ગૌરગઓવિન્દાર્ચનસ્મરણપદ્ધતિ · શ્લોક 301-320

તારાવલી-દુકૂલેયં તડિત્-તુલ્ય-તનુ-ચ્છવિઃ ।
દક્ષિણા મૃદ્વીકા ખ્યાતા તુલસીતિ વદન્તિ યામ્

અસ્યા વયો દ્વિ-માસાઢ્ય-હાયનાસ્ તુ ત્રયોદશ (13-2) ।
ઇયં શ્રી-રઘુનાથાખ્યાં પ્રાપ્તા ગૌર-રસે કલૌ

અસ્યા મન્ત્રોદ્ધારો યથા કિશોરી-તન્ત્રે--
નાદ-બિન્દુ-યુતો વહ્નિર્ મુખ-વૃત્ત-સમન્વિતઃ ।
સ્વાહાન્તા મઞ્જરી ઙે ઽન્તા રતિ-મઞ્જરિકા-મનુઃ

મન્ત્રો યથા--રાં રતિ-મઞ્જર્યૈ સ્વાહા
અસ્યા ધ્યાનં યથા તત્રૈવ--
તારાલિવાસો-યુગલં વસાનાં
તડિત્-સમાન-સ્વતનુ-ચ્છવિં ચ ।
શ્રી-રાધિકાયા નિકટે વસન્તીં
ભજે સુરૂપાં રતિ-મઞ્જરીં તામ્

કુઞ્જસ્ય તુઙ્ગવિદ્યાયાઃ કુઞ્જઃ પૂર્વત્ર વર્તતે ।
લવઙ્ગ-સુખદો નામ્ના સુદૃશાં સુમનોહરઃ

લવઙ્ગ-મઞ્જરી તત્ર મુદા તિષ્ઠતિ સર્વદા ।
સા તુ રૂપાખ્ય-મઞ્જર્યા એકેનાહ્ના વરીયસી

ઉદ્યદ્-વિદ્યુત્-સમાન-શ્રીસ્ તારાવલી-પટાવૃતા ।
શ્રી-કૃષ્ણાનન્દદા નિત્યં દક્ષિણા મૃદ્વિકા મતા

વય એક-દિનં સાર્ધ-હાયનાસ્ તુ ત્રયોદશ (13-6-1) ।
શ્રી-સનાતન-નામાસૌ ખ્યાતા ગૌર-રસે કલૌ

અસ્યા મન્ત્રોદ્ધારો યથા કિશોરી-તન્ત્રે--
શ્રી-લીલાભ્યાં સમાયુક્તા
ઙે ઽન્તા લવઙ્ગ-મઞ્જરી ।
સ્વાહા લવઙ્ગ-મઞ્જર્યા
મન્ત્રો ઽયં દશ-વર્ણકઃ

મન્ત્રો યથા--શ્રીં લાં લવઙ્ગ-મઞ્જર્યૈ સ્વાહા
અસ્યા ધ્યાનં યથા તત્રૈવ--
ચપલા-દ્યુતિ-નિન્દિ-કાન્તિકાં
શુભ-તારાવલિ-શોભિતામ્બરામ્ ।
વ્રજ-રાજ-સુત-પ્રમોદિનીં
પ્રભજે તાં ચ લવઙ્ગ-મઞ્જરીમ્

રસાનન્દ-પ્રદો નામ્ના ચિત્રા-કુઞ્જસ્ય પશ્ચિમે ।
કુઞ્જો ઽસ્તિ તત્ર વસતિ સર્વદા રસ-મઞ્જરી

શ્રી-રૂપ-મઞ્જરી-સમ્યગ્-જિવાતુ સા પ્રકીર્તિતા ।
હંસ-પક્ષ-દુકૂલેયં ફુલ્લ-ચમ્પક-કાન્તિ-ભાક્

લવઙ્ગ-મઞ્જરી-તુલ્યા પ્રાયેણ ગુણ-સમ્પદા ।
અતીવ પ્રિયતાં પ્રાપ્તા શ્રી-રૂપ-મઞ્જરી-શ્રિતા

સન્ધાન-ચતુરા સેયં દૌત્યે કૌશલમ્ આગતા ।
ત્રયોદશ-શરદ્-યુક્તા (13) દક્ષિણા મૃદ્વિકા મતા

સા કલૌ રઘુનાથાખ્યા-યુક્ત-ભટ્ટત્વમ્ આગતા

અસ્યા મન્ત્રોદ્ધારો યથા કિશોરી-તન્ત્રે--
મુખ-વૃત્ત-યુતો વહ્નિ-નાદ-બિન્દુ-સમન્વિતઃ ।
સ્વાહાન્ત-સમ્પ્રદાનાન્તો મન્ત્રો વૈ રસ-મઞ્જરી

મન્ત્રો યથા--રાં રસ-મઞ્જર્યૈ સ્વાહા ।
અસ્યા ધ્યાનં યથા તત્રૈવ--
હંસ-પક્ષ-રુચિરેણ વાસસા
સંયુતાં વિકચ-ચમ્પક-દ્યુતિમ્ ।
ચારુ-રૂપ-ગુણ-સમ્પદાન્વિતાં
સર્વદાપિ રસ-મઞ્જરીં ભજે

ઐશાન્યે ચમ્પકલતા-કુઞ્જાત્ કુઞ્જો ઽસ્તિ શોભનઃ ।
ગુણાનન્દ-પ્રદો નામ્ના તત્રાસ્તે ગુણ-મઞ્જરી

રૂપ-મઞ્જરિકા-સૌખ્યાભિલાષા સા પ્રકીર્તિતા ।
જબા-રાજિ-દુકૂલેયં તડિત્-પ્રકર-કાન્તિ-ભાક્

કનિષ્ઠેયં ભવેત્ તસ્યાસ્ તુલસ્યાસ્ તુ ત્રિભિર્ દિનૈઃ ।
શ્રી-કૃષ્ણામોદ-દાક્ષિણ્યમ્ આશ્રિતા પ્રખરોદિતા