ગૌરગઓવિન્દાર્ચનસ્મરણપદ્ધતિ · શ્લોક 341-360

મન્ત્રો યથા --શ્રીં કસ્તૂરી-મઞ્જર્યૈ સ્વાહા ।
અસ્યા ધ્યાનં યથા તત્રૈવ--
વિશુદ્ધ-હેમાબ્જ-કલેવરાભાં
કાચ-દ્યુતિ-ચારુ-મનોજ્ઞ-ચેલામ્ ।
શ્રી-રાધિકાયા નિકટે વસન્તીં
ભજામ્ય્ અહં કૌસ્તૂરી-મઞ્જરિકામ્

અથ વૃન્દાવનાધીશૌ પદ્મ-કેશર-મધ્ય-ગૌ ।
કોટિ-કન્દર્પ-લાવણ્યૌ ધ્યાયેત્ પ્રિય-સખી-વૃતૌ

ઉક્ત-વેશ-વયો-રૂપ-સંયુતૌ સુમનોહરૌ ।
સંસ્મરેત્ સિદ્ધ-દેહેન સાધકઃ સાધનૈર્ યુતઃ

તત્રાદૌ મઞ્જરી-રૂપાન્ ગુર્વાદીન્ તુ સ્વીયાન્ સ્વીયાન્ પ્રણાલ્ય્-અનુસારેણ સંસ્મરેત્ શ્રી-ગુરુ-પરમ-ગુરુ-ક્રમેણેતિ તતઃ શ્રી-રાધિકાં ધ્યાયેત્ ।
તતઃ શ્રી-નન્દનન્દનમ્ ।
અથ યુગલ-મન્ત્રોદ્ધારો યથા સનત્-કુમાર-સંહિતાયામ્--
ગોપીજન-વલ્લભેતિ ચરણાન્ ઇતિ ચ ક્રમાત્ ।
શરણં ચ પ્રપદ્યે ચ તત એતત્ પદ-દ્વયમ્

પદ-ત્રયાત્મકો મન્ત્રઃ ષોડશાર્ણ ઉદાહૃતઃ ।
નમો ગોપીજનેત્ય્ ઉક્ત્વા વલ્લભાભ્યાં વદેત્ તતઃ ।
પદ-દ્વયાત્મકો મન્ત્રો દશાર્ણઃ ખલુ કથ્યતે

મન્ત્રો યથા--ગાં ગોપીજન-વલ્લભ-ચરણાન્ શરણં પ્રપદ્યે,
નમો ગોપીજન-વલ્લભાભ્યામ્ ।
અસ્ય ધ્યાનં યથા તત્રૈવ--
અથ ધ્યાનં પ્રવક્ષ્યામિ મન્ત્રસ્યાસ્ય દ્વિજોત્તમ ।
પીતામ્બરં ઘન-શ્યામં દ્વિ-ભુજં વન-માલિનમ્

બર્હિ-બર્હ-કૃતાપીશં શશિ-કોટિ-નિભાનનમ્ ।
ઘૂર્ણાયમાન-નયનં કર્ણિકારાવતંસિનમ્

અભિતશ્ ચન્દનેનાથ મધ્યે કુઙ્કુમ-બિન્દુના ।
વિચિત્ર-તિલકં ભાલે વિભૃતં મણ્ડલાકૃતિમ્

તરુણાદિત્ય-સઙ્કાશ-કુણ્ડલાભ્યાં વિરાજિતમ્ ।
ઘર્મામ્બુ-કણિકા-રાજદ્-દર્પણાભ-કપોલકમ્

પ્રિયા-મુખે કૃતાપાઙ્ગ-લીલયા ચોન્નત-ભ્રુવમ્ ।
અગ્ર-ભાગ-લસન્-મુક્તા-સ્ફુરદ્-ઉચ્ચ-સુનાસિકમ્

દશન-જ્યોત્સ્નયા રાજત્-પક્વ-બિમ્બ-ફલાધરમ્ ।
કેયૂરાઙ્ગદ-સદ્-રત્ન-મુદ્રિકાદિ-લસત્-કરમ્

વિભૃતં મુરલીં વામે પાણૌ પદ્મં તથોત્તરે ।
કાઞ્ચી-દામ-સ્ફુરન્-મધ્યં નૂપુરાભ્યાં લસત્-પદમ્

રતિ-કેલિ-રસાવેશ-ચપલં ચપલેક્ષણમ્ ।
હસન્તં પ્રિયયા સાર્ધં હાસયન્તં ચ તાં મુહુઃ

ઇત્થં કલ્પ-તરોર્-મૂલે રત્ન-સિંહાસનોપરિ ।
વૃન્દારણ્યે સ્મરેત્ કૃષ્ણં સંસ્થિતં પ્રિયયા સહ

વામ-પાર્શ્વે સ્થિતાં તસ્ય રાધિકાં ચ સ્મરેત્ તતઃ ।
સુચીન-નીલ-વસનાં દ્રુત-હેમ-સમ-પ્રભામ્

પટાઞ્ચલેનાવૃતાઙ્ગાં સ-સ્મિતાનન-પઙ્કજામ્ ।
કાન્ત-વક્ત્રે ન્યસ્ત-નૃત્યચ્-ચકોરીં ચઞ્ચલેક્ષણામ્

અઙ્ગુષ્ઠ-તર્જ્જનીભ્યાં ચ નિજ-પ્રિય-મુખામ્બુજે ।
અર્પયન્તીં નાગ-વલ્લીં પૂગ-ચૂર્ણ-સમન્વિતામ્

મુક્તાહાર-સ્ફુરચ્-ચારુ-પીનોન્નત-પયોધરામ્ ।
ક્ષીણ-મધ્યાં પૃથુ-શ્રોણિં કિઙ્કિણી-જાલ-મણ્ડિતામ્

રત્ન-તાડઙ્ક-મઞ્જીર-રત્ન-પાદાઙ્ગુલીયકામ્ ।
લાવણ્ય-સાર-મુગ્ધાઙ્ગીં સર્વાવયવ-સુન્દરીમ્

આનન્દ-રસ-સમ્મગ્નાં પ્રસન્નાં નવ-યૌવનમ્ ।
સખ્યશ્ ચ તસ્યા વિપ્રેન્દ્ર તત્-સમાન-વયો-ગુણાઃ ।
તત્-સેવન-પરા ભાવ્યાશ્ ચામર-વ્યજનાદિભિઃ