Garuda Purana · Chapter 2.44

iti śrīgāruḍe mahāpurāṇe uttarakhaṇḍe dvitīyāṃśe dharmakāṇḍe pretakalpe śrīkṛṣṇagaruḍasaṃvāde śuddhinirūpaṇaṃ nāma tricatvāriṃśo 'dhyāyaḥ
śrīgaruḍamahāpurāṇam- 44
śrīviṣṇuruvāca /
svecchayā tārkṣya maraṇaṃ śṛṅgidaṃṣṭrisarīsṛpaḥ /
cāṇḍālādyātmaghātaiśca viṣādyaistāḍanaistathā

jalāgnipātavātaiśca nirāhārādibhistathā /
yeṣāmeva bhavenmṛtyuḥ proktāste pāpakarmiṇaḥ

pāṣaḍyanāśramāścaiva mahāpātakinastathā /
striyaśca vyabhicāriṇya ārūḍhapatitāstathā

na teṣāṃ syānnava śrāddhaṃ na saṃskāraḥ sapiṇḍanam /
śrāddhāni ṣoḍaśoktāni na bhavanti ca tānyapi

vetanaṃ yat kṣipedapsu gṛhyāgniśca catuṣpathe /
pātrāṇinirdahedagnau sāgnike pāpakarmaṇi

pūrṇe saṃvatsare teṣāmitthaṃ kāryaṃ dayālubhiḥ /
ekādaśīṃ samāsādya śuklapakṣe ca kāśyapa

viṣṇuṃ yamaṃ ca sampūjya gandhapuṣpākṣatādibhiḥ /
daśa piṇḍān ghṛtāktāṃśca darbheṣu madhusaṃyutān

yajñopavīti satilān dhyāyan viṣṇuṃ yamaṃ tathā /
dakṣiṇābhimukhastūṣṇīmekaikaṃ nirvapet tutān

uddhṛtya miśritān paścāt tīrthe 'bhmaḥ su viniḥ kṣipet /
kṣipan saṃkīrtayennāma gotraṃ ca mṛtakasya ca

punarapyarcayedviṣṇuṃ yamaṃ kusumacandanaiḥ /
dhūpadīpaiḥ sanaivedyairbhakṣyabhojyasamanvitaiḥ

tasminnupavasedahni viprāṃśceva nimantrayet /
kulavidyātapoyuktān sādhuśīlasamanvitān

nava saptāthavā pañca svasāmarthyānusārataḥ /
apare 'hani madhyāhne yamaṃ viṣṇuṃ tathārcayet

udaṅmukhāṃstathā viprāṃstān samyagupaveśayet /
āvāhanārghadānādau viṣṇuṃ yamasamanvitam

yajñopavītī kurvīta pretanāma prakīrtayet /
pretaṃ yamaṃ ca viṣṇuṃ ca smaran śrāddhaṃ samāpayet

anyebhyaścāpi sarvebhyaḥ piṇḍadānārthamuddharet /
pṛthagvā daśa piṇḍāṃśca pañca dadyāt krameṇa tu

prathamaṃ viṣṇave dadyādbrahmaṇe ca śivāya ca /
sabhṛtyāya śivāyātha pretāyāpi ca pañcamam

nāma gotraṃ smaret tasya viṣṇuśabdaṃ prakīrtayet /
namaskāraśiraskantu pañcamaṃ piṇḍamuddharet

gobhūmipiṇḍadānādyaiḥ śaktyā pretaṃ smaraṃśca tam /
tilaistilāṃstu viprāṇāṃ darbhayukteṣu pāṇiṣu

dadyādannaṃ dvijānāṃ ca tāmbūlaṃ dakṣiṇāṃ tathā /
evaṃ śiṣṭatamaṃ vipraṃ hariṇyena prapūjayet

nāma gotraṃ smaran dadyādviṣṇuprītostviti bruvan /
anuvrajya dvijān paścāt tyaktāmbho dakṣiṇāmukhaḥ

kīrtayannāmagotre tu bhuvi prītostviti kṣipet /
mitrabandhujanaiḥ sārdhaṃ śeṣaṃ bhuñjīta vāgyataḥ /
pratisaṃvatsarādi syādekoddiṣṭavidhānataḥ

evaṃ kṛte gamiṣyanti svarlokaṃ pāpakarmiṇaḥ /
sapiṇḍīkaraṇādau tu kṛte caivāpnuvantite

atha kaścit pramādena mriyate hyudakādibhiḥ /
saṃsārapramukhastasya sarvaṃ kuryādyathāvidhi

pramādādicchayā martyo na gacchetsarpasaṃmukhaḥ /
pakṣayorubhayornāgaṃ pañcamīṣu prapūjayet

kuryāt piṣṭamayīṃ lekhāṃ nāgānāmākṛtiṃ bhuvi /
arcayet tāṃ sitaiḥ puṣpaiḥ sugandhaiścandanenaca

pradadyāddhūpadīpantu taṇḍulāṃśca sitān kṣipet /
āmapiṣṭaṃ tathaivānnaṃ kṣīrañca vinivedayet

upasthāya vadedevaṃ muñcan mudrāṃśukāni ca /
madhuraṃ taddine 'śrīyāddevaśrāddhaṃ samāpayet

sauvarṇaṃ śaktito nāgaṃ tato dadyāddvijottame /
dhenuṃ dattvā tato brūyāt prīyatāṃ nāgarāḍiti

yathāvibhavyaṃ kurvīta karmāṇyanyāni pūrvavat /
svaśākhoktavidhānena itthaṃ kuryādyathātatham /
pretatvānmocayet tāṃstu svargamārgaṃ nayet ca