ગૌરગઓવિન્દાર્ચનસ્મરણપદ્ધતિ · શ્લોક 221-240

મન્ત્રો યથા -ઐં સૌં વિશાખાયૈ સ્વાહા ।
અસ્યા ધ્યાનં, યથા તત્રૈવ--
સચ્-ચમ્પકાવલિ-વિડમ્બિ-તનું સુશીલાં
તારામ્બરાં વિવિધ-ભૂષણ-શોભમાનામ્ ।
શ્રી-નન્દનન્દન-પુરો વસનાદિ-ભૂષા-*
દાને રતાં સુકુતુકાં ચ ભજે વિશાખામ્

ચિત્રં પૂર્વ-દલે કુઞ્જં પદ્મ-કિઞ્જલ્ક-નામકમ્ ।
શ્રી-ચિત્રા સ્વામિની તત્ર વર્તતે કૃષ્ણ-વલ્લભા

અભિસારિકાત્વમ્ આપન્ના હરૌ રતિ-સમન્વિતા ।
લવઙ્ગ-માલા-સેવાઢ્યા કાશ્મીર-વર્ણ-સંયુતા

કાચ-તુલ્યામ્બરા ચાસૌ સદા ચિત્ર-ગુણાન્વિતા ।
અસ્યાશ્ ચૈવ વયોમાનં મનુ-સંખ્યા-દિનાન્વિતમ્

ઋષિ-માસાધિકં શક્ર-હાયનં ચેતિ વિશ્રુતમ્ (14-7-14)

ચતુરો ઽસ્યાઃ પિતા પ્રોક્તો જનન્ય્ અસ્યાશ્ ચ ચર્ચ્ચિકા ।
પતિઃ પીઠરકશ્ ચાસ્યા અસૌ ગૌર-રસે પુનઃ

ગોવિન્દાનન્દતાં પ્રાપ્તા ચતુર્થ-યુગ-મધ્યકે ।
ઇયં ત્વ્ અધિક-મૃદ્વી ચ ગૃહમ્ અસ્યાસ્ તુ યાવટે

અભિસારિકા-લક્ષણં યથા (ઉન્ 5.71-72)--
યાભિસારયતે કાન્તં સ્વયં વાભિસરત્ય્ અપિ ।
સા જ્યોત્સ્ની તામસી યાન-યોગ્ય-વેષાભિસારિકા

લજ્જયા સ્વાઙ્ગ-લીનેવ નિઃશબ્દાખિલ-મણ્ડના ।
કૃતાવગુષ્ઠા સ્નિગ્ધૈક-સખી-યુક્તા પ્રિયં વ્રજેત્

ઉદાહરણં યથા તત્ર (1) જ્યોત્સ્ન્ય્-અભિસારિકાયાઃ (ઉન્ 5.74)--
ઇન્દુસ્ તુન્દિલ-મણ્ડલં પ્રણયતે વૃન્દાવને ચન્દ્રિકાં
સાન્દ્રાં સુન્દરિ નન્દનો વ્રજ-પતેસ્ ત્વદ્ વીથિમ્ ઉદ્વીક્ષતે ।
ત્વં ચન્દ્રાઞ્ચિત-ચન્દનેન ખચિતા ક્ષૌમેણ ચાલઙ્કૃતા
કિં વર્ત્મન્ય્ અરવિન્દ-ચારુ-ચરણ-દ્વન્દ્વં ન સન્ધિત્સસિ

(2) તામસ્ય્-અભિસારિકાયાઃ (વિમ્ 4.22, ઉન્ 5.75)--
તિમિર-મસિભિઃ સંવીતાઙ્ગ્યઃ કદમ્બ-વનાન્તરે
સખિ બક-રિપું પુણ્યાત્માનઃ સરન્ત્ય્ અભિસારિકાઃ ।
તવ તુ પરિતો વિદ્યુદ્-વર્ણાસ્ તનુ-દ્યુતિ-સૂચયો
હરિ હરિ ઘન-ધ્વાન્તાન્યેતાઃ સ્વવૈરિણિ ભિન્દતે

(ઉન્ 8.21)--
અધિકા મૃદવશ્ ચાત્ર ચિત્રા મધુરિકાદયઃ

અધિક-મૃદ્વ્ય્-ઉદાહરણં, યથા (ઉન્ 8.20)--
દરાપિ ન દૃગ્-અર્પિતા સખિ શિખણ્ડ-ચૂડે મયા
પ્રસીદ બત મા કૃથા મયિ વૃથા પુરોભાગિતામ્ ।
નટન્-મકર-કુણ્ડલં સપદિ ચણ્ડિ લીલા-ગતિં
તનોત્ય્ અયમ્ અદૂરતઃ કિમ્ ઇહ સંવિધેયં મયા

અસ્યા યૂથો યથા (શ્રી-કૃષ્ણ-ગણોદ્દેશ-દીપિકા 1.245)--
રસાલિકા તિલકિની શૌરસેની સુગન્ધિકા ।
વામની વામનયના નાગરી નાગવલ્લિકા

અસ્યા મન્ત્રોદ્ધારો, યથા સ્કાન્દે--
લક્ષ્મીશ્ ચિત્રા ચતુર્થ્યન્તા વહ્નિ-જાયા ષડક્ષરઃ ।
મન્ત્રો ઽયં ચિત્રિકા-નામ્ન્યાઃ કૃષ્ણ-સખ્યા ઉદીરિતઃ

મન્ત્રો યથા--શ્રીં ચિત્રાયૈ સ્વાહા ।
અસ્યા ધ્યાનં, યથા તત્રૈવ--
કાશ્મીર-વર્ણાં સહિતાં વિચિત્ર-*
ગુણૈઃ સ્મિતા-શોભિ-મુખીં ચ ચિત્રામ્ ।
કાચામ્બરાં કૃષ્ણ-પુરો લવઙ્ગ*-
માલા-પ્રદાને નિતરાં સ્મરામિ

આગ્નેય-પત્રે પૂર્ણેન્દુ-કુઞ્જ-સ્વર્ણાભ-વર્ણકે ।
શ્રી-ઇન્દુલેખા વસત્ય્ અત્ર હરિતાલ-સમાઙ્ગિકા

દાડિમ્બ-કુસુમોદ્ભાસિ-વસના કૃષ્ણ-વલ્લભા ।
પ્રોષિત-ભર્તૃકા-ભાવમ્ આપન્ના રતિ-યુગ્-ઘરૌ

અમૃતાશન-સેવાઢ્યા યાસૌ નન્દાત્મજસ્ય વૈ ।
વયોમાનં ભવેત્ તસ્યાઃ સર્વ-શાસ્ત્રેષુ સમ્મતમ્

સાર્ધ-દિગ્-વાસરૈર્ યુક્તા દ્વિ-માસ-મનુ-હાયના (14-2-10 1।2) ।
અસૌ તુ વામ-પ્રખરા હરેશ્ ચામર-સેવિની