Garuda Purana · Chapter 3.21

// 51 //
iti śrīgāruḍe mahāpurāṇe uttarakhaṇḍe tṛtīyāṃśe brahmakāṇḍe bhadrākṛtabhagavatpatitvaprāpakatapaścaryādinirūpaṇaṃ nāma viṃśodhyāyaḥ
śrīgaruḍamahāpurāṇam- 21
śrīkṛṣṇa uvāca /
kālindyā api cotpattiṃ pravakṣyāmi khageśvara /
vivasvānnāma sūryobhattasya putrī vyajāyata

kālindīsaṃjñakā vīndra yamunā yānujā smṛtā /
kṛṣṇapatnītvakāmena cacāra tapa uttamam

tapa ālocanaṃ proktaṃ tattvānāṃ ca vinirṇayaḥ /
pūrvārjitānāṃ pāpānāmanutāpastapaḥ smṛtam

prāyo nāma tapaḥ proktaṃ cittanigraha ucyate /
prāyaścittamiti proktaṃ na tu kṣauraṃ khageśvara

anutāpayutaṃ bhūtaṃ tacchaṇu tvaṃ khageśvara /
pūrvaṃ na japtaṃ divyamantraṃ mukunda taptaṃ sadā kleśadāvānalena

na vai smṛtaṃ harināmāmṛtaṃ ca sadā smṛtaṃ haridoṣādikaṃ ca /
na tu smṛtaṃ haritattvāmṛtaṃ ca samyak śrutaṃ lolavārtādikaṃ ca

na pūjitaṃ haripādāravindaṃ supūjitāḥ putramitrādikāśca /
na vanditaṃ haripādāravindaṃ suvandito mitrapādaḥ sughoraḥ

na dṛṣṭaṃ vai dhūpadhūmrairupetaṃ harervakraṃ kuntalaiḥ saṃvṛtaṃ ca /
putrādikaṃ lālitaṃ vai mukunda na lālitaṃ tava vakraṃ murāre

sulālitaṃ bhūṣaṇaiḥ putramitraṃ na lālitaṃ sarvapāpāpahāri /
na bhuktaṃ vai harinairavedyaśeṣaṃ mitrālaye ṣaḍrasānnaṃ ca bhuktam

supuṣpagandhā nārpitā te murāre samarpitāḥ putramitrādikebhyaḥ /
santaptohaṃ putramitrādikeṣu kadā drakṣye tava vaktraṃ mukunda

avaiṣṇavānnaiḥ śigruśākādikaiśca hyanarpitānnaiśca tathāpyasaṃskṛtaiḥ /
tathāpyabhakṣyai rasanā ca dagdhā kadā drakṣye tava vaktraṃ mukunda

aṣṭākṣarīpūjayā divyatīrthairviṣṇoḥ purā bhrāmitaiḥ śaṅkhatīrthaiḥ /
na pāvitaṃ maccharīraṃ murāre kadā drakṣye tava va ktraṃ mukunda

anarpitairgandhapuṣpādikaiśca anarpitairbhūṣaṇairvastrajātaiḥ /
avaiṣṇavānāṃ digdhagandhādidoṣairgātraṃ dagdhaṃ kadā hyuddhariṣye mukunda

dagdhau ca pādau mama vāsudeva na gacchantau kṣetrapathaṃ hareśca /
netre ca dagdhe mama sarvadāpi nālokitaṃ tava deva pratīkam

dagdhau ca hastau mama vāsudeva na pūjitaṃ tava viṣṇoḥ pratīkam /
mayā kṛtaṃ pāpajātaṃ murāre kadā drakṣye tava vakraṃ mukunda

madīyadoṣāngaṇayanna pūrṇa dayāṃ kuru tvaṃ suddhadāsyānmukunda /
yāvanti lomāni madīyagātre saṃti prabho sarvadorṣarvidūra

tāvanti pāpāni madīyagātre kadā drakṣye tava vaktraṃ mukunda /
anantadehe patiputrairgṛhaiśca mitrairdhanaiḥ paśubhṛtyādikaiśca

sukhaṃ nāptaṃ hyapumātraṃ mukunda sevā muktā tava devasya viṣṇoḥ /
itaḥ paraṃ putramitrādikaṃ ca yāsye nāhaṃ tava dāsī bhavāmi

yeye brūyuḥ putramitrādikaiśca samyak sukhaṃ jāyate martyaloke /
teṣāmāsye mūtraviṣṭhādikaṃ ca samyak sadā patitaṃ ceti jāne

mitrādīnāṃ yatkṛtaṃ dravyajātaṃ vṛthā gataṃ malarūpaṃ ca jātam /
sadvaiṣṇavānāṃ yatkṛtaṃ dravyajātaṃ hariprāpteḥ kāraṇaṃ syātsadaiva

etādṛśaṃ tattu jātaṃ mukunda alaṃ hyalaṃ tena duḥkhaṃ ca bhuktam /
saṃgaṃ dattātsajjanānāṃ sadā tvaṃ vinā ca tvaṃ durjanānāṃ ca saṃgāt

saṃgaiḥ sadā durjanānāṃ murāre gātraṃ dagdhaṃ na virāgeṇa yuktam /
etādṛśāhaṃ kāṃ gātiṃ vā mukunda yāsye na jāne dayayā māṃ ca pāhi

etādṛśo hyanutāpaḥ khagendra prāyaścittaṃ na ca kṣaurādikaṃ ca /
bhānoḥ kanyā hyanutāpaṃ ca kṛtvā vicārayāmāsa hareḥ sutattvam

sarvottamo harirekaḥ sadaiva yataḥ pūrṇaḥ sarvaguṇaistataśca /
sṛṣṭau yasmājjayate viśvajātamato hariḥ sarvaguṇaiśca pūrṇaḥ

yo devānāmādya akāra eva yato brahmādyā naiva pūrṇāḥ samastāḥ /
lakṣmīprasādāccirapuṇyena jāto yathāyogyaṃ pūrṇaguṇo viriñcaḥ

na lakṣmīvadguṇapūrṇo viriñco na viṣṇuvadguṇapūrṇā ramāpi /
na vāyuvadbhāratī cāpi pūrṇā na śeṣavadvāruṇī cāpi pūrṇā

na vai rudravatpārvatī pūrṇarūpā hyanyepyevaṃ naiva pūrṇāḥ sadaiva /
ālocanāmevameṣā hi kṛtvā tapaścakre yamunāyāśca tīre

tadācāhaṃ yamunāyāśca tīraṃ pārthena sākaṃ mṛgayāṃ gataḥ khaga /
dṛṣṭvā ca tāṃ tatra tapaścarantīṃ tadābruvaṃ matsakhāyaṃ ca pārtham

he pārtha śīghraṃ vraja kanyāsamīpaṃ tvaṃ pṛccha kasmādatra tapaḥ karoṣi /
evaṃ proktastatsamīpaṃ sa gatvā pṛṣṭvā caitatkāraṇaṃ śīghrameva

āgatya māmavadatphālgunoyaṃ sarvaṃ vṛttāṃntaṃ tvasau matsamīpe /
tatastvahaṃ sumuhūrte ca tasyāḥ pāṇigrahaṃ kṛtavāṃstatra samyak

tasyāśca tāpātsaṃtataṃ madvicārātprasannohaṃ satataṃ suprasannaḥ /
pūrṇānande ramamāṇāsya nityaṃ tayā ca me kiṃ sukhaṃsyātkhagendra

mayā vivāhonugrahārthaṃ hi tasyā aṅgīkṛto na tu saukhyāya vīndra /
tathā vakṣye lakṣmaṇāyāśca rūpaṃ pāṇigrāhe kāraṇaṃ cāpi vīndrā

śṛṇuṣva tattava vakṣyāmi gopyaṃ sacchiṣyake nāsti gopyaṃ gurośca