Garuda Purana · Chapter 2.5

iti śrīgāruḍe mahāpurāṇe uttarakhaṇḍe pretakalpe śrīkṛṣṇagaruḍasaṃvāde dahanavidhikṛcchralakṣaṇadagdhāgamanarajasvalāmaraṇavidhipañcakamaraṇaprāyaścittanirūpaṇaṃ nāma caturtho 'dhyāyaḥ
śrīgaruḍamahāpurāṇam- 5
śrīkṛṣṇa uvāca /
evaṃ dagdhvā naraṃ pretaṃ snātvā kṛtvā tilodakam /
agrataḥ strījano gacchedvrajeyuḥ pṛṣṭhato narāḥ

prāśayennimbapatrāṇi rudanto nāmapūrvakam /
vidhātavyaṃ cācamanaṃ pāṣāṇopari saṃsthite

te praviśya gṛhaṃ sarve sutādyāśca sapiṇḍakāḥ /
bhaveyurdaśarātraṃ vai yata āśaucakaṃ khaga

krītalabdhāśanāḥ sarve svapeyuste pṛthakpṛthak /
akṣāralavaṇānnāḥ syurnimajjeyuśca te tryaham

amāṃsabhojanāścādhaḥ śayīranbrahmacāriṇaḥ /
parasparaṃ na saṃspṛṣṭā dānādhyayanavarjitāḥ

malināścādhomukhāśca dīnā bhogavivarjitāḥ /
aṅgasaṃvāhanaṃ keśamārjanaṃ varjayanti te

mṛnmaye patraje vāpi bhuñjīraṃste ca bhājane /
uvāsantu te kuryurekāhamatha vā tryaham

garuḍa uvāca /
āśaucina iti proktamāśaucasya ca vai prabho /
lakṣaṇaṃ kiṃ kiyatkālaṃ bhāvyaṃ vā tadyutairnaraiḥ

śṛkṛṣṇa uvāca /
apanodyantvidaṃ kālādibhirāśu niṣedhakṛt /
piṇḍādhyayanadānādeḥ puṅgato 'tiśayo hi tat

daśāhaṃ śāvamāśaucaṃ sapiṇḍeṣu vidhīyate /
janane 'pyevameva syānnipuṇaṃ śuddhimicchatām

janmanyekodakānāntutrirātrācchuddhiriṣyate /
śāvasya śeṣācchudhyanti tryahādudakadāyinaḥ

ādantajananatsadya ā caulānnaiśikī smṛtā /
trirātramā vratādeśāddaśarātramataḥ param

āśaucaṃ te samākhyātaṃ saṃkṣepātprakṛtaṃ bruve /
jalaṃ tridivamākāśe sthāpyaṃ kṣīrañca mṛnmaye

atra snāhi pibātreti mantreṇānena kāśyapa /
kāṣṭhatraye guṇairbaddhe prītyai rātrau catuṣpathe

prathame 'hni tṛtīye vā saptame navame tathā /
asthisaṃcayanaṃ kāryaṃ dine tadgotrajaiḥ saha

tadūrdhvamaṅgasaṃsparśaḥ sapiṇḍānāṃ vidhīyate /
yogyāḥ sarvakriyāṇāṃ ca samānasalilāstathā

pretapiṇḍaṃ bahirdadyāddarbhamātravivarjitam /
prāgudīcyāṃ caruṃ kṛtvā snātvā prayatamānasaḥ

bhūmāvasaṃskṛtānāṃ ca saṃskṛtānāṃ kuśeṣu ca /
navabhirdivasaiḥ piṇḍānnava dadyātsamāhitaḥ

daśamaṃ piṇḍamutsṛjya rātriśeṣe śucirbhavet /
asagotraḥ sagotro vā yadi strī yati vā pumān

prathame 'hani yo dadyātsa daśāhaṃ samāpayet /
śālinā saktubhirvāpi śākairvāpyatha nirvapet

prathame 'hani yaddravyaṃ tadeva syāddaśāhikam /
yāvadāśaucamekaikasyāñjalerdānamucyate

yadvā yasmindine dānaṃ tasmiṃstaddinasaṃkhyayā /
daśāhe 'ñjalayaḥ pakṣinpañcāśadantime

dvivṛddhyā vā bhavetpakṣinnañjalīnāṃ śataṃ punaḥ /
yadāhi tryahamāśaucaṃ tadā vāñjalayo daśa

trayo 'ñjalaya evaṃ tu prathame 'hanivai tadā /
catvārastu dvitīye 'hni tṛtīye syustrayastathā

śatāñjali yadā pakṣinnādye triṃśattadāhani /
catvāriṃśaddvitīye 'hni triṃśadahni tṛtīyake

evaṃ jalasyāñjalayo vibhājyāḥ pakṣayordvayoḥ /
sarveṣu pitṛkāryeṣu putro mukyo 'dhikāravān

piṇḍaprasekastūṣṇīñca puṣpadhūpādikaṃ tathā /
daśame 'hani samprāpte snānaṃ grāmādvahiścaret

tatra tyājyāni vāsāṃsi keśaśmaśrunakhāni ca /
vipraḥ śudhyatyapaḥ spṛṣṭvā kṣattriyo vāhanaṃ tathā

vaiśyaḥ pratodaṃ raśmīnvā śūdro yaṣṭiṃ kṛtakriyaḥ /
mṛtādalpavayobhiśca sapiṇḍaiḥ parivāpanam

kāryantu ṣoḍaśī ṣaḍbhiḥ piṇḍairdaśabhiraiva ca /
prathamā malinā hyetairādaśāhaṃ mṛterbhavet

dināni daśa yānṣiṇḍānkurvantyatra sutādayaḥ /
pratyahaṃ te vibhajyante caturbhāgaiḥ khagottama

bhāgadvayena dehaḥ syāttṛtīyena yamānugāḥ /
tṛpyanti hi caturthena svayamapyupajīvati

ahorātraistu navabhirdeho niṣpattimāpnuyāt /
śirastvādyena piṇḍena pretasya kriyate tathā

dvitīyena tu karṇākṣināsikaṃ tu samāsataḥ /
galāṃsabhujavakṣaśca tṛtīyena tathā kramāt

caturthena ca piṇḍena nābhiliṅgagudaṃ tathā /
jānujaṅghaṃ tathā pādau pañcamena tu sarvadā

sarvamarmāṇi ṣaṣṭhena saptamena tu nāḍayaḥ /
dantalomānyaṣṭamena vīryantu navamena ca

daśamena tu pūrṇatvaṃ tṛptatā kṣudviparyayaḥ /
madhyamāṃ ṣoḍaśīṃ vacmi vainateya śṛṇuṣva me

viṣṇavādiviṣṇuparyantānyekādaśa tathā khaga /
śrāddhāni pañca devānāmityeṣāṃ madhyaṣīḍaśī

nimittaṃ durmatiṃ kṛtvā yadi nārāyaṇo baliḥ /
ekādaśāhe kartavyo vṛṣotsargo 'pi tatra vai

ekādaśāhe pretasya yasyātsṛjyeta no vṛṣaḥ /
pretatvaṃ susthiraṃ tasya dattaiḥ śrāddhaśatairapi

akṛtvā yadvṛṣotsargaṃ kṛtaṃ vai piṇḍapātanam /
niṣphalaṃ sakalaṃ vidyātpramītāya na tadbhavet

vṛṣotsargādṛte nānyatkiñcidasti mahītale /
putraḥ patnyatha dauhitraḥ pitā vā duhitātha vā

mṛtādanantaraṃ tasya dhruvaṃ kāryo vṛṣotsavaḥ /
caturvatsatarīyukto yasyotsṛjyeta vā vṛṣaḥ

alaṅkṛto vidhānena pretatvaṃ tasya no bhavet /
ekādaśe 'hni samprāpte vṛṣālābho bhavedyadi

darbhaiḥ piṣṭaistu sampādya taṃ vṛṣaṃ mocayedvudhaḥ /
vṛṣotsarjanavelāyāṃ vṛṣābhāva (lābha) kathañcana

mṛttikābhistu darbhairvā vṛṣaṃ kṛtvā vimocayet /
yadiṣṭaṃ jīvatastasya dadyādekādaśe 'hani

mṛtamuddiśya dātavyaṃ śayyādhenvādikaṃ tathā /
viprānbahūn bhojayīta pretasya kṣudviśāntaye

tṛtīyāṃ ṣoḍaśīṃ vacmi vainateya śṛṇuṣva tām /
dvādaśa pratimāsyāni ādyaṃ ṣāṇmāsikaṃ tathā

sapiṇḍīkaraṇaṃ caiva tṛtīyā ṣoḍaśī matā /
dvādaśāhe tripakṣe ca ṣaṇmāse māsike 'bdike

tṛtīyāṃ ṣoḍaśīmenāṃ vadanti matabhedataḥ /
yasyaitā ni na dattāni pretaśrāddhāni ṣoḍaśa

piśācatvaṃ sthiraṃ tasya dattaiḥ śrāddhaśatairapi /
ekādaśe dvādaśe vā dine ādyaṃ prakīrtitam

māsādau pratimāsañca śuddhaṃ mṛtatithau khaga /
ekenāhnā tribhirvāpi hīneṣu vinatāsuta

māsaṣaṇmāsavarṣeṣu tripakṣeṣu bhavanti hi /
śrāddhānyathasyātsāpiṇḍyaṃ pūrṇe varṣe tadardhake

tripakṣe 'bhyudaye vāpi dvādaśāhe 'tha vā nṛṇām /
ānantyātkuladharmāṇāṃ puṃsāñcaivāyuṣaḥ kṣayāt

asthiratvāccharīrasya dvādaśāhe praśasyate /
sapiṇḍīkaraṇeṣvevaṃ vidhiṃ pakṣīndra me śṛṇu

ekoddiṣṭavidhānena kāryaṃ tadapi kāśyapa /
tilagandhodakairyuktaṃ kuryātpātracatuṣṭayam

pātraṃ pretasya tatraikaṃ pitryaṃ pātratrayaṃ tathā /
secayetpitṛpātreṣu pretapātraṃ khaga triṣu

caturo nirvapetpiṇḍānpūrvanteṣu samāpayet /
tataḥ prabhṛti vai pretaḥ pitṛsāmānyamaśnute

tataḥ pitṛtvamāpanne tasminprete khageśvara /
śrāddhadharmairaśeṣaistu tatpūrvānarcayetpitṝn

ekacityārohaṇe ca ekāhni maraṇe tathā /
sāpiṇḍyantu striyā nāsti mṛte bhartuḥ striyo bhavet

pākaikyamatha kālaikyaṃ kartraikyañca bhavetkhaga /
śrāddhādau saha dāhe ca patipatnyorna saṃśayaḥ

bharturmṛtatitheranyatithau citimathāruhet /
tāṃmṛtāhani tu samprāpte pṛthak piṇḍena yojayet

pratyabdañca yugapattu samāpayet

yasya saṃvatsarādarvāk sapiṇḍīkaraṇaṃ bhavet /
māsikañcodakumbhañca deyaṃ tasyāpi vatsaram

navaśrāddhaṃ sapiṇḍatvaṃ śrāddhānyapi ca ṣoḍaśa /
ekenaiva tu kāryāṇi saṃvibhaktadhaneṣvapi

pitāmahībhiḥ sāpiṇḍyaṃ tathā mātāmahaiḥ saha /
uktaṃ bhartrāpi sāpiṇḍyaṃ striyā veṣayabhedataḥ

navaśrāddhasya te kālaṃ vakṣyāmi śṛṇu kāśyapa /
maraṇāhni mṛtisthāne śrāddhaṃ pakṣinprakalpayet

dvitīyañca tato mārge viśrāmo yatra kāritaḥ /
tataḥ sañcayanasthāne tṛtīyaṃ śrāddhamucyate

pañcame saptame tadvadaṣṭame navame tathā /
daśamaikādaśe caiva nava śrāddhāni vai khaga

śrāddhāni nava caitāni tṛtīyā ṣoḍaśī smṛtā /
ekoddiṣṭavidhānena kāryāṇi manujaistathā

prathame 'hni tṛtīye vā pañcame saptame tathā /
navamaikādaśe caiva navaśrāddhaṃ prakīrtitam

ucyante ṣaḍimānīha nava syurapi yāgetaḥ /
uktāni te mayā tāni ṛṣīṇāṃ matabhedataḥ

rūḍhipakṣo mamābhīṣṭo yogaḥ kaiścidiheṣyate /
ādye dvitīye dātavyastathaivaikaṃ pavitrakam

pretāya piṇḍo dātavyo bhuktavatsu dvijātiṣu /
praśrastatrābhiraṇyeti yajamānadvijanmanā

akṣayyamamukasyeti vaktavyaṃ viratau tathā /
ekoddiṣṭaṃ me nibodha cetthamāvatsaraṃ smṛtam

sapiṇḍīkaraṇādūrdhvaṃ yāni śrāddhāni ṣoḍaśa /
ekoddiṣṭavidhānena caredvā pārvaṇādṛte

pratyabdaṃ yo yathā kuryāttathā kuryātsa tānyapi /
ekādaśe dvādaśe 'hni preto bhuṅkte dinadvayam

yoṣitaḥ puruṣasyāpi piṇḍaṃ preteti nirvapet /
sāpiṇḍye tu kṛte tasya pretaśabdo nivartate

dīpadānaṃ prakartavyamāvarṣantu gṛhādbahiḥ /
annaṃ dīpo jalaṃ vastramanyadvādīyate ca yat

tṛptidaṃ pretaśabdena sapiṇḍīkaraṇāvadhi /
abdakṛtyaṃ mayoktante samāsādvinatāsuta

vaivasvatagṛhe yānaṃ yathā tattu nibodhameḥ /
trayodaśe 'hni śravaṇākarmaṇonantarantu saḥ

tvaggṛhītāhivattārkṣya gṛhīto yamakiṅkaraiḥ /
tasminmārge vrajatyeko gṛhīta iva markaṭaḥ

vāyvagrasārivadrūpaṃ dehamanyatprapadyate /
tatpiṇḍajaṃ pātanārthamanyattu pitṛsambhavam

tatpramāṇavayo 'vasthāsaṃsthānāṃ pragbhavo yathā /
ṣaḍaśīti sahasrāṇi yojanānāṃ pramāṇataḥ

adhvāntarāliko jñeyo yamamānuṣalokayoḥ /
sādhikārdhakrośayutaṃ yojanānāṃ śatadvayam

catvāriṃ śattathā sapta pratyahaṃ yāti tatra saḥ /
aṣṭācatvāriṃśatā ca traiṃśatā divasairiti

vaivasvatapuraṃ yāti kṛṣyamāṇo yamānugaiḥ /
evaṃ krameṇa yātabye mārge pāparataistu yat

jāyate saprapañcaṃ tacchṛṇu tvamaruṇānuja /
trayodaśadine dattaḥ pāśairbaddhvātidāruṇaiḥ

yamasyāṅkuśahasto vai bhṛkuṭīkuṭilānanaḥ /
daṇḍaprahārasambhrāntaḥ kṛṣyate dakṣiṇāṃ diśam

kuśakaṇṭakavalmīkaśaṅkupāṣāṇakarkaśe /
tathā pradīptajvalane kvacicchvabhraśatotkaṭe

pradīptādityatapte ca dahyamānaḥ sadaṃśake /
kṛṣyate yamadūtaiśca śivāvannādabhīṣaṇaiḥ

prayātiḥ dāruṇe mārge pāpakarmā yamālaye /
kalevare dahyamāne mahāntaṃ kṣayamṛcchati

bhakṣyamāṇe tathaivāṅge bhidyamāne ca dāruṇam /
chidyamāne cirataraṃ janturduḥ khamavāpnute

svena karmavi pākena dehāntaragato 'pi san /
purāṇi ṣoḍaśāmuṣmanmārge tāni ca me śṛṇu

yāmyaṃ sauripuraṃ nagedvabhavanaṃ gandharvaśailāgamau krauñcaṃ krūrapuraṃ vicitrabhavanaṃ bahvāpadaṃ duḥ khadam /
nānākrandapuraṃ sutaptabhavanaṃ raudraṃ payovarṣaṇaṃ śītāḍhyaṃ bahubhītiṣoḍaśapurāṇyetānyadṛṣṭani te

tatra yāmya puraṃ gacchanputraputreti ca bruvan /
hāheti krandate nityaṃ svakṛtaṃ duṣkṛtaṃ smaran

aṣṭādaśodine tārkṣya tatpura prāpnuyādasau /
puṣpabhadrā nadī yatra nyagrodhaḥ priyadarśanaḥ

viśrāmecchāṃ karotyatra kārayanti na te bhaṭāḥ /
kṣitau dattaṃ sutaistasya snehādvā kṛpayā tathā

māsikaṃ piṇḍamaśnāti tataḥ sauripuraṃ vrajet /
vrajannevaṃ pralapate mudgarāhatipīḍitaḥ

jalāśayo naiva kṛto mayā tadā manuṣyatṛptyai paśupakṣitṛptaya /
gotṛptihetorna ca gocaraḥ kṛtaḥ śarīra he nistara yattvayā kṛtam

tatra nāmnā tu rājāsau jaṅgamaḥ kāmarūpadhṛk /
bhayāt taddarśanājjātādbhuṅkte piṇḍaṃ sa śaṅkitaḥ

tripakṣe jalasaṃyuktaṃ kṣitau dattaṃ tato vrajet /
vrajannevaṃ pralapate khaḍgāghātaprapīḍitaḥ

na nityadānaṃ na gavāhnikaṃ kṛtaṃ pustaṃ ca dattaṃ na hi vedaśāstrayoḥ /
purāṇadṛṣṭo na hi sevito 'dhvā śarīra he nistara yattvayā kṛtam

nagendranagaraṃ gatvā bhuktvā cānnaṃ tathāvidham /
māsi dvitīye yaddattaṃ bāndhavaistu tato vrajet

vrajannevaṃ pralapate kṛpāṇatsarutāḍitaḥ /
parādhānamabhūtsarvaṃmama mūrkhaśiromaṇeḥ

mahatā puṇyayogena mānuṣyaṃ labdhavānaham /
tṛtīye māsi samprāpte gandharvanagare śubham

tṛtīyamāsikaṃ piṇḍaṃ tatra bhuktvā brajatyasau /
vrajannevaṃ vilapate tadagreṇāhataḥ pathi

mayā na dattaṃ na hutaṃ hutāśane tapo na taptaṃ himaśailagahvare /
na sevitaṃ gāṅgamaho mahājalaṃ śarīra he nistara yattvayā kṛtam

turye śailāgamaṃ māsi prāpnuyāttatra varṣaṇam /
tasyopari bhavetpakṣinpāṣāṇānāṃ nirantaram

caturthamāsikaṃ śrāddhaṃ bhuktvā tatra prasarpati /
sa patanneva vilapanpāṣāṇādyatipīḍitaḥ

na jñānamārgo na ca yogamārgo na karmamārgo na ca bhaktimārgaḥ /
na sādhusaṅgātkimapi śrutaṃ mayā śarīra he nistara yattvayā kṛtam

tataḥ krūrapura māsi pañcame yāti kāśyapa /
bhuvi dattaṃ piṇḍajalaṃ bhuktvā krūrapuraṃ vrajet

vrajannevaṃ vilapate paṭṭiśaiḥ pātitaḥ pathi /
hā mātarhāpitarbhrātaḥ sutā hā hā mama striyaḥ

yuṣmābhirnopadiṣṭo 'hamavasthāṃ prāpta īdṛśīm /
evaṃ lālapyamānaṃ te yamadūtā vadantihi

kva mātā kva pitā mūḍha kva jāyā kva sutaḥ suhṛt /
svakarmopārjite bhuṅkṣvaṃ mūrkha yātāściraṃ pathi

jānāsi śambalamalaṃ balamadhvagānāṃ no 'śambalaḥ prayatate paralokagatyai /
gantavyamasti tava niścitameva tena mārgeṇa yena na bhavet krayavikrayo 'pi

ūnaṣāṇmāsike krauñce bhuktvā piṇḍantu sodakam /
ghaṭīmātrantu viśramya vicitranagaraṃ vrajet

vrajannevaṃ vilapate śūlāgreṇa vidāritaḥ

kutra yāmi na hi gāmi jīvitaṃ hā mṛtasya maraṇaṃ punarna vai /
itthameva vilapan prayātyasau yātanārhadhṛtavigrahaḥ pati

vicitranagare tatra vicitro nāma pārithivaḥ /
tatra ṣaṇmāsapiṇḍena tṛptaḥ san vrajate puraḥ

vrajannevaṃ vilapate prāsāgreṇa prapīḍitaḥ

mātā bhrātā pitā putraḥ ko 'pi me vartate na vā /
yo māmuddharate pāpaṃ patantaṃ duḥ khasāgare

vrajatastatra mārge tu tatra vaitaraṇī śubhā /
śatayojanavistīrṇā pūyaśoṇitasaṃkulā

āyāti tatra dṛśyante nāvikā dhīvarādayaḥ /
te vadanti pradattā gauryadi vaitaraṇī tvayā /
nāvamenāṃ samāroha sukenottara vai nadīm

tatra yena pradattā gauḥ sa sukhenaiva tāṃ taret /
adāyī tatra ghṛṣyeta karagrāhantu nāvikaiḥ

ukhaiḥ kākairbakolūkaistīkṣṇatuṇḍairvitudyate /
manujānāṃ hitaṃ dānamante vaitaraṇī khaga

dattā pāpaṃ dahet sarvaṃ mama lokantu sā nayet /
maptame māsi samprāpte puraṃ bahvāpadaṃ mṛtaḥ

vrajettu sodakaṃ bhuktvā piṇḍaṃ vai saptamāsikam /
vrajannevaṃ vilapate parighāhatipīḍitaḥ

na dattaṃ na hutaṃ taptaṃ na snātaṃ na kṛtaṃ hitam /
yādṛśaṃ caritaṃ karma mūḍhātman bhuṅkṣva tādṛśam

māsyaṣṭame duḥ khade tu pare bhuktvātha sodakam /
piṇḍaṃ prayātsayau tārkṣya nānākrandapuraṃ tataḥ

prayāṇe ca pravadate musalāghātapīḍitaḥ /
kva jāyācaṭulaiścāṭupaṭubhirvacanairmama

bhojanaṃ bhallabhallībhirmusalaiśca kva māraṇam /
navame māsi dattaṃ vai nānākrandapure tataḥ

piṇḍamaśrāti karuṇaṃ nānākrandān karotyapi /
daśame māsi dattaṃ vai sutaptabhavanaṃ tataḥ

sarannevaṃ vilapate halāhatihataḥ pathi /
kva sūnupeśalakaraiḥ pādasaṃvāhanaṃ mama

kva dūtavajrapratimakairmatpadakarṣaṇam /
daśame māsi piṇḍādi tatra bhuktvā prasarpati

māse caikādaśe pūrṇe puraṃ raudraṃ sa gacchati /
gacchanneva vilapate yathā pṛṣṭhe prapīḍitaḥ

kvāhaṃ satūlīśayane parivartan kṣaṇe kṣaṇe /
bhaṭahastabhraṣṭayaṣṭikṛṣṭapṛṣṭhaḥ kva vā punaḥ

kṣitau dattañca piṇḍādi bhuktvā tatra tato vrajet /
payovarṣaṇamityetannāmakaṃ puramaṇḍaja

vrajannevaṃ vilapate kuṭhārairmūrdhni tāḍitaḥ /
kva bhṛtyakomalakarairgandhatailāvasecanam

kva kīnāśānugaiḥ krodhātkuṭhāraiḥ śirasi vyathā /
ūnābdikañca yacchrāddhaṃ tatra bhuṅkte suduḥ khitaḥ

saṃpūrṇe tu tato varṣe śītāḍhyaṃ nagaraṃ vrajet /
gacchannevaṃ churikayā cchinnajihvastu roditi

priyālāpaiḥ kva ca sasamadhuratvasya varṇanam /
uktamātre 'sipatrādijihvācchedaḥ kva caiva hi

vārṣikaṃ piṇḍadānādi bhuktvā tatra prasarpati /
bahubhītikaraṃ tattat piṇḍajaṃ devamāsthitaḥ

prakāśayati pāppānamātmānañca vinindati /
yoṣidapyevametasmin mārge vai paridevati

tato yāmyaṃ nātidūre nagaraṃ sa hi gacchati /
catvāriṃśadyojanāni caturyuktānivistṛtam

trayodaśa pratīhārāḥ śravaṇā nāma tatra vai /
śravaṇākarmatastuṣyantyanyathā krodhamāpnuyuḥ

tatastatrāśu raktākṣaṃ bhinnāñjanacayopamam /
mṛtyukālāntakādīnāṃ madhye paśyati vai yamam

daṃṣṭrākarālavadanaṃ bhṛkuṭīdāruṇākṛtim /
virūpairbhoṣaṇairvaktrairvṛtaṃ vyādhiśataiḥ prabhum

daṇḍāsaktamahābāhuṃ pāśahastaṃ subhairavam /
tannirdiṣṭāṃ tato janturgatiṃ yāti śubhāśubhām

pāpī pāpāṃ gatiṃ yāti yathā te kathitaṃ purā /
chatropānahadātāro ye ca veśmapradāyakāḥ

ye tu puṇyakṛtastatra te paśyanti yamaṃ tadā /
saumyākṛtiṃ kuṇḍalinaṃ maulimantaṃ dhṛtaśriyam

ekādaśe dvādaśe hi ṣaṇmāse ābdike tathā /
viprān bahūn bhojayet tatra yanmahatī kṣudhā

jīvan putrakalatrādipradiṣṭamitaraiḥ khaga /
yo na sādhayati svārthamevaṃ paścāddhikhidyate

etat te sarvamākhyātaṃ saṃyaminyāṃ yathāgati /
proktamāvarṣakṛtyaṃ te kimanyacchrotumicchasi