Garuda Purana · Chapter 3.20

iti śrīgāruḍe mahāpurāṇe uttarakhaṇḍe tṛtīyāṃśe brahmakāṇḍe nīlāvivāhanirṇayo nāmaikonaviṃśo 'dhyāyaḥ
śrīgaruḍamahāpurāṇam- 20
śrīkṛṣṇa uvāca /
yā pūrvasarge nalasaṃjñasya vīndra putrī bhūtvā viṣṇupatnī sakāmā /
pradakṣiṇaṃ bhramaṇaṃ vai cakāra guṇena bhadrā bhadrasaṃjñā babhūva

kanyābhāve saṃsthitāṃ bhadrasaṃjñāṃ pitā nalastvabravīttāṃ sa paśyan /
bhadre kimarthaṃ gātrapīḍāṃ karoṣi phalaṃ hi tannandini me vadasva

bhadrovāca /
śṛṇutvaṃ me tāta namaskriyādeḥ phalaṃ vaktuṃ kā samarthā bhavecca

tathāpyahaṃ tava vakṣyāmi tāta yathāśaktyā śṛṇu samyagghitāya /
sadā harimarma nātho dayālurahaṃ harestava dāsānudāsī /
māṃ pāhi viṣṇostava vande pade ityuktvā praṇāmaṃ cākaroddaṇḍarūpam

hareḥ praṇāmaṃ tviti kartavyaśūnyaṃ vyarthaṃ tamāhurjñāninastacchṛṇu tvam /
rameśa madhveśa sarasvatīśetyevaṃ vadanpraṇamedviṣṇudevam

yathā prasanno vandanāddevaddeva stathā na tuṣṭaḥ pūjanātkarmataśca /
yathā nāmasmaraṇādvandanādvā pāpānniyacchetu tathā na cānyaiḥ

dehaṃ tu ye poṣayantyeva tāta hareḥ praṇāmaiḥ śūnyabhūtaṃ ca puṣṭam /
tadevamāhurvyarthameveti tāta tatpoṣakāṇāṃ narake duḥ khamāhuḥ

yamo 'pi taṃ tatra ulūkhale tu nidhāya piṣṭaṃ sukhalaiḥ karoti /
yo vā paraṃ na karotyeva tāta pradakṣiṇaṃ devadevasya viṣṇoḥ

tasyaiva pādau talayantre nidhāya yamaśca nityaṃ prakaroti piṣṭam /
eṣāṃ jihvā harikṛṣṇeti nāma na vakti nityaṃ vyarthabhūtāṃ vadanti

teṣāṃ jihvā yamaloke yamastu niṣkāsya piṣṭaṃ prakaroti nityam /
kāśīnivāsena ca kiṃ prayojanaṃ kiṃ vā prayāge maraṇena tāta

kiṃ vāraṇāgre maraṇena saukhyaṃ kiṃ vā makhādeḥ samanuṣṭhitena /
samastatīrtheṣvaṭanena kiṃ kimadhītaśāstreṇa sutīkṣṇabuddhyā

yeṣāṃ jihvāgre harināmaiva nāsti yeṣāṃ gātrairnamanaṃ nāpi viṣṇoḥ /
yeṣāṃ padbhyāṃ nāsti hareḥ pradakṣiṇaṃ teṣāṃ sarvaṃ vyarthamāhurmahāntaḥ

haryarpaṇādrihitaṃ nāma kasmātpradakṣiṇaṃ namanaṃ cāhurarghyam /
ato viṣṇornamanaṃ kāryameva harernāmasmaraṇaṃ tāta kāryam

janma hyetaddurlabhaṃ naśvaraṃ tu yathā jalasthaṃ tattathaiva /
no visvāsaṃ kuru gātre tvadīye jīveṣvapi svaḥ paraśceti tāta

sadyaḥ kṛtaṃ namanaṃ na tvadīyaṃ sadyaḥ kṛtaṃ smaraṇaṃ na tvadīyam /
kadā prāpsye maraṇaṃ tanna jāne na viśvāsaṃ kuru gātre mahātman

etacchrutvā nalo vīndra putrīvākyaṃ sunirmalam /
namaskāraṃ ca kṛtavānyathāśaktyā pradakṣiṇam

sāpi pradakṣiṇaṃ cakre namaskāraṃ sadā hareḥ /
evaṃ bahudinaṃ kṛtvā dhyātvā nārāyaṇaṃ param

kalevaraṃ ca tatyāja maraṇe haricintayā /
matpiturvasudevasya bhaginyā udare khaga

kaikeyīti ca nāmnā sā tvabhavadbhadrasaṃjñakā /
yasmādbhadraguṇairyuktā bhadrā sā bhadranāmikā

tasyātmajaiśca kaikeyaiḥ pañcabhiḥ khagasattama /
pratyāhṛtāmimāṃ bhadrāṃ prāptavān khagasattama

vakṣyehaṃ mitravindāyāḥ pāṇigrahaṇakāraṇam /
sāvadhānamanā bhūtvā śṛṇu pakṣīndra sattama

mitravindovāca /
yānpūrvasargepyavṛṇonnikāmato hyagnīṣomānnāmikā mitravindā /
mitraṃ hariṃ prāptukāmā sadaika tatropāyaṃ cintayāmāsadevī

hariprāptau sādhanāḥ saṃti teṣu mukhyaṃ kaciccintayāmāsa devī /
teṣāṃ madhye śravaṇaṃ śreṣṭhamāhuḥ purāṇānāṃ sāttvikānāṃ sadāpi

viṣṇorutkarṣo vartate yatra vāyostathotkarṣaḥ sajjanānāṃ purāṇe /
śrāddhaṃ sadā viṣṇubuddhyā sadaiva nānyacchrāvyaṃ sādhanaṃ tatra caiva

yasmindine śravaṇaṃ nāsti viṣṇosteṣāṃ janma vyarthamāhuḥ kathāyām /
snāna japaḥ pañcayajñaṃ vrataṃ ca iṣṭāpūrte kṛcchracāndro ca dattam

sarvaṃ vyarthaṃ vaiṣṇavānāṃ ca dīkṣā kathāṃ vinā samyaganuṣṭhitāṃ vai /
yairna śrutaṃ bhāgavataṃ purāṇaṃ sasaṃpradāyairgurubhiḥ saṃyutaiśca

yairna śrutaṃ bhāgavataṃ purāṇaṃ yairna śrutaṃ brahmakāṇḍaṃ purāṇam /
teṣāṃ janma vyarthamāhurmamahāntastasmācchrāvyā harivārtā sadaiva

na yatra govindakathāmahānadī na yatra nārāyaṇapādasaṃśrayaḥ /
na yatra viṣṇoḥ satataṃ vacosti na saṃvasettatkṣaṇamātraṃ kathañcit

yasmin grāme bhāgavataṃ na śāstraṃ na vartate bhāgavatā rasajñāḥ /
yasmin gṛhe nāsti gītārthasāraḥ yasmin grāme nāma sahasrakaṃ vā

tayo rasajñā yatra na santi tatra na saṃvasetkṣaṇamātraṃ kathañcit /
yasmin dine divyakathā ca viṣṇorna vāsti jantostasya cāyurvṛthaiva

garbhe gate nātra vicāryamasti tanmanyate durlabhaṃ martyaloke /
karṇaṃ kalpairbhūṣitaṃ suṃdaraṃ ca na suṃdaraṃ cāhurāryā rasajñāḥ

viṣṇoḥ kathākhyābharaṇaiśca yuktaṃ tadeva karṇaṃ suṃdaraṃ cāhurāryāḥ /
tasmātsadā bhāgavatārthasāraṃ śṛṇvanti ye satataṃ vācayanti

teṣāṃ janma svasthamāhurmahānto mahatphalaṃ cāsti tathaiva teṣām /
soṣṇīṣakañcukayutāśca hareḥ kathāṃ vai śṛṇvanti yepi ca paṭhanti sadaiva martyāḥ

sarvepi te pūjanīyā hi loke na vai śiśre codare caiva saktāḥ /
ye dākṣiṇyādarthalobhādvadanti sadā purāṇaṃ bhagavattattvasāram

pracchādayante tattvagopyāni ye tu teṣāṃ gatiḥ sūryasūnuḥ sadaiva /
ye dharmakāṇḍe karmakāṇḍe sadaiva utpādayante suruciṃ tatra nityam

maulyena ye kathayeyuḥ purāṇaṃ teṣāṃ gatiḥ sūrya sunaḥ sadaiva /
maulyena ye bhāgavataṃ purāṇaṃ śṛṇvanti vai hariśāstrārthatattvam

maulyena vedādhyayanaṃ prakurvate teṣāṃ gatiḥ sūryasūnuḥ sadaiva /
yadṛcchayā prāptadhanena ye tu saṃtuṣṭāste hyatra yogyāḥ sadaiva

dhanārjane ye tvatitṛṣṇābhiyuktāsteṣāṃ na vai bhāgavatedhikāraḥ /
matvā loke harirevati nityamantaryāmī nāsti tadanya īśaḥ

evaṃ sadā ye pravicintayanti yogakṣemaṃ bibhṛyādviṣṇureṣām /
sadvaiṣṇavānāmaśubhaṃ nāsti nāsti pradṛśyate saṃśayajñānarūpāt

karmānusāreṇa harirdadāti phalaṃ śubhānāmaśubhasya caiva /
atastadarthaṃ naiva yatnaṃ ca kuryāddhanārthaṃ vai haritattve ca kuryāt

ataḥ snātvā divyamantraṃ japitvā visarjayitvā viṣṇunirmālyagandham /
śucirbhūtvā bhāgavataṃ purāṇaṃ saṃśrāvayetsarvavettāpi nityam

karmānusāreṇa dhanārjanaṃ ca vedārjanaṃ śāstrasamārjanaṃ ca /
bhaviṣyati śravaṇaṃ cāpi viṣṇoratyādarācchravaṇaṃ durghaṭaṃ ca

atyādarādbhāgavatasya sāramāsvādayeddurghaṭaṃ martyaloke /
āsvādya tadbhāgavataṃ purāṇamānandabāṣpairyuktatā durghaṭā ca

śrutvā tattvā nāṃ nirṇayaṃ dhāraṇaṃ ca sudurghaṭaṃ cāhurāryāḥ samastam /
śrutvā tattvānāṃ dhāraṇānantaraṃ ca kāmakrudhorjāraṇaṃ durghaṭaṃ ca

śrutvā tattvānāṃ dhāraṇānaṃ taraṃ ta tathā yoge durghaṭaṃ saṃgataṃ ca

śrutvā tattvānāṃ dhāraṇānantaraṃ ca kāmakrudhorjāraṇaṃ durghaṭaṃ ca /
ete doṣā jñānapūtānapīha kurvanti saṃdehayutānsadaiva

ato hyahaṃ śravaṇaṃ satkathāyāḥ sadā kariṣye nātra vicāryamasti /
tenāpyahaṃ harināmābhivāñchā niścitya cittaṃ śravaṇe vai cakāra /
ādehamevaṃ śravaṇaṃ ca kṛtvā tyaktvā dehaṃ bhūtale saṃprajātā

nivastuṃ vasudevasya bhaginyā udare khaga /
sumitrā saṃjñakāyāṃ ca jātā vai mitravindikā

śravaṇena hariṃ mitraṃ prāptā sā mitravindikā /
ataḥ sā mitravindeti saṃjñayā saṃbabhūva ha

svayaṃvare mitravindā rājñāṃ madhye tu bhāminī /
mamāṃse vyasṛjanmālāṃ tāṃ gṛhītvā khageśvara /
vidhūya nṛpatīnsarvānpurīṃ prāptāḥ khageśvara