Garuda Purana · Chapter 3.27

iti śrīgāruḍe mahāpurāṇe uttarakhaṇḍe tṛtīyāṃśe brahmakāṇḍe vyaṅkaṭagirimāhātmye svāmipuṣkariṇyāditīrthatatratyadevatadīyaśālagrāmalakṣaṇa taddānādivarṇanaṃ nāma ṣaḍviṃśodhyāyaḥ
śrīgaruḍamahāpurāṇam- 27
śrīkṛṣṇa uvāca /
sā gatā snātukāmātha nandāṃ pāpanivāriṇīm /
papraccha taṃ guruṃ vipraṃ vinayāvanatā sudhīḥ

kinnāmeyaṃ nadī vipra kiṃ kāryaṃ cātra me vada /
jaigīṣavyastvevamukto vākyametaduvāca ha

jaigīṣavya uvāca /
śṛṇu bhadre pravakṣyāmi māhātmyaṃ pāpanāśanam /
iyaṃ nadī mahābhāge sadā pāpavināśinī

brahmahatyādipāpaugho yatra snānena naśyati /
pratyakṣaṃ dṛśyate hyatra snānaṃ kartuṃ samudyataiḥ

jalaṃ cāśubhrarūpeṇa pāpaiśca paridṛśyate /
yāvacchubhrodakaṃ devi tāvatsanānaṃ ca kārayet

yāvacchubhrodakaṃ naiva tāvatpāpaṃ na naśyati /
śuddhodake samāyāte pāpaṃ naṣṭamiti dhruvam

kalāvitthaṃ viśālākṣi mahimā dṛśyate bhuvi /
atra snānaṃ prakartavyaṃ dātavyaṃ dāna muttamam /
tataśca jñānamāsādya viviṣṇulokaṃ sa gacchati

gurustrīgamanāccandra ahalyāyāṃ gato hariḥ /
surāpānācca śukrastu suvarṇaharaṇādbaliḥ

brahmahatyāyāśca rudro nāgo dattāpahārakaḥ /
sūtasya hananādrāmo nirmukto hyatra bhāmini

nānena sadṛśaṃ tīrthaṃ na bhūtaṃ na bhaviṣyati /
snānaṃ kuru mahābhāge tena siddhiṃ hyavāpsyasi

jaigīṣavyeṇa muninā pitrā saha ca kanyakā /
snānaṃ cakāra vidhivadudatiṣṭhacca bhāmini

yāvacca pauruṣaṃ sūktaṃ tāvatkālaṃ hi tiṣṭhati /
paścājjaptvā mahāmantraṃ veṅkaṭeśābhidhaṃ param

dvijātīnprīṇayitvā sā vastradravyādibhūṣaṇaiḥ /
tasmācca prayayau devī kamārītīrthamuttamam

kumārīmahimānaṃ ca śrutvā snānaṃ cakāra sā /
punarāvṛtya sā devī hyantarā virajānadīm

dṛṣṭvā papraccha sā devī jaigīṣavyaṃ guruṃ prabhum /
kiṃ saṃjñikeyaṃ viprendra kiṃ kāryaṃ hyatra me vada

jaigīṣavyaḥ pṛṣṭa eva muvāca karuṇānidhiḥ /
iyaṃ bhāgīrathī kanye āyāti hyantareṇa tu

ataḥ sā procyate hyantargaṅgeti paramarṣibhiḥ /
kanye tvasyāstu salilaṃ śrīninivāsapriyaṃ sadā

atra snānaṃ yaḥ karoti sa yāti paramāṃ gatim /
snānaṃ cakāra sā kanyā jale paramapāvane

dānādikaṃ tathā jñātvā jajāpa paramaṃ manum /
śrīnivāsasamīpaṃ tu punarāgatya bhāminī

aṅgapradakṣiṇaṃ cakre bhaktyā veṅkaṭanāyakam /
brāhmaṇādīnprīṇayitvā vastragandhādibhūṣaṇaiḥ

punaḥ paradine prātaḥ svāmipuṣkariṇījale /
snānaṃ kṛtvā mahābhāgā yayau tuṃburusaṃjñikām

papraccha taṃ guruṃ devī nāthaṃ kinnāmikā tvayam /
jaigīṣavya uvāca /
iyaṃ tuṃbarukābhijñā nārī vai varavarṇinī

purā tuṃ buruṇā sākaṃ nāradastapasi sthitaḥ /
atra prādurabhūdviṣṇurnāradasya hitāya ca

snānaṃ yaḥ kurute hyatra sa yāti paramāṃ gatim /
atra snānaṃ manuṣyāṇāṃ sarveṣāṃ durlabhaṃ kalau

atra snānaṃ manuṣyāṇāṃ nālpasya tapasaḥ phalam /
tatra snātvā ca pītvā ca dattvā dānānyakeśaḥ

punarāgatya sā devī śrīnivāsaṃ nanāma ha /
tasmimandine brāhmaṇāṃśca tarpayāmāsa bhamini

svāmipuṣkariṇīṃ prāpya dīpānprājvālayatsatī /
sopāneṣu mahābhāgā dīpāvalibhirañjasā /
prīṇayāmāsa deveśaṃ śrīnivāsaṃ jagadgurum

punaḥ paradine prāpte śakratīrthamanuttamam /
kapilākhyordhvadeśe tu tattīrthaṃ pāvanaṃ smṛtam

tatra snātvā mahābhāgā tadūrdhvaṃ snāpayetsvayam /
viṣvasenasarastatra sarvapāpavināśanam

tata ūrdhvaṃ mahābhāgā yayau tatra dadarśa sā /
pañcāyudhānāṃ tīrthāni teṣu snānaṃ cakāra sā

tadūrdhvaṃ cāgnikuṇḍaṃ syāddurārohaṃ tatogrataḥ /
tasyopari brahmatīrthaṃ brahmahatyāvimocanam

saptarṣīṇāṃ tadūrdhvaṃ tu puṇyatīrthaṃ ca satphalam /
daśādhikaphalaṃ teṣā tīrthānāmuttarottaram

eteṣāṃ caiva māhātmyaṃ ko vā vaktumihārhati /
ṛṣitīrtheṣu sā kanyā cacāra tapa uttamam

mamāvatāraparyantaṃ caritvā tapa uttamam /
yogadhāraṇa yā dehaṃ tyaktvā jāṃbavato gṛhe

jātā jāṃbavatī nāma vavṛdhe tasya veśmani /
tasyāḥ pitā jāṃbavānsa samādātkanyakāṃ tadā /
rukmyā anaṃ tarā saiṣā mama bhāryā khageśvara

idaṃ hi paramākhyānaṃ veṅkaṭādrermahāgireḥ /
ko vā varṇayituṃ śakto madanyaḥ puruṣo bhuvi

veṅkaṭeśasya naivedyaṃ sadā lakṣmīḥ karoti vai /
brahmā pūjayate nityamevaṃ śāstrasya nirṇayaḥ

naivedyabhakṣiṇāṃ puṃsāmupahāsaṃ na kārayet /
svasya prāśastyabhāve tu naivedyādi guḍādikam /
grāhyameva na saṃdeho anyathā nārakī bhavet

śrīnivāsātparo devo na bhūto na bhaviṣyati /
svayaṃ ca pācayitvātvaṃ ghṛtapakvādikaṃ tathā /
śrīnivāsasya naivedyaṃ dattvā bhojanamācaret

idaṃ tu paramaṃ gopyaṃ tavoktaṃ ca khageśvara /
na kasyāpi ca vaktavyaṃ gopyatvātkhagasattama /
itaḥ paraṃ pravakṣyāmi tāratamyaṃ śṛṇu prabho