eva sarvavit syāt taṃ brahmāṇaṃ kurvīta_
(GBr_1,5.11i) eṣa ha vai vidvāṃt sarvavid brahmā yad bhṛgvaṅgirovit_
(GBr_1,5.11j) ete ha vā asya sarvasya śamayitāraḥ pālayitāras
(GBr_1,5.11k) tamād brahmā stute bahiḥpavamāne vācayati

(GBr_1,5.12a) śyeno 'si gāyatrachandā
(GBr_1,5.12b) anu tvārabhe
(GBr_1,5.12c) svasti mā saṃpārayeti
(GBr_1,5.12d) sa yad āha śyeno 'sīti somaṃ vā etad āha_
(GBr_1,5.12e) eṣa ha vā agnir bhūtvāsmiṃl loke saṃśāyayati
(GBr_1,5.12f) tad yat saṃśāyayati tasmāc cheyanas
(GBr_1,5.12g) tac cheyanasya śyenatvam_
(GBr_1,5.12h) sa yad āha gāyatrachandā anutvārabha iti gāyatreṇa chandasā vasurbhir devaiḥ prātaḥsavane 'smiṃl loke 'gniṃ santam anvārabhate
(GBr_1,5.12i) sa yad āha svasti mā saṃpārayeti gāyatreṇaiva chandasā vasubhir devaiḥ prātaḥsavane 'smiṃl loke 'gninā devena svasti mā saṃpārayeti gāyatreṇaivainaṃ tac chandasā vasubhir devaiḥ prātaḥsavane 'smiṃl loke 'gninā devena svasti saṃpadyate ya evaṃ veda
(GBr_1,5.13a) atha mādhyaṃdine pavamāne vācayati samrāḍ asi triṣṭupchandā
(GBr_1,5.13b) anu tvārabhe
(GBr_1,5.13c) svasti mā saṃpārayeti
(GBr_1,5.13d) sa yad āha samrāḍ asīti somaṃ vā etad āha_
(GBr_1,5.13e) eṣa ha vai vāyurbhūtvāntarikṣaloke samrājati
(GBr_1,5.13f) tad yat samrājati tasmāt samrāṭ
(GBr_1,5.13g) tat samrājasya samrāṭtvam_
(GBr_1,5.13h) sa yad āha triṣṭupchandā anu tvārabha iti traiṣṭubhena chandasā rudrair devair mādhyaṃdine savane 'ntarikṣaloke vāyuṃ santam anvārabhate
(GBr_1,5.13i) sa yad āha svasti mā saṃpārayeti traiṣṭubhenaiva chandasā rudrair devair mādhyaṃdine savane antarikṣaloke vāyunā devena svasti mā saṃpārayeti
(GBr_1,5.13j) traiṣṭubhenaivainaṃ tac chandasā rudrair devair mādhyaṃdine savane antarikṣaloke vāyunā devena svasti saṃpadyate ya evaṃ veda

(GBr_1,5.14a) athārbhave pavamāne vācayati svaro 'si gayo 'si jagacchandā
(GBr_1,5.14b) anu tvārabhe
(GBr_1,5.14c) svasti mā saṃpārayeti
(GBr_1,5.14d) sa yad āha svaro 'sīti somaṃ vā etad āha_
(GBr_1,5.14e) eṣa ha vai sūryo bhūtvāmuṣmiṃl loke svarati
(GBr_1,5.14f) tad yat svarati tasmāt svaras
(GBr_1,5.14g) tat svarasya svaratvam_
(GBr_1,5.14h) sa yad āha gayo 'sīti somaṃ vā etad āha_
(GBr_1,5.14i) eṣa ha vai candramā bhūtvā sarvāṃl lokān gacchati
(GBr_1,5.14j) tad yad gacchati tasmād gayas
(GBr_1,5.14k) tad gayasya gayatvam_
(GBr_1,5.14l) sa yad āha jagacchandā anu tvārabha iti jāgatena chandasādityair devais tṛtīyasavane 'muṣmiṃl loke sūryaṃ santam anvārabhate
(GBr_1,5.14m) sa yad āha svasti mā saṃpārayeti jāgatenaiva chandasādityair devais tṛtīyasavane 'muṣmiṃl loke sūryeṇa devena svasti mā saṃpārayeti jāgatenaivainaṃ tac chandasādityair devais tṛtīyasavane 'muṣmiṃl loke sūryeṇa devena svasti saṃpadyate ya evaṃ veda

(GBr_1,5.15a) atha saṃsthite saṃsthite savane vācayati mayi bhargo mayi maho mayi yaśo mayi sarvam iti
(GBr_1,5.15b) pṛthivy eva bhargo 'ntarikṣa eva maho dyaur eva yaśo 'pa eva sarvam
(GBr_1,5.15c) agnir eva bhargo vāyur eva maha āditya eva yaśaś candramā eva sarvam_ [ed. ādityā]
(GBr_1,5.15d) vasava eva bhargo rudrā eva maha ādityā eva yaśo viśvedevā eva sarvam_
(GBr_1,5.15e) gāyatry eva bhargas triṣṭub eva maho jagaty eva yaśo 'nuṣṭub eva sarvam_
(GBr_1,5.15f) prācy eva bhargaḥ pratīcy eva maha udīcy eva yaśo dakṣiṇaiva sarvam_
(GBr_1,5.15g) vasanta eva bhargo grīṣma eva maho varṣā eva yaśaḥ śarad eva sarvam_
(GBr_1,5.15h) trivṛd eva bhargaḥ pañcadaśa eva mahaḥ saptadaśa eva yaśa ekaviṃśa eva sarvam
(GBr_1,5.15i) ṛgveda eva bhargo yajurveda eva mahaḥ sāmaveda eva yaśo brahmaveda eva sarvam_
(GBr_1,5.15j) hotaiva bhargo 'dhvaryur eva maha udgātaiva yaśo brahmaiva sarvam_
(GBr_1,5.15k) vāg eva bhargaḥ prāṇa eva mahaś cakṣur eva yaśo mana eva sarvam

(GBr_1,5.16a) sa yad āha mayi bharga iti pṛthivīm evaital lokānām ahāgniṃ devānāṃ vasūn devān devagaṇānāṃ gāyatraṃ chandasāṃ prācīṃ diśāṃ vasantam ṛtūnāṃ trivṛtaṃ stomānām ṛgvedaṃ vedānāṃ hautraṃ hotrakāṇāṃ vācam indriyāṇām

(GBr_1,5.17a) sa yad āha mayi maha ity antarikṣam evaital lokānām āha vāyuṃ devānāṃ rudrān devān devagaṇānāṃ traiṣṭubhaṃ chandasāṃ pratīcīṃ diśāṃ grīṣmam ṛtūnāṃ pañcadaśaṃ stomānāṃ yajurvedaṃ vedānām ādhvaryavaṃ hotrakāṇāṃ prāṇam indriyāṇām

(GBr_1,5.18a) sa yad āha mayi yaśa iti divam evaital lokānām āhādityaṃ devānām ādityān devagaṇānāṃ jāgataṃ chandasām udīcīṃ diśāṃ varṣā ṛtūnāṃ saptadaśaṃ stomānāṃ sāmavedaṃ vedānām audgātraṃ hotrakāṇāṃ cakṣur indriyāṇām

(GBr_1,5.19a) sa yad āha mayi sarvam ity apa evaital lokānām āha candramasaṃ devānāṃ viśvān devān devagaṇānām ānuṣṭubhaṃ chandasāṃ dakṣiṇāṃ diśāṃ śaradam ṛtūnām ekaviṃśaṃ stomānāṃ brahmavedaṃ vedānāṃ brahmatvaṃ hotrakāṇāṃ mana indriyāṇām

(GBr_1,5.20a) sa vā eṣa daśadhā catuḥ saṃpadyate
(GBr_1,5.20b) daśa ca ha vai catur virājo 'kṣarāṇi
(GBr_1,5.20c) taṃ garbhā upajīvanti
(GBr_1,5.20d) śrīr vai virāḍ
(GBr_1,5.20e) yaśo 'nnādyam_
(GBr_1,5.20f) śriyam eva tad virājaṃ yaśasy annādyo pratiṣṭhāpayati
(GBr_1,5.20g) pratiṣṭhantīr idaṃ sarvam anupratiṣṭhati
(GBr_1,5.20h) pratitiṣṭhati prajayā paśubhir ya evaṃ veda

(GBr_1,5.21a) anarvāṇaṃ ha vai devaṃ dadhyaṅṅ āṅgirasa upasīdaṃ ha yajñasya śnuṣṭiṃ samaśnavāmaha iti
(GBr_1,5.21b) sa dadhyaṅṅ āṅgiraso 'bravīd yo vai saptadaśaṃ prajāpatiṃ yajñe 'nvitaṃ veda nāsya yajño riṣyate
(GBr_1,5.21c) na yajñapatiṃ riṣyanta iti
(GBr_1,5.21d) tā vā etāḥ pañca vyāhṛtayo bhavanty o śrāvayāstu śrauṣaḍ yaja ye yajāmahe vauṣaḍ iti
(GBr_1,5.21e) sa dadhyaṅṅ āṅgiraso 'bravīn na vayaṃ vidmo yadi brāhmaṇāḥ smo yady abrāhmaṇāḥ smo yadi tasyarṣeḥ smo vānyasyeti_
(GBr_1,5.21f) anarvāṇaś ca ha vā ṛtāvantaś ca pitaraḥ svadhāyām āvṛṣāyanta vayaṃ vadāmahai vayaṃ vadāmahā iti
(GBr_1,5.21g) so 'yāt svāyaṃbhuvo vā ṛtāvanto madayātāṃ na vayaṃ vadāmahā iti
(GBr_1,5.21h) tasmāt pravare pravriyamāṇe vācayed devāḥ pitara iti tisraḥ_
(GBr_1,5.21i) ya eti saṃyajati sa bhavati yaś ca na brūte yaś ca na brūta iti brāhmaṇam

(GBr_1,5.22a) sāvitraṃ ha smaitaṃ pūrve purastāt paśum ālabhanta ity etarhi prājāpatyam_
(GBr_1,5.22b) yo hy eva savitā sa prajāpatir iti vadantas
(GBr_1,5.22c) tasmād u samupyāgnīṃs tena yajeran_
(GBr_1,5.22d) te samānadhiṣṇyā eva syur okhāsaṃbharaṇīyāyāḥ_
(GBr_1,5.22e) ukhāsaṃbharaṇīyāyāṃ vinyupayāgnīṃs tayā yajeran_
(GBr_1,5.22f) te nānādhiṣṇyā eva syur ā dīkṣaṇīyāyāḥ_
(GBr_1,5.22g) dīkṣaṇīyāyāṃ saṃnyupyāgnīṃs tayā yajeran_
(GBr_1,5.22h) te samānadhiṣṇyā eva syur odavasānīyāyāḥ_
(GBr_1,5.22i) udavasānīyāyāṃ vinyupyāgnīṃs tayā yajeran_
(GBr_1,5.22j) te nānādhiṣṇyā eva syuḥ_
(GBr_1,5.22k) atha yadi yajamānasyopatapet pārśvato 'gnīn ādhāya tāvad āsīta yāvad agadaḥ syāt_
(GBr_1,5.22l) yadi preyāt svair eva tam agnibhir dahet_
(GBr_1,5.22m) aśavāgnibhir itare yajamānā āsata iti vadantas
(GBr_1,5.22n) tasya tad eva brāhmaṇaṃ yad adaḥ puraḥsavane
(GBr_1,5.22o) pitṛmedha āśiṣo vyākhyātāḥ

(GBr_1,5.23a) sāyaṃprātarhomau sthālīpāko navaś ca yaḥ | baliś ca pitṛyajñaś cāṣṭakā saptamaḥ paśuḥ || ity ete pākayajñāḥ
(GBr_1,5.23b) agnyādheyam agnihotraṃ paurṇamāsyamāvāsye | naveṣṭiś cāturmāsyāni paśubandho 'tra saptamaḥ || ity ete haviryajñāḥ
(GBr_1,5.23c) agniṣṭomo 'tyagniṣṭoma ukthyaḥ ṣoḍaśimāṃs tataḥ | vājapeyo 'tirātraś cāptoryāmātra saptamaḥ || ity ete sutyāḥ
(GBr_1,5.23d) ke svid devā pravovājāḥ ke svid devā abhidyavaḥ | ke svid devā haviṣmantaḥ kiṃ svij jigāti sumnayuḥ ||
(GBr_1,5.23e) ṛtava eva pravovājā māsā devā abhidyavaḥ | ardhamāsā haviṣmantas taj jigāti sunmayuḥ ||
(GBr_1,5.23f) kati svid rātrayaḥ katy ahāni kati stotrāṇi kati śastrāṇy asya | kati svit savanāḥ saṃvatsarasya stotriyāḥ padākṣarāṇi katy asya ||
(GBr_1,5.23g) <dvāv atirātrau ṣaṭ śatam agniṣṭomā dve viṃśatiśate ukthyānāṃ | dvādaśa ṣoḍaśinaḥ ṣaṣṭiḥ ṣaḍahā vaiṣuvataṃ ca [VaitS 31.15]> ||
(GBr_1,5.23h) ahānyasya viṃśatiśatāni trīṇy ahaś caikaṃ tāvad asya | saṃvatsarasya savanāḥ sahasram asīti trīṇi ca saṃstutasya ||
(GBr_1,5.23i) ṣaṭṣaṣṭiś ca dve ca śate bhavata stutaśastrāṇām ayutaṃ caikam asya | stotriyāś ca navatisahasrā dve niyute navatiś cāti ṣaṭ ca ||
(GBr_1,5.23j) aṣṭau śatāny ayutāni triṃśac caturnavatiś ca padāny asya | saṃvatsarasya kavibhir mitasyaitāvatī madhyamā devamātrā ||
(GBr_1,5.23k) ayutam ekaṃ prayutāni triṃśad dve niyute tathā hy anusṛṣṭāḥ | aṣṭau śatāni nava cākṣarāṇy etāvān ātmā paramaḥ prajāpateḥ ||
(GBr_1,5.23l) ādyaṃ vaṣaṭkāraḥ pradānāntam etam agniṣṭome parvaśaḥ sādhu kḷptam | saubheṣajaṃ chanda īpsan yad agnau catuḥśataṃ bahudhā hūyate yat ||
(GBr_1,5.23m) prātaḥsavana stuta ekaviṃśo gāyatrastomamita eka eva | mādhyaṃdinaḥ saptadaśena kḷptas trayastriṃśena savanaṃ tṛtīyam

(GBr_1,5.24a) śraddhāyāṃ retas tapasā tapasvī vaiśvānaraḥ siṣice 'patyam īpsan | tato jajñe lokajit somajambhā ṛṣer ṛṣir aṅgirāḥ saṃnabhūva ||
(GBr_1,5.24b) ṛṣer yajñasya caturvidhasya śraddhāṃ yaḥ śreyasīṃ lokam amuṃ jigāya | yasmai vedāḥ prasṛtāḥ somabindu yuktā vahanti sukṛtām u lokam ||
(GBr_1,5.24c) ṛco 'sya bhāgāṃś caturo vahanty ukthaśastraiḥ pramudo modamānāḥ | grahair havirbhiś ca kṛtākṛtaś ca yajūṃṣi bhāgāṃś caturo vahanti ||
(GBr_1,5.24d) audumbaryāṃ sāmaghoṣeṇa tāvat saviṣṭutibhiś ca stomaiḥ chandasā | sāmāni bhāgāṃś caturo vahanti gītyā stomena saha prastāvena ca ||
(GBr_1,5.24e) prāyaścittair bheṣajaiḥ saṃstuvanto 'tharvāṇo 'ṅgirasaś ca śāntāḥ | brahmā brahmatvena pramudo modamānā asaṃsṛṣṭān bhāgāṃś caturo vahanti ||
(GBr_1,5.24f) yo brahmavit so 'bhikaro 'stu vaḥ śivo dhiyā dhīro rakṣatu dharmam etam | mā vaḥ pramattām amṛtāc ca yajñāt karmāc ca yenān aṅgiraso 'piyāsīt ||
(GBr_1,5.24g) māyuṃ daśaṃ māruśastāḥ prameṣṭā mā me bhūr yuktā vidahātha lokān | divyaṃ bhayaṃ rakṣata dharmam udyataṃ yajñaṃ kālāśa stutigopanāyanam ||
(GBr_1,5.24h) hotā ca maitrāvaruṇaś ca pādam acchāvākaḥ saha grāvastutaikam | ṛgbhi stuvanto 'harahaḥ pṛthivyā agniṃ pādaṃ brahmaṇā dhārayanti ||
(GBr_1,5.24i) adhvaryuḥ pratiprasthātā neṣṭonnetā nihitaṃ pādam ekam | sam antarikṣaṃ yajuṣā stuvanto vāyuṃ pādaṃ brahmaṇā dhārayanti ||
(GBr_1,5.24j) sāmnodgātā chādayann apramatta audumbaryāṃ stobhadeyaḥ sagadgadaḥ | vidvān prastotā vidahātha suṣṭutiṃ subrahmaṇyaḥ pratihartātha yajñe ||
(GBr_1,5.24k) sāmnā divy ekaṃ nihitaṃ stuvantaḥ sūryaṃ pādaṃ brahmaṇā dhārayanti | brahmā haikaṃ brāhmaṇācchaṃsinaḥ saha potāgnīdhro nihitaṃ pādam ekam ||
(GBr_1,5.24l) atharvabhir aṅgirobhiś ca gupto 'psu candraṃ pādaṃ brahmaṇā dhārayanti | ṣoḍaśikaṃ hotrakā abhiṣṭuvanti vedeṣu yuktāḥ prapṛthak caturdhā ||
(GBr_1,5.24m) manīṣiṇo dīkṣitāḥ śraddadhānā hotāro guptā abhivahanti yajñam | dakṣiṇato brahmaṇasyoṃ janad ity etāṃ vyāhṛtiṃ japan ||
(GBr_1,5.24n) saptadaśaṃ sadasyaṃ taṃ kīrtayanti purā viduḥ | aṣṭādaśī dīkṣitā dīkṣitānāṃ yajñe patnī śraddadhāneha yuktā ||
(GBr_1,5.24o) ekonaviṃśaḥ śamitā babhūva viṃśo yajñe gṛhapatir eva sunvan | ekaviṃśatir evaiṣāṃ saṃsthāyām aṅgiro vaha ||
(GBr_1,5.24p) vedair abhiṣṭuto loko nānāveśāparājitaḥ |

(GBr_1,5.25a) sapta sutyāḥ sapta ca pākayajñāḥ haviryajñāḥ sapta tathaikaviṃśatiḥ | sarve te yajñā aṅgiraso 'piyanti nūtanā yān ṛṣayo sṛjanti ye ca sṛṣṭāḥ purāṇaiḥ ||
(GBr_1,5.25b) eteṣu vedeṣv api caikam evāpavrajam ṛtvijāṃ saṃbharanti | kṛṭstṛpāt sacate tām aśastiṃ viṣkandham enaṃ visṛtaṃ prajāsu ||
(GBr_1,5.25c) nivartante dakṣiṇā nīyamānāḥ sute some vitate yajñatantre | moghāśiṣo yanty anivartamānā aniṣṭayajñā na taranti lokān ||
(GBr_1,5.25d) dvādaśavarṣaṃ brahmacaryaṃ pṛthag vedeṣu tat smṛtam | evaṃ vyavasthitā vedāḥ sarva eva svakarmasu ||
(GBr_1,5.25e) santi caiṣāṃ samānāḥ mantrāḥ kalpāś ca brāhmaṇāni ca | vyavasthānaṃ tu tat sarvaṃ pṛthagvedeṣu tat smṛtam ||
(GBr_1,5.25f) ṛgvedasya pṛthivī sthānam antarikṣasthāno 'dhvaraḥ | dyau sthānaṃ sāmavedasyāpo bhṛgvaṅgirasāṃ smṛtam ||
(GBr_1,5.25g) agnir devata ṛgvedasya yajurvedo vāyudevataḥ | ādityaḥ sāmavedasya candramā vaidyutaś ca bhṛgvaṅgirasām ||
(GBr_1,5.25h) trivṛtstoma ṛgvedasya yajūṃṣi pañcadaśena saha jajñire | saptadaśena sāmaveda ekaviṃśo brahmasaṃmitaḥ ||
(GBr_1,5.25i) vāg adhyātmam ṛgvedasya yajuṣāṃ prāṇa ucyate | cakṣuṣī sāmavedasya mano bhṛgvaṅgirasāṃ smṛtam ||
(GBr_1,5.25j) ṛgbhiḥ saha gāyatraṃ jāgatam āhur yajūṃṣi traiṣṭubhena saha jajñire | uṣṇikkakubhyāṃ bhṛgvaṅgiraso jagatyā sāmāni kavayo vadanti ||
(GBr_1,5.25k) ṛgbhiḥ pṛthivīṃ yajuṣāntarikṣaṃ sāmnā divaṃ lokajit somajambhāḥ | atharvabhir aṅgirobhiś ca gupto yajñaś catuṣpād divam udvaheta ||
(GBr_1,5.25l) ṛgbhiḥ suśasto yajuṣā pariṣkṛtaḥ saviṣṭutaḥ sāmajit somajambhāḥ | atharvabhir aṅgirobhiś ca gupto yajñaś catuṣpād divam āruroha ||
(GBr_1,5.25m) ṛco vidvān pṛthivīṃ veda saṃprati yajūṃṣi vidvān bṛhad antarikṣam | divaṃ veda sāmago yo vipaścit sarvān lokān yad bhṛgvaṅgirovit ||
(GBr_1,5.25n) yāṃś ca grāme yāṃś cāraṇye japanti mantrān nārthān bahudhā janāsaḥ | sarve te yajñā aṅgiraso 'piyanti nūtanā sā hi gatir brahmaṇo yāvarārdhyā ||
(GBr_1,5.25o) triviṣṭapaṃ tridivaṃ nākam uttamaṃ tam etayā trayyā vidyayaiti | ata uttare brahmalokā mahānto 'tharvaṇām aṅgirasāṃ ca sā gatiḥ || atharvaṇām aṅgirasāṃ ca sā gatir iti brāhmaṇam