Gauragaovindārcanasmaraṇapaddhati · Verses 241-260

gṛham asyās tu yāvaṭe pitā sāgara-saṃjñakaḥ

asyā mātā bhaved velā patir asyās tu durbalaḥ /
vasu-rāmānandatayā khyātā gaura-rase hy asau

proṣita-bhartṛkā-lakṣaṇaṃ yathā (UN 5.89)--
dūra-deśaṃ gate kānte bhavet proṣita-bhartṛkā /
priya-saṃkīrtanaṃ dainyam asyās tānava-jāgarau /
mālinyam anavasthānaṃ jāḍya-cintādayo matāḥ

udāharaṇaṃ yathā (UN 5.90)--
vilāsī svacchandaṃ vasati mathurāyāṃ madhu-ripu*
rvasantaḥ santāpaṃ prathayati samantād anupadam /
durāśeyaṃ vairiṇy ahaha mad-abhīṣṭodyama-vidhau
vidhatte pratyūhaṃ kim iha bhavitā hanta śaraṇam

vāma-prakharā-lakṣaṇodāharaṇe tūkte; asyā yūtho yathā śrī-kṛṣṇa-gaṇoddeśa-dīpikāyām (1.247)--
tuṅgabhadrā citralekhā suraṅgī raṅgavāṭikā /
maṅgalā suvicitrāṅgī modinī madanāpi ca

asyā mantroddhāro yathā īśāna-saṃhitāyām--
vāg-bhavaś cendulekhā ca caturthī vahni-jāyikā /
mantraḥ syāc cendulekhāyā aṣṭārṇaḥ samudīritaḥ

mantro yathā--aim indulekhāyai svāhā /
asyā dhyānaṃ yathā tatraiva--
haritāla-samāna-deha-kāntiṃ
vikasad-dārima-puṣpa-śobhi-vastrām /
amṛtaṃ dadatīṃ mukunda-vaktre
bhaja ālīm aham indulekhikākhyām

dakṣiṇe 'smin dale kāma-latā-nāmāsti kuñjakam /
atyanta-sukhadaṃ tapta-jāmbūnada-sama-prabham

śrī-campakalatā tiṣṭha-tyamuṣmin kṛṣṇa-vallabhā /
asau vāsaka-sajjātvam āpannā rati-yug-gharau

vāma-madhyā campakābhā cātakābha-śubhāmbarā /
tat-sevā ratna-mālāyā dānaṃ cāmara-cālanam

sārdha-trayodaśa-dina-māsa-dvaya-samanvitāḥ /
manu-saṃkhyā-hāyanāś ca vayomānaṃ bhavet punaḥ (14-2-13 1/2)

mātāsyā vāṭikā khyātā pitā cārāma-saṃjñakaḥ /
asyāś ca bhartā caṇḍākhyas tathā gaura-rase hy asau /
śivānandatayā khyātim āgatā hi kalau yuge

vāsaka-sajjā-lakṣaṇaṃ yathā (UN 5.76-77)--
svavāsaka-vaśāt kānte sameṣyati nijaṃ vapuḥ /
sajjī-karoti gehaṃ ca yā sā vāsaka-sajjikā

ceṣṭāsyāḥ smara-saṃkrīḍā-saṅkalpa-vartma-vīkṣaṇam /
sakhī-vinoda-vārttā ca muhur dūti-kṣaṇādayaḥ

udāharaṇaṃ yathā (UN 5.78)--
rati-krīḍā-kuñjaṃ kusuma-śayanīyojjvala-ruciṃ
vapuḥ sālaṅkāraṃ nijam api vilokya smita-mukhī /
muhur dhyāyaṃ dhyāyaṃ kim api hariṇā saṅgama-vidhiṃ
samṛddhyanti rādhā madana-mada-mādyan matir abhūt

vāma-prakharā-lakṣaṇodāharaṇe tūkte; asyā yūtho yathā (kṛṣṇa-gaṇoddeśe 1.244)--
kuraṅgākṣī suracitā maṇḍalī maṇimaṇḍanā /
caṇḍikā candralatikā kandukākṣī sumandirā

asyā mantroddhāro yathā gāruḍe--
ādau ca campakalatā ṅe 'ntā vaiśvānara-priyā /
mantro 'yaṃ campakalatā-premado vasu-varṇakaḥ

mantro yathā--campakalatāyai svāhā /
asyā dhyānaṃ yathā tatraiva--
campakāvali-samāna-kāntikāṃ
cātakābha-vasanāṃ subhūṣaṇām /
ratna-mālya-yuta-cāmarodyatāṃ
cāru-campakalatāṃ sadā bhaje

rakṣodale śyāma-varṇe kuñje śrī-raṅgadevikā /
sukhadākhye nivasati nityaṃ śrī-hari-vallabhā

padma-kiñjalka-varṇābhā jabā-puṣpa-nibhāmbarā /
utkaṇṭhitā-bhāva-yuktā śrī-kṛṣṇe rati-bhāk sadā