Garuda Purana · Chapter 2.8

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe śrīkṛṣṇagaruḍasaṃvāde pretakalpe pañcapretopākhyānaṃ nāma saptamo 'dyāyaḥ
śrīgaruḍamahāpurāṇam- 8
garuḍa uvāca /
svāminkasyādhikāro 'tra sarva evaurdhvadehike /
kriyāḥ katividhāḥ proktā vadaitatsarvameva me

śrīkṛṣṇa uvāca /
putraḥ pautraḥ prapautro vā tadbhrātā bhrātṛsantatiḥ /
sapiṇḍasantatirvāpi kriyārhāḥ khaga jñātayaḥ

teṣāmabhāve sarveṣāṃ samānodakasantatiḥ /
kuladvaye 'pi cocchinne strībhiḥ kāryāḥ kriyāḥ khaga

icchayocchinnabandhaśca kārayedavanīpatiḥ /
pūrvāḥ kriyā madhyamāśca tathā caivottarāḥ kriyāḥ

pratisaṃvatsaraṃ pakṣinnekoddiṣṭavidhānataḥ /
śrāddhaṃ tatra prakartavyaṃ phalaṃ tasya śṛṇuṣva me

brahmendrarudranāsatyasūryāgnivasumārutān /
viśvedevānpitṛ gaṇānvayāṃsi manujānpaśūn

sarīsṛpānmātṛgaṇānyaccānyadbhūtasaṃjñitam /
śrāddhaṃ śraddhānvitaḥ kurvanprīṇayatyakhilaṃ jagat

te tṛptāstarpayantyenaṃ putradāradhanaistathā /
adhikāraḥ kriyābhedaḥ samāsātte nirūpitaḥ

garuḍa uvāca /
ukteṣveko 'pi cenna syādadhikārī surottama /
kartavyaṃ kiṃ tadā viṣṇo puruṣeṇa vijānatā

śrīkṛṣṇa uvāca /
adhikāro yadā nāsti yadi nāsti ca niścayaḥ /
jīvite sati jīvāya dadyācchrāddhaṃsvayaṃ naraḥ

kṛtopavāsaḥ susnātaḥ kṛṣṇāsaṅgaḥ samāhitaḥ /
kartāramatha bhoktāraṃ viṣṇuṃ sarveśvaraṃ yajet

sadakṣiṇāśca satilāstistraśca jaladhenavaḥ /
nivedayetpitṛbhyaśca svadheti susamāhitaḥ

agnaye kavyavāhanāya svadhā nama iti smaran /
somāyatvā pitṛmate svadhā nama iti smaran

dakṣiṇena tu dadyācca tṛtīyāṃ dakṣiṇāyutām /
yamāyāṅgirase cātha svadhā nama iti smaran

tayormadhye tu niḥ kṣipya viprānsaṃmantrya bho jayet /
prathamāmuttare nyasya dvitīyāṃ dakṣiṇe nyaset

madhye tṛtīyāṃ vinyasya paścādāvāhanādikam /
āvāhanādinā pūrvaṃ viśvedevānprapūjyaca

vasubhyastvāmahaṃ vipra rudrebhyastvāmahaṃ tataḥ /
sūryebhyastvāmahaṃ vipra bhojayāmīti tānvadet

āvāhanādikaṃ śeṣaṃ kuryācca pitṛśeṣavat /
sāmyāṃ dhenuṃ tato dadyādvasūddeśaṃ dvijāya tu

āgneyyāṃ cātha raudrāya yāmyāṃ sūryadvijāya tu /
viśvebhyaścātha devebhyastilapātraṃ nivedayet

svastītyeva tathākṣayyaṃ jalaṃ dattvātha tāndvijān /
visarjayetsmaranviṣṇuṃ devamaṣṭākṣaraṃ vibhum

tataḥ kāmaṃ kuleśānīṃ śivaṃ nārāyaṇaṃ smaret /
caturdaśyāṃ tato gacchedyathāprāptāṃ saridvarām

vastrāṇi lohakhaṇḍāni jitaṃ ta iti saṃjapan /
dakṣiṇābhimukho vahniṃ jvālayettatra ca svayam

pañcāśatā kuśairbrāhmīṃ kṛtvā pratikṛtiṃ dahet /
hutvā śmāśānikaṃ homaṃ pūrṇāhutyantameva hi

niragrimatha vā bhūmiṃ yamaṃ rudrañca saṃsmaret /
hutvā prādhānike sthāne paścādāvāhayecca tam

śrapayeccāparaṃ vahnau mudgamiśraṃ caruṃ tataḥ /
tilataṇḍulamiśrañca dvitīyaṃ sapavitrakam

oṃ pṛthivyai namastubhyamiti caikaṃ nivedayet /
oṃ yamāya namaśceti dvitīyaṃ tadanantaram

oṃ namaścātha rudrāya śmāśānapataye namaḥ /
tato dīpte samiddhe 'gnau bhūmau prakṛtidāruṇe

saptabhyo yamasaṃjñebhyo dadyātsapta jalāñjalīn /
yamāya dharmarājāya mṛtyave cāntakāya ca

vaivasvatāya kālāya sarvaprāṇaharāya ca /
svadhākāranamaskārapraṇavaiḥ saha saptadhā

amukāmukagautraitattubhyamastu tilodakam /
pradadyāddaśa piṇḍāṃstu arghapuṣpasamanvitān

dhūpo dīpo balirgandhaḥ sarveṣāmastu cākṣayaḥ /
daśa piṇḍāṃstu dāndattvā viṣṇoḥ saumyaṃ mukhaṃ smaret

kuryācca māsikaṃ māsi sapiṇḍīkaraṇaṃ tataḥ /
āśaucānte tataḥ kuryādātmano vā marasya tu

kuryādasthiratāṃ jñātvā śaktyārogyadhanāyuṣam /
etatte sarvamākhyātaṃ jīvacchrāddhaṃ mayā khaga