Garuda Purana · Chapter 3.10

iti śrīgāruḍe mahāpurāṇe tṛtī- utta- brahmakāṇḍe devakṛtaviṣṇustutidevatātāratamyanirūpaṇaṃ nāma navamo 'dhyāyaḥ
śrīgaruḍamahāpurāṇam- 10
garuḍa uvāca /
devairevaṃ stuto viṣṇurbhagavānsāttvatāṃ patiḥ /
kīdṛśaṃ hyāśrayaṃ dattvaiṣāṃ viveśa mahāprabhuḥ

etadveditumicchāmi kṛṣṇakṛṣṇa mahāprabho /
samyag brūhi dayālo tvaṃ yadi macchrotramarhati

śrīkṛṣṇa uvāca /
teṣu tattveṣu bhagavānsa viveśa mahāprabhuḥ /
kṣobhayāmāsa bhagavān saṃbandhavidhuro hariḥ

adau sasarja bhagavān brahmāṇḍaṃ kana kātmakam /
pañcāśatkoṭivistīrṇaṃ yojanānāṃ samantataḥ

tadūrdhvamaṇvavayavastāvānkanakarūpakaḥ /
vartate tata ūrdhvaṃ tu pañcāśatkoṭibhūtalam

evaṃ koṭiśataṃ tasyāvayavaḥ parikīrtitaḥ /
tataśca saptāvaraṇaiḥ samatātparidhīkṛtam

kabandhāvaraṇaṃ hyādyaṃ koṭyā daśasahasrakam /
dvitīyā varaṇaṃ jñeyaṃ pāvakasya mahātmanaḥ

apāṃ daśaguṇairyuktaṃ samantātparidhī (khī) kṛtam /
tṛtīyāvaraṇaṃ jñeyaṃ harasyaiva mahātmanaḥ

daśādhikaṃ pāvakācca samantātparivāritam /
caturthāvaraṇaṃ jñeyaṃ nabhasopi mahāprabho

harāddaśaguṇairevaṃ samantātparivāritam /
pañcamāvaraṇaṃ jñeyamahaṅkārākhyamevaca

vyomno daśaguṇairevaṃ samantātparivāri tam /
ṣaṣṭhamāvaraṇaṃ proktaṃ mahattattvaṃ khageśvara

ahaṅkārāddaśaguṇaṃ samantātparivāritam /
saptamāvaraṇaṃ proktaṃ triguṇāvaraṇaṃ prabho

mahattattvāddaśaguṇairadhikaṃ parikīrtitam /
mahattattvānantaraṃ ca tamo hyāvaraṇaṃ smṛtam

mahattattvātpañcaguṇairadhikaṃ parikīrtitam /
tasmācca dviguṇaṃ jñeyaṃrajo hyāvaraṇaṃ smṛtam

tataśca dviguṇaṃ jñeyaṃ sattvāvaraṇamuttamam /
trayaścaivaṃ militvā tu ekāvaraṇamīritam

avyākṛtākhyamākāśaṃ tadanantaramīritam /
maryādārahitaścaivaṃ tatrāste hariravyayaḥ

aṣṭamāvaraṇaṃ vyomnoraṃ tarā virajā nadī /
pañcayojanavistīrṇā samantātparīdhīkṛtā

asti puṇyatamā jñeyā lokasaṃsāranāśinī /
evaṃ caturmukhenaiva tadā hṛṣyaṃ ti cāṇḍaja

te sarve virajānadyāṃ samyak snātvā visarjya ca /
liṅgadehaṃ tataḥ paścānmokṣaṃ vindanti te hareḥ

aparokṣadṛśāmevaṃ brahmaṇā saha gāminām /
virajātaraṇaṃ viddhi nānyeṣāṃ vinatāsuta

aparokṣadṛśāṃ brahmanvyāsādīnāṃ khageśvara /
virajātaraṇaṃ nāsti bhoktavyatvācca karmaṇaḥ

viriñcenaiva sākaṃ tu kalpesminnadhikāriṇām /
teṣāṃ tu niyamenaiva sarvaprārabdhasaṃkṣayaḥ

bhavatyevaṃ na saṃdeho nānyeṣāṃ sarvasaṃkṣayaḥ /
atastu virajātaraṇaṃ teṣāmeva bhavetpaṭo

virajātaraṇaṃ nāsti teṣāṃ ta (tayosta)tsaṃgināṃ tathā /
sarvārabdhakṣayo nāsti yatasteṣāṃ khagādhipa

ataśca sarvathā nāsti virajātaraṇaṃ prabho /
pralaye virajānadyā layo nāsti khageśvara

lakṣmyātmikā tu sā jñeyā liṅgadehavidāriṇī /
brahmatvayogyā ṛjavo nāma devāḥ prakīrtitāḥ

tepi pratyekaśaḥ saṃti hyanantāśca pṛthaggaṇāḥ /
pṛthakpṛthak ca taiḥ sākaṃ mokṣayogyāḥ khageśvara

jīvāḥ saṃti hyaneke ca pratikalpe sṛjanti te /
dvātriṃśallakṣaṇaiḥ samyagyuktā vāyutvayogyakāḥ
(10.28)
aṣṭāviṃśallakṣaṇaiśca girīśapadayoginaḥ /
caturviṃśatimārabhyāṣoḍaśācca surāḥ smṛtāḥ

aṣṭakā ṛṣayaḥ proktāstadūnāścakravartinaḥ /
śatajanma samārabhya brahmaṇaḥ parameṣṭhinaḥ

aparokṣamiti proktaṃ tathā hyārabdhasaṃkṣayaḥ /
ekena śatakalpena vāyutvaṃ yāti bho dvija

śatajanmani brahmatvaṃ yāti paścāddhareḥ padam /
catvāriṃśadbrahmakalpaṃ samārabhya khageśvara

rudrasyāpyāparokṣyaṃ syāttathā prārabdhasaṃkṣayaḥ /
ekacatvāriṃśakalpe śeṣatvaṃ yāti suvrata

brahmaṇā saha mokṣaṃ ca yāti samyaṅ na cānyathā /
kalpaviṃśatimārabhya brahmaṇaḥ parameṣṭhinaḥ

indrasyāpyāparokṣyaṃ syāttathā prārabdhasaṃkṣayaḥ /
brahmaṇaiva sahāyāti hariṃ nārāyaṇaṃ param

garuḍa uvāca /
pañcāśītibrahmakalpaṃ samārabhya mahāprabho /
rudrasyāpyāparokṣyaṃ syāttathā prārabdhasaṃkṣayaḥ

iti śrutaṃ mayā brahmanbrahmaṇoktaṃ hareḥ priyāt /
itthaṃ tvayoktaṃ śrīkṛṣṇa saṃśayobādhate mama

ato me saṃśayaṃ chindhi yathā na syāttathā punaḥ /
iti tadvacanaṃ śrutvā kṛṣṇo vacanamabravīt

śrīkṛṣṇa uvāca /
brahmoktasya mayoktasya vivādo nāsti sarvathā /
saṃdehastvajñadṛṣṭīnāṃ jñānināṃ nāsti sarvathā

aśītihyaṣṭakā proktā aṣṭapañca khageśvara /
catvāriṃśadbrahmakalpa evaṃ prāha caturmukhaḥ

tattvānāṃ bahugopyatvāttathoktaṃ brahmaṇā purā /
abhiprāyastvevameva jñātavyo nātra saṃśayaḥ

pañcā śītibrahmakalpaṃ ye vijānanti bho dvija /
tendhaṃ tamaḥ praviśanti satyaṃsatyaṃ mayoditam

virajānantaraṃ vipraṃ tathā vyākṛtamaṃbaram /
anantapāraṃ tadapi lakṣmīstasyābhimāninī

saṃkhyānugaṇanaṃ nāma yasya nāsti mahāprabho /
na dānaṃ jātiproktaṃ sarvadā nāsti saṃśayaḥ

aṇḍābhimānī brahmā tu virāḍākhyo hyabhūttadā /
evaṃ mataṃ sa nirmāya bhagavānharikhyayaḥ

viśeṣāttatra garuḍa devaistattvābhimānibhiḥ /
adhaścordhvaṃ tadākramya haristiṣṭhati sarvadā

evaṃ prākṛtasargoktirvaikṛtaṃ śṛṇu pakṣirāṭ

garuḍa uvāca /
sṛṣṭiruktā tvayā pūrvaṃ śrutā samyaṅ mayā hare

kiṃ nāma prākṛtaṃ jñeyaṃ tathā kiṃ vaikṛtaṃ prabho /
etadvistīrya me brūhi śrotuṃ kautūhalaṃ hi me

śrīkṛṣṇa uvāca /
avyaktādyāḥ pṛthivyantā aṇḍācca bahirudbhavāḥ /
te sarve prākṛtāḥ proktāsteṣāṃ jñānādvimacyate

brahmāḍaṃ vikṛtaṃ jñeyaṃ brahmāṇḍāntaḥ khageśvara /
yā sṛṣṭirucyate sadbhiḥ saivoktā vikṛteti ca

sṛṣṭiśca pralayaścaiva saṃsāro bhaktireva ca /
devatā ṛṣimukhyāśca lokā bhūrādayastathā

anādyanantakālīnāḥ sarvadaikaprakārakāḥ /
jagatpravāhaḥ satyo 'yaṃ naiva mithyā kathañcana

yattvetadanyathā brūyuḥ sarvahantāra eva te /
jagatpravāhaḥ satyo 'yaṃ harisevetisāthā

satyaṃ satyaṃ punaḥ satyamuddhatya bhujamutyate /
vedācchāstraṃ paraṃ nāsti na devaḥ keśavātparaḥ

sarvotkṛṣṭaṃ keśavaṃ ca vihāyānyamupāsate /
teṣāmandhaṃ tamo jñeyaṃ pitṝṇāṃ garuṇāmapi

idānīṃ śṛṇu pakṣīndra vaikṛtaṃ sargamuttamam /
samyagjānāti yo loke sa yāti paramaṃ padam