Gauragaovindārcanasmaraṇapaddhati · Verses 221-240

mantro yathā -aiṃ sauṃ viśākhāyai svāhā /
asyā dhyānaṃ, yathā tatraiva--
sac-campakāvali-viḍambi-tanuṃ suśīlāṃ
tārāmbarāṃ vividha-bhūṣaṇa-śobhamānām /
śrī-nandanandana-puro vasanādi-bhūṣā-*
dāne ratāṃ sukutukāṃ ca bhaje viśākhām

citraṃ pūrva-dale kuñjaṃ padma-kiñjalka-nāmakam /
śrī-citrā svāminī tatra vartate kṛṣṇa-vallabhā

abhisārikātvam āpannā harau rati-samanvitā /
lavaṅga-mālā-sevāḍhyā kāśmīra-varṇa-saṃyutā

kāca-tulyāmbarā cāsau sadā citra-guṇānvitā /
asyāś caiva vayomānaṃ manu-saṃkhyā-dinānvitam

ṛṣi-māsādhikaṃ śakra-hāyanaṃ ceti viśrutam (14-7-14)

caturo 'syāḥ pitā prokto janany asyāś ca carccikā /
patiḥ pīṭharakaś cāsyā asau gaura-rase punaḥ

govindānandatāṃ prāptā caturtha-yuga-madhyake /
iyaṃ tv adhika-mṛdvī ca gṛham asyās tu yāvaṭe

abhisārikā-lakṣaṇaṃ yathā (UN 5.71-72)--
yābhisārayate kāntaṃ svayaṃ vābhisaraty api /
sā jyotsnī tāmasī yāna-yogya-veṣābhisārikā

lajjayā svāṅga-līneva niḥśabdākhila-maṇḍanā /
kṛtāvaguṣṭhā snigdhaika-sakhī-yuktā priyaṃ vrajet

udāharaṇaṃ yathā tatra (1) jyotsny-abhisārikāyāḥ (UN 5.74)--
indus tundila-maṇḍalaṃ praṇayate vṛndāvane candrikāṃ
sāndrāṃ sundari nandano vraja-pates tvad vīthim udvīkṣate /
tvaṃ candrāñcita-candanena khacitā kṣaumeṇa cālaṅkṛtā
kiṃ vartmany aravinda-cāru-caraṇa-dvandvaṃ na sandhitsasi

(2) tāmasy-abhisārikāyāḥ (ViM 4.22, UN 5.75)--
timira-masibhiḥ saṃvītāṅgyaḥ kadamba-vanāntare
sakhi baka-ripuṃ puṇyātmānaḥ saranty abhisārikāḥ /
tava tu parito vidyud-varṇās tanu-dyuti-sūcayo
hari hari ghana-dhvāntānyetāḥ svavairiṇi bhindate

(UN 8.21)--
adhikā mṛdavaś cātra citrā madhurikādayaḥ

adhika-mṛdvy-udāharaṇaṃ, yathā (UN 8.20)--
darāpi na dṛg-arpitā sakhi śikhaṇḍa-cūḍe mayā
prasīda bata mā kṛthā mayi vṛthā purobhāgitām /
naṭan-makara-kuṇḍalaṃ sapadi caṇḍi līlā-gatiṃ
tanoty ayam adūrataḥ kim iha saṃvidheyaṃ mayā

asyā yūtho yathā (śrī-kṛṣṇa-gaṇoddeśa-dīpikā 1.245)--
rasālikā tilakinī śaurasenī sugandhikā /
vāmanī vāmanayanā nāgarī nāgavallikā

asyā mantroddhāro, yathā skānde--
lakṣmīś citrā caturthyantā vahni-jāyā ṣaḍakṣaraḥ /
mantro 'yaṃ citrikā-nāmnyāḥ kṛṣṇa-sakhyā udīritaḥ

mantro yathā--śrīṃ citrāyai svāhā /
asyā dhyānaṃ, yathā tatraiva--
kāśmīra-varṇāṃ sahitāṃ vicitra-*
guṇaiḥ smitā-śobhi-mukhīṃ ca citrām /
kācāmbarāṃ kṛṣṇa-puro lavaṅga*-
mālā-pradāne nitarāṃ smarāmi

āgneya-patre pūrṇendu-kuñja-svarṇābha-varṇake /
śrī-indulekhā vasaty atra haritāla-samāṅgikā

dāḍimba-kusumodbhāsi-vasanā kṛṣṇa-vallabhā /
proṣita-bhartṛkā-bhāvam āpannā rati-yug-gharau

amṛtāśana-sevāḍhyā yāsau nandātmajasya vai /
vayomānaṃ bhavet tasyāḥ sarva-śāstreṣu sammatam

sārdha-dig-vāsarair yuktā dvi-māsa-manu-hāyanā (14-2-10 1/2) /
asau tu vāma-prakharā hareś cāmara-sevinī