Garuda Purana · Chapter 3.23

iti śrīgāruḍe mahāpurāṇe uttarakhaṇḍe tṛtīyāṃśe brahmakāṇḍe lakṣmaṇāvivāhahetunirūpaṇaṃ nāma dvāviṃśodhyāyaḥ
śrīgaruḍamahāpurāṇam- 23
śrīkṛṣṇa uvāca /
somasya putrī pūrvasarge babhūva bhāryā madīyā jāmbavatī mama priyā /
tāsāṃ madhye hyadhikā vīndra kiñcidrudrādibhyaḥ pañcaguṇairvihīnā

yadāveśo balavānsyādramāyāṃ tadānāmasa priyate keśavolam /
yadāveśāddhrāsamupaiti kāle tadā tāsāṃ sāmyamāhurmahāntaḥ

lakṣmyāveśaḥ kiñcidastyeva nityamatastābhyaḥ kiñcidādhikyamasti

garuḍa uvāca /
tāsāṃ madhye jāmbavantī tu kṛṣṇa ārādhanaṃ kīdṛśaṃ sā cakāra /
tanme brūhi kṛpayā viśvamūrte ādhikye vai kāraṇaṃ tābhya eva

garuḍenaivamuktastu bhagavān devakīsutaḥ /
meghagaṃbhīrayā vācā uvāca vinatāsutam

śrīkṛṣṇa uvāca /
yā pūrvasarge somaputrī babhūva piturgṛhe vartamānāpi sādhvī /
janma svakīyaṃ sārthakaṃ vai cakāra pitrā sākaṃ viṣṇuśuśrūṣaṇe na ca

śuśrāva nityaṃ satpurāṇāni caivaṃ cakre sadā viṣṇupādapraṇāmam /
cakre sadā tārakasyāpi viṣṇoḥ pradakṣiṇaṃ smaraṇaṃ kurvatī sā

pitrā sākaṃ sā tu kanyā khagendra vairāgyayuktā śravaṇātsaṃbabhūva /
keśaṃ ca mitraṃ dviradādikaṃ ca anarghyaratnāni gṛhādikaṃ ca

sarvaṃ hyetannaśvaraṃ caiva mene mamādhīnaṃ hariṇā vai kṛtaṃ ca /
yenaiva dattaṃ putramitrādikaṃ ca tenā hṛtaṃ vedanāṃ naiva cakre

adyaiva viṣṇuḥ paramo dayāluḥ dayāṃ mayi kṛtavāṃste na suṣṭhu /
pitrā sākaṃ kanyakā sā tu vīndra sadātmani hyamale vāsudeve

ekāntatvaṃ suṣṭhu bhaktyā gatā sā yadṛcchayā sopapannena devī /
akalpayantyātmano vīndra vṛttiṃ cakāra yatsāvadhirādhaṃ prathaiva

sā vai vittaṃ viṣṇupādāravinde duḥ khārṇavāttarāke saṃcakāra /
vāgīndridriyaṃ khaga samyak cakāra harerguṇānāṃ varṇane vā sadaiva

hastau ca viṣṇorgṛhasaṃmārjanādau cakāra devī gātramalāpahāram /
śrotraṃ ca cakre harisatkathodaye mokṣādimārge hyamṛtopame ca

netraṃ ca cakre pratimādidarśane anādikālīnamalāpahariṇī /
sadvaiṣṇavānāṃ sparśane caiva saṃge nirmālyagandhānuvilepane tvak

ghrārṇedriyaṃ sā haripādasāre cakāra saṃsāravimuktide ca /
jihvendriyaṃ harinaivedyaśeṣe śrīmattulasyādivimiśrite ca

pādau hareḥ kṣetrapathānusarpaṇe śiro hṛṣīkeśapadābhivandane /
kāmaṃ hṛdāsye tu haridāsyakāmyā tathottamaślokajanāścaranti

niṣkāmarūpe ca matiṃ cakāra vāgindriyaṃ stavanaṃ svīcakāra /
evaṃ sadā kāryasamūhamātmanā samarpayitvā parameśapādayoḥ

tīrthāṭanārthaṃ tu jagāma pitrā sākaṃ hareḥ prīṇanādyarthameva /
ārādhayitvā brāhmaṇānviṣṇubhaktānādau gṛhe vastrasaṃbhūṣaṇādyaiḥ

paścātkalpaṃ kārayāmāsa devī viṣṇoragre tīrthayātrārthameva /
yāvatkālaṃ tīrthayātrā mukunda tāvatkālaṃ tūrdhvaretā bhavāmi

yāvatkālaṃ tīrthayātrāṃ kariṣye tāvaddattādvaiṣṇavānāṃ ca saṃgam /
hareḥ kathāśravaṇaṃ syānmukunda nāvaiṣṇavānāṃ saṃgināmaṅgasaṃgam

suhṛjjanaiḥ putramitrādikaiśca dīrthāṭanaṃ naiva kuryāṃ mukunda /
kurvanti ye kāmyayā tīrthayātrāṃ teṣāṃ saṃgaṃ kuru dūre mukunda

śālagrāmaṃ ye vihāyaiva yātrāṃ kurvanti teṣāṃ kiṃ phalaṃ prāhurāryāḥ /
yadā tīrthānāṃ darśanaṃ syāttadaiva śālagrāmaṃ purataḥ sthāpayitvā

tīrthāṭanaṃ pādacairaiḥ kṛtaṃ cetpūrṇaṃ phalaṃ prāhurāryāḥ khagendra /
pādatrāṇaṃ pādarakṣāṃ ca kṛtvā tīrthāṭanaṃ pādahīnaṃ tadāhuḥ

yo vāhane turage copaviṣṭastīrthāṭanaṃ kurute cārdhahīnam /
vṛṣādīnāṃ vāhane pādamāhuḥ parānnānāṃ bhojane vyarthamāhuḥ

mahātmanāṃ vedavidāṃ yatīnāṃ parānnānāṃ bhojane naiva doṣaḥ /
saṃkalpayitvā paramādareṇa jagāma sā tīrthayātrārthameva

ādau snātvā harinirmātyagandhaṃ visarjayitvā śravaṇaṃ vai cakāra /
pitrā sākaṃ bhojanaṃ cāpi kṛtvā agre dine krośamekaṃ jagāma

tatra dvijānpūjayitvānnapāna rātrau tattvaṃ śrāvayāmāsa devī /
evaṃ yātrāṃ ye prakurvanti nityaṃ teṣāṃ yātrāṃ saphalāṃ prāhurāryāḥ

vinā dayāṃ tīrthayātrā khagendravyarthetyevaṃ vīndra cāhurmahāntaḥ /
divā rātrau ye na śṛṇvanti divyāṃ hareḥ kathāṃ tīrthamārge khagendra

vyarthaṃvyarthaṃ tasya cāhurgataṃ vai aśvādīnāṃ vāhanānāṃ ca viddhi /
aśvādīnāmaparādhaṃ vadasva gaṅgādīnāṃ darśanātpāpanāśaḥ

kṣetrasthaviṣṇordarśanātpāpanāśo mārjārasyāpyaparādhaṃ vadasva /
kṣetrasthaviṣṇoḥ pūjanātpāpanāśaḥ pūjāvatāmaparādhaṃ vadasva

japādīnāṃ kurvatāṃ pāpanāśo viṣṇordhyānātsadya evādhanāśaḥ /
anusaṃdhānādrahitaṃ sarvameva kṛtaṃ vyarthameveti cāhuḥ

ato hareḥ pāpavināśinīṃ kathāṃ śrutvā viṣṇorbhaktimānsyātvagandra /
dṛṣṭvādṛṣṭvā haripādāṅkitaṃ ca smṛtvāsmṛtvā bhaktimānsyātkhagendra

pitrā sākaṃ kanyakā sāpi vīndra śeṣācalasthaṃ śrīnivāsaṃ ca draṣṭum /
jagāma sā mārgamadhye hariṃ ca sā cintayāmāsa ramāpatiṃ ca

kadā drakṣye śrīnivāsasya vakṣaḥ śrīvatsaratnairbhūṣitaṃ vistṛtaṃ ca /
kadā drakṣye śrīnivāsasya tundaṃ valitrayeṇāṅkitaṃ suṃdaraṃ ca

kadā drakṣye śrīnivāsasya kaṇṭhaṃ maharlokasyāśrayaṃ kaṃbutulyam /
kadā drakṣye śrīnivāsasya nābhiṃ sadāntarikṣasyāśrayaṃ vai supūrṇam

kadā drakṣye vadanaṃ vai murārerjanalokasyāśrayaṃ sarvadaiva

śiraḥ kadā śrīnivāsasya drakṣye satyasya lokasyāśrayaṃ sarvadaiva /
kaṭiṃ kadā śrīnivāsasya drakṣye bhūrlokasyāśrayaṃ sarvadaiva

kadā drakṣye śrīnivāsasya coru talātalasyāśrayaṃ sarvadaiva /
kadā drakṣye śrīnivāsasya jānu sukomalaṃ sutalasyāśrayaṃ ca

kadā drakṣye śrīnivāsasya jaṅghe rasātalasyāśrayeḥ sarvadaiva /
kadā drakṣye pādatalaṃ hareśca pātālalokasyāśrayaṃ sarvadaiva

itthaṃ mārge cintayantī ca devī śeṣācale śeṣadevaṃ dadarśa /
phaṇaiḥ sahasraiḥ suvirājamānaṃ nānādrumairvānarairvānarībhiḥ

ananta janmārjitapuṇyasaṃcayānmayādya dṛṣṭaḥ paramācalo hi /
taddarśanādvāṣpakalākulekṣaṇā sadyaḥ samutthāya nanāma mūrdhnā

mukhaṃ ca dṛṣṭvā namanaṃ ca kāryaṃ pṛṣṭhādibhāge namanaṃ na kāryam /
sāpi dviṣaṭkaṃ namanaṃ ca cakre śālagrāmaṃ sthāpayitvā puro 'sya

itthaṃ kāryaṃ vaiṣṇavaiḥ parvatasya tvaṃ vaiṣṇavairviparītaṃ ca kāryam /
madhvāntaḥsthaḥ parvatāgresti nityaṃ ramābrahmādyaiḥ pūjitaḥ śrīnivāsaḥ

susattamaṃ paramaṃ śrīnivāsaṃ drakṣye 'thāhaṃ hyārurukṣe 'calañca /
ityevamuktvā kapilākhyatīrthe sthānaṃ cakre sā svapitrā sahaiva

atraivāste śrīnivāso haristu dravyeṇa rūpeṇa na cānyatheti /
ādausnātvā muṇḍanaṃ tatra kṛtvā tīrthaśrāddhaṃ kārayitvā sutīrthe

gobhūhiraṇyādisamastadānaṃ dattvā śailaṃ cārurohātha sādhvī /
śālagrāmaṃ sthāpayitvā sa cāgre punaḥ praṇāmaṃ sāpi cakre subhaktyā

sopānānāṃ śataparyantamevamāruhya sā hyupaviṣṭā tu tatra /
śuśrāva sā bhāgavataṃ purāṇaṃ śuśrāva vaiveṅkaṭādreḥ praśaṃsām

jaigīṣavyādgurupādātsubhaktyā suśrāva tattvaṃ veṅkaṭādreśca sarvam