Scripture Library

Garuda Purana · Chapter 2.45

2.45.1

iti śrīgāruḍe mahāpurāṇe uttarakhaṇḍe dvitīyāṃśākhye dharmakāṇḍe pretakalpe śrīkṛṣṇagaruḍasaṃvāde durmaraṇe kāryākāryakriyādinirūpaṇaṃ nāma catuścatvāriṃśo 'dhyāyaḥ
śrīgaruḍamahāpurāṇam- 45
śrīviṣṇuruvāca /
pratyabdaṃ śrāddhamevaṃ te kathayāmi khageśvara /
pratyabdaṃ pārvaṇenaiva kuryātāṃ kṣetrajorasau

2.45.2

vidhinācetarairevamekoddiṣṭaṃ na pārvaṇam

2.45.3

anagneśca sutau syātāmanagnī kṣetrajorasau /
ekoddiṣṭaṃ na kuryātāṃ pratyabdaṃ tau tu pārvaṇam

2.45.4

yadā tvanyataraḥ sāgniḥ putro vāpyathavā pitā /
pratyabdaṃ pārvaṇaṃ tatra kuryātāṃ kṣetrajaurasau

2.45.5

anagnayaḥ sāgnayo vā putrā vā pitaro 'pi vā /
ekoddiṣṭaṃ sutaiḥ kāryaṃ kṣayāha iti kecana

2.45.6

darśakāle kṣayo yasya pretapakṣe 'tha vā punaḥ /
pratyabdaṃ pārvaṇaṃ kāryaṃ tasya sarvaiḥ sutairapi

2.45.7

ekoddiṣṭamaputrāṇāṃ puṃsāṃ syādyopitāmapi /
ekoddiṣṭe kuśā grāhyāḥ samūlā yajñakarmaṇi /
bahirlūnāḥ sakṛllanāḥ śrāddhaṃ vṛddhimṛte sadā

2.45.8

kartavye pārvaṇe śrāddhe āśaucaṃ yadi jāyate /
āśaucāvagame kuryācchrāddhaṃ hi tadanantaram

2.45.9

ekoddiṣṭe tu samprāpte yadi vighnaḥ prajāyate /
māsenyasmin tithau tasyāṃ kuryācchrāddhaṃ tadaiva hi

2.45.10

tūṣṇīṃ śrāddhāntu śūdrasya bhāryāyāstatsutasya ca /
kanyāyāśca dvijātīnāmanupetadvijasya ca

2.45.11

ekakāle gatā sūnāṃ bahūnāmatha vā dvayoḥ /
tantreṇa śrapaṇaṃ kuryācchrāddhaṃ kuryāt pṛthakpṛthak

2.45.12

dadyāt pūrvaṃ mṛtasyādau dvitīyasya tataḥ punaḥ /
tṛtīyasya tataḥ kuryāt saṃnipāte tvayaṃ vidhiḥ (kramaḥ)

2.45.13

pratyabdamevaṃ yaḥ kuryādyathātathamatandritaḥ /
tārayitvā pitṝn sarvān prāpnoti paramāṃ gatim

2.45.14

na jñāyate mṛtāhaścet prasthānadinameva ca /
māsaścet syāt parijñātastaddarśe syānmṛtāhikam

2.45.15

yadā māso na vijñāto vijñātaṃ dinameva ca /
tadā mārgaśire māsi māghe vā taddinaṃ bhavet

2.45.16

dinamāsāvavijñātau maraṇasya yadā punaḥ /
prasthānadinamāsau tu grāhyau śrāddhe mayoditau

2.45.17

prasthānasyāpi na jñātau dinamāsau yadā punaḥ /
mṛtavārtāśrutau grāhyau pūrvaproktakrameṇa tu

2.45.18

pravāsamantareṇāpi syātāṃ tau vismṛtau yadā /
tadānīmapi tau grāhyau pūrvavat tu mṛtāhike

2.45.19

gṛhasthe proṣite yacca kaścittu mriyate gṛhe /
āsaucāpagame yatra prārabdhe śrāddhakarmaṇi

2.45.20

pratyāgataścejjānāti tatra vṛttaṃ gṛhī tathā /
āśaucaṃ gṛhiṇasteṣāṃ na dravyādestadā bhavet

2.45.21

putrādinā yadārabdhaṃ śrāddhaṃ tattvena vākhilam /
samāpanīyaṃ tatrāpi śrāddhaṃ gṛhītu dūrataḥ

2.45.22

dātrā boktrā ca na jñātaṃ sūtakaṃ mṛtakaṃ tathā /
ubhayorapi taddoṣaṃ nāropayati karhicit

2.45.23

yadā tvanyatarajñātaṃ sūtakaṃ mṛtakaṃ tathā /
bhoktureva tadā doṣo nānyo dātā praduṣyati

2.45.24

ityuktena prakāreṇa yaḥ kuryānmṛtavāsaram /
avijñātamṛtāhasya satataṃ tārayatyasau

2.45.25

nityaśrāddhe 'tha gandhādyairdvijānabhyarcya bhaktitaḥ /
sarvān pitṛgaṇān samyak sahaivoddiśya yojayet

2.45.26

āvāhanaṃ svadhākāro piṇḍāgnaukaraṇādikam /
brahmacaryādiniyamā viśvadevāstathaiva ca

2.45.27

nityaśrāddhe tyajedetān bhojyamannaṃ prakalpayet /
dattvā tu dakṣiṇāṃ śaktyā namaskārairvisarjayet

2.45.28

devānuddiśya viśvādīn yaddadyāddvijabhojanam /
tannityaśrāddhavat kāryaṃ devaśrāddhaṃ taducyate

2.45.29

mātṛśrāddhantu pūrveṇa karmādau paitṛkaṃ tathā /
uttare 'hani vṛddhau syānmātāmahagaṇasya tu

2.45.30

śrāddhatrayaṃ prakurrvīta vaiśvadevantutāntrikam

2.45.31

mātṛbhyaḥ kalpayetpūrvaṃ pitṛbhyastadanantaram /
mātāmahebhyaśca tathā dadyāditthaṃ krameṇa tu

2.45.32

mātṛśrāddhe tu viprāṇāmabhāve sukulodgatāḥ /
patiputrānvitāḥ sādhvyo yoṣito 'ṣṭau ca bhāvayet

2.45.33

iṣṭāpūrtādike śrāddhaṃ kuryādābhyudayaṃ tathā /
utpātādinimitteṣu nitya śrāddhavadeva tu

2.45.34

nityaṃ daivañca vṛddhiñca kāmyaṃ naimittikaṃ tathā /
śrāddhānyuktaprakāreṇa kurvan siddhimavāpnuyāt /
iti te kathitaṃ tārkṣya kimanyatparipṛcchasi

Original text: Garuḍapurāṇa · Edition: Bombay : Venkatesvara Steam Press (or a reprint thereof) · Data entry members of the Sansknet Project · GRETIL (Göttingen) · CC BY-NC-SA 4.0