Garuda Purana · Chapter 3.17

iti śrīgāruḍe mahāpurāṇe uttarakhaṇḍe tṛtīyāṃśe brahmakāṇḍe mahālakṣmyavatārādinirūpaṇaṃ nāma ṣoḍaśo 'dhyāyaḥ
śrīgaruḍamahāpurāṇam- 17
garuḍa uvāca /
caturjanmasu vai kṛṣṇa śacyādyaiḥ saha bhāratī /
ekadeha viśiṣṭaiva bhuvi jāteti coktavān

kāraṇaṃ brūhi me brahman śiṣyāya tava suvrata /
garuḍenaivamuktastamuvāca madhusūdanaḥ

śrīkṛṣṇa uvāca /
viśiṣṭadehasaṃ prāptau bhāratyāḥ pakṣisattama /
vakṣyāmi kāraṇaṃ vīndra sāvadhānamanāḥ śṛṇu

purā kṛtayuge vīndra rudrabhāryā ca pārvatī /
indrabhāryā śacī devī yama bhāryāca śāmalā

aśvibhāryā uṣā devī bhartṛbhiḥ sahitā khaga /
brahmalokaṃ yayustatra brahmāṇaṃ dadṛśustadā

hāvaṃ bhāvaṃ vilāsaṃ ca darśayāmāsurañjasā /
dṛṣṭvā tā uddhatā brahmā śaśāpa khagasattama

uddhatāśca yato yūyaṃ mānuṣīṃ yonimāpsyatha /
tatra svabhartṛsaṃyogamavāpsyatha khageśvara

evaṃ śaptāstu tāḥ sarvā ājagmurmeruparvatam /
tatropaviṣṭaṃ brahmāṇaṃ vañcayāmāsurañjasā

tūṣṇīmeva sthite vīndra vañcayantyaḥ sthitāḥ punaḥ /
tatastūṣṇīṃ sthitaṃ vīndra vañcayāmāsurañjasā

trivārānantaraṃ brahmā śaptavāṃstā mahāprabhuḥ /
trivāraṃ vañcanaṃ yasmādekavāraṃ ca darśanam

kiṃ cāśrutvātaḥ paścāccaturjanmasu bhūtale /
ekadehānmānuṣatvaṃ bhaviṣyati na saṃśayaḥ

dvitīye janmani tathā anyagātvamavāpsyatha /
tṛtīye janmani tathā bhartṛsaṃyoga māpsyatha

janmanyādye caturthe ca nānyagātvamavāpsyatha /
tathā svabhartṛsaṃyogaṃ nāvāpsyatha ca sarvaśaḥ

evaṃ śaptāstu tāḥ sarvā brahmaṇā pakṣisattama /
tadā vicārayāmāsurmilitvā merumūrdhani

brahmaśāpastvanirvāya upāyaiḥ śataśopi ca /
nīcaiḥ samāgamo nindyastathaiva ca vipattidaḥ

uttamena ca saṃgena daivenāpyarthado bhavet /
devānāmuttamo vāyustadarthaṃ saṃgamācaret

vicāryaivamumādyā bhāratyāḥ sevāṃ tu cakrire /
sahasravatsarānte sā bhāratī toṣitābravīt

matsevāṃ ca kimarthaṃ vai hyācariṣyanti suvratāḥ /
tasyāṃ raktāśca tā devyastvabruvansvacikīrṣitam

purā vayaṃ tu śaptāḥ sma brahmaṇā krodharūpiṇā /
ekadehānmānuṣatvamavāpsyatha varāṅganāḥ

caturthajanmanyapyevaṃ dvitīye janmani prabho /
samāpsyathānyagātvaṃ cetyevaṃ śaptā ha bhāmini

asmākaṃ vāyunā devenānyagātvaṃ na doṣabhāk /
atastvayaikadehatvamicchāmo devi janmasu

hatyuktā tābhiratha ca tathaityuktvā dvijottama /
sā pārvatyādibhiryuktā bhāratītyabhavadbhuvi

śivanāmno dvijasyaiva gṛhe sā tu kumārikā /
karmaikyārthaṃ tapaścakreḥ viṣṇośca śivasaṃjñinaḥ

tapasā toṣitā viṣṇuḥ śiva saṃjño mahāprabhuḥ /
varaṃ prādāttṛtīyesminkṛṣṇajanmani bho striyaḥ

samyaktvabhartṛsaṃyogo bhaviṣyati vinā bhavam /
yatonayā ca pārvatyā preritā eva sarvaśaḥ

vilāsaṃ darśayāmāsa brahmaṇaḥ parameṣṭhinaḥ /
ataḥ sā pārvātī śreṣṭhā brahmadehe na saṃśayaḥ

kṛṣṇadehepi tasyāstu na bhaviṣyati saṃgamaḥ /
anyagātvaṃ dvitīyesminbhaviṣyati na saṃśayaḥ

rudrāntaḥ stho hariścaiva vahaṃ dattvā striyāṃ prabhuḥ /
antardhānaṃ yayau śrīmānsvalokaṃ gatavānabhūt

visṛjya tāśca taṃ dehaṃ babhūvurnalakanyakāḥ /
indraseneti saṃjñāṃ ca labdhvā tāśca tapovanam

yayustatra carantyastā dadṛśurmudgalaṃ tvṛṣim /
tasya darśanamātreṇa babhūvuḥ kāmamohitāḥ

mudgalasyābhimānaṃ hi nāśayitvā ca mārutaḥ /
ramayāmāsa tatrasthā bhāratyādivarāṅganāḥ

taddehena visṛṣṭā sā babhūva draupadīti ca /
yasmātsā drupadājjātā tasmātsā draupadī smṛtā

vedimadhyātsamudbhūtā tasmātsāyonijā smṛtā /
kṛṣṇavarṇā yatastasmātsā kṛṣṇā bhūtale smṛtā

kṛṣṇādehapi bhāratyā abhimānaḥ sadā smṛtaḥ /
śacyāderabhimānastu tasmindehe kadācana

yasyāḥ svabhartṛsaṃyogakāle ca khagasattama /
abhimānastadaiva syāttasyā eva na cānyathā

etāsāṃ ramaṇe kāle umāyāḥ pakṣisattama /
abhimānaśca nāstyeva svāpa eva ratāḥ sadā

pārthasya ramaṇe kāle draupadyāśca kalevare /
bhāratyāśca tathā śacyā abhimānadvayaṃ smṛtam

umādeḥ śyāma lādeśca abhimānakṣatistadā /
sarvāsāṃ svāpa eva syānnātra kāryā vicāraṇā

arjunaṃ vīrarūpeṇa praviṣṭo vāyureva ca /
bhāratīṃ ramate nityaṃ śāmalāṃ ca yudhiṣṭhiraḥ

suṃdareṇa ca rūpeṇa praviṣṭo nakule marut /
ramate bhāratīṃ nityaṃ nakulaścāpyuṣāṃ khaga

nītirūpeṇa cāviṣṭo sahadeve ca mārutaḥ /
draupadīṃ ramate nityaṃ sahadevotpayuṣāṃ khaga

śacyādyā draupadīdehe nāpuḥ saṃgaṃ ca mārutaḥ /
tāsāmatonyagāmitvaṃ kṛṣṇādehe na cintayet

dharmādidehasaṃgaṃ ca bhāratyā naiva cintayet /
manujasya ca dehasya tāsāṃ saṃgaṃ cintayet

aparokṣavatīnāṃ tu tāsāṃ lepo na sarvathā /
athavā mudgalasyeva ratikāle khageśvara

ramaṇaṃ cakrurevaṃ tā ato doṣo na vidyate /
ekasmindivase vīndra dharmo vāyuśca tāvubhau

ramaṇaṃ cakratuḥ samyakkṛṣṇādehe 'pi mānada /
tathāpyananyāgāmitvaṃ cintanīyaṃ na saṃśayaḥ

surāṇāṃ surabhogyāśca bhogaṃ jānanti devatāḥ /
na jānantyeva martyāṃstu teṣu deheṣu te punaḥ

nīrakṣīravivikaṃ ca haṃso vetti na cāparaḥ /
ataḥ svabhartṛsaṃyogaṃ kṛṣṇādehena cintayet kṛṣṇādehenyagāmitvaṃ naiva cintyaṃ khageśvara