Garuda Purana · Chapter 3.28

iti śrīgāruḍe mahāpurāṇe utta dṛ tṛ dṛ brahma dṛ kanyākṛtanānātīrthayātrādinirūpaṇaṃ nāma saptaviṃśo 'dhyāyaḥ
śrīgaruḍamahāpurāṇam- 28
yā pūrvasarge dakṣaputrī satī tu rudrasya patnī dakṣayajñe svadeham /
visṛjya sā menakāyāṃ ca jajñe dharādharāddhemavato vai sakāśāt

sā pārvatā rudrapatnī khagendra yā śeṣapatnī vāruṇī nāma pūrvā /
saivāgatā balabhadreṇa rantuṃ dvirūpamāsthāya mahāpativratā

śrīrityākhyā indirāveśayuktā tasyā dvitīyā pratimā megharūpā /
śeṣaṇa rūpeṇa yadā hi vīndra tapaścacāra viṣṇunā sārdhameva

tadaiva devī vāruṇī śeṣapatnī tapaśca kre indirāprītaye ca /
tadā prītā indirā suprasannā uvāca tāṃ vāruṇīṃ śeṣapatnīm

yadā rāmo vaiṣṇavāṃśena yuktaḥ saṃpatsyate bhūtale rauhiṇeyaḥ /
mayyāveśātsaṃyutā tvaṃ tu bhadre śrīrityākhyā valabhadrasya rantum

saṃpatsyase nātra vicāryamastītyuktvā sā vai prayayau viṣṇuloke /
śrīlakṣmyaṃśācchrīritīḍyāṃ samākhyāṃ labdhvā loke śeṣapatnī babhūva

yadāhīśo vipulāmuddharecca tadā rāmaḥ śrībhidāsaṃgame ca /
karoti toṣatsarvadā vai ramāyāstasyāpyāveśo vyaṃstritamonasaṃgam

yā revatī raivatasyaiva putrī sā vāruṇī balabhadrasya patnī /
sauparṇanāmnī balapatnī khagendra yāstāstisraḥ ṣaḍviṣṇośca strībhyaḥ /
dviguṇādhamā rudraśeṣādikebhyo daśādhamā tvaṃ vijānīhi pautra

garuḍa uvāca /
rāmeṇa rantuṃ sarvadā vāruṇī tu putrītvamāpe revatasyaiva subhrūḥ /
evaṃ trirūpā vāruṇī śeṣapatnī dvirūpabhūtā pārvatī rudrapatnī

nīcāyā jāṃbavatyāśca śeṣasāmyaṃ ca kutracit /
śrūyate ca mayā kṛṣṇa nimittaṃ brūhi me prabho

umāyāśca tathā rudraḥ sadā bahuguṇādhikaḥ /
evaṃ tvayoktaṃ bhagavanniścayārthaṃ mama prabho

revatī śrīyutā śrīśca śeṣarūpā ca vāruṇī /
sauparṇi pārvatī caiva tisraḥ śeṣāśato varāḥ

ityapi śrūyate kṛṣṇa kutracinmadhusūdana /
nimittaṃ brūhi me kṛṣṇa tavaśiṣyāya suvrata

śrīkṛṣṇa uvāca /
vijñāya jāṃbavatyāśca tadanyeṣāṃ khagādhipa /
uttamānāṃ ca sāmyaṃ tu uttamāveśato bhavet

avarāṇāṃ guṇasyāpi hyuttamānāmadhīnatā /
astīti dyotanāyaiva śatāṃśādhikamucyate

yathā mayocyate vīndra tathā jānīhi nānyathā /
tadanantarajānvakṣye śṛṇu kāśyapajottama

caturdaśasu cendreṣu saptamo yaḥ purandaraḥ /
vṛtrādīnāṃ śarīraṃ tu puramityucyate budhaiḥ

taṃ dārayati vajreṇa yasmāttasmātpurandaraḥ /
caturdaśasu cendreṣu mantradyumnastu ṣaṣṭhakaḥ

mantrānaṣṭa mahāvīndra devo dyotayate yataḥ /
mantradyumnastato loke ubhāvapyeka eva tu

mantradyumnāvatārobhūtkuntīputrorjuno bhuvi /
viṣṇorvāyoranantasya cendrasya khagasattama

pārthaścaturbhiḥ saṃyukta indra eva prakīrtitaḥ /
caturthepi ca vāyośca viśeṣosti sadārjuna

vālirnāmā vānarastu purandara iti smṛtaḥ /
candravaṃśe samutpanno gādhirājo vicakṣaṇaḥ

mantradyumnāvatāraḥ sa viśvāmitrapitā smṛtaḥ /
vedoktamantrā gāḥ proktā dhiyā saṃdhārayedyataḥ

ato gādhiriti proktastadarthaṃ bhūtale hyabhūt /
ikṣvākuputro vīndra vikukṣiriti viśrutaḥ

sa evendrāvatārobhūddharisevārthameva ca /
viśeṣeṇa hariṃ kukṣau vijñānācca hariḥ sadā

ato vikukṣināmāsau bhūloke viśrutaḥ sadā /
rāmaputraḥ kuśaḥ prokta indra eva prakīrtitaḥ

vālmīkiṛṣiṇā yasmātkuśenaiva vinirmitaḥ /
ataḥ kuśa iti prokto jānakīnandanaḥ prabhuḥ

indradyumnaḥ puredrastu gādhī vālī tathārjunaḥ /
vikukṣiḥ kuśa evaite sapta cendrāḥ prakīrtitāḥ

yaḥ kṛṣṇaputtraḥ pradyumnaḥ kāma eva prakīrtitaḥ /
prakṛṣṭaprakāśarūpatvātpradyumna iti nāmavān

yā rāmabhrātā bharataḥ kāma evābhavadbhuvi /
rāmājñāṃ bharate yasmāttasmādbharatanāmakaḥ

cakrābhimāni kāmastu sudarśana iti smṛtaḥ /
brahmaiva kṛṣṇaputrastu sāṃbo jāmbavatīsutaḥ

kāmāvatāro vijñeyaḥ saṃdeho nātra vidyate /
yo rudraputraḥ skandastu kāma eva prakīrtitaḥ

ripūnāskaṃ date nityamataḥ skanda iti smṛtaḥ /
yo vā sanatkumārastu brahmaputraḥ khagādhipa /
kāmāvatāro vijñeyo nātra kāryā vicāraṇā

sudarśanaśca paramaḥ pradyumnaḥ sāṃba eva ca /
sanatkumāraḥ sāṃbaścaṣaḍete kāmarūpakāḥ

tataśca indrakāmāvapyumādibhyo daśāvarau /
tayormadhye tu garuḍa kāma indrādhamaḥ smṛtaḥ

prāṇastvahaṅkāra eva ahaṅkārakasaṃjñakaḥ /
garutmadaṃśo vijñeyaḥ kāmendrābhyāṃ daśādhamaḥ

tadanantarajānvakṣye śṛṇu vīndra samāhitaḥ /
śravaṇānmokṣamāpnoti mahāpāpādvimucyate

kāmaputroniruddho 'pi hareranyaḥ prakīrtitaḥ /
sa evābhūddhareḥ sevāṃ kartuṃ rāmānujo bhuvi

śatrughna iti vikhyātaḥ śatrūnsūdayate yataḥ /
aniruddhaḥ kṛṣṇaputro pradyumnādyo 'janiṣṭa ha

saṃkarṣaṇādirūpaistu tribhirāviṣṭa eva saḥ /
evaṃ dvirūpo vijñeyo hyaniruddho mahāmatiḥ

kāmabhāryā ratiryā tu dvirūpā saṃprakīrtitā /
rugmaputrī rugmavatī kāmabhāryā prakīrtitā

atiprakāśayuktatvāttasmādrugmavatī smṛtā /
duryodhanasya yā putrī lakṣaṇā sā ratiḥ smṛtā

kāṣṭhā sāṃbasya bhāryā sā lakṣaṇaṃ saṃyunaktyataḥ /
lakṣaṇābhidhayābhūmau duṣṭa vīryodbhavā hyapi

evaṃ dvirūpā vijñeyā kāmabhāryā ratiḥ smṛtā /
svāyaṃbhuvo brahmaputro manustvādyo gurau samaḥ /
rājadharmeṇa viṣṇośca jātaḥ prīṇayituṃ hareḥ

bṛhaspatirdevāgururmahātmā tasyāvatārāstraya āsan khagendra /
rāmāvatāre bharatākhyo babhūva hyaṃbhojajāveśayuto bṛhaspatiḥ

devāvatārānvānarāṃstārayitvā śrīrāmadivyā'caritānyavādīt /
ato hyasau nāranāmā babhūva hyaṅgatvamāptuṃ rāmadevasya bhūmyām

kṛṣṇāvatāre droṇanāmā babhūva aṃbhojajāveśayuto bṛhasyapatiḥ /
yasmāddoṇātsaṃbhabhūva guruśca tasmādasau droṇasaṃjño babhūva

bhūbhārabhūtādyuddhṛtau hyaṅgabhūto viṣṇoḥ sevāṃ kartumevāsa bhūmau /
bṛhaspatiḥ pavanāveśapuktā sa uddhavaścetyamidhānamāpa

yasmādutkṛṣṭo hariratra samyagato hyasau budhavannāma cāpa /
sakhā hyabhūtkṛṣṇadevasya nityaṃ mahāmatiḥ sarvalokeṣu pujvaḥ

dakṣiṇāṅguṣṭhajo dakṣo brahmaputro mahāmatiḥ /
kanyāṃ sṛṣṭvā hareḥ prīṇannāsa bhūmā prajāpatiḥ /
putrānudapādayaddakṣastvato dakṣa iti smṛtaḥ

śacīṃ bharyāṃ devarājasya viddhi tasyā hyavatāraṃ śṛṇu samyak khagendra /
rāmāvatāre nāma tārā babhūva sā vālipatnī śacīsajakā ca

rāmānmṛte vālisaṃjñe patau hi sugrīvasaṃgaṃ sā cakārātha tārā /
ato nāgātsvargalokaṃ ca tārā kva vā yāyādantarikṣe na pāpā

kṛṣṇāvatāre saiva tārā ca vīndra babhūva bhūmau vijayasya patnī /
piśaṅgadeti hyabhidhā syācca tasyāḥ sāmīpyamasyāstvajuṃnaveva cāsīt

utpādayitvā babhruvāhaṃ ca putraṃ tasyāṃ tyaktvā hyarjuno vai mahātmā /
ataścobhe vāracitrāṅgade ca śacīrūpe nātra vivāryamasti

pulomajā mantradyumnasya bhāryā yā kāśikā gādhirājasya bhāryā /
vikukṣibhāryā sumatiśceti saṃjñā kuśasya patnī kāntimatīti saṃjñā

etā hi sapta hyavarāśca śacyā jānīhi vai nāsti vicāraṇātra /
śacī ratiścāniruddho manurdakṣo bṛhaspatiḥ /
ṣaḍanyonyasamāḥ proktā ahaṅkārāddaśādhamāḥ

atha yaḥ pravaho vāyurmukhyavāyoḥ suto balī /
sa vāyuṣu mahānadya sa vai koṇādhipastathā

nāsikāsu sa evokto bhautikastulya eva ca /
ativāhaḥ sa evoktaḥ yato gamyo mumukṣubhiḥ

dakṣādibhyaḥ pañcaguṇādadhamaḥ saṃprakīrtitaḥ /
garuḍa uvāca /
pravahaśceti saṃjñāṃ sa kimarthaṃ prāpa tadvada

arthaḥ kaścāsti tannāmnaḥ pratītastaṃ vadasva me /
garuḍenaivamuktastu bhagavāndevakīsutaḥ /
uvāca paramaprītaḥ saṃstūya garuḍaṃ hariḥ

kṛṣṇa uvāca /
praharṣeṇa harestulyānsarvadā vahate yataḥ /
ataḥ pravahanāmāsau kīrtitaḥ pakṣisattama

sarvottamo viṣṇurevāsti nāmnā brahmādayastadadhīnāḥ sadāpi /
mayoktametattu satyaṃ na mithyā gṛhṇāmi hastenoragaṃ kopayuktam

sarvaṃ nu satyaṃ yadi mithyā bhavettu tadā tvasau māṃ daśatuhyahīndraḥ /
evaṃ bruvannuragaṃ kopayuktaṃ samagrahīnnādaśatsopyuraṅgaḥ

etasya saṃdhāraṇādeva vīndra sa vāyuputraḥ pravahetyāpa saṃjñām /
yo vā loke viṣṇumūrtiṃ vihāya daityasvarūpā reṇukādyāḥ kudevāḥ

teṣāṃ tathā matpitṝṇāṃ ca pūjā vyarthā satyaṃ satyametadbravīmi /
etatsarvaṃ yadi mithyā bhavettu tadā tvasau māṃ daśatu hyahīndraḥ

pitryaṃ nayāmi pravihāyaiva ye tu pitruddeśātkevalaṃ yaḥ karoti /
sa pāpātmā narakānvai prayātītyetadvākyaṃ satyametadbravīmi

na śrīḥ svatantrā nāpi vidhiḥ svatantro na vāyudevo nāpi śivaḥ svatantraḥ /
tadanye no gauripuloma jādyāḥ kiṃ vaktavyaṃ nātra loke svatantraḥ

bravīmi satyaṃ puruṣo viṣṇureva satyaṃ satya bhujamuddhṛtya satyam /
etatsarvaṃ yadi mithyā bhavettu tadā tvasau māṃ daśatu hyahīndra

jīvaśca satyaḥ paramātmā ca satyastayorbhedaḥ satye e tatsadāpi /
jaḍaścasatyo jīvajaḍayośca bhedo bhedaḥ satyaḥ kiṃ ca jaḍaiśayorbhidā

bhedaḥ satyaḥ sarvajīveṣu nityaṃ satyā jaḍānāṃ ca bhedā sadāpi /
etatsarvaṃ yadi mithyā bhavettu tadā tvasau daśatu māṃ hyahīndraḥ

evaṃ bruvannuragaṃ kopayuktaṃ samagrahīnnādaśatsopyuraṅgaḥ /
etasya saṃdhāraṇādevavīdre sā vāyuputraḥ pravahetyāpa saṃjñām

dvayaṃ svarūpaṃ praviditvaiva pūrvaṃ tvaṃ svīkuruṣva dvayameva nityam /
snānādikaṃ ca prakaroti nityaṃ pāpī sa ātmā naiva mokṣaṃ prayāti

tasmāddvayaṃ pravicāryaiva nityaṃ sukhī bhavennātra vicāryamasti /
etatsarvaṃ yadi mithyā bhavettu tadā tvasau māṃ daśatu hyahīndraḥ

garuḍa uvāca /
kiṃ taddvayaṃ devadeveśa kiṃ vā tatkāraṇaṃ kīdṛśaṃ me vadasva /
dvayostyāgaṃ kīdṛśaṃ me vadasva tyāgātsukhaṃ kīdṛśaṃ me vadasva

śrīkṛṣṇa uvāca /
dvayaṃ cāhustvindriye dve baliṣṭhe dehe hyasmiñ śrotranetre susṛṣṭe /
avāntare śrotranetre khagendra dvayaṃ cāhustatsvarūpaṃ ca vakṣye

śrotrasvabhāvo loka vārtāśrutau ca hyatīva modastvādarāsvādanena /
harervārtāśravaṇe duḥ khajālaṃ śrotrasvabhāvo jaḍatā damaśca

netrasvabhāvo darśane strīnarāṇāṃ hyatyādarānnāsti nidrādikaṃ ca /
harerbhaktānāṃ darśane duḥ kharūpo viṣṇoḥ pūjādarśane duḥ khajālam

tayoḥ svarūpaṃ praviditvaiva pūrvaṃ punaḥ punaḥ svīkarotyeva mūḍhaḥ /
śiśraṃ maurkhyāccaiva kutrāpi yonau praveśayetsarvadā hyādareṇa

bhayaṃ ca lajjā naiva cāste vadhūnāṃ tathā nṛṇāṃ vanitānāṃ yatīnām /
svasāraṃ te hyaviditvā dinepi suvāma yajñena svābhāvaśca vīndra

rasāsvabhāvo bhakṣaṇe sarvadāpi hyanarpitasyānnabhakṣyasya viṣṇoḥ /
tatho pahārasya ca tatsvabhāvaḥ abhakṣyāṇāṃ bhakṣaṇe tatsvabhāvaḥ

alehyalehasya ca tatsvabhāvaḥ pātuṃ tvapeyasya ca tatsvabhāvaḥ /
dvayoḥ svarūpaṃ ca vihāya mūḍhaḥ punaḥ punaḥ svīkarotyeva nityam

tasya snānaṃ vyarthamāhuśca yasmāttasmāttyājyaṃ na dvayoḥ kāryameva /
abhiprāyaṃ hyetamevaṃ khagendra jānīhi tvaṃ prahasyaiva nityam

bhāryādvayaṃ hyaviditvā svarūpaṃ svīkṛtya caikāṃ pravihāyaiva caikām /
snānādikaṃ kurute mūḍhabūddhiḥ vyarthaṃ cāhurmokṣabhogau ca naiva /
etatsarvaṃ yadi mithyā bhavettu tadā tvasau māṃ daśatu hyahīndraḥ

garuḍa uvāca /
bhāryādvayaṃ kiṃ vada tvaṃ mamāpi tayoḥ svarūpaṃ kiṃ vada tvaṃ murāre /
tayormadhye grāhyabhāryāṃ vada tvamagrāhyabhāryāṃ cāpi samyagvada tvam

śrīkṛṣṇa uvāca /
buddhiḥ patnī sā dvirūpā khagendra duṣṭā caikā tvaparā suṣṭhurūpā /
tayormadhye duṣṭarūpā kaniṣṭhā jyeṣṭhā tu yā suṣṭhubuddhisvarūpā

kaniṣṭhayā naṣṭatāṃ yāti jīvaḥ sutiṣṭhantyā yāti yogyāṃ pratiṣṭhām /
kaniṣṭhāyāḥ śṛṇu vakṣye svarūpaṃ śrutvā tasyāstyāgabuddhiṃ kuruṣva

jīvaṃ yaṃ vai prerayantī kaniṣṭhā kāmyaṃ dharmaṃ kurute sarvadāpi /
kva brāhmaṇāḥ kva ca viṣṇurmahātmā kva vai kathā kva ca yajñāḥ kvagāvaḥ

kva cāśvatthaḥ kva ca snānaṃ kva śaucametatsarvaṃ nāma nāśaṃ karoti /
mūḍhaṃ patiṃ reṇukāṃ pūjayasva māyādevyā dīpadānaṃ kuruṣva

subhairavādīn bhaja mūḍha tvamandha hāridracūrṇandhārayeḥ sarvadāpi /
jyeṣṭhāṣṭamyāṃ jyeṣṭhadevīṃ bhajasva bhaktyā sūtraṃ galabandhaṃ kuruṣva

marigandhāṣṭamyāṃ marigandhaṃ bhajasva tathā sūtraṃ svagale dhārayasva /
dīpastaṃbhaṃ sudine pūjayasva tatsūtrameva svagale dhārayasva

mahālakṣmīṃ cādyalakṣmīṃ ca samyak pūjāṃ kuru tvaṃ hi bhaktyātha jīva /
lakṣmīsūtraṃ svāgale dhārayasva mahālakṣmīvān bhavasītyuttaratra

vihāya mauñjīdivase bhāgyakāmaḥ suguggulāndhārayasvātibhaktyā /
suvāsinīḥ pūjayasvāśu bhaktyā gandhaiḥ puṣpairdhūpadīpaiḥ pratoṣya

varārtikyaṃ kāṃsyapātre nidhāya kurvārtikyaṃ devatādevatānām /
picumandapatrāṇi vitatya bhūmau namasva tvaṃ kṣamyatāṃ ceti coktvā

mahādevīṃ pūjayasvādya bhaktyā sadvaiṣṇavānāṃ mā dadasvāpyathānnam /
sadvaiṣṇavānāṃ yadi vānnaṃ dadāsi bhāgyaṃ ca te paśyato nāśameti

svavāmahaste veṇupātre nidhāya dīpaṃ dhṛtvā savyahaste pate tvam /
uttiṣṭha bhoḥ pañcagṛheṣu bhikṣāṃ kuruṣva samyak pravihāyaiva lajjām

ādau gṛhe ṣaḍrasānnaṃ ca kutvā jagadgopyaṃ bhojanaṃ tvaṃ kuruṣva /
taccheṣānnaṃ bhojayitvā pate tvaṃ tāsāṃ ca re śaraṇaṃ tvaṃ kuruṣva

tāsaṃ hastaṃ pustake stāpayitvā trāhityevaṃ tanmukhairvācayasva /
tvaṃ khaḍgadevaṃ pūjayasvādyabhartastatsevakānpūjayasvādya samyak

taiḥ sārdhaṃ tvaṃ śvānaśabdaṃ kuruṣva haridrācūrṇaṃsarvadā tvaṃ dadhasva /
kuruṣva tvaṃ bhīmasenasya pūjāṃ pañcāmṛtaiḥ ṣoḍaśabhiścopacāraiḥ

tatkaupīnaṃ raupyajaṃ kārayitvā samarpayitvā dīpamālāṃ kuruṣva /
taddāsavaryān bhojayasvādya bhaktyā garjasva tvaṃ bhīmabhīmeti suṣṭhu

taddāsavaryānmodayasva svavastrairmadyairmāṃsadravyajālena nityam /
mahādevaṃ pūjayasvādya samyag mahārudrairatirudraiśca samyak

haretyuktvā jaṅgamānpūjayasvaśaivāgame nipuṇāñchūdrajātān /
śākaṃbharīṃ vivisaḥ sarvaśākānsupācayitvā ca gṛhe gṛhe ca

dadasva bhaktyā paramādareṇa svalaṅkṛtya prāstuvaṃstadguṇāṃśca /
kulādevaṃ pūjayasvādya bhaktyā tvaṃ dṛgbhyāṃ vai taddine śaṃbhubuddhyā

tadbhaktavaryānpūjayasvādya samyak tatpādamūle vandanaṃ tvaṃ kuruṣva /
supañcamyāṃ mṛnmayīṃ śeṣamūrtiṃ pūjāṃ kuruṣva kṣīralājādikaiśca

sunāgapāśaṃ hi gale ca baddhvā taccheṣānnaṃ bhojayerbhoḥ punastvam /
dine caturthe bhoja yasvādya bhaktyā naivedyānnaṃ bhojayasvādya suṣṭhu

ityādikaṃ prerayitvā patiṃ sā jīvena naṣṭaṃ prikarotyeva nityam /
tasyāḥ saṃgājjīvarūpaḥ patistvāṃ samyagdaṣṭāmihaloke paratra

tasyāḥ saṃgaṃ suvidūraṃ visṛjyaceṣṭvā samagraṃ kuru sarvadā tvam /
subuddhirūpā tvīrayantī jagāda bhajasva viṣṇuṃ paramādareṇa

hariṃ vinānyaṃ na bhajasva nityaṃ sā reṇukā tvāṃ tu na pālayiṣyati /
adṛṣṭanāmā haririve hi nityaṃ phalaprado yadi na syātkhagendra

jugupsitāṃ śrutyanuktāṃ ca devīṃ patidruhāṃ sarvadā sevayitvā /
tasyāḥ prasādātkuṣṭhabhagandarādyairbhuktvā duḥ khaṃ saṃyaminīṃ prayāhi

tadā kudavī kutra gatā vadasvame hyataḥ pate tvaṃ na bhajasva devīm /
pate bhaja tvaṃ brāhmaṇānvaiṣṇavāṃśca saṃsāraduḥ khāttāransuṣṭhurūpān

sevādikaṃ pravīhāyaiva svacchaṃ māyādevyā bhajanātkiṃ vadasva /
jyeṣṭhāṣṭamyāṃ jyeṣṭhadevīṃ hyalakṣmīṃ lakṣmīti buddhyā pūjayitvā ca samyak

tasyāḥ sūtraṃ galabaddhaṃ ca kṛtvā nānāduḥ khaṃ hyanubhūyāḥ pate tvam /
yadā pate yamādūtaiśca pāśairbaddhvā ca samyak tāḍyamānaiḥ kaśābhiḥ

tadā hyalakṣmīḥ kutra palāyate 'sāvato mūlaṃ viṣṇupādaṃ bhajasva /
pate bhaja tvaṃ sarvadā vāyutattvaṃ na cāśrayestvaṃ sūkṣmaskandaṃ ca mūḍha

tadvattaṃ tvaṃ navanītaṃ ca bhaktyā taducchiṣṭaṃ bhakṣayitvā pate hi /
tasyāśca sūtraṃ galabaddhaṃ ca kṛtvā ihaiva duḥ khānyanubhūyāḥ pate tvam

yadā pate yamadūtaiśca pāśairbaddhvā ca samyak tāḍyamānaḥ kaśābhiḥ /
tadā skandaḥ kutra palāyate 'sāvato mūlaṃ viṣṇupādaṃ bhajasva

dīpastaṃbhaṃ dāpayitvā pate tvaṃ sūtraṃ ca baddhvā svagale ca bhaktyā /
tadā baddhvā yamadūtaiśca pāśairdīpastaṃbhaistāḍyamānastu samyak

dīpastaṃbhaḥ kutra palāyitobhūdato mūlaṃ viṣṇupādaṃ bhajasva /
lakṣmīdine pūjayitvā ca lakṣmīṃ sūtraṃ tasyāḥ svagale dhāraya tvam

yadā pate yamadūtaiśca pāśairbadhvā samyak tāḍyamānaḥ kaśābhiḥ /
tadā lakṣmīḥ kutra palāyate 'sāvato mūlaṃ viṣṇupādaṃ bhajasva

vivāhamaiñjīdivase mūḍhabuddhe jugusitāndhārayitvā subhaktyā /
varārārtikaṃ kāṃsyapātre nidhāya kṛtvārtikyaṃ udaudaiti śabdam

tathaiva daṣṭvā picumandasya patraṃ sunartayitvā paramādareṇa /
yadā tadā yamadūtaiśca pāśairbaddhvābaddhvā tāḍyamānaśca samyak

tava svāminkuladevo mahātmanpalāyitaḥ kutra me tadvadasva /
svadehānāṃ pūjayitvā ca samyakkaṇṭhābharaṇairvidhurāṇāṃ ca keśaiḥ

saṃtiṣṭhamāne yamadūtā baliṣṭhā saṃtāḍyamāne musalairbhindipālaiḥ /
yadā tadā kutra palāyitā sā keśairvihīnā laṃbakarṇaṃ ca kṛtvā

svavāmahaste veṇupātraṃ nidhāya dīpaṃ dhṛtvā savyahaste ca mūḍhaḥ /
gṛhegṛhe bhaikṣacaryāṃ ca kṛtvā saṃtiṣṭhamāne svagṛhaṃ caiva devī

yadā tadā yamadūtaiśca mūḍha dīpaiḥ sahasrairdahyamānaśca samyak /
nirnāsikā reṇukā mūḍhabuddhe palāyitā kutra sā me vadasva

sadā mūḍhaṃ khaḍgadevaṃ ca bhaktyā taṃ bhaktavatpūjayitvā ca samyak /
taiḥ sārdhaṃ tvaṃ śvānavadgarjayitvā saṃtiṣṭhamāne svagṛhe caiva nityam

yadā tadā yamadūtaiśca samyak saṃtāḍyamānastatra śabdaṃ prakurvan /
saṃtiṣṭhamāne bhaktavaryaṃ vihāya tadā devaḥ kutra palāyitobhūt

sa pārthakyādbhīmasenapratīkaṃ pañcāmṛtaiḥ pūjayitvā ca samyak /
suvyañjane cānnakaupīnameva dattvā mūḍhastiṣṭhamāne svagehe

yadā tadā yamadūtaiśca samyak saṃtāḍyamāne yamamārge ca mūḍhaḥ /
bhīmaḥ sa vai kutra palāyitobhūto mūlaṃ viṣṇupādaṃ bhajasva

mahādevaṃ pūjayitvā ca samyak haretyuktvā svagṛhe vidyamāne /
yadā gṛhaṃ dahyate vahninā tu tadā haraḥ kutra palāyitobhūt

śākaṃ bharīdivase sarvameva śākaṃbharī sā ca devī mahātman /
palāyitā kutra me tvaṃ vadasva kulāladevaṃ pūjayitvā ca bhaktyā

kārpāsaṃ vai tena dattaṃ gṛhītvā saṃtiṣṭhamāne yamadūtaiśca samyak /
saṃhanyamānastīkṣaṇadhāraiḥ kuṭhāraiḥ kulāladevaṃ ca sudaṃṣṭranetram /
vihāya vai kutra palāyitobhūnna jñāyate 'nveṣaṇāccāpi kena

yadā pañcamyāṃ mṛnmayīṃ śeṣamūrtiṃ saṃpūjya bhaktyā vidyamāne svagehe /
tadā baddhvā yamadūtāśca samyak saṃnahyamāne nāgapāśaiścabaddhvā

svabhaktavaryaṃ pravihāya nāgaḥ palāyitaḥ kutra vai saṃvada tvam /
dūrvāṅkurairmodakaiḥ pūjayitvā vināyakaṃ pañcakhādyaistathaiva

saṃtiṣṭhaṃmāne yamadūtaiśca samyak saṃtāḍyamāne taptadaṇḍaiśca mūḍha /
dantaṃ vihāyaiva ca vighnarājaḥ palāyitaḥ kutra me taṃ vadatvam

vivāhakāle piṣṭadevīṃ subhaktyā saṃpūjayitvā vidyamāno gṛhe sve /
yadā tadā yamadūtaiśca baddhvā saṃpīḍyamāno yamamārge sa mūḍhaḥ

viṣṭhādevī pīḍyamānaṃ ca bhaktaṃ vihāya sā kutra palāyitābhūt /
vivāhakāle rajakasya gehaṃ gatvā samyak prārthayitvā ca mūḍhaḥ

yastaṃbhasūtraṃ kalaśe parītya pūjāṃ kṛtvā vidyamāno gṛhe sve /
yadā tadā yamadūtaśca samyak taṃ staṃbhasūtraṃ tasya mukhe nidhāya

saṃtāḍyamāne saṃtabhasūtrasthadevī palāyitā kutra me saṃvadasva /
vivāhakāle pūjayitvā ca samyak caṇḍāladevīṃ bhaktavaśyāṃ ca tasyāḥ

tadbhaktavaryaiḥ śūrpamadhye ca tīre saṃsevayitvā vidyamāno gṛhesve /
yadā tadā yamadūtaiśca baddhvā saṃtāḍyamāno yamamārge mahadbhiḥ

cūledavī kva palāyitābhūtsumūḍhabuddhe viṣṇupādaṃ bhajasva /
jvarādibhiḥ pīḍyamāne svaputre gṛhe sthitaṃ brahmadevaṃ ca samyak

dhūrpairdīpairbhakṣyabhojyaiśca puṣpaiḥ pūjāṃ kṛtvā vidyamānaśca gehe /
yadā tadā yamadūtaiśca baddhvā saṃtāḍyamāne veṇupāśādibhiśca

sa brahmadevaḥ kva palāyitobhūtsumūḍhabuddhe viṣṇupādaṃ bhajasva /
santānārthaṃ bṛhatīṃ pūjayitvā galena baddhvā bṛhatīṃ vai phalaṃ ca

saṃtiṣṭhamāne yamadūtaiśca baddhvā saṃtāḍyamāne bṛhatīkaṇṭakaiśca /
tadā devī bṛhatī mūḍhabuddhe palāyitā kutra me tadvada tvam

bhajasva mūḍha paradaivataṃ ca nārāyaṇaṃ tārakaṃ sarvaduḥ khāt /
sukṣudradeveṣu matiṃ ca mā kuru na ca śṛṇu tvaṃ phalguvākyaṃ tathaiva

sukṣudradevān bhindipāle nidhāya visarjayitvā dūradeśe mahātman /
saṃdhārya tvaṃ svakulācāradharmaṃ saṃpātane narakaṃ hetubhūtam

punīhi gātraṃ sarvadā mūḍhabuddhe mantrāṣṭakairjanmatīrthe pavitre /
hṛdi sthitāṃmārairvyamudrāṃ vihāya kṛtvābhūṣāṃ viṣṇumudrābhiragryām

sadā mūḍho harivārtāṃ bhajasva hyāyurgataṃ vyarthamevaṃ kubuddhyā /
sadvaiṣṇavānāṃ saṃgamo durlabhaśca kṣubdhaṃ jñānaṃ tāratamyasvarūpam

hariṃ guruṃ hyanusṛtyaiva satyaṃ gatiṃ svakīyāṃ tena jānīhi mūḍha /
dagdhvā duṣṭāṃ buddhimevaṃ ca mūḍha subuddhirūpaṃ mā bhajasvaiva nityam

mayā sārdhaṃ sadguruṃ prāpya samyagvairāgyapūrvaṃ tattvamātraṃ viditvā /
tenaiva mokṣaṃ prāpnumo nārjavairyattāryā viṣṇoḥ saṃprasādācca lakṣmyāḥ

ityāśayaṃ manasā sannidhāya tathā coktaṃ bhaktavaryo madīyaḥ /
ato bhaktaḥ pravahetyeva saṃjñāmavāpa vīndra prakṛtaṃ taṃ śṛṇu tvam